“Lesson 150—Mga Pioneer sa Bawat Lupain: Paghahanda ng Daan para sa Iba,” Manwal ng Titser ng Seminary para sa Doktrina at mga Tipan (2025)
“Mga Pioneer sa Bawat Lupain,” Manwal ng Titser ng Seminary para sa Doktrina at mga Tipan
Lesson 150: Doktrina at mga Tipan 135–136
Mga Pioneer sa Bawat Lupain
Paghahanda ng Daan para sa Iba
Mula 1847 hanggang 1868, libu-libong pioneer ang nagpakita ng matinding pananampalataya kay Jesucristo habang sila ay naglalakbay sakay ng bagon o kariton upang magtipon kasama ng mga Banal sa Salt Lake Valley. Ngayon, patuloy na nagpapakita ng matinding pananampalataya ang mga pioneer mula sa iba’t ibang panig ng mundo sa kanilang pagtitipon kasama ng mga Banal saanman sila nakatira. Ang lesson na ito ay makatutulong sa mga estudyante na magkaroon ng hangaring maging mga pioneer sa pamamagitan ng paghahanda ng daan upang sumunod ang iba kay Jesucristo.
Mga Posibleng Aktibidad sa Pag-aaral
Mga Pioneer
Paalala: Maaaring epektibo na makahanap ng mga halimbawa ng mga pioneer sa inyong stake, ward, o bansa at maghandang ibahagi ang kanilang mga kuwento bilang bahagi ng lesson. Kung maaari, anyayahan sila na pumunta sa klase at ibahagi ang kanilang karanasan.
Maaari mong ipakita ang sumusunod na aktibidad upang matulungan ang mga estudyante na maunawaan ang kahulugan ng isang pioneer. Maaaring ibahagi ng mga estudyante ang kanilang mga hula sa klase o sa maliliit na grupo. Maaari mong iangkop ang aktibidad na ito upang maisama ang mga pioneer na ang buhay ay nakaapekto sa mga tao sa inyong lugar.
Itugma ang mga tao sa kanilang mga nagawa.
|
Mga Tao |
Mga Nagawa |
|---|---|
Mga Tao 1. Johnnes Gutenberg | Mga Nagawa A. Unang pangulo ng Relief Society sa Taiwan |
Mga Tao 2. Elizabeth Jackson | Mga Nagawa B. Unang babaeng nanalo ng Nobel Prize, iginawad para sa kanyang pananaliksik tungkol sa radiation |
Mga Tao 3. Chen Lin Shu-liang | Mga Nagawa C. Nag-imbento ng palimbagan |
Mga Tao 4. Edmund Hillary at Tenzing Norgay | Mga Nagawa D. Unang nakaakyat sa tuktok ng Mount Everest |
Mga Tao 5. Marie Curie | Mga Nagawa E. Naglakbay sakay ng kariton patungo sa Salt Lake Valley |
Kapag tapos nang manghula ang mga estudyante, ibigay ang mga tamang sagot (1-C, 2-E, 3-A, 4-D, 5-B).
-
Ano ang pagkakatulad ng mga taong ito?
Tulungan ang mga estudyante na maunawaan na ang isa sa mga pagkakatulad ng mga taong ito ay sila ay mga pioneer. Mailalarawan ang pioneer bilang isang taong nauna at naghanda ng daan na susundan ng iba. Maaari din ninyong panoorin ang “I Am a Pioneer” (1:16), na makikita sa ChurchofJesusChrist.org.
2:3 -
Paano naihanda ng mga nagawa ng mga pioneer na ito ang daan na susundan ng iba?
Ang halimbawa ni Jesucristo
Ibinahagi ni Pangulong M. Russell Ballard ng Korum ng Labindalawang Apostol ang sumusunod tungkol kay Jesucristo:
Ang ating Tagapagligtas na si Jesucristo ang pinakadakilang pioneer sa paghahanda ng daan. Tunay ngang Siya “ang daan” para maisakatuparan ang plano ng kaligtasan upang tayo ay makapagsisi at, sa pamamagitan ng pananampalataya sa Kanya, ay makabalik sa ating Ama sa Langit. (M. Russell Ballard, “Sumunod kay Jesucristo nang May mga Yapak ng Pananampalataya,” Liahona, Nob. 2022, 35)
Upang matulungan ang mga estudyante na masuri ang pahayag na ito, maaari mong sabihin sa kanila na tukuyin ang mga banal na kasulatan na naglalarawan ng mga paraan na si Jesucristo ay isang pioneer. Kung kailangan nila ng tulong, maaari mong ibigay ang mga sumusunod na passage o iba pang mapipili mo.
