Lesona 156: O Mataupu Faavae o le Faatuatua ma Folafolaga Aloaia 1 ma le 2

Folafolaga Aloaia 2

Faaaliga i le Perisitua

A o salalau atu le talalelei i le lalolagi atoa i le seneturi lona luasefulu, sa tatalo taitai o le Ekalesia mo se taitaiga e faatatau i se aiaiga faavae lea na faatapulaaina ai tagata o le Ekalesia e tupuga mai i Aferika mai le mauaina o le perisitua. E toatele le Au Paia na filifili e faaaoga le faatuatua ia Iesu Keriso a o latou feagai ma fesili e uiga i le faiga faavae . I le aso 8 o Iuni, 1978, na faasilasila mai ai e le Au Peresitene Sili se faaaliga na aveesea ai nei tapulaa. E mafai ona fesoasoani lenei lesona i tagata aoga e galulue i le faatuatua pe a latou feagai ma tulaga le mautonu po o fesili faaleagaga.

Gaoioiga E Ono Mafai Ona Aoao Ai

Faataitaiga o le faatuatua

Mafaufau e amata le lesona i le valaauliaina o tagata aoga e mafaufau e uiga i tagata latou te iloa o e na faatinoina le faatuatua tele ia Iesu Keriso i se tulaga faigata. Ona faamalamalama atu lea faapea o Elder Helvécio Martins (1930–2005) o le Fitugafulu ma lona faletua o Rudá, sa feagai muamua ma se tulaga sa manaomia ai le faatuatua tele. O oe po o se tagata aoga e mafai ona faitau le parakalafa lenei i le vasega.

Ia Aperila 1972, na asiasi atu ai faifeautalai mai Le Ekalesia a Iesu Keriso o le Au Paia o Aso e Gata Ai i le fale mautotogi o Helvécio ma Rudá Martins o Rio de Janeiro, Pasila. Sa vave ona maua e le au Matini se molimau i le moni o le savali a faifeautalai. Sa latou aoao foi e uiga i se aiaiga faavae a le Ekalesia lea na faatapulaaina ai alii uli e tupuga mai i Aferika mai le faauuina i le perisitua. O Helvécio ma Rudá, o e na tupuga mai i Aferika, sa i ai ni fesili mo faifeautalai (tagai i le “Elder Helvécio Martins of the Seventy,” Ensign, Me 1990, 106; Mark Grover, The Autobiography of Elder Helvécio Martins [1994], 43).

• O a ni fesili semanu e te fesili atu ai i faifeautalai pe ana faapea e te i ai i lenei tulaga?

• O a nisi o auala e ono tali atu ai se tasi i se tulaga faapenei?

Valaaulia tagata aoga e mafaufau e uiga i tulaga le mautinoa o loo feagai ma i latou pe na feagai ai foi i o latou olaga. E mafai ona aofia ai fesili faaleagaga e le’i taliina o loo i ai nei. E mafai ona latou tusi e uiga i o latou tulaga po o fesili i a latou api talaaga mo suesuega. Uunaia tagata aoga e gauai atu i aoaoga po o uunaiga a le Agaga e mafai ona fesoasoani ia i latou i o latou tulaga.

Faatino i le faatuatua

Ina ia fesoasoani i tagata aoga ia iloa pe na faapefea ona tali atu le aiga o Matini i lenei tulaga, mafaufau e valaaulia se tagata aoga e faitau leotele ia parakalafa nei i le vasega:

Ina ua uma ona aoao e uiga i le faasaina o le perisitua, sa filifili le aiga o Matini e galulue i le faatuatua. E lei umi ae papatisoina i laua ma auauna atu ma le faamaoni i le Ekalesia mo le tele o tausaga. Na toe manatua e Elder Matini mulimuli ane, “Na matou mauaina le upumoni, ma e leai se mea o le a taofia i matou mai le ola ai.”

