Lesona 155: O Mataupu Faavae o le Faatuatua ma Folafolaga Aloaia 1 ma le 2

Folafolaga Aloaia 1

“Na Faaali Mai e le Alii ia te Au e ala i se Faaaliga Vaaia ma Faaaliga”

Mo le tusa ma le 50 tausaga, sa faia ai e nisi o tagata o le Ekalesia ni faaipoipoga autaunonofo e tali atu ai i se poloaiga mai le Alii. I le 1890, na poloaiina ai e le Alii ia Peresitene Uilifoti Uitilafi (1807–98) e faasilasila atu le faamuta o faaipoipoga autaunonofo i le Ekalesia. O lenei lesona e mafai ona fesoasoani i tagata a’oga ia malamalama ai e faatonutonu e le Alii Lana Ekalesia e ala i faaaliga faifai pea i Ana perofeta.

Gaoioiga E Ono Mafai Ona Aoao Ai

O lenei lesona o loo taulai atu i le poloaiga a le Alii mo le Au Paia ia le toe faaauauina le faatinoina o faaipoipoga autaunonofo. A o lei aoaoina atu lenei lesona, atonu e aoga le toe faamanatu o punaoa mai le lesona “Mataupu Faavae ma Feagaiga 132:1–2, 34–66” e fesoasoani ai i tagata aoga atonu o loo i ai pea ni fesili e uiga i faaipoipoga autaunonofo.

Ua faaali mai e le Atua Lona finagalo i Lana fanau

Faamalosia ai o le suesueina patino ma le iloiloga. Mo nisi aoaoga i auala e fai ai lenei mea, tagai i le aoaoga ua faaautuina “Fai faatulagaga ma avanoa mo tagata aoao ina ia aoaoina e le Agaga Paia,” o loo maua i le Tomai Atina’e o Faiaoga: Aoao atu e ala i le Agaga. Mafaufau e faataitai le faia o ni iloiloga faaletagata lava ia e uiga i se aoaoga faavae, upumoni, po o se mataupu faavae.

Mafaufau e amata le lesona i le valaauliaina o se tagata aoga e faitau pe tauloto ia le Mataupu Faavae o le Faatuatua 1:9. Ona fesoasoani lea i tagata aoga e iloilo o latou talitonuga e uiga i le faaali mai e le Atua o Lona finagalo i Lana fanau e ala i perofeta. E mafai ona e faaali atu mea nei ma tuu atu i tagata aoga se taimi e mafaufau filemu ai i a latou tali.

Mo faamatalaga o i lalo, filifili le filifiliga (iloa; talitonu; sina talitonu; le iloa pe) e sili ona atagia mai ai le auala e te faatumuina ai le avanoa: “Ou te e moni lenei mea.”

• Ua faaali mai e le Atua Lona finagalo i Lana fanau e ala mai i Ana perofeta.

• O le Atua o loo faaali mai nei Lona finagalo i Lana fanau e ala i Ana perofeta.

• O le a faaali mai e le Atua Lona finagalo i Lana fanau e ala mai i Ana perofeta.

Valaaulia tagata aoga e mafaufau pe aisea na latou tali mai ai i le ala na latou faia ai. E mafai ona e valaaulia nisi e faasoa mai.

Faamalamalama atu o le lesona o le asō o le a taulai atu i se faataitaiga mai le talafaasolopito o le Ekalesia lea e faaalia ai le taitaiina e le Alii o Lana Ekalesia e ala i faaaliga faifai pea i Ana perofeta. Uunaia i latou e gauai atu i uunaiga mai le Agaga lea e mafai ona fesoasoani ia i latou e iloa ai le faamanuiaga o le mauaina o faaaliga faifai pea mai le Alii.

Folafolaga Aloaia 1

Fesoasoani i tagata aoga ia malamalama o le Folafolaga Aloaia 1 e faatatau i le poloaiga a le Alii mo le Au Paia ia le toe faaauauina le faatinoina o faaipoipoga autaunonofo. Valaaulia tagata aoga e sue le parakalafa o le folasaga i le amataga o le Folafolaga Aloaia 1 i a latou tusitusiga paia. Afai e manaomia, tuu atu ni kopi o le folasaga mo tagata aoga o loo i ai lomiga tuai.

