“Lesona 161: Fanazaran-tena amin’ny fifehezana fotopampianarana 10: Fampiharana ireo fitsipiky ny fahazoana fahalalana ara-panahy,” Fotopampianarana sy Fanekempihavanana: Boky torolalana ho an’ny mpampianatra seminera (2025)
“Fanazaran-tena amin’ny fifehezana fotopampianarana 10,” Fotopampianarana sy Fanekempihavanana: Boky torolalana ho an’ny mpampianatra seminera
Lesona 161: “Ny fianakaviana: Fanambarana ho an’izao tontolo izao”
Fanazaran-tena amin’ny fifehezana fotopampianarana 10
Fampiharana ireo fitsipiky ny fahazoana fahalalana ara-panahy
Ny fifehezana fotopampianarana dia afaka manampy ireo mpianatra hanorina ny fototry ny fiainan’izy ireo amin’i Jesoa Kristy sy ny filazantsarany. Ity lesona ity dia hanome fahafahana ny mpianatra hizara ireo andinin-tsoratra masina fifehezana fotopampianarana izay manan-danja eo amin’ny fiainan’izy ireo sy hanampy azy ireo hianatra sy hampihatra ireo fitsipika masina mba hahazoana fahalalana ara-panahy.
Ireo sahanasa fianarana azo atao
Famerenana fifehezana fotopampianarana: Zarao
Mba hanampiana ny mpianatra hamerina fohifohy ny zavatra nianarany tamin’ity taona ity sy hanomana azy ireo hizara ireo andinin-tsoratra masina fifehezana fotopampianarana izay nisy fiantraikany teo amin’ny fiainan’izy ireo, dia hevero ny hanoratra ilay andian-teny tsy feno hoe Iray amin’ireo tiako indrindra tamin’ny… eny amin’ny solaitrabe.
Azonao atao ny mamarana ilay andian-teny amin’ny fomba samihafa, toy ny hoe olona teo amin’ny tantaran’ny Fiangonana, tantara izay nianaranay tamin’ity taona ity, na zavatra nianarako avy tamin’ny mpiara-mianatra iray. Isaky ny mamarana ilay andian-teny ianao dia avelao ny mpianatra hizara fohifohy amin’ny namana iray ny valinteniny sy ny antony nisafidianany izany.
Farany, fenoy amin’ny andinin-tsoratra masina fifehezana fotopampianarana ilay andian-teny. Omeo fotoana ny mpianatra hamerenana ny lisitr’ireo andinin-tsoratra masina fifehezana fotopampianarana ao amin’ny Tahirin-kevitra fototra ho an’ny fifehezana fotopampianarana (2023). Asao izy ireo hizara amin’ny namana iray ny andinin-tsoratra masina nosafidiny sy ny dikan’izany amin’izy ireo. Ataovy azo antoka fa ampy ny fotoana ho an’ity sahanasa fanazaran-tena eo amin’ny fampiharana manaraka ity.
Mianatra sy mampihatra ireo fitsipiky ny fahazoana fahalalana ara-panahy
Alohan’ny hampahafantarana ity tantara manaraka ity dia mety hanampy ny mamela ny mpianatra hamerina hijery fohifohy ireo fitsipika ao amin’ny andiam-pehezan-teny 5–12 ao amin’ny fizarana “Mahazo fahalalana ara-panahy” ao amin’ny Tahirin-kevitra fototra ho an’ny fifehezana fotopampianarana. (Misy sahanasa famerenana tafiditra ao amin’ny “Sahanasa famerenana fifehezana fotopampianarana” izay hita ao amin’ny tovana ho an’ity boky torolalana ity.)
Fanamarihana: Ny lohahevitra aroso ato amin’ity lesona ity dia mety ho tena saro-pady sy mikasika ny fiainana manokan’ny mpianatra maro. Rehefa mifanakalo hevitra momba ity tantara manaraka ity ny mpianatra dia ampahatsiahivo azy ireo ny fitiavan’ Andriamanitra ny zanany rehetra sy ny faniriany mba hitondrantsika ny olona rehetra amim-panajana sy amim-pitiavana.
Jereo ny fizarana “Rafi-tantara hafa” ao amin’ny “Sahanasa fianarana fanampiny” raha toa ka tsapanao fa tsara kokoa ho an’ny mpianatra ny mampihatra ireo fitsipiky ny fahazoana fahalalana ara-panahy amina toe-javatra hafa.