I le 1975 sa faasilasila mai ai e le Ekalesia, o le a fausia se malumalu i São Paulo, Pasila. “’E ui matou te lei faamoemoe e ulu atu i ai, ae sa matou galulue mo le fauga o le malumalu e pei foi o isi tagata o le au paia,’ ao manatua ai e Elder Matini. ‘O le mea moni lava, o le fale o le Alii.’ Sa faatau ese atu e Sister Matini ana maataua e fesoasoani ai i su’ega tupe ma sa avea Uso Matini o se sui o le komiti faalauiloa” (i le “Elder Helvécio Martins of the Seventy,” Ensign, Me 1990, 106).

• O le a se mea e tu matilatila mai ia te oe e uiga i le tali a le aiga Matini?

• Aisea e te manatu ai na latou filifili e galulue ma le faatuatua i lenei tulaga?

Afai e manaomia, faasino atu nai lo le taulai atu i mea latou te le’i iloa, sa taulai atu le aiga o Matini i le upumoni na faaali mai e le Atua ia i latou e ala i le Agaga Paia.

Mafaufau e valaaulia tagata aoga e fai se lisi o upumoni latou te iloa e uiga i le Tama Faalelagi, Iesu Keriso, ma le talalelei e mafai ona fesoasoani ia i latou e agai ai i luma ma le faatuatua pe a latou feagai ma fesili po o tulaga le mautonu. Ona valaaulia lea o i latou e faasoa mai mea na latou tusia ma faamatala mai pe faapefea e na upumoni ona fesoasoani ia i latou e agai ai i luma ma le faatuatua.

Folafolaga Aloaia 2

Ina ia fesoasoani i tagata aoga ia malamalama i tulaga e faatatau i le faasaina o le perisitua ma le faaaliga na aveesea ai, valaaulia i latou e sue le faatomuaga o le Folafolaga Aloaia 2 i a latou tusitusiga paia. Afai e manaomia, tuu atu ni kopi o le faatomuaga mo tagata aoga o loo i ai lomiga tuai o tusitusiga paia.

Faitau le faatomuaga o le Folafolaga Aloaia 2, ma vaavaai mo talaaga e faatatau i lenei tautinoga.

• O le a se mea mai le parakalafa lenei e te manatu e taua ona malamalama i ai?

Faamalamalama atu o le laina o loo ta’ua ai, “E leai se malamalamaaga manino o faamaumauga a le Ekalesia i le amataga o lenei faiga” e faatusa i le tulaga aloaia o le Ekalesia i le faasaina o le perisitua. E tāua ona tatou lē taumatemate pe aiseā na faatulaga ai lenei faasā.

Atonu foi e te mafaufau e faasino atu le mau faasino i le 2 Nifae 26:33 i le fuaiupu muamua o le faatomuaga. Mafaufau e valaaulia tagata aoga e faitau le fuaiupu lenei ma faasoa mai upumoni e taua ona manatua pe a mafaufau i lenei faiga faavae.

O leFolafolaga Aloaia 2 o loo i ai le faasilasilaga aloaia o le faaaliga na maua e le Au Peresitene Sili ma le Korama a Aposetolo e Toasefululua i le aso 1 o Iuni, 1978.

Nai lo le suesueina o se vasega o le Folafolaga Aloaia 2 mafaufau e valaaulia tagata aoga e suesue faatasi ma se vaega toalaiti. Afai e maua, e mafai ona latou faaaogaina punaoa mai le “O Le Aso ua Leva ona Folafola Mai” (Liahona, Iuni 2018, 34–37) e fesoasoani ai i a i latou ia malamalama lelei i nisi o faamatalaga na faia i le Folafolaga Aloaia 2.

Faitau parakalafa e fa i lalo o le fuaitau “Uso Pele” i le Folafolaga Aloaia 2. Mafaufau e maka ia upu ma fasifuaitau e te lagona e taua.

• O le a se mea e tulaga ese mai ia te oe mai mea na e faitauina?

• O le a se mea ua fesoasoani lenei aafiaga ia te oe ia e malamalama pe lagona ai e uiga i le Tama Faalelagi ma Iesu Keriso?

