Lesksiyon 155: Ang Mga Artikulo sa Hugot nga Pagtuo ug Opisyal nga mga Pahayag 1 ug 2

Opisyal nga Pahayag 1

“Ang Ginoo Mipakita Kanako Pinaagi sa Panan-awon ug Pagpadayag”

Sulod sa mga 50 ka tuig, gihimo sa pipila ka miyembro sa Simbahan ang pagbaton og dinaghan nga kaminyoon ingon nga tubag sa sugo gikan sa Ginoo. Niadtong 1890, gisugo sa Ginoo si Presidente Wilford Woodruff (1807–98) nga ipahibalo nga hunongon na ang pagbaton og dinaghan nga kaminyoon diha sa Simbahan. Kini nga seksiyon makatabang sa mga estudyante nga masabtan nga gidumala sa Ginoo ang Iyang Simbahan pinaagi sa padayon nga pagpadayag sa Iyang mga propeta.

Posibleng mga Kalihokan sa Pagkat-on

Kini nga leksiyon nagpunting sa mga pulong sa Ginoo para sa mga Santos nga hunongon na ang pagbaton og dinaghan nga kaminyoon. Sa dili pa itudlo kini nga leksiyon, makatabang tingali nga irebyo ang mga kapanguhaan gikan sa leksiyon nga “Doktrina ug mga Pakigsaad 132:1–2, 34–66” aron tabangan ang mga estudyante nga naa pay mga pangutana bahin pagbaton og dinaghan nga kaminyoon.

Gipadayag sa Dios ang Iyang kabubut-on ngadto sa Iyang mga anak

Awhaga ang pagsusi ug pagsukod sa kaugalingon. Para sa dugang nga pagbansay kon unsaon ni paghimo, tan-awa ang pagbansay nga nag-ulohang “Paghimo og mga sitwasyon ug mga oportunidad alang sa mga tigkat-on nga matudloan pinaagi sa Espiritu Santo,” diha sa Pagpalambo sa mga Kahanas sa Magtutudlo: Pagtudlo pinaagi sa Espiritu. Ikonsiderar ang pagpraktis sa paghimo og mga pagsusi sa kaugalingon para sa estudyante bahin sa usa ka doktrina, kamatuoran, o baroganan.

Ikonsiderar ang pagsugod sa leksiyon pinaagi sa pagdapit sa usa ka estudyante nga basahon o i-recite ang Mga Artikulo sa Hugot nga Pagtuo 1:9. Dayon tabangi ang mga estudyante nga timbangtimbangon ang ilang mga gituohan bahin sa pagpadayag sa Dios sa iyang kabubut-on ngadto sa Iyang mga anak pinaagi sa mga propeta. Pwede nimong ipakita ang mosunod ug hatagi og panahon ang mga estudyante nga hunahunaon ang ilang mga tubag.

Para sa mga pamahayag sa ubos, pilia ang opsiyon nga (nahibalo; nagtuo; medyo nagtuo; wala ko kahibalo kon) nga labing nagpakita kon unsaon nimo pagtubag ang blangko nga: “ako nga kini tinuod.”

• Gipadayag na sa Dios ang Iyang kabubut-on ngadto sa Iyang mga anak pinaagi sa Iyang mga propeta.

• Ang Dios Kasamtangan nga nagpadayag sa Iyang kabubut-on ngadto sa Iyang mga anak pinaagi sa Iyang mga propeta.

• Ang Dios mopadayon sa pagpadayag sa Iyang kabubut-on ngadto sa Iyang mga anak pinaagi sa Iyang mga propeta.

Dapita ang mga estudyante sa paghunahuna kon nganong mao kadto ang ilang tubag. Pwede nimong dapiton ang pipila sa pagpakigbahin.

Ipasabot nga ang leksiyon karon magpunting sa usa ka ehemplo sa kasaysayan sa Simbahan nga nagpakita sa paggiya sa Ginoo sa Iyang Simbahan pinaagi sa padayon nga pagpadayag ngadto sa Iyang mga propeta. Dasiga sila nga bantayan ang mga pag-aghat gikan sa Espiritu nga makatabang nila nga mailhan ang mga panalangin sa padayon nga pagpadayag gikan sa Ginoo.

Opisyal nga Pahayag 1

Tabangi ang mga estudyante nga masabtan nga ang Opisyal nga Pahayag 1 naghisgot sa sugo sa Ginoo para sa mga Santos nga ihunong ang pagbaton og dinaghan nga kaminyoon. Dapita ang mga estudyante nga pangitaon ang pasiuna nga parapo sa sinugdanan sa Opisyal nga Pahayag 1 diha sa ilang mga kasulatan. Kon kinahanglan, paghatag og mga kopya sa pasiuna sa mga estudyante nga naay mas unang edisyon.

