Leksiyon 157: Ang mga Artikulo sa Hugot nga Pagtuo ug Opisyal nga mga Pahayag 1 ug 2

Sukda ang Imong Nakat-onan 10

Pagpamalandong sa Imong Pagtuon sa Doktrina ug mga Pakigsaad

Ang pagpamalandong ug ang pagsukod sa atong espirituhanong pagkat-on makatabang kanato nga mas maduol sa Manluluwas. Kini nga leksiyon makatabang sa mga estudyante sa paghinumdom ug pagsusi kon sa unsang paagi ang pagtuon sa Doktrina ug mga Pakigsaad nakatabang nila sa paglambo sa espiritwal.

Posibleng mga Kalihokan sa Pagkat-on

Espirituwal nga mga handomanan

Ikonsiderar ang pagdala og personal nga litrato sa klase. Ipakita ang litrato ug ihulagway kadali ang imong mga panumdoman nga konektado sa mga tawo o mga hitabo diha sa litrato. Kon ang mga estudyante gihangyo sa pagbuhat sa kalihokan sa pagpangandam sa estudyante , dapita sila nga ipakigbahin kadiyot ang ilang mga litrato ug mga panumdoman diha sa gamayng grupo o sa klase. Pwede usab nilang ipakigbahin ang mga litrato nga anaa sa ilang selpon.

• Sa imong hunahuna, nganong ganahan ang mga tawo nga magtan-aw og litrato sa mga tawo o mga panghitabo sa nangagi?

• Unsa ang pipila ka ehemplo sa mga handomanan nga kita tingali aduna nga wala makuhai og litrato?

Si Elder Neil L. Andersen sa Korum sa Napulog Duha ka Apostoles misulti bahin sa atong espirituwal nga mga handomanan.

Hangupa ang sagrado ninyong mga panumduman. Tuohi kini. Isulat kini. Ipaambit kini sa inyong pamilya. Saligi nga miabut kini kaninyo gikan sa inyong Langitnong Amahan ug sa Iyang Hinigugma nga Anak. Tuguti nga magdala kini og pailub sa inyong mga pagduhaduha ug panabut sa inyong mga kalisdanan. Mosaad ko ninyo nga samtang kamo andam nga moila ug mainampingon nga mobahandi sa espirituhanong mga hitabo nga angay hinumduman sa inyong kinabuhi, magkadaghan pa ang moabot kaninyo. Ang Langitnong Amahan nakaila ug nahigugma kaninyo! (Neil L. Andersen, “Mga Espirituhanong Panumdoman nga Angay Hinumduman,” Liahona, May 2020, 22)

• Sa imong hunahuna nganong importante ang pagpamalandong sa atong espirituwal nga mga handomanan?

  Ipasabot nga kini nga leksiyon mohatag og higayon sa mga estudyante nga pamalandongan ang pipila sa espirituwal nga mga handomanan o kasinatian nga aduna sila samtang nagtuon sa Doktrina ug mga Pakigsaad ug kasaysayan sa Simbahan sa milabay nga tuig.

  Sa dili pa mohatag og panahon alang sa mga estudyante nga tubagon ang mosunod nga mga pangutana, ikonsiderar ang paghisgot sa pamahayag diha sa pasiuna sa Doktrina ug mga Pakigsaad nga nag-ingon, “Sa mga pagpadayag, ang usa ka tawo makapaminaw sa malumo apan gamhanan nga tingog sa Ginoong Jesukristo.” Pwedeng dapiton sa mga estudyante nga rebyohon ang mga panabot nga ilang girekord sa ilang mga journal sa pagtuon sa tibuok tuig o mga marka o mga mubo nga sulat nga ilang gisulat diha sa ilang mga kasulatan aron matabangan silang tubagon kining mga pangutanaha.

• Unsay imong nakat-onan bahin kang Jesukristo samtang imong gitun-an ang Iyang mga pulong niining tuiga diha sa Doktrina ug mga Pakigsaad?

• Sa unsang paagi nausab ang imong relasyon sa Langitnong Amahan ug ni Jesukristo sa milabayng tuig?

