Leksiyon 154: Ang mga Artikulo sa Hugot nga Pagtuo ug Opisyal nga mga Pahayag 1 ug 2

Ang mga Artikulo sa Hugot nga Pagtuo

Pagkat-on sa Sukaranan nga mga Kamatuoran sa Ebanghelyo sa Manluluwas

Niadtong Marso 1, 1842, gitubag ni Propeta Joseph Smith ang hangyo sa editor sa diyaryo nga si John Wentworth nga mohatag og impormasyon bahin sa kasaysayan ug mga tinuohan sa Simbahan. Isip kabahin sa iyang tubag, gipahayag ni Joseph ang 13 ka sukaranan nga mga baroganan sa ebanghelyo nga nailhan karon isip mga Artikulo sa Hugot nga Pagtuo. Kini nga leksiyon makatabang sa mga estudyante nga mapalawoman ang ilang pagsabot sa doktrina sa Manluluwas pinaagi sa pagtuon sa mga kamatuoran nga naa sa mga Artikulo sa Hugot nga Pagtuo.

Posibleng mga Kalihokan sa Pagkat-on

Pagpasabot sa atong mga tinuohan

Ikonsiderar nga sugdan ang klase gamit ang mosunod nga senaryo.

Hunahunaa nga naa kay higala nga gustong mahibalo og dugang bahin sa unsay tinuohan sa mga miyembro sa Ang Simbahan ni Jesukristo sa mga Santos sa Ulahing mga Adlaw. Interesado kaayo ang imong higala pero naa lang siyay pipila ka minuto sa pagpaminaw sa dili pa mosulod sa klase.

• Unsay gusto nimong masabtan sa imong higala bahin kang Jesukristo ug sa Iyang ebanghelyo?

  Pwede nimong hatagan og tulo ka minuto ang mga estudyante sa pagsulat sa ilang mga tubag diha sa ilang mga journal sa pagtuon. Sa laing paagi, pwede nilang hisgotan kon unsay ilang ipakigbahin isip usa ka klase o idrama-drama ang senaryo uban ang kapares.

• Unsang mga kapanguhaan ang pwede nimong ipakigbahin sa imong higala aron matabangan siyang makakat-on og dugang bahin sa Manluluwas ug sa Iyang ebanghelyo?

Kon kinahanglan, ipasabot nga usa sa makatabang nga kapanguhaan mao ang mga Artikulo sa Hugot nga Pagtuo. Seguroa nga matultolan sa mga estudyante kon asa makita diha sa ilang mga kasulatan ang mga Artikulo sa Hugot nga Pagtuo. Pwede tingali nimo silang hatagan og pipila ka higayon aron masusi kon unsa sila ka pamilyar sa mga Artikulo sa Hugot nga Pagtuo. Pananglitan, pwede nimong pangutan-on ang mga estudyante kon naa ba silay namemorya nga usa o nakagamit og pipila samtang nagtudlo og leksiyon, nagsulat og pakigpulong, o nagpaambit sa ebanghelyo sa Manluluwas ngadto sa uban.

Ang mga Artikulo sa Hugot nga Pagtuo

Aron matabangan ang mga estudyante nga makakat-on kon sa unsang paagi nato nabatonan ang mga Artikulo sa Hugot nga Pagtuo, ikonsiderar ang pagpakigbahin sa mga estudyante sa bidyo nga “Ang mga Artikulo sa Hugot nga Pagtuo” (4:43), nga anaa sa ChurchofJesusChrist.org. Pwede usab nimong i-summarize ang mosunod nga background nga impormasyon:

Niadtong 1842, gitubag ni Joseph Smith ang usa ka sulat nga iyang nadawat gikan kang John Wentworth, nga nagpuyo sa Chicago, Illinois. Si Wentworth ang editor sa usa ka mantalaan nga gitawag og Chicago Democrat ug gusto siyang mahibalo og dugang bahin sa mga tinuohan ug kasaysayan sa mga Santos nga nagpuyo sa Nauvoo, Illinois. Sa mga bahin sa sulat, gipakigbahin ni Joseph ang mga detalye bahin sa pagkatukod ug kapalaran sa Simbahan sa Manluluwas. Gitapos sa Propeta ang sulat pinaagi sa 13 ka mugbong mga pamahayag nga naglangkob sa sukaranan nga mga kamatuoran ug doktrina sa Simbahan. Kini nga mga pamahayag sa wala kaulahian gitawag og ang Mga Artikulo sa Hugot nga Pagtuo ug gimantala niadtong 1851 sa unang edisyon sa Perlas nga Labing Bililhon.

