Lesona 164: Atamai i Aoaoga Faavae: Mauaina o Tali i A’u Fesili

Faamalosia o Lou Faavae Faaleagaga

Faatomuaga i le Atamai i Aoaoga Faavae

I le avea ai ma soo o Iesu Keriso i aso e gata ai, tatou te feagai ai ma le tele o tulaga lamatia faaleagaga ma faigata. Ina ia tutu malosi e tetee atu i faatosinaga a le fili, e tatau ona tatou fausia o tatou olaga i luga o le faavae mautinoa e tasi, o Iesu Keriso. O lenei lesona o le a fesoasoani i tagata aoga ia malamalama i le ala e mafai ai e le atamai i aoaoga faavae ona faamanuiaina o latou olaga ma fesoasoani ia i latou e fausia o latou faavae faaleagaga ia Iesu Keriso.

Gaoioiga E Ono Mafai Ona Aoao Ai

O lenei lesona e mafai ona faaaoga e faailoa atu ai i tagata aoga ia faamoemoega o le atamai i aoaoga faavae. E mafai foi ona faaaoga e faamanatu ai i tagata aoga o e ua masani i le atamai i aoaoga faavae e uiga i le taua o lenei vaega taua o o latou aafiaga i le seminare. E mafai ona e aoao atu lenei lesona i le amataga o se kalena o le tausaga fou, ae e mafai foi ona e toe asiasia pe afai o loo e aoaoina se vaega fou o tagata aoga.

O le “Aoaoga Faamasani i le Atamai i Aoaoga Faavae” mo faiaoga e mafai ona avea o se punaoa aoga e malamalama ai pe faapefea ona faaaoga le atamai i aoaoga faavae i lau aoaoga. E mafai ona maua lenei aoaoga faamasani i le ChurchofJesusChrist.org.

O lo tatou faavae faaleagaga

Fesoasoani i tagata aoga ia malamalama i le taua o le fausiaga o o latou faavae faaleagaga i luga o Iesu Keriso. E mafai ona e faia lenei mea e ala i le talanoaina o le faafouga o le Malumalu o Sate Leki, faamamafa atu le galuega sa faia e faamalosia ai le faavae e faasaga i mafuie ma isi tulaga lamatia e ono i ai. Atonu e te manao e faaali atu ata. E mafai foi ona e faaali atu “Peresitene Nelson—Faavae o le Malumalu” (2:03).

• Aisea e te manatu ai o le tele o taimi ma punaoa na tuuto atu i le toefaafouga o le Malumalu o Sate Leki ma faaleleia lona faavae?

• E mafai faapefea ona tatou faatusatusaina mea na faia i le malumalu i o tatou olaga patino?

Faitau le Helamana 5:12, ma vaavaai mo upumoni ma mataupu faavae e mafai ona fesoasoani e te malamalama atili ai i le manaomia o se faavae faaleagaga e fausia i luga o Iesu Keriso.

• O le a le mea na fesoasoani lenei fuaiupu e te malamalama ai e uiga i le mafuaaga tatou te manaomia ai le malosi lea e sau mai ia Iesu Keriso?

• O le a se upumoni ua e aoaoina mai lenei fuaiupu e uiga i le mea e mafai ona tupu pe a tatou faatotonugalemuina o tatou olaga i le Faaola?

  E mafai ona e fai atu i tagata aoga e tusi mea sa latou aoaoina i se tasi o faamatalaga i luga o le laupapa. Ona mafai lea ona e tuu atu ia i latou se avanoa e faamalamalama ai a latou tali. Atonu latou te fai mai se tala faapea afai tatou te fausia lo tatou faavae faaleagaga ia Iesu Keriso, e le mafai ona tatou pauu.

• O le a lou manatu i le uiga o le fausia o o tatou faavae faaleagaga i luga o Iesu Keriso?

E mafai e tagata aoga ona faasoa mai manatu e pei o le faatotonugalemuina o o tatou olaga ia Iesu Keriso ma Ana aoaoga, mulimuli i Ana faataitaiga, ma salamo i taimi uma.

