Lesona 152: Fotopampianarana sy Fanekempihavanana 137–138

Fotopampianarana sy Fanekempihavanana 138, Tapany 1

Ny fahitana momba ny fitsidihan’ny Mpamonjy ny tontolon’ny fanahy

Raha nalahelo noho ny fahafatesan’ireo olon-tiany tao amin’ny fianakaviany sy ory noho ny faharavana nateraky ny Ady Lehibe Faharoa sy ny valanaretina gripa naneran-tany ny Filoha Joseph F. Smith, dia nitady fampiononana tao amin’ny soratra masina izy. Rehefa nisaintsaina ireo andinin-tsoratra masina ao amin’ny 1 Petera 3–4 izy dia nahazo fahitana lehibe momba ny fanompoana nataon’ny Mpamonjy tany amin’ny tontolon’ny fanahy teo anelanelan’ny fahafatesany sy ny Fitsanganany tamin’ny maty. Ankehitriny ny fahitan’ny Filoha Smith dia lasa ny Fotopampianarana sy Fanekempihavanana 138. Ity lesona ity dia afaka manampy ny mpianatra hahatakatra ny fomba hanoloran’ny Mpamonjy famonjena ho an’ireo zanaky ny Ray any An-danitra any amin’ny tontolon’ny fanahy.

Sahanasa fianarana azo atao

Mankaiza isika rehefa maty?

Asao ny mpianatra hisaintsaina ity rafi-tantara manaraka ity na hamorona rafi-tantara izay mifanaraka amin’ny zavatra ilain’izy ireo. Ny tanjon’ilay rafi-tantara dia ny hanampy ireo mpianatra hanombantombana ny zavatra fantatr’izy ireo momba ny tontolon’ny fanahy. Azon’ny mpianatra atao ny mizara izay takatr’izy ireo fa mitranga amin’ireo izay nanaiky sy tsy nanaiky ny filazantsaran’i Jesoa Kristy.

Taorian’ny fandevenana an’i Bebe Roberts dia miteny aminao i Julie fa samy maty kanefa tsy natao batisa tany amin’Ny Fiangonan’i Jesoa Kristy ho an’ny Olomasin’ny Andro Farany i Bebe sy i Dadabe Roberts. Ireo ray aman-drenibeny hafa (i Bebe sy i Dadabe Jones) dia nodimandry ka nitoetra ho mpikamban’ny Fiangonana mahatoky nandritra ny androm-piainan’izy ireo. Manontany anao i Julie hoe: “Inona no hitranga amin’ireo ray aman-drenibeko izay tsy vita batisa?”

Saintsaino ny zavatra fantatrao momba ny tontolon’ny fanahy.

• Hatraiza ny fahatokian-tenanao hizara fahamarinana momba ny tontolon’ny fanahy amin’i Julie?

Ampahatsiahivo ny mpianatra fa isan’ireo anjara asan’ny Fanahy Masina ny mijoro ho vavolombelona momba ny fahamarinana. Asao izy ireo mba hiezaka ny hahay hihaino tsara ny fijoroana ho vavolombelona ataon’ny Fanahy mikasika ireo fahamarinana momba ny drafitry ny famonjen’ny Ray any An-danitra izay hohalalinin’izy ireo androany.

Ny fahitana momba ny fanavotana ny maty

Mba hanomezana ny sahan-kevitra ara-tantara amin’ny Fotopampianarana sy Fanekempihavanana 138, dia zarao ity teny nambaran’ny Filoha Ballard ity.

Ny Filoha M. Russell Ballard tao amin’ny Kôlejin’ny Apôstôly Roambinifolo, izay zafikelin’ny Filoha Joseph F. Smith, dia nizara izao manaraka izao momba ilay fahitana izay lasa Fotopampianarana sy Fanekempihavanana 138 amin’izao fotoana izao.

