Lesona 154: O Mataupu Faavae o le Faatuatua ma Folafolaga Aloaia 1 ma le 2

Mataupu Faavae o le Faatuatua

Aoaoina o Upumoni Faavae o le Talalelei a le Faaola

I le aso 1 Mati, 1842, sa tali atu ai le Perofeta o Iosefa Samita i se talosaga mai le faatonu o le nusipepa o John Wentworth e tuuina mai faamatalaga e uiga i le talafaasolopito ma talitonuga o le Ekalesia. O se vaega o lana tali, sa folafola atu ai e Iosefa mataupu faavae autu e 13 o le talalelei ua lauiloa i aso nei o Mataupu Faavae o le Faatuatua. O lenei lesona e mafai ona fesoasoani i tagata aoga e faalolotoina lo latou malamalama i le aoaoga faavae a le Faaola e ala i le suesueina o upumoni o loo i ai i Mataupu Faavae o le Faatuatua.

Gaoioiga E Ono Mafai Ona Aoao Ai

Faamalamalamaina o o tatou talitonuga

Mafaufau e amata le vasega i le ata faataitai lenei.

Vaai faalemafaufau e i ai sau uo e fia iloa atili ia mea e talitonu i ai tagata O le Ekalesia a Iesu Keriso o le Au Paia o Aso e Gata Ai. E ese le fiafia o lau uo ae e na o ni nai minute lava e faalogo ai ae e lei alu i le vasega.

• O le a se mea e te manao mo lau uo ia ona malamalama ai e uiga ia Iesu Keriso ma Lana talalelei?

  E mafai ona e tuuina atu i tagata aoga ni minute se tolu e tusi ai a latou tali i a latou api talaaga mo suesuega. I se isi itu, e mafai ona latou talanoaina mea o le a latou faasoa atu o se vasega pe faatino faatasi ma se paga le tulaga faataitai.

• O a ni punaoa e mafai ona e faasoa atu i lau uo e fesoasoani ai ia i latou e aoao atili e uiga i le Faaola ma Lana talalelei?

Afai e manaomia, ta’u i ai o se tasi o punaoa aoga o Mataupu Faavae o le Faatuatua. Ia mautinoa e mafai e tagata aoga ona maua Mataupu Faavae o le Faatuatua i a latou tusitusiga paia. E mafai ona e tuuina atu ia i latou ni nai minute e iloilo ai lo latou tulaga o le masani ai i Mataupu Faavae o le Faatuatua. Mo se faataitaiga, e mafai ona e fesili i tagata aoga pe na i ai se taimi na latou taulotoina ai se tasi pe faaaoga foi a o aoao atu se lesona, tusia o se lauga, po o le faasoa atu o le talalelei a le Faaola i isi.

Mataupu Faavae o le Faatuatua

Ina ia fesoasoani i tagata aoga e aoao e uiga i le ala na tatou maua ai Mataupu Faavae o le Faatuatua, mafaufau e faasoa atu i tagata aoga le vitio “The Articles of Faith” (4:43), o loo maua i le ChurchofJesusChrist.org. E mafai foi ona e aoteleina faamatalaga nei i tua atu:

I le 1842, sa tali atu ai Iosefa Samita i se tusi na ia maua mai ia John Wentworth, o le sa nofo i Sikako, Ilinoi. O Wentworth o le faatonu o se nusipepa na ta’ua o le Chicago Democrat ma sa manao ia iloa atili e uiga i talitonuga ma le talafaasolopito o le Au Paia sa nonofo i Navu, Ilinoi. I vaega o le tusi, sa faasoa mai ai e Iosefa ni faamatalaga auiliili e uiga i le faatuina ma le taunuuga o le Ekalesia a le Faaola. Sa faaiuina e le Perofeta le tusi i ni faamatalaga pupuu se 13 o loo i ai upumoni faavae ma aoaoga faavae o le Ekalesia. O nei faamatalaga na faaigoa mulimuli ane o Mataupu Faavae o le Faatuatua ma sa lolomiina i le 1851 i le lomiga muamua o le Penina Tau Tele.

Na faasoa mai e Elder L. Tom Perry (1922–2015) o le Korama a Aposetolo e Toasefululua le mea lenei e uiga i le auala e mafai ai e le aoaoina o Mataupu Faavae o le Faatuatua ona fesoasoani ia i tatou.