Basahin ang ilan sa mga talata: Juan 13:15; 14:2–6; 2 Nephi 31:5–12; at Mosias 16:7. Maghanap ng mga paraan kung paano maituturing na pioneer si Jesucristo.
-
Ano ang nahanap ninyo?
-
Paano naging pagpapala sa buhay ninyo ang mga ginawa ng Tagapagligtas sa paghahanda ng daan para sa inyo?
Ipaliwanag sa mga estudyante na maraming paraan kung saan isang pioneer ang Tagapagligtas at Siya lang ang makagagawa nito. Gayunpaman, may ilang paraan para matularan natin ang Kanyang “halimbawa … [at] gawin din ang ginawa [Niya]” (Juan 13:15) upang maging mga pioneer para sa iba. Anyayahan ang mga estudyante na isulat ang sumusunod bilang heading sa kanilang study journal: “Tulad ng Tagapagligtas, maaari akong maging isang pioneer sa pamamagitan ng tapat na pagpapakita sa iba ng daang susundan.”
Maaari mong ipakita ang mga sumusunod na tanong, at sabihin sa mga estudyante na sagutin ang mga ito sa ilalim ng heading sa itaas sa kanilang study journal:
-
Palagay mo ba ay nag-iiwan ka ng isang halimbawa na gusto mong tularan ng iba?
-
Ano ang nagpapasaya sa iyo tungkol sa pagiging isang pioneer? Ano ang nagpapakaba sa iyo?
-
Sa iyong palagay, paano ka matutulungan ni Jesucristo na maging isang pioneer para sa iba?
Sa natitirang bahagi ng lesson na ito, anyayahan ang impluwensya ng Espiritu Santo na dagdagan ang iyong hangarin na maging isang pioneer na katulad ni Cristo na tutularan ng iba.
Mga handcart pioneer
Anyayahan ang mga estudyante na ibahagi ang naaalala nila na natutuhan nila tungkol sa paglalakbay pakanluran at sa Doktrina at mga Tipan 136. Maaari ninyong rebyuhin ang Doktrina at mga Tipan 136:6–7 upang ilarawan ang isang paraan na ang mga unang Banal na naglakbay pakanluran ay inutusan na maging mga pioneer.
Maaari mong ipakita ang larawan ng isang kariton at ibuod ang sumusunod na impormasyon.
Matapos maglakbay ang maraming grupo patungo sa Salt Lake City na sakay ng mga bagon, na karaniwang hinihila ng mga baka, hinikayat ni Brigham Young ang mga Banal na gumamit ng mga kariton. Ang mga pioneer ang mismong humila sa mga kariton para sa mas tipid at mas mabilis na paglalakbay. Tanging 10 sa mahigit 350 ng mga nandarayuhang grupo ang naglakbay gamit ang kariton. Bagama’t nagawa ng karamihan sa mga grupo ng kariton ang paglalakbay nang walang malaking problema, naging dahilan ang mga unos sa taglamig noong 1856 upang maipit sa daan ang Willie at Martin handcart company. Marami ang namatay dahil sa pagkagutom at matitinding temperatura. Ang mga pagsisikap sa pagsagip na ginawa ng mga miyembro ng Simbahan sa Utah ay naglaan ng mga kinakailangang suplay at tumulong sa mga naglakbay na matapos ang kanilang paglalakbay, na nagligtas sa mahigit 1,200 buhay (tingnan sa Mga Paksa sa Kasaysayan ng Simbahan, “Mga Grupo ng mga Kariton,” ChurchofJesusChrist.org/study/history/topics).
Maaari kang magbahagi ng isang kuwento o patotoo mula sa isang handcart pioneer gaya ng sumusunod. Anyayahan ang mga estudyante na maghanap ng mga paraan na maiaangkop nila ang halimbawa ng mga pioneer sa kanilang buhay.
Ibinahagi ni Elder Quentin L. Cook ng Korum ng Labindalawang Apostol ang sumusunod na salaysay ng isang handcart pioneer.
