Lesona 167: Atamai i Aoaoga Faavae: Mauaina o Tali i A’u Fesili

Suesueina o Autu ma Fesili o le Talalelei ai ma se Vaaiga e Faavavau

Mauaina o le Malamalama Faaleagaga, Vaega 3

O se tasi o faamoemoega o le atamai i aoaoga faavae o le fesoasoani lea i tagata aooga ia faamasani i mataupu faavae o le mauaina o le malamalama faaleagaga ina ia mafai ona latou faaaogaina i o latou olaga atoa. O lenei lesona e mafai ona fesoasoani i tagata aooga e su’esu’e ai manatu faavae ma fesili faatasi ma se vaaiga e faavavau ma vaai atili ai ia i latou e pei ona faia e Iesu Keriso.

Gaoioiga E Ono Mafai Ona Aoao Ai

O Le Mata o le Faatuatua

Faaali atu le ata o loo i lalo ma fai i tagata aooga e vaai faalemafaufau i le tulaga.

Vaai faalemafaufau i le savali atu i totonu o se falemataaga ma vaaia se faaaliga faapenei. E faapefea ona e faamatalaina mea o loo e vaaia?

• Mata o le a sou manatu pe afai e ta’u atu e se tasi o loo tilotilo i le faaaliga lava lea e tasi sa latou vaaia le foliga o se mata faaletagata?

Faamatala atu e faapea, mai i se isi itu ese o togitogi e laina e faaali mai ai se ata o se mata faaletagata. Faaali atu le ata lenei. Atonu foi e te manao e ki le vitio, lea e faaalia ai le suiga o le vaaiga seia oo ina iloa atu le mata.

• O le a se mea e mafai ona tatou aoaoina e uiga i manatu mai lenei ata?

• O a ni lesona faaleagaga e ono fesoasoani ia i tatou ina ia malamalama ai?

A uma ona faasoa mai e tagata aooga o latou malamalama’aga, fesoasoani ia i latou e aoao mai ia Elder Neil L. Andersen o le Korama a Aposetolo e Toasefululua.

Tagai i le ata lenei na saunia e Michael Murphy. Mai i lenei vaaiga, e faigata ona e talitonu o se faatinoga o le faatufugaga o se mata o se tagata. Ae ui i lea, a o e vaai i togitogi mai se vaaiga e ese mai, e te vaaia le matagofie o le foafoaga a le faatufugaga.

E faapena foi, tatou te vaai i upumoni faaleagaga a le Atua e ala i le vaaiga o se mata o le faatuatua. (Neil L. Andersen, “O Le Mata o le Faatuatua,” Liahona, Me 2019, 35)

• O le a sou manatu i le uiga o le vaai i upumoni faaleagaga i “se mata o le faatuatua”?

• O le a se mea e mafai i nisi taimi ona faafaigata ai mo i tatou ona vaai i upumoni faaleagaga i lenei auala?

Vaai e pei ona silasila ai le Alii

Pe a tatou manaomia le fesoasoani i le vaai ai i aoaoga faavae, fesili, po o faafitauli lautele mai se vaaiga o le faatuatua, e mafai ona tatou faaaogaina mataupu faavae o le mauaina o le malamalama faaleagaga:

1. Faatino i le faatuatua.

2. Iloilo manatu ma fesili se vaaiga e faavavau.

3. Saili le malamalama atili e ala i punavai faalelagi ua atofaina.

I lenei lesona, o le a tatou taulai atu ai i le iloiloina o manatu faavae ma fesili faatasi ma se vaaiga e faavavau.

Valaaulia tagata aooga e faamatala mai lo latou malamalamaaga e uiga i le iloiloina o manatu faavae ma fesili ma se vaaiga e faavavau.

Faitau ia palakalafa 8–10 i le vaega o le “Mauaina o le Malamalama Faaleagaga” o le Pepa Autu o le Atamai i Aoaoga Faavae (2023) ma vaai po o a mea e mafai ona tatou faia e maua ai se vaaiga e faavavau.

• O le a se mea na e aoaoina mai nei parakalafa e uiga i le taua o le tausia o se vaaiga e faavavau?

• O le a se mea e mafai ona fesoasoani ia te oe e maua ai se vaaiga e faavavau?

Mafaufau e maka lenei fasifuaitau i totonu o le parakalafa 8: Tatou te saili le fesoasoani a le Agaga Paia ina ia vaai ai i mea e pei ona silasila i ai le Alii.