Si Elder L. Tom Perry (1922–2015) sa Korum sa Napulog Duha ka Apostoles mipakigbahin sa mosunod bahin sa kon sa unsang paagi ang pagkat-on sa mga Artikulo sa Hugot nga Pagtuo makatabang nato.

Giawhag ko kamo sa paggamit sa inyong salabotan sa pagtuon ug sa pagkat-on sa mga Artikulo sa Hugot nga Pagtuo ug sa mga doktrina nga gitudlo niini. Kauban kini sa labing importante ug sigurado nga maoy labing husto nga mga pahayag sa doktrina sa Simbahan. Kon inyong gamiton kini isip giya nga motudlo sa inyong mga pagtuon sa ebanghelyo ni Jesukristo, mahimo kamong andam sa pagpahayag sa inyong pagsaksi sa gipahiuli nga kamatuoran ngadto sa kalibutan. Makapahayag kamo sa yano, madayganon, ug kinasingkasing nga paagi sa sukaranang mga tinuhoan nga inyong gimahal isip miyembro sa Ang Simbahan ni Jesukristo sa mga Santos sa Ulahing mga Adlaw. (L. Tom Perry, “Ang mga Doktrina ug mga Baruganan nga Anaa sa mga Artikulo sa Hugot nga Pagtuo,” Liahona, Nob. 2013, 48)

• Unsay imong nakat-onan niini nga pamahayag bahin sa kaimportante sa pagtuon ug pagkahibalo sa mga Artikulo sa Hugot nga Pagtuo?

Ikonsiderar ang pagpamatuod sa bisan unsang panalangin nga imong namatikdan tungod sa pagtuon sa mga Artikulo sa Hugot nga Pagtuo ug paggamit niini sa pagpahayag sa ebanghelyo sa Manluluwas.

Pagkat-on sa ebanghelyo ni Jesukristo gamit ang mga Artikulo sa Hugot nga Pagtuo

Ang mosunod nga ideya maoy usa ka paagi sa pagtabang sa mga estudyante nga makabaton og makahuloganon nga kasinatian sa mga Artikulo sa Hugot nga Pagtuo. Ikonsiderar ang pag-apod-apod sa handout nga giulohan og “Kalihokan sa Pagtuon sa mga Artikulo sa Hugot nga Pagtuo.” Hatagi og panahon ang mga estudyante sa pagkompleto sa mga kalihokan diha sa handout. Dasiga sila nga hatagan og pagtagad ang espirituhanong mga pag-aghat o panghunahuna nga ilang madawat gikan sa Espiritu Santo samtang magtuon sila. Pwede nimong seguroon nga pipila ka estudyante magpunting sa unang upat ka artikulo sa hugot nga pagtuo, nga nagtudlo sa importanteng sukaranan nga mga kamatuoran bahin sa Langitnong Amahan, kang Jesukristo, ug sa Ilang doktrina.

Seguroa nga anaa ka aron matabangan ang mga estudyante, pero dapita sila nga gamiton ang mga kahanas sa pagtuon nga ilang nakat-onan sa panimalay, simbahan, ug sa seminary aron makompleto ang mga kalihokan. Kon dali rang mahuman sa mga estudyante ang kalihokan, dapita sila nga mopili og laing artikulo sa hugot nga pagtuo ug balika ang proseso.

Kalihokan sa Pagtuon sa mga Artikulo sa Hugot nga Pagtuo

Lakang 1: Pagpili og usa sa mga Artikulo sa Hugot nga Pagtuo nga gusto nimong tun-an karon ug tubaga ang mosunod nga mga pangutana:

• Unsa nga mahangtorong kamatuoran o mga kamatuoran ang imong nakat-onan gikan niini nga artikulo sa hugot nga pagtuo?

