“141-р хичээл—Сургаал ба Гэрээ 132: Олон эхнэртэй гэрлэлт,” Сургаал ба Гэрээний семинарын багшийн гарын авлага (2025)
“Сургаал ба Гэрээ 132,” Сургаал ба Гэрээний семинарын багшийн гарын авлага
141-р хичээл: Сургаал ба Гэрээ 129–132
Сургаал ба Гэрээ 132:1–2, 34–66
Олон эхнэртэй гэрлэлт
Бурханы гэрлэлтийн хүчинтэй хууль нь нэг эрэгтэй, нэг эмэгтэйн хооронд байдаг хэдий ч (Иаков 2:27, 30-ийг үзнэ үү) Тэрээр зарим хүүхдэдээ олон эхнэр авах ёсыг хэрэгжүүлэхийг хэд хэдэн удаа зарлиглаж байсан. Сэргээгдсэн Сүм байгуулагдсан эхний жилүүд бол тэрхүү онцлог үеүдийн нэг юм. Их Эзэн бошиглогч Иосеф Смитэд олон эхнэр авах ёсыг хэрэгжүүлж, уг зарчмыг бусдад заахыг зарлигласан. Энэ хичээл Сүм байгуулагдсан эхэн үед Их Эзэний зарим гэгээнтэнд өгсөн олон эхнэр авах ёсыг хэрэгжүүлэх зарлигийг илүү сайн ойлгоход суралцагчдад тусална.
Боломжит суралцах үйл ажиллагаа
Дагахад хэцүү зарлигууд
Ерөнхийлөгч Рассэлл М.Нэлсон ийн заасан.
Бурхан Өөрийн гэрээт хүүхдүүдээс хэцүү хүнд зүйлийг хийлгэхийг үргэлж хүсэж ирсэн. (Russell M. Nelson, “Stand as True Millennials,” Ensign, Oct. 2016, 27)
-
Бурхан хүүхдүүдээ хийгээсэй гэж хүсдэг хэцүү зүйлсийн зарим жишээ юу вэ?
Шаардлагатай бол суралцагчдад эргэцүүлэн бодох судрын цөөн хэдэн түүхийг хэлж өг. Жишээнүүд нь Абрахамаас Исаакыг золиослохыг хүссэн (Эхлэл 22:1–2, 10-ыг үзнэ үү), Мариа Есүс Христийн эх байх дуудлагыг хүлээн авсан (Лук 1:26–38-ыг үзнэ үү), Есүс Христ бүх хүн төрөлхтний төлөө зовж шаналж, цагаатгалыг хийсэн (Матай 26:39-ийг үзнэ үү) зэрэг байж болно. Эдгээр үйл явдлыг харуулсан зургуудыг үзүүлэх талаар бодож үз.
-
Яагаад Бурхан заримдаа хүүхдүүдээрээ хэцүү зүйлийг хийлгэхийг хүсдэг гэж та бодож байна вэ?
Энэ ярилцлагын нэг хэсэг болгон Абрахам 3:23–25-ыг та уншиж болно. Та мөн ChurchofJesusChrist.org дээрх “Бошиглогч байх хэцүү юу?” (1:54) бичлэгийг үзүүлж болно.
Бидний эрин үед Их Эзэн бошиглогч Иосеф Смитээс олон хэцүү зүйлийг хийлгэхийг хүссэн. Сүм байгуулагдсан эхэн үед Бурхан Иосеф Смитэд олон эхнэр авах ёсыг тогтоох нэгэн хүнд зарлигийг өгчээ.
Олон эхнэртэй гэрлэлт нь нэг эрэгтэй хүн олон эмэгтэйтэй гэрлэхийг хэлж байгааг тайлбарла. Энэ зан үйлийн талаар эргэлзээ төрж, асуулттай байх нь хэвийн зүйл гэдгийг ойлгоход суралцагчдад тусал. Судлах тэмдэглэлдээ тэдэнд байгаа асуултуудаа бичиж тэмдэглэх цагийг суралцагчдад гаргаж өгч болно.
Суралцагчид хариултаа өөрсдөө эрэлхийлэх нь тустай. Тэднийг судлах явцдаа Ариун Сүнсээр дамжуулан хүлээн авах удирдамжид анхаарлаа хандуулахад урь. Багшийн хувьд таны үүрэг нь суралцагчдын бүх асуултад хариулах явдал биш юм. Хариултыг нь мэдэхгүй гэж хэлж болно. Бидэнд бүх хариулт байхгүй ч Есүс Христэд итгэх итгэлээр урагшлах боломжтой гэдгийг та харуулж болно.
Олон эхнэртэй гэрлэлтийн талаарх Их Эзэний заавар
Бошиглогч Иосеф Смит Библийг орчуулж байхдаа нэгээс олон эхнэртэй гэрлэж байсан Бурханы зарим үйлчлэгчийн талаар уншсан. Иосеф Бурханаас юу асуусныг олж мэдэхийн тулд Сургаал ба Гэрээ 132:1-ийг унш. Дараа нь 2, 34–37-р шүлгүүд-ийг уншаад, Их Эзэн бошиглогчийн асуултад хэрхэн хариулсныг олж мэд.
-
Их Эзэнд олон эхнэр авах ёс хүлээн зөвшөөрөгдсөн үеийн тухай та эдгээр шүлгээс ямар үнэнийг олж мэдсэн бэ?
Их Эзэн олон эхнэртэй гэрлэлтийг зөвхөн Өөрөө зарлигласан үедээ хүлээн зөвшөөрдөг гэсэн үнэнийг тодорхойлоход суралцагчдад тусалж, олж мэдсэн зүйлээ илэрхийлэхэд тэднийг урь.
