Lesona 168: Atamai i Aoaoga Faavae: Mauaina o Tali i A’u Fesili

Liliu Atu i Punaoa Mamana Faalelagi ua Filifilia e Fesoasoani e Maua ai Tali

Mauaina o le Malamalama Faaleagaga, Vaega 4

O se tasi o faamoemoega o le atamai i aoaoga faavae o le fesoasoani lea i tagata aooga e aoao ma faaaoga mataupu faavae o le mauaina o le malamalama faaleagaga. E mafai ona fesoasoani lenei lesona i tagata aooga e malamalama ai i le taua o le saili o le mea moni mai punavai ua tuuina mai ma le alofa e le Tama Faalelagi ma Iesu Keriso.

Gaoioiga E Ono Mafai Ona Aoao Ai

Faamatalaga e tele

Mafaufau e aumai se ipu vai e faaali atu. Valaaulia tagata aooga e vaai faalemafaufau i le ofoina atu o se vaiinu ia i latou. Fesili atu ia i latou po o le a se mea atonu latou te fia iloa e uiga i le vai ae latou te lei filifili pe inuina.

E pei lava ona tatou mananao ia iloa le puna o mea tatou te tuuina i o tatou tino, pe a i ai ni a tatou fesili o le talalelei po o autu tatou te fia iloa, e tatau foi ona tatou iloiloina punavai o faamatalaga tatou te vaavaai i ai mo faamatalaga.

Sa faamatala mai e Elder Dieter F. Uchtdorf, a o i ai i le Au Peresitene Sili:

E lei i ai lava i le talafaasolopito o le lalolagi se taimi na faigofie ai lo tatou mauaina o le tele o faamatalaga—o nisi e sa’o, o nisi e sese, ma o le tele lava e i ai ni nai mea moni.

O le taunuuga la, e le’i i ai lava i le talafaasolopito o le lalolagi le sili atu ona taua o le aoao le ala e iloatino moni ai le va o le mea moni ma le mea sese. (Dieter F. Uchtdorf, “O Le A le Upumoni?” [Faigalotu a le Ofisa o Aoga a le Ekalesia, Ian. 13, 2013], broadcasts.ChurchofJesusChrist.org)

• O a punavai o faamatalaga e masani ona e vaai i ai pe afai e i ai sau fesili o le talalelei?

• E mafai faapefea ona e iloa pe faatuatuaina se punavai o faamatalaga?

O le Atua o le punavai lea o upumoni uma

Ina ia fesoasoani i tagata aooga ia iloa le manaomia ona vaai atu i le Tama Faalelagi ma Iesu Keriso i lo latou sailiga mo le upumoni, mafaufau e faaali atu mau nei i luga o le laupapa.

E mafai ona e valaaulia tagata aooga e suesue nisi po o fuaiupu uma e i latou lava pe faatasi foi ma se vaega. Mafaufau e valaaulia i latou e tusi i luga o le laupapa upu po o fasifuaitau latou te maua e faamatala ai uiga o le Tama Faalelagi ma Iesu Keriso.

Faitau mau nei, ma vaavaai mo upu po o fasifuaitau e fesoasoani ia te oe e malamalama ai pe aisea e tatau ai ona tatou vaai atu i le Tama Faalelagi ma Iesu Keriso mo le upumoni:

• Ioane 14:6

• Mosaea 4:9

• Mataupu Faavae ma Feagaiga 88:6–7

• Mataupu Faavae ma Feagaiga 93:26

• O a ni mea ua fesoasoani nei fuaiupu e te malamalama ai i le mafuaaga e tatau ai ona tatou faalagolago i le Tama Faalelagi ma Iesu Keriso a o saili mo le upumoni?

  I le avea ai ma se vaega o la outou talanoaga, ta’u atu i ai o le Atua o le punavai o upumoni uma. Mafaufau e tusi le mataupu faavae lenei i luga o le laupapa.

• O fea e mafai ona tatou maua ai le upumoni lea e sau mai le Tama Faalelagi ma Iesu Keriso?

Sailia o punavai faatuatuaina

O le gaoioiga suesue lenei e mafai ona fesoasoani i tagata aooga e malamalama ai pe aisea o le a latou mananao ai e faaaoga punavai mamana ua filifilia ua faamanuiaina ai i latou e le Atua.