• Sa unsang paagi ang mga pagtulun-an niini nga artikulo sa hugot nga pagtuo makaapektar sa imong relasyon sa Langitnong Amahan ug kang Jesukristo?

Lakang 2: Pagpili og labing menos duha sa mosunod nga mga opsiyon nga makatabang nimo sa pagkat-on og dugang bahin sa imong napili nga artikulo sa hugot nga pagtuo:

1. Sag-uloha. Paghunahuna og ideya nga makatabang nimo nga masag-ulo ang imong artikulo sa hugot nga pagtuo ug paggahin og panahon sa pagsag-ulo niini.

2. Pangita og may kalabotan nga mga kapanguhaan. Pangita og may kalabotan nga mga kasulatan o mga pamahayag gikan sa mga lider sa Simbahan nga konektado sa imong napili nga artikulo sa hugot nga pagtuo. Pwede kang mogamit og mga tool sama sa mga footnote diha sa imong mga kasulatan, ang Topical Guide, ang Giya ngadto sa mga Kasulatan, o ang search function sa Librarya sa Ebanghelyo nga app aron sa pagtabang nimo.

3. Paghimo og biswal nga representasyon. Paggamit og art aron sa pagtabang nimo nga makig-istorya o mopresentar sa mga pagtulun-an gikan sa imong napili nga artikulo sa hugot nga pagtuo. Ang mga ehemplo naglakip og drowing, collage, word cloud, o meme. (Tungod sa sagrado nga kinaiya sa Dios, likayi ang pagdrowing sa mga sakop sa Dios nga Kapangulohan.)

4. Paghimo og senaryo. Paghunahuna og mga sitwasyon nga maatubang nimo o sa ubang tin-edyer, o mga pangutana sa ebanghelyo nga matubag sa imong artikulo sa hugot nga pagtuo. Isulat ang mga senaryo o mga pangutana ug ipasabot kon sa unsang paagi o nganong makatabang ang mga kamatuoran nga gitudlo sa artikulo sa hugot nga pagtuo.

5. Ipamatuod. Isulat ang imong pagpamatuod sa mga kamatuoran nga gitudlo sa imong artikulo sa hugot nga pagtuo. Ihulagway kon sa unsang paagi kini nga mga pagtulun-an nakapanalangin sa imong kinabuhi ug nakapasuod nimo sa Dios.

Ipakigbahin ang unsay imong nakat-onan

Ikonsiderar ang mga paagi nga matabangan ang mga estudyante nga ipakigbahin ug ipresentar ang unsay ilang nakat-onan. Pwede nimong isulat ang mga numero 1–13 sa 13 ka gagmayng piraso sa papel ug ibutang kini sa sulod sa kalo. Pagbunot og usa ug pangutan-a kon adunay bisan kinsang estudyante nga nagtuon niana nga artikulo sa hugot nga pagtuo nga andam nga mopakigbahin. Para sa mas dako nga klase, ikonsiderar ang pagpares-pares sa mga estudyante o pagbahin kanila sa gagmayng grupo ug dapita sila sa pagpakigbahin diha sa usag usa.

Human sa pagpakigbahin, ang andam nga mga estudyante mahimong mopakita sa ilang mga papel sa tibuok lawak aron makita kini sa uban.

Dugang nga mga Kapanguhaan

Asa pa ko makakat-on og dugang bahin sa sulat ni Wentworth ug sa mga Artikulo sa Hugot nga Pagtuo?

Niadtong 1851, ang mga Artikulo sa Hugot nga Pagtuo giapil sa unang edisyon sa Perlas nga Labing Bililhon, nga gimantala sa British Mission sa Simbahan. Nahimo kining opisyal nga doktrina sa Simbahan human giusab ang Perlas nga Labing Bililhon niadtong 1878 ug gi-canonize atol sa Oktubre 1880 nga kinatibuk-ang komperensiya sa Simbahan. Ang mosunod nga mga kapanguhaan mahimong makatabang.

