Leksiyon 148: Doktrina ug mga Pakigsaad 135–136

Pagpuli diha sa Kapangulohan

Gipili sa Ginoo sa Pagdumala sa Simbahan

Ang mga miyembro sa Simbahan sa panahon ni Joseph Smith wala pa gayod makasinati nga namatyan sila og propeta. Dili lamang ang pagkamartir ni Joseph ug Hyrum usa ka emosyonal nga hagit nga panahon apan usa ka posible nga kalibog ug kawalay kasigurohan kon kinsa ang mangulo sa Simbahan. Hinoon, giandam sa Ginoo ang dalan aron makapadayon ang Iyang Simbahan ubos sa propetikanhong pagpangulo. Kini nga leksiyon gituyo aron matabangan ang mga estudyante nga madugangan ang ilang pasalig nga ang Ginoo mopadayon sa pagiya sa Iyang buhat bisan pa og mamatay ang usa ka propeta.

Posibleng mga Kalihokan sa Pagkat-on

Bag-ong lider sa Simbahan

Agig pagsugod sa klase, ikonsiderar ang pagpakigbahin sa mosunod nga senaryo.

Handurawa nga aduna kay higala nga ginganlan ogGabriel nga bag-o lang miapil sa Simbahan uban ang iyang pamilya. Human mibiya sa seminary usa niana ka adlaw, nangutana siya nimo mahitungod sa mga lider sa Simbahan. Naglibog siya kon unsay mahitabo dihang mamatay ang Presidente sa Simbahan ug kon unsaon pagpili og bag-ong propeta. Mas naglibog siya kon giunsa nato pagkahibalo nga saktong tawo ang propeta.

• Sa sukod nga 1 hangtod 5, diin ang 1 ang labing ubos ug ang 5 ang labing taas, unsa ka kamasaligon nga matubag nimo ang pangutana ni Gabriel?

• Sa imong hunahuna, nganong importanteng masabtan kon sa unsang paagi mag-ilis og lider ang Simbahan?

Pwede nimong dasigon ang mga estudyante nga magtinguha og tabang sa Espiritu Santo sa ilang pagkat-on samtang atong mas tun-an pa ang sumbanan nga gihatag sa Ginoo sa pagpili og lider sa Iyang Simbahan. Dapita sila nga magtinguha og pagpadayag nganong importante nga mahibalo sila karon dayon diha sa ilang kinabuhi.

Kinsay mopuli kang Joseph Smith?

Makatabang tingali sa mga estudyante nga masabtan ang pipila sa konteksto nga mitultol sa unang pagpuli og lider diha sa Simbahan. Aron mahimo kini, pwede nimong i-summarize o basahon ang mosunod:

Sa panahon sa pagkamatay ni Joseph Smith, wala pa gayod makasinati ang mga miyembro sa Simbahan nga mamatyag propeta. Agi og dugang sa grabeng kaguol tungod sa kamatayon ni Joseph, ang pipila dili segurado kon unsaon sa pagpadayon sa Simbahan. Kadaghanan sa mga Apostol anaa sa sidlakang Estados Unidos nga nagserbisyo sa mga misyon dihang nabalitaan nila ang kamatayon ni Joseph ug Hyrum. Dihang nadungog nila ang makapasubong balita, sila ug ang ubang misyonaryo nagsugod sa pagbiyahe pauli sa Nauvoo.

Sa pagkawala sa Presidente sa Simbahan, pipila ka tawo ang mipahayag sa ilang lahilahi nga pag-angkon mahitungod sa kon unsay mahitabo sa pagpangulo sa Simbahan.

Ikonsiderar ang pagdapit og tulo ka estudyante nga moadto atubangan sa klase. Pwede nimong ipabasa og kusog sa matag estudyante ang usa sa mosunod nga tulo ka parapo. Alang sa imong kasayoran, ang unang asoy sa ubos nagtumong kang Sidney Rigdon. Ang ikaduhang asoy para kang Brigham Young. Ang ikatulong asoy para kang James Strang. Ayaw una ipahibalo sa mga estudyante ang mga ngalan.

Ang Unang Magtatambag sa Unang Kapangulohan miingon nga nakadawat siyag panan-awon nga walay mopuli kang Joseph. Misugyot siya nga siya ang kinahanglang mahimong “tig-atiman” sa Simbahan.