Faitau i parakalafa 11–12 i le vaega ua faaigoaina o le “Mauaina o le Malamalama Faaleagaga” i le Pepa Autu o le Atamai i Aoaoga Faavae (2023). Saili mo aoaoga e mafai ona limata’ita’ia ai i tatou i a tatou taumafaiga e saili tali i a tatou fesili.

• O a upu po o fasifuaitau na e maua e faamatala ai pe aisea e taua ai le faaaoga o punavai mamana ua filifilia?

• O a nisi o punavai mai le Tama Faalelagi ma Iesu Keriso e mafai ona tatou liliu atu i ai i la tatou sailiga mo le upumoni? E faapefea e punavai nei ona faaalia ai le alofa o le Tama Faalelagi ma Iesu Keriso mo i tatou?

O gaoioiga nei e mafai ona fesoasoani i tagata aooga ia malamalama i le auala e maua ai punaoa mamana ua filifilia ma iloilo ai le faatuatuaina o isi punavai e ono latou tau atu i ai. Mafaufau e faaaoga se tasi po o gaoioiga uma e lua, e fuafua i lou taimi avanoa ma manaoga o au tamaiti aoga.

Gaoioiga A: Saili punavai mamana ua filifilia

A o lei valaauina tagata aooga e faauma le gaoioiga lenei, mafaufau e faataitai pe faapefea ona faaaoga fesoasoaniga o suesuega ua faia e le Ekalesia e saili ai punavai mamana ua filifilia. E mafai ona e filifilia se autu o le talalelei ma faaali atu i tagata aooga le mea e maua ai nisi faamatalaga e faaaoga ai punaoa o loo lisi atu i le laasaga 2.

A uma ona faaali atu i tagata aooga le auala e maua ai punavai mamana ua filifilia, tuu atu ia i latou e faataitai e i latou lava pe fai faatasi ma se paga. E mafai ona e faasoa ma faaali atu faatonuga nei e fesoasoani ai i tagata aooga e amata.

Faataitai le faaaogaina o fesoasoaniga o suesuega ua faia e le Ekalesia e saili ai punavai mamana ua filifilia e ala i le mulimuli i laasaga nei e lua:

1. Filifili se autu o le talalelei e saili ai faamatalaga e uiga i ai. O faataitaiga o autu e aofia ai le faaliliuga o le Tusi a Mamona, tala o le Ulua’i Faaaliga, ma le Upu o le Poto. E mafai ona e filifilia soo se autu o le talalelei e te fiafia i ai.

2. Saili punavai mamana ua filifilia e ala i le faaaogaina o fesoasoaniga o suesuega na faia e le Ekalesia. O faataitaiga o fesoasoaniga mo suesuega e aofia ai Autu ma Fesili, Taiala i Tusitusiga Paia, o le faatinoga o sailiga o le Gospel Library , O Autu o le Talafaasolopito o le Ekalesia, ma lauga o konafesi aoao.

   A o galulue tagata aooga e saili punavai mamana ua filifilia, mafaufau e savalivali solo ina ia e avanoa e fesoasoani i tagata aooga e ono i ai ni fesili po o ni manaoga. A uma se taimi na suesue ai tagata aooga, e mafai ona fesoasoani fesili nei ia i latou e talanoaina ai o latou aafiaga.

3. O a ni malamalamaaga na e maua e ala i le faagasologa o le sailiga o punavai mamana ua filifilia?

4. O a ni faamatalaga fesoasoani na e mauaina?

Gaoioiga E: Iloilo punavai o faamatalaga

E i ai taimi i la tatou sailiga mo le upumoni e tatou te tau atu ai i punavai o faamatalaga e le i lolomiina e le Ekalesia. I nei tulaga, e taua ai lo tatou iloiloina o le faatuatuaina o faamatalaga o loo tatou mauaina.

• O le a se mea e mafai ona tatou faia e iloa ai le eseesega i le va o punavai o faamatalaga e faatuatuaina ma le lē faatuatuaina?

Faaali fesili nei pe tuuina atu i tagata aooga i se pepa e tufa atu. E faaopoopo atu i le valaauliaina o tagata aooga e faitau e i latou lava ia fesili pe o se vasega, e mafai ona e fai atu ia i latou e faitau mau e o faatasi ma fesili.

