“Leksiyon 150—Mga Pioneer sa Matag Yuta: Pag-andam sa Dalan para sa Uban,” Manwal sa Magtutudlo sa Seminary sa Doktrina ug mga Pakigsaad (2025)
“Mga Pioneer sa Matag Yuta,” Manwal sa Magtutudlo sa Seminary sa Doktrina ug mga Pakigsaad
Leksiyon 150: Doktrina ug mga Pakigsaad 135–136
Mga Pioneer sa Matag Yuta
Pag-andam sa Dalan para sa Uban
Gikan sa 1847 hangtod 1868, linibo ka pioneer ang nagpakitag dakong hugot nga pagtuo kang Jesukristo samtang nagbiyahe sila pinaagi sa mga karomata o kariton aron magpundok uban sa mga Santos sa Walog sa Salt Lake. Karon, ang mga pioneer gikan sa tibuok kalibotan padayong nagpakitag dakong hugot nga pagtuo samtang sila nagpundok uban ang mga Santos bisan asa man sila nagpuyo. Kini nga leksiyon makatabang sa mga estudyante nga mobati og pagtinguha nga mahimong mga pioneer pinaagi sa pag-andam sa dalan aron sundon sa uban si Jesukristo.
Posibleng mga Kalihokan sa Pagkat-on
Mga pioneer
Timan-i: Epektibo tingali ang pagpangita og mga ehemplo sa mga pioneer sa imong stake, ward, o nasod ug mangandam sa pagpakigbahin sa ilang mga istorya isip kabahin sa leksiyon. Kon posible, pwede nimo silang dapiton nga moadto sa klase aron isulti ang ilang kasinatian.
Ikonsiderar ang pagpakita sa mosunod nga kalihokan aron tabangan ang mga estudyante nga masabtan ang kahulogan sa pioneer. Pwedeng ipakigbahin sa mga estudyante ang ilang mga tagna diha sa klase o sa gagmayng mga grupo. Pwede nimong ipahaom ni nga kalihokan aron iapil ang mga pioneer nga nakaimpluwensiya sa kinabuhi sa uban diha sa inyong lugar.
Itukma ang mga tawo sa ilang mga kalamposan.
|
Mga Tawo |
Mga Kalamposan |
|---|---|
Mga Tawo 1. Johnnes Gutenberg | Mga Kalamposan A. Unang presidente sa Relief Society sa Taiwan |
Mga Tawo 2. Elizabeth Jackson | Mga Kalamposan B. Unang babaye nga nakadaog og Nobel Prize, gihatag isip ganti para sa iyang research sa radiation |
Mga Tawo 3. Chen Lin Shu-liang | Mga Kalamposan C. Miimbento sa printahanan |
Mga Tawo 4. Edmund Hillary ug Tenzing Norgay | Mga Kalamposan D. Unang nakakatkat sa tumoy sa Mount Everest |
Mga Tawo 5. Marie Curie | Mga Kalamposan E. Mibiyahe pinaagi og kariton paingon sa Salt Lake Valley |
Dihang mahuman na og tag-an ang mga estudyante, ihatag ang saktong tubag (1-C, 2-E, 3-A, 4-D, 5-B).
-
Unsay naa aning mga tawhana nga magkaparehas?
Tabangi ang mga estudyante nga masabtan nga ang magkaparehas aning mga tawhana mao nga sila puros mga pioneer. Ang pioneer nagtumong sa usa ka tawo nga mouna ug moandam sa dalan aron mosunod ang uban. Pwede nimong tan-awon ang “I Am a Pioneer” (1:16), nga anaa sa ChurchofJesusChrist.org.
2:3 -
Sa unsang paagi ang mga nalampos niini nga mga pioneer nag-andam sa dalan nga sundon sa uban?
Ang ehemplo ni Jesukristo
Gipakigbahin ni Presidente M. Russell Ballard sa Korum sa Napulog Duha ka Apostoles ang mosunod bahin kang Jesukristo:
Ang atong Manluluwas, si Jesukristo, mao ang labing unang pioneer sa pag-andam sa dalan. Sa pagkatinuod, Siya mao “ang dalan” alang sa plano sa kaluwasan nga matuman aron nga kita makahinulsol ug, pinaagi sa hugot nga pagtuo diha Kaniya, makabalik ngadto sa atong Langitnong Amahan. (M. Russell Ballard, “Sunda si Jesukristo uban sa mga Lakang sa Hugot nga Pagtuo,” Liahona, Nob. 2022, 35)
Aron matabangan ang mga estudyante nga maanalisar kini nga pamahayag, ikonsiderar ang pagdapit nila nga pangitaon ang mga kasulatan nga nagpakita sa mga paaagi nga pioneer si Jesukristo. Kon nagkinahanglan sila og tabang, pwede nimong ihatag ang mosunod nga tudling o ang uban pa nga imong napili.