Ou te uunaia outou e faaaoga o outou mafaufau atamamai e suesue ma aoao ai Mataupu Faavae o le Faatuatua ma aoaoga faavae o loo aoao mai ai. O nisi ia o faamatalaga o aoaoga faavae e sili ona taua ma e mautinoa lava e sili ona pupuu i le Ekalesia. Afai o le a outou faaaogaina e fai ma taiala e taitai ai au suesuega o le talalelei a Iesu Keriso, o le a e iloa ai lou saunia e tautino atu lau molimau e uiga i le upumoni toefuataiina i le lalolagi. O le a mafai ona outou tautino atu i auala faigofie, tuusa’o, ma o’oo’o ia talitonuga autu e pele ia te oe, i le avea ai ma se tagata O le Ekalesia a Iesu Keriso o le Au Paia o Aso e Gata Ai. (L. Tom Perry, “O Aoaoga Faavae ma Mataupu Faavae o Loo I Ai i Mataupu Faavae o le Faatuatua,” Liahona,” Nov. 2013, 48)

• O le a se mea na e aoaoina mai lenei faamatalaga e uiga i le taua o le suesue ma le iloaina o Mataupu Faavae o le Faatuatua?

Mafaufau e tuuina atu lau molimau i soo se faamanuiaga ua e matauina mai le suesueina o Mataupu Faavae o le Faatuatua ma faaaoga e folafola atu ai le talalelei a le Faaola.

Aoaoina o le talalelei a Iesu Keriso i Mataupu Faavae o le Faatuatua

O le manatu lenei o se tasi lea o auala e fesoasoani ai i tagata aoga ia maua se aafiaga aogā i Mataupu Faavae o le Faatuatua. Mafaufau e tufa atu le pepa e tufa atu ua faaautu o le “Gaoioiga Suesue o Mataupu Faavae o le Faatuatua.” Tuu atu i tagata aoga se taimi e faauma ai le gaoioiga i luga o le pepa tufaatu. Uunaia i latou e gauai atu i uunaiga faaleagaga poo malamalamaaga latou te maua mai i le Agaga Paia a o latou suesue. Atonu e te manao e faamautinoa o le a taulai atu nisi o tagata aoga i mataupu faavae muamua e fa o le faatuatua, lea e aoao mai ai upumoni faavae taua e uiga i le Tama Faalelagi, Iesu Keriso, ma la Latou aoaoga faavae.

Ia maua sou avanoa e fesoasoani ai i tagata aoga, ae valaaulia i latou e faaaoga tomai suesue sa latou aoaoina i le fale, lotu, ma le seminare e faamaea ai gaoioiga. Afai e vave faamaea e tagata aoga le gaoioiga, valaaulia i latou e filifili se isi mataupu faavae o le faatuatua ma toe fai le faagasologa.

Gaoioiga Su’esu’e o Mataupu Faavae o le Faatuatua

Laasaga 1: Filifili se tasi o Mataupu Faavae o le Faatuatua e te manao e suesue i ai i le asō ma tali fesili nei:

• O a upumoni po o ni upumoni e faavavau ua e aoaoina mai lenei mataupu faavae o le faatuatua?

• E mafai faapefea e aoaoga mai lenei mataupu faavae o le faatuatua ona aafia ai lou sootaga ma le Tama Faalelagi ma Iesu Keriso?

Laasaga 2: Filifili ia le itiiti ifo ma le lua ni filifiliga nei e fesoasoani ia te oe e aoao atili ai e uiga i lau mataupu faavae o le faatuatua ua filifilia:

1. Tauloto. Mafaufau i se manatu e fesoasoani ia te oe e tauloto ai lau mataupu faavae o le faatuatua ma faaalu se taimi e taulotoina ai.

2. Saili punaoa e fesootai i ai. Saili tusitusiga paia fetaui poo faamatalaga mai taitai o le Ekalesia e fesootai i le mataupu faavae o le faatuatua na e filifilia. E mafai ona e faaaogaina meafaigaluega e pei o vaefaamatalaga i au tusitusiga paia, o le Taiala i Autu, o le Taiala i Tusitusiga Paia, po o le faatinoga o sailiiliga i le polokalama o le Potutusi o le Talalelei e fesoasoani ia te oe.

3. Fatu se faatusa vaaia. Faaaoga ata e fesoasoani ia te oe e fesootai pe fai ma sui o aoaoga mai lau mataupu faavae o le faatuatua ua filifilia. O faataitaiga e mafai ona aofia ai se ata tusi, ni ata putuputu, upu i ao, po o le meme. (Ona o le natura paia o le Atua, aloese mai le tusiaina o ata o tagata o le Aiga Atua.)

4. Fatu se ata faataitai. Mafaufau i tulaga e feagai ma oe po o isi talavou, po o fesili o le talalelei e mafai ona fesoasoani i ai lau mataupu faavae o le faatuatua. Tusi le ata faataitai po o fesili ma faamatala pe faapefea pe aisea o le a fesoasoani ai upumoni o loo aoaoina i le mataupu faavae o le faatuatua.

