Lesson 147: Doktrina at mga Tipan 135–136

Doktrina at mga Tipan 135

Ang Pagkakamartir ni Joseph Smith, ang Propeta

Pagkaraan ng maraming taon ng pamumuno sa mga Banal, ibinilanggo si Propetang Joseph Smith at ang kanyang kapatid na si Hyrum sa Piitan ng Carthage. Noong Hunyo 27, 1844, sumalakay ang mga mandurumog at pinaslang ang dalawang lalaki. Layunin ng lesson na ito na tulungan ang mga estudyante na mapalakas ang kanilang patotoo tungkol kay Joseph Smith bilang Propeta ng Pagpapanumbalik ng Diyos.

Mga Posibleng Aktibidad sa Pag-aaral

“Ang Propeta at Tagakita ng Panginoon”

Maaari kang magpakita ng larawan ni Joseph Smith at anyayahan ang mga estudyante na isipin kunwari na kakausapin nila ang isang taong walang nalalaman tungkol sa kanya. Sabihin sa kanila na ilista kung ano sa palagay nila ang apat o limang pinakamahalagang bagay na ginawa ng Panginoon para sa atin sa pamamagitan ni Propetang Joseph Smith. Maaaring makatulong ang mga sumusunod na tanong:

• Paano maiiba ang inyong buhay kung wala ang mga pagpapalang ibinigay sa atin ng Panginoon sa pamamagitan ni Propetang Joseph Smith?

• Paano naimpluwensyahan ni Joseph Smith at ng kanyang gawain bilang propeta ang inyong kaalaman at ugnayan sa Ama sa Langit at kay Jesucristo?

Ipaliwanag na sa lesson na ito, malalaman ng mga estudyante ang tungkol sa pagkakamartir ni Joseph Smith at kung ano ang ginawa ng Panginoon sa pamamagitan niya. Habang nag-aaral sila, anyayahan sila na hangaring mas maunawaan kung paano sila pinagpala ng Panginoon sa pamamagitan ng Propeta.

Ang mga pangyayari na humantong sa Piitan ng Carthage

Upang matulungan ang mga estudyante na maghandang pag-aralan ang Doktrina at mga Tipan 135, maaari mong ibuod ang mga talatang ito sa sarili mong mga salita.

Payapang namuhay sa Illinois si Joseph Smith at ang mga Banal nang humigit-kumulang tatlong taon. Noong 1842, sila ay muling nagsimulang makaranas ng oposisyon. Ang mga tumiwalag sa Simbahan at ang mga kaaway ng Simbahan ay nagkaisa sa paglaban sa Propeta at sa mga Banal. Ang ilang mamamayan ng Illinois ay nagsimulang mangamba at magalit sa impluwensysa ng mga Banal sa pulitika. Ang iba naman ay lalong nainggit sa pag-unlad ng ekonomiya sa Nauvoo. Ang pag-uusig laban sa mga Banal ay humantong din sa mga maling pagkaunawa tungkol sa mga gawain, tulad ng pag-aasawa nang higit sa isa, na iniulat nang mali ng ilang nag-apostasiyang miyembro ng Simbahan. Pagsapit ng tag-init ng 1844, labis na tumindi ang pagkapoot sa Simbahan.

Noong Hunyo 7, 1844, si William Law, na naglingkod bilang Pangalawang Tagapayo sa Unang Panguluhan, at ang iba pang mga nag-apostasiya ay naglathala ng unang isyu ng pahayagan na tinawag na Nauvoo Expositor upang pasiklabin ang galit ng publiko sa Propeta at sa Simbahan. Itinuring ni Joseph Smith at ng karamihan sa Nauvoo city council na nakakaperhuwisyo sa publiko ang pahayagan at iniutos nilang wasakin ang palimbagan ng Nauvoo Expositor. Ang utos na ito ay naaayon sa batas noong panahon ni Joseph Smith.

Ilang residente ng karatig na lugar ang tumutol sa mga Banal at sa pagkawasak ng palimbagan. Pinayuhan ni Gobernador Thomas Ford ng Illinois si Joseph Smith at ang iba pang lider ng Simbahan na maglakbay patungo sa bayan ng Carthage at lutasin ang sitwasyon ayon sa batas. Pinangakuan niya sila ng lubos na proteksyon at makatarungang paglilitis kung kusa silang pupunta. Sa kabila ng mga pangakong ito, kumbinsido ang Propeta na papatayin siya kung pupunta siya (tingnan sa Doktrina at mga Tipan 135:4). Gayunpaman, noong Hunyo 24, 1844, nilisan nina Joseph at Hyrum Smith at ng ilang iba pa ang Nauvoo patungo sa Carthage upang subukan at panatilihing ligtas ang mga Banal mula sa karahasan ng mga mandurumog.

