“Lesona 160: Fanambarana momba ny fianakaviana, Tapany 3: Fahasambarana ao amin’ny fiainam-pianakaviana,” Fotopampianarana sy Fanekempihavanana: Boky torolalana ho an’ny mpampianatra seminera (2025)
“Fanambarana momba ny fianakaviana, Tapany 3,” Fotopampianarana sy Fanekempihavanana: Boky torolalana ho an’ny mpampianatra seminera
Lesona 160: “Ny fianakaviana: Fanambarana ho an’izao tontolo izao”
Fanambarana momba ny fianakaviana, Tapany 3
Fahasambarana ao amin’ny fiainam-pianakaviana
Ny antony iray nandefasan’ny Ray any An-danitra antsika ety an-tany ao anatina fianakaviana dia ny hanampiana antsika mba hiaina fahasambarana. Ao amin’ilay fanambarana momba ny fianakaviana, ny Tompo dia nanambara ny fomba ahafahantsika mahazo fiadanana sy fahasambarana izay ho an’ny tena manokana sy ny fianakaviana. Ity lesona ity dia afaka manampy ny mpianatra hampihatra ny fampianaran’i Jesoa Kristy eo amin’ireo fifandraisana ao amin’ny fianakavian’izy ireo.
Ireo sahanasa fianarana azo atao
Antony sy vokatra
Hevero ny hanoratra eny amin’ny solaitrabe ity fehezan-teny milaza antony sy vokatra tsy feno manaraka ity. Fenoy ny banga voalohany amin’ny alalan’ny andian-teny toy ny hoe “Ny fahazoana isa tsara any am-pianarana.” Avy eo dia asao ny mpianatra hameno ny banga faharoa amina andian-teny izay mameno ilay fehezan-teny, toy ny hoe “manao enti-mody isika.” Azonao averina imbetsaka io dingana io amin’ny alalan’ny fampiasana andian-teny samihafa.
“ dia azo tratrarina kokoa rehefa .”
Asao ny mpianatra hamaky ny andiam-pehezan-teny 7 ao amin’ny fanambarana momba ny fianakaviana, ka hitady fomba iray nentanim-panahy hamenoana ilay andian-teny eny amin’ny solaitrabe. Ampio ny mpianatra hamantatra ity fahamarinana manaraka ity: Ny fahasambarana ao amin’ny fiainam-pianakaviana dia azo tratrarina kokoa rehefa miorina eo amin’ny fampianaran’i Jesoa Kristy Tompo. Mba hanampiana ny mpianatra hieritreritra ny fomba ahafahan’ny fiainana ny fampianaran’i Kristy mitondra mankany amin’ny fahasambarana ao amin’ny fiainam-pianakaviana dia angataho izy ireo hisaintsaina fanontaniana tahaka ireto manaraka ireto:
-
Amin’ny fomba ahoana araka ny eritreritrao no ahafahan’ny Ray any An-danitra sy i Jesoa Kristy hampitombo ny fahasambaran’ny fianakavianao?
-
Manampy amin’ny fisian’izany fahasambarana izany amin’ny fomba ahoana ny fiezahanao miaina ny fampianaran’ Izy ireo?
Ampahafantaro ny mpianatra fa any amin’ny faran’ity lesona ity izy ireo dia hasaina handray andraikitra eo anatrehan’ny iray amin’ireo fampianaran’ny Mpamonjy izay afaka mampitombo ny fahasambaran’ny fianakaviany. Asao ny mpianatra hikatsaka ny fanampian’ny Ray any An-danitra mandritra ny ambin’ny lesona mba hahafantarana izay fitsipika tokony hifantohan’izy ireo. Amporisiho ny mpianatra mba hihaino tsara izay eritreritra na fahatsapana azony avy amin’ny Fanahy Masina.
