Leksiyon 156: Ang Mga Artikulo sa Hugot nga Pagtuo ug Opisyal nga mga Pahayag 1 ug 2

Opisyal nga Pahayag 2

Pagpadayag bahin sa Pagkapari

Samtang mikatap ang ebanghelyo sa tibuok kalibotan panahon sa ikabaynte nga siglo, nag-ampo alang sa giya ang mga lider sa Simbahan bahin sa usa ka palisiya nga nagdili sa mga miyembro sa Simbahan nga African og kagikan nga makadawat sa pagkapari. Daghang Santos ang mipili sa pagpakita og hugot nga pagtuo kang Jesukristo samtang nag-atubang og mga pangutana bahin sa palisiya. Niadtong Hunyo 8, 1978, gipahibalo sa Unang Kapangulohan ang usa ka pagpadayag nga mitangtang niini nga mga restriksyon. Kini nga leksiyon makatabang sa mga estudyante nga molihok uban sa hugot nga pagtuo dihang mag-atubang sila og walay kasiguroan nga mga sitwasyon o espirituwal nga mga pangutana.

Posibleng mga Kalihokan sa Pagkat-on

Mga ehemplo sa hugot nga pagtuo

Ikonsiderar ang pagsugod sa leksiyon pinaagi sa pagdapit sa mga estudyante nga hunahunaon ang mga tawo nga ilang kaila nga nagpakitag dakong hugot nga pagtuo kang Jesukristo sa lisod nga mga sitwasyon. Dayon, ipasabot nga si Elder Helvécio Martins (1930–2005) sa Seventy ug ang iyang asawa, si Rudá, sa makausa nag-atubang pod og usa ka sitwasyon nga nagkinahanglan og dakong hugot nga pagtuo. Pwede ninyong basahon o ipabasa sa usa ka estudyante ang mosunod nga parapo ngadto sa klase.

Niadtong Abril 1972, ang mga misyonaryo gikan sa Ang Simbahan ni Jesukristo sa mga Santos sa Ulahing mga Adlaw mibisita sa apartment ni Helvécio ug Rudá Martins sa Rio de Janeiro, Brazil. Dali ra kaayong nakaangkon og pamatuod ang mga Martins sa kamatuoran sa mensahe sa mga misyonaryo. Nahibaloan usab nila ang bahin sa palisiya sa Simbahan nga nagdili sa mga Itom nga lalaki nga African og kagikan nga maordinahan sa pagkapari. Si Helvécio ug Rudá, nga African og kagikan, adunay mga pangutana sa mga misyonaryo (tan-awa sa “Elder Helvécio Martins of the Seventy,” Ensign, Mayo 1990, 106; Mark Grover, The Autobiography of Elder Helvécio Martins [1994], 43).

• Unsay imong ipangutana sa mga misyonaryo kon diha pa ka niini nga sitwasyon?

• Unsa pay posible nga reaksyon sa usa ka tawo sa sitwasyon nga sama niini?

Dapita ang mga estudyante nga hunahunaon ang walay kasigurohan nga mga sitwasyon nga ilang giatubang o giatubang sa ilang kinabuhi. Pwedeng apil niini ang ilang kasamtangang wala matubag nga espirituwal nga mga pangutana. Pwede nilang isulat ang ilang mga sitwasyon o mga pangutana diha sa ilang mga journal sa pagtuon. Dasiga ang mga estudyante nga bantayan ang mga pagtulun-an o pag-aghat sa Espiritu nga makatabang nila sa ilang mga kahimtang.

Paglihok diha sa hugot nga pagtuo

Aron tabangan ang mga estudyante nga makita ang tubag sa pamilyang Martins niini nga sitwasyon, ikonsiderar ang pagdapit sa usa ka estudyante nga basahon og kusog ngadto sa klase ang mosunod nga mga parapo:

Human masayod bahin sa restriksyon sa pagkapari, mipili ang pamilyang Martin nga molihok uban ang hugot nga pagtuo. Sa ulahi nabunyagan sila ug matinud-anong miserbisyo sa Simbahan sulod sa daghang tuig. Nakahinumdom si Elder Martins, “Nakaplagan namo ang kamatuoran, ug walay makapugong kanamo sa pagtuman niini.”