Faitau le folasaga i le Folafolaga Aloaia 1, ma vaavaai mo mea o loo aoao mai ai e uiga i le faiga masani a le Au Paia o faaipoipoga autaunonofo.

• O le a le mea na faigata ai i le Au Paia ona faaauau pea ona faia faaipoipoga autaunonofo?

Ina ia fesoasoani i tagata aoga ia malamalama atili e uiga i nei faigata, mafaufau e faitau pe aotele ia parakalafa nei. E mafai foi ona e valaaulia se tagata aoga e faitau atu i le vasega.

Ina ua uma ona nonofo le Au Paia i Iuta i le ogatotonu o le vaitau o le 1800, e toatele tagata o le Ekalesia na faia faaipoipoga autaunonofo. Na iu lava ina pasia e taitai o le malo tulafono na avea ai faaipoipoga autaunonofo ma solitulafono i le Iunaite Setete. O nei tulafono na taitai atu ai i le pue faapagotaina ma le faafalepuipuiina o le toatele o alii o le Au Paia o Aso e Gata Ai. O isi na lalafi ina ia aloese mai le pue faapagotaina (tagai i le Au Paia: O le Tala o le Ekalesia a Iesu Keriso i Aso e Gata Ai, vol. 2, Leai se Lima Eleelea, 1846–1893 [2020], 142, 408–9, 518–20).

I nei tulaga faigata, sa saili ma le agaga tatalo Peresitene Uilifoti Uitilafi ma maua le taitaiga mai le Alii. Na ia lagona le musuia e faatonuina ai ia taitai o le Ekalesia e faamuta le aoaoina atu o le mataupu faavae o faaipoipoga autaunonofo. Ia Setema 1890, na tuuina mai ai e Peresitene Uitilafi se manifeso (ua taua i le asō o le Folafolaga Aloaia 1). I le manifeso, na saunoa ai Peresitene Uitilafi i lipoti sese faapea o loo uunaia pea e taitai o le Ekalesia ia faaipoipoga fou autaunonofo (tagai i le Au Paia, 2:584–85, 597–601).

O lenei manifeso o loo ua iloa nei o le Folafolaga Aloaia 1 i le Mataupu Faavae ma Feagaiga.

Tuu atu i tagata aoga se avanoa e suesue ai nisi o fautuaga ma faatonuga a Peresitene Uitilafi i le Au Paia. Afai e manaomia, faaali atu i tagata aoga le mea o i ai i tusitusiga paia e mafai ona latou maua ai parakalafa o le a latou suesueina.

Suesue i anomea nei, ma vaavaai mo nisi o fautuaga a Peresitene Uitilafi i le Au Paia:

• Parakalafa 4–5 o le Folafolaga Aloaia 1 (e amata i le “E tusa ai ma tulafono …”)

• Parakalafa 1–2 o vaega o loo mulimuli i le Folafolaga Aloaia 1

Afai e lava le taimi, atonu e aoga le valaaulia o tagata aoga e suesue nisi parakalafa mai upusii. E mafai ona e tofia ni vaega toalaiti o tagata aoga e suesue ni parakalafa faapitoa, ma vaavaai mo mea na aoaoina e Peresitene Uitilafi mai le Alii. Ona mafai lea ona aotele e tagata aoga a latou suesuega ma le vasega.

• O a ni mea ua fesoasoani nei parakalafa e te malamalama ai pe faapefea ona ta’ita’ia e le Faaola Lana Ekalesia?

  Tuu atu i le toatele o tagata aoga se avanoa e tali atu ai le fesili talu ai. Latou te ono faailoa mai se upumoni e talitutusa ma lenei: O le a le faatagaina lava e le Alii le Peresitene o le Ekalesia e taitai sese le Ekalesia. E taitaia e le Alii Lana Ekalesia e ala i faaaliga faifai pea i Ana perofeta.

• E mafai faapefea e le iloaina o nei upumoni ona faamanuiaina pe aafia ai lou olaga?

• O a mea e mafai e nei upumoni ona a’oa’o atu ia te oe e uiga i le Faaola ma Lona naunautaiga mo i tatou?

Faaaliga faifai pea i aso nei

Sa faasoa mai e Peresitene Russell M. Nelson le molimau lenei:

Ou te iloama le mautinoa o loo taitai e le Alii mataupu o Lana Ekalesia. Sa Ia fetalai, “O le a Ou faaali atu [ia te outou] Ou te mafai ona faia o laʼu lava galuega” [2 Nifae 27:21].