Sa faamatala mai e Peresitene Russell M. Nelson ia mafuaaga e manaomia ai ona tatou fausia lo tatou faavae i luga o Iesu Keriso:

O le taimi lenei tatou te faatinoina ai taitoatasi ni fuataga tulagaese—masalo o ni fuataga tatou te le’i faia muamua lava—e faamalolosia ai o tatou faavae faaleagaga patino . O vaitaimi fou e lei oo mai muamua e manaomia ona i ai ni fuafuaga fou e lei aumaua muamua.

O’u uso e ma tuafafine pele, o aso nei e gata ai. Afai e ao ia te oe ma a’u ona tetee atu i mea lamatia ma faatosinaga o loo foufou mai, e taua tele le tofu maua e i tatou o se faavae faaleagaga mausali ua atia’e i luga o le papa o lo tatou Togiola, o Iesu Keriso. …

Ua tautino mai e le Alii e faapea e ui i luitau faigata tele o nei aso, ae o i latou o ē atiae o latou faavae i luga o Iesu Keriso, ma aoao i le auala e utuvai ai mai Lona mana, e lē manaomia ona lolo atu i lagona popolevale o lenei vaitau. (Russell M. Nelson, “O Le Malumalu ma Lou Faavae Faaleagaga,” Liahona, Nov. 2021, 93)

• O le a se mea ua fesoasoani lenei saunoaga e te malamalama ai e uiga i lou manaomia o se faavae malosi faaleagaga?

Mafaufau e valaaulia tagata aoga e mafaufau e uiga i mea o loo latou oo i ai i le olaga e fesoasoani latou te iloa ai le manaomia o le fausiaina o o latou faavae i luga o le Faaola. Ona valaaulia lea o i latou e iloilo le malosi o lo latou faavae faaleagaga. O se tasi o auala e faia ai lenei mea o le faaali atu lea o le iloiloga o le tagata lava ia, lea e faatatau i taunuuga eseese o le atamai i aoaoga faavae o le a aoaoina e tagata aoga i lenei lesona. E mafai e tagata aoga ona iloilo le leoa e i latou lava pe tusi a latou tali ia latou api faamaumau mo suesuega.

Mo faamatalaga taitasi nei, faatulaga oe lava i se fuafaatatau o le 1 (matuai le ioeina) i le 5 (ioe malosi).

1. Ou te faalagolago ia Iesu Keriso ma Ana aoaoga pe a faaosoosoina au pe faatosinaina e le fili.

2. Ou te iloa le auala e maua ai tali i a’u fesili faaleaoaoga faavae, faaletagata lava ia, faaleagafesootai, po o fesili faaletalafaasolopito.

3. E mafai ona ou faamalamalama atu aoaoga faavae a Iesu Keriso i isi.

4. E mafai ona ou maua fuaitau o mau taua o loo i ai aoaoga faavae a Keriso.

5. Ou te faalagolago i faataitaiga ma aoaoga a Iesu Keriso e fesoasoani ia te au e faia filifiliga i aso taitasi.

Atamai i aoaoga faavae

Faamalamalama atu o se tasi o auala e mafai ai e tagata aoga ona fausia o latou faavae i luga o Iesu Keriso e ala i o latou aafiaga i le seminare e le ala lea i le atamai i aoaoga faavae. Afai e i ai ni au tagat aoga sa auai muamua i le seminare, mafaufau e fai atu ia i latou e faamalamalama mai mea ua latou iloa e uiga i le atamai i aoaoga faavae. E mafai foi ona e folasia atu i tagata aoga le atamai i aoaoga faavae e ala i le faaali atu o le vitio “What Is Doctrinal Mastery?” (3:56), o loo maua i le ChurchofJesusChrist.org.

Faitau le vaega o le “Faatomuaga i le Atamai i Aoaoga Faavae” i le Pepa Autu o le Atamai i Aoaoga Faavae,  (2023). Mafaufau pe mafai faapefea e le auai i le atamai i aoaoga faavae ona fesoasoani ia te oe e fausia se faavae malosi ia Iesu Keriso.

E mafai ona e fai atu i tagata aoga e faitau faatasi i ni vaega toalaiti. O se tasi o tagata aoga e mafai ona nafa ma le tofia o tagata aoga i le vaega e faitau ia parakalafa eseese, e mafai ona tofia se isi e lisi ni mea taua na maua, ma e mafai e se isi ona lipoti mai mea na maua e le vaega i le vasega.

• O a taunuuga autu e lua o le atamai i aoaoga faavae?

