Leksiyon 149: Doktrina ug mga Pakigsaad 135–136

Doktrina ug mga Pakigsaad 136: Ang Paglakaw Pakasadpan

Usa ka Panaw sa Pakigsaad paingon sa Walog sa Salt Lake

Niadtong Pebrero 1846, ang unang grupo sa mga Santos sa Ulahing mga Adlaw mibiya sa Nauvoo aron moadto sa wala mailhi nga kayutaan sa Kasadpan. Sa Winter Quarters, Nebraska, nadawat ni Presidente Brigham Young ang nailhan karon nga Doktrina ug mga Pakigsaad 136. Niini nga pagpadayag, misaad ang Manluluwas nga panalanginan ang mga Santos samtang matinud-anon nilang gituman ang ilang mga pakigsaad sa ilang pagpanaw pakasadpan. Kini nga leksiyon makatabang sa mga estudyante nga masabtan nga mopanalangin ang Langitnong Amahan kanila samtang naningkamot silang tumanon ang ilang pakigsaad sa pagsunod sa Iyang mga sugo.

Posibleng mga Kalihokan sa Pagkat-on

Taas ug lisod nga panaw

Sa pagsugod sa klase, ipakita ang larawan sa gitabonang karomata ug usa ka mapa nga wala pa maagii sukad. Dapita ang mga estudyante nga handurawon kon unsay ilang bation kon kinahanglan silang mobiyahe parehas sa gihimo sa unang mga Santos. Pwede nimong basahon o i-summarize ang mosunod nga parapo aron tabangan ang mga estudyante nga masabtan kon unsay gisakripisyo sa unang mga Santos aron tumanon ang sugo sa Ginoo nga mopanaw sila pakasadpan.

Kapin sa 60,000 ka mga Santos sa Ulahing mga Adlaw ang mipanaw gamit ang gitabonang karomata o kariton gikan sa Nauvoo paingon sa Salt Lake Valley tali sa 1846 ug 1868. Gidala sa mga pamilya kon unsay masulod sa gitabonang karomata o kariton. Ang uban wala na dalha. Dili masakyan ang mga karomata gawas kon sila masakit o maangol. Kadaghanan sa pamilya kinahanglang mobaktas og 1,200 milya (1,900 ka kilometro) gikan sa Nauvoo paingon sa Salt Lake Valley.

Alang sa pagsugod, ikonsiderar ang pagpakitag mapa sa inyong lugar ug markahi kon asa dapit ang 1,200 milya (1,900 ka kilometro).

• Unsa kahay imong gikabalak-an niini nga panaw?

• Sa unsang paagi ka tabangan sa Manluluwas nga makaya ang ingon niini nga klase sa panaw? Sa unsang paagi ka molihok uban ang hugot nga pagtuo Kaniya samtang nagpanaw?

Pwede nimong pangutan-on ang mga estudyante kon sa unsang paagi ang atong indibiduwal nga panaw sa kinabuhi susama sa paglakaw pakasadpan sa mga Santos. Agig dugang sa mga tubag sa mga estudyante, ihatag ang mosunod nga pamahayag gikan kang Presidente M. Russel Ballard:

Si Presidente M. Russell Ballard sa Korum sa Napulog Duha ka Apostoles mitudlo:

Bisan og angay ug importante nga hinumdoman ang makasaysayanong ika-19 nga siglo nga Mormon pioneer trek, kinahanglan natong hinumdoman nga “ang malisod nga panaw sa kinabuhi nagpadayon!” alang sa matag usa kanato samtang atong ipakita ang atong kaugalingong “hugot nga pagtuo sa matag lakang.” …

Ang malisod nga panaw balik ngadto sa atong Langitnong Amahan mao ang labing importante nga panaw sa atong kinabuhi, ug nagpadayon kini matag adlaw, matag semana, matag bulan, ug matag tuig samtang magkadako ang atong pagtuo Kaniya ug sa Iyang Hinigugma nga Anak, nga si Jesukristo. …

Pabilin sa dalan sa ebanghelyo pinaagi sa pagbaton og “hugot nga pagtuo sa matag lakang” aron kamo luwas nga makabalik ngadto sa presensya sa Langitnong Amahan ug ni Ginoong Jesukristo. (M. Russell Ballard, “Ang Malisud nga Panaw Nagpadayon!,” Liahona, Nob. 2017, 105–6).

• Unsay ganahan kaayo nimo gikan sa gitudlo ni Presidente Ballard?

Samtang magtuon ka karon, pamalandongi kon kumusta na ang imong panaw sa kinabuhi. Kumusta na ang imong pagpaduol sa Langitnong Amahan ug ni Jesukristo? Sa unsang paagi nimo nakita ang Ilang tabang niini nga panaw? Mainampoong pamalandongan ang imong pag-uswag ug kon unsay nakapalisod para nimo.