Miingon ang Presidente sa Kurom sa Napulog Duha ka Apostoles nga gihatag ni Joseph Smith ang awtoridad sa Manluluwas sa pagdumala sa Simbahan ngadto sa Kurom sa Napulog Duha.

Usa ka miyembro nga nabunyagan upat ka bulan sa wala pa namatay si Joseph ang nagpakita og usa ka sulat na pirmado ni Joseph Smith nga nagtudlo kaniya isip manununod ni Joseph.

• Unsa kahay imong reaksyon niini nga mga hitabo kon miyembro ka sa Simbahan adtong panahona?

• Unsa kahay imong kabalak-an bahin sa mga pangangkon?

Sumbanan nga gihatag sa Ginoo

Ikonsidear ang pagdapit sa mga estudyante nga pangitaon ang mga kasulatan, pamahayag sa mga lider sa Simbahan, ug uban pag balaanong gitudlo nga mga kapanguhaan kon sa unsang paagi nato mailhan nga gipili sa Ginoo ang propeta. Ingon og bahin sa ilang pagtuon, dapita ang mga estudyante nga gamiton ang mosunod nga handout aron makat-on kon giunsa pagkahibalo sa mga Santos kon kinsay angayng sundon pagkamatay ni Joseph Smith:

Kinsa ang mosunod human sa pagkamatay ni Joseph Smith

Sa wala pa ang iyang kamatayon, gitudlo ni Propeta Joseph Smith ang mosunod ngadto sa Korum sa Napulog Duha ka Apostoles:

Mga igsoon, … [a]ng pipila sa importante nga mga talan-awon duol na nga mahitabo. Basin tingali ang akong mga kaaway mopatay kanako. Ug kon ugaling buhaton gayud nila, ug ang mga yawe ug gahum nga ania kanako dili mahatag diha kaninyo, mawala kini sa kalibutan. Apan kon magmalamposon man ako sa pagbutang niini diha sa inyong mga ulo, diha mahimo na akong mahulog nga usa ka biktima ngadto sa mamumuno nga mga kamot kon itugot na kini sa Dios, ug makabiya ako uban sa tanang kalipay ug katagbawan, sa kasayuran nga ang akong buluhaton natuman na, ug ang pundasyon natukod diin ang gingharian sa Dios pagatukuron niini nga dispensasyon sa kahingpitan sa panahon.

Diha sa mga abaga sa Napulog Duha kinahanglan ang responsibilidad sa pagpangulo sa simbahan anaa dayon mopatong hangtud nga kamo mopili og lain nga mosunod kaninyo. (Mga Pagtulun-an sa mga Presidente sa Simbahan: Joseph Smith [2007], 646-647)

Gitudlo usab ni Joseph Smith nga ang Unang Kapangulohan mao ang bugtong grupo labaw sa Kurom sa Napulog Duha ka Apostoles, pero dihang mamatay ang propeta, mawala ang Unang Kapangulohan (tan-awa sa History, 1838–1856 [Manuscript History of the Church], volume B-1, 691, josephsmithpapers.org).

• Base sa imong nakat-onan, unsay nakatabang kanimo sa pagtubag sa tulo ka pangangkon nga gihimo ganina?

• Unsang sumbanan ang gihimo sa Ginoo alang sa pagpadayon sa pagpangulo sa Iyang Simbahan dihang mamatay ang propeta?

Dihang mihatag og pakigpulong si Brigham Young atubangan sa mga Santos sa usa ka dakong panagtigom, daghan ang nagrekord og milagrosong kasinatian ug mibati og kompirmasyon sa Espiritu Santo.