  Ia mautinoa ua malamalama tagata aoga o nei taunuuga o le (1) aoaoina ma le faaaogaina o mataupu faavae mo le mauaina o le malamalama faaleagaga, ma le (2) taulotoina o fuaitau o mau o le atamai i aoaoga faavae ma le aoaoga faavae o le talalelei a Iesu Keriso o loo latou aoao atu.

  Atonu e aoga le faamalamalama atu o le a auai tagata aoga i lesona i le tausaga atoa e taulai atu i nei taunuuga. O le a latou maua avanoa e faamatala ai aoaoga faavae i a latou lava upu, tauloto fasifuaitau autu o mau o le fuaitau o le atamai i aoaoga faavae, ma faaaoga mataupu faavae o le mauaina o le malamalama faaleagaga e faaaoga ai le aoaoga faavae i mea moni o le olaga.

• O le a sou manatu e mafai faapefea e le atamai i aoaoga faavae ona fesoasoani ia te oe ia fausia ou faavae i luga o Iesu Keriso?

• E mafai faapefea e le auai i le atamai i aoaoga faavae ona puipuia oe mai luitau i le lumanai ma osofaiga a le fili?

Fesoasoani i tagata aoga ia malamalama o se taumafaiga e auai atoatoa i le faatinoina o le atamai i aoaoga faavae e mafai ona fesoasoani latou te liliu atu ai ia Iesu Keriso ma le mautinoa atili. Mafaufau e fesili atu i tagata aoga o e sa auai talu ai i le atamai i aoaoga faavae e faasoa mai pe na faapefea ona faamanuiaina ai o latou olaga. Molimau atu a o latou faalagolago ia Iesu Keriso, o le a mafai ona latou tetee atu i luitau o loo feagai ma i latou i le asō ma saunia mo i latou o le a oo mai i le lumanai.

Punaoa Faaopoopo

O le a se mea e mafai ona ou aoao mai le fausiaina o se faavae o le malumalu?

Na aoao mai Elder Donald L. Hallstrom o le Fitugafulu:

O le faaaogaina o le malumalu o se upu valiata, o le po nei o le a ou talanoa atu ai e uiga i faavae. Faatasi ai ma le fuafuaina ma le fausiaina o malumalu uma, e faaalu ai galuega taua i mea e le faigofie ona vaaia pe a maea le galuega faatino—o le faavae. Mo se faataitaiga …o le Malumalu o Philadelphia Penisilevania, lea … o [a]fea e mae’a ai, … o le a 82 futu le maualuga i lona taualuga ma tulai mai ai le 195 futu i le tumutumu o le agelu o Moronae. E pei ona … i le faamamafaina atu ma le faaupuina e pei ona i ai lenei fausaga, o le a mafai lava ona aafia i matagi faataumaoi ma vai mai le eleele. O nei tulaga matautia, afai e le siakia, e mafai ona matua faaleagaina ai ma oo ai lava ina faatamaiaina lenei maota malualii.

O le iloa ai o nei malosiaga o le a matuai osofai ai le malumalu, sa mamanuina e enisinia ma sa viliina e le konekarate se lua e 32-futu le loloto i lalo o le fuatifaavae atoa o le fausaga. Sa eliina le lua e tau i le papa’alā masani o Penisilevania ia maua ai se faavae e le maluelue lea e fau ai i luga. Ona noanoa ai lea o fusifaavae ma faavae i le papa’alā mausali faatasi ai ma taula papa e tetee atu ai e oo lava i matagi fesasaa’i ma vaialalo malolosi. Sa viliina taula i le 50 i le 175 futu i totonu o le maamora ma le faafufusi i le 250,000 pauna i le inisi sikuea. E tu valavala taula i le 15 futu i itu uma e lua.

Ua ou tuuina atu na auiliiliga e aoao atu ai le manatu: e le pei o le fauina o se fale (i soo se faamatalaga e le tumau), i le fauina o lo tatou faavavau (ma, iai le faamoemoega, e faavavau) ola, o nisi taimi tatou te tuu atu ai ma le faanoanoa sina gauai itiiti i le enisiniaina ma le fauga o o tatou faavae. O lea ua tuua i tatou ua maualuga le aliali, ma ua faigofie ai ona faafefeteina e malosiaga matautia. (Donald L. Hallstrom, “Le Faavae Malosi” [faigalotu a le Ofisa o Aoga a le Ekalesia mo talavou matutua, Nov. 2, 2014], broadcasts.ChurchofJesusChrist.org)

O le a le faamoemoega o le atamai i aoaoga faavae?