Мормоны Номоос бид зарим нифай хүн Бурханы хүслийн эсрэг олон эхнэр авах ёсыг эхлүүлсэн гэдгийг олж мэдсэн. Тэд өөрсдийн үйлдлийг Хуучин Гэрээн дэх судрын түүхээс үндэслэсэн хэмээн зөвтгөсөн (Иаков 2:23–24-ийг; Сургаал ба Гэрээ 132:38–39-ийг мөн үзнэ үү). Их Эзэн эдгээр үйлдлийг буруушааж, гэрлэлтэд тавьдаг Өөрийн жишгийг нифайчуудад заасан.
Иаков 2:26–27, 30-ийг уншаад, нифайчуудад заасан Их Эзэний сургаалуудыг олж мэд.
-
Эдгээр шүлэг нь олон эхнэртэй гэрлэлтийн талаарх ойлголтыг тань хэрхэн нэмэгдүүлж байна вэ?
Шаардлагатай бол нэг эрэгтэй, нэг эмэгтэй хүний хоорондын гэрлэлт нь Их Эзэний гэрлэлтийн тухай хүчинтэй хууль гэдгийг ойлгоход суралцагчдад тусал. Гэсэн хэдий ч Бурхан тухайн үедээ олон эхнэр авах ёсыг энэ хуулийн онцгой тохиолдол болгон зарлигласан. Бурханы олон эхнэр авах зарлигийг өгсөн нэг шалтгаан нь “[Түүнд] үр удмыг өсгөх” (Иаков 2:30) явдал юм.
-
Энэ мэдлэг Сүм байгуулагдсан эхэн үед олон эхнэртэй гэрлэлтийн талаарх асуултуудад тань хэрхэн тус болж болох вэ?
Эхэн үеийн гэгээнтнүүд дунд хэрэгжсэн олон эхнэр авах ёс
Суралцагчид Сүм байгуулагдсан эхэн үед хэрэгжиж байсан олон эхнэр авах ёсны талаар илүү сайн ойлгохын тулд тэнгэрээс томилогдсон эх сурвалжуудыг ашиглах боломжтой.
“Excerpts from ‘Plural Marriage in Kirtland and Nauvoo’” хэмээх гарчигтай тараах материалыг тарааж өгөх талаар бодож үз. Та суралцагчдаас эдгээр материалыг бие дааж эсвэл жижиг бүлгүүдээр хийж гүйцэтгэхийг хүсэж болно. Тэдэнд байгаа асуултуудад хариулахад тус болох мэдээллийг олж мэдэхэд тэднийг урь.
Суралцагчдыг судалж дуусах үед дараахтай төстэй асуултуудыг тавих замаар сурч мэдсэн зүйлээ хуваалцах боломж тэдэнд олго.
-
Та судлах явцдаа тус болох юу сурч мэдсэн бэ?
-
Иосеф Смитээс болон Сүм байгуулагдсан эхэн үеийн бусад гишүүнээс олон эхнэр авахыг хүсэх үед тэдэнд ямар байсан бол?
-
Бурхан энэ хэцүү зарлигт гэгээнтнүүдэд хэрхэн тусалсан бэ?
Энэ сэдвийн талаар асуулттай байх нь хэвийн зүйл гэдгийг ойлгоход суралцагчдад тусал. Уг зарлигийн дагуу амьдрахад эхэн үеийн гэгээнтнүүдэд хэцүү байсан ба одоо үүнийг ойлгох хэцүү байж болно. Гэсэн хэдий ч Тэнгэрлэг Эцэг, Есүс Христ, сэргээгдсэн сайн мэдээний тухай бидний мэддэг чухал үнэнд анхаарлаа хандуулах нь итгэлтэй урагшлахад бидэнд тусалж чадна. Та гэрчлэлээ хуваалцаж, дараахтай төстэй мэдэгдлийг хуваалцаж болно.
Арван хоёр төлөөлөгчийн чуулгын ахлагч Нийл Л.Андэрсэн ийн заасан.
Итгэл хэзээ ч асуулт бүрийн хариултыг шаарддаггүй бөгөөд заримдаа “би бүх зүйлийг мэдэхгүй ч гэсэн дагалдагчийн амьдралаар амьдрахад хангалттай зүйлийг мэднэ” гэсэн хандлагатайгаар урагш тэмүүлэх баталгаа, урам зоригийг эрэлхийлж байдаг. (Нийл Л.Андэрсэн, “Итгэлийг тохиолдлоор бус, сонголтоор олж авдаг,” 2015 оны 10-р сарын Ерөнхий чуулган, 55)
Юу сурснаа дүгнэх
Суралцагчдад сурсан зүйлээ илэрхийлэхэд туслахын тулд дараах жишээг танилцуулах талаар бодож үз.
Иосеф Смит Сүмд олон эхнэр авах ёсыг тогтоосон нь Бурханы хүслийн эсрэг байсан эсэхэд эргэлзэж буй нэг найзтайгаа ярилцаж байна гэж төсөөл. Найзтайгаа эелдэг, тэвчээртэй хуваалцаж болох зарим санааг тэмдэглэлдээ бичих цаг гарга.
Суралцагчдыг тэмдэглэлдээ бичиж дууссаны дараа, та цөөн хэдэн суралцагчаас бичсэн зүйлийнхээ тухай хуваалцахыг хүсэж болно. Энэ нь суралцагчдад зарим асуулт, эргэлзсэн зүйлдээ олсон хариултаа хуваалцах сайхан боломж байж болох юм.
Суралцагчид Есүс Христэд итгэх итгэлээ үйлдэл болгож, тусламж хүсэн, Тэнгэр дэх Эцэгт хандах үед Тэрээр амьдралд нь тулгарах сорилт, асуултуудад туслах болно гэдгийг гэрчлэх талаар бодож үз.