Dasiga ang mga estudyante nga tinguhaon ang tabang sa Espiritu Santo aron tabangan silang mailhan kon giunsa sila pagpanalangin sa Langitnong Amahan ug ni Jesukristo karon ug mahimong magpadayon sa pagpanalangin sa ilang tibuok nga mga panaw.

Ang pulong ug kabubut-on sa Ginoo

Pwede nimong basahon o i-summarize ang mosunod nga parapo aron makahatag og makasaysayanon nga konteksto sa Doktrina ug mga Pakigsaad 136. Pwede usab nimong hangyoon ang mga estudyante nga pangitaon ang Winter Quarters diha sa mapa.

Human ang layo ug lisod nga panaw patabok sa Iowa, temporaryong miistar ang mga Santos sa usa ka lugar nga ginganlan nilag Winter Quarters sa Nebraska. Kay wala sila makaandam sa pagpalabay sa tingtugnaw didto, giantos sa mga Santos ang kagutom, sakit, ug kamatayon, nga nagsulay sa ilang kalig-on ug paglahutay. Sa Winter Quarters, Nebraska niadtong Enero 1847 nga nadawat ni Presidente Brigham Young ang nailhan karon nga Doktrina ug mga Pakigsaad 136. Niini nga pagpadayag, gisugo sa Manluluwas ang mga Santos nga mangandam ug magpadayon sa ilang panaw pakasadpan.

Basaha ang Doktrina ug mga Pakigsaad 136:1–11, nga mangita kon unsay gihangyo sa Manluluwas nga buhaton sa mga Santos samtang mopanaw sila pakasadpan.

• Unsay mipatigbabaw kanimo gikan niini nga mga bersikulo?

Paminaw og maayo sa mga tubag sa mga estudyante. Kon makatabang, ipangutana sa pipila ang mosunod: “Sa bersikulo 2 ug 4, unsay gitudlo sa Manluluwas sa mga Santos bahin sa paghimo ug pagtuman sa ilang mga pakigsaad?” “Sa unsang paagi atimanon sa mga Santos ang usag usa ug kadtong nagsunod nila?” “Base sa bersikulo 11, unsang mga panalangin ang gisaad sa Manluluwas kon himoon ug tumanon sa mga Santos ang ilang mag pakigsaad sa tibuok panaw?”

Tabangi ang mga estudyante sa pag-ila sa kamatuoran nga samtang atong tumanon ang atong mga pakigsaad aron masunod ang mga sugo sa Ginoo, panalanginan kita Niya sa tanang butang.

Basaha ang Mosiah 18:8–10 ug ang Doktrina ug mga Pakigsaad 20:77, nga mangita sa bisan unsang pagkasusama sa mga pakigsaad nga atong himoon panahon sa bunyag ug sakramento.

Hugot nga pagtuo sa matag lakang

Para sa sunod nga bahin sa leksiyon, ikonsiderar ang pagbahinbahin sa mga estudyante ngadto sa “mga panon sa pioneer.” Pwede nimong han-ayon patuyok ang mga lamesa o lingkoranan aron mahisgotan sa mga panon ang mga bersikulo ug pangutana. Ang matag panon makapili og“kapitan” nga maoy moreport sa klase kon unsay makahuloganon para nila base sa ilang panaghisgotan.

Basaha ang Doktrina ug mga Pakigsaad 136:19–29 ug markahi ang mga sugo nga gihatag sa Manluluwas sa mga Santos samtang nagbiyahe sila padulong sa kasadpan. Pagpilig pipila ka sugo nga makahuloganon kanimo.

• Nganong importanteng sundon sa panon sa mga pioneer ang mga sugo nga imong gipili?

• Sa unsang paagi ang pagsunod sa susamang mga sugo makatabang nato?

• Unsang mga panalangin ang ihatag tingali sa Ginoo kanato tungod sa pagtuman sa maong mga sugo karon?

Pwedeng tun-an sa mga estudyante ang mosunod nga mga istorya sa pioneer ug hisgotan ang mosunod nga mga pangutana isip mga panon o isip usa sa klase. Kon hisgotan diha sa panon, seguroa nga nasabtan sa mga estudyante ang tanang direksiyon ug mga pangutana nga ilang gikinahanglan ug nga ang mga lider sa grupo masayod nga sila moreport sa nagpatigbabaw sa pananghisgotan o pwede nilang ipabuhat sa laing sakop sa grupo ang pagreport.

