Դաս 159․ «Ընտանիք՝ Հայտարարություն աշխարհին»

Ընտանիքի հռչակագիրը, Մաս 2

«Երեխաները Տիրոջ ժառանգությունն են»

Տիրոջ մարգարեները հայտարարել են Երկնային Հոր ծրագրում երեխաների կարևորության մասին: Կանայք և ամուսինները կարող են մասնակցել Աստծո ծրագրին՝ աշխարհ բերելով երեխաներ և մեծացնելով նրանց սիրո և արդարակեցության մեջ: Այս դասը կօգնի ուսանողներին հասկանալ երեխաներ ունենալու և նրանց մասին հոգ տանելու կարևորությունը Երկնային Հոր ծրագրում:

Հնարավոր ուսումնական վարժություններ

Աստվածային ուղղորդում՝ ընտանիքի հռչակագրից

Կարող եք սկսել դասը՝ կիսվելով հետևյալ սցենարով կամ նմանատիպ սցենարով, որը լավագույնս համապատասխանում է ձեր ուսանողների կարիքներին: Կարող եք բաժանել ուսանողներին զույգերի՝ սցենարից հետո հարցերը քննարկելու համար:

Քրիստենը և իր երկու ընկերուհիները քննարկում են իրենց ապագան և այն, ինչ իրենք ակնկալում են կյանքից: Երբ խոսում են ընտանիքի թեմայով, Քրիստենն ասում է, որ ուրախությամբ կցանկանա ամուսնանալ և երեխաներ ունենալ, երբ մեծանա: Նրա ընկերուհիներից մեկն ասում է. «Ես ուզում եմ ամուսնանալ, բայց ոչ մի դեպքում չեմ ուզում երեխաներ մեծացնել այս խենթ աշխարհում»: Մյուս ընկերուհին ասում է. «Ես դեմ չէի լինի մի օր երեխա ունենալ, բայց չեմ կարծում, որ կուզենամ ամուսնանալ»: Լսելով իր ընկերուհիների կարծիքը՝ Քրիստենը զարմանում է, թե ինչու է երեխա ունենալու վերաբերյալ իր կարծիքն այդքան տարբերվում նրանց կարծիքից:

• Քրիստենի ընկերուհիներն ինչու կարող են այդպիսի կարծիք ունենալ։

  Ուսանողների մի քանի զույգի խնդրեք կիսվել իրենց պատասխաններով: Կարող եք նաև առաջարկել ուսանողներին կիսվել երեխաների և ծնողական պարտականությունների վերաբերյալ այլ մտահոգություններով կամ հարցերով: Ուսանողներին տրամադրեք «Ընտանիք՝ Հայտարարություն աշխարհին» հռչակագրի օրինակները օգտագործման համար։ Յուրաքանչյուր զույգի առաջարկեք ուսումնասիրել պարբերություններ 4–6-ը՝ փնտրելով բառեր կամ արտահայտություններ, որոնք հռչակում են Տիրոջ վարդապետությունը երեխաների և ծնողական պարտականությունների վերաբերյալ: Խրախուսեք ուսանողներին ուսումնասիրելիս նշել կարևոր բառերը կամ արտահայտությունները: Անհրաժեշտության դեպքում նշեք, որ «շատացեք և երկիրը լցրեք» արտահայտությունը վերաբերում է երեխաներ ունենալուն, իսկ «ծնունդ տալու սուրբ զորություն» արտահայտությունը վերաբերում է սեռական հարաբերություններին: Կարող եք տալ հետևյալ տիպի հարցեր։

• Ի՞նչ ճշմարտություններ բացահայտեցիք երեխաներ ունենալու և ծնողական պարտականությունների մասին:

• Ձեր կարծիքով, ինչո՞ւ է Տերը ցանկանում, որ ամուսինները և կանայք երեխաներ ունենան, եթե կարող են ունենալ:

• Ի՞նչ պատճառներով ամուսինները կարող են չցանկանալ երեխաներ ունենալ:

Նախքան պատասխանելը՝ կարող եք առաջարկել ուսանողներին գրել իրենց մտքերն ու զգացմունքները երեխաների և ծնողական պարտականությունների վերաբերյալ Տիրոջ վարդապետության մասին։ Խրախուսեք ուսանողներին խնդրել Սուրբ Հոգու ազդեցությունը՝ օգնելու իրենց հասկանալ երեխաներ ունենալու և նրանց մասին հոգ տանելու կարևորությունը՝ որպես Երկնային Հոր ծրագրի մաս:

Փնտրեք այլ աստվածային աղբյուրներ՝ հասկացողության համար

Կարող եք ցուցադրել ճշմարտություն պարունակող ստորև բերված երեք արտահայտությունները ընտանիքի մասին հայտարարությունից։ Բացատրեք, որ ուսանողները օգտագործելու են այս արտահայտությունները, որպեսզի սովորեն փնտրել աստվածայնորեն սահմանված աղբյուրներ՝ լրացուցիչ հասկացողություն ձեռք բերելու համար։ Կարող եք ուսանողներին բաժանել երեք հոգանոց խմբերի, որոնցից յուրաքանչյուրը կուսումնասիրի ճշմարտություններից մեկը: Գուցե ուսանողները ցանկանան ստեղծագործ եղանակով ընտրել իրենց արտահայտությունները։ Օրինակ՝ յուրաքանչյուր խմբի ամենաերիտասարդ կամ ամենաբարձրահասակ ուսանողը կարող է առաջինը ընտրություն կատարել, թե որ արտահայտությունն է ուսումնասիրելու:

• «Ուժի մեջ է մնում Իր զավակներին տված՝ շատանալու և երկիրը լցնելու վերաբերյալ Աստծո պատվիրանը»:

• «Ծնունդ տալու սուրբ զորությունը պետք է օգտագործվի միայն այն տղամարդու և կնոջ միջև, որոնք օրինական ձևով ամուսնացած են որպես ամուսին և կին»:

• «Ծնողները սրբազան պարտականություն ունեն դաստիարակել իրենց երեխաներին սիրո և արդարակեցության մեջ»:

  Խրախուսեք ուսանողներին օգտագործել այնպիսի աղբյուրներ, ինչպիսիք են Սուրբ գրքերի ուղեցույցը կամ Gospel Library հավելվածը՝ իրենց ճշմարտության հայտարարությունների վերաբերյալ լրացուցիչ տեղեկություններ գտնելու համար: Եթե ​​նրանք ուղղորդման կարիք ունենան, առաջարկեք որոնման հարցումներ, օրինակ՝ «շատանալ և լցնել», «ծնունդ տալու զորություն» կամ «արդարակյաց ծնողներ»: Առաջարկեք նրանց որոնել Եկեղեցու ղեկավարների ուղերձներ, սուրբ գրությունների հատվածներ կամ Եկեղեցու ամսագրի հոդվածներ, որոնք խորացնում են իրենց հասկացողությունը:

  Երբ ուսանողները վերջացնեն նախապատրաստվելը, առաջարկեք նրանց խմբի հետ կիսվել իրենց գրածով: Կարող եք տալ ստորև ներկայացվող հարցերից մի քանիսը:

• Ի՞նչ սովորեցիք ճշմարտության այս արտահայտությունների մասին, որը ձեր կարծիքով կարևոր է:

• Այսօրվա աշխարհում այս ճշմարտություններով ապրելու համար ինչո՞ւ է պահանջվում հավատք առ Հիսուս Քրիստոս:

• Ի՞նչ օրինակներ եք տեսել, որ այդ ճշմարտություններով ապրելը տանում է դեպի ավելի շատ սեր, և այդ ճշմարտություններն անտեսելը տանում է դեպի ցավ կամ ափսոսանք:

• Ի՞նչ կարող եք անել հիմա, որպեսզի պատրաստվեք հավատարմորեն ապրելու այդ ճշմարտություններով ապագայում:

Հավերժական վարդապետություն երեխաների մասին

Վկայեք Աստծո հավերժական ծրագրում երեխաների կարևորության մասին և կիսվեք հետևյալ խոսքերով։