Filima’otiina o le Mea Sa’o mai le Mea Sese

Tusi Lesona a le Faiaoga Seminare o le Mataupu Faavae ma Feagaiga—Mauaina o le Malamalama Faaleagaga, Vaega 4

Faitau fesili nei. Mafaufau pe mafai faapefea e fesili faapenei ona fesoasoani ia te oe e filima’oti ai le faatuatuaina ma le aoga o punavai eseese o faamatalaga.

• O le a se mea na ou lagonaina mai le Agaga Paia i le taimi sa ou faitau ma faalogo ai i lea faamatalaga? (Tagai i le Mataupu Faavae ma Feagaiga 50:23–24.)

• Pe aumaia faalatalata atili au ia Iesu Keriso ma Lana Ekalesia e lenei faamatalaga? (Tagai i le Moronae 7:15–17.)

• Pe ua uunaia au e lenei faamatalaga e tausia poloaiga a le Atua?

• Pe ogatusa ma mea o aoao mai e tusitusiga paia ma perofeta o ona po nei? (Tagai i le 2 Timoteo 3:15–17; Mataupu Faavae ma Feagaiga 1:38.)

• Pe o faamautinoa ai mea ua ou lagonaina ua ta’u mai e le Agaga Paia ia te au e moni, pe o loo uunaia ai au e masalomia upumoni o le talalelei? (Tagai i le Moronae 10:5 .)

• Pe mai se punavai e talitonuina e le Faaola po o taitai o Lana Ekalesia?

• Mata o le a se tala a o’u matua ma taitai o le Ekalesia e uiga i nei faamatalaga? (Afai e faaosoosoina au e nanā mai ia i latou, o le a se mea o tau mai ai ia te au e uiga i lona punavai?)

A uma ona faitau e tagata aooga ia fesili, fai atu i ai e faasoa mai pe aisea latou te manatu ai o fesili faapenei o le a fesoasoani mo i latou e mafaufau loloto ai. E mafai foi ona e valaaulia i latou e faasoa mai ni faataitaiga o le auala na latou faaaogaina ai nei fesili po o fesili talitutusa e iloilo ai le faatuatuaina o faamatalaga.

Faaaoga mea ua e aoaoina

Ina ia fesoasoani i tagata aooga e teuloto a latou aoaoga, mafaufau e valaaulia i latou e tusi a latou tali i se tasi po o fesili uma nei i a latou api talaaga mo suesuega. Ona mafai lea ona e valaaulia i latou e faasoa mai o latou manatu faatasi ma se paga po o le vasega.

• O le a se mea ua e aoaoina i le aso e mafai ona fesoasoani ai ia te oe e maua atili ai tali i au fesili o le talalelei?

• O le a sou manatu, o le a faapefea e mea ua e aoaoina i lenei aso ona faatosina ai au faatinoga i le lumanai?

Molimau atu i upumoni sa e suesueina i lenei aso, ma uuna’ia tagata aooga e saili le upumoni ua faaalia mai e le Tama Faalelagi ma Iesu Keriso e ala i punavai mamana ua filifilia.

Punaoa Faaopoopo

O a punavai e mafai ona ou faaaogaina e maua ai le upumoni ua faaalia mai e le Atua?

Na aoao mai e Sister Tracy Y. Browning o le Au Peresitene Aoao o le Peraimeri:

Vaaia Atili o Iesu Keriso i o Tatou Olaga

I le avea ai o ni fanau o le Feagaiga a le Atua, ua tulagaese lava le faamanuiaina o i tatou i le anoanoai o meafaigaluega ua tofia mai le lagi e faaleleia ai la tatou vaaiga faaleagaga. O afioga ma aoaoga a Iesu Keriso e pei ona tusia i tusitusiga paia ma savali mai Ana perofeta filifilia, ma Lona Agaga e maua mai i tatalo i aso taitasi, auai e le aunoa i le malumalu, ma sauniga faalevaiaso o le faamanatuga e mafai ona fesoasoani e toefuatai mai ai le filemu ma maua mai ai le meaalofa e tatau ai o le iloatino lea e aumaia le sulu o Keriso ma Lona malamalama i tulimanu o o tatou olaga ma i se lalolagi atonu e puaoa. E mafai foi ona avea le Faaola ma o tatou tapasa ma lo tatou tautai a o uli atu lo tatou sa i sami malū ma galuā o le olaga. E mafai ona ia faalauleleia le ala sa’o e tau atu i lo tatou taunuuga e faavavau. (Tracy Y. Browning, “Vaaia Atili o Iesu Keriso i o tatou Olaga,” Liahona, Nov. 2022, 13–14)

Na faamalamalama mai e Elder Dieter F. Uchtdorf o le Korama a Aposetolo e Toasefululua:

O Iesu Keriso o le Malosiaga o le Autalavou

O fea la e te maua ai le upumoni?