Naantig ako sa salaysay ni Elizabeth Jackson, na ang asawang si Aaron ay namatay matapos ang huling pagtawid sa Platte River kasama ang Martin handcart company. Isinulat niya:
“Hindi ko tatangkaing ilarawan ang aking damdamin nang maiwan akong balo na may tatlong anak, sa gayon kahirap na kalagayan. … Naniniwala ako … na ang aking mga pagdurusa alang-alang sa ebanghelyo ay magpapabanal sa akin para sa aking ikabubuti. …
“[Nagsumamo] ako sa Panginoon, … Siya na nangakong maging katuwang ng mga balo, at ama ng mga ulila. Nagsumamo ako sa Kanya at tinulungan Niya ako.”
Sinabi ni Elizabeth na isinulat niya ang kasaysayang ito para sa mga taong nagdaan din sa gayong sitwasyon sa pag-asang magiging handa ang mga inapo na isakripisyo ang lahat para sa kaharian ng Diyos. (Quentin L. Cook, “Ang mga Babaeng LDS ay Kahanga-hanga!,” Liahona, Mayo 2011, 18)
-
Ano ang pinatotohanan ni Elizabeth tungkol sa Panginoon?
-
Ano ang inaasahan niyang matututuhan ng iba mula sa kanyang halimbawa?
Maaari mong anyayahan ang mga estudyante na tukuyin ang mga doctrinal mastery passage o iba pang mga banal na kasulatan na naglalarawan kung paano nakatanggap si Elizabeth ng lakas mula sa Tagapagligtas. Kasama sa ilang halimbawa ang Mateo 11:28–30; Alma 7:11–13; o Doktrina at mga Tipan 6:36.
Itanong kung paano makatutulong ang mga banal na kasulatang ito sa ating hangarin na maging isang pioneer para sa iba.
Mga halimbawa ng mga pioneer
Ipaliwanag na ang mga Banal ay hindi na inuutusang magtipon sa Salt Lake Valley. Inaanyayahan silang maging mga pioneer sa pamamagitan ng pagtitipon sa mga stake ng Sion saanman sila nakatira at paghahanda ng daan upang sumunod ang iba kay Jesucristo. Ang mga halimbawa ng mga pioneer sa iba’t ibang panig ng mundo ay makatutulong sa atin na sundin si Jesucristo at maging mga pioneer saanman tayo naroon.
Para sa sumusunod na aktibidad, bigyan ang mga estudyante ng handout na “Mga Pioneer sa Iba’t Ibang Panig ng Mundo,” na naglalaman ng mga kuwentong iniangkop mula sa Mga Kasaysayan mula sa Iba’t Ibang Panig ng Mundo na makikita sa ChurchofJesusChrist.org.
Bilang alternatibo, maaari mong ipabasa sa mga estudyante ang mga kuwento ng kanilang mga ninuno sa FamilySearch.org o sabihin sa kanila na pagnilayan ang mga natukoy nila kung nakumpleto nila ang aktibidad sa paghahanda ng estudyante. Maaari din nilang basahin ang tungkol sa mga pioneer sa kanilang bansa na makikita sa Mga Kasaysayan mula sa Iba’t Ibang Panig ng Mundo sa bahaging Kasaysayan ng Simbahan ng Gospel Library.
Kumpletuhin ang sumusunod na aktibidad, at alamin kung paano makatutulong sa iyo ang mga halimbawa ng mga pioneer sa iba’t ibang panig ng mundo sa pagsisikap mong maging isang pioneer.
-
Basahin ang kuwento ng isa o mahigit pang mga pioneer.
-
Tukuyin kung paano sila naging pioneer.
-
Alamin ang mga paraan na tinulungan sila ng Ama sa Langit at ni Jesucristo.
-
Isulat sa iyong study journal kung paano ka mabibigyang-inspirasyon ng kanilang mga halimbawa na katulad ng kay Cristo na maging isang pioneer para sa iba.
Mga Pioneer sa iba’t ibang panig ng Mundo
American Samoa
“Oo ang Sinabi ng Diyos”
Si Leva ‘aia Levao ay namuhay nang may malalang mga problema sa kalusugan. Noong 2015, nagkaroon siya ng mga pigsa sa kanyang mga mata. Gumaling ang mga pigsa matapos siyang bigyan ng mga missionary ng basbas ng priesthood. Sinimulan nila ang pagbabasa ng Aklat ni Mormon kasama siya.
Hindi nasiyahan ang ilang tao sa maliit na komunidad ng isla na makita si Levao na nagsasaalang-alang ng isang bagong relihiyon. Kinutya nila ang kanyang mga pagsisikap at siya ay minaliit. Gayunpaman, nanatili siyang matatag at kalaunan ay nabinyagan. Hindi nagtagal ay sumapi rin sa Simbahan ang asawa niyang si Tui, at ang kanyang tatlong anak, at kalaunan ay naglingkod si Levao sa kanyang branch bilang pangulo ng Relief Society. Ang iba pa, na naimpluwensyahan ng kanyang halimbawa ng katapatan, ay tinawag siyang puso ng Simbahan sa Olosega.
