« មេរៀនទី ១៤១—គោលលទ្ធិ និងសេចក្តីសញ្ញា ១៣២ ៖ ការមានប្រពន្ធច្រើន » សៀវភៅសិក្សាព្រះគម្ពីរគោលលទ្ធិ និងសេចក្ដីសញ្ញាសម្រាប់គ្រូបង្រៀនថ្នាក់សិក្ខាសាលា ( ឆ្នាំ ២០២៥ )
« គោលលទ្ធិ និងសេចក្តីសញ្ញា ១៣២ » សៀវភៅសិក្សាព្រះគម្ពីរគោលលទ្ធិ និងសេចក្ដីសញ្ញាសម្រាប់គ្រូបង្រៀនថ្នាក់សិក្ខាសាលា
មេរៀនទី ១៤១ ៖ គោលលទ្ធិ និងសេចក្តីសញ្ញា ១២៩–១៣២
គោលលទ្ធិ និងសេចក្ដីសញ្ញា ១៣២:១–២, ៣៤–៦៦
ការមានប្រពន្ធច្រើន
ទោះបីជាក្រឹត្យវិន័យដ៏ចាំបាច់របស់ព្រះអំពីអាពាហ៍ពិពាហ៍គឺរវាងបុរសម្នាក់ និងស្ត្រីម្នាក់ក៏ដោយ ( សូមមើល យ៉ាកុប ២:២៧, ៣០ ) ក៏មានពេលខ្លះ ទ្រង់បានបញ្ជាបុត្រាបុត្រីរបស់ទ្រង់មួយចំនួនឲ្យអនុវត្តការមានប្រពន្ធច្រើនដែរ ។ នៅអំឡុងពេលដំបូងនៃការស្ដារសាសនាចក្រឡើងវិញជាពេលមួយក្នុងចំណោមអំឡុងពេលនៃករណីលើកលែង ។ ព្រះអម្ចាស់បានបញ្ជាឲ្យព្យាការី យ៉ូសែប ស្ម៊ីធ អនុវត្តការមានប្រពន្ធច្រើន និងបង្រៀនគោលការណ៍នេះដល់អ្នកដទៃ ។ មេរៀននេះអាចជួយសិស្សឲ្យយល់កាន់តែច្បាស់អំពីព្រះបញ្ញត្តិរបស់ព្រះអម្ចាស់ ដែលឲ្យពួកបរិសុទ្ធមួយចំនួនអនុវត្តការមានប្រពន្ធច្រើននៅសាសនាចក្រសម័យមុន ។
សកម្មភាពរៀនសូត្រដែលអាចមាន
បទបញ្ញត្តិដែលពិបាកៗ
ប្រធាន រ័សុល អិម ណិលសុន បានបង្រៀន ៖
ព្រះបានតែងតែសុំឲ្យបុត្រាបុត្រីរបស់ទ្រង់ដែលធ្វើសេចក្ដីសញ្ញាធ្វើកិច្ចការដ៏លំបាកៗ ។ ( រ័សុល អិម ណិលសុន « Stand as True Millennials » Ensign ខែ តុលា ឆ្នាំ ២០១៦ ទំព័រ ២៧ )
-
តើឧទាហរណ៍អ្វីខ្លះនៃរឿងពិបាកៗដែលព្រះបានបង្គាប់ឲ្យបុត្រាបុត្រីរបស់ទ្រង់ធ្វើ ?
-
ហេតុអ្វីអ្នកគិតថា ពេលខ្លះព្រះបញ្ជាឲ្យបុត្រាបុត្រីក្នុងសេចក្ដីសញ្ញារបស់ទ្រង់ធ្វើកិច្ចការលំបាកៗ ?