Para sa teksto sa tibuok sulat ni Joseph Smith, tan-awa sa “Ang Sulat ni Wentworth,” Ensign, Hulyo 2002, 26–32, o ang Mga Papeles ni Joseph Smith nga website.

Aron makakat-on og dugang bahin sa mga Artikulo sa Hugot nga Pagtuo, tun-i ang mosunod nga pakigpulong sa komperensiya ug artikulo:

• L. Tom Perry, “Ang mga Doktrina ug mga Baruganan nga Anaa sa mga Artikulo sa Hugot nga Pagtuo” (Liahona, Nob. 2013, 46–48)

• John W. Welch, “Ang mga Artikulo sa Hugot nga Pagtuo ug ang Kinabuhi ni Joseph Smith” (Liahona, Dis. 2013, 69–75)

Sa unsang paagi ang mga Artikulo sa Hugot nga Pagtuo makatabang nako sa pagpaambit sa ebanghelyo ngadto sa uban?

Si Presidente M. Russell Ballard sa Korum sa Napulog Duha ka Apostoles mitudlo:

Bisan unsa man ang inyong pilion nga gamiton aron sa pagpahibalo sa inyong mga higala ug mga kaila kabahin sa Simbahan, isulat kini, susiha kini kon husto ba gayod, ug himoa kini nga yano ug mubo.

Ang nagtubo nga pagkainila sa Simbahan ug ang nagkadaghang mga pangutana gikan sa uban naghatag kanato og daghang mga oportunidad nga mahimong taytayan, makahimo og mga higala, ug makapasa og husto nga impormasyon. Apan makahatag usab kini og dakong posibilidad sa dili pagsinabtanay ug usahay gani pag pangdaot kon tugotan nato ang uban nga mopasabot kon kinsa kita ug unsay atong gituohan kay sa kita gayod ang motudlo niini. …

Manghinaot ako nga kadtong gamay ra kaayo og nahibaloan sa Simbahan labaw unta magtinguha nga makakat-on og dugang mahitungod kanato. …

Kamo isip mga miyembro makatabang niini nga mahitabo pinaagi sa pag-adto ug pagpaambit sa uban sa mahinungdanon nga mga impormasyon nga anaa sa mga Artikulo sa Hugot nga Pagtuo. (M. Russell Ballard, “Hugot nga Pagtuo, Pamilya, mga Kamatuoran, ug mga Bunga,” Liahona, Nob. 2007, 25)

Sa unsang paagi ang pagkat-on ug pagsunod sa mga kamatuoran ug baroganan sa ika-trese ka artikulo sa hugot nga pagtuo makapanalangin sa akong kinabuhi?

Sa paghisgot sa ikatrese ka artikulo sa hugot nga pagtuo, si Presidente Gordon B. Hinckley (1910–2008) miingon:

[Kini] nga artikulo sa atong hugot nga pagtuo mao ang usa sa nag-unang mga pahayag sa atong teyolohiya. Kita kinahanglan nga mobalik-balik sa pagpamalandong niini. Dayon, sa higayon nga kita matintal sa pagbuhat og bisan unsa nga butang nga dili maayo o dili matinuoron o imoral, adunaymosantop sa atong mga hunahuna uban sa pipila nga pwersa niining mahinungdanon, malukpanon nga pamahayag mahitungod sa moral nga mga baroganan sa atong pamatasan. (Gordon B. Hinckley, “Fear Not to Do Good,” Liahona, Feb. 2000, 5; Ensign, Jan. 2000, 2)

Dugang nga mga Kalihokan sa Pagkat-on

Ang ika-trese nga artikulo sa hugot nga pagtuo

Aron matabangan ang mga estudyante sa pagtuon sa pipila ka Kristohanong mga kinaiya nga nalista diha sa ika-trese nga artikulo sa hugot nga pagtuo, ikonsiderar ang pagsulat sa mosunod nga mga pulong diha sa pisara sa walay piho nga pagkahan-ay:

Pagkamatinuoron, Pagkamatinud-anon, Pagkaputli, Pagkamanggiluluy-on, Mahiyason, Matinuohon, Malaomon, Malig-on (“makalahutay sa tanan nga mga butang.”).