Si Presidente George Q. Cannon (1827–1901), nga sa ulahi nagserbisyo sa Unang Kapangulohan, mipakigbahin:

Si Brigham Young … mibarog ug namulong sa katawhan. … Kadtong nanambong niana nga okasyon dili gayud makalimot sa impresyon nga miabut kanila! Kon si Joseph nabuhi gikan sa pagkamatay ug namulong pag-usab kanila, ang hitabo dili unta kaayo hilabihan nga ikatingala kay sa nahitabo ngadto sa daghan nga mitambong niadto nga miting. Tingog gayud kadto ni Joseph mismo; ug dili lang kadto nga tingog ni Joseph ang nadungog; apan sa panan-aw sa mga tawo ang tawo nga nagbarug sa ilang atubangan daw mao gayud si Joseph. Wala nay laing nadungog nga talagsaon ug milagrosong hitabo kay sa nahitabo nianang adlawa sa presensya niana nga kongregasyon. Ang Ginoo mihatag sa Iyang katawhan og usa ka pagpamatuod diin walay luna nga gibilin alang sa pagduha-duha kon si kinsa ang tawo nga Iyang gipili nga mangulo kanila. Nakita nila ug nadungog sa ilang natural nga mga mata ug dalunggan, ug dayon ang mga pulong nga gilitok miabut, inubanan sa makadani nga gahom sa Dios, ngadto sa ilang kasingkasing, ug napuno sila sa Espiritu ug hilabihang kalipay. Tingali dunay mga kasubo, ug sa ubang kasingkasing seguro, dunay pagduha-duha ug kawalay kasiguroan; apan karon klaro na sa tanan nga ania ang tawo nga gitugyanan sa Ginoo sa gikinahanglang awtoridad nga molihok sa ilang taliwala puli ni Joseph (George Q. Cannon, “Joseph Smith, the Prophet,” Juvenile Instructor, Oct. 1870, 174–75).

Si Emily Smith Hoyt, usa sa mga miyembro nga anaa dihang mihatag og pakigpulong si Brigham Young atubangan sa mga Santos, misulat:

Ang paagi sa pagpangatarongan, ang ekspresyon sa nawong, ang tono sa tingog nakalipay sa tibuok nakong kalag. Ang akong kaugalingong mga mata nakakita sa gipatay nga lawas ni Joseph. Ang akong kaugalingong mga kamot, nakabatyag sa iyang bugnaw, patay nga lawas. Nasayud ko nga patay na si Joseph. Apan nakugang ako kanunay ug wala tuyoa nga motan-aw sa pulpito aron makita kon dili ba kadto si Joseph. Dili gayod, si Brigham Young kadto ug kon adunay magduhaduha sa katungod ni Brigham sa pagdumala sa mga responsibilidad alang sa mga Santos, ang ako lamang masulti kanila mao kini. Angkona ang espiritu sa Dios ug sayri sa inyong kaugalingon. Ang Ginoo mosangkap alang sa iyang kaugalingon (Emily Smith Hoyt, sa Lynne W. Jorgensen, “The Mantle of the Prophet Joseph Passes to Brother Brigham: A Collective Spiritual Witness,” BYU Studies, vol. 36, num. 4 [1996–97], 164).

• Kon naa ka didto, unsa kahay epekto niini nga kasinatian kanimo?

• Sa unsang paagi konektado ang Moroni 10:5 sa imong gitun-an?

Dapita ang mga estudyante sa pagpakigbahin sa unsay ilang nakat-onan gikan sa ilang pagtuon. Seguroa nga nasabtan sa mga estudyante nga dihang mamatay ang Presidente sa Simbahan, mawala ang Unang Kapangulohan ug ang Kurom sa Napulog Duha ka Apostoles ang modumala sa Simbahan. Tabangi ang mga estudyante nga masabtan nga ang Apostoles nga nag-alagad sa Unang Kapangulohan mobalik sa ilang pwesto sa katungdanan sa Kurom sa Napulog Duha. Seguroa nga masabtan usab sa mga estudyante nga kadtong Apostol nga labing dugay na nga nangalagad mao ang Presidente as Kurom sa Napulog Duha ka Apostoles ug, tungod niini, mahimong sunod nga Presidente sa Simbahan.

Mahimong mailhan usab sa mga estudyante nga pinaagi sa Espiritu Santo, makadawat kita og pagsaksi nga gitawag sa Dios kadtong nagdumala sa Simbahan.

• Unsa kahay atong mahimo, o unsay imong nahimo, aron makadawat og espirituwal nga saksi nga gipili sa Ginoo ang atong propeta sa pagdumala sa Iyang Simbahan?