ជាផ្នែកមួយនៃការពិភាក្សានេះ អ្នកអាចអាន អ័ប្រាហាំ ៣:២៣–២៥ ។ អ្នកក៏អាចបង្ហាញវីដេអូនេះបានផងដែរ « Is It Hard to Be the Prophet? » ( ១:៥៤ ) មាននៅលើគេហទំព័រ ChurchofJesusChrist.org ។
នៅក្នុងគ្រាកាន់កាប់ត្រួតត្រារបស់យើង ព្រះអម្ចាស់បានបង្គាប់ឲ្យព្យាការី យ៉ូសែប ស្ម៊ីធ ធ្វើកិច្ចការលំបាកៗជាច្រើន ។ បទបញ្ញត្តិដ៏លំបាកមួយដែលព្រះបានប្រទានដល់ យ៉ូសែប ស្ម៊ីធ គឺដើម្បីបង្កើតនូវការអនុវត្តនៃការមានប្រពន្ធច្រើន ដែលស្គាល់ផងដែរថាជាពហុពន្ធភាពនៅសាសនាចក្រសម័យមុន ។
សូមពន្យល់ថា ការមានប្រពន្ធច្រើនសំដៅទៅលើការរៀបអាពាហ៍ពិពាហ៍របស់បុរសម្នាក់ និងស្ត្រីលើសពីម្នាក់ ។ សូមជួយសិស្សឲ្យយល់ថា វាជារឿងធម្មតាទេក្នុងការប្រឆាំងនឹងអារម្មណ៍ច្របូកច្របល់ ឬមានសំណួរអំពីការអនុវត្តនេះ ។ សូមពិចារណាផ្តល់ពេលវេលាឲ្យសិស្សសរសេរសំណួរនានានៅក្នុងសៀវភៅកំណត់ហេតុការសិក្សារបស់ពួកគេ ។
វាជាការល្អសម្រាប់សិស្សដើម្បីស្វែងរកចម្លើយផ្ទាល់ខ្លួនរបស់ពួកគេ ។ សូមអញ្ជើញពួកគេឲ្យយកចិត្តទុកដាក់ទៅលើការណែនាំដែលពួកគេទទួលបានតាមរយៈព្រះវិញ្ញាណបរិសុទ្ធ នៅពេលពួកគេសិក្សា ។ តួនាទីរបស់អ្នកក្នុងនាមជាគ្រូបង្រៀន គឺមិនត្រូវឆ្លើយសំណួររបស់សិស្សទាំងអស់នោះទេ ។ វាមិនអីទេក្នុងការនិយាយថា អ្នកមិនមានចម្លើយទេ ។ អ្នកអាចបង្ហាញថា ទោះជាគ្មានចម្លើយទាំងអស់ក៏ដោយ ក៏យើងអាចឈានទៅមុខដោយសេចក្ដីជំនឿលើព្រះយេស៊ូវគ្រីស្ទបានដែរ ។
ការណែនាំរបស់ព្រះអម្ចាស់អំពីការមានប្រពន្ធច្រើន
ខណៈកំពុងបកប្រែព្រះគម្ពីរប៊ីប ព្យាការី យ៉ូសែប ស៊្មីធ អានអំពីពួកអ្នកបម្រើមួយចំនួនរបស់ព្រះដែលរៀបការមានភរិយាលើសពីម្នាក់ ។ ដើម្បីស្វែងយល់អំពីអ្វីដែល យ៉ូសែប បានទូលសួរព្រះ សូមអាន គោលលទ្ធិ និងសេចក្ដីសញ្ញា ១៣២:១ ។ បន្ទាប់មក សូមអាន ខទី ២ និង ៣៤–៣៧ ដោយស្វែងរករបៀបដែលព្រះអម្ចាស់បានឆ្លើយតបទៅនឹងសំណួររបស់ព្យាការី ។
-
តើអ្វីទៅជាសេចក្ដីពិតដែលអ្នករៀនចេញពីខគម្ពីរទាំងនេះ អំពីពេលដែលការមានប្រពន្ធច្រើនគឺអាចទទួលយកបានចំពោះព្រះអម្ចាស់ ?
សូមអញ្ជើញសិស្សឲ្យបង្ហាញអំពីអ្វីដែលពួកគេកំពុងរៀន ហើយជួយពួកគេឲ្យស្វែងរកសេចក្ដីពិតដែលថា ព្រះអម្ចាស់ទទួលយកការអនុវត្តនៃការមានប្រពន្ធច្រើន តែនៅពេលទ្រង់បញ្ជាឲ្យធ្វើវាប៉ុណ្ណោះ ។
នៅក្នុងព្រះគម្ពីរមរមន យើងរៀនថា ពួកសាសន៍នីហ្វៃមួយចំនួនបានចាប់ផ្ដើមការមានប្រពន្ធច្រើនប្រឆាំងនឹងព្រះរាជបំណងរបស់ព្រះ ។ ពួកគេនិយាយដោះសារថា សកម្មភាពរបស់ពួកគេផ្អែកលើដំណើររឿងក្នុងព្រះគម្ពីរ ចេញពីព្រះគម្ពីរសញ្ញាចាស់ ( សូមមើល យ៉ាកុប ២:២៣–២៤; សូមមើលផងដែរ គោលលទ្ធិ និងសេចក្ដីសញ្ញា ១៣២:៣៨–៣៩ ) ។ ព្រះអម្ចាស់បានថ្កោលទោសចំពោះទង្វើទាំងនេះ ហើយបានបង្រៀនពួកសាសន៍នីហ្វៃអំពីបទដ្ឋានរបស់ទ្រង់ស្តីពីអាពាហ៍ពិពាហ៍ ។
សូមអាន យ៉ាកុប ២:២៦–២៧, ៣០ ដោយស្វែងរកការបង្រៀនរបស់ព្រះអម្ចាស់ទៅដល់ពួកសាសន៍នីហ្វៃ ។
-
តើខគម្ពីរទាំងនេះបានបន្ថែមអ្វីខ្លះ ទៅលើការយល់ដឹងរបស់អ្នកអំពីការមានប្រពន្ធច្រើន ?
