« មេរៀនទី ១៥៣—គោលលទ្ធិ និងសេចក្ដីសញ្ញា ១៣៨ ផ្នែកទី ២ ៖ ‹ ត្រូវបានរៀបចំឲ្យមក នៅពេលកំណត់នៃព្រះ › » សៀវភៅសិក្សាព្រះគម្ពីរគោលលទ្ធិ និងសេចក្ដីសញ្ញា សម្រាប់គ្រូបង្រៀនថ្នាក់សិក្ខាសាលា ( ឆ្នាំ ២០២៥ )
« គោលលទ្ធិ និងសេចក្ដីសញ្ញា ១៣៨ ផ្នែកទី ២ » សៀវភៅសិក្សាព្រះគម្ពីរគោលលទ្ធិ និងសេចក្ដីសញ្ញា សម្រាប់គ្រូបង្រៀនថ្នាក់សិក្ខាសាលា
មេរៀនទី ១៥៣ ៖ គោលលទ្ធិ និងសេចក្តីសញ្ញា ១៣៧–១៣៨
គោលលទ្ធិ និងសេចក្តីសញ្ញា ១៣៨ ផ្នែកទី ២
« ត្រូវបានរៀបចំឲ្យមក នៅពេលកំណត់នៃព្រះ »
ដោយជាផ្នែកនៃការនិមិត្តរបស់លោកពីពិភពវិញ្ញាណ ប្រធាន យ៉ូសែប អេហ្វ ស៊្មីធ បានឃើញវិញ្ញាណដ៏ឧត្តុង្គឧត្ដម និងពួកអ្នកធំរបស់ព្រះវរបិតាសួគ៌ជាច្រើន ។ លោកបានឃើញព្យាការីពីបុរាណ ដែលបានធ្វើកិច្ចការរបស់ព្រះអម្ចាស់ដោយស្មោះត្រង់ ។ លោកក៏បានឃើញអ្នកដទៃទៀតដែលព្រះអម្ចាស់បានរក្សាទុកឲ្យកើតនៅថ្ងៃចុងក្រោយដែរ ដើម្បីសាងសង់ព្រះវិហារបរិសុទ្ធ និងធ្វើពិធីបរិសុទ្ធសម្រាប់មនុស្សស្លាប់ ។ ពិធីបរិសុទ្ធបែបនេះត្រូវបានធ្វើឡើងបានតាមរយៈកិច្ចការព្រះវិហារបរិសុទ្ធ និងពង្សប្រវត្តិ ។ មេរៀននេះអាចជួយសិស្សឲ្យមានការជំរុញចិត្តដើម្បីចូលរួមក្នុងកិច្ចការព្រះវិហារបរិសុទ្ធ និងពង្សប្រវត្តិ ។
សកម្មភាពរៀនសូត្រដែលអាចមាន
កិច្ចការដ៏សំខាន់របស់ខ្ញុំ
ការបំផុសគំនិតខាងក្រោមអាចជួយសិស្សឲ្យគិតអំពីកិច្ចការសំខាន់ៗដែលព្រះវរបិតាសួគ៌មានឲ្យពួកគេធ្វើ ។ បន្ទាប់ពីមានពេលវេលាគិតពិចារណា និងសរសេរហើយ សិស្សដែលស្ម័គ្រចិត្តអាចចែកចាយចម្លើយរបស់ពួកគេបាន ។
-
កិច្ចការដ៏សំខាន់បំផុតមួយចំនួនដែលខ្ញុំបានធ្វើនៅក្នុងជីវិតរបស់ខ្ញុំគឺ …
-
កិច្ចការដ៏សំខាន់បំផុតមួយចំនួនដែលខ្ញុំអាចធ្វើក្នុងជីវិតរបស់ខ្ញុំរួមមាន …
-
ព្រះវរបិតាសួគ៌បានបញ្ជូនខ្ញុំមកផែនដីនៅពេលនេះ ដើម្បី …