Tamin’ny 3 ôktôbra 1918, rehefa niaina alahelo lalina noho ny olona an-tapitrisany maty maneran-tany noho ny ady sy ny valanaretina ary koa noho ny nahafatesan’ireo tao amin’ny fianakaviany, dia nandray ilay fanambarana avy any an-danitra ny Filoha Smith, izay antsoina hoe “ny fahitana momba ny fanavotana ny maty.” …

Ilay fanambarana izay noraisiny tamin’ny 3 ôktôbra dia nankahery ny fony ary nitondra valiny ho an’ireo fanontaniana maro nananany. Isika koa dia afaka mahazo hery sy mianatra bebe kokoa mikasika ny hoavintsika manokana rehefa maty isika sy ireo olon-tiantsika ka mankany amin’ny tontolon’ny fanahy amin’ny fandalinana io fanambarana io sy ny fandinihana ny lanjany eo amin’ny fomba hitondrantsika ny fiainantsika isan’andro. (M. Russell Ballard, “Ny fahitana momba ny fanavotana ny maty,” Liahona, nôv. 2018, 72–73.)

Vakio ny Fotopampianarana sy Fanekempihavanana 138:1–4, ka tadiavo ireo fahamarinana izay nosaintsainin’ny Filoha Smith rehefa nandray io fahitana io izy.

• Inona no manan-danja aminao momba ny zavatra izay nosaintsainin’ny Filoha Smith teo am-panaovany fandalinana?

• Inona no fantatry ny Filoha Smith momba an’i Jesoa Kristy sy ny sorona fanavotana nataony?

  Ampio ny mpianatra hamantatra fahamarinana iray tahaka izao manaraka izao: Azo vonjena ny zanaky ny Ray any An-danitra tsirairay avy amin’ny alalan’ny Sorompanavotan’i Jesoa Kristy sy amin’ny alalan’ny fankatoavana ireo fitsipiky ny filazantsarany.

  Azonao atao ny mamintina ny Fotopampianarana sy Fanekempihavanana 138:5–10 amin’ny alalan’ny fizarana fa namaky ny 1 Petera 3–4 ny Filoha Smith rehefa nisaintsaina ny fanavotana ny maty izay nampanantenain’ny sorona fanavotan’ny Mpamonjy. Azonao ampahafantarina fa ny 1 Petera 4:6 dia andinin-tsoratra masina fifehezana fotopampianarana.

• Inona no fantatrao momba ny fomba nanaovan’i Jesoa Kristy ny famonjena ho afaka ny ho azon’ny zanaky ny Ray any An-danitra rehetra?

Ny nisehoan’ny Mpamonjy tany amin’ny tontolon’ny fanahy

Rehefa mandalina ilay fahitana ny mpianatra dia mety hanampy ny mampahafantatra fa ny Filoha Smith dia nahita ny Mpamonjy nitsidika ny tontolon’ny fanahy teo anelanelan’ny fotoana nahafatesany sy ny Fitsanganany tamin’ny maty.

Ampahatsiahivo ny mpianatra fa ny tontolon’ny fanahy dia mizara ho paradisa sy tranomaizina. Raha ilaina dia azonao atao ny manazava fa ny tranomaizina ato amin’ity sahan-kevitra ity dia entina ilazana toerana tsy maharitra any amin’ny tontolon’ny fanahy ho an’ireo izay maty ka tsy nahalala ny fahamarinana (fa tsy fonja na efitrano figadrana). Ireo fanahy ao amin’io tranomaizina io koa dia ireo izay tsy nankatkò nandritra ny fiainana an-tany topics.ChurchofJesusChrist.org

Vakio ity teny nambaran’ny Filoha Dallin H. Oaks ao amin’ny Fiadidiana Voalohany manaraka ity mikasika ny asa famonjena ho an’ireo zanaky ny Ray any An-danitra rehetra ao amin’ny tontolon’ny fanahy.

Ny asa famonjena ao amin’ny tontolon’ny fanahy dia ny fanafahana ireo fanahy amin’ny zavatra izay faritan’ny soratra masina matetika hoe “fatorana.” Eo ambany karazana fatorana ny olona rehetra ao amin’ny tontolon’ny fanahy. (Dallin H. Oaks, “Matokia ny Tompo,” Liahona, nôv. 2019, 26)

Rehefa mandalina ilay fahitana voarakitra ao amin’ny Fotopampianarana sy Fanekempihavanana 138 ianao dia tadiavo ny fomba maha-voafatotra ireo fanahy zanaky ny Ray any An-danitra sy ny fomba hanafahana azy ireo amin’ny alalan’ny Mpamonjy sy ny sorona fanavotany.