ប្រសិនបើចាំបាច់ សូមជួយសិស្សឲ្យយល់ថា អាពាហ៍ពិពាហ៍រវាងបុរសម្នាក់ និងស្ត្រីម្នាក់គឺជាក្រឹត្យវិន័យដ៏ចាំបាច់របស់ព្រះស្តីពីអាពាហ៍ពិពាហ៍ ។ ទោះជាយ៉ាងណាក៏ដោយ ជួនកាលព្រះបានបញ្ជាឲ្យអនុវត្តការមានប្រពន្ធច្រើនដែលជាករណីលើកលែងចំពោះក្រឹត្យវិន័យដ៏ចាំបាច់នេះ ។ ហេតុផលមួយដែលព្រះបានប្រទានឲ្យអនុវត្តការមានប្រពន្ធច្រើនគឺដើម្បី « ចិញ្ចឹមពូជមួយសម្រាប់ [ ទ្រង់ ] » ( យ៉ាកុប ២:៣០ ) ។
-
តើចំណេះដឹងនេះអាចជួយដល់សំណួរដែលអ្នកអាចមានអំពីការអនុវត្តនៃការមានប្រពន្ធច្រើននៅសាសនាចក្រសម័យមុនយ៉ាងដូចម្ដេច ?
ការមានប្រពន្ធច្រើនក្នុងចំណោមពួកបរិសុទ្ធជំនាន់ដើម
សិស្សអាចទទួលបានប្រយោជន៍មកពីឱកាសក្នុងការប្រើប្រភពដែលបានតែងតាំងដោយទេវភាព ដើម្បីយល់កាន់តែច្បាស់អំពីការអនុវត្តនៃការមានប្រពន្ធច្រើននៅសាសនាចក្រសម័យមុន ។
សូមពិចារណាចែកចាយសំណៅចែកដែលមានចំណងជើងថា « ដកស្រង់ចេញពី ‹ Plural Marriage in Kirtland and Nauvoo ( ការមានប្រពន្ធច្រើននៅទីក្រុងខឺតឡង់ និងទីក្រុងណៅវូ ) › » ។ អ្នកអាចសុំឲ្យសិស្សសិក្សាឯកសារទាំងនេះរៀងៗខ្លួន ឬក្នុងក្រុមតូចៗ ។ សូមអញ្ជើញពួកគេឲ្យស្វែងរកព័ត៌មានដែលអាចជួយឆ្លើយសំណួរដែលពួកគេអាចមាន ។
បន្ទាប់ពីសិស្សបញ្ចប់ការសិក្សាហើយ សូមផ្តល់ឱកាសឲ្យពួកគេចែកចាយនូវអ្វីដែលពួកគេបានរៀនដោយការសួរសំណួរដូចខាងក្រោមនេះ ៖
-
តើអ្នកបានរៀនអ្វីខ្លះចេញពីការសិក្សារបស់អ្នក ដែលអ្នកបានរកឃើញថាមានប្រយោជន៍ ?
-
តើ យ៉ូសែប ស្ម៊ីធ និងសមាជិកជំនាន់ដើមដទៃទៀតនៃសាសនាចក្រត្រូវបានបង្គាប់ឲ្យអនុវត្តការមានប្រពន្ធច្រើនបែបនេះដោយរបៀបណា ?
-
តើព្រះបានជួយពួកបរិសុទ្ធជាមួយនឹងបទបញ្ញត្តិដ៏លំបាកនេះយ៉ាងដូចម្ដេច ?