Basaha ang pasiuna sa Opisyal nga Pahayag 1, nga mangita kon unsay gitudlo niini bahin sa pagbaton og dinaghan nga kaminyoon sa mga Santos.

• Unsay nakapalisod sa mga Santos sa pagpadayon sa pagbaton og dinaghan nga kaminyoon?

Aron tabangan ang mga estudyante nga mas masabtan kini nga mga kalisdanan, ikonsiderar ang pagbasa o pag-summarize sa mosunod nga mga parapo. Pwede usab nimong dapiton ang usa ka estudyante sa pagbasa niini ngadto sa klase.

Human mipuyo ang mga Santos sa Utah sa tungatunga sa mga 1800, daghang miyembro sa Simbahan ang dayag nga nagbaton og dinaghan nga kaminyoon. Wala madugay ang mga lider sa gobyerno mipasar og mga balaod nga naghimong ilegal sa pagbaton og dinaghan nga kaminyoon diha sa Estados Unidos. Kini nga balaod miresulta sa pag-aresto sa daghang Santos sa Ulahing mga Adlaw nga mga lalaki. Ang uban nagtagotago aron dili maaresto (tan-awa sa Mga Santos: Ang Istorya sa Simbahan ni Jesukristo sa Ulahing mga Adlaw, vol. 2, Walay Dili Balaan nga Kamot, 1846–1893 [2020], 177-178, 509–12, 643–46).

Niining lisod nga mga kahimtang, si Presidente Wilford Woodruff mainampoong nangayo ug nakadawat og giya gikan sa Ginoo. Nadasig siyang hatagan og instruksiyon ang mga lider sa Simbahan nga hunongon ang pagtudlo sa baroganan sa pagbaton og dinaghan nga kaminyoon. Niadtong Septiyembre 1890, si Presidente Woodruff nag-isyu og manipesto (nga nailhan karon nga Opisyal nga Pahayag 1). Diha sa manipesto, gitubag ni Presidente Woodruff ang sayop nga mga report nga dayag gihapon nga gidasig sa mga lider sa Simbahan ang bag-ong dinaghan nga kaminyoon (tan-awa sa Mga Santos, 2:724–25, 741–746).

Kini nga manipesto nailhan karon nga Opisyal nga Pahayag 1 diha sa Doktrina ug mga Pakigsaad.

Hatagig higayon ang mga estudyante nga tun-an ang pipila sa tambag ug mga instruksiyon ni Presidente Woodruff ngadto sa mga Santos. Kon kinahanglan, ipakita sa mga estudyante kon asa sa mga kasulatan nila makita ang mga parapo nga ilang tun-an.

Tun-i ang mosunod nga mga materyal, nga pangitaon ang pipila sa tambag ni Presidente Woodruff ngadto sa mga Santos:

• Parapo 4–5 sa Opisyal nga Pahayag 1 (sugod sa “Tungod kay ang mga balaod …”)

• Parapo 1–2 sa mga kinutlo nga nagsunod sa Opisyal nga Pahayag 1

Kon naa pay panahon, makatabang tingali ang pagdapit sa mga estudyante nga tun-an ang dugang mga parapo gikan sa mga kinutlo. Pwede nimong ihatag sa gagmayng grupo sa mga estudyante ang pihong mga parapo, nga pangitaon kon unsay nakat-onan ni Presidente Woodruff gikan sa Ginoo. Dayon pwedeng i-summarize sa mga estudyante ang ilang mga nakaplagan diha sa klase.

• Unsay gikatabang niini nga mga parapo aron imong masabtan ang bahin sa kon giunsa pagdumala sa Manluluwas ang Iyang Simbahan?

  Hatagig kahigayonan ang daghang estudyante nga motubag sa nag-unang pangutana. Mailhan tingali nila ang mga kamatuoran nga sama sa mosunod: Dili tugotan sa Ginoo nga mahisalaag ang Presidente sa Simbahan sa pagdumala sa Simbahan. Gidumala sa Ginoo ang Iyang Simbahan pinaagi sa padayon nga pagpadayag ngadto sa Iyang mga propeta.

• Sa unsang paagi ang pagkahibalo niini nga mga kamatuoran nakapanalangin o nakaapektar sa imong kinabuhi?

• Unsay gitudlo niini nga mga kamatuoran kanimo mahitungod sa Manluluwas ug sa Iyang mga tinguha para kanato?

Padayon nga pagpadayag karon

Si Presidente Russell M. Nelson mipakigbahin sa mosunod nga pagpamatuod:

Ako nahibalo nga may kasiguroan nga ang Ginoo naggiya sa mga kalihokan sa Iyang Simbahan. Siya miingon, “Ako mopakita [kaninyo] nga Ako makahimo sa pagbuhat sa akong kaugalingon nga buhaton” [2 Nephi 27:21].