Fomba iray handaminana ny kilasy ny fizarana ny mpianatra ho vondrona maromaro misy olona telo avy. Asao ny mpianatra handalina ny iray amin’ireto fizarana telo manaraka ireto. Aorian’ny fotoana hifanakalozana hevitra momba ireo fanontaniana nomena dia azon’ny mpianatra atao ny mizara ny zavatra nianarany amin’ny hafa ao amin’ny vondrona misy azy izay nandalina fizarana iray hafa.

Amporisiho ny mpianatra hizara ireo fahamarinana izay ianarany. Raha te hahazo fampiofanana mikasika ny fomba hanaovana izany dia jereo ny fampiofanana mitondra ny lohateny hoe “Amporisiho ny mpianatra hizara ireo fahamarinana izay ianarany” izay hita ao amin’ny Fahaiza-manao ho fampivoarana ny mpampianatra: Ataovy izay hisian’ny fianarana amim-pahavitrihana. Hevero ny hanao fanazaran-tena amin’ny fampiasana ilay fahaiza-manao “Asao ny mpianatra hifampizara ny zavatra ianaran’izy ireo.”

• Inona no hitanao?

• Ahoana no fomba nandraisan’ireo fanahy ny filazantsaran’ny Mpamonjy nandritra ny fiainana an-tany?

• Ahoana no naha-voafatotra ireo fanahy ireo? Ahoana no fomba nanafahan’ny Mpamonjy azy ireo?

• Inona avy ireo fahafahana azo araraotina izay omen’ny Mpamonjy ireo fanahy ao amin’ny paradisa? Ao amin’ny tranomaizina?

• Inona no azontsika atao mba hanampiana ny Mpamonjy amin’ny asany?

1. Manafaka ireo fanahy ao amin’ny paradisa ny Mpamonjy.

Vakio ny Fotopampianarana sy Fanekempihavanana 138:11–19, 23–24, 50–52, ka tadiavo ny fomba nanafahan’ny Mpamonjy ireo fanahy ao amin’ny paradisa.

2. Manafaka ireo fanahy ao amin’ny tranomaizina ny Mpamonjy.

Vakio ny Fotopampianarana sy Fanekempihavanana 138:20–22, 29–37, 57–59, ka tadiavo ny fomba nanafahan’ny Mpamonjy ireo fanahy ao amin’ny tranomaizina.

3. Mandamina ny fitoriana ny filazantsara any amin’ny tontolon’ny fanahy ny Mpamonjy.

Vakio ny Fotopampianarana sy Fanekempihavanana 138:30–37, 57–59, ka tadiavo ny fomba nandaminan’ny Tompo ny fitoriana ny filazantsara amin’ireo izay any amin’ny tranomaizina.

Mampiseho ny fahatakarana

Mba hanampiana ny mpianatra hampiseho ny fahatakarany ny Fotopampianarana sy Fanekempihavanana 138 dia azon’ny mpianatra atao ny milalao an-tsehatra ilay rafi-tantara tany am-piandohan’ny fotoam-pianarana. Ny mpianatra dia afaka mifandimby milalao ny anjara asan’i Julie ary manao fanazaran-tena amin’ny fomba hamaliana ny fanontaniany ho an’ireo ray aman-drenibeny tsirairay. Rehefa avy nomena fotoana ampy hanaovana fanazaran-tena ny mpianatra dia azon’izy ireo atao ny mizara amin’ny iray kilasy ny zavatra tsapany sy ny fomba hiantefan’ireo fampianarana ireo amin’izy ireo.

Azonao atao ny mizara ny fijoroana ho vavolombelona anananao momba ny Ray any An-danitra sy an’i Jesoa Kristy ary ny famonjena atolotr’ Izy ireo ho an’ny velona sy ny maty.

Loharanom-pitaovana fanampiny

Aiza no ahafahako mianatra misimisy kokoa momba ny fahitana ny tontolon’ny fanahy sy ny famonjena ho an’ny maty?