Basaha ang pipila sa mosunod nga mga bersikulo: Juan 13:15; 14:2–6; 2 Nephi 31:5–12; ug Mosiah 16:7. Pangita og mga paagi nga si Jesukristo mahimong isipon nga usa ka pioneer.
-
Unsay imong nakaplagan?
-
Sa unsang paagi nahimong panalangin sa imong kinabuhi ang mga aksiyon sa Manluluwas sa pag-andam sa dalan para nimo?
Ipasabot sa mga estudyante nga adunay daghang paagi nga ang Manluluwas usa ka pioneer nga Siya ray makahimo. Bisan pa niana, adunay pipila ka paagi nga masunod nato ang Iyang “panig-ingnan… [ug] buhaton ang [Iyang] gibuhat” (Juan 13:15) aron mahimong pioneer para sa uban. Dapita ang mga estudyante nga isulat ang mosunod isip ulohan sa ilang journal sa pagtuon: “Sama sa Manluluwas, ako mahimong usa ka pioneer pinaagi sa matinod-anong pagpakita sa uban sa dalan nga subayon.”
Ikonsiderar ang pagpakita sa mosunod nga mga pangutana, ug dapita ang mga estudyante nga tubagon nila kini ubos sa maong ulohan diha sa ilang mga journal sa pagtuon:
-
Gibati ba nimo nga nagpakita ka og maayong ehemplo nga gusto nimong ipasunod sa uban?
-
Unsay nakapahinam nimo bahin sa pagkahimong pioneer? Unsay makapakulba nimo?
-
Sa unsang paagi kaha nimo nabati nga si Jesukristo makatabang nga mahimong pioneer alang sa uban?
Sa nahibiling bahin niini nga leksiyon, dapita ang impluwensiya sa Espiritu Santo aron mas modako ang imong tinguha nga mahimong pioneer nga sama ni Kristo aron sundon sa uban.
Nagkariton nga mga pioneer
Dapita ang mga estudyante sa pagpakigbahin kon unsay ilang nahinumdoman bahin sa panaw paingon sa kasadpan ug sa Doktrina ug mga Pakigsaad 136. Ikonsiderar ang pagrebyo sa Doktrina ug mga Pakigsaad 136:6–7 aron sa pagpakita sa usa ka paagi nga gihangyo nga mahimong pioneer ang mga unang Santos nga mobiyahe paingon sa kasadpan.
Ikonsiderar ang pagpakita sa imahe sa usa ka kariton ug sa paghatag og mubo nga pagpasabot sa mosunod nga impormasyon.
Human makabiyahe ang daghang panon paingon sa Salt Lake City sakay sa mga karomata, nga sagad giguyod sa mga toro, si Brigham Young midasig sa mga Santos nga mogamit og mga kariton. Ang mga pioneer mismo ang motulod sa mga kariton aron mas barato ug mas paspas ang pagbiyahe. 10 lamang sa kapin sa 350 ka panon sa mga milalin ang nagdala og kariton sa biyahe. Bisan og kadaghanan sa mga panon nga nagkariton ang nakaabot ra nga walay dagkong mga problema, ang mga kusog nga ulan nga yelo niadtong 1856 maoy hinungdan nga natanggong sa dalan ang Willie ug Martin nga mga panon sa nagkariton. Daghan ang namatay tungod sa gutom ug grabe nga mga temperatura. Ang mga paningkamot sa pagluwas gihimo sa mga miyembro sa Simbahan diha sa Utah pinaagi sa paghatag og gikinahanglan nga mga suplay ug nagtabang sa mga biyehero nga makompleto ang ilang panaw,nagluwas sa kapin sa 1,200 ka kinanuhi (tan-awa sa Mga Hisgotanan sa Kasaysayan sa Simbahan, “Mga Panon sa Nagkariton,” ChurchofJesusChrist.org/study/history/topics).
Ikonsiderar ang pagpakigbahin og istorya o pagpamatuod gikan sa usa ka pioneer nga nagkariton nga sama sa mosunod. Dapita ang mga estudyante nga mangita og mga paagi nga magamit nila ang ehemplo sa pioneer diha sa ilang mga kinabuhi.
Gipakigbahin ni Elder Quentin L. Cook sa Korum sa Napulog Duha ka Apostoles ang mosunod nga asoy sa usa ka pioneer nga nagkariton.