សូមជួយសិស្សឲ្យយល់ថា វាមិនអីទេ ប្រសិនបើពួកគេនៅតែមានសំណួរអំពីប្រធានបទនេះនោះ ។ វាជាបទបញ្ញត្តិដ៏លំបាកមួយសម្រាប់ពួកបរិសុទ្ធនៅសម័យដើមដើម្បីរស់នៅតាម ហើយវាអាចពិបាកនឹងយល់នៅពេលឥឡូវនេះ ។ ទោះជាយ៉ាងណាក៏ដោយ ការផ្តោតទៅលើសេចក្ដីពិតដ៏សំខាន់ដែលយើងដឹងអំពីព្រះវរបិតាសួគ៌ ព្រះយេស៊ូវគ្រីស្ទ និងដំណឹងល្អដែលបានស្ដារឡើងវិញ អាចជួយយើងឲ្យឈានទៅមុខក្នុងសេចក្ដីជំនឿបាន ។ អ្នកប្រហែលជាចង់ទទួលបានទីបន្ទាល់ផ្ទាល់ខ្លួន ហើយចែកចាយសេចក្តីថ្លែងការណ៍ដូចខាងក្រោមនេះ ៖
អែលឌើរ នែល អិល អាន់ឌើរសិន ក្នុងកូរ៉ុមនៃពួកសាវកដប់ពីរនាក់បានបង្រៀន ៖
រូបភាពអែលឌើរ នែល អិល អាន់ឌើរសិនសេចក្តីជំនឿពុំទាមទារនូវចម្លើយចំពោះគ្រប់សំណួរនោះទេ ប៉ុន្តែវាស្វែងរកការបញ្ជាក់ និងការលើកទឹកចិត្តឲ្យឈានឆ្ពោះទៅមុខ ទោះបីជាពេលខ្លះយើងអាចទទួលស្គាល់ថា « ខ្ញុំពុំចេះគ្រប់យ៉ាងនោះទេ ប៉ុន្តែខ្ញុំដឹងគ្រប់គ្រាន់ដើម្បីបន្តដើរនៅលើផ្លូវនៃភាពជាសិស្ស » ។ ( នែល អិល អាន់ឌើរសិន « Faith Is Not by Chance, but by Choice » Liahona ខែ វិច្ឆិកា ឆ្នាំ ២០១៥ ទំព័រ ៦៦ )
សង្ខេបអ្វីដែលអ្នកបានរៀន
ដើម្បីជួយសិស្សឲ្យបរិយាយនូវអ្វីដែលពួកគេបានរៀននៅថ្ងៃនេះ សូមពិចារណាណែនាំអំពីសាច់រឿងដូចខាងក្រោម ៖
សូមស្រមៃថា អ្នកមានការសន្ទនាជាមួយមិត្តភក្តិម្នាក់ដែលឆ្ងល់ថា តើ យ៉ូសែប ស្ម៊ីធ បានប្រឆាំងនឹងព្រះរាជបំណងរបស់ព្រះដែរឬអត់ នៅពេលដែលលោកបានបង្កើតការអនុវត្តនៃការមានប្រពន្ធច្រើននៅក្នុងសាសនាចក្រ ។ សូមចំណាយពេលមួយភ្លែតដើម្បីគូសបញ្ជាក់ចំណុចមួយចំនួននៅក្នុងសៀវភៅកំណត់ហេតុរបស់អ្នក ដែលអ្នកអាចចែកចាយជាមួយមិត្តភក្តិរបស់អ្នកដោយសេចក្ដីសប្បុរស និងការអត់ធ្មត់ ។
បន្ទាប់ពីសិស្សមានឱកាសសរសេរនៅក្នុងសៀវភៅកំណត់ហេតុរបស់ពួកគេហើយ អ្នកអាចសួរថា តើមានសិស្សណាម្នាក់ចង់ចែកចាយអ្វីដែលពួកគេបានសរសេរដែរឬទេ ។ នេះក៏អាចជាពេលដ៏ល្អមួយសម្រាប់សិស្សដើម្បីបង្ហាញចម្លើយណាមួយដែលពួកគេអាចរកឃើញចំពោះសំណួរ ឬកង្វល់របស់ពួកគេផ្ទាល់មួយចំនួនផងដែរ ។
សូមពិចារណាថ្លែងទីបន្ទាល់ទៅសិស្សថា នៅពេលដែលពួកគេអនុវត្តសេចក្តីជំនឿលើព្រះយេស៊ូវគ្រីស្ទ ហើយបែរទៅរកព្រះវរបិតារបស់ពួកគេនៅស្ថានសួគ៌ដើម្បីទទួលបានជំនួយ នោះទ្រង់នឹងជួយពួកគេចំពោះឧបសគ្គ ឬសំណួរដែលពួកគេប្រឈមមុខក្នុងជីវិតរបស់ពួកគេផ្ទាល់ ។