5. Molimau atu. Tusi lau molimau e uiga i upumoni na aoaoina i lau mataupu faavae o le faatuatua. Faamatala pe na faapefea ona faamanuiaina lou olaga e nei aoaoga ma aumaia ai oe ia latalata atili i le Atua.

Faasoa atu mea ua e aoaoina

Mafaufau i ni auala e fesoasoani ai i tagata aoga e faasoa mai ma tuuina atu mea na latou aoaoina. E mafai ona e tusia numera 1–13 i ni fasipepa laiti e 13 ma tuu i totonu o se pulou. Se’i mai se tasi i soo se taimi ma fesili pe i ai ni tagata aoga na suesueina lena mataupu faavae o le faatuatua e naunau e faasoa mai. Mo se vasega toatele atu, mafaufau e faatulaga tagata aoga i ni paga po o ni vaega toalaiti ma valaaulia i latou e fefaasoaai le tasi ma le isi.

A uma le fetufaaiga, e mafai e tagata aoga naunau ona faaali a latou pepa i le potu atoa mo isi e maimoa i ai.

Punaoa Faaopoopo

O fea ou te aoaoina atili ai e uiga i le tusi a Wenworth ma le Mataupu Faavae o le Faatuatua?

I le 1851, o Mataupu Faavae o le Faatuatua sa aofia ai i le lomiga muamua o le Penina Tau Tele, na lolomiina i le Misiona a le Ekalesia i Peretania. Sa avea i latou ma aoaoga faavae aloaia a le Ekalesia ina ua uma ona toe faafouina le Penina Tau Tele i le 1878 ma sa faapaiaina i le taimi o le konafesi aoao a le Ekalesia ia Oketopa 1880. E ono mafai foi ona fesoasoani punaoa nei.

Mo le anotusi o le tusi atoa na tusia e Iosefa Samita, tagai i le “The Wentworth Letter,” Ensign, Iulai 2002, 26–32, po o le uepisaite o le Joseph Smith Papers .

Ina ia aoao atili e uiga i Mataupu Faavae o le Faatuatua, suesue le lauga ma le tusiga lenei o le konafesi:

• L. Tom Perry, “O Aoaoga Faavae ma Mataupu Faavae o Loo I Ai i Mataupu Faavae o le Faatuatua” (Liahona, Nov. 2013, 46–48)

• John W. Welch, “The Articles of Faith and the Life of Joseph Smith,” (Liahona, Tesema 2013, 69–75)

E mafai faapefea e Mataupu Faavae o le Faatuatua ona fesoasoani ia te au e faasoa atu le talalelei i isi?

Na aoao mai Peresitene M. Russell Ballard o le Korama a Aposetolo e Toasefululua:

Po o le a lava le mea e te filifili e faaaoga e faailoa atu ai i au uo ma paaga e uiga i le Ekalesia, tusi i lalo, siaki mo le sa’o lelei, ma faafaigofie ma puupuu.

O le faatupulaia o le lauiloa o le Ekalesia ma le faateleina o fesili mai isi ua tuuina mai ai ia i tatou ni avanoa maoae e fausia sootaga ma isi, faia ni uo, ma tuufaasolo atu faamatalaga sa’o. Ae e mafai foi ona ono aumaia se tulaga o le lē malamalama ma o nisi taimi e oo lava i le faailoga tagata pe afai tatou te faatagaina isi e faamatala po o ai i tatou ma mea tatou te talitonu i ai nai lo le tuuina atu e i tatou lava. …

Ou te faamoemoe o i latou e itiiti se iloa e uiga i le Ekalesia o le a saili e aoao atili e uiga ia i tatou. …

O outou o tagata o le ekalesia e mafai ona fesoasoani i lenei mea ia tupu e ala i le aapa atu ma faasoa atu i isi ia faamatalaga faavae o loo maua i Mataupu Faavae o le Faatuatua. (M. Russell Ballard, “Faatuatuaga, Aiga, Mea Moni, ma Fua,” Liahona, Nov. 2007, 27)

E mafai faapefea e le aoaoina ma le ola ai i upumoni ma mataupu faavae o i le mataupu faavae o le faatuatua lona sefulutolu ona faamanuiaina ai lo’u olaga?