Kasagaran, ang akong mga magtatambag ug ako magtulo ang luha samtang nagtan-aw sa dihang Siya nagpataliwala diha sa mahagiton kaayo nga mga sirkumstansiya human kami makabuhat sa among labing maayo ug wala nay dugang pang mabuhat. Kami sa pagkatinuod nagpabilin nga natingala. (Russell M. Nelson, “Welcome nga Mensahe,” Liahona, Mayo 2021, 6)

Human sa pagpakigbahin sa nag-unang mga pamahayag, ikonsiderar ang pagdapit sa mga estudyante sa paghisgot sa mosunod nga pangutana uban sa usa ka pares o sa gamay nga grupo. Pwedeng moduol sa pisara ang mga sakop sa kada grupo ug isulat ang pipila sa ilang mga tubag.

• Unsang ebidensiya ang imong nakita nga padayong migiya ang Ginoo sa Iyang Simbahan pinaagi sa pagpadayag ngadto sa Iyang mga propeta sa atong panahon?

  Apil sa pipila ka ehemplo nga hisgotan tingali sa mga estudyante ang mga mensahe nga gipakigbahin sa mga propeta ug apostoles sa kinatibuk-ang komperensiya, ug sa pagpahayag ug pagdepensa sa importanteng mga kamatuoran pinaagi sa “Ang Pamilya: Usa ka Pamahayag ngadto sa Kalibotan,” “Ang Buhi nga Kristo: Ang Pagpamatuod sa mga Apostoles,” ug “Ang Pagpahiuli sa Kahingpitan sa Ebanghelyo ni Jesukristo: Usa ka Pamahayag ngadto sa Kalibotan sa Ikaduhang Siglo nga Kasaulogan.”

• Sa unsang paagi napanalanginan ang imong kinabuhi tungod sa padayon nga pagpadayag sa Ginoo pinaagi sa Iyang mga propeta?

Ipakita ang pagsabot

Aron matabangan ang mga estudyante nga ipakita ang ilang pagsabot bahin sa ilang nakat-onan karon, ikosiderar ang pagpakigbahin sa mosunod nga senaryo:

Nabalaka si Sofia sa pipila sa mga kausaban nga iyang nakita sa Simbahan. Natingala siya kon nganong ang pipila sa mga butang nga gipahimo sa propeta kanato karon, lahi kay niadtong bata pa siya.

• Unsa ang pipila sa mga butang nga imong nakat-onan karon nga makatabang tingali nga ipakigbahin kang Sofia?

Pwedeng motubag ang mga estudyante ingon nga bahin sa panaghisgot sa klase, o pwede nimo silang dapiton nga idrama-drama kini nga senaryo uban sa usa ka pares.

Pagpamatuod sa mga kamatuoran nga imong nahisgotan karon. Dasiga ang mga estudyante nga ilhon nga ang padayong paggiya sa Ginoo pinaagi sa Iyang mga propeta mahimong panalangin sa ilang kinabuhi.

Dugang nga mga Kapanguhaan

Asa ko makakat-on og dugang bahin sa kasaysayan sa pagbaton og dinaghan nga kaminyoon ug sa Manipesto?

• “Ang Mensahero ug ang Manipesto,” Kinatibuk-ang Saysay sa mga Pagpadayag, 323–331

• “Dinaghan nga Kaminyoon ug mga Pamilya sa Unang Utah [Plural Marriage and Families in Early Utah],” Mga Essay sa mga Hilisgotan sa Ebanghelyo

• “The Manifesto and the End of Plural Marriage,” Mga Essay sa mga Hilisgotan sa Ebanghelyo

• Kapitulo 35, 38–40 sa Mga Santos: Ang Istorya sa Simbahan ni Jesukristo sa Ulahing mga Adlaw, vol. 2, Walay Dili Balaan nga Kamot, 1846–1893

Giunsa pagdumala sa Manluluwas ang Iyang Simbahan pinaagi sa padayon nga pagpadayag ngadto sa buhing propeta?

Si Presidente Russell M. Nelson mipasabot:

Sa dihang nagtigom kami isip Konseho sa Unang Kapangulohan ug Korum sa Napulog Duha, ang among mga lawak mitinganan nahimong mga lawak sa pagpadayag. Ang Espiritu tataw kaayo nga anaa. Samtang kami nakigbisog sa mga komplikado nga mga hilisgotan, usa ka kulba-hinam nga proseso ang nahitabo samtang ang matag Apostol gawasnon nga mipadayag sa iyang mga hunahuna ug panglantaw. Bisan pa man kon managlahi kami sa among unang mga panglantaw, ang gugma nga among gibati sa usag usa anaa kanunay. Ang among panaghiusa nakatabang kanamo sa pag-ila sa kabubut-on sa Ginoo alang sa Iyang Simbahan.