Առաջին Նախագահության նախագահ Դալլին Հ. Օուքսը բացատրել է երեխաների կարևորությունը Աստծո ծրագրում:

Աստվածային սերը Հոր ծրագրում

Հավերժական վարդապետությունը … առանձնահատուկ հեռանկար ունի երեխաների համար։ Այս հեռանկարից երեխաներ ունենալն ու դաստիարակելը մենք դիտարկում ենք որպես աստվածային ծրագրի մաս: Դա հաճելի և սրբազան պարտականություն է նրանց համար, ում տրված է դրան մասնակցելու զորությունը։ Հետևաբար, մեզ պատվիրված է ուսուցանել և պայքարել այն սկզբունքների և գործելակերպերի համար, որոնք լավագույն պայմաններն են ապահովում երեխաների զարգացման և երջանկության համար՝ Աստծո ծրագրի ներքո: (Դալլին Հ. Օուքս, «Աստվածային սերը Հոր ծրագրում», Լիահոնա, մայիս 2022, 102)

• Տեսե՞լ եք արդյոք, թեերեխաներն ինչպե՞ս են օրհնում են ձեր ընտանիքը կամ ձեր ծանոթների ընտանիքը։

• Երեխաներին աշխարհ բերելը և նրանց սիրո մեջ դաստիարակելն ինչպե՞ս կարող է օգնել ձեզ ավելի նմանվել մեր երկնային ծնողներին:

Կարող եք ցուցադրել հետևյալ հուշումները և առաջարկել ուսանողներին լուռ գնահատել իրենց հասկացողությունը այն մասին, ինչ այսօր սովորեցին:

Գնահատեք ձեր հասկացողությունը հետևյալ պնդումների վերաբերյալ՝ ձեր ուսումնական օրագրում պատասխանելով լիովին համաձայն եմ, համաձայն եմ, որոշ չափով համաձայն եմ, վստահ չեմ։ Հակիրճ գրեք, թե ինչու եք ընտրել պատասխաններից յուրաքանչյուրը:

• Ես հասկանում եմ, թե ինչու է այսօր ուժի մեջ մնում շատանալու և երկիրը լցնելու վերաբերյալ Աստծո պատվիրանը։

• Ես հասկանում եմ, թե ինչու ծնունդ տալու սուրբ զորությունը պետք է օգտագործվի միայն օրինական ամուսնացած կնոջ և տղամարդու միջև:

• Ես հասկանում եմ, թե ինչու ծնողները պետք է իրենց երեխաներին մեծացնեն սիրո և արդարակեցության մեջ:

Եթե ​​ուսանողները լրացուցիչ հարցեր կամ մտահոգություններ ունենան երեխաների վերաբերյալ Տիրոջ վարդապետության կամ մաքրաբարոյության օրենքի վերաբերյալ, խրախուսեք նրանց խոսել այդ թեմայով ծնողների կամ Եկեղեցու ղեկավարների հետ:

Եզրափակեք՝ առաջարկելով մի քանի ուսանողի ամփոփ ներկայացնել այն, ինչ իրենք սովորեցին երեխաներ ունենալու և նրանց մասին հոգ տանելու կարևորության մասին՝ որպես Երկնային Հոր ծրագրի մաս:

Լրացուցիչ նյութեր

Երեխա ունենալն ինչո՞ւ է կարևոր Երկնային Հոր երջանկության ծրագրում:

Տասներկու Առաքյալների Քվորումից նախագահ Մ. Ռասսել Բալլարդն ուսուցանել է.