សូមអញ្ជើញសិស្សឲ្យស្វែងរកវិវរណៈផ្ទាល់ខ្លួន ដើម្បីដឹងពីកិច្ចការសំខាន់ៗមួយចំនួនដែលព្រះវរបិតាសួគ៌ និងព្រះយេស៊ូវគ្រីស្ទសព្វព្រះទ័យឲ្យពួកគេសម្រេចបាន ។ សិស្សក៏អាចសិក្សាពររបស់លោកអយ្យកោរបស់ពួកគេនៅផ្ទះ ដើម្បីស្វែងយល់បន្ថែមអំពីការណ៍នេះផងដែរ ។
ពួកវិញ្ញាណជម្រើសៗដែលបានរក្សាទុកឲ្យមកនៅពេលពេញកំណត់
សូមអញ្ជើញសិស្សឲ្យចែកចាយអ្វីដែលពួកគេចងចាំអំពីផែនការរបស់ព្រះវរបិតាសួគ៌ចេញពីការនិមិត្តរបស់ប្រធាន យ៉ូសែប អេហ្វ ស្ម៊ីធ អំពីពិភពវិញ្ញាណ ( សូមមើល គោលលទ្ធិ និងសេចក្តីសញ្ញា ១៣៨:១១–៦០ ) ។
សូមជួយសិស្សយល់ថា នៅក្នុង គោលលទ្ធិ និងសេចក្តីសញ្ញា ១៣៨:៣៨–៤៩, ៥៣ ប្រធាន យ៉ូសែប អេហ្វ ស្ម៊ីធ បានឃើញវិញ្ញាណឧត្តុង្គឧត្ដម និងពួកអ្នកធំជាច្រើន ។ អ្នកអាចអញ្ជើញសិស្សឲ្យចង្អុលបង្ហាញពីមនុស្សមួយចំនួនដែលប្រធាន ស្ម៊ីធ បានឃើញក្នុងការនិមិត្តរបស់លោក ។
សូមអាន គោលលទ្ធិ និងសេចក្តីសញ្ញា ១៣៨:៥៣–៥៦ ដោយរកមើលកិច្ចការដែលព្រះវរបិតាសួគ៌បានរៀបចំវិញ្ញាណឧត្តុង្គឧត្ដមជាច្រើនដើម្បីសម្រេចបាននៅថ្ងៃចុងក្រោយ ។
-
តើឃ្លាអ្វីខ្លះនៅក្នុងខគម្ពីរទាំងនេះអាចសំដៅលើអ្នក ?
-
តើអ្នករៀនសូត្រអ្វីខ្លះអំពីកិច្ចការរបស់ព្រះវរបិតាសួគ៌សម្រាប់អ្នក ?
-
តើអ្នកនឹងសង្ខេបខគម្ពីរទាំងនេះទៅជាសេចក្តីថ្លែងការណ៍អំពីសេចក្ដីពិតដោយរបៀបណា ?
នៅពេលសិស្សសង្ខេបខគម្ពីរទាំងនេះ សូមជួយពួកគេស្វែងរកសេចក្ដីពិតដូចខាងក្រោមនេះ ៖ ព្រះវរបិតាសួគ៌បានរក្សាទុកពួកវិញ្ញាណជម្រើសៗដើម្បីធ្វើការនៅក្នុងចម្ការទំពាំងបាយជូររបស់ព្រះអម្ចាស់សម្រាប់សេចក្ដីសង្គ្រោះនៃបុត្រាបុត្រីទ្រង់ ។
-
តើមានរបៀបអ្វីខ្លះដែលយើងអាចធ្វើការនៅក្នុងចម្ការទំពាំងបាយជូររបស់ព្រះអម្ចាស់ ដើម្បីជួយសង្គ្រោះបុត្រាបុត្រីរបស់ទ្រង់ ?