Natandog ko sa asoy ni Elizabeth Jackson, kansang bana si Aaron namatay human sa kataposang pagtabok didto sa Platte River kuyog sa Martin nga panon sa nagkariton. Siya misulat:
“Dili ko mosulay sa paghulagway sa akong mga gibati sa pagkahimong biyuda uban sa tulo ka anak, sa ingon kalisod nga mga kahimtang. … Nagtuo ako … nga ang akong mga pag-antus alang sa Ebanghelyo mopanalangin kanako alang sa akong kaayohan. …
“Ako [mihangyo] sa Ginoo, … Siya kinsa misaad nga mahimong bana sa biyuda, ug amahan sa mga walay amahan. Mihangyo ako kaniya ug siya miabut sa pagtabang kanako.”
Si Elizabeth miingon nga gisulat niya ang kasaysayan alang niadtong may susamang kasinatian uban sa paglaom nga ang kaliwatan unta andam nga moantos ug mosakripisyo sa tanang butang alang sa gingharian sa Dios. (Quentin L. Cook, “Ang LDS nga mga Kababayen-an Talagsaon!,” Liahona, Mayo 2011, 18)
-
Unsay gipamatud-an ni Elizabeth bahin sa Ginoo?
-
Unsay gilaoman niya nga makat-onan sa uban gikan sa iyang ehemplo?
Ikonsiderar ang pagdapit sa mga estudyante sa pag-ila sa mga tudling sa doktrinal nga kahanas o uban pang mga kasulatan nga nagpakita kon sa unsang paagi si Elizabeth nakadawat og kusog gikan sa Manluluwas. Apil sa mga pananglitan ang Mateo 11:28–30; Alma 7:11–13; o Doktrina ug mga Pakigsaad 6:36.
Pangutana kon sa unsang paagi kini nga mga kasulatan makatabang sa atong tinguha nga mahimong pioneer para sa uban.
Mga ehemplo sa mga pioneer
Ipasabot nga wala na hangyoa ang mga Santos nga magpundok sa Walog sa Salt Lake. Gidapit sila nga mahimong mga pioneer pinaagi sa pagpundok isip stake sa Zion bisan asa sila nagpuyo ug sa pag-andam sa dalan aron sundon sa uban si Jesukristo. Ang mga ehemplo sa mga pioneer sa tibuok kalibotan makatabang nato sa pagsunod kang Jesukristo ug mahimong pioneer bisan asa pa ta.
Para sa mosunod nga kalihokan, hatagi ang mga estudyante sa Handout nga “Mga Pioneer sa tibuok Kalibotan,” nga naglangkob mga istorya gikan sa Global Histories nga anaa sa ChurchofJesusChrist.org.
Ang alternatibo, puwede nimong dapiton ang mga estudyante nga basahon ang mga istorya sa ilang mga katigulangan diha sa FamilySearch.org o pamalandongi kadtong ilang mga nailhan kon nakompleto na nila ang kalihokan sa pagpangandam sa estudyante. Pwede usab nilang basahon ang bahin sa mga pioneer sa ilang nasod nga naa sa Global Histories sa seksiyon sa Kasaysayan sa Simbahan diha sa Librarya sa Ebanghelyo.
Kompletoha ang mosunod nga kalihokan, nga mangita kon sa unsang paagi ang mga ehemplo sa mga pioneer sa tibuok kalibotan makatabang nimo sa imong mga paningkamot nga mahimong pioneer.
-
Basaha ang istorya sa usa o daghan pang mga pioneer.
-
Ilha kon sa unsang paagi sila mga pioneer.
-
Pangita og mga paagi kon giunsa sila pagtabang sa Langitong Amahan ug ni Jesukristo.
-
Isulat sa imong journal sa pagtuon kon sa unsang paagi ang ilang mga ehemplo nga sama kang Kristo makadasig kanimo aron mahimong pioneer para sa uban.
Mga Pioneer sa tibuok Kalibotan
American Samoa
“Ang Dios Miingon og Oo”
Si Leva ‘aia Levao nagkinabuhi nga adunay grabe nga mga problema sa panglawas. Sa 2015, natuboan siya og hubag sa iyang mga mata. Naayo ang mga hubag human siya gihatagan og panalangin sa pagkapari sa mga misyonaryo. Nagsugod sila pagbasa sa Basahon ni Mormon uban niya.