Na saunoa mai Peresitene M. Russell Ballard o le Korama a Aposetolo e Toasefululua, i mea nei ao tautala atu i faiaoga o le seminare ma le inisitituti:

Na faamaonia talu ai nei e le Fono Faatonu o Aoga a le Ekalesia se fuafuaga taulamua i le seminare ua ta’ua o le Atamai i Aoaoga Faavae. … O lenei ta’imua o le a taulai atu i le fausia ma le faamalosia o le faatuatua o a tatou tagata aoga ia Iesu Keriso ma faamausali i latou i le gafatia faateleina e ola ma faaaoga le talalelei i o latou olaga. Faaaogaina o tusitusiga paia ma upu a perofeta, o le a latou aoao ai pe faapefea ona faatino ma le faatuatua ia Keriso e maua ai le malamalama faaleagaga ma le malamalamaaga e uiga i Lana talalelei. Ma o le a latou maua avanoa e aoao ai le auala e faaaoga ai aoaoga faavae a Keriso ma mataupu faavae o le talalelei i fesili ma luitau latou te faalogo ma vaaia i aso taitasi i o latou tupulaga ma luga o faasalalauga faaagafesootai.

O lenei taulamua ua musuia ma o le a faatino i le taimi sao. O le a i ai se aafiaga matagofie i luga o o tatou tagata talavou. (M. Russell Ballard, “O Avanoa ma Tiutetauave a Faiaoga o le OAE i le Seneturi 21” [o se afiafi ma se Pulega Aoao, Fep. 26, 2016], broadcasts.ChurchofJesusChrist.org)

Gaoioiga Faaopoopo e Aoao Ai

Gaoioiga faailoga-mau o le atamai aoaoga faavae

Faaaoga se gaoioiga malie e fesoasoani ai i tagata aoga e faailoga fuaitau o mau o le atamai i aoaoga faavae. Valaaulia i latou e saili le “Fuaitau o Mau o le Atamai i Aoaoga Faavae ma Fasifuaitau Autu o Mau e ala i Kosi” i le Pepa Autu o le Atamai i Aoaoga Faavae (2023). E mafai e tagata aoga ona nonofo i autafa o se paga a o latou makaina ia fuaitau, ona faasoa mai lea o a latou tali i se fesili e mafai ona fesoasoani i tagata aoga ia iloa lelei ai le tasi ma le isi. Ona mafai lea e tagata aoga ona fesuiai paga ma toe fai le faagasologa lenei seia oo ina makaina le numera manaomia o fuaitau.

Taulotoina o mau

E mafai ona e valaaulia tagata aoga e saili le “Fuaitau o Mau o le Atamai i Aoaoga Faavae ma Fasifuaitau Autu o Mau e ala i Kosi” i le Pepa Autu o le Atamai i Aoaoga Faavae (2023). Faamalamalama atu o le a valaaulia tagata aoga e suesue nei fuaitau ina ia latou iloa ai le aoaoga faavae ma tuu atu ai ia i latou avanoa e faataitai ai ona faamalamalama atu mea ua latou aoaoina. Ta’u i tagata aoga o le a tuu atu ia i latou ni avanoa e tauloto ai vaega taua o fuaiupu o loo i ai i fasifuaitau autu o mau.

Valaaulia tagata aoga e mafaufau i taimi o le a taua ai le iloaina o mau taua ma mea latou te aoao atu. Fesili atu i tagata aoga pe i ai ni o latou aafiaga i le manatuaina ma le faasoaina atu o mau i isi.

Polokalama o le Atamai i Aoaoga Faavae

Fesoasoani i tagata aoga e sii mai le polokalama o le Atamai i Aoaoga Faavae i telefoni feaveai. Faaaoga le taimi o le vasega e fesoasoani ai i tagata aoga ia masani i le polokalama ma galulue ai i nisi o gaoioiga. Faamalosiau i tagata aoga ina ia fa’aaoga le polokalama i fafo atu o vasega.