Pangutan-a ang mga estudyante kon nakahibalo ba sila hain nga artikulo sa hugot nga pagtuo ang naghisgot niini nga mga sumbanan ug mga kinaiya. Ikonsiderar ang dungan nga pagsulti sa ika-trese nga artikulo sa hugot nga pagtuo. Pwede nimong ipasabot nga ang “tambag ni Pablo” naggikan sa Mga Taga-Filipos 4:8 sa Bag-ong Tugon.

Bahina ang mga estudyante sa gagmayng grupo ug tahasan ang kada grupo ang usa sa mga pulong nga naa sa pisara aron tun-an. Dasiga ang kada grupo nga pangitaon ang kahulogan sa pulong nga gisangon ug mangita og dugang nga mga kasulatan o mga pamahayag sa mga lider sa Simbahan nga nagtudlo bahin ini. Mahimo usab nga mangita og pananglitan ang mga estudyante gikan sa kinabuhi sa Manluluwas diin Iyang gipakita ang sumbanan o kinaiya. Dapita ang mga estudyante sa pagpakigbahin sa unsay ilang nakat-onan. Ikonsiderar ang pagpangutana og pipila ka pangutana sama sa mosunod:

• Sa unsang paagi ang pagsunod sa mga sumbanan ug mga hiyas niini nga artikulo sa hugot nga pagtuo makatabang nimo nga mahimong mas maayong sumusunod ni Jesukristo?

• Sa unsang paagi ang paghimo og maayo ngadto sa uban ug pagtinguha sa mga butang nga mahiyason ug dalaygon makatabang nimo nga malikay sa sala ug tentasyon?

Human makatubag ug makapakigbahin ang mga estudyante sa ilang mga ideya, ipakigbahin ang pahayag ni Presidente Hinckley diha sa seksyon nga “Dugang nga mga Kapanguhaan.”

Ang Sumbanan sa Kamatuoran

Ang laing importanteng bahin sa mga sinulat ni Joseph Smith diha sa sulat ni Wentworth usahay gitawag og “Ang Sumbanan sa Kamatuoran.” Ikonsiderar ang pagdapit sa mga estudyante nga tun-an ang mosunod nga pamahayag, nga mangita sa mga pulong o hugpong sa mga pulong nga makahuluganon para nila.

Ang Sumbanan sa Kamatuoran natukod, walay dili balaan nga kamot ang makapugong sa buhat sa paglambo; mga pagpanggukod mahimong magkakusog, ang mga manggugubot mahimong maghiusa, mga kasundaluhan magpundok, mga pasangil mahimong modaut sa kadungganan, apan ang kamatuoran sa Dios magpadayon nga maisugon, halangdon, ug gawasnon, hangtod nga kini makasulod sa matag yuta, makabisita sa matag dapit, molukop sa matag nasud, ug makasulti sa matag dunggan; hangtud ang katuyoan sa Dios matuman, ug ang Halangdong Jehova moingon nga ang buhat nahuman na. (“Ang Wentworth Letter,” Ensign, Hulyo 2002, 31)

Hisgoti kon unsay nakat-onan sa mga estudyante gikan niini nga pamahayag pinaagi sa pagpangutana sama sa mosunod:

• Unsa ang mipatigbabaw kanimo gikan niini nga pamahayag?

• Sa unsang paagi nakita nimo nga natuman ang mga pulong ni Propeta Joseph Smith sa atong panahon?

Ang laing paagi sa pagtabang sa mga estudyante nga masabtan gyod ni nga pamahayag mao ang paghatag nila og kahigayonan sa paghimo og biswal nga paghulagway nga nagpakita sa unsay gitudlo niini nga pamahayag. Pananglitan, pwedeng maghunahuna ang mga estudyante og mamugnaon nga mga paagi sa paghulagway sapagpakaylap sa tibuok kalibotan sa kamatuoran bahin sa Dios. Pwedeng ipakigbahin sa mga estudyante ang ilang mga biswal ngadto sa uban ug ipasabot kon nganong giapil nila ang unsay ilang gibuhat.