Matapos manatili nina Joseph at Hyrum sa bilangguan nang ilang araw, sumalakay ang mga mandurumog.

Ang pagkakamartir

Bago basahin ng mga estudyante ang sumusunod na scripture passage, maaari mong sabihin sa kanila na ibahagi ang anumang bagay na maaaring nalalaman na nila tungkol sa pagkakamartir nina Joseph at Hyrum Smith.

Inilarawan sa Doktrina at mga Tipan 135, na orihinal na inilathala nang wala pang tatlong buwan matapos ang pagkakamartir, kung ano ang nangyari. Basahin ang Doktrina at mga Tipan 135:1–2, at alamin ang mga detalye tungkol sa pagkakamartir o pagpaslang at kung sino ang nakasaksi nito. (Kung gusto ninyo ng mas marami pang detalye, basahin ang Doktrina at mga Tipan 135:4–7.)

• Ano ang natuklasan ninyo?

• Ano ang maaaring maisip o madama ninyo kung naging saksi kayo sa kahindik-hindik na pangyayaring ito?

Upang matulungan ang mga estudyante na maisip ang nangyari, maaari mong ipanood ang video na “Joseph Smith—Prophet of the Restoration” (mula sa time code na 0:00 hanggang 3:06) o “Joseph Smith: The Prophet of the Restoration” (mula sa time code na 55:50 hanggang 59:51).

Kung kinakailangan, ipaliwanag na si Elder John Taylor (1808–87) ay isa sa mga saksi sa pagpaslang. Kalaunan ay gumaling siya mula sa kanyang mga sugat noong araw na iyon at nagpatuloy na maglingkod bilang pangatlong Pangulo ng Ang Simbahan ni Jesucristo ng mga Banal sa mga Huling Araw.

Basahin ang Doktrina at mga Tipan 135:3, at alamin ang ilan sa mga paraan na pinagpala tayo ng Panginoon sa pamamagitan ni Propetang Joseph Smith.

Ang Doktrina at mga Tipan 135:3 ay isang doctrinal mastery passage. Maaari mong sabihin sa mga estudyante na markahan ang mga doctrinal mastery passage sa natatanging paraan upang madali nilang mahanap ang mga ito.

• Anong mga katotohanan ang mahalaga sa iyo? Bakit?

Sabihin sa mga estudyante na ilista sa pisara ang mahahalagang katotohanan mula sa talata 3 at ibahagi ang kanilang mga naiisip tungkol sa mga ito.

Maaaring gumamit sila ng iba’t ibang salita, ngunit ang isang katotohanan na malamang na matutukoy ng mga estudyante ay si Joseph Smith ay nakagawa nang higit pa, maliban lamang kay Jesucristo, para sa kaligtasan ng sanlibutan kaysa sa sinumang tao. Maaari mong isulat sa pisara ang isang katotohanang tulad nito. Maaaring mahalagang linawin na ang kaligtasan ay posible lamang sa pamamagitan ni Jesucristo, na siyang Tagapagligtas ng buong sangkatauhan. Gayunpaman, kumilos si Jesucristo sa pamamagitan ni Propetang Joseph Smith upang maipagkaloob ang mga pagpapala ng Kanyang Pagbabayad-sala sa mga anak ng Ama sa Langit sa dispensasyong ito.

Maaari mong anyayahan ang mga estudyante na maglaan ng ilang sandali at pagnilayan ang kahalagahan ng katotohanang ito sa sarili nilang buhay.

Bagama’t nagwakas ang mortal na buhay ni Joseph Smith noong Hunyo 27, 1844, ang kanyang gawain, patotoo, at impluwensya ay nakatulong sa milyun-milyong anak ng Ama sa Langit na lumapit kay Jesucristo at matanggap ang mga pagpapala ng kaligtasan.

“Ang kanyang misyon at kanyang mga gawain”

Upang matulungan ang mga estudyante na mas maunawaan kung paano ginamit ng Ama sa Langit at ni Jesucristo si Joseph Smith upang tulungan tayong mas mapalapit sa Kanila, maaari mong anyayahan ang mga estudyante na gawin ang tatlong sumusunod na hakbang. May kasamang ilang halimbawa na naka-italics.

Anyayahan ang mga mag-aaral na magbahagi: Upang malaman pa ang tungkol sa pag-anyaya sa iba na magbahagi, tingnan ang training na may pamagat na “Magpatotoo nang madalas at anyayahan ang mga mag-aaral na ibahagi ang kanilang mga nadarama, karanasan, at patotoo,” na matatagpuan sa Mga Kasanayan para sa Pag-unlad ng Guro: Magturo sa Pamamagitan ng Espiritu. Maaaring sanayin ang kasanayang “Lumikha ng mga pahiwatig na tutulong sa mga estudyante na maipahayag ang kanilang nadarama, karanasan, at patotoo.”

