Leksiyon 147: Doktrina ug mga Pakigsaad 135–136

Doktrina ug mga Pakigsaad 135

Ang Pagkamartir ni Joseph Smith ang Propeta

Human sa pipila ka tuig nga pagdumala sa mga Santos, si Propeta Joseph Smith ug ang iyang igsoong lalaki nga si Hyrum napriso sa Carthage Jail. Niadtong Hunyo 27, 1844, miatake ang usa ka mangugubot ug nahimong martir ang duha ka lalaki. Kini nga leksiyon gidisenyo aron matabangan ang mga estudyante nga mapalig-on ang ilang pagpamatuod kang Joseph Smith isip Propeta sa Dios sa Pagpahiuli.

Posibleng mga Kalihokan sa Pagkat-on

“Ang Propeta ug Manalagna sa Ginoo”

Ikonsiderar ang pagpakita sa larawan ni Joseph Smith ug pagdapit sa mga estudyante nga ihanduraw nga paingon nila istoryahon ang usa ka tawo nga walay nahibaloan bahin niya. Hangyoa sila nga maghimog listahan sa upat o lima sa labing importanteng butang nga gihimo sa Ginoo para nato pinaagi ni Propeta Joseph Smith. Ang mosunod nga mga pangutana mahimong makatabang:

• Unsa ka lahi ang imong kinabuhi kon wala pa ang mga panalangin nga gihatag sa Ginoo kanato pinaagi ni Propeta Joseph Smith?

• Sa unsang paagi naimpluwensiyahan ang imong kahibalo ug relasyon sa Langitnong Amahan ug ni Jesukristo pinaagi kang Joseph Smith ug sa iyang propetikanhong buhat?

Ipasabot nga niini nga leksiyon, makat-onan sa mga estudyante ang bahin sa pagkamartir ni Joseph Smith ug kon unsay gihimo sa Ginoo pinaagi niya. Samtang magtuon sila, dapita silang magtinguha og mas maayong pagsabot kon sa unsang paagi sila gipanalanginan sa Ginoo pinaagi sa Propeta.

Ang dalan paingon sa Bilanggoan sa Carthage

Aron tabangan ang mga estudyante nga mangandam sa pagtuon sa Doktrina ug mga Pakigsaad 135, ikonsiderar ang pag-summarize niini nga mga parapo gamit ang kaugalingon nimong mga pulong.

Si Joseph Smith ug ang mga Santos nagpuyo nga malinawon didto sa Illinois sulod sa mga tulo ka tuig. Sa 1842, nakasinati na pod silag balik og pagsupak. Ang mga masinupakon diha sa Simbahan ug mga kaaway sa gawas sa Simbahan naghiusa sa pagbatok sa Propeta ug sa Simbahan. Pipila sa mga residente sa Illinois nagsugod na og kahadlok ug nasilag sa politikanhong impluwensya sa mga Santos. Ang uban nasina sa pag-uswag sa ekonomiya sa Nauvoo. Ang paglutos batok sa mga Santos resulta usab sa mga dili pagsinabtanay bahin sa lahi nga mga pagtulun-an, sama sa dinaghan nga kaminyoon, ang pipila niini sayop nga gipakita sa mga naapostasiya nga mga miyembro sa Simbahan. Sa ting-init sa 1844, migrabe pag-ayo ang pagsupak batok sa Simbahan.

Niadtong Hunyo 7, 1844, si William Law, kinsa nakaserbisyo isip Ikaduhang Magtatambag sa Unang Kapangulohan, ug ang ubang naapostasiya miimprinta sa unang isyu sa usa ka mantalaan nga gitawag og Nauvoo Expositor aron masuko ang publiko batok sa Propeta ug sa Simbahan. Si Joseph Smith ug ang kadaghanan sa konseho sa siyudad sa Nauvoo nagtuo nga ang mantalaan ang nagdala og kagubot ug mimando nga walaon ang Nauvoo Expositor. Kini nga mando nahiuyon sa balaod sa panahon ni Joseph Smith.