Niadtong 1975 ang Simbahan mipahibalo nga usa ka templo ang pagatukoron didto sa São Paulo, Brazil. ‘“Bisan og kami wala magpaabot nga makasulod niini, nagtrabaho kami alang sa pagtukod sa templo sama sa ubang mga miyembro,’ matod ni Elder Martins. ‘Balay gihapon kini sa Ginoo.’ Gibaligya ni Sister Martins ang iyang alahas aron itabang sa pondo, ug si Brother Martins miserbisyo sa komitiba sa pagmantala” (sa “Elder Helvécio Martins of the Seventy,” Ensign, Mayo 1990, 106).

• Unsay mipatigbabaw diha kanimo sa pagsanong sa pamilyang Martins?

• Sa imong hunahuna, nganong mipili silang molihok uban ang hugot nga pagtuo niini nga sitwasyon?

Kon kinahanglan, ipassabot nga imbes magtutok sa wala nila mahibaloi, nagtutok ang pamilyang Martins sa kamatuoran nga gipadayag kanila sa Dios pinaagi sa Espiritu Santo.

Ikonsiderar ang pagdapit sa mga estudyante nga ilista ang mga kamatuoran nga ilang nahibaloan bahin sa Langitnong Amahan, kang Jesukristo, ug sa ebanghelyo nga makatabang nila sa pagpadayon uban ang hugot nga pagtuo kon mag-atubang sila og mga pangutana o walay kasegurohan nga mga sitwasyon. Dayon dapita sila nga ipakigbahin ang ilang gisulat ug ipasabot kon sa unsang paagi ang maong mga kamatuoran makatabang nila sa pagpadayon uban ang hugot nga pagtuo.

Opisyal nga Pahayag 2

Aron matabangan ang mga estudyante nga masabtan ang mga kahimtang nga konektado sa restriksyon sa pagkapari ug ang pagpadayag nga mitangtang sa maong restriksyon, dapita silang pangitaon ang pasiuna sa Opisyal nga Pahayag 2 diha sa ilang mga kasulatan. Kon kinahanglan, paghatag og mga kopya sa pasiuna sa mga estudyante nga naay mas karaan nga edisyon sa mga kasulatan.

Basaha ang pasiuna sa Opisyal nga Pahayag 2, nga pangitaon ang panghitabo nga konektado niini nga pahayag.

• Sa imong hunahuna, unsa ang importanteng masabtan gikan niini nga parapo?

Ipatin-aw nga ang pahayag nga, “ang mga rekord sa Simbahan wala maghatag og klarong panabot sa gigikanan niini nga buhat” nagrepresentar sa opisyal nga posisyon sa Simbahan sa restriksyon sa pagkapari. Importante nga dili kita magtagna-tagna kon nganong gipatuman ang restriksyon.

Pwede usab ninyong ikonsiderar ang pagpasabot sa pakisayran sa 2 Nephi 26:33 sa unang kapahayag sa pasiuna. Ikonsiderar ang pagdapit sa mga estudyante nga basahon kini nga bersikulo ug ipakigbahin ang mga kamatuoran nga importanteng hinumdoman dihang maghunahuna niini nga palisiya.

Ang Opisyal nga Pahayag 2 naglangkob sa opisyal nga pahibalo sa pagpadayag nga nadawat sa Unang Kapangulohan ug sa Kurom sa Napulog Duha ka Apostoles niadtong Hunyo 1, 1978.

Imbes tun-an ang Opisyal nga Pahayag 2 isip usa ka klase, ikonsiderar ang pagdapit sa mga estudyante nga tun-an kini uban sa gamayng grupo. Kon anaa, pwede nilang gamiton ang mga kapanguhaan gikan sa “The Long-Promised Day” (Liahona, Hunyo 2018, 34–37) aron tabangan silang mas masabtan ang pipila sa mga pahayag diha sa Opisyal nga Pahayag 2.

Basaha ang upat ka parapo ilawom sa hugpong sa mga pulong nga “Minahal kong mga Kaigsoonan” diha sa Opisyal nga Pahayag 2. IKonsiderar ang pagmarka sa mga pulong o hugpong sa mga pulong nga importante para nimo.

• Unsay mipatigbabaw diha kanimo sa imong nabasa?

• Sa tabang niini nga kasinatian, unsay imong nasabtan o gibati bahin sa Langitnong Amahan ug kang Jesukristo?