O loo i ai i totonu o le talalelei a Iesu Keriso. Ma o le atoaga o lena talalelei o loo aoaoina i totonu O Le Ekalesia a Iesu Keriso o le Au Paia o Aso e Gata Ai.

Na fetalai Iesu Keriso, “O a’u nei le ala, ma le upu moni, ma le ola: e le alu atu lava se tasi i le tama, pe a le ui mai ia te a’u” [Ioane 14:6].

Pe a i ai ni au filifiliga taua e faia, o Iesu Keriso ma Lana talalelei toefuataiina o le filifiliga aupito silisili lea. A i ai ni au fesili, o Iesu Keriso ma Lana talalelei toefuataiina o tali aupito silisili ia. (Dieter F. Uchtdorf, “O Iesu Keriso o le Malosiaga o le Autalavou,” Liahona, Nov. 2022, 10)

O le a se isi mea e mafai ona fesoasoani ia te au a’o ou saili ia iloa le upumoni?

Sa faasoa mai e Peresitene Russell M. Nelson le mea lenei:

Ou te augani atu ia te outou ia pulea lau molimau. Galue i ai. Pulea. Tausi i ai. Faafailele ina ia tuputupu ae. Fafaga i upumoni. Aua ne’i faaleagaina i filosofia sese o alii ma tamaitai le talitonu ona e tuufesili lea pe aisea ua vaivai ai lau molimau. …

Afai e i ai ni au fesili—ma ou te faamoemoe e i ai—saili ni tali faatasi ma manaoga faatauanau ia talitonu. Aoao mea uma e te mafaia e uiga i le talalelei ma ia mautinoa e te liliu atu i punavai e faatumulia i upumoni mo le taitaiga. Ua tatou ola i le tisipenisione ua “leai se mea e taofia” [Mataupu Faavae ma Feagaiga 121:28]. O lea, o le a i ai le taimi o le a tali mai ai e le Alii a tatou fesili uma. (Russell M. Nelson, “Filifiliga mo le Faavavau” [faigalotu i le lalolagi atoa mo le autalavou matutua, 15 Me, 2022])

Gaoioiga Faaopoopo e Aoao Ai

Vitio: “Punavai Paia ua Atofaina”

Mafaufau e faaaoga vaega o le vitio “Divinely Appointed Sources” (9:16). E mafai ona faagaeetia tagata aooga i molimau a tagata talavou o e na mauaina le mana i le faaaogaina o punavai mamana ua filifilia e talanoaina ai fesili ma atugaluga o le talalelei.

Divinely Appointed Sources

O le aoao e uiga i le talafaasolopito o le Ekalesia

O le aoao e uiga i mea na tutupu i le talafaasolopito o le Ekalesia e mafai ona tuuina atu ai ni lu’itau tulaga ese. O le iloaina o lenei mea e mafai ona fesoasoani mo tagata aooga. I upu a se tusitala faasolopito e toatasi o le Ekalesia, “Mai la tatou vaaiga i le taimi nei, ua tele lava ina le toe i ai ni mea o le vaitaimi ua tuanai. Ua maliliu atu tagata; ua muta foi o latou aafiaga. Ae peitai, o loo totoe fasi vaega o mea ua tuanai—o tusi, o apitalaaga, faamaumauga o faalapotopotoga, ma meafaitino faaletino. O le asō, e mafai ona tatou aoao ai e uiga i mea ua tuanai, e ala i fasi vaega o loo totoe. O taimi uma e leiloloa ai faamatalaga i le va o le taimi ua tuanai ma le taimi nei. E ao ona tatou suesue i faamaumauga o loo i ai ae ia manatua e le o i ai uma mea ua tuanai” (Keith A. Erekson, “Understanding Church History by Study and Faith,” Ensign, Fep. 2017, 57).