“Lesona 157—Iloilo Lou Aoaoina 10: Mafaufau i Lau Suesuega o le Mataupu Faavae ma Feagaiga,” Tusi Lesona a le Faiaoga Seminare o le Mataupu Faavae ma Feagaiga (2025)
“Iloilo Lou Aoaoina 10,” Tusi Lesona a le Faiaoga Seminare o le Mataupu Faavae ma Feagaiga
Lesona 157: O Mataupu Faavae o le Faatuatua ma Folafolaga Aloaia 1 ma le 2
Iloilo Lou Aoaoina 10
Mafaufau i Lau Suesuega o le Mataupu Faavae ma Feagaiga
O le manatunatu ma iloiloina lo tatou aoaoina faaleagaga e mafai ona fesoasoani ia tatou faalatalata atili atu ai i le Faaola. O lenei lesona e mafai ona fesoasoani i tagata aoga ia manatua ma iloilo ai pe na faapefea e le suesueina o le Mataupu Faavae ma Feagaiga ona fesoasoani i lo latou tuputupu a’e faaleagaga.
Gaoioiga E Ono Mafai Ona Aoao Ai
Manatuaga faaleagaga
Mafaufau e aumai se ata patino i le vasega. Faaali atu le ata ma faamatala puupuu ou manatuaga e fesootai ma tagata po o mea na tutupu i le ata. Afai e talosagaina tagata aoga e fai le gaoioiga sauniuni a tagata aoga, valaaulia i latou e faasoa puupuu atu a latou ata ma mea e manatua i ni vaega toalaiti po o le vasega. E mafai foi ona latou faasoa atu a latou ata o loo i a latou telefoni.
-
Aisea e te manatu ai e fiafia tagata e vaai i ata o tagata po o mea na tutupu mai o latou taimi ua tuanai?
-
O a nisi o faataitaiga o mea tatou te manatuaina atonu e le mafai ona pueina i se ata?
Na talanoa mai Elder Neil L. Andersen o le Korama a Aposetolo e Toasefululua i o tatou manatuaga faaleagaga.
Opo mau ou manatuaga paia. Talitonu i ai. Tusi i lalo. Faasoa atu i lou aiga. Talitonu na oo mai ia te oe mai lou Tama Faalelagi ma Lona Alo Pele. Tuu atu latou te aumaia le onosai i ou masalosaloga ma le malamalama i ou tulaga faigata. Ou te folafola atu a e aloaia ma le naunautai ma faapelepele ma le faaeteete ia mea tutupu musuia faaleagaga i lou olaga, o le a tele atu isi mea e oo mai ia te oe. E silafia e le Tama Faalelagi oe ma e alofa ia te oe! (Neil L. Andersen, “O Manatuaga Musuia Faaleagaga,” Liahona, Me 2020, 22)
-
Aisea e te manatu ai e taua le mafaufau i o tatou manatuaga faaleagaga?
Faamalamalama atu o lenei lesona o le a tuuina atu ai i tagata aoga se avanoa e toe mafaufau ai i nisi o manatuaga faaleagaga po o aafiaga na latou maua a o suesueina le Mataupu Faavae ma Feagaiga ma le talafaasolopito o le Ekalesia i le tausaga ua tea.
A o lei tuuina atu i tagata aoga se taimi e tali ai fesili nei, mafaufau e faatatau i le faamatalaga o loo i le folasaga o le Mataupu Faavae ma Feagaiga lea e faapea mai, “I faaaliga, e faalogo ai se tasi i le siufofoga agamalu ae mausali o le Alii o Iesu Keriso.” E mafai ona valaaulia tagata aoga e toe iloilo ni malamalamaaga na latou faamaumauina i a latou api faamaumau mo suesuega i le aluga o le tausaga po o faailoga po o faamatalaga na latou faia i a latou tusitusiga paia e fesoasoani ai ia i latou e tali nei fesili.
-
O le a se mea ua e aoaoina e uiga ia Iesu Keriso a o e suesueina Ana upu i lenei tausaga i le Mataupu Faavae ma Feagaiga?
-
Na faapefea ona suia lau mafutaga ma le Tama Faalelagi ma Iesu Keriso i le tausaga ua tea?
-
O a nisi o fuaitau o mau na e suesueina na aafia ai oe? Na faapefea ona aafia oe i nei fuaitau?
-
O a nisi o upumoni o le talalelei sa e taumafai e faaaoga? O le a se mea ua e vaaia pe faamoemoe e vaai i ai ona o au taumafaiga?
A maea ua lava se taimi, valaaulia tagata aoga e faasoa mai nisi o o latou manatuaga faaleagaga i le vasega, pe a talafeagai ai e faasoa atu. A o faasoa mai e tagata aoga, faamalosi atu isi e fai so latou sao i le talanoaga e ala i le fai atu o fesili e pei o le “O ai na oo i se mea faapena?” po o le “O le a se mea e mafai ona e faaopoopo atu i mea na faasoa mai e lau uo i le vasega?”
Mauaina o faaaliga
Faamanatu atu i tagata aoga ua valaaulia i latou i le tausaga atoa e faataitai ma aoao pe faapefea ona maua faaaliga patino.