Epekto sa pagpadayag

Kini nga pagpadayag adunay dakong epekto sa mga tawo sa tibuok kalibotan. Dili madugay human kini madawat, gipadala ang mga misyonaryo sa Africa. Sukad niadto natukod ang mga templo niana nga kontinente, ug gatosan ka libo ka tawo nga African og kagikan sa tibuok kalibotan ang nakadawat sa mga ordinansa sa ebanghelyo alang sa ilang kaugalingon ug alang sa ilang mga katigulangan nga namatay na.

Ipasabot nga apil niadtong apektado sa pagpadayag si Helvécio ug Rudá Martins. Ikonsiderar ang pagdapit og usa ka estudyante sa pagbasa og kusog sa mosunod nga parapo ngadto sa klase:

Human masayod bahin pagpadayag nga nagtugot sa tanang angayan nga lalaki nga madakawat sa pagkapari, si Helvécio nahinumdom:

“Dili nako mapugngan ang akong mga gibati. Si Rudá ug ako misulod sa among kwarto, nangluhod, ug nag-ampo. Naghilak mi samtang nagpasalamat sa among Amahan sa Langit alang sa panghitabo nga igo lamang namong gipangandoy. Miabot gayod ang adlaw, ug diha sa among mortal nga mga kinabuhi” (The Autobiography of Elder Helvécio Martins [1994], 69–70).

Wala madugay human ang 1978 nga pagpadayag, naselyo ang pamilyang Martins diha sa templo. Si Helvécio nahimong lokal nga lider sa pagkapari ug sa ngadto-ngadto natawag nga magserbisyo ingon nga sakop sa Seventy (tan-awa sa “Elder Helvécio Martins of the Seventy,” 106).

• Unsa kahay kalainan sa kinabuhi sa pamilyang Martins kon wala pa nila pilia nga magpakitag hugot nga pagtuo kang Jesukristo?

• Unsay imong nakat-onan gikan sa ehemplo sa pamilyang Martins nga makatabang nimo sa walay kasegurohan nga mga sitwasyon o wala matubag nga mga pangutana?

  Ingon nga bahin sa inyong panaghisgot, ikonsiderar ang pagsulat sa mosunod nga kamatuoran diha sa pisara: Dihang molihok kita uban sa hugot nga pagtuo panahon sa walay kasegurohan nga mga sitwasyon, nangandam kita sa pagdawat sa mga panalangin sa Gino.

• Unsa ang pipila ka paagi nga makalihok kamo uban sa hugot nga pagtuo kon mag-atubang kamo og walay kasegurohan nga mga sitwasyon o espirituwal nga mga pangutana?

  Kon kinahanglan, makapangita og mga ideya ang mga estudyante diha sa parapo 5–7 sa seksiyon nga “Pag-angkon og Espirituhanong Kahibalo” sa Mahinungdanon nga Dokumento sa Doktrinal nga Kahanas (2023).

• Sa unsang paagi gipanalanginan ka o ang imong mga kaila sa Ginoo tungod sa paglihok uban ang hugot nga pagtuo?

Ikonsiderar ang pagpakigbahin og ehemplo gikan sa imong kinabuhi. Pwede usab ninyong ipasalida ang bidyo nga “Struggling with the History of Race and the Priesthood” (4:04), nga anaa sa ChurchofJesusChrist.org.

Agig dugang, pwede nimong dapiton ang mga estudyante nga mangitag mga ehemplo gikan sa mga kasulatan nga nagpakita nga gipanalanginan sa Ginoo kadtong milihok uban ang hugot nga pagtuo. Apil sa mga ehemplo ang biyuda sa Sarefat (1 Mga Hari 17:8–24); pamilya ni Lehi (1 Nephi 2:2–5; 17:1–3); ug ang Propeta Joseph Smith (Joseph Smith—Kasaysayan 1:8–17).

Paghimo og plano

Pahinumdomi ang mga estudyante sa sitwasyon o pangutana gikan sa ilang kinabuhi nga ilang gihunahuna sa sinugdanan sa leksiyon. Dayon dapita ang mga estudyante sa pagtubag sa mosunod nga mga pangutana diha sa ilang mga journal sa pagtuon:

• Unsay imong nakat-onan o gibati karon nga makatabang nimo sa walay kasegurohan nga mga sitwasyon o espirituwal nga mga pangutana?

• Unsay piho nimong himoon aron magpakitag hugot nga pagtuo kang Jesukristo niini nga mga sitwasyon?