ប្រសិនបើសិស្សមិនបានលើកឡើងទេ អ្នកអាចទាញចំណាប់អារម្មណ៍របស់ពួកគេទៅមើល ខទី ៥៤ ។ សូមជួយពួកគេឲ្យទទួលស្គាល់ថា យើងអាចធ្វើការនៅក្នុងចម្ការទំពាំងបាយជូររបស់ព្រះអម្ចាស់ដោយការចូលរួមក្នុងពិធីបរិសុទ្ធនៃព្រះវិហារបរិសុទ្ធសម្រាប់មនុស្សស្លាប់ ។ អ្នកអាចរំឭកសិស្សថា ការធ្វើពិធីបរិសុទ្ធនៃព្រះវិហារបរិសុទ្ធសម្រាប់មនុស្សនៅផ្នែកម្ខាងទៀតនៃវាំងនន គឺជាវិធីមួយដែលយើងជួយប្រមូលសាសន៍អ៊ីស្រាអែល ។
សេចក្តីថ្លែងការណ៍ខាងក្រោមនេះអាចជួយសិស្សដឹងថា គោលលទ្ធិ និងសេចក្តីសញ្ញា ១៣៨:៥៣–៥៦ អនុវត្តចំពោះពួកគេ ។ ដើម្បីអនុវត្តការភ្ជាប់ទៅបណ្ណាល័យដំណឹងល្អ សិស្សអាចបង្កើតតំណភ្ជាប់មួយរវាងខគម្ពីរ និងសេចក្ដីថ្លែងការណ៍ ។
ប្រធាន រ័សុល អិម ណិលសុន បានថ្លែងទីបន្ទាល់ ៖
ក្នុងចំណោមមនុស្សទាំងអស់ដែលធ្លាប់រស់នៅលើផែនដីនេះ ពួកយើង គឺជាមនុស្សដែលបានចូលរួមនៅក្នុងព្រឹត្តការណ៍នៃការប្រមូលផ្ដុំដ៏អស្ចារ្យចុងក្រោយនេះ ។ ឱ នោះជារឿងរំភើបណាស់ !
ព្រះវរបិតាសួគ៌របស់យើងបានរក្សាទុកវិញ្ញាណដ៏អស្ចារ្យបំផុតជាច្រើន—ប្រហែលជាខ្ញុំអាចនិយាយថា ជាក្រុមដ៏ល្អបំផុតរបស់ទ្រង់—សម្រាប់ដំណាក់កាលចុងក្រោយនេះ ។ ពួកវិញ្ញាណដ៏អស្ចារ្យ ជាវីរបុរសទាំងនោះ—អ្នកដែលសំខាន់បំផុតទាំងនោះ—គឺជា ប្អូនៗ ! ( រ័សុល អិម ណិលសុន និង វេនឌី ដ័បុលយូ ណិលសុន « សង្ឃឹមអ៊ីស្រាអែល » [ ការប្រជុំធម្មនិដ្ឋានទូទាំងពិភពលោកសម្រាប់យុវវ័យ ថ្ងៃទី៣ ខែមិថុនា ឆ្នាំ២០១៨ ] នៅលើគេហទំព័រ ChurchofJesusChrist.org )
សំណួរដូចខាងក្រោមនេះអាចជួយសិស្សឲ្យវាយតម្លៃពីអារម្មណ៍បច្ចុប្បន្នរបស់ពួកគេអំពីការចូលរួមក្នុងកិច្ចការពង្សប្រវត្តិ និងព្រះវិហារបរិសុទ្ធ ។ បន្ទាប់ពីពួកគេមានពេលគិតពិចារណាគ្រប់គ្រាន់ហើយ សិស្សដែលស្ម័គ្រចិត្តអាចចែកចាយគំនិត និងអារម្មណ៍របស់ពួកគេ ។
-
តើអ្នកមានអារម្មណ៍យ៉ាងណាដែលដឹងថា ព្រះអម្ចាស់បានរៀបចំអ្នកដើម្បីជួយប្រមូលសាសន៍អ៊ីស្រាអែល តាមរយៈកិច្ចការពង្សប្រវត្តិ និងព្រះវិហារបរិសុទ្ធ ?