Ou te uunaia outou ina ia faateleina lou tomai faaleagaga o i ai nei e maua ai faaaliga faaletagata lava ia. …
Ou te aioi atu ia te outou ia faateleina lo outou gafatia faaleagaga e maua ai faaaliga. … Filifili e fai le galuega faaleagaga o loo manaomia ona faia ina ia olioli ai i le meaalofa o le Agaga Paia ma faalogo atu ai pea ma le manino atili i le siufofoga o le Agaga. (Russell M. Nelson, “Faaaliga mo le Ekalesia, Faaaliga mo o Tatou Olaga,” Liahona, Me 2018, 95–96)
Ina ia fesoasoani e faailoa atu le valaaulia a Peresitene Nelson mo i tatou ina ia faalautele atu i tala atu o lo tatou gafatia e maua ai faaaliga, mafaufau e faaali atu ni paluni eseese ua faafefeteina i lapopoa eseese. Valaaulia tagata aoga e mafaufau po o le fea o paluni e sili ona faatusa i lo latou mafai e maua ai faaaliga patino i le amataga o le tausaga ma po o le fea e faatusa i lo latou mafai i le taimi nei. O se vaega o a latou manatunatuga, e mafai ai e tagata aoga ona mafaufau loloto i fesili nei. Valaaulia ni nai tagata aoga e faasoa mai.
-
O le a se mea ua fesoasoani ia te oe e “faalautele” ma “faateleina lou mafai faaleagaga e maua ai faaaliga” i lenei tausaga?
-
O a nisi o fuaitau o mau mai le Mataupu Faavae ma Feagaiga ua faaopoopo atu i lou malamalama e uiga i le mauaina o faaaliga?
Afai e manaomia e tagata aoga se fesoasoani, e mafai ona e tuuina atu nisi o faataitaiga e pei o le Iosefa Samita—Talafaasolopito 1:5–20 ma le Mataupu Faavae ma Feagaiga 8:2–3; 9:7–9; 11:12–13; 88:118.
-
O a aafiaga na oo mai ia te oe talu ai nei i faaaliga faaletagata lava ia?
Faamatalaina o le Toefuataiga
Faaali atu ni ata se tele i le potu o loo faaalia ai mea taua na tutupu i le Toefuataiga, e pei o ata nei. A leai, e mafai ona e fai atu i le vasega e lisi mea taua na tutupu o le Toefuataiga i luga o le laupapa. Filifili faatasi o se vasega ni mea se fa pe lima e talanoaina. Tusi nei mea i luga o fasi pepa eseese ma tuu solo pepa faataamilo i le potu.
O Le Uluai Faaaliga
Toefuataiga o le Perisitua Mekisateko
O Le Oo Mai o le Tusi a Mamona
Faatuina o Malumalu
Tuu tagata aoga i ni vaega ma valaaulia vaega taitasi e faapotopoto i se ata po o se pepa e ese mai. Tofi se taitai o le kulupu e faafaigofie se talanoaga e uiga i lena mea na tupu i le Toefuataiga. Uunaia le taitai e valaaulia tagata uma o le vaega e faasoa mai se mea. A maea ua lava se taimi, valaaulia vaega e faataamilo i se ata fou ma filifili se taitai fou o le kulupu. O uunaiga nei e mafai ona fesoasoani i le taitai o le kulupu e taitaia le talanoaga i nofoaga taitasi.
-
Faasoa atu mea e te manatua e uiga i lenei mea na tupu.
-
Faamatala pe aisea o le a aoga ai mo tagata i le lalolagi atoa ona iloa e uiga i lenei vaega o le Toefuataiga o le talalelei a Iesu Keriso.
-
Talanoaina pe na faapefea ona fesoasoani lenei vaega o le Toefuataiga e faateleina ai lou faatuatua i le Tama Faalelagi ma Iesu Keriso.
O Le Perofeta o Iosefa Samita
O le gaoioiga lenei e mafai ona faaaoga e faaopoopo atu i le gaoioiga o le manatunatu loloto na faia e tagata aoga i le amataga o le lesona.
Faaali atu se ata o le Perofeta o Iosefa Samita. Fesili atu i tagata aoga pe latou te manatua po o le fea fuaitau o le atamai i aoaoga faavae o loo faamatala ai le galuega maoae na faataunuuina e Iosefa i lona olaga. Ona faitau faatasi lea pe tauloto faatasi le Mataupu Faavae ma Feagaiga 135:3 . Faamanatu i tagata aoga o lenei molimau ia Iosefa Samita na tusia ina ua faatoa mavae le maliu faamaturo. Fesoasoani ia i latou e saunia e faasoa atu i le tasi ma le isi a latou molimau ia Iosefa Samita o le perofeta a le Alii.
Mafaufau pe na faapefea ona suia ou lava lagona ma molimau ia Iosefa Samita i le aluga o le tausaga. Atonu e te manao e tusi i lalo ou manatu a o e mafaufau i mea nei:
-
Na faapefea ona e iloa mo oe lava na faaali mai le Tama Faalelagi ma Iesu Keriso ia Iosefa Samita i le Togalaau Paia?
-
E mafai faapefea e le galuega na musuia e le Alii ia Iosefa Samita e fai ona fesoasoani ia te oe e te latalata atili atu ai i le Tama Faalelagi ma Iesu Keriso?
-
Afai e te le o mautinoa e uiga i le valaauga o Iosefa Samita o se perofeta a le Atua, o le a se mea e mafai ona e faia e aoao ai mo oe lava?
Mafaufau e faaiu i le valaauliaina o ni nai tagata aoga e faasoa mai a latou molimau ia Iosefa Samita.