• O le a sou manatu o a ni faamanuiaga o le taumafai e vaai i a tatou fesili faaleagaga po o atugaluga i le auala e silasila i ai le Alii?

Saili ni mau se lua pe tolu e mafai ona fesoasoani ia te oe e malamalama ai i le taua o le vaaiga a le Alii.

E mafai e tagata aooga ona amata i le saili mo mau e uiga i le malamalama o le Atua i lalo o le “God, Omniscience of” i le Faasino mo Autu.

O nisi nei o fuaiupu e mafaufau i ai:

• Isaia 55:8–9

• 2 Nifae 9:20

• Mataupu Faavae ma Feagaiga 38:1–2

• Mataupu Faavae ma Feagaiga 88:6, 41

Ina ia fesoasoani i tagata aooga e mafaufau e uiga i mea sa latou faitauina, fai i ai e tusi se aotelega o mea sa latou aoaoina e uiga i le Atua. E mafai ona e valaaulia ni nai tagata aooga e faasoa mai mea na latou tusia pe fai i tagata aooga e faasoa ma se paga.

• O a mea o aoao mai e nei fuaiupu e uiga i le Atua e ono faaosofia ai i tatou e vaai i mea mai Lana silafaga?

Vaaiga eseese

O le faatinoga lenei e mafai ona fesoasoani i tagata aooga e faataitai ai le faatusatusaina o se vaaiga faalelalolagi ma se vaaiga e faavavau. Mafaufau e folasia atu se vaaiga faataitai e pei o lenei ma fesoasoani i tagata aooga e mafaufau i vaega uma e lua o le vaaiga.

Sa faauu talu ai nei Ryan mai le aoga maualuga. Ua amata ona ia faauo ma se teineitiiti e le auai i le Ekalesia a Iesu Keriso o le Au Paia o Aso e Gata Ai. A o faasolo ina mafana le la mafutaga, sa ia aumaia talu ai nei le manatu e mafai ona la nonofo faatasi nai lo le faaipoipo.

Valaaulia le vasega e talanoaina le fesili lenei ma lisi tali i luga o le laupapa i lalo o se ulutala ua faaulutalaina “Vaaiga Faalelalolagi.” Mafaufau e faamanatu i tagata aooga le faatufugaga na faaali atu i le amataga o le lesona. E mafai ona e faaali atu le vaaiga i le itu o le mata i le taimi o lenei talanoaga.

• Afai na i ai se vaaiga faatapulaa pe faalelalolagi a Ryan, aisea e ono foliga mai ai lenei mea o se manatu lelei ia te ia?

Afai e manaomia e tagata aooga se fesoasoani e maua mai ai ni mafuaaga, e mafai ona e faasoa atu le parakalafa lenei.

Afai sa tilotilo Ryan i lenei faaiuga ma se vaaiga faalelalolagi, atonu o le a ia vaaia nisi o penefiti i le nonofo ai ma lana uo teine nai lo le faaipoipo. Atonu e mafaufau o ia i le sefeina o tupe e ala i le lē faaaluina i se mama taugata ma se faaipoipoga. Atonu e manatu o ia o le a faaitiitia ai le mamafatu o le i ai i totonu o se faaipoipoga o le a manaomia ai lana tautinoga atoatoa. Afai e lelei mea uma, e mafai lava ona la faaipoipo i se taimi mulimuli ane.

O lea la ua tilotilo tagata aooga i lenei tulaga i se vaaiga faalelalolagi, e fesoasoani ina ia latou maua se vaaiga e faavavau. Afai na e faaalia le itu autafa o le mata i le taimi o le talanoaga mulimuli, ia faaali atu nei loa le ata i le itu o iloa atu ai le mata.

I luga o le laupapa, tusi ai le ulutala “Vaaiga e Faavavau,” ma valaaulia tagata aooga e lisi tali i le fesili lenei i lalo o lenei ulutala. Mafaufau e faasino atu tagata aooga i punaoa e pei o le “O Le Aiga: O Se Folafolaga i le Lalolagi” po o le Mo le Malosi o le Autalavou: O Se Taiala mo le Faia o Filifiliga (2022).

• Afai e i ai se vaaiga e faavavau a Ryan, aisea o le a ia filifili ai e aua nei nonofo faatasi ma lana uo teine?

