Lesona 166: Atamai i Aoaoga Faavae: Mauaina o Tali i A’u Fesili

Faatino i le Faatuatua ia Maua ai Tali

Mauaina o le Malamalama Faaleagaga, Vaega 2

Ua valaaulia i tatou e Iesu Keriso e vaai atu ia te Ia ma faatino le faatuatua i o tatou olaga atoa. E taua lo tatou taulai atu i le Faaola, aemaise lava pe a le faigofie ona tatou foia ni fesili po o ni mea e tula’i mai. O lenei lesona e mafai ona fesoasoani i tagata aooga ia malamalama i le ala e faatino ai ma le faatuatua ia Iesu Keriso a o latou sailia tali o a latou fesili.

Gaoioiga E Ono Mafai Ona Aoao Ai

O le taua o le fai o fesili

A o lei amataina le vasega, atonu e te manao e tusi le fesili lenei mai ia Peresitene Dieter F. Uchtdorf i luga o le laupapa. A o ulufale mai tagata aooga, valaaulia i latou e mafaufau loloto pe mafai faapefea ona latou taliina lana fesili ma pe aisea o le a latou tali ai i lea auala. A lava loa le taimi e mafaufau loloto ai, ona fai lea i ai e faasoa mai a latou tali.

O Peresitene Dieter F. Uchtdorf, a o i ai i le Au Peresitene Sili, na faia le fesili lenei:

E afaina le i ai o ni fesili e uiga i le Ekalesia po o ona aoaoga faavae? (Dieter F. Uchtdorf, “The Reflection in the Water” [Faigalotu a le Ofisa o Aoga a le Ekalesia, Nov. 1, 2009], thechurchnews.com)

• E faapefea ona e tali atu i lenei fesili? Aisea e te tali atu ai faapena?

A o e faitau i le vaega o totoe o le saunoaga a Peresitene Uchtdorf, vaavaai pe faapefea ona faatusatusa au tali i lana saunoaga.

Au uo talavou pele, o i tatou o ni tagata fai fesili aua ua tatou iloa o le fesili e taitaiina atu ai i le mea moni. O le ala [lena] na amata ai le Ekalesia—mai se alii talavou na i ai ni ana fesili. O le mea moni, ou te le mautinoa pe mafai faapefea e se tasi ona iloa le upumoni e aunoa ma le faia o fesili. …

… O le fesili o le amataga lea o se molimau. … O le faia o fesili e le o se faailoga lea o le vaivai; ae o se teuteuala mo le tuputupu a’e. (Dieter F. Uchtdorf, “The Reflection in the Water” [Faigalotu a le Ofisa o Aoga a le Ekalesia, Nov. 1, 2009], thechurchnews.com)

• O a ni faataitaiga ua e vaaia i tusitusiga paia, talafaasolopito o le Ekalesia, po o lou lava olaga e faapupula mai ai e finagalo le Tama Faalelagi ma Iesu Keriso tatou te faia ni fesili?

O nisi taimi atonu tatou te mauaina ni faamatalaga fou e uiga i le aoaoga faavae, faiga masani, po o le talafaasolopito o le Ekalesia e foliga e faigata ona malamalama i ai. Atonu foi e i ai ni a tatou fesili e faigata ona taliina. O le i ai o fesili e le tutusa ma le masalosalo. O fesili e faia ma le faamaoni e mafai ona faateleina ai lo tatou malamalama ma le molimau ia Iesu Keriso. O le fafagaina o tatou mafaufauga i le masalosalo e mafai ona aafia leaga ai lo tatou faatuatua ia te Ia (tagai Topics ma Fesili, “Answering Gospel Questions,” topics.ChurchofJesusChrist.org).

Fai atu i tagata aooga e mafaufau i ni a latou fesili e ono i ai e uiga i le Ekalesia po o ona aoaoga faavae e le faigofie ona latou taliina. E mafai ona e valaaulia tagata aooga e tusi nei fesili i totonu o a latou api o talaaga mo suesuega. Valaaulia i latou e saili mo upumoni i lenei lesona e mafai ona fesoasoani ia i latou pe a tulai mai ni fesili faigata.

Tali atu i fesili faigata

Ina ia faapupula le taua o le faia o fesili ma faataitai pe faapefea ona faatino i le faatuatua, avatu se faataitaiga vaaia i le vasega. Faaaoga le faamatalaga o loo i lalo pe faaali le vitio “Mauaina o le Malamalama Faaleagaga: O le Tala a Madison,” o loo maua i le ChurchofJesusChrist.org, mai le faailo taimi 0:00 i le 1:44.

