«Դաս 161․ Վարդապետության սերտման վարժություն 10․ Կիրառել հոգևոր գիտելիքներ ձեռք բերելու սկզբունքները», Վարդապետություն և Ուխտեր․ Սեմինարիայի ուսուցչի ձեռնարկ (2025)
«Վարդապետության սերտման Վարժություն 10», Վարդապետություն և Ուխտեր․ Սեմինարիայի ուսուցչի ձեռնարկ
Դաս 161․ «Ընտանիք՝ Հայտարարություն աշխարհին»
Վարդապետության սերտման վարժություն 10
Կիրառել հոգևոր գիտելիքներ ձեռք բերելու սկզբունքները
Վարդապետության սերտումը կօգնի ուսանողներին կառուցել իրենց կյանքի հիմքը Հիսուս Քրիստոսի և Նրա ավետարանի վրա: Այս դասն ուսանողներին հնարավորություն կտա կիսվել վարդապետության սերտման հատվածներով, որոնք կարևոր են իրենց կյանքում, ինչպես նաև կօգնի նրանց սովորել և կիրառել հոգևոր գիտելիքներ ձեռք բերելու աստվածային սկզբունքները:
Հնարավոր ուսումնական վարժություններ
Վարդապետության սերտման կրկնություն․ Կիսվել
Որպեսզի օգնեք ուսանողներին համառոտ կրկնել, թե ինչ են իրենք սովորել այս տարի և նախապատրաստեք նրանց՝ կիսվելու վարդապետության սերտման հատվածներով, որոնք ազդեցություն են թողել իրենց կյանքի վրա, գրատախտակին գրեք Իմ սիրելի … մեկը անավարտ արտահայտությունը։
Կարող եք ավարտել արտահայտությունը մի քանի տարբեր եղանակով, օրինակ՝ մարդկանցից Եկեղեցու պատմությունից, պատմություններից, որոնք մենք սովորել ենք այս տարի կամ բաներից, որոնք ես սովորել եմ դասընկերոջիցս։ Արտահայտությունն ավարտելու յուրաքանչյուր տարբերակի դեպքում ուսանողներին հնարավորություն տվեք զուգընկերոջ հետ համառոտ կիսվել իրենց պատասխաններով և բացատրել, թե ինչու են ընտրել հատկապես այդ տարբերակները:
Եվ վերջում լրացրեք արտահայտությունը՝ օգտագործելով վարդապետության սերտման հատվածները։ Ուսանողներին ժամանակ տրամադրեք՝ վերանայելու վարդապետության սերտման հատվածների ցանկը Վարդապետության սերտման հիմնական փաստաթուղթ (2023)։ Առաջարկեք նրանց զուգընկերների հետ կիսվել իրենց ընտրած հատվածով և ասել, թե ինչ նշանակություն ունի այն իրենց համար: Համոզվեք, որ բավարար ժամանակ եք թողնում գործնական կիրառման ստորև բերված վարժությունը կատարելու համար:
Սովորեք և կիրառեք հոգևոր գիտելիքներ ձեռք բերելու սկզբունքները
Նախքան հետևյալ պատմությունը ներկայացնելը՝ օգտակար կլինի ուսանողներին հնարավորություն տալ համառոտ կրկնել պարբերություններ 5–12-ը Վարդապետության սերտման հիմնական փաստաթղթի «Ձեռք բերել հոգևոր գիտելիքներ» բաժնում։ (Կրկնելու համար առաջարկվող վարժություններն ընդգրկված են այս ձեռնարկի հավելվածում՝ «Վարդապետության սերտման կրկնության վարժություններ» բաժնում:)
Նշում․ Այս դասի համար առաջարկվող թեման կարող է շատ զգայուն և անձնական լինել ուսանողներից շատերի համար: Դասարանում հետևյալ պատմությունը քննարկելիս ուսանողներին հիշեցրեք Աստծո սիրո մասին Իր բոլոր զավակների հանդեպ և Իր ցանկության մասին, որպեսզի մենք բոլոր մարդկանց վերաբերվենք հարգանքով և սիրով:
Եթե կարծում եք, որ ավելի լավ կլինի, որ ուսանողները կիրառեն հոգևոր գիտելիքներ ձեռք բերելու սկզբունքներն այլ իրավիճակում, օգտվեք «Այլընտրանքային սցենար» բաժնից «Օժանդակ ուսումնական վարժություններում»:
Տասներկու Առաքյալների Քվորումից երեց Ջեֆրի Ռ. Հոլլանդը նկարագրել է մի երիտասարդի, որը բախվել էր շատ դժվար մարտահրավերների: Այդ երիտասարդի իրավիճակի մասին կարդալիս խորհեք, թե ինչու է նրա համար կարևոր կիրառել հոգևոր գիտելիքներ ձեռք բերելու սկզբունքները:
Պատմությունը մի պատանու մասին է, որն արժանի կերպով սկսեց միսիայի իր ծառայությունը, սակայն ժամանակից շուտ, իր ընտրությամբ, տուն վերադարձավ՝ միասեռական հակվածությունների ու դրանից բխող ընկճվածության պատճառով: Նա իր արժանավորությունը չէր կորցրել, սակայն իր հավատը հասել էր ճգնաժամային մակարդակի, նրա էմոցիոնալ բեռը ծանրացել էր և հոգևոր ցավն ավելի ու ավելի էր խորացել: Նա ժամանակ առ ժամանակ իրեն վիրավորված, շփոթված, բարկացած և լքված էր զգում։ (Ջեֆրի Ռ. Հոլլանդ, «Ահա քո մայրը», Լիահոնա, նոյ. 2015, 49)
Օգնեք ուսանողներին պատրաստվել տեսնելու այս դասի առնչությունն իրենց հետ՝ հնարավորություն տալով նրանց գիտակցել իրենց հասկացողություններն ու զգացմունքները՝ կապված նման իրավիճակների հետ: Խրախուսեք ուսանողներին գրել իրենց մտքերն իրենց օրագրերում՝ ցուցադրելով հետևյալ հուշումները.