-
តើអ្នកមានអារម្មណ៍ជំរុញចិត្តប៉ុនណាដើម្បីចូលរួមក្នុងកិច្ចការពង្សប្រវត្តិ និងព្រះវិហារបរិសុទ្ធ ? ហេតុអ្វីអ្នកមានអារម្មណ៍បែបនេះ ?
នៅក្នុងមេរៀន « គោលលទ្ធិ និងសេចក្តីសញ្ញា ១២៧–១២៨ ផ្នែកទី ២ » សិស្សត្រូវបានលើកទឹកចិត្តឲ្យចូលរួមក្នុងកិច្ចការព្រះវិហារបរិសុទ្ធ និងពង្សប្រវត្តិ ។ អ្នកអាចអញ្ជើញសិស្សឲ្យចែកចាយអ្វីដែលពួកគេបានធ្វើ និងរបៀបដែលព្រះអម្ចាស់បានប្រទានពរដល់ពួកគេ ។
ត្រូវបានរក្សាទុកដើម្បីជួយប្រមូលសាសន៍អ៊ីស្រាអែលតាមរយៈកិច្ចការព្រះវិហារបរិសុទ្ធ និងពង្សប្រវត្តិ
ខាងក្រោមនេះគឺជារបៀបមួយដើម្បីជួយសិស្សឲ្យទទួលខុសត្រូវលើការសិក្សារបស់ពួកគេ ។
សូមអញ្ជើញពួកគេឲ្យបង្កើតសារមួយដែលពួកគេអាចចែកចាយដើម្បីជំរុញចិត្តមនុស្សឲ្យចូលរួមក្នុងកិច្ចការព្រះវិហារបរិសុទ្ធ និងពង្សប្រវត្តិ ។ សារនោះអាចជាខិតប័ណ្ណ ការចុះផ្សាយនៅលើប្រព័ន្ធផ្សព្វផ្សាយសង្គម សារជាវីដេអូ ឬជាប្រភេទ នៃការអញ្ជើញផ្សេងទៀត ។ សូមអនុញ្ញាតឲ្យសិស្សជ្រើសរើសបង្កើតប្រភេទសារ ។
អ្វីដែលមាននៅក្នុងសំណៅចែក « បានរក្សាទុកដើម្បីជួយប្រមូលសាសន៍អ៊ីស្រាអែលតាមរយៈកិច្ចការព្រះវិហារបរិសុទ្ធ និងពង្សប្រវត្តិ » អាចផ្ដល់គំនិតមួយចំនួនដល់សិស្សពីអ្វីដែលត្រូវដាក់បញ្ចូលនៅក្នុងសាររបស់ពួកគេ ។ សូមអញ្ជើញសិស្សឲ្យសិក្សាអ្វីដែលមាននៅក្នុងសំណៅចែកនេះ មុននឹងបង្កើតសាររបស់ពួកគេ ។ សិស្សអាចជ្រើសរើសសិក្សារៀងៗខ្លួន ឬនៅក្នុងក្រុមតូចៗ ។
ត្រូវបានរក្សាទុកដើម្បីជួយប្រមូលសាសន៍អ៊ីស្រាអែលតាមរយៈកិច្ចការព្រះវិហារបរិសុទ្ធ និងពង្សប្រវត្តិ
-
សូមអាន គោលលទ្ធិ និងសេចក្តីសញ្ញា ១៣៨:៥៧–៥៩ ដោយរកមើលពីរបៀបដែលអ្នកនៅក្នុងពិភពវិញ្ញាណទទួលបានការប្រោសលោះ ។
-