Dugang nga mga Kapanguhaan

Asa ko makakat-on og dugang bahin sa restriksyon sa pagkapari ug ang pagpadayag nga gipahibalo diha sa Opisyal nga Pahayag 2?

Tan-awa ang mosunod nga mga kapanguhaan:

• “Paghatag sa mga Panalangin sa Priesthood” (Liahona, Hunyo 2018)

• “Restriksyon sa Pagkapari ug sa Templo” (Mga Hisgotanan sa Kasaysayan sa Simbahan)

• “Race and the Priesthood” (Gospel Topics Essays)

• “Mga Pagpadayag panahon sa Ting-init sa 1978” (Personal nga Saysay ni Elder Ahmad Corbitt sa Seventy)

Giunsa pagtinguha sa mga lider sa Simbahan ang paggiya sa Ginoo sa wala pa nadawat kini nga pagpadayag?

Si Presidente Spencer W. Kimball (1895–1985), nga Presidente sa Simbahan dihang nadawat ang pagpadayag, mihinumdom:

Nasayud ako nga adunay usa ka butang sa among atubangan nga importante kaayo sa kadaghanan sa mga anak sa Dios. … Kada adlaw nag-inusara akong moadto ug uban sa dakong kabalaan ug kaligdong didto sa ibabaw nga mga kwarto sa templo, ug didto akong gihalad ang akong kalag ug gihalad ang akong mga paningkamot sa pagpadayon sa programa. Buot ako nga mobuhat unsa ang iyang buot ipabuhat. Nakigsulti ako kaniya kalabut niini ug miingon, “Ginoo, buot lamang ako nga mobuhat unsa ang husto. … Buot lamang kami sa mga butang nga pagbuot nimo, ug buot kami niini kon imong pagbuot kini ug dili hangtud.” …

Giklaro kaayo sa Ginoo ngari kanako unsa ang angay nga buhaton. (Mga Pagtulun-an sa mga Presidente sa Simbahan: Spencer W. Kimball [2006],297)

Unsa kahay gibati sa mga lider sa Simbahan nga nakadawat niini nga pagpadayag?

Si Presidente Gordon B. Hinckley (1910–2008), kinsa usa ka sakop sa Korum sa Napulog Duha ka Apostoles sa panahon ang pagpadayag nadawat, mipamatuod kabahin sa unsa kini sama nga maanaa sa templo nianang adlawa:

Miduyog kami sa pag-ampo diha sa labing sagrado nga sitwasyon. Si Presidente Kimball mismo mao ang namulong niana nga pag-ampo. … Adunay balaanon nga pagbati diha sa kwarto. Alang kanako, mabati nga daw adunay agianan nga naabli tali sa langitnong trono ug sa nagluhod, nangamuyo nga propeta sa Dios kinsa giubanan sa iyang mga Kaigsoonan. Ang Espiritu sa Dios anaa didto. Ug pinaagi sa gahum sa Espiritu Santo dihay miabut niana nga propeta nga kasigurohan nga ang butang diin iyang giampo matarung, …

Kaming tanan nasayud nga ang panahon miabut na alang sa kausaban ug nga ang desisyon miabut gikan sa kalangitan. Ang tubag klaro. Adunay hingpit nga panaghiusa diha kanamo sa among kasinatian ug sa among pagsabut. (Gordon B. Hinckley, “Priesthood Restoration,” Ensign, Okt. 1988, 69–70)

Dugang nga mga Kalihokan sa Pagkat-on

Mga Bidyo

Ikonsiderar ang paggamit sa usa o kapin pa sa mosunod nga mga bidyo sa mga porsyon sa leksiyon. Kini nga mga bidyo makatabang sa mga estudyante nga makita ang mga panig-ingnan sa matinud-anong mga Santos, sa wala pa ug pagkahuman sa pagpadayag nga tangtangon ang mga restriksyon sa pagkapari.

• “Long-Promised Day” (8:41). Gipakita sa bidyo ang mga Santos sa Ghana nga dugay nang naghulat sa kahigayonan nga madawat ang pagkapari.

• “Be One—A Celebration of the Revelation on the Priesthood” gikan sa time code 1:06:55 hangtod 1:09:14. Gihulagway sa Itom nga mga Santos sa Ulahing mga Adlaw kon sa unsang paagi napanalanginan sa pagkapari ang ilang kinabuhi.