Ny Loholona Jeffrey R. Holland ao amin’ny Kôlejin’ny Apôstôly Roambinifolo dia nilazalaza momba ny zatovolahy iray izay niatrika olana tena sarotra. Rehefa mamaky momba ny toe-javatra niainan’io zatovolahy io ianao dia saintsaino ny antony maha-zava-dehibe aminy ny fampiharana ireo fitsipiky ny fahazoana fahalalana ara-panahy.
Hiresaka momba ny zatovolahy iray izay niditra tamim-pahamendrehana tany amin’ny sahan’ny misiôna aho, izay nisafidy ny hody alohan’ny fotoana noho izy voasarika amin’ny lehilahy mitovy aminy sy noho ny ratra izay niainany avy tamin’izany. Mbola mendrika izy, saingy efa narefo dia narefo ny finoany, niha-tsy zaka ny vesatry ny zavatra tsapany, ary nihamafy hatrany ny fahoriany ara-panahy. Nifandimby tonga teo aminy ny ratram-po, ny fisafotofotoan-tsaina, ny fahatezerana ary ny fahakiviana. (Jeffrey R. Holland, “Indro ny reninao,” Liahona, nôv. 2015, 49)
Afaka manampy amin’ny fanomanana ireo mpianatra hahita ny maha-zava-dehibe ity lesona ity ianao amin’ny alalan’ny famelana azy ireo hiato kely ka hisaintsaina ny fahatakarany sy ny fahatsapany mifandray amin’ny toe-javatra toy izany. Azonao atao ny mamporisika ireo mpianatra hanoratra ny eritreriny ao amin’ny diary fandalinan’izy ireo amin’ny alalan’ny fampisehoana ireo tari-kevitra toy ireto manaraka ireto:
-
Inona araka ny eritreritrao no fanontaniana na ahiahy momba ny drafitry ny Ray any An-danitra na momba ny Fiangonana mety hananan’io zatovolahy io?
-
Inona no mety ho fiantraikan’ireo fanontaniana na ahiahy ireo amin’ny fifandraisany amin’ny Ray any An-danitra?
-
Nahoana no zava-dehibe ho an’ny olona ao anatin’ny toe-javatra mitovy amin’izany ny mahatakatra sy mampihatra ireo fitsipiky ny fahazoana fahalalana ara-panahy? Nahoana no zava-dehibe ho an’ny namany sy ny fianakaviany ny mampihatra ireo fitsipika ireo ihany koa?
Tadidio fa ity lesona ity dia tsy afaka mamaly ny fanontaniana rehetra mety hananan’ny mpianatra. Tsy mbola nanambara ny valiny rehetra Andriamanitra. Ity lesona ity dia natao hanampiana ireo mpianatra ho lasa mpianatr’i Jesoa Kristy mahatoky kokoa amin’ny alalan’ny fampiharana ireo fitsipiky ny fahazoana fahalalana ara-panahy rehefa miatrika fanontaniana sy ahiahy eo amin’ny fiainany izy ireo.
Asao ny mpianatra hizara amin’ny iray kilasy ny zavatra nianarany momba ireo fitsipiky ny fahazoana fahalalana ara-panahy izay tsapan’izy ireo fa hanampy indrindra an’io zatovolahy io, na ny namany, na ny fianakaviany. Manomeza fotoana betsaka ho an’ity fifanakalozan-kevitra ity.
Miankina amin’ny fotoana ambiny aorian’ny fifanakalozan-kevitra, dia afaka misafidy avy amin’ny tahirin-kevitra hoenti-mampianatra sisa tavela ianao mba hanampiana ny mpianatra hahatakatra kokoa ireo fitsipika ireo.
Inona no nataon’ilay tovolahy?
Hevero ny hangataka ny mpianatra hitady namana iray ary hanome ny tahadikan’ny ambin’ilay tantara notaterin’ny Loholona Holland. Asao izy ireo hanisy tsipika ny zavatra maneho ny fomba nampiharan’io zatovolahy io sy ny hafa ireo fitsipiky ny fahazoana fahalalana ara-panahy.
Avy eo dia hevero ny hampiseho ireo fanontaniana etsy ambany mba horesadresahin’ny mpiara-miasa.
Ny filohan’ny misiônany, ny filohan’ny tsatòkany, ny evekany dia nandany ora maro nandinika sy nitomany ary nitsodrano azy. … Nijoro ho vavolombelona taminy momba ny herin’ Andriamanitra, sy ny Fiangonany [ny reniny], fa indrindra indrindra momba ny fitiavany an’ilay zanany. Sady nijoro ho vavolombelona ihany koa izy ny amin’ny fitiavany azy tsy voahozongozona ary tsy mety maty. …
Tsy niova tamin’ny fomba mahagaga ny fironan’[ilay zatovolahy] ho voasarika amina lehilahy. Tsy nisy nihevitra fa izany no hitranga. Fa niova tsikelikely ny fony.