Ireo fampianaran’i Jesoa Kristy
Hevero ny hametraka sarin’i Jesoa Kristy eo amin’ny solaitrabe. Asao ny mpianatra hamaky indray ny andiam-pehezan-teny 7, fa amin’ity indray mitoraka ity dia asaivo asiany marika ny fampianarana tsirairay izay afaka mampitombo ny fahasambaran’ny fianakaviana. Asao ny mpianatra hanoratra ny zavatra hitany eny amin’ny solaitrabe manodidina ny sarin’i Jesoa Kristy. Avy eo dia asaivo miasa ao anaty vondrona kely na tsiroaroa ny mpianatra mba hamitana ity sahanasa manaraka ity:
-
Misafidiana fampianaran’i Jesoa Kristy iray hitanao ao amin’ny andiam-pehezan-teny 7.
-
Mitadiava soratra masina na teny nambaran’ny mpitarika iray ao amin’ny Fiangonana izay manampy antsika hahatakatra tsara kokoa izany fampianarana izany.
-
Lazalazao ny fomba ahafahan’ny fanarahana izany fampianarana izany mampitombo ny fahasambarana ao amin’ny fianakaviana.
Raha mila fanampiana ny mpianatra dia azonao atao ny manasa azy ireo hampiasa ny Torolalana ho an’ny Soratra Masina na hikaroka ao amin’ny application Médiathèque de l’Évangile. Ireto manaraka ireto dia soratra masina sasantsasany mety ho hitan’ny mpianatra mikasika ireo fampianarana avy ao amin’ny andiam-pehezan-teny 7: 3 Nefia 18:15–16, 21 (vavaka); Môrônia 7:45–48 (fitiavana); Fotopampianarana sy Fanekempihavanana 58:42–43 (fibebahana); Fotopampianarana sy Fanekempihavanana 64:9–11 (famelana).
ChurchofJesusChrist.org
Rehefa nomena fotoana ampy, dia asao ny vondrona tsirairay hizara amin’ny mpianatra rehetra ny zavatra hitan’izy ireo. Rehefa mizara izany ny vondrona dia asao izy ireo hanoratra eny amin’ny solaitrabe ny andinin-tsoratra masina na ny ampahany amin’ny teny nambaran’ny mpitarika ao amin’ny Fiangonana izay nanampy azy ireo hahatakatra ny fampianaran’i Jesoa Kristy.
Avy eo dia azonao atao ny mampiasa fanontaniana tahaka ireto manaraka ireto mba hanampiana ny mpianatra hisaintsaina sy hifanakalo hevitra momba ny fomba ahafahan’ny fampianaran’i Jesoa Kristy hisy fiantraikany eo amin’ny fianakaviana.
-
Inona amin’ireo fampianaran’i Kristy eny amin’ny solaitrabe no nisy fiantraikany teo amin’ny fahasambarana tsapanao tao amin’ny fianakavianao?
-
Inona amin’ireo fampianarana ireo no tianao hifantohana kokoa ao amin’ny fianakavianao? Nahoana? Ahoana no ahafahanao manatanteraka izany ao amin’ny fianakavianao?
-
Inona amin’izy ireo no tianao hifantohana ao amin’ny fianakavianao any aoriana any? Nahoana?
-
Inona amin’ireo fampianaran’ny Mpamonjy no afaka manampy fianakaviana iray izay manana olana amin’ny tsy fitovian-kevitra, na ny fifandirana, na ny fifandraisana feno disadisa?
-
Rehefa mifanakalo hevitra momba ilay fanontaniana teo aloha ny mpianatra dia azonao atao ny mampitodika azy ireo any amin’ireo fitsipiky ny “finoana, vavaka, fibebahana, famelan-keloka, fanajana, fitiavana, [ary] fangorahana” ao amin’ny andiam-pehezan-teny nohalalinin’izy ireo. Mijoroa ho vavolombelona momba ny fanirian’ny Mpamonjy hamela heloka sy hanasitrana ary hanatsara ny fifandraisan’ny tsirairay sy ny fianakaviana. Ny ezaka ataontsika sy ny faniriantsika hibebaka sy hamela ny hafa dia afaka manasa ny fitarihany manasitrana eo amin’ny fiainantsika sy ny fifandraisantsika.