Մահկանացության նպատակը Աստծուն ավելի նման դառնալն է` ձեռք բերելով ֆիզիկական մարմիններ, գործադրելով ազատ կամքը և ստանձնելով դերեր, որոնք նախկինում պատկանում էին միայն երկնային ծնողներին` ամուսնու, կնոջ և ծնողի դերերը: …

Երկնային Հայրը կամենում է, որ մենք … ոչ միայն հնազանդվենք «շատանալու և լցնելու» Նրա առաջին պատվիրանին, ոչ միայն կատարենք Իր ծրագիրը, այլ նաև գտնենք այն ուրախությունը, որ Նրա ծրագիրը կոչված է տալու Իր որդիներին և դուստրերին։ …

… Մահկանացու կյանքի հիմնական նպատակներից մեկն այն է, որ մենք ինքներս կարողանանք վերարտադրել այդ ընտանեկան փորձառությունը, միայն այս անգամ որպես ծնողներ, այլ ոչ թե որպես երեխաներ։ (Մ. Ռասսել Բալլարդ, «ԵԿՀ ուսուցիչների հնարավորությունները և պարտականությունները 21-րդ դարում» [երեկո Բարձրագույն Իշխանության հետ, փետրվար 26, 2016], broadcasts.ChurchofJesusChrist.org)

Ինչո՞ւ է սեռական մտերմությունը ընդունելի միայն ամուսնացած տղամարդու և կնոջ միջև:

Տասներկու Առաքյալների Քվորումից երեց Դեյլ Գ. Ռենլանդը և քույր Ռութ Լ․ Ռենլանդը բացատրել են հետևյալը․

Երկնային Հայրը ցանկանում է, որ սեռական հարաբերությունները ամուսնության մեջ օգտագործվեն երեխաներ ունենալու, սեր արտահայտելու և ամուսնու և կնոջ միջև զգացմունքային, հոգևոր և ֆիզիկական կապը ամրացնելու համար: Ամուսնության մեջ սեռական մտերմությունը պետք է միավորի կնոջն ու ամուսնուն՝ վստահության, նվիրվածության և միմյանց հանդեպ հարգանքի ներքո: …

Հիսուս Քրիստոսի Վերջին Օրերի Սրբերի Եկեղեցու՝ Հավերժական ընտանիքների վարդապետությունը եզակի է քրիստոնեական ավանդույթներում: Մենք չենք ստեղծվել միայն անըմբռնելի Աստծուն գովաբանելու, երկրպագելու և ծառայելու համար: Մենք ստեղծվել ենք սիրող երկնային ծնողների կողմից, որպեսզի աճենք և դառնանք նրանց նման: Արական և իգական ոգիները ստեղծվել են միմյանց լրացնելու համար։ Ահա թե ինչու սեռը չի փոխվում հավերժություններում, քանի որ այն հիմք է հանդիսանում հավերժ պարգևի համար, որը Երկնային Հայրը կարող է տալ՝ դա կյանքն է Նրա տեսակով։

Որպեսզի մենք իրականացնենք այս օրհնությունը, Երկնային Հայրը պատվիրել է պահպանել սեռական մտերմությունը տղամարդու և կնոջ ամուսնության համար: … Աստծո ծրագրի համաձայն՝ մենք չենք կարող միայնակ կամ առանց մեր ամուսնուն կամ կնոջը՝ ամուսնության մեջ հավատարիմ լինելու լիակատար հանձնառության հասնել այնպիսի կյանքի, որ վայելում է մեր Երկնային Հայրը: …

… Սեռական հարաբերությունները «մեր աստվածային էության գերագույն արտահայտություններից մեկն է» [Դեյվիդ Ա. Բեդնար, «We Believe in Being Chaste», Ensign, մայիս 2013, 42]: Մեր կողմից սեռական զգացմունքների ունակության պատշաճ արտահայտումը հնարավոր է դարձնում, որ Աստծո ծրագիրը տարածվի երկրի վրա և հավերժության մեջ՝ հնարավորություն տալով մեզ նմանվել մեր Երկնային Հորը: Աստված հավատարիմներին խոստանում է հավերժական կյանք, որը ներառում է հավերժական ամուսնություն, երեխաներ և հավերժական ընտանիքի բոլոր մյուս օրհնությունները։ (Դեյլ Գ. Ռենլանդ և Ռութ Լիբերթ Ռենլանդ, «Սեռական մտերմության աստվածային նպատակները», Ensign, օգոստոս 2020, 15–17)

Ի՞նչ են ուսուցանել մարգարեները կյանքի սրբության մասին՝ կապված վիժեցման հետ:

Եկեղեցու ղեկավարները հետևյալ հրահանգներն են տվել․

Տերը պատվիրել է. «Մի … սպանիր, ոչ էլ նման որևէ բան գործիր» (Վարդապետություն և Ուխտեր 59.6): Եկեղեցին դեմ է անձնական կամ սոցիալական հարմարության համար ընտրովի վիժեցմանը: Անդամները չպետք է ենթարկվեն, կատարեն, կազմակերպեն, վճարեն, համաձայնվեն կամ խրախուսեն վիժեցումը: Միակ հնարավոր բացառություններն են, երբ.