Nanomboka niverina tany am-piangonana indray izy. Nisafidy ny handray an-tsitrapo sy amim-pahamendrehana ny fanasan’ny Tompo izy. Nahazo ny fahazoan-dalana hidirana ny tempoly indray izy ary nanaiky ny antso ho mpampianatra seminera vao maraina, izay nahitany fahombiazana tena mahatalanjona. Ary ankehitriny, dimy taona taty aoriana, tamin’ny alalan’ny fangatahany manokana sy ny fanampiana lehibe nataon’ny Fiangonana, dia niditra indray ny sahan’ny misiôna izy mba hamita ny asa fanompoany ny Tompo. Nitomany noho ny herim-po sy ny fahamarinan-toetra ary ny fahatapahan-kevitr’ity zatovolahy ity aho. (Jeffrey R. Holland, “Indro ny reninao,” Liahona, nôv. 2015, 49)
-
Ahoana no fomba nanehoan’ireo safidy nataon’ilay zatovolahy ny finoany an’i Jesoa Kristy? Inona araka ny eritreritrao no fiantraikan’ny safidiny teo amin’ny fifandraisany amin’ny Ray any An-danitra?
-
Nahoana araka ny eritreritrao no zava-dehibe ny nisafidianan’ny reniny ny hijoro ho vavolombelona taminy momba ny fitiavan’ Andriamanitra azy?
-
Inona no porofo hitanao fa nitodika tany amin’ireo loharano voatendrin’ Andriamanitra izy? Inona araka ny eritreritrao no mety ho fiantraikan’ny safidy nataony teo amin’ny finoany an’i Jesoa Kristy?
-
Ndeha hatao hoe tsy afaka mahita ny valin’ny fanontaniany sy ny ahiahiny sasantsasany ity tovolahy ity. Inona no zavatra fantatrao momba ny Ray any An-danitra sy ny drafiny izay afaka manampy azy ny mitadidy azy?
Fenoy ny banga
Ho an’ity sahanasa ity dia hevero ny hanoratra eny amin’ny solaitrabe ireo fehezan-teny telo tsy feno etsy ambany.
Misafidiana iray amin’ireto teny nambara manaraka ireto avy ao amin’ny Tahirin-kevitra fototra ho an’ny fifehezana fotopampianarana ary andramo fenoina tsy an-kijery izany. Avy eo dia hamarino ny valiny nomenao amin’ny alalan’ny fampiasana ny andiam-pehezan-teny 5–12 ao amin’ny fizarana “Mahazo fahalalana ara-panahy”.
-
“Mandritra ireo fotoana izay mety tsy hahitantsika avy hatrany ny valin’ireo fanontaniantsika …”
-
“Mikatsaka ny fanampian’ny Fanahy Masina isika mba …”
-
“Ny fianarana mamantatra sy misoroka ireo loharano tsy azo itokisana dia afaka …”
Eritrereto ny antony maha-zava-dehibe ny fahatakaran’ilay zatovolahy sy ny namany ary ny fianakaviany ireo fitsipika ao amin’ilay teny nambara nosafidinao.
Asao ny mpianatra hifindrafindra eran’ny efitrano ary hifampizara ny fahatakaran’izy ireo. Azonao atao ny mamporisika azy ireo hanohy hitady namana vaovao mandra-pizaran’izy ireo ny eritreriny amin’ny olona iray farafahakeliny izay nisafidy ny safidy 1, olona iray izay nisafidy ny safidy 2, ary olona iray nisafidy ny safidy 3.
Loharano voatendrin’ Andriamanitra
Hevero ny hampiseho ireto fanontaniana manaraka ireto. Avy eo dia omeo fotoana ampy ny mpianatra hikarohana soratra masina sy teny nambara alohan’ny hanasana azy ireo hamaly amin’ny feo mafy.
Raha ilaina dia azonao omena ireo loharanom-pitaovana naroso ao amin’ny fizarana “Loharanom-pitaovana fanampiny” ireo mpianatra.
-
Inona avy ireo andinin-tsoratra masina fifehezana fotopampianarana avy ao amin’ny Fotopampianarana sy Fanekempihavanana (na boky soratra masina hafa) izay heverinao fa afaka manampy io zatovolahy io?
-
Inona avy ireo teny nambaran’ny mpitarika ato amin’ny Fiangonana izay hanampy azy na ireo olona akaikin’ny fony ny mandalina azy?