Sa pagtapos, ikonsiderar ang pagtugot sa mga estudyante nga gamiton unsay ilang nakat-onan aron tubagon ang senaryo sa sinugdanan sa leksiyon. Ang usa ka paagi sa paghimo niini mao ang pagpa-role play sa mga estudyante uban ang ilang mga pares. Ingong bahin sa ilang tubag, pwede nimong dasigon ang mga estudyante nga iapil ang ilang kaugalingong pagsaksi nga ang propeta mao ang pinili sa Ginoo nga lider.

Dugang nga mga Kapanguhaan

Sa unsang paagi miabot sa mga Santos ang espirituwal nga saksi dihang si Brigham Young ug ang Napulog Duha gipili sa Ginoo sa pagdumala sa Iyang Simbahan?

Ang ubang mga Santos, sama ni Benjamin F. Johnson, William C. Staines, ug Wilford Woodruff, mirekord nga nadungog nila ang tingog ni Joseph Smith o nakita si Joseph ingon og si Brigham Young nga nag-istorya (tan-awa sa Benjamin F. Johnson, My Life’s Review [1947], 104; History, 1838–1856 [Manuscript History of the Church], volume F-1, 300, josephsmithpapers.org).

Para sa dugang impormasyon bahin sa tubag sa mga miyembro ug mga lider sa Simbahan sa mga pangutana bahin sa kon unsay mahitabo sa kapangulohan sa Simbahan, tan-awa sa kapitulo 45 sa Mga Santos, volume 1 ([2018], 628–46).

Asa ko makakat-on og dugang bahin sa pagpuli sa Unang Kapangulohan?

Human sa kamatayon ni Presidente Thomas S. Monson, si Elder D. Todd Christofferson sa Kurom sa Napulong Duha ka Apostoles mipakigbahin:

Usa ka Mensahe gikan sa Unang Kapangulohan

Usa ka espesyal nga tibuok kalibutan nga pagsibya sa pagpaila sa bag-o nga Unang Kapangulohan karong Enero 16, 2018.

Si Presidente Ezra Taft Benson (1899–1994) mitudlo:

Ang Dios nasayod sa tanang mga butang, ang kataposan gikan sa sinugdanan, ug walay tawo nga mahimong presidente sa simbahan ni Jesukristo pinaagi sa wala damha, o magpabilin dinha pinaagi sa sulagma, o mamatay sa wala tuyoa nga panghitabo. (Ezra Taft Benson, “Jesus Christ—Gifts and Expectations,” New Era, Mayo 1975, 16–17)

Ang mosunod nga Mga Hisgotanan sa Kasaysayan sa Simbahan naghatag og dugang impormasyon sa mga hitabo human sa kamatayon ni Joseph Smith mahitungod sa pagpangulo sa Simbahan: “Ang Pagpuli sa Liderato sa Simbahan,” ChurchofJesusChrist.org/study/history/topics.

Sa unsang paagi ko makadawat og espirituwal nga saksi nga gitawag sa Dios ang bag-ong Presidente sa Simbahan?

Si Elder Neil L. Andersen sa Korum sa Napulog Duha ka Apostoles mipakigbahin kon unsay gihimo sa iyang asawa, si Kathy, aron makadawat og saksi nga gikan sa Dios ang tawag ni Presidente Russell M. Nelson:

Ang Propeta sa Dios

Si Elder Andersen nagtudlo nga dunay kaluwasan ug kalinaw sa pagsunod sa propeta, kansang labing importante nga tahas mao ang pagtudlo sa dalan paingon sa Manluluwas.

Kita adunay pribilehiyo isip mga Santos sa Ulahing mga Adlaw nga makadawat og personal nga pagsaksi nga ang tawag ni Presidente Nelson gikan sa Dios. Samtang ang akong asawa, si Kathy, personal nga nakaila ni Presidente Nelson sulod sa dul-an sa tulo ka dekada ug walay pangutana mahitungod sa iyang balaang katungdanan, sa pag-set apart kaniya, nagsugod siya sa pagbasa sa tanan niyang mga pakigpulong sa kinatibuk-ang komperensiya sa miaging 34 ka tuig, nga nag-ampo alang sa mas lawom nga kasiguroan sa iyang propetikanhong tahas. Mosaad ko kaninyo nga kining mas dakong pagsaksi moabot kaninyo samtang mapainubsanon ug takos kamong magtinguha niini. (Neil L. Andersen, “Ang Propeta sa Dios,” Liahona, Mayo 2018, 26)