I le seminare, sa iloa ai e Madison o Iosefa Samita na fai ana autaunonofo. Ina ua ia faalogo i lenei tulaga, sa oo mai nisi o fesili i lona mafaufau.

Ina ia fesoasoani i tagata aooga e talanoaina fesili nei, e mafai ona e vaevaeina le vasega i ni paga po o ni vaega toalaiti. A uma ona talanoaina fesili, e mafai e tagata aooga ona lipoti mai a latou tali i le vasega.

• O a nisi o auala lē lelei ma lelei e mafai ona faia e Madison e taulima ai ma ana fesili?

• Aisea e te manatu ai o nei auala o le a lē lelei pe lelei foi?

Pe a tatou fetaia’i ma fesili faigata, e mafai ona fesoasoani le faaaoga o mataupu faavae o le mauaina o le malamalama faaleagaga.

O nisi tagata aooga atonu na i ai se aafiaga talu ai i le suesueina o mataupu faavae o le mauaina o le malamalama faaleagaga i le seminare. Afai o lea, fesili i tagata o le vasega pe mafai ona latou taulotoina mataupu faavae e tolu o le mauaina o le malamalama faaleagaga. A manaomia, fai i ai e faitau le parakalafa 4 o le vaega “Mauaina o le Malamalama Faaleagaga” o le Pepa Autu o le Atamai i Aoaoga Faavae (2023). Mafaufau e tusi mataupu faavae nei i luga o le laupapa:

• Faatino i le faatuatua.

• Iloilo manatu ma fesili faatasi ma se vaaiga e faavavau.

• Saili le malamalama atili e ala i punavai faalelagi ua atofaina.

Faatino i le faatuatua

O ni aafiaga a’oa’oina i lenei aso o le a taulai atu i le mataupu faavae o le faatinoina i le faatuatua.

Faitau le Mataupu Faavae ma Feagaiga 6:36. Faailoa mai pe faapefea e lenei valaaulia mai le Faaola ona fesoasoani ia i tatou e faatino i le faatuatua.

• O a upu po o fasifuaitau i lenei fuaiupu e mafai ona fesoasoani ia Madison po o isi e i ai ni fesili e uiga i le talalelei po o le Ekalesia?

• Aisea o le a fesoasoani ai na upu po o fasifuaitau?

A o faasoa mai e tagata aooga a latou tali, fesoasoani ia i latou e faailoa mai le upumoni lenei: a i ai ni a tatou fesili e lei taliina, e mafai ona tatou vaai atu ia Iesu Keriso ma aua le masalosalo

Faamatala i tagata aooga o le tele o faataitaiga o auala e mafai ona tatou vaai atu ai ia Iesu Keriso o loo maua i le Pepa Autu o le Atamai i Aoaoga Faavae.

Faitau ia palakalafa 5–7 i le vaega o le “Mauaina o le Malamalama Faaleagaga” o le Pepa Autu o le Atamai i Aoaoga Faavae, ma vaavaai mo auala e mafai ona e faatino ai i le faatuatua pe a i ai ni au fesili faaleagaga.

• O le fea o faamatalaga mai nei parakalafa e te lagona e mafai ona sili ona aoga i se tasi e i ai se fesili e i ai ni lu’itau? Aisea?

Mafaufau e valaaulia tagata aooga e su’e ni mau e lagolago ai a latou tali. Mo se faataitaiga, afai e ta’ua e tagata aooga le tatalo, e mafai ona latou faasino atu i le 2 Nifae 32:8–9 po o le Iakopo 1:5–6. Afai latou te ta’ua le suesueina o tusitusiga paia, e mafai ona latou faasino atu i le 2 Nifae 32:3 po o le 2 Timoteo 3:15–17.

Saili ni avanoa masani e faamanatu ai i tagata aooga le taua o le faia o nei faatinoga ma se taula’iga ia Iesu Keriso. E te ono valaaulia tagata aooga e mafaufau pe mafai faapefea e amioga latou te faailoa mai ona avea ma faataitaiga o le vaavaai atu ia Iesu Keriso.