1. Isulat ang “Ang gawain ng Panginoon sa pamamagitan ni Joseph Smith” sa gitna ng isang pahina sa iyong study journal.

2. Sa paligid ng pariralang ito, isulat o idrowing ang 4-5 bagay na itinuro o ginawa ng Ama sa Langit at ni Jesucristo sa pamamagitan ni Joseph Smith. Kung maaari, magsama ng scripture reference para sa bawat paraan. Halimbawa: “Ang Unang Pangitain” (Joseph Smith—Kasaysayan 1:17–19).

3. Isama ang iyong mga naiisip at nadarama kung paano nakatutulong sa iyo ang bawat bagay na inilista mo upang mas mapalapit sa Ama sa Langit at kay Jesucristo. Halimbawa: Sa pamamagitan ni Joseph Smith, mas nauunawaan ko ang tungkol sa Ama sa Langit at kay Jesucristo. Alam ko na sasagutin ng Ama sa Langit ang aking mga panalangin at ang Ama sa Langit at si Jesucristo ay dalawang magkahiwalay na persona.

Kung kailangan ng mga estudyante ng tulong sa pag-iisip ng mga karagdagang halimbawa na isusulat o idodrowing nila, maaari nilang balikan ang mga sumusunod na paksa at talata: priesthood (Doktrina at mga Tipan 13:1); ang Aklat ni Mormon (Doktrina at mga Tipan 17:5–6; 135:3); gawaing misyonero (Doktrina at mga Tipan 4; 110:11); kapangyarihang magbuklod (Doktrina at mga Tipan 110:13–16).

Habang nagninilay at nagsusulat ang mga estudyante, maaari mong patugtugin ang “Praise to the Man” (Hymns, blg. 27). Ipaliwanag na ang himnong ito ay isinulat ni William W. Phelps pagkaraan ng pagkamatay ng Propeta bilang parangal sa kanya.

Mag-aanyaya ng maraming estudyante hangga’t maaari na magbahagi ng kanilang mga naiisip kung paano sila pinagpala ng Panginoon sa pamamagitan ni Propetang Joseph Smith at maaari kang gumawa ng listahan sa pisara. Habang ibinabahagi ng mga estudyante ang kanilang mga naiisip at nadarama tungkol sa isang paksa, maaari mong itanong ang tulad ng “May iba pa ba na nakaisip ng tungkol sa pagpapala ring iyon? Gusto mo bang magdagdag ng anumang ideya sa ating talakayan?” o “Paano maiiba ang buhay mo kung wala ang pagpapalang ito?” Sabihin sa mga estudyante na magbahagi ng tungkol sa maraming pagpapala. Maaari mo ring ibahagi ang iyong mga naiisip at nadarama.

Bilang pagtatapos, maaari mo ring ibahagi ang sumusunod na pahayag ni Pangulong M. Russell Ballard, ng Korum ng Labindalawang Apostol. Si Pangulong Ballard ay apo-sa-talampakan ni Hyrum Smith.

Dapat nating alalahanin palagi ang sakripisyong ginawa nina Joseph at Hyrum Smith, pati na ng napakaraming iba pang matatapat na lalaki, babae, at bata, upang maitatag ang Simbahan para matamasa ko at ninyo ang maraming pagpapala at lahat ng katotohanang inihayag sa atin ngayon. Hindi dapat makalimutan ang kanilang katapatan kailanman! (M. Russell Ballard, “Hindi Ba Tayo Magpapatuloy sa Isang Napakadakilang Adhikain?,” Liahona, Mayo 2020, 11)

• Kung nais ng isang tao na mas maunawaan kung paano siya pinagpala ng Panginoon sa pamamagitan ni Propetang Joseph Smith, ano ang irerekomenda ninyong gawin niya?

Isaulo

Maaari mong tulungan ang mga estudyante na isaulo ang reference at mahalagang parirala ng banal na kasulatan ng Doktrina at mga Tipan 135:3 at rebyuhin ang mga ito sa mga susunod na lesson. Ang mahalagang parirala ng banal na kasulatan para sa passage na ito ay “Inilabas [ni Joseph Smith] ang Aklat ni Mormon, na kanyang isinalin sa pamamagitan ng kaloob at kapangyarihan ng Diyos.” Ang mga ideya para sa mga aktibidad sa pagsasaulo ay nasa mga materyal sa appendix sa ilalim ng “Mga Aktibidad sa Pagrerebyu ng Doctrinal Mastery.”

Karagdagang Resources

Saan ko matututuhan pa ang tungkol sa pagkakamartir nina Joseph at Hyrum Smith?

Ang Kabanata 43–44 ng Mga Banal: Ang Kuwento ng Simbahan ni Jesucristo sa mga Huling Araw, Tomo 1, Ang Pamantayan ng Katotohanan, 1815–1846 ay naglalaman ng mga detalyadong salaysay ng mga pangyayaring humantong sa pagpaslang kina Joseph at Hyrum Smith ([2018], 594–629).