Ang pipila sa mga residente sa palibot nga lugar ang miprotesta sa mga Santos ug sa pagwala sa mantalaan. Gitambagan ni Gobernador Thomas Ford sa Illinois si Joseph Smith ug ang ubang miyembro sa Simbahan nga moadto sa lungsod sa Carthage ug legal nga resolbahon ang sitwasyon. Gisaaran niya sila nga panalipdan sila sa bug-os ug patas nga husay kon boluntaryo silang moadto. Bisan pa niini nga mga saad, kombinsido ang Propeta nga mamatay siya kon moadto siya (tan-awa sa Doktrina ug mga Pakigsaad 135:4). Bisan pa niana, niadtong Hunyo 24, 1844, mibiya si Joseph ug Hyrum Smith ug ang pipila pa mibiya sa Nauvoo padulong sa Carthage aron sulayan ug malikay ang mga Santos sa pagkabayolente sa manggugubot nga mga tawo.

Human sa pipila ka adlaw nga nabalhog sa Joseph ug Hyrum sa prisohan, miatake ang mangugubot nga mga tawo.

Ang pagmartir

Sa dili pa basahon sa mga estudyante ang mosunod nga mga tudling sa kasulatan, ikonsiderar ang paghangyo nila nga ipakigbahin ang bisan unsa nga nahibaloan na nila bahin sa pagkamartir ni Joseph ug Hyrum Smith.

Ang Doktrina ug mga Pakigsaad 135, orihinal nga namantala wala pay tulo ka bulan human sa pagkamartir, mihulagway sa unsay nahitabo. Basaha ang Doktrina ug mga Pakigsaad 135:1-2, nga mangita sa mga detalye bahin sa pagkamartir ug kon kinsay nakasaksi niini. (Kon gusto nimo og dugang detalye, basaha ang Doktrina ug mga Pakigsaad 135:4–7.)

• Unsay imong nadiskobrehan?

• Unsa kahay imong hunahunaon o bation kon nasaksihan nimo mismo kining ngil-ad kaayo nga hitabo?

Aron matabangan ang mga estudyante nga mahanduraw ang nahitabo, ikonsiderar ang pagpasalida sa bidyo nga “Joseph Smith—Prophet of the Restoration” ( gikan sa time code 0:00 hangtod 3:06) o “Joseph Smith—Prophet of the Restoration” (gikan sa time code 55:50 hangtod 59:51).

Kon kinahanglan, ipasabot nga usa si Elder John Taylor (1808–87) sa nakasaksi sa pagkamartir. Sa katapusan siya naayo gikan sa iyang mga samad nga nahiagoman anang adalaw ug mipadayon aron sa pagserbisyo isip ikatulong Presidente sa Simbahan ni Jesukristo sa mga Santos sa Ulahing mga Adlaw.

Basaha ang Doktrina ug mga Pakigsaad 135:3, nga mangita sa pipila sa mga paagi nga gipanalanginan kita sa Ginoo pinaagi ni Propeta Joseph Smith.

Ang Doktrina ug mga Pakigsaad 135:3 maoy usa ka tudling sa doktrinal nga kahanas. Ikonsiderar ang pagdapit sa mga estudyante sa pagmarka sa mga tudling sa doktrinal nga kahanas aron dali ra nila kining makita.

• Unsa nga mga kamatuoran ang makahuloganon para nimo? Ngano man?

Dapita ang mga estudyante nga ilista ang makahuloganong mga kamatuoran gikan sa bersikulo 3 diha sa pisara ug ipakigbahin ang ilang mga hunahuna bahin niini.

Mahimo silang mogamit og laing mga pulong, pero lagmit mailhan sa mga estudyante ang usa ka kamatuoran nga gawas lang kang Jesukristo, mas daghan og nahimo si Joseph Smith para sa kaluwasan sa kalibotan kay kang bisan kinsang tawo. Ikonsiderar ang pagsulat og kamatuoran nga sama niini diha sa pisara. Importante tingaling klarohon nga posible lamang ang kaluwasan pinaagi ni Jesukristo, ang Manluluwas sa tanang katawhan. Bisan pa niana, gihimo kini ni Jesukristo pinaagi ni Propeta Joseph Smith aron ipaabot ang mga panalangin sa Iyang Pag-ula ngadto sa mga anak sa Langitnong Amahan niini nga dispensasyon.