I le talanoa ai e uiga i le mataupu faavae o le faatuatua lona sefulutolu, na saunoa ai Peresitene Gordon B. Hinckley (1910–2008):

[O lenei] mataupu faavae o lo tatou faatuatuaga o se tasi lea o tautinoga faavae o lo tatou talitonuga faalelotu. E tatau ona tatou toe manatunatu ai pea lava pea. Ma, soo se taimi lava e ono faaosoosoina ai i tatou e faia soo se mea valea po o le lē faamaoni po o le lē mama, o le a oo mai i o tatou mafaufau ma se malosiaga lenei faamatalaga maoae, ma le atoatoa o mataupu faavae o a tatou amioga. (Gordon B. Hinckley, “Aua le Fefe e Fai Mea Lelei,” Liahona, Fep. 2000, 5; Ensign, Jan. 2000, 2)

Gaoioiga Faaopoopo e Aoao Ai

O le mataupu faavae o le faatuatua lona sefulutolu

Ina ia fesoasoani i tagata aoga e suesue nisi o uiga faaKeriso o loo lisiina i le mataupu faavae o le faatuatua lona sefulutolu, mafaufau e tusi upu nei i luga o le laupapa i se faatulagaga faapitoa:

Faamaoni, Moni, Nofomama, Agalelei, Amio Mama, Talitonu, Faamoemoe, Mausali (“mafai ona onosai i mea uma”).

Fesili i tagata aoga pe latou te iloa po o le fea mataupu faavae o le faatuatua o loo talanoaina ai nei tulaga faatonuina ma uiga auaumama. Mafaufau e tauloto faatasi le mataupu faavae o le faatuatua lona sefulutolu. E mafai ona e ta’u i ai o le “apoapoaiga a Paulo” e sau mai le Filipi 4:8 i le Feagaiga Fou.

Vaevae tagata aoga i ni vaega toalaiti, ma tofi atu i vaega taitasi se tasi o upu o loo i luga o le laupapa e suesue. Uunaia vaega taitasi e sue le uiga o lana upu atofaina ma sue nisi tusitusiga paia po o faamatalaga mai taitai o le Ekalesia o loo aoao atili mai ai. E mafai foi e tagata aoga ona maua se faataitaiga mai le soifuaga o le Faaola lea na Ia faataitaia ai le tulaga faatonuina po o le uiga. Valaaulia tagata aoga e faasoa mai mea na latou aoaoina. Mafaufau e fai atu nisi o fesili e pei o nei:

• E mafai faapefea e le ola ai i tulaga faatonuina ma uiga i lenei mataupu faavae o le faatuatua ona fesoasoani ia te oe e avea ai o se soo sili atu o Iesu Keriso?

• E mafai faapefea e le faia o mea lelei i isi ma le sailia o mea e mama ma tauleleia ona fesoasoani ia te oe e aloese ai mai le agasala ma faaosoosoga?

A uma ona tali mai tagata aoga ma faasoa mai o latou manatu, faasoa atu le saunoaga a Peresitene Hinckley i le vaega o “Punaoa Faaopoopo”.

O Le Tagavai o le Upumoni

O le isi vaega taua o tusitusiga a Iosefa Samitai le tusi a Wentworth o nisi taimi e faasino i ai o le “O Le Tagavai o le Upumoni.” Mafaufau e valaaulia tagata aoga e suesue le faamatalaga lenei, ma vaavaai mo upu po o fasifuaitau e taua ia i latou.

Ua faatuina le Tagavai o le Upumoni; e leai se lima eleelea e mafai ona taofia le galuega mai le alualu i luma; e ono tula’i mai sauaga, e ono tuufaatasia tagata faatupu faalavelave, e ono faapotopotoina vaegaau, e ono taufaasese tuua’iga, ae o le upumoni a le Atua o le a agai pea i luma ma le manino, mamalu, ma le tutoatasi, seia oo ina so’o uma ai konetineta, ma asiasi atu i atunuu uma, ma aofia ai malo uma, ma lagonaina e taliga uma, seia oo ina faataunuuina faamoemoega o le Atua, ma seia oo ina fetalai mai le Ieova Silisiliese, ua mae’a le galuega. (“The Wentworth Letter,” Ensign, Iulai 2002, 31)

Talanoaina mea na aoaoina e tagata aoga mai lenei saunoaga e ala i le fai atu o fesili e pei o nei:

• O le a se mea na tulagaese ia te oe mai lenei saunoaga?

• E faapefea ona e vaaia le faataunuuina o upu a le Perofeta o Iosefa Samita i o tatou aso?

O le isi auala e fesoasoani ai i tagata aoga e teuloto lenei faamatalaga o le tuu atu lea ia i latou o se avanoa e fatu ai se ata vaaia e faatusa i mea o loo aoaoina i lenei faamatalaga. Mo se faataitaiga, e mafai ona mafaufau tagata aoga i ni auala fatufatuai e faaalia ai le salalau atu o le upumoni a le Atua i le lalolagi atoa. E mafai e tagata aoga ona faasoa atu a latou ata vaaia i isi ma faamatala mai pe aisea na latou faaaofia ai mea sa latou faia.