O le tele o taimi, matou te vaavaai atu ai ma o’u fesoasoani ma lagona ootia ma loimata a o Ia faasalavei mai i tulaga matuā lu’itauina i le mae’a ai ona matou faia o mea sili na matou mafaia ma lē toe mafai ona fai o se mea. Matou te tu ma ofo moni lava. (Russell M. Nelson, “Tuleiga Amata,” Liahona, Me 2021, 6)

A mae’a ona faasoa atu ia faamatalaga na muamua atu, mafaufau e valaaulia tagata a’oga e talanoaina le fesili lea faatasi ma se paga po o se vaega toaitiiti. E mafai ona o mai tagata o vaega taitasi i le laupapa ma tusi nisi o a latou tali.

• O le a se faamaoniga ua e vaaia o loo faaauau pea ona taitai e le Alii Lana Ekalesia e ala i faaaliga i Ana perofeta i o tatou aso?

  O nisi o faataitaiga e ono ta’ua e tagata aoga e mafai ona aofia ai savali na faasoa mai e perofeta ma aposetolo i konafesi aoao, ma le folafola atu ma le puipuia o upumoni taua e ala i le “O Le Aiga: O Se Folafolaga i le Lalolagi,” “O Le Keriso Soifua: O Le Molimau a Aposetolo,” ma le “O Le Toefuataiga o le Atoatoa o le Talalelei a Iesu Keriso: O Se Folafolaga i le Lua Selau Tausaga i le Lalolagi.”

• Na faapefea ona faamanuiaina lou olaga i faaaliga faifai pea ua saunia e le Alii e ala mai i Ana perofeta?

Faataitai le malamalamaaga

Ina ia fesoasoani i tagata aoga e faaalia lo latou malamalama e uiga i mea ua latou aoaoina i le asō, mafaufau e faasoa atu le vaaiga faataitai lenei:

Ua le fiafia Sofia i nisi o suiga ua ia vaaia i le Ekalesia. Sa ia mafaufau pe aisea ua ese ai nisi o mea ua talosagaina i tatou e le perofeta e fai i le taimi nei nai lo le taimi a o laitiiti o ia.

• O a nisi o mea ua e aoaoina i le asō e mafai ona fesoasoani e faasoa atu ia Sofia?

E mafai ona tali mai tagata aoga o se vaega o se talanoaga a le vasega, pe mafai foi ona e valaaulia i latou e faatino lenei tulaga ma se paga.

Molimau atu i upumoni na outou talanoaina i le asō. Uunaia tamaiti aoga ia iloa le taitaiga faifai pea a le Alii e ala mai i Ana perofeta e mafai ona avea ma se faamanuiaga i o latou olaga.

Punaoa Faaopoopo

O fea e mafai ona ou aoao atili ai e uiga i le talafaasolopito o faaipoipoga autaunonofo ma le Manifeso?

• “The Messenger and the Manifesto,” Revelations in Context, 323–331

• “Plural Marriage and Families in Early Utah,” Gospel Topics Essays

• “The Manifesto and the End of Plural Marriage,” Gospel Topics Essays

• Mataupu 35, 38–40 o le Au Paia: O le Tala o le Ekalesia a Iesu Keriso i Aso e Gata Ai, vol. 2, Leai se Lima Eleelea, 1846–1893

E faapefea ona taitaia e le Faaola Lana Ekalesia e ala i faaaliga faifai pea i le perofeta o loo soifua?

Na faamatala mai e Peresitene Russell M. Nelson:

A matou potopoto o se Aufono a le Au Peresitene Sili ma le Korama o le Toasefululua, e avea a matou potu fono ma potu o faaaliga. E faalogoina le afio ai o le Agaga. A matou tauivi ai ma ni mataupu lavelave, e matala mai se faagasologa faagaeetiaina a o faaalia ma le saoloto e Aposetolo taitoatasi ona mafaufauga ma manatu. E ui atonu e eseese i matou i o matou uluai manatu, ae o le alofa matou te lagonaina mo le tasi ma le isi e tumau. E fesoasoani lo matou lotogatasi ia i matou e iloatino ai le finagalo o le Alii mo Lana Ekalesia.