Ikonsidrar ang pagdapit sa mga estudyante sa paggahin og pipila ka panahon sa pagpamalandong sa kaimportante niini nga kamatuoran sa ilang kaugalingong kinabuhi.

Bisan og natapos na ang mortal nga kinabuhi ni Joseph Smith niadtong Hunyo 27, 1844, ang iyang buhat, pagpamatuod, ug impluwensiya nakatabang sa minilyong anak sa Langitnong Amahan nga moduol kang Jesukristo ug madawat ang mga panalangin sa kaluwasan.

“Iyang misyon ug iyang mga buhat”

Aron tabangan ang mga estudyante nga mas mailhan kon sa unsang paagi gigamit sa Langitnong Amahan ug ni Jesukristo si Joseph Smith aron mas maduol kita Kanila, ikonsiderar ang pagdapit sa mga estudyante nga himoon ang mosunod nga tulo ka lakang. Apil sa mga italic ang pipila ka ehemplo.

Dapita ang mga tigkat-on nga ipakigbahin ang: Aron makakat-on pa og dugang bahin sa pagdapit sa uban sa pagpakigbahin, tan-awa ang pagbansay nga nag-ulohang “Pagpamatuod kanunay ug dapita ang mga tigkat-on sa pagpakigbahin sa ilang mga pagbati, mga kasinatian, ug mga pagpamatuod.,” nga anaa sa Pagpalambo sa mga Kahanas sa Magtutudlo: Pagtudlo Pinaagi sa Espiritu. Ikonsiderar ang pagpraktis sa kahanas nga “Paghimo og mga pangutana nga motabang sa mga estudyante sa pagsulti sa ilang mga pagbati, mga kasinatian, ug pagpamatuod.”

1. Isulat ang “Ang Ginoo milihok pinaagi kang Joseph Smith” diha sa tunga sa panid sa imong journal sa pagtuon.

2. Sa palibot niini nga hugpong sa mga pulong, pagsulat o pagdrowing og 4-5 ka butang nga gitudlo o gihimo sa Langitnong Amahan ug ni Jesukristo pinaagi ni Joseph Smith. Kon posible, pag-apil og usa ka pakisayran nga kasulatan alang sa matag paagi. Pananglitan: “Ang Unang Panan-awon” (Joseph Smith—Kasaysayan 1:17–19).

3. Iapil ang imong mga hunahuna ug mga pagbati mahitungod kon sa unsang paagi ang usa ka butang nga imong gilista nga nakatabang nimo nga mas maduol ngadto sa Langitnong Amahan ug kang Jesukristo. Pananglitan: Pinaagi kang Joseph Smith mas nasabtan nako ang bahin sa Langitnong Amahan ug ni Jesukristo. Nahibalo ko nga tubagon sa Langitnong Amahan ang akong mga pag-ampo ug nga managlahing binuhat ang Langitnong Amahan ug si Jesukristo.

Kon kinahanglan sa mga estudyante og dugang mga ehemplo kon unsay isulat o idrowing, pwede nilang irebyo ang mosunod nga mga hilisgotan ug mga bersikulo: pagkapari (Doktrina ug mga Pakigsaad 13:1); ang Basahon ni Mormon (Doktrina ug mga Pakigsaad 17:5–6; 135:3); misyonaryo nga buhat (Doktrina ug mga Pakigsaad 4; 110:11); gahom sa pagselyo (Doktrina ug mga Pakigsaad 110:13–16).

Samtang namalandong ug nagsulat ang mga estudyante, pwede nimong ipatukar ang “Pagdayeg sa Tawo” (Mga Himno, no. 19). Ipasabot nga kining kantaha gisulat ni William W. Phelps human sa kamatayon sa Propeta isip paghinumdom kaniya.