Aafiaga o le faaaliga

Sa i ai se aafiaga loloto o lenei faaaliga i alii ma tama’ita’i i le lalolagi atoa. E lei leva ona maua, ae auina atu loa faifeautalai i Aferika. Talu mai lena taimi ua fausia ai Malumalu i lena konetineta, ma ua faitau selau afe tagata e tupuga mai Aferika i le lalolagi atoa ua mauaina sauniga o le talalelei mo i latou lava ma mo latou tuaa ua maliliu.

Faamalamalama atu le tulaga lena ia i latou na aafia i le faaaliga o Helvécio ma Rudá Martins. Mafaufau e valaaulia se tagata aoga e faitau leotele le parakalafa lenei i le vasega:

Ina ua uma ona aoao e uiga i le faaaliga lea na tuuina atu ai le perisitua i alii agavaa uma, sa toe manatua e Helvécio:

“Sa le mafai ona taofiofi o’u lagona. Sa ma o atu ma Rudá i lo ma potumoe, tootutuli i lalo, ma tatalo. Sa ma fetagisi a’o ma faafetai atu i lo tatou Tama i le Lagi mo se mea na tupu lea sa na ona matou moemiti i ai. Na oo moni mai lava le aso, ma i o ma’ua olaga i le tino” (The Autobiography of Elder Helvecio Martins [1994], 69-70).

E lei leva ona uma le faaaliga i le 1978, ae faamauina le aiga o Matini i le malumalu. Sa avea Helvécio ma se taitai perisitua i le lotoifale ma na iu lava ina valaauina o ia e auauna atu o se tasi o le Au Fitugafulu (tagai i le “Elder Helvécio Martins of the Seventy,” 106).

• Atonu na faapefea ona ese mea uma mo le aiga o Matini pe ana latou le filifili e faatino le faatuatua ia Iesu Keriso?

• O le a se mea na e aoaoina mai le faataitaiga a le aiga o Matini e mafai ona fesoasoani ia te oe i ou tulaga le mautonu po o fesili e le’ taliina?

  I le avea ai o se vaega o lau talanoaga, mafaufau e tusi le upumoni lenei i luga o le laupapa: A tatou galulue i le faatuatua i taimi o tulaga le mautonu, ua tatou saunia i tatou lava e maua faamanuiaga a le Alii.

• O a nisi o auala e mafai ona e galue ai i le faatuatua pe a e feagai ma tulaga le mautonu po o fesili faaleagaga?

  A manaomia, e mafai e tagata aoga ona saili manatu i le parakalafa 5–7 o le “Mauaina o le Malamalama Faaleagaga” i le vaega o le Pepa Autu o le Atamai i Aoaoga Faavae (2023).

• Na faapefea ona faamanuiaina oe e le Alii po o tagata e te iloa ona o le galulue i le faatuatua?

Mafaufau e faasoa atu se faataitaiga mai lou olaga. E mafai foi ona e faaali atu le vitio “Struggling with the History of Race and the Priesthood” (4:04), o loo maua i le ChurchofJesusChrist.org.

Struggling with the History of Race and the Priesthood | His Grace

E le gata i lea, e mafai ona e valaaulia tagata aoga e saili mo faataitaiga mai tusitusiga paia o loo faaalia ai le faamanuiaina e le Alii o tagata o e na galulue i le faatuatua. O faataitaiga e aofia ai le fafine Sarefata ua oti lana tane (1 Tupu 17:8–24); aiga o Liae (1 Nifae 2:2–5; 17:1–3); ma le Perofeta o Iosefa Samita (Iosefa Samita—Talafaasolopito 1:8–17).

Fai se fuafuaga

Faamanatu i tagata aoga tulaga po o fesili mai o latou olaga lea na latou mafaufau loloto i ai i le amataga o le lesona. Ona valaaulia lea o i latou e tali fesili nei ia latou api talaaga mo suesuega:

• O a mea ua e aoaoina pe lagonaina i le asō e mafai ona fesoasoani ia te oe i ou tulaga le mautonu po o fesili faaleagaga?

• O le a se mea patino o le a e faia e faaaoga ai le faatuatua ia Iesu Keriso i nei tulaga?

Punaoa Faaopoopo

O fea e mafai ona ou aoao atili ai e uiga i le faasaina o le perisitua ma le faaaliga na fofogaina mai i le Folafolaga Aloaia 2?