• “A New Day” (2:24). Gipakigbahin sa Itom nga mga Santos sa Ulahing mga Adlaw ang ilang reaksiyon sa 1978 nga pagpadayag.

Ipasabot ang kalihokan

Ang mga estudyante tingali nakasinati sa ilang mga kinabuhi dihang sila hangyoon sa pagpasabot kon nganong gipatuman ang restriksyon sa pagkapari. Ikonsiderar ang pagtugot nila nga magpraktis niini diha sa klase. Sa dili pa sila magpraktis og pagpasabot, makatabang tingali ang pagpahinumdom nila nga wala kita kahibalo kon nganong gipatuman kini nga palisiya (tan-awa sa Pasiuna sa Opisyal nga Pahayag 2).

Dayon ikonsiderar ang pagdapit sa mga estudyante nga tubagon ang mosunod nga mga pangutana. Pwedeng magpraktis ang mga estudyante sa pagtubag niini uban sa ilang pares o gamayng grupo.

• Kon adunay mangutana nimo kon nganong gipatuman ang restriksyon sa pagkapari, unsang mga kamatuoran ang gibati nimong mas importante aron matabangan sila nga makasabot? Ngano man?

Human makapraktis sa pagpasabot ang mga estudyante, hangyoa silang ipakigbahin ang mga kamatuoran nga ilang gitutokan. Kon kinahanglan, hatagig gubug-aton nga nasayod kita nga gimahal sa Dios ang tanan Niyang mga anak ug gidapit silang tanan sa pagdangop Kaniya (tan-awa sa 2 Nephi 26:33). Nasayod usab kita nga nagtinguha ug nakadawat ang mga propeta sa paggiya sa Ginoo pinaagi sa paggiya sa Iyang Simbahan.

Mga ehemplo sa paglihok uban ang hugot nga pagtuo

Ikonsiderar ang pagpakigbahin sa mosunod nga nahinumdoman ni Presidente Dallin H. Oaks sa Unang Kapangulohan. Dapita ang mga estudyante sa pagpangita kon giunsa nila pag-atubang ang wala matubag nga mga pangutana dihang gipatuman pa ang restriksyon sa pagkapari.

Akong naobserbahan ang kasakit ug ang kasagmuyo nga nasinati niadtong kinsa nag-antos niini nga mga pagdili ug niadtong kinsa … nangita og mga rason. Akong gitun-an ang gihatag nga mga rason ug wala mobati og panghimatuod sa kamatuoran bisan hain niini. Isip kabahin sa akong mainampoon nga pagtuon, akong nakat-onan nga, sa kinatibuk-an, ang Ginoo panagsa ra nga mohatag og mga rason alang sa mga sugo ug mga direksiyon nga Iyang gihatag ngadto sa Iyang mga sulugoon. Determinado ko nga magmatinud-anon sa atong propetikanhong mga lider ug mag-ampo—sama sa gisaad gikan sa sinugdanan niini nga mga pagdili—nga moabot ang adlaw nga ang tanan makatagamtam sa mga panalangin sa pagkapari ug templo. (“President Oaks Remarks at Worldwide Priesthood Celebration,” newsroom.ChurchofJesusChrist.org)

• Unsay imong nakat-onan sa tubag ni Presidente Oaks nga makatabang nimo dihang aduna kay mga pangutana bahin sa usa ka doktrina o palisiya sa Simbahan?

• Para nimo nganong importante ang pagkamaunongon sa atong propeta nga mga lider samtang kita naghulat og tubag sa atong mga pangutana?

Pagpili sa hugot nga pagtuo imbes sa pagduhaduha

Ikonsiderar ang pagpasalida sa “Doubt Not, but Be Believing” gikan sa time code 15:26 hangtod 20:28. Niini nga bidyo, gihulagway ni Elder Dale G. Renlund sa Korum sa Napulog Duha ka Apostoles ug si Sister Ruth L. Renlund ang mga ehemplo sa duha ka tawo nga lainlain og tubag sa ilang mga pangutana sa ebanghelyo, diin ang usa nagduhaduha ug ang lain naay hugot nga pagtuo. Human mapasalida ang bidyo, dapita ang mga estudyante sa pagpakigbahin sa mga pagtulun-an o panglantaw nga mipatigbabaw kanila.