Dapita ang mas daghang estudyante kutob sa mahimo sa pagpakigbahin sa ilang mga hunahuna kon sa unsang paagi sila gipanalangin sa Ginoo pinaagi ni Propeta Joseph Smith ug ikonsiderar ang paghimog listahan diha sa pisara. Samtang ipakigbahin sa mga estudyante ang ilang mga hunahuna ug mga pagbati sa hilisgotan, ikonsiderar ang pagpangutana sama sa “Mao pod ba ni nga panalangin ang gihunahuna sa uban? Naa ba moy gustong idugang sa atong panaghisgot?” o “Unsa kahay kalainan sa inyong kinabuhi kon wala ni nga panalangin?” Dapita ang mga estudyante sa pagpakigbahin sa daghang panalangin. Ikonsiderar usab ang pagpakigbahin sa imong mga hunahuna ug mga pagbati.

Sa pagtapos, pwede usab nimong ipakigbahin ang mosunod nga pamahayag ni Presidente M. Russell Ballard, Akting nga Presidente sa Korum sa Napulog Duha ka Apostoles. Si Presidente Ballard maoy apo sa tuhod ni Hyrum Smith.

Ato gayod kanunayng hinumdoman ang bili nga gibayran ni Joseph ug Hyrum Smith, dungan sa ubang daghang matinud-anong mga lalaki, mga babaye, ug mga kabataan, sa pag-establisar sa Simbahan aron ikaw ug ako makapahimulos sa daghang mga panalangin ug tanan niining pinadayag nga mga kamatuoran nga anaa kanato karon. Ang ilang kamatinud-anon dili gayud mahikalimtan! (M. Russell Ballard, “Kita Dili Ba Mopadayon sa Hilabihan ka Mahinungdanon nga Katuyoan?,” Liahona, Mayo 2020, 11)

• Kon adunay usa ka tawo nga gustong mas masabtan kon sa unsang paagi sila gipanalanginan sa Ginoo pinaagi ni Propeta Joseph Smith, unsay imong irekomendar nga himoon nila?

Pagsag-ulo

Pwede nimong tabangan ang mga estudyante sa pagsag-ulo sa pakisayran ug mahinungdanong hugpong sa mga pulong sa kasulatan sa Doktrina ug mga Pakigsaad 135:3 ug irebyo kini sa umaabot nga mga leksiyon. Ang mahinungdanong hugpong sa mga pulong sa kasulatan para niini nga tudling mao ang “Si Joseph Smith nakapatungha sa Basahon ni Mormon, diin siya mihubad pinaagi sa gasa ug gahom sa Dios.” Ang mga ideya alang sa mga kalihokan sa pagsag-ulo anaa sa mga materyal sa apendiks ubos sa “Mga Kalihokan sa Pagrebyo sa Doktrinal nga Kahanas.”

Dugang nga mga Kapanguhaan

Asa ko makakat-on pa og dugang bahin sa pagkamartir ni Joseph ug Hyrum Smith?

Kapitulo 43–44 sa Mga Santos: Ang Kasaysayan sa Simbahan ni Jesukristo sa mga Santos sa Ulahing mga Adlaw, vol. 1, Ang Sumbanan sa Kamatuoran, 1815–1846 naay detalyadong mga asoy sa mga hitabo nga nagtultol sa pagpatay kang Joseph ug Hyrum Smith ([2018], 592–627).

Paghimo og birtuwal nga paglibot sa Bilanggoan sa Carthage.

Unsaon nako pagtubag niadtong wala makasabot sa atong gibati kabahin kang Joseph Smith?

Si Presidente Gordon B. Hinckley (1910–2008) mitudlo:

Kita wala magsimba sa Propeta. Nagsimba kita sa Dios ang atong Mahangtoron nga Amahan ug sa nabanhaw nga Ginoong si Jesukristo. Apan atong giila ang Propeta; kita nagpaila kaniya; kita mitahod kaniya; mitamod kita kaniya isip usa ka instrumento diha sa mga kamot sa makagagahom sa pagpahiuli diha sa yuta ang karaan nga mga kamatuoran sa balaan nga ebanghelyo, uban sa pagkapari diin pinaagi ang awtoridad sa Dios gigamit diha sa mga kalihokan sa Iyang Simbahan ug alang sa pagpanalangin sa Iyang mga katawhan. (Gordon B. Hinckley, “Joseph Smith Jr.—Prophet of God, Mighty Servant,” Ensign, Dec. 2005, 4)

Unsaon nako pagpalambo ug pagpalig-on sa akong pagpamatuod ni Propeta Joseph Smith?