Afai e manaomia e tagata aooga se fesoasoani i le taliina o le fesili, e mafai ona e faasoa atu le parakalafa lenei. O le mea e lelei ai, o le a maua e tagata aooga a latou lava tali a o latou auai i talanoaga.

Afai sa tilotilo Ryan i lenei faaiuga i se vaaiga e faavavau, e mafai ona ia mafaufau i nisi o mea nei: O le fiafia e sau mai le mulimuli ia Iesu Keriso ma ola i Ana aoaoga. O le a le manao Ryan e “agasala i le Atua” (Kenese 39:9) e ala i le solia o le tulafono a le Alii o le legavia, lea e aofia ai le aloese mai sootaga tau feusuaiga a o lei faaipoipo. Ua aoao mai foi e le talalelei a Iesu Keriso e i ai foi le aia tatau i fanau e fananau mai ai i se aiga e faaipoipo ai se tama ma se tina ma tuuto atu ia i latou ma le tasi ma le isi. Ua malamalama Ryan e mafai ona ia osia feagaiga ma le Atua i totonu o le malumalu ina ia mafai ai e ana faiā ona oo i le faavavau.

O le vitio puupuu lenei e mafai ona faaalia ai le manino e mafai ona tatou maua i le faia o faaiuga pe a tatou vaai i fesili ma faafitauli lautele mai se vaaiga e faavavau.

O lea la ua galulue tagata aooga i se tulaga faataitai, e mafai ona e valaaulia i latou e talanoaina isi tulaga e i latou lava pe i ni vaega toalaiti. E mafai ona latou vaai i se fesili ese po o se mataupu lautele mai vaaiga faalelalolagi ma le faavavau.

Ina ia fesoasoani i tagata aooga e talanoaina le taua o le faatusatusaina o vaaiga faalelalolagi ma le faavavau, e mafai ona e fai atu fesili e pei o nei:

• O le a se mea na e aoaoina mai e ala i le faatusatusaina o se vaaiga faalelalolagi ma se vaaiga e faavavau?

• O a faamanuiaga e mafai ona maua mai le vaaia lea o a tatou filifiliga po o fesili mai se vaaiga e faavavau?

• O anafea na e molimauina ai faamanuiaga o le vaai atu i mea i se vaaiga e faavavau?

Molimau atu i upumoni na outou talanoaina i le asō. Uuna’ia tagata aooga e faaauau pea ona faataitai le faaaogaina o mataupu faavae i le mauaina o le malamalama faaleagaga, a o latou sailia tali ia latou fesili.

Punaoa Faaopoopo

E mafai faapefea ona ou talanoa atu i isi ao ese la’u vaaiga mai ia i latou?

Na saunoa mai Peresitene Dallin H. Oaks o le Au Peresitene Sili:

Ou te fautua atu atonu e sili atu i o tatou tagata talavou ona aloese mai le finau ma a latou paaga. … O le a sili atu lava mo i latou ona tali atu e ala i le faailoaina o manatu faalelalolagi po o mafaufauga i manatu o loo latou fetaiai, ma e ala i le faailoaina o mafaufauga po o manatu eseese ia e taialaina mafaufauga o le Au Paia o Aso e Gata Ai. O lenei mea o le a le aveesea ai le maliega mai tagata e le tutusa o tatou faatuatuaga, ae e mafai ona aveesea ai le talanoaga mai le finauina. (Dallin H. Oaks, “As He Thinketh in His Heart” [afiafi ma se Pulega Aoao, 8 Fep., 2013], broadcasts.ChurchofJesusChrist.org)

E mafai faapefea e le malamalama i le ata o le faaolataga ona aafia ai la’u vaaiga?