• Հղիությունը առաջացել է բռնի ուժի գործադրմամբ՝ բռնաբարության կամ արյունապղծության արդյունքում:

• Իրավասու բժիշկը որոշում է, որ մոր կյանքը կամ առողջությունը լուրջ վտանգի տակ է:

• Իրավասու բժիշկը որոշում է, որ պտուղը ունի լուրջ արատներ, որոնք թույլ չեն տա երեխային ողջ մնալ ծնվելուց հետո:

Բայց նույնիսկ այս հանգամանքները ինքնաբերաբար չեն արդարացնում վիժեցումը: Վիժեցումը լրջագույն խնդիր է։ Այն պետք է քննարկվի միայն այն բանից հետո, երբ պատասխանատու անձինք աղոթքով ստանան հաստատում: Անդամները կարող են խորհրդակցել իրենց եպիսկոպոսների հետ՝ այդ գործընթացի ժամանակ։ (Ընդհանուր ձեռնարկ. Ծառայել Հիսուս Քրիստոսի Վերջին Օրերի Սրբերի Եկեղեցում, 38.6.1, ChurchofJesusChrist.org)

Որտեղի՞ց կարող եմ ավելին իմանալ ընտանիքի մասին հայտարարությունում ուսուցանվող ճշմարտությունների մասին:

Ստորև բերված է մի քանի ելույթ, որոնք դուք կարող եք ընտրել ուսումնասիրելու համար.

• Դալլին Հ. Օուքս, «Ծնողները և երեխաները», Լիահոնա, նոյեմբեր 2018, 61–67

• Դեյվիդ Ա․ Բեդնար, «Մենք հավատում ենք մաքրաբարո լինելուն», Լիահոնա, մայիս 2013, 41–44

• Նիլ Լ․ Անդերսեն, «Երեխաներ», Լիահոնա, նոյ. 2011, 28–31

Օժանդակ ուսումնական վարժություններ

Երեխաներին արդարակեցության մեջ դաստիարակելը և նրանց կարիքները ապահովելը

Եթե ​​ուսանողների համար օգտակար կլինի ավելին իմանալ իրենց երեխաներին սիրո և արդարակեցության մեջ մեծացնելու՝ ծնողներին ուղղված Տիրոջ պատվիրանի մասին, կարող եք կիրառել հետևյալ գաղափարը։

Ընտանիքի մասին հայտարարության պարբերություն 6-ը ուսումնասիրելուց հետո բացատրեք, որ այս տնտեսության սկզբում Փրկիչը հանդիմանեց Մարգարե Ջոզեֆ Սմիթին և Եկեղեցու այլ ղեկավարներին՝ իրենց ընտանիքների նկատմամբ պատշաճ հոգատարություն չցուցաբերելու համար: Ուսանողներին հանձնարարեք կարդալ Վարդապետություն և Ուխտեր 93․40–50 հատվածները՝ փնտրելով թե Տերը ինչ ուսուցանեց։ Խնդրեք ուսանողներին կիսվել իրենց գտածով։ Նշեք, որ թեև երեխաներին արդարակեցության մեջ մեծացնելու պարտականությունը դրված է ծնողների վրա, երեխաները կարող են օգնել իրենց ծնողներին կատարել Տիրոջ պատվիրանները: Կարող եք տալ նմանատիպ հարցեր.