Masulondong mipanaw ang mga Santos og libolibo ka kilometro “ngadto sa dapit diin ang Ginoo mopahimutang sa istaka sa Zion” (Doktrina ug mga Pakigsaad 136:10). Aron matabangan ang mga estudyante nga masabtan ang pipila ka mga paagi nga gipanalanginan sa Ginoo ang mga pioneer samtang naningkamot sila sa pagtuman sa ilang mga pakigsaad sa pagsunod sa Ginoo, pwede nimong himoon ang usa sa mosunod:

• Dapita ang mga estudyante sa pagpili og usa ka paboritong istorya sa panaw sa mga pioneer paingon sa Salt Lake Valley nga ipakigbhain sa ilang grupo.

• Hatagi silag kapilian sa mga istorya gikan sa Mga Santos: Ang Istorya sa Simbahan ni Jesukristo sa Ulahing mga Adlaw, vol. 2, Walay Dili Balaan nga Kamot, 1846–1893 (2020), 72–118 ug gikan sa “Mga Pioneer” o “Ang Panaw sa Kasadpan” sa ChurchofJesusChrist.org nga pwedeng basahon sa mga estudyante diha sa ilang mga panon.

• Ipasalida ang bidyo nga “Watched Over by God: Elizabeth Panting’s Journey to Zion” gikan sa time code 7:47 hangtod 11:16, ang istorya sa usa ka milagro sa giagian sa pioneer.

• Sa unsang paagi kini nga istorya sa pioneer nagpakita sa panalangin sa Ginoo samtang naningkamot kita sa pagtuman sa Iyang mga sugo?

• Sa unsang paagi kini nga istorya makatabang sa mga tin-edyer karon samtang manaad silang tumanon ang mga sugo sa Dios?

Mga leksiyon sa panaw sa pioneer

Dapita ang mga estudyante sa pagpamalandong kon giunsa sila pagpanalangin sa Langitnong Amahan diha sa ilang panaw sa kinabuhi samtang gituman nila ang Iyang mga sugo. Pangutan-a kon adunay estudyante nga gustong mopakigbahin sa iyang kasinatian. Ikonsiderar usab ang pagpakigbahin sa imong mga kasinatian.

Dapita ang tanang sakop sa klase nga isulat ang ilang nakat-onan karon nga tingali ilang ipakigbahin sa usa ka sakop sa pamilya o higala. Pwedeng iapil sa mga estudyante kon sa unsang paagi ang istorya sa mga pioneer makatabang nato nga mahimong matinud-anon sa atong mga pakigsaad aron tumanon ang mga sugo sa Ginoo karon ug kon unsaon pagpanalangin sa Ginoo kanato sa atong mga paningkamot. Dapita silang ipakigbahin ang ilang nakat-onan sa ilang pamilya o higala nga wala sa klase.

Dugang nga mga Kapanguhaan

Sa unsang paagi ang akong panaw sa kinabuhi parehas sa panaw sa pioneer?

Si Presidente M. Russell Ballard sa Korum sa Napulog Duha ka Apostoles mipasabot:

Ang akong mga apohan sa tuhod ug ubang unang mga pioneer nag-atubang og daghang babag samtang sila miabot pinaagi sa mga karwahe, mga karomata, ug naglakaw padulong sa Walog sa Salt Lake. Kita usab mag-atubang og mga hagit diha sa atong indibidwal nga mga panaw sa atong mga kinabuhi. Kita wala magtulod og mga karomata o magdrayb og tinabonan nga mga karwahe subay sa sakaon nga mga bukid ug agi sa lawom nga mga pundok sa snow; kita naningkamot sama sa ilang gibuhat nga espirituhanong mobuntog sa mga tintasyon ug mga hagit sa atong panahon. Kita adunay mga dalan nga pagalakton; kita adunay mga bungtod—ug usahay mga bukid—nga katkaton. Bisan og ang mga pagsulay karon lahi kay sa niadtong unang mga pioneer, kini mahagiton gihapon alang kanato. (M. Russell Ballard, “Sunda si Jesukristo uban sa mga Lakang sa Hugot nga Pagtuo,” Liahona, Nob. 2022, 35)

Nakita ba nato ang mga milagro karon sama sa mga pioneer?

Si Elder David A. Bednar sa Korum sa Napulog Duha ka Apostoles mitudlo:

Usahay pangutan-on ko sa mga miyembro sa Simbahan kon nganong wala kitay dagkong mga milagro karon sama adtong nahitabo sa unang mga adlaw sa Pagpahiuli. Kanunay pareho ra ang akong tubag: “Kita aduna!” …

Ang dagkong mga milagro sa atong kinabuhi karon parehas kaayo sa kanunay nga nadawat sa mahalarong mga disipulo ni Ginoong Jesukristo: paghimog balaang mga pakigsaad sa Dios ug takos nga pagdawat sa mga ordinansa sa pagkapari, ang kalayo sa maong balaang mga pakigsaad naglihok kanato ug sa sulod kanato, ug nagdawat sa gahom sa pagkadiosnon sa atong mga kinabuhi samtang atong tumanon ang maong mga pakigsaad ug “pagtuman sa tanang ordinansa sa Ginoo.” … Wala mihunong ang panahon sa mga milagro. (David A. Bednar, “As Long as the World Shall Stand” [Debosyonal sa Brigham Young University, Ene. 19, 2021], 5, speeches.byu.edu)