Ang pipila ka tawo sa gamayng komunidad sa isla ni Levao wala malipay nga naa siyay bag-ong relihiyon. Gibugalbugalan nila ang iyang mga paningkamot ug gibiaybiay siya. Pero, nagpabilin siyang lig-on ug wala madugay nagpabunyag. Ang iyang bana nga si Tui, ug ilang tulo ka anak wala madugay misunod niya diha sa tinuhoan, ug si Levao nagserbisyo sa iyang branch isip presidente sa Relief Society. Ang uban, nga naimpluwensiyahan sa iyang dedikasyon, mitawag kaniya nga ang kasingkasing sa Simbahan sa Olosega.
South Korea
“Dili na Gyod Ko Mobatig Kabugnaw”
Si Choi Dong Sull usa ka Presbyterian nga ministro nga mibati nga responsibilidad niyang protektahan ang mga miyembro sa iyang kongregasyon gikan sa Simbahan ni Jesukristo sa mga Santos sa Ulahing mga Adlaw. Pero, nagsugod siya sa pagpakig-istorya sa mga misyonaryo ug nasabtan ang doktrinal nga mga isyu nga nakapalibog niya. Nahibalo siya nga makapausab sa karera ang iyang bag-ong mga gituohan ug makadaot kini sa iyang relasyon sa iyang amahan, nga tsirman sa Presbyterian nga Simbahan sa Korea niadtong panahona.
Gipili ni Dong Sull nga mabunyagan sa Han River. “Kutob sa mahimo gusto nakong masinati ang bunyag nga parehas kang Jesukristo,” siya mipasabot. Sa gabonon nga buntag sa Septiyembre 5, 1981, grabe ang katugnaw sa tubig sa Han River, pero dihang mihaw-as sa tubig si Dong Sull, gihulagway niya ang kainit nga gikan sa sulod. “Karon nahisakop na ako sa tinuod nga Simbahan sa Ginoo,” matod niya. “Dili na gyod ko mobatig kabugnaw.” Duha ka semana ang milabay, nabunyagan usab ang iyang asawa ug duha ka anak nga lalaki—niining higayona sulod sa mainit nga meetinghouse. Ang pagpasakop sa Simbahan dili sayon para kang Dong Sull ug sa iyang pamilya, apan naghimong posible sa bag-ong mga panalangin. “Ang mga paglutos ug pag-antos … human sa akong bunyag dili mahubit sa pulong,” matod ni Dong Sull. “Daghan kaayog nawala namo dihang [miapil mi sa Simbahan], pero mas daghan kami og nabatonan nga labaw pa sa among gipangandoy.”
Côte d’Ivoire
“Mga Pultahan sa Kinabuhi ug Kalipay”
Si Lydie Zebo Bahie ang kinamanghorang anak sa iyang pamilya nga nagpuyo sa panimalay dihang namatay ang iyang mga ginikanan. Kini nga kamatayon miresulta sa grabeng depresyon. Ang iyang pag-umangkon, nga si Faet Nadege, mipaila niya sa Simbahan ni Jesukristo sa mga Santos sa Ulahing mga Adlaw.
Dihang miadto siya sa Simbahan sa unang higayon, gibati ni Lydie ang dakong gugma gikan sa mga sister sa mga organisasyon sa Relief Society ug sa Young Women. Bisan og mihunong na siya pagbasa dihang nagkadepresyon siya, mibalik ang iyang maayong pagpunting dihang gitun-an niya ang Basahon ni Mormon. Siya nabunyagan niadtong Nobiyembre 18, 1995.
Wala madugay human sa iyang bunyag, nakabaton siyag kahigayonan nga ipakita ang gugma nga iyang nadawat pinaagi sa pagserbisyo sa mga organisasyon sa Relief Society ug sa Young Women. Nagserbisyo usab siya isip misyonaryo sa branch, nga nagdapit sa uban sa pagdiskobre sa samang pag-abiabi ug kalinaw nga bag-o lang niyang nakaplagan. “Tanan niini nga mga calling nagpalig-on ug nagtabang nako nga mouswag, sa espirituwal ug sa mental nga paagi,” miingon si Lydie.
Si Lydie nahimong usa sa unang mga sister nga misyonaryo nga nagserbsiyo sa Democratic Republic of the Congo Kinshasa Mission.
Dihang mahuman na og tuon ang mga estudyante, ikonsiderar ang pagbahin nila sa gagmayng mga grupo aron ipakigbahin unsa ang ilang nakat-onan.
Dapita ang mga estudyante sa pagsulat sa unsay ilang nakat-onan o gitun-an karon nga nakatabang nga modako ang ilang tinguha nga mahimong pioneer. Pwede usab nilang isulat ang mga paagi nga gusto nilang sundon ang ehemplo sa Manluluwas ug mahimong pioneer para sa uban ug kon ngano.