សូមអានសេចក្តីថ្លែងការណ៍ដូចតទៅនេះដោយប្រធាន ហែនរី ប៊ី អាវរិង នៃគណៈប្រធានទីមួយ ។ សូមរកមើលថាតើព្រះអង្គសង្គ្រោះមានព្រះទ័យយ៉ាងណាចំពោះអ្នកដែលចូលរួមក្នុងកិច្ចការព្រះវិហារបរិសុទ្ធ និងពង្សប្រវត្តិ ។
សូមគិតអំពីព្រះអង្គសង្គ្រោះ ពេលអ្នកជួបទ្រង់ ។ អ្នកនឹងមានបទសម្ភាសន៍នោះ ។ ទ្រង់បានបង់ថ្លៃអំពើបាបរបស់អ្នក និងកូនវិញ្ញាណទាំងអស់របស់ព្រះវរបិតាសួគ៌ ។ ទ្រង់គឺជាព្រះយេហូវ៉ា ។ ទ្រង់បានបញ្ជូនអេលីយ៉ា ។ ទ្រង់បានប្រទានអំណាចនៃបព្វជិតភាពដើម្បីផ្សារភ្ជាប់ និងផ្ដល់ពរចេញពីសេចក្តីស្រឡាញ់ដ៏សុទ្ធសាធ ។ ហើយទ្រង់បានទុកព្រះទ័យលើអ្នក ដោយអនុញ្ញាតឲ្យអ្នកបានឮពីដំណឹងល្អក្នុងជីវិតរបស់អ្នក ដោយផ្តល់ឱកាសឲ្យអ្នកទទួលយកកាតព្វកិច្ចដើម្បីផ្តល់ដំណឹងល្អនោះដល់បុព្វការីជនរបស់អ្នក ដែលមិនបានមានឱកាសដ៏មានតម្លៃដូចអ្នក ។ សូមគិតអំពីការដឹងគុណដែលទ្រង់មានចំពោះអស់អ្នកដែលបង់ថ្លៃទាំងក្នុងកិច្ចការ និងសេចក្តីជំនឿដើម្បីស្វែងរកឈ្មោះបុព្វការីជនរបស់ពួកគេ និងជាអ្នកដែលស្រឡាញ់ពួកគាត់ និងទ្រង់គ្រប់គ្រាន់ល្មមដើម្បីផ្តល់ឲ្យពួកគាត់នូវជីវិតដ៏នៅអស់កល្បជានិច្ចនៅក្នុងក្រុមគ្រួសារ ដែលនោះគឺជាអំណោយទានដ៏អស្ចារ្យបំផុតនៃអំណោយទានទាំងអស់របស់ព្រះ ។ ទ្រង់បានប្រទានដល់ពួកគេនូវពលិកម្មដែលគ្មានទីបញ្ចប់ ។ ទ្រង់នឹងស្រឡាញ់ ហើយដឹងគុណចំពោះអស់អ្នកដែលបានបង់ថ្លែអ្វីក៏ដោយដែលពួកគេអាចធ្វើបាន ដើម្បីអនុញ្ញាតឲ្យបុព្វការីជនរបស់ពួកគេជ្រើសរើសការប្រទានឲ្យនូវជីវិតដ៏នៅអស់កល្បជានិច្ចរបស់ទ្រង់ ។ ( ហែនរី ប៊ី អាវរិង « Hearts Bound Together » Liahona ខែឧសភា ឆ្នាំ២០០៥ ទំព័រ៧៨–៧៩ )
-
តើអ្នកគិតថា ការចូលរួមក្នុងកិច្ចការពង្សប្រវត្តិ និងព្រះវិហារបរិសុទ្ធអាចជួយអ្នកធ្វើតាមគំរូរបស់ព្រះយេស៊ូវគ្រីស្ទយ៉ាងដូចម្ដេច ?
-
តើមានបទពិសោធន៍ផ្ទាល់ខ្លួន បទគម្ពីរ ឬសេចក្តីថ្លែងការណ៍ដោយថ្នាក់ដឹកនាំសាសនាចក្រដែលអ្នកអាចនឹងចង់ចែកចាយដែរឬទេ ?