• Sujets et questions, “Monde des esprits,” topics.ChurchofJesusChrist.org

Ahoana no fomba tokony hitadiavako valiny ho an’ireo fanontaniako momba ny tontolon’ny fanahy?

Nanazava ny fomba hitadiavantsika valiny ho an’ny fanontaniantsika ny Filoha Dallin H. Oaks ao amin’ny Fiadidiana Voalohany rehefa avy nizara izy fa betsaka ny zavatra tsy fantatsika momba ny tontolon’ny fanahy:

Ho an’ny fanontaniana rehetra momba ny tontolon’ny fanahy dia valiny roa no arosoko. Voalohany, tadidio fa tia ny zanany Andriamanitra ary tsy maintsy hanao izay tsara indrindra ho antsika tsirairay avy Izy. Faharoa, tadidio ity fampianaran’ny Baiboly efa tsy zovina ity, izay tena nanampy ahy indrindra tamin’ny fanontaniana maro tsy nahazoam-baliny:

“Matokia an’i Jehovah amin’ny fonao rehetra, fa aza miankina amin’ny fahalalanao.

“Maneke Azy amin’ny alehanao rehetra, fa Izy handamina ny lalanao” (Ohabolana 3:5–6). …

Afaka manontany tena mangingina mikasika ny toe-javatra hiainana any amin’ny tontolon’ny fanahy isika, na miresadresaka an’ireo na fanontaniana hafa tsy voavaly rehefa miaraka amin’ny fianakaviana na miaraka amin’ny olona tena akaikin’ny fo. Kanefa isika dia tsy tokony hampianatra na hampiasa toy ny fotopampianarana ôfisialy ny zavatra tsy mahafeno ny fenitry ny fotopampianarana ôfisialy. Ny fanaovana izany dia tsy mampandroso ny asan’ny Tompo ary mety hahakivy mihitsy aza ireo olona izay mikatsaka ny fampiononana na ny fankaherezana azy manokana amin’ny alalan’ny fanambarana ho an’ny tena manokana izay omanin’ny Tompo mba homena ny tsirairay avy amintsika. (Dallin H. Oaks, “Matokia ny Tompo,” Liahona, nôv. 2019, 28)

Ahoana no fomba hanafahan’ny Mpamonjy ireo izay any amin’ny tontolon’ny fanahy amin’ny fatorana?

Nampianatra izao ny Filoha Dallin H. Oaks ao amin’ny Fiadidiana Voalohany:

Ny fanambarana lehibe azon’ny Filoha Joseph F. Smith, izay lasa soratra masina ôfisialy ao amin’ny fizarana 138 ao amin’ny Fotopampianarana sy Fanekempihavanana dia milaza fa ireo marina nodimandry izay tao anatin’ny toetry ny “fiadanana” (Fotopampianarana sy Fanekempihavanana 138:22) teo am-piandrasan’izy ireo ny Fitsanganan’i Kristy tamin’ny maty (jereo ny Fotopampianarana sy Fanekempihavanana 138:16) dia “nihevitra ny fisarahana maharitra eo amin’ny fanahiny sy ny vatany ho toy ny fatorana” (Fotopampianarana sy Fanekempihavanana 138:50).

Ampahoriana amin’ny fatorana iray fanampiny koa ny ratsy fanahy. Noho ireo fahotana tsy nibebahana, izy ireo dia ao anatin’ilay nantsoin’ny Apôstôly Petera hoe “tranomaizina” (1 Petera 3:19; jereo koa ny Fotopampianarana sy Fanekempihavanana 138:42). Ireo fanahy ireo dia faritana hoe “voafatotra” na “babo” (Fotopampianarana sy Fanekempihavanana 138:31, 42) na hoe “hatsipy any amin’ny haizina ivelany” izay ahitana “fitomaniana, sy fidradradradrana ary fikitroha-nify” eo am-piandrasan’izy ireo ny fitsanganana amin’ny maty sy ny fitsarana (Almà 40:13–14).