-
Ըստ ձեզ այդ երիտասարդը Երկնային Հոր ծրագրի կամ Եկեղեցու վերաբերյալ ի՞նչ հարցեր կամ մտահոգություններ կարող է ունենալ:
-
Այդ հարցերը կամ մտահոգություններն ինչպե՞ս կարող են ազդել Երկնային Հոր հետ իր հարաբերությունների վրա:
-
Նմանատիպ իրավիճակներում հայտնված մարդկանց համար ինչո՞ւ է կարևոր հասկանալ և կիրառել հոգևոր գիտելիքներ ձեռք բերելու սկզբունքները: Ինչո՞ւ է կարևոր, որ իրենց ընկերները և ընտանիքի անդամները նույնպես կիրառեն այդ սկզբունքները:
Նկատի ունեցեք, որ այս դասը չի կարող տալ ուսանողների յուրաքանչյուր հարցի պատասխանը: Աստված դեռ չի հայտնել բոլոր հարցերի պատասխանները: Այս դասի նպատակն է օգնել ուսանողներին դառնալ Հիսուս Քրիստոսի ավելի հավատարիմ աշակերտներ՝ կիրառելով հոգևոր գիտելիքներ ձեռք բերելու սկզբունքները, երբ իրենց կյանքում բախվում են հարցերի և մտահոգությունների:
Ուսանողներին առաջարկեք կիսվել դասարանի հետ հոգևոր գիտելիքներ ձեռք բերելու սկզբունքների մասին իրենց սովորածով, որն, ըստ իրենց, առավել օգտակար կլինի սցենարի երիտասարդի, նրա ընկերների կամ ընտանիքի համար: Բավարար ժամանակ տրամադրեք դա քննարկելու համար:
Կախված քննարկումից հետո առկա ժամանակից՝ ընտրեք դասի մնացած նյութերից մեկը՝ օգնելու ուսանողներին ավելի լավ հասկանալ այդ սկզբունքները:
Ի՞նչ արեց այդ երիտասարդը
Դասարանի անդամներին խնդրեք գտնել զուգընկեր և նրանցից յուրաքանչյուրին տրամադրեք երեց Հոլլանդի պատմության մնացած մասի օրինակը: Առաջարկեք նրանց ընդգծել, թե ինչպես էին այդ երիտասարդը և մյուս մարդիկ կիրառում հոգևոր գիտելիքներ ձեռք բերելու սկզբունքները:
Այնուհետև զուգընկերներին ցուցադրեք հետևյալ հարցերը քննարկման համար:
Նրա միսիայի նախագահը, նրա ցցի նախագահը, նրա եպիսկոպոսն անթիվ ժամեր անցկացրին՝ փնտրելով նրան, լաց լինելով նրա համար և օրհնելով նրան: … [Նրա մայրն] իր որդուն բերեց իր վկայությունն Աստծո զորության, Նրա Եկեղեցու և հատկապես՝ իր երեխայի հանդեպ Նրա սիրո մասին: Այդ նույն ոգով նա վկայում էր որդու հանդեպ իր անձնական անզիջում, անվախճան սիրո մասին: …
Այդ [երիտասարդի] սեռական կողմնորոշումը որևէ կերպ հրաշքով չփոխվեց. ոչ ոք չէր էլ սպասում, որ դա տեղի կունենա։ Բայց կամաց-կամաց, տղայի սիրտը փոխվեց:
Նա սկսեց վերադառնալ եկեղեցի: Նա ընտրեց պատրաստակամորեն և արժանիորեն ընդունել հաղորդությունը: Նա կրկին տաճարային երաշխավորագիր ստացավ և կոչում ընդունեց՝ ծառայելու որպես վաղ առավոտյան սեմինարիայի ուսուցիչ, ինչը նա հրաշալի կատարեց: Եվ հիմա՝ հինգ տարի անց, իր անձնական խնդրանքով և Եկեղեցու նշանակալի օգնությամբ, նա վերադարձել է միսիայի վայր, որպեսզի ավարտին հասցնի Տիրոջը նվիրված իր ծառայությունը: Ես լաց եմ եղել այս երիտասարդի քաջության, ազնվության և վճռականության համար: (Ջեֆրի Ռ. Հոլլանդ, «Ահա քո մայրը», Լիահոնա, նոյ. 2015, 49)