Dugang nga mga Kalihokan sa Pagkat-on

Tubag ni Brigham Young sa kamatayon ni Joseph Smith

Aron mas mapakita ang kamatuoran nga dumalaon sa Kurom sa Napulog Duha ka Apostoles ang Simbahan human mamatay ang propeta, ikonsiderar ang pagpakigbahin sa kasinatian ni Brigham Young dihang nabasa niya ang sulat nga nagpahibalo nga namatay na si Joseph Smith. Girekord ni Brigham ang mosunod:

Sa dihang nadawat namo kadto nga sulat, didto si Orson Pratt ug ako ug gibasa ang sulat. Gibati nako niadto ang wala pa gayod nako mabati sa akong kinabuhi. … Hilabihan ka sakit ang akong ulo nga nagtuo [ko] nga moliki kini. … Wala na ba ang Pagkapari sa yuta? Si Joseph ug Hyrum Smith wala na. [Dayon] kalit kini nga miabot sa akong hunahuna. Miabot kini kanako nga sama sa Pagpadayag—ang mga yawe sa gingharian ania dinhi. (Brigham Young, in Historian’s Office General Church Minutes, Feb. 12, 1849, 2, Church History Library, Salt Lake City)

• Unsa ang nakahatag og kahupayan kang Brigham Young human siya makahibalo sa kamatayon ni Joseph Smith?

Pag-reorganisar sa Unang Kapangulohan

Aron tabangan ang mga estudyante nga masabtan kon unsay nahitabo sa Unang Kapangulohan human sa pagkamatay ni Joseph Smith, pwede nimong ipasabot nga ang Unang Kapanguholan wala pa dayon maorganisar pag usab human sa pagkamatay sa Presidente sa Simbahan.

Pwede nimong pangutan-on ang mga estudyante kon nasayod ba sila kon unsa ka dugay naorganisar pag-usab ang Unang Kapangulohan human mamatay si Joseph Smith.

Depende sa ilang pagsabot, pwede nimong ipakigbahin ang pipila o ang tanan sa mosunod:

Human sa pagkamatay ni Propeta Joseph Smith, ang Korum sa Napulog Duha ka Apostoles ang nangulo sa Simbahan sulod sa tulo og tunga ka tuig sa wala pa mareorganisar ang Unang Kapangulohan. Sa sama, ang Korum sa Napulog Duha nangulo sa Simbahan kapin og gamay sa tulo ka tuig human sa pagkamatay ni Presidente Brigham Young ug hapit duha ka tuig human sa pagkamatay ni John Taylor. Pero, dihang si Presidente Wilford Woodruff namatay niadtong Septiyembre 2, 1898, ang Ginoo midasig ni Lorenzo Snow ug sa ubang mga sakop sa Napulog Duha nga i-organisar pag-usab ang Unang Kapangulohan paglabay lamang sa 11 ka adlaw, niadtong Septiyembre 13 (tan-awa sa George Q. Cannon, “Remarks,” Deseret Weekly, Okt. 8, 1898, 514). Sukad nianang panahona, ang Korum sa Napulog Duha ka Apostoles nangulo sa Simbahan kasagaran sa mubo lamang nga panahon sa dili pa ma-set apart ang bag-ong Presidente sa Simbahan ug maorganisar pag-usab ang Unang Kapangulohan.

Kinsa ang mahimong sunod nga propeta karon?

Aron mahatagan ang mga estudyante og higayon sa pag-summarize sa ilang nakat-onan, ikonsiderar ang pagpakitag mga imahe sa kasamtangang Unang Kapangulohan ug Korum sa Napulog Duha ka Apostoles ngadto sa 15 ka estudyante. Kini nga mga estudyante pwedeng motindog sa atubangan ug iorganisar ang ilang kaugalingon ingong ang Unang Kapangulohan ug Kurom sa Napulog Duha ka Apostoles. Hangyoa ang mga estudyante nga ipakita kon unsay mahitabo sa Unang Kapangulohan ug sa Kurom sa Napulog Duha ka Apostoles, base sa sumbanan sa Ginoo, kon mamatay ang Presidente sa Simbahan.