Dugang nga mga Kalihokan sa Pagkat-on

Doktrina ug mga Pakigsaad 136:8: Mormon nga Batalyon

Kon para nimo makatabang sa imong mga estudyante ang pagkahibalo bahin sa Mormon nga Batalyon, dapita silang basahon ang Doktrina ug mga Pakigsaad 136:8. Pwede usab nilang rebyohon ang pipila sa mga detalye gikan sa Mga Hisgotanan sa Kasaysayan sa Simbahan, “Mormon nga Batalyon,” ChurchofJesusChrist.org/study/history/topics.

Pwede usab nimong ipakigbahin ang usa sa mosunod nga mga bidyo:

• “Elder Christofferson Celebrates the 175th Anniversary of the Mormon Battalion” (2:58)

• “Faith-Filled Action” (3:12)

• “A Legacy More Precious Than Gold: Contributions of the Mormon Battalion (1998)”

Doktrina ug mga Pakigsaad 136:28–29: “Kon ikaw malipayon, … [ug] kon ikaw magmasulub-on …”

Pwede nimong ipakigbahin nga, bisan pa sa mga kalisdanan, gusto sa Manluluwas nga mahimong makapalipay nga kasinatian para sa mga Santos ang layo nga panaw paingon sa Walog sa Salt Lake. Siya usab nakasabot nga anaa gayoy mga panahon sa kasub-anan. Dapita ang mga estudyante sa pagbasa sa Doktrina ug mga Pakigsaad 136:28–29. Ang mga pangutana sa panaghisgot mahimong maglakip sa mosunod:

• Sa unsang paagi ang musika ug pagsayaw nahimong paagi aron dayegon nimo ang Ginoo? Sa unsang paagi kini nagdalag kalipay sa imong kinabuhi?

• Sa imong hunahuna, nganong gusto sa Manluluwas nga magmalipayon tkia, bisan sa kinalisorang kahimtang?

• Sa imong hunahuna, nganong importante ang pag-ampo kon mobati nga magmasulob-on kita? Sa unsang paagi kana modala ngadto sa kalipay?

Isip pagkamasulondon sa Ginoo, ang mga Santos sagad manayaw ug manganta sa gabii human sa taas nga adlaw sa pagpanaw.

Pwede nimong ipakigbahin ang mosunod nga pamahayag gikan ni Presidente Russell M. Nelson:

Mga kaigsoonan, ang kalipay nga atong gibati dili kaayo konektado sa mga sirkumstansya sa atong kinabuhi apan konektado kaayo sa gitutokan sa atong kinabuhi.

Kon ang sentro sa atong kinabuhi anaa sa plano sa Dios sa kaluwasan … ug ni Jesukristo ug sa Iyang ebanghelyo, mobati kita og kalipay bisan unsa pay mahitabo—o wala mahitabo—sa atong kinabuhi. Ang kalipay moabot gikan ug tungod Kaniya. Siya ang tinubdan sa tanang kalipay. (Russell M. Nelson, “Hingpit nga Kalipay ug Espirituhanon nga Pagsugakod,” Liahona, Nob. 2016, 82.)

• Sa unsang paagi nagdalag kalipay ang Manluluwas sa imong kinabuhi, bisan panahon sa mga pagsulay?

• Unsa ang pipila ka nahiangayng mga paagi nga naningkamot kang magmalipayon, bisan og nag-atubang og pagsulay?

Mga kapilian nga bidyo

Pwede nimong gamiton ang bisan hain sa mosunod nga dugang kapanguhaan sa imong leksiyon.

Aron matabangan ang mga estudyante nga masabtan ang gahom nga atong madawat sa paghimog mga pakigsaad, pwede nimong ipasalida ang bidyo nga “Inspiring Short: The Fire of Temple Covenants” (3:39). Gipakigbahain ni Elder David A. Bednar sa Korum sa Napulog Duha ka Apostoles ang gahom sa mga pakigsaad sa templo sa Nauvoo panahon sa COVID-19 nga pandemya sa 2020.

Aron ipasiugda ang kaimportante sa pag-atiman niadtong nanginahanglan, pwede nimong ipasalida ang “Our Pioneer Legacy” (1:17). Niini nga bidyo, gipasabot ni Presidente Dallin H. Oaks sa Unang Kapangulohan ang panginahanglan sa pag-atiman sa mga kabos ug nanginahanglan sumala sa gitudlo sa Manluluwas sa Doktrina ug mga Pakigsaad 136:8.