• Unsa ang pipila sa mga tudling sa kasulatan nga imong gitun-an nga nakaapektar nimo? Sa unsang paagi ka naapektohan sa maong mga tudling?

• Unsa ang pipila sa mga kamatuoran sa ebanghelyo nga gisulayan nimog gamit? Unsay imong nakita o gilaoman nga makita tungod sa imong mga paningkamot?

Human sa igo nga panahon, dapita ang mga estudyante sa pagpakigbahin sa pipila sa ilang espirituwal nga mga handomanan diha sa klase, kon angayng ipakigbahin. Samtang nagpakigbahin ang mga estudyante, awhaga ang uban nga moapil sa panaghisgot pinaagi sa pagpangutana og parehas sa “Kinsa ang nakasinati og sama sa ingon?” o “Unsay inyong ikadugang sa gipakigbahin sa inyong klasmeyt?”

Pagdawat og pagpahayag

Pahinumdomi ang mga estudyante nga tibuok tuig silang gidapit nga praktisan ug magkat-on kon unsaon pagdawat og personal nga pagpadayag.

Giawhag ko kamo nga palapdan pa ang inyong kasamtangang espiritwal nga abilidad sa pagdawat og personal nga pagpadayag. …

Mohangyo ko kaninyo sa pagpagpalambo sa inyong espirituhanong kapasidad sa pagdawat og pagpadayag. … Pilia ang paghimo sa espiritwal nga buhat nga maoy gikinahanglan aron sa pagtagamtam sa gasa sa Espiritu Santo ug mas kanunay ug mas klaro nga pagpaminaw sa tingog sa Espiritu. (Russell M. Nelson, “Pagpadayag alang sa Simbahan, Pagpadayag alang sa Atong mga Kinabuhi,” Liahona, Mayo 2018, 95–96)

Aron makatabang nga mahulagway ang pagdapit ni Presidente Nelson aron palapdan nato ang atong katakos sa pagdawat og pagpadayag, ikonsiderar ang pagpakita sa lainlaing mga balloon nga gipaburot sa lainlaing mga gidak-on. Dapita ang mga estudyante nga ikonsiderar kon hain nga balloon ang nagrepresentar sa ilang kapasidad sa pagdawat og personal nga pagpadayag sa sinugdanan sa tuig ug hain niini ang nagrepresentar sa ilang katakos karon. Isip kabahin sa ilang pagpamalandong, pwedeng pamalandongan sa mga estudyante ang mosunod nga mga pangutana. Dapita ang pipila ka estudyante sa pagpakigbahin.

• Unsay nakatabang nimo nga “palapdan” ug sa “pagpagpalambo sa inyong espirituhanong kapasidad sa pagdawat og pagpadayag” karong tuiga?

• Unsa ang pipila ka tudling gikan sa Doktrina ug mga Pakigsaad ang nadugang sa imong pagsabot bahin sa pagdawat og pagpadayag?

  Kon nagkinahanglan og tabang ang mga estudyante, pwede kang mohatag og pipila ka pananglitan sama sa Joseph Smith—Kasaysayan 1:5–20 ug Doktrina ug mga Pakigsaad 8:2–3; 9:7–9; 11:12–13; 88:118.

• Unsang mga kasinatian ang bag-ohay lang nimong nabatonan sa personal nga pagpadayag?

Pagpasabot sa Pagpahiuli

Ipakita ang daghang mga imahe sa tibuok lawak nga nagpakita sa importanteng mga hitabo sa Pagpahiuli, sama sa mosunod. Isip alternatibo, pwede nimong hangyoon ang klase nga ilista ang importanteng mga panghitabo sa Pagpahiuli diha sa pisara. Isip usa ka klase, pagpili og upat hangtod lima nga hisgotan. Isulat kini sa lainlaing piraso sa papel ug ibutang ang mga papel sa tibuok lawak.