Sa among mga miting, ang kadaghanan [mayoriya] dili gayod maoy matuman! Mainampoon kaming naminaw sa usag usa ug nakigsulti sa usag usa hangtod nagkahiusa kami. Dayon dihang nakab-ot na namo ang hingpit nga panag-uyon, ang makapahiusa nga impluwensiya sa Espiritu Santo makapadasig! Among nasinati kon unsay nahibaloan ni Propeta Joseph Smith sa dihang siya mitudlo, “Pinaagi sa panaghiusa sa pagbati kita makaangkon og gahom sa Dios.” [Mga Pagtulun-an sa mga Presidente sa Simbahan: Joseph Smith (2007), 393–94]. Walay gayoy sakop sa Unang Kapangulohan o sa Korum sa Napulog Duha nga motugyan sa mga desisyon alang sa Simbahan sa Ginoo [ngadto] sa iyang kaugalingon nga labing maayong paghukom lamang! (Russell M. Nelson, “Pagpadayag alang sa Simbahan, Pagpadayag alang sa Atong mga Kinabuhi,” Liahona, Mayo 2018, 95)

Si Elder Quentin L. Cook sa Korum sa Napulog Duha mitudlo:

Napanalanginan kita sa nagpadayon nga pagpadayag diha sa buhi nga mga propeta. …

Ang ubang mga pagpadayag hilabihan ka importante, ug ang uban nakadugang sa atong pagsabut sa mahinungdanon nga balaanong mga kamatuoran ug naghatag og giya sa atong panahon. (Quentin L. Cook, “Ang Panalangin sa Nagpadayon nga Pagpadayag ngadto sa mga Propeta ug sa Personal nga Pagpadayag aron sa Paggiya sa Atong Kinabuhi,” Liahona, Mayo 2020, 97)

Dugang nga mga Kalihokan sa Pagkat-on

Alternatibo nga pagsugod

Aron matabangan ang mga estudyante nga makita ang kaimportante sa padayon nga pagpadayag gikan sa Dios pinaagi sa Iyang mga propeta, pwede nimo silang hatagan og senaryo nga parehas sa mosunod:

Handurawa nga miingon ang imong higala: “Nahibalo ko nga nagtuo ka nga propeta sa Joseph Smith, pero wala ko makaamgo hangtod karon nga ikaw gitawag sa Dios ang ubang mga propeta sunod ni Joseph Smith. Nganong buhaton man na Niya?”

Dayon pwedeng magpraktis ang mga estudyante sa pagtubag sa senaryo. Dasiga silang maghatag og usa o duha ka pihong ehemplo kon sa unsang paagi padayong gipadayag sa Dios ang importanteng mga butang alang kanato pinaagi sa Iyang propeta.

Si Alma nga Tigulang nagtinguha og pagpadayag gikan sa Dios

Aron tabangan ang mga estudyante nga makakita og dugang ehemplo sa usa ka propeta nga nagtinguha, ug nakadawat, og pagpadayag gikan sa Dios bahin sa usa ka lisod nga butang, ikonsiderar ang pagbasa sa kasinatian ni Alma nga Tigulang diha sa Mosiah 26. Pwede nimong i-summarize ang Mosiah 26:1–12 pinaagi sa pagpasabot nga ang mga miyembro sa Simbahan gidala ngadto sa pagpakasala sa mga dili magtutuo. Gisugo ni Hari Mosiah si Alma nga tabangan kadtong mga nakasala. Dayon pwede nimong ipabasa sa mga estudyante ang Mosiah 26:13–14 aron mailhan kon unsay gihimo ni Alma.

Pwedeng pangitaon sa mga estudyante ang mga tubag sa mga pangutana sama sa mosunod samtang nagbasa sa Mosiah 26:32–36:

• Unsa ang pagpadayag nga gihatag sa Dios kang Alma?

• Unsay gihimo ni Alma sa pagpadayag nga iyang nadawat?

• Nganong panalangin ang pagpadayag?

Ebidensiya nga padayong gigiyahan sa Ginoo ang Iyang Simbahan

Aron tabangan ang mga estudyante nga makakitag pananglitan nga padayong gigiyahan sa Ginoo ang Iyang Simbahan pinaagi sa pagpadayag, ikonsiderar ang pagtan-aw sa “The Temple and Your Spiritual Foundation” gikan sa time code 11:13 hangtod 13:08. Pwedeng ipakigbahin sa mga estudyante kon nganong ang padayon nga pagpadayag naghimong magpadayon ang buluhaton sa Ginoo sa tibuok kalibotan.