Ny fitsanganana amin’ny maty ho an’ny rehetra ao amin’ny tontolon’ny fanahy dia azo antoka amin’ny alalan’ny Fitsanganan’i Jesoa Kristy tamin’ny maty (jereo ny 1 Korintiana 15:22), na dia mitranga amin’ny fotoana samy hafa aza izany ho an’ny vondrona samy hafa. Mandra-pahatonga izany fotoana voatendry izany dia mahakasika ny asa famonjena voalohany indrindra ny zavatra resahan’ny soratra masina amintsika momba ny zavatra atao any amin’ny tontolon’ny fanahy. Kely ny zavatra hafa nambara ankoatra izany. Ny filazantsara dia torina amin’ny olona tsy manam-pahalalana, tsy nibebaka, ary mpikomy mba hanafahana azy ireo amin’ny famatorana ary handroso mankany amin’ireo fitahiana nomanin’ny Ray any An-danitra be fitiavana ho azy ireo.

Ny fatorana any amin’ny tontolon’ny fanahy izay mihatra amin’ireo fanahy marina niova fo dia ny tsy maintsy hiandrasan’izy ireo ny fanatanterahana ny ôrdônansy hisoloana tena azy ireo ety an-tany, ary angamba mety homena lalana mihitsy izy ireo mba hanentana ny hafa hanao izany, mba hahafahana manao batisa azy ireo sy hahazoany ireo fitahian’ny Fanahy Masina (jereo ny Fotopampianarana sy Fanekempihavanana 138:30–37, 57–58). Ireo ôrdônansy isoloana tena eto an-tany ireo koa dia manome fahefana azy ireo mba handroso eo ambany fahefan’ny fisoronana hanatevina ny vondron’ireo olo-marina izay afaka mitory ny filazantsara ao amin’ny tranomaizin’ny fanahy. (Dallin H. Oaks, “Matokia ny Tompo,” Liahona, nôv. 2019, 26–27)

Inona no takina amin’ireo izay any amin’ny tranomaizin’ny fanahy?

Rehefa nitarika horonan-tsary fitsidihana ny Tempolin’i Rome Italie talohan’ny nanokanana azy ny Loholona isany David A. Bednar sy Ronald A. Rasband ao amin’ny Kôlejin’ny Apôstôly Roambinifolo dia nampianatra hoe:

Hoy ny Mpamonjy: “Raha misy olona tsy ateraky ny rano sy ny Fanahy, dia tsy mahazo miditra amin’ny fanjakan’ny [lanitra] izy.” Ny batisa asitrika ho famelana ny fahotana dia ôrdônansin’ny famonjena tena ilaina ao amin’ny filazantsaran’i Jesoa Kristy. Ary manao batisa ho an’ny maty isika eto amin’ny tempoly. Hisy mpikamban’ny Fiangonanay miakanjo fotsy anankiroa izay hiditra ao amin’ny dobo fanaovana batisa, ary ao no hatao batisa ho an’ireo razambeny izy ireo. Ny batisa ho an’ny maty dia nampianarin’i Paoly Apôstôly ao amin’ny Testamenta Vaovao, ary manana fahafahana lehibe isika hanohy izany ôrdônansy izany ao amin’ny Fiangonana ankehitriny any amin’ireo tempoly rehetra manerana izao tontolo izao.

Iray amin’ireo fanontaniana lehibe amin’ny maha-Kristianina ny zavatra mitranga amin’ireo izay tsy mbola nandre momba an’i Jesoa Kristy velively. Ny anarany no hany anarana eo ambanin’ny lanitra izay ahafahan’ny lehilahy iray na ny vehivavy iray ho voavonjy. Saingy teo anivon’ireo rehetra izay efa niaina, dia vitsy ihany no efa nandre momba Azy sy nanana fahafahana hianatra ny fotopampianarany, ary handray ny ôrdônansin’ny famonjena an’ny batisa asitrika. Azo tanterahina izany amin’ny alalan’ny batisa isoloana tena ho an’ny maty. Misy olona sasantsasany izay hanontany raha toa ka manery ireo razambenay izahay mba ho lasa mpikambana ao amin’Ny Fiangonan’i Jesoa Kristy ho an’ny Olomasin’ny Andro Farany. Tsia no valiny. Fanomezana feno fitiavana izany. Ary avy eo izy ireo dia manana fahafahana hanaiky na handà izany ôrdônansy izany. (David A. Bednar and Ronald A. Rasband, in “Two Apostles Lead a Virtual Tour of the Rome Italy Temple” [video], ChurchofJesusChrist.org)