• Ինչպե՞ս կարող եք աջակցել ձեր ծնողներին՝ ձեր ընտանիքը «լույսի և ճշմարտության մեջ» մեծացնելու իրենց սուրբ պարտականություն մեջ: (Վարդապետություն և Ուխտեր 93․40)։

• Ինչպե՞ս դեռահասները կարող են «ավելի ջանասեր և հոգատար լինել տան համար»։ (Վարդապետություն և Ուխտեր 93․50)։

Երբ ուսանողները պատասխանեն վերը նշված հարցերին, կարող եք նրանց փոքր խմբերի բաժանել, որպեսզի մտածեն, թե ինչպես կարող են օգնել իրենց ծնողներին: Ստորև բերված են ծնողների որոշ պարտականություններ, որոնք ներառված են ընտանիքի մասին հայտարարությունում: Կարող եք յուրաքանչյուր խմբի հանձնարարել թեմաներից մեկը՝ քննարկման համար։

• Ծնողները պետք է ապահովեն իրենց երեխաների ֆիզիկական և հոգևոր կարիքները:

• Ծնողները պետք է ուսուցանեն իրենց երեխաներին սիրել և ծառայել միմյանց:

• Ծնողները պետք է ուսուցանեն իրենց երեխաներին պահել Աստծո պատվիրանները:

• Ծնողները պետք է ուսուցանեն իրենց երեխաներին լինել օրինապաշտ քաղաքացիներ։

Քննարկելու համար ուսանողներին ժամանակ տալուց հետո առաջարկեք նրանց կիսվել իրենց գաղափարներից մի քանիսով: Նրանց պատասխանները գրեք գրատախտակին: Ավարտեք՝ տալով նմանատիպ հարց․

• Տիրոջ տված պարտականություններ կատարելու հարցում ձեր ծնողներին աջակցելն ինչպե՞ս կարող է նախապատրաստել ձեզ ապագայում արդարակյաց ծնող լինելու համար։

Հաշվետու լինել Աստծո առաջ

Որպեսզի օգնեք ուսանողներին հասկանալ ծնողների և ընտանիքի անդամների սուրբ պարտականությունները Աստծո առջև, կարող եք նրանց հարցնել, թե արդյոք երբևէ իրենք ունեցել են դայակ, որն իրենց խնամում էր, երբ իրենց ծնողները բացակայում էին: Կարող եք նաև հարցնել՝ արդյոք նրանք երբևէ խնամել են այլ ընտանիքի երեխաների: Առաջարկեք ուսանողներին գրատախտակին գրել այն բնութագրերը կամ հատկանիշները, որոնք ծնողները կարող են փնտրել իրենց երեխաների համար դայակ ընտրելիս:

• Ձեր կարծիքով, ինչո՞ւ է ծնողը ցանկանում ունենալ վստահելի և պատասխանատու դայակ:

• Ինչո՞ւ Աստված կարող է մեծ ակնկալիքներ ունենալ նրանցից, ովքեր ծառայում են որպես երկրային խնամակալներ Իր հոգևոր զավակների համար:

Առաջարկեք ուսանողներին կարդալ ընտանիքի մասին հայտարարության պարբերություն 8-ը և կիսվել այդ պարբերությունից ստացած զգացումներով կամ պատկերացումներով: Վկայեք, որ Աստված խորապես հոգ է տանում Իր բոլոր զավակների մասին և ցանկանում է, որ մեր ընտանեկան հարաբերությունները տևեն հավերժ:

Երկնային Հայրը և Հիսուս Քրիստոսը սիրում են բոլոր երեխաներին

Որպեսզի օգնեք ուսանողներին զգալ Երկնային Հոր և Հիսուս Քրիստոսի՝ երեխաների հանդեպ ունեցած սերը, դիտեք Մորմոնի Գրքի «Jesus Christ Prays and Angels Minister to the Children» տեսանյութը (5:52): Առաջարկեք ուսանողներին դիտելիս գրել իրենց գաղափարներն ու տպավորությունները և պատրաստ լինել կիսվելու դրանցով: Եթե ​​տեսանյութն անհասանելի է, կարող եք ուսանողների հետ կարդալ այդ պատմությունը 3 Նեփի 17.11–25 հատվածներում։

Jesus Christ Prays and Angels Minister to the Children | 3 Nephi 17:11–25