-
Երիտասարդի կատարած ընտրություններն ինչպե՞ս են ցուցադրում իր հավատքն առ Հիսուս Քրիստոս: Ըստ ձեզ, նրա ընտրություններն ինչպե՞ս են ազդում Երկնային Հոր հետ իր հարաբերությունների վրա:
-
Ըստ ձեզ, ինչո՞ւ է կարևոր, որ նրա մայրը վկայեց նրա հանդեպ Աստծո սիրո մասին:
-
Ի՞նչ ապացույց եք տեսնում, որ նա դիմել է աստվածայնորեն սահմանված աղբյուրներին: Ըստ ձեզ, աղբյուրների նրա ընտրությունն ինչպե՞ս կարող էր ազդել առ Հիսուս Քրիստոս իր հավատքի վրա:
-
Պատկերացրեք, որ այդ երիտասարդը չի կարողանում գտնել իր որոշ հարցերի կամ մտահոգությունների պատասխանները։ Ինչ գիտեք Երկնային Հոր և Նրա ծրագրի մասին, որը երիտասարդի համար օգտակար կլինի հիշել:
Լրացրեք բաց թողնված տեղերը
Այս վարժության համար գրատախտակին գրեք հետևյալ երեք անավարտ արտահայտությունը:
Վարդապետության սերտման հիմնական փաստաթղթից ընտրեք հետևյալ արտահայտություններից մեկը և փորձեք ավարտել այն հիշողությամբ: Այնուհետև ստուգեք ձեր պատասխանը՝ օգտագործելով «Ձեռք բերել հոգևոր գիտելիքներ» բաժնի պարբերություններ 5–12-ը։
-
«Այն դեպքերում, երբ մենք չենք կարողանում անմիջապես գտնել մեր հարցերի պատասխանները …»
-
«Մենք խնդրում ենք Սուրբ Հոգու օգնությունը, որպեսզի …»
-
«Սովորելով ճանաչել անվստահելի աղբյուրները և խուսափել դրանցից օգտվելուց, մենք կարող ենք …»
Մտածեք, թե երիտասարդի, նրա ընկերների ու ընտանիքի համար ինչու է կարևոր հասկանալ ձեր ընտրած արտահայտության սկզբունքները:
Ուսանողներին առաջարկեք շրջել սենյակում և միմյանց հետ կիսվել գաղափարներով: Խրախուսեք նրանց շարունակել գտնել նոր զուգընկերներ այնքան ժամանակ, մինչև որ նրանք կկիսվեն մտքերով առնվազն մեկ մարդու հետ, որն ընտրել է տարբերակ 1-ը, մեկ այլ մարդու հետ, որն ընտրել է տարբերակ 2-ը և մեկ ուրիշի, որն ընտրել է տարբերակ 3-ը:
Աստվածային աղբյուրներ
Կարող եք ցուցադրել հետևյալ հարցերը։ Այնուհետև ուսանողներին բավարար ժամանակ տվեք՝ սուրբ գրությունները և ուղերձները փնտրելու համար, նախքան նրանց կառաջարկեք բարձրաձայն պատասխանել հարցերին:
Անհրաժեշտության դեպքում կարող եք ուսանողներին տրամադրել առաջարկվող նյութերը «Լրացուցիչ նյութեր» բաժնից:
-
Վարդապետություն և Ուխտերի (կամ սուրբ գրությունների այլ գրքերի) վարդապետության սերտման ո՞ր հատվածները կարող են օգնել այդ երիտասարդին:
-
Եկեղեցու ղեկավարների ո՞ր ուղերձներն օգտակար կլինեն նրա կամ նրա մերձավորների ուսումնասիրության համար։