Sahanasa fianarana fanampiny

Lalaovy an-tsehatra ilay fahitana ao amin’ny fizarana 138

Hevero ny hanampy ny mpianatra hilalao an-tsehatra amim-panajana fatratra ny hoe mety ho toy ny ahoana izany fitoriana ny filazantsara any amin’ny tontolon’ny fanahy izany. Azonao atao ny milalao an-tsehatra ny rafi-tantara momba an’i Julie izay ao anatin’ny lesona. Azonao atao ny manasa mpianatra roa hisolo tena an’i Bebe sy Dadabe Roberts, izay mandeha any amin’ny tranomaizin’ny fanahy. Ny andiana mpianatra iray hafa dia afaka misolo tena an’i Bebe sy i Dadabe Jones, izay mandeha any amin’ny paradisan’ny fanahy. Asao ireo mpianatra izay misolo tena an-dry Jones hitsidika an-dry Roberts mba hampianatra azy ireo ny filazantsara. Manasà mpianatra iray hafa hisolo tena an’i Volasoa sy ny anadahiny, izay atao batisa any amin’ny tempoly ho an-dry Roberts izay ray aman-dreniben’izy ireo. Avy eo dia afaka mandao ny tranomaizin’ny fanahy ry Roberts ary miditra ao amin’ny paradisan’ny fanahy.

Fanamarihana: Ny tanjona dia tsy ny haneho hoe iza no mampianatra ny filazantsara amin’iza any amin’ny tontolon’ny fanahy, fa ny hanehoana kosa ny fomba handaozan’ireo fanahy ny tranomaizin’ny fanahy rehefa avy nanaiky ny ôrdônansin’ny batisa izay tanterahina any amin’ny tempoly izy ireo (jereo ny Fotopampianarana sy Fanekempihavanana 138:31).

Olona avy any amin’ny tontolon’ny fanahy nitsidika ny raiben’ny Filoha Nelson

Mba hanamafisana ireo fahamarinana hitan’ny mpianatra nandritra ny fandalinana ny fizarana 138, dia azonao atao ny mizara amin’izy ireo ny tantara iray izay nozarain’ny Filoha Nelson momba ny raibeny. Azonao atao ny mampiseho ny horonan-tsary “La visite d’un père” (3:20). Aorian’ilay horonan-tsary dia azonao hametrahana fanontaniana mitarika ho amin’ny fifanakalozan-kevitra tahaka ireto manaraka ireto ny mpianatra:

• Inona no zavatra nianaranao avy tamin’ny tantara notantarain’ny Filoha Nelson?

• Inona no ampianarin’io tantara io anao momba ny drafitry ny famonjen’ny Ray any An-danitra?

Misaintsaina sy mandinika ny soratra masina

Raha hahazoan’ny mpianatra tombontsoa ny fanaovana fifanakalozan-kevitra momba ny fomba hanasan’ny fisaintsainana na ny fandinihana ny soratra masina fanambarana dia asao izy ireo hamaky ny Fotopampianarana sy Fanekempihavanana 138:1–4, 11, 29. Angataho izy ireo hitady ireo teny nampiasain’ny Filoha Smith mba hamaritana ny fomba nentiny nanao io fandalinana soratra masina io. Mety hahita fahamarinana toy izao manaraka izao ny mpianatra: ny fisaintsainana ny soratra masina sy ny fandinihana ny sorona fanavotan’ny Mpamonjy dia afaka manomana antsika handray fanambarana avy amin’ Andriamanitra.

Asao ny mpianatra hizara ny zavatra niainan’izy ireo rehefa nisaintsaina na nandinika ny soratra masina izy ireo raha toa ka tsy dia mikasika ny momba ny tenan’izy ireo manokana izany. Azonao atao ny mametraka fanontaniana tahaka ireto manaraka ireo:

• Nahoana, araka ny hevitrao, no afaka mitarika mankany amin’ny fahazoana fanambarana ny fisaintsainana ny soratra masina?