Tagai i punaoa nei:

• “Tuuina Atu o Faamanuiaga o le Perisitua” (Liahona,, Iuni 2018)

• “Faasaina o le Perisitua ma le Malumalu” (Autu o Talafaasolopito o le Ekalesia)

• “Race and the Priesthood” (Gospel Topics Essays)

• “Faaaliga i le Taumafanafana o le 1978” (Tala Patino a Elder Ahmad Corbitt o le Fitugafulu)

Na faapefea ona sailia e taitai o le Ekalesia le taitaiga a le Alii a o lei mauaina lenei faaaliga?

Na manatua e Peresitene Spencer W. Kimball (1895–1985), o lē sa avea ma Peresitene o le Ekalesia ina ua maua le faaaliga:

Sa ou iloaina e i ai se mea sa i o tatou luma sa matuai taua tele i le toatele o fanau a le Atua. … Mai lea aso i lea aso sa ou alu ai toatasi i le faamaoni ma le naunautai tele i le potu pito i luga o le malumalu, o iina sa ou tuuina atu ai lo’u agaga ma tuuina atu au taumafaiga e faaalualu ai i luma le polokalama. Sa ou manao e fai le mea sa ia finagalo ai. Sa ou talanoa ia te ia i lenei mea ma faapea atu, “Le Alii e, na o le mea sa’o lava ou te manao ai. … Na pau le mea matou te mananao i ai o le mea e te finagalo ai, ma matou te mananao i ai i le taimi e te finagalo ai ae le o le seia.” …

Sa matua faamanino mai e le Alii ia te au le mea sa tatau ona fai. (Aoaoga a Peresitene o le Ekalesia: Spencer W. Kimball [2006],238-39)

Na faapeī taitai o le Ekalesia o e na oo i lenei faaaliga?

O Peresitene Gordon B. Hinckley (1910–2008), o lē sa avea ma se sui o le Korama a Aposetolo e Toasefululua i le taimi na maua ai le faaaliga, na molimau mai i le tulaga na i ai le malumalu i lena aso:

Sa matou auai i le tatalo i le tulaga sili ona paia. O Peresitene Kimball lava ia o le leo i lena tatalo. … Sa i ai se siosiomaga faapaiaina ma le faamamaluina i le potu. Mo au, o se lagona e pei o se faitotoa vaapiapi ua matala i le va o le nofoalii faalelagi ma le perofeta a le Atua o loo tootuli, ma augani atu lea na faatasi atu i ai ona Uso. Na i ai iina le Agaga o le Atua. Ma i le mana o le Agaga Paia na oo mai i lena perofeta se faamautinoaga o le mea na ia tatalo ai ua sao lea, …

O i matou uma na iloa ua oo mai le taimi mo se suiga ma ua oo mai le filifiliga mai le lagi. Na manino le tali. Sa i ai se lototasi atoatoa ia i matou i lo matou aafiaga ma i lo matou malamalama. (Gordon B. Hinckley, “Priesthood Restoration,” Ensign,, Oke. 1988, 69–70)

Gaoioiga Faaopoopo e Aoao Ai

Vitio

Mafaufau e faaaoga se vitio se tasi pe sili atu o vitio nei i le taimi o vaega o le lesona. O nei vitio e mafai ona fesoasoani i tagata aoga e vaai ai i faataitaiga a le Au Paia faamaoni, a o lei oo i le taimi ma le maea ai o le faaaliga lea na aveesea ai faasa o le perisitua.

• “Aso ua leva ona Folafola Mai” (8:41). O loo faaalia i lenei vitio le Au Paia i Kana o e na faatalitali mo se taimi umi mo le avanoa e umia ai le perisitua.

  Long-Promised Day

• “Ia Tasi—O Se Faamanatuga o le Faaaliga i le Perisitua” mai le taimi faalilolilo 1:06:55 i le 1:09:14. O tagata Uli o le Au Paia o Aso e Gata Ai, ua faamatala mai le auala na faamanuiaina ai o latou olaga e le perisitua.