I a matou fonotaga, e matua le mafai lava ona pule tutu le itu e toatele! Matou te faalogo ma le agaga tatalo i le tasi ma le isi ma talanoa ma le tasi ma le isi seia oo ina matou autasi. A oo loa ina matou ausia le tasi atoatoa, o le faatosinaga autasi a le Agaga Paia e matua faamaniti tino lava! Matou te oo i le mea na iloa e le Perofeta o Iosefa Samita ina ua ia aoao mai, “O le tuufaatasia o lagona tatou te maua ai le mana faatasi ma le Atua” [Aoaoga a Peresitene o le Ekalesia: Iosefa Samita (2007), 393–94]. E leai se uso o le Au Peresitene Sili po o le Korama o le Toasefululua na te faia ni faaiuga mo le Ekalesia a le Alii i sana ia lava faaiuga sili na o ia! (Russell M. Nelson, “Faaaliga mo le Ekalesia, Faaaliga mo o Tatou Olaga,” Liahona, Me 2018, 95)

Na aoao mai Elder Quentin L. Cook o le Korama o le Toasefululua:

Ua faamanuiaina i tatou i faaaliga faifai pea i perofeta soifua. …

O nisi faaaliga e matua ma’eu le taua, ma o isi e faaleleia ai lo tatou malamalama i upumoni paia taua ma maua ai le taiala mo o tatou aso. (Quentin L. Cook, “O Le Faamanuiaga o Faaaliga Faifai Pea i Perofeta ma Faaaliga Faaletagata Lava Ia e Taiala ai o Tatou Olaga,” Liahona, Me 2020, 97)

Gaoioiga Faaopoopo e Aoao Ai

Se isi amataga

Ina ia fesoasoani i tagata aoga ia iloa le taua o faaaliga faifai pea mai le Atua e ala mai i Ana perofeta, e mafai ona e tuuina atu ia i latou se tulaga e pei o lenei:

Vaai faalemafaufau i le faapea mai o lau uo: “Sa ou iloaina sa e talitonu o Iosefa Samita o se perofeta, ae ou te lei iloaina seia oo mai talu ai nei, e te talitonu na valaauina e le Atua isi perofeta ina ua mavae Iosefa Samita. Aisea o le a Ia faia ai lena mea?”

Ona mafai lea e tagata aoga ona faataitai le tali atu i le tulaga faataitai. Uunaia i latou e tuuina mai se faataitaiga patino se tasi pe lua o le auala o loo faaauau ai pea ona faaali mai e le Atua mea taua ia i tatou e ala mai i Lana perofeta.

Ua sailia e Alema le Matua faaaliga mai le Atua

Ina ia fesoasoani i tagata aoga ia iloa se faataitaiga faaopoopo o se perofeta o loo sailia, ma mauaina, faaaliga mai le Atua e uiga i se mataupu faigata, mafaufau e faitau e uiga i le aafiaga o Alema le Matua i le Mosaea 26. E mafai ona e aoteleina le Mosaea 26:1–12 i le faamalamalama atu faapea o tagata o le Ekalesia na taitaiina atu i le agasala e e le talitonu. Sa faatonuina e le Tupu o Mosaea ia Alema e galulue faatasi ma i latou o e na agasala. Ona mafai lea ona e tuu atu i tagata aoga e faitau le Mosaea 26:13–14 e faailoa mai ai le mea na faia e Alema.

E mafai e tagata aoga ona vaavaai mo tali i fesili e pei o fesili nei a o faitauina le Mosaea 26:32–36:

• O le a le faaaliga na tuuina mai e le Atua ia Alema?

• O le a le mea na faia e Alema i le faaaliga na ia mauaina?

• Na faapefea ona avea le faaaliga ma se faamanuiaga?

Faamaoniga faifai pea o loo taitaia ma le mataalia e le Alii Lana Ekalesia

Ina ia fesoasoani i tagata aoga ia iloa se faataitaiga o le auala o loo taitaia ai ma le mataalia e le Alii Lana Ekalesia e ala i faaaliga, mafaufau e matamata i le “O Le Malumalu ma Lou Faavae Faaleagaga” mai le faailo taimi 11:13 i le 13:08. E mafai ona faasoa mai e tagata aoga le mafuaaga ua mafai ai e faaaliga faifai pea ona agai i luma le galuega a le Alii i le lalolagi atoa.