Ang Unang Panan-awon

Pagpahiuli sa Melchizedek nga Pagkapari

Ang Pagtungha sa Basahon ni Mormon

Ang Pagtukod sa mga Templo

Grupo-grupoha ang mga estudyante ug dapita ang matag grupo nga magpundok sa laing imahe o papel. Pagtudlo og lider sa grupo nga maoy modumala sa panaghisgot bahin sa maong hitabo sa Pagpahiuli. Awhaga ang lider nga dapiton ang tanan sa grupo nga makigbahin og usa ka butang. Human ang igo nga panahon, dapita ang mga grupo nga mobalhin sa bag-ong imahe ug pagpili og bag-ong lider sa grupo. Ang mosunod nga mga pangutana makatabang sa lider sa grupo nga mogiya sa panaghisgot sa matag estasyon.

1. Ipakigbahin ang imong nahinumdoman bahin niini nga hitabo.

2. Ipasabot kon nganong makaayo sa mga tawo sa tibuok kalibotan nga mahibalo niining bahina sa Pagpahiuli sa ebanghelyo ni Jesukristo.

3. Hisgoti kon sa unsang paagi kini nga bahin sa Pagpahiuli nakatabang nga modako ang imong hugot sa pagtuo sa Langitnong Amahan ug kang Jesukristo.

Ang Propeta Joseph Smith

Ang mosunod nga kalihokan mahimong magamit agig dugang sa kalihokan sa pagpamalandong nga gihimo sa mga estudyante sa sinugdanan sa leksiyon.

Ipakita ang litrato ni Propeta Joseph Smith. Pangutan-a ang mga estudyante kon nakahinumdom ba sila hain nga tudling sa doktrinal nga kahanas ang naghulagway sa dakong buhat nga nahimo ni Joseph sa iyang kinabuhi. Dayon basaha o i-recite ang Doktrina ug mga Pakigsaad 135:3 nga magkauban. Pahinumdomi ang mga estudyante nga kini nga pagpamatuod ni Joseph Smith gisulat wala madugay human sa pagkamartir. Tabangi silang sa pagpangandam sa pagpakigbahin sa usag usa sa ilang mga pamatuod kang Joseph Smith ingon nga propeta sa Ginoo.

Hunahunaa kon sa unsang paagi nausab ang imong mga pagbati ug pagpamatuod kang Joseph Smith paglabay sa tuig. Pwede nimong isulat ang imong mga gihunahuna samtang imong pamalandongan ang mosunod:

• Sa unsang paagi nimo nakat-onan nga ang Langitnong Amahan ug si Jesukristo mipakita kang Joseph Smith diha sa Sagradong Kakahoyan?

• Sa unsang paagi ang buluhaton sa Ginoo nagdasig kang Joseph Smith nga tabangan kang maduol sa Langitnong Amahan ug kang Jesukristo?

• Kon dili ka segurado sa calling ni Joseph Smith isip propeta sa Dios, unsay imong mahimo aron makakat-on sa imong kaugalingon?

Ikonsiderar ang pagtapos pinaagi sa pagdapit sa pipila ka estudyante sa pagpakigbahin sa ilang pagpamatuod kang Joseph Smith.

Dugang nga mga Kalihokan sa Pagkat-on

Pag-angkon og espirituhanong kahibalo

Kon makabenepisyo ang mga estudyante sa pagsukod sa ilang pagsabot sa mga baroganan sa pag-angkon og espirituhanong kahibalo, ikonsiderar ang paggrupo-grupo nila aron hisgotan ang mosunod:

• Unsaon nimo pagpasabot sa mosunod nga tulo ka baroganan sa pag-angkon og espirituhanong kahibalo sa usa ka tawo nga dili pamilyar niini?

  1. Lihokon inubanan sa hugot nga pagtuo.

  2. Susiha ang mga konsepto ug mga pangutana nga adunay mahangtorong panglantaw.

  3. Tinguhaa ang dugang nga panabot pinaagi sa balaanong gitudlo nga mga tinubdan.

• Sa unsang paagi nimo nakaplagan ang mga baroganan sa pag-angkon og espirituhanong kahibalo aron makatabang kini sa imong kinabuhi?

• Unsay imong mga kasinatian sa paggamit niini nga mga baroganan aron tabangan ang uban o aron sulbaron ang kaugalingon nimong mga gikabalak-an?