O faataitaiga o le faatinoina i le faatuatua

Faasoa atu le faaiuga i le tulaga faataitai e uiga ia Madison. Valaaulia tagata aooga e faailoa mai pe na faapefea ona filifili Madison e faatino i le faatuatua a o feagai ai ma ana fesili. E mafai ona e faaalia le vitio “Mauaina o le Malamalama Faaleagaga: O le Tala a Madison” mai le faailo taimi 1:44 i le 8:35; afai e le o maua le vitio, faitau le parakalafa lenei.

Ina ua uma le vasega, sa alu atu Madison i lona faiaoga ma fesili pe aisea na faia ai e Iosefa Samita ana autaunonofo. Sa uunaia o ia e lona faiaoga e faaauau pea ona ola i le talalelei ma tuuina atu le tatalo faamaoni a o ia saili mo ni tali. A o tatalo Madison ma suesue i ana tusitusiga paia, sa ia maua se uuna’iga o le a ia maua se tali i le taimi e tatau ai. Sa faaauau pea ona galue Madison i le faatuatua ma faalagolago i le molimau sa ia te ia e uiga i le Tama Faalelagi ma Lana fuafuaga, ma sa faasolosolo malie lava ona ia maua tali na fesoasoani ia te ia e maua ai lona filemu. I le taimi atoa o le faagasologa, sa lagona e Madison le tuputupu ae o lana sootaga ma le Tama Faalelagi ma Iesu Keriso. Sa oo ina ia iloa a tatou galulue i le faatuatua, o le a saunia e le Atua ia tali po o le filemu o loo tatou sailia.

I le avea ai o se vaega o le talanoaga o le fesili lenei, fai atu i tagata aooga e faasino mai po o fea o faatinoga a Madison e faatatau i mea sa latou suesueina i le Pepa Autu o le Atamai i Aoaoga Faavae.

• Na faapefea ona faaalia i faatinoga a Madison lona faatuatua ia Iesu Keriso?

• O le a se mea e mafai ona tatou aoaoina e uiga i le Tama Faalelagi ma Iesu Keriso mai i aafiaga o Madison?

Mafaufau e valaaulia tagata aooga e mafaufau ma faasoa mai taimi na faamanuiaina ai i latou ona o le faatinoina o le faatuatua pe a feagai ma ni fesili faigata. Ona valaaulia lea o tagata aooga e mafaufau e uiga i mea sa latou aoaoina ma lagonaina i le aso nei e mafai ona fesoasoani i o latou tulaga patino ma fesili. Mafaufau e tuu atu ia i latou se taimi e faamau ai o latou mafaufauga ma faalogona i totonu o a latou api faamaumau mo suesuega.

Faaiu i lau molimau i le taua o le faatino i le faatuatua ma se taula’iga ia Iesu Keriso a o tatou sailia tali i a tatou fesili.

Punaoa Faaopoopo

E faapefea ona ou faateleina lo’u faatuatua ia Iesu Keriso?

Na aoao mai Peresitene Russell M. Nelson:

Faatino i le faatuatua. O le a se mea e te faia pe afai ua ia te oe se faatuatua tele atu? Mafaufau i ai. Tusitusi e uiga i ai. Ona maua lea o le faatuatua telea e ala i le faia o se mea e manaomia tele ai le faatuatua. (Russell M. Nelson, “Ua Toetu Keriso; O Le Faatuatua ia te Ia O Le A Aveesea ai Mauga,” Liahona, Me 2021, 103)

Na aoao mai Elder Dale G. Renlund o le Korama a Aposetolo e Toasefululua:

E na o le pau le auala e tupu ai le fa’atuatua e mo se tagata e fa’atino i le fa’atuatua. O nei faatinoga e masani ona uunaia e ni vala’aulia e tuuina mai e isi, ae e le mafai ona tatou “fa’atupuina” le fa’atuatua o se isi po o le fa’alagolago fa’apitoa atu i isi e uunaia lo tatou foi fa’atuatua. Mo lo tatou fa’atuatua ina ia tuputupu ae, e tatau ona tatou filifili i fa’atinoga fa’atupu-fa’atuatua, e pei o le tatalo, su’esu’eina o tusitusiga paia, ‘ai ma inu i le fa’amanatuga, tausia o poloaiga, ma le auauna atu i isi. (Dale G. Renlund, “Tautinoga Mausali ia Iesu Keriso,” Liahona, Nov. 2019, 23)

Ae faapefea pe afai e i ai sa’u fesili e foliga mai e le mafai ona taliina?