  Savali Faafeiloai

• Vitio: “A New Day” (2:24). Ua faasoa mai e tagata Uli o le Au Paia o Aso e Gata Ai a latou tali i le faaaliga i le 1978.

  A New Day

Faamatala le gaoioiga

Atonu e oo tagata aoga i taimi o o latou olaga o le a talosagaina ai i latou e faamatala mai pe aisea na i ai faasa o le perisitua. Mafaufau e tuu atu ia i latou e faataitai lenei mea i le vasega. Ae latou te lei faataitai e faamatala atu, atonu e aoga le faamanatu atu ia i latou tatou te le iloa mafuaaga na faatulaga ai lenei faiga faavae (tagai i le Folasaga i le Folafolaga Aloaia 2).

Ona mafaufau lea e valaaulia tagata aoga e tali fesili nei. E mafai e tagata aoga ona faataitai ona tali atu i ai faatasi ai ma se paga po o se vaega toalaiti.

• Afai e fesili atu se tasi ia te oe pe aisea ua i ai faasa o le perisitua ma le malumalu, o a upumoni e te lagona e sili ona taua e fesoasoani ia i latou ia malamalama ai? Aisea?

A uma ona faataitai e tagata aoga le faamalamalamaina, fai atu ia i latou e faasoa mai po o a upumoni sa latou taulai atu i ai. Afai e manaomia, faamamafa atu ua tatou iloa e alofa le Atua i Ana fanau uma ma valaaulia tagata uma e o mai ia te Ia (tagai i le 2 Nifae 26:33). Ua tatou iloa foi e saili perofeta ma maua le taitaiga a le Alii i le taitaiina o Lana Ekalesia.

O se faataitaiga o le faatinoina i le faatuatua

Mafaufau e faasoa lenei manatuaga mai ia Peresitene Dallin H. Oaks o le Au Peresitene Sili. Valaaulia tagata aoga e vaavaai pe na faapefea ona ia taulimaina ana fesili e lei taliina a o faatulaga le faasaina o le perisitua.

Be One - A Celebration of the Revelation on the Priesthood

Sa ou matauina le tiga ma le le fiafia na oo ia i latou na mafatia i nei tulaga faasaina ma i latou o e … na saili mo mafuaaga. Sa ou suesue i mafuaaga na tuuina mai i lena taimi ma sa le mafai ona ou lagonaina le faamaoniga o le moni o soo se tasi o ia mea. O se vaega o la’u suesuega ma le agaga tatalo, na ou iloa ai, i se tulaga lautele, e seāseā tuu mai e le Alii ni mafuaaga mo poloaiga ma faatonuga Na te tuuina mai i Ana auauna. Sa ou naunau e faamaoni i o tatou taitai faaperofeta ma ia tatalo—e pei ona folafolaina mai le amataga o nei tapulaa—e faapea o le a oo mai le aso o le a olioli ai tagata uma i faamanuiaga o le perisitua ma le malumalu. (“Saunoaga a Peresitene Oaks i le Faamanatuina o le Perisitua i le Lalolagi Atoa,” newsroom.ChurchofJesusChrist.org)

• O le a se mea na e aoaoina mai le tali a Peresitene Oaks e mafai ona fesoasoani ia te oe pe a i ai ni au fesili e uiga i se aoaoga faavae po o se faiga faavae a le Ekalesia?

• Aisea e te manatu ai e taua le faamaoni i o tatou taitai faaperofeta a o tatou faatalitali mo tali i a tatou fesili?

Filifilia o le faatuatua nai lo le masalosalo

Mafaufau e faaali atu le “Aua le Masalosalo, ae Ia Talitonu” mai le faailo taimi 15:26 i le 20:28. I le vitio lenei, o loo faamatala ai e Elder Dale G. Renlund o le Korama a Aposetolo e Toasefululua ma Sister Ruth L. Renlund ni faataitaiga o ni tagata se toalua o e na eseese tali i a laua fesili o le talalelei, o le tasi e masalosalo ae o le isi e faatuatua. A uma ona faaali le vitio, valaaulia tagata aoga e faasoa atu aoaoga po o malamalamaga sa tumatila ia i latou.

Elder Dale G. Renlund and Sister Ruth L. Renlund