Na aoao mai Peresitene M. Russell Ballard o le Korama a Aposetolo e Toasefululua:

E ala mai i le Perofeta o Iosefa Samita, na tuu atu i ai e le Atua le Tusi a Mamona, le Mataupu Faavae ma Feagaiga, ma le tele o isi mau aoaoga faaopoopo i le Ekalesia. Sa aofia ai ma se malamalama o le ata o le faaolataga, o lona uiga o le faafanua o le mea na tatou o mai ai, lo tatou faamoemoega iinei i le lalolagi, ma le mea tatou te o i ai pe a tatou feoti. Ua tatou maua foi i le fuafuaga se vaaiga tulagaese e faavavau, o tatou o fanau agaga a le Atua. E ala mai i le malamalama po o ai lo tatou Tama Faalelagi atoa ai ma lo tatou sootaga ia te Ia ma Lona Alo Pele, o Iesu Keriso, o le a tatou taliaina ai a La poloaiga ma osia ni feagaiga ma i Laua ia o le a taitai atu ai i tatou e toe foi atu i lo La afioaga e faavavau. (M. Russell Ballard, “O le Atua o loo i le Foeuli,” Liahona, Nov. 2015, 25)

Gaoioiga Faaopoopo e Aoao Ai

Vaaiga e faavavau a Iesu Keriso

E mafai ona musuia mo tagata aooga le vaai atu sa faatumauina e Iesu Keriso se vaaiga e faavavau i le taimi o Lona soifuaga faaletino. Mafaufau e faitau faataitaiga i tusitusiga paia lea na tali atu ai Iesu Keriso i se fesili po o se faafitauli e faavae i Lona malamalamaaga i le fuafuaga o le faaolataga a le Atua. O faataitaiga e aofia ai le Luka 2:49; Ioane 6:35, 38, 42, 51; Ioane 18:36; ma le tele o isi mau. E ono fesoasoani le faitau o nisi o fuaiupu o loo siomia ai po o le saunia faamatalaga i mea o loo faitauina e tagata aooga. E mafai foi ona aogā i tagata aooga le talanoaina o mafuaaga latou te faafetai ai ona sa faatumauina e Iesu Keriso se vaaiga e faavavau e faataunuu ai Lana misiona paia.

Aoaoina le talafaasolopito o le Ekalesia

Fesoasoani i tagata aooga ia malamalama i eseesega faaleaganuu o loo i ai i le va o a tatou agaifanua ma tu masani ma i latou mai le taimi ua tuanai. O se tasi o auala e faia ai lenei mea o le faaali atu lea o se faafanua o le lalolagi ma valaaulia tagata aooga e faasoa faapuupuu mai mea latou te iloa e uiga i atunuu eseese i le lalolagi atoa. E mafai e tagata aooga ona talanoaina mea e mafai ona a’oa’oina ai tatou mai le asiasi atu i atunuu eseese ma tulaga e mafai ona faigata. Valaaulia tagata aooga e suesue ia parakalafa 9 ma le 10 i le vaega o le “Mauaina o le Malamalama Faaleagaga” o le Pepa Autu o le Atamai i Aoaoga Faavae (2023), ma saili mea e fai pe a i ai ni a tatou fesili tau talafaasolopito. E mafai foi ona e faaalia lenei vitio, lea o loo fautuaina ai e le tusitala faasolopito o le Ekalesia o Matthew Grow le ala e faatautaia ai le talafaasolopito o le Ekalesia.

Toe faaupuina o faafitauli ma fesili

E tusa ai ma le parakalafa 8 i le vaega o le Mauaina o le Malamalama Faaleagaga o le Pepa Autu o le Atamai i Aoaoga Faavae (2023), o le vaai i mea e pei ona faatagaina ai i tatou e le Alii e toe faatupu manatu faavae, fesili, ma faafitauli lautele. Fesoasoani i tagata aooga e aoao pe faapefea ona latou faia le toe faaupuina, ona tuu atu lea ia i latou e faataitai. O laasaga nei e tolu atonu o ni faatonuga aoga mo tagata aooga e mulimuli ai. E mafai ona latou faaaogaina pepa tufa atu o le Toefaaupuina o Fesili e tusi ai i lalo a latou fesili ma mafaufauga. Atonu foi e te manao e faaali le vitio e faapupula ai le toe faaupuina o fesili faigata.

1. Filifili se fesili po o se mataupu lautele.

2. Mafaufau ma tusi i lalo manatu eseese e ono i ai ia i latou po o se tasi e i ai se vaaiga faalelalolagi e uiga i le mataupu.

3. Vaai i le fesili lava lea e tasi po o se mataupu lautele i se vaaiga e faavavau. Mafaufau loloto i fesili e pei, “O a mea ua ou iloa e uiga i le Tama Faalelagi, Lana fuafuaga, ma ala e feagai ai ma Lana fanau?” ma “O a aoaoga o le talalelei e fesootai pe faamaninoina ai lenei manatu po o le mataupu?”