Na faasoa mai e Peresitene M. Russell Ballard o le Korama a Aposetolo e Toasefululua le mea lenei:

Afai e te soifua i le umi ua ou ola ai, o le a e iloaina e i ai lava i faafitauli se auala e foia ai i latou lava. Atonu o se malamalamaaga musuia po o se faaaliga e ono faamalamalamaina ai se faafitauli. Manatua, o le Toefuataiga e le o se mea se tasi na tupu, ae o loo faaauau pea ona faaali mai.

Aua lava ne’i lafoaia upumoni sili na faaali mai e ala mai i le Perofeta o Iosefa Samita. Aua lava ne’i tuu le faitauina, mafaufau loloto, ma le faaaogaina o le mataupu faavae a Keriso o loo i totonu o le Tusi a Mamona.

Aua nei musu e tuu atu se taimi tutusa i le Alii e ala i taumafaiga faamaoni e malamalama i mea ua faaali mai e le Alii. E pei ona fai mai la’u uo pele ma paaga muamua o Elder Neal A. Maxwell i se tasi taimi, “E le tatau ona tatou manatu … faapea ona ua le mafai ona tatou faamalamalamaina se mea, o le a le mafai lava la ona faamalamalamaina” [Not My Will, but Thine (1988), 124].

O lea la a o lei e faia lena filifiliga lamatia faaleagaga e alu ese, ou te uunaia oe ia toe tu ma mafaufau ma le toto’a a o lei e lafoaia soo se mea na aumaia oe i lau molimau o le Ekalesia toefuataiina a Iesu Keriso i le taimi muamua lava. Tu ma mafaufau i mea sa e lagonaina iinei ma le mafuaaga na e lagonaina ai. Mafaufau i taimi na molimau atu ai le Agaga Paia ia te oe e uiga i upumoni e faavavau. (M. Russell Ballard, “A Matou O Ea Ia Te Ai?,” Liahona, Nov. 2016, 91)

Gaoioiga Faaopoopo e Aoao Ai

Isi vaaiga faataitai

E avea o se isi auala i le vaaiga faataitai i le lesona, e mafai ona e faaaogaina se tasi o mea nei:

1. Tusitusiga Paia: Valaaulia tagata aooga e suesue se faataitaiga mai tusitusiga paia o tagata na faatinoina le faatuatua ina ua i ai a latou fesili pe sa i ai i ni tulaga faigata. O faataitaiga e ono aofia ai Iosefa Samita (tagai Iosefa Samita—Talafaasolopito 1:8–18, Nifae (tagai 1 Nifae 3:31, 4:7), Liae ma Sarai (tagai 1 Nifae 5:1–8), po o Peteru ma le au Aposetolo (tagai Ioane 6:59–69).

2. Talafaasolopito o le Ekalesia: Faaaoga se faataitaiga mai le talafaasolopito o le Ekalesia o loo faapupula mai ai mataupu faavae o le faatinoina i le faatuatua. O se tasi o ia tala e mafai ona avea ma tali a Polika Iaga ma lona uso o Iosefa a o la tauivi e malamalama i le faaaliga a Iosefa Samita o tikeri e tolu o le mamalu, lea ua maua nei i le Mataupu Faavae ma Feagaiga 76. (Tagai “The Vision,” Revelations in Context, o loo maua i le ChurchofJesusChrist.org.)

3. O le tufuga maa: Matamata le vitio “Act in Faith: The Stonemason”(4:57). Fesoasoani i tagata aooga ia iloa pe mafai faapefea ona latou taofimau i upumoni latou te iloa a o latou saili ia malamalama i a latou fesili o i ai o le talalelei.

4. Liahona: Afai e i ai ni masini faatekinolosi a tagata aooga, valaaulia i latou e filifili se lomiga talu ai nei o le mekasini o le Liahona ma sue le tala tusia o le “Ata o le Faatuatua”. Faatonu i latou e filifili le “O le vaega o totoe o le tala” (na o le tekinolosi) i le faaiuga o le itulau ma faitau le tala. A uma, e mafai ona latou faasoa atu le tala na latou maua i se tuaoi po o le vasega ma faailoa mai le luitau na feagai ma le tagata ma pe na faapefea ona latou faaaogaina mataupu faavae o le faatinoina i le faatuatua.