Si Elder Neil L. Andersen sa Korum sa Napulog Duha ka Apostoles miingon:

Ang pagpamatuod bahin ni Propeta Joseph Smith moabot nga lahi sa matag usa nato. Mahimong moabot kini samtang nagluhod kamo sa pag-ampo, naghangyo sa Dios sa pagmatuod nga siya tinuod nga propeta. Mahimong moabot kini samtang nagbasa kamo sa asoy sa Propeta bahin sa Unang Panan-awon. Usa ka pagpamatuod mahimong motuhop diha sa inyong kalag samtang magbalik-balik kamo og basa sa Basahon ni Mormon. Mahimong moabot kini samtang magpamatuod kamo bahin sa Propeta o samtang magbarog kamo sa templo ug makaamgo nga pinaagi ni Joseph Smith ang balaang gahom sa pagselyo gipahiuli sa yuta. Uban sa hugot nga pagtuo ug tinuod nga katuyoan, ang inyong pagpamatuod kang Propeta Joseph Smith malig-on. (Neil L. Andersen, “Joseph Smith,” Liahona, Nob. 2014, 30)

Dugang nga Kalihokan sa Pagkat-on

Doktrina ug mga Pakigsaad 135:4–6. Ang Basahon ni Mormon ug ang Doktrina ug mga Pakigsaad

Samtang ilhon sa mga estudyante ang mga kamatuoran gikan sa Doktrina ug mga Pakigsaad 135:3, mailhan tingali nila nga si Joseph Smith ang nagpatungha sa Basahon ni Mormon, Doktrina ug mga Pakigsaad, ug uban pang mga kasulatan alang sa atong kaayohan. Aron tabangan ang mga estudyante nga mas masabtan ang kaimportante niining balaang mga sinulat, dapita ang usa ka estudyante nga basahon ang Doktrina ug mga Pakigsaad 135:4–5, nga mangita kon unsang mga tudling gikan sa Basahon ni Mormon ang gibasa ni Hyrum Smith sa wala pa siya mamatay. Pangutan-a ang mga estudyante kon unsay ilang nadiskobrehan ug dapita silang ipakigbahin kon sa unsang paagi kini nga tudling nakahupay tingali kang Joseph ug Hyrum Smith.

Dapita ang mga estudyante nga basahon ang Doktrina ug mga Pakigsaad 135:6, nga mangitag rason kon nganong gipatungha ang Basahon ni Mormon ug ang Doktrina ug mga Pakigsaad. Tabangi ang mga estudyante nga mailhan ang kamatuoran nga sama sa mosunod: Ang Basahon ni Mormon ug ang Doktrina ug mga Pakigsaad gipatungha para sa kaluwasan sa kalibotan. Ikonsiderar ang pagpangutana og sama sa mosunod para sa panaghisgotan:

• Sa unsa nga mga paagi nga kining mga basahon makatabang sa pagdala sa kaluwasan sa kalibotan?

• Sumala sa bersikulo 6, nganong apil ang Basahon ni Mormon ug ang Doktrina ug Pakigsaad sa labing importanteng mga libro nga imong mabatonan?

Hangyoa ang mga estudyante nga pamalandongan ang kaimportante sa Basahon ni Mormon ug sa Doktrina ug mga Pakigsaad ug kon sa unsang paagi nahimong panalangin sa ilang kinabuhi ang matag basahon. Pwede nimo silang dapiton sa pagpakigbahin sa ilang paboritong tudling sa kasulatan sa bisan hain sa mga basahon. Pwede usab nimong ipasalida ang bidyo nga “Testimony of the Book of Mormon” (4:39) ni Elder Jeffrey R. Holland sa Korum sa Napulog Duha ka Apostoles.