South Korea
“Hindi na Ako Kailanman Muling Lalamigin”
Si Choi Dong Sull ay isang Presbyterian minister na nakadamang responsibilidad niya na protektahan ang mga miyembro ng kanyang kongregasyon mula sa Ang Simbahan ni Jesucristo ng mga Banal sa mga Huling Araw. Gayunpaman, nagsimula siyang makipagkita sa mga missionary at naliwanagan sa mga isyu ng doktrina na bumagabag sa kanya. Batid niyang ang kanyang mga bagong paniniwala ay mangangailangan ng pagbabago ng propesyon at maaapektuhan ang ugnayan niya sa kanyang ama, na tagapamahala ng Simbahang Presbyterian ng Korea sa panahong iyon.
Pinili ni Dong Sull na magpabinyag sa Han River. “Gusto kong ang binyag ko ay maging karanasang katulad ng kay Jesucristo hangga’t maaari,” paliwanag niya. Noong mahamog na umaga ng Setyembre 5, 1981, ang tubig ng Han River ay malamig, ngunit nang umahon siya mula sa tubig, inilarawan ni Dong Sull ang init na nadama niya sa kanyang kalooban. “Ngayon ay kabilang na ako sa totoong Simbahan ng Diyos,” sabi niya. “Hindi na ako kailanman muling lalamigin.” Makalipas ang dalawang linggo, nabinyagan din ang kanyang asawa at dalawang anak na lalaki—sa pagkakataong ito sa isang mainit na meetinghouse. Ang pagsapi sa Simbahan ay hindi naging madali para kay Dong Sull at sa kanyang pamilya, ngunit nagbigay-daan ito sa mga bagong pagpapala. “Ang mga pag-uusig at pagdurusa … matapos akong mabinyagan ay hindi ko kayang mailarawan sa salita,” sabi ni Dong Sull. “Marami ang nawala sa amin sa [pagsapi sa Simbahan], subalit nagkaroon kami nang higit pa kaysa pinangarap namin.”
Côte d’Ivoire
“Mga Pintuan ng Buhay at Kaligayahan”
Si Lydie Zebo Bahie ang huling anak sa kanyang pamilya na nakatira sa tahanan ng kanyang mga magulang nang pumanaw ang mga ito. Ang pagpanaw na ito ay nagdulot sa kanya ng matinding depresyon. Ipinakilala siya ng kanyang pamangkin na si Faet Nadege, sa Ang Simbahan ni Jesucristo ng mga Banal sa mga Huling Araw.
Nang magsimba siya sa unang pagkakataon, nakadama si Lydie ng matinding pagmamahal mula sa kababaihan ng mga organisasyon ng Relief Society at Young Women. Bagama’t tumigil siya sa pagbabasa sa panahon ng kanyang depresyon, nakita niya ang kanyang sarili na nakakapokus na muli nang pag-aralan niya ang Aklat ni Mormon. Nabinyagan siya noong Nobyembre 18, 1995.
Hindi nagtagal matapos ang kanyang binyag, nakatanggap siya ng pagkakataong ibalik ang pagmamahal na ipinakita sa kanya sa pamamagitan ng paglilingkod sa mga organisasyon ng Relief Society at Young Women. Naglingkod rin siya bilang missionary ng branch, nag-aanyaya sa iba na tuklasin ang gayon ding pagkakaibigan at kapayapaan na natagpuan niya kamakailan. “Pinalakas ako ng lahat ng tungkuling ito at tinulungang umunlad, kapwa sa espirituwal at mental,” sabi ni Lydie.
Si Lydie ang isa sa mga unang sister missionary na naglingkod sa Democratic Republic of the Congo Kinshasa Mission.
Kapag natapos nang mag-aral ang mga estudyante, maaari mo silang ilagay sa maliliit na grupo upang ibahagi ang kanilang natutuhan.
Sabihin sa mga estudyante na isulat ang kanilang natutuhan o pinag-aralan ngayon na nakatutulong na maragdagan ang kanilang hangarin na maging isang pioneer. Maaari din silang sumulat ng mga paraan kung paano nila gustong tularan ang halimbawa ng Tagapagligtas at maging isang pioneer para sa iba at kung bakit.