Fitomboan’ny fahasambarana
Alohan’ny hanasana ny mpianatra hampihatra ny iray amin’ireo fampianaran’ny Mpamonjy amin’ny fianakaviany dia ampio izy ireo hieritreritra ireo fomba azo ampiharana ny fampianarany amin’ny toe-javatra samihafa iainan’ny fianakaviana. Hevero ny hanoratra toe-javatra vitsivitsy samihafa iainan’ny fianakaviana eny amin’ny solaitrabe izay mety hiainan’ny mpianatra ao amin’ny kilasinao. Ireo ohatra dia mety hahitana ireto manaraka ireto:
-
Fianakaviana iray manontolo izay mavitrika ao am-piangonana.
-
Fianakaviana izay ny ampahany ihany no mpikambana.
-
Ray aman-dreny nisara-panambadiana.
-
Fianakaviana ahitana ray na reny tokan-tena.
Hevero ny hangataka ny mpianatra mba hizara ny valin’ireto fanontaniana manaraka ireto ho an’ireo toe-javatra tsirairay iainan’ny fianakaviana eny amin’ny solaitrabe:
-
Inona avy ireo fitsipika manokana avy ao amin’ny andiam-pehezan-teny 7 ao amin’ny fanambarana momba ny fianakaviana izay harosonao ho an’ny zatovo iray ao anatin’io toe-javatra io?
-
Ahoana no ahafahan’ny zatovo iray ao amin’io toe-javatra iainan’ny fianakaviana io mampihatra ireo fitsipika nosafidinao?
Hevero ny hampiseho ity teny nambara manaraka ity:
Nampianatra izao ny Loholona David A. Bednar ao amin’ny Kôlejin’ny Apôstôly Roambinifolo:
Na inona na inona zavatra ratsy mety nitranga tao amin’ny fianakavianao dia mijoro ho vavolombelona aho ary mampanantena fa i Jesoa Kristy Tompo no loharanon’ny fanasitranana sy ny fanavaozana ary ny famerenana amin’ny laoniny izay ilainao. …
Miaraka amin’ny fanampian’ny Tompo dia afaka mamorona fianakaviana mandrakizay ianao, na dia tsy avy ao amin’ilay karazana tokantranona Olomasin’ny Andro Farany izay miseho indraindray ao amin’ny fonon’ny gazetiboky Liahona na Ensign ireny aza ianao. Tsarovy foana ny hoe, manomboka aminao izany! (David A. Bednar, “A Welding Link” [worldwide devotional for young adults, Sept. 10, 2017], broadcasts.ChurchofJesusChrist.org)
-
Inona no nanan-danja taminao tao anatin’ny teny nambaran’ny Loholona Bednar? Nahoana?
Asao ny mpianatra hisafidy iray amin’ireo fampianaran’i Jesoa avy ao amin’ny fanambarana momba ny fianakaviana izay tsapan’izy ireo fa ahazoan’izy ireo fitaomana ny hampiharana azy mba hanatsarana ny fahasambarana ao amin’ny fianakaviany manokana. Omeo fotoana izy ireo hisaintsainana sy hanoratana ao amin’ny diary fandalinany drafitra iray hanombohana, na hanohizana, na hanatsarana ny fiainana izany fampianarana izany. Raha ampy ny fotoana dia asao ny mpianatra vitsivitsy hizara ny zavatra tsapany fa tokony hataony.
Zarao ny fijoroana ho vavolombelona anananao momba ny herin’i Jesoa Kristy mba hampitomboana ny fahasambarana ao amin’ny fianakavian’ireo izay miezaka miaina ny fampianarany.