Maglibot sa virtual tour sa Piitan ng Carthage.

Paano ako tutugon sa mga nagkakamali sa pag-unawa sa nararamdaman natin tungkol kay Joseph Smith?

Itinuro ni Pangulong Gordon B. Hinckley (1910–2008):

Hindi natin sinasamba ang Propeta. Sinasamba natin ang Diyos Amang Walang Hanggan at ang nabuhay na muli na Panginoong Jesucristo. Ngunit kinikilala natin ang Propeta; ipinapahayag natin siya; iginagalang natin siya; pinagpipitaganan natin siya bilang kasangkapan sa mga kamay ng Maykapal sa pagpapanumbalik sa lupa ng mga sinaunang katotohanan ng banal na ebanghelyo, pati na ang priesthood na sa pamamagitan nito ang awtoridad ng Diyos ay nagagamit sa mga gawain ng Kanyang Simbahan at para sa pagpapala ng Kanyang mga tao. (Gordon B. Hinckley, “Joseph Smith Jr.—Prophet of God, Mighty Servant,” Ensign, Dis. 2005, 4)

Paano ko mapauunlad at mapalalakas ang aking patotoo tungkol kay Propetang Joseph Smith?

Sinabi ni Elder Neil L. Andersen ng Korum ng Labindalawang Apostol:

Ang patotoo tungkol kay Propetang Joseph Smith ay maaaring dumating sa atin sa magkakaibang paraan. Maaari itong dumating habang nakaluhod kayo sa panalangin, na hinihiling sa Diyos na patunayan na siya ay totoong propeta. Maaari itong dumating habang binabasa ninyo ang salaysay ng Propeta tungkol sa Unang Pangitain. Ang patotoo ay maaaring magpadalisay sa inyong kaluluwa habang paulit-ulit ninyong binabasa ang Aklat ni Mormon. Maaari itong dumating kapag nagpatotoo kayo tungkol sa Propeta o habang nasa templo kayo at natatanto na sa pamamagitan ni Joseph Smith ay ipinanumbalik ang banal na kapangyarihang magbuklod sa lupa. Taglay ang pananampalataya at tunay na layunin, ang inyong patotoo kay Propetang Joseph Smith ay lalakas. (Neil L. Andersen, “Joseph Smith,” Liahona, Nob. 2014, 30)

Karagdagang Aktibidad sa Pag-aaral

Doktrina at mga Tipan 135:4–6. Ang Aklat ni Mormon at ang Doktrina at mga Tipan

Kapag nakatukoy ang mga estudyante ng mga katotohanan mula sa Doktrina at mga Tipan 135:3, malamang na mauunawaan nila na inilabas ni Joseph Smith ang Aklat ni Mormon, Doktrina at mga Tipan, at iba pang mga banal na kasulatan para sa ating kapakinabangan. Upang matulungan ang mga estudyante na mas maunawaan ang kahalagahan ng mga sagradong kasulatan na ito, ipabasa sa isang estudyante ang Doktrina at mga Tipan 135:4–5, at ipahanap kung anong passage mula sa Aklat ni Mormon ang binasa ni Hyrum Smith bago siya mamatay. Itanong sa mga estudyante kung ano ang natuklasan nila at anyayahan silang ibahagi kung paano nakapagbigay ng kapanatagan ang scripture passage na ito kina Joseph at Hyrum Smith.

Sabihin sa mga estudyante na basahin ang Doktrina at mga Tipan 135:6, at alamin ang dahilan kung bakit inilabas ang Aklat ni Mormon at ang Doktrina at mga Tipan. Tulungan ang mga estudyante na matukoy ang katotohanang tulad ng sumusunod: Ang Aklat ni Mormon at ang Doktrina at mga Tipan ay inilabas para sa kaligtasan ng sanlibutan. Maaari kang magtanong ng mga tanong na tatalakayin tulad ng sumusunod:

• Sa anong mga paraan nakatutulong ang mga aklat na ito sa pagdadala ng kaligtasan sa daigdig?

• Ayon sa talata 6, bakit ang Aklat ni Mormon at ang Doktrina at mga Tipan ang pinakamahahalagang aklat na maaaring magkaroon kayo?

Sabihin sa mga estudyante na pag-isipan ang kahalagahan ng Aklat ni Mormon at ng Doktrina at mga Tipan at kung paano pinagpala ng bawat aklat ang kanilang buhay. Maaari mo silang anyayahang magbahagi ng isang paboritong scripture passage mula sa alinman sa mga aklat na ito. Maaari mo ring ipanood ang video na “Patotoo Tungkol sa Aklat ni Mormon” (4:39) ni Elder Jeffrey R. Holland ng Korum ng Labindalawang Apostol.