ប្រសិនបើសិស្សនឹងទទួលបានអត្ថប្រយោជន៍ពីការមើលវីដេអូនៃសេចក្តីថ្លែងការណ៍របស់ប្រធាន អាវរិង នោះអ្នកអាចបង្ហាញវីដេអូនេះ « Hearts Bound Together » ពីនាទីទី ១០:២១ ដល់ ១១:២៩ នៅលើគេហទំព័រ ChurchofJesusChrist.org ។
ប្រសិនបើអ្នកមានអារម្មណ៍ថាសិស្សរបស់អ្នកនឹងទទួលបានការជំរុញចិត្តពីពរជ័យដែលបានសន្យាសម្រាប់ការចូលរួមក្នុងកិច្ចការពង្សប្រវត្តិ និងព្រះវិហារបរិសុទ្ធ នោះអ្នកអាចបង្ហាញពួកគេនូវវីដេអូមួយ ឬទាំងពីរនេះ ៖ « The Promised Blessings of Temple and Family History Work » ( ៣:២៦ ) និង « The Promised Blessings of Temple and Family History Work 2 » ( ៤:០៤ ) ។
អ្នកក៏អាចពិភាក្សាអំពីរបៀបដែលព្រះអម្ចាស់កំពុងបង្កើនឱកាសប្រើប្រាស់ព្រះវិហារបរិសុទ្ធ និងបច្ចេកវិទ្យារបស់យើង ដើម្បីជួយកិច្ចការពង្សប្រវត្តិផងដែរ ។ មានសេចក្តីថ្លែងការណ៍នៅក្នុង « ធនធានបន្ថែមទាំងឡាយ » ដែលបង្រៀនពីការណ៍នេះ ។
-
« Hearts Bound Together »
16:12 -
« The Promised Blessings of Temple and Family History Work »
3:23 -
« The Promised Blessings of Temple and Family History Work 2 »
4:5
ត្រូវបានជំរុញចិត្តឲ្យចូលរួមក្នុងកិច្ចការព្រះវិហារបរិសុទ្ធ និងពង្សប្រវត្តិ
សូមផ្តល់ពេលឲ្យសិស្សបង្កើត និងចែកចាយសារមួយ ដើម្បីជួយជំរុញចិត្តមនុស្សឲ្យចូលរួមនៅក្នុងកិច្ចការព្រះវិហារបរិសុទ្ធ និងពង្សប្រវត្តិ ។ សូមលើកទឹកចិត្តសិស្សឲ្យចែកចាយសាររបស់ពួកគេនៅឯផ្ទះ ។
សំណួរខាងក្រោមនេះអាចជួយសិស្សឲ្យជញ្ជឹងគិតអំពីការជំរុញចិត្តរបស់ពួកគេផ្ទាល់ក្នុងការចូលរួមក្នុងកិច្ចការព្រះវិហារបរិសុទ្ធ និងពង្សប្រវត្តិ ។ ការឆ្លើយសំណួរនៅក្នុងសៀវភៅកំណត់ហេតុរបស់ពួកគេ គឺជារបៀបមួយសម្រាប់សិស្សដើម្បីយាងអញ្ជើញព្រះវិញ្ញាណបរិសុទ្ធមកបង្រៀនពួកគេ ។ សូមអញ្ជើញសិស្សដែលស្ម័គ្រចិត្តឲ្យចែកចាយចម្លើយរបស់ពួកគេជាមួយសិស្សក្នុងថ្នាក់ ។
-
តើអ្វីដែលអ្នកបានរៀន ឬបានទទួលអារម្មណ៍នៅក្នុងការសិក្សារបស់អ្នកអំពី គោលលទ្ធិ និងសេចក្តីសញ្ញា ១៣៨ បានជះឥទ្ធិពលលើការជំរុញចិត្តរបស់អ្នកឲ្យចូលរួមក្នុងកិច្ចការព្រះវិហារបរិសុទ្ធ និងពង្សប្រវត្តិដោយរបៀបណា ?
-
ហេតុអ្វីបានជាការចូលរួមក្នុងកិច្ចការព្រះវិហារបរិសុទ្ធ និងពង្សប្រវត្តិអាចជាការងារសំខាន់បំផុតដែលអ្នកមិនធ្លាប់ធ្វើពីមុនមក ?