Lesona 165: Atamai i Aoaoga Faavae: Mauaina o Tali i A’u Fesili

Sailia o Faaaliga Faaletagata Lava Ia mo A’u Fesili

Mauaina o le Malamalama Faaleagaga, Vaega 1

E alofa le Tama Faalelagi i Lana fanau ma e finagalo ia tatou pei o Ia. A o tatou saili e aoao e uiga ia te Ia, ua folafola mai e le Tama Faalelagi e faaali mai upumoni i o tatou mafaufau ma loto e ala i le Agaga Paia (tagai i le Mataupu Faavae ma Feagaiga 8:2; Moronae 10:5). O lenei lesona e mafai ona fesoasoani i tagata aooga ia malamalama pe mafai faapefea ona latou maua le taitaiga ma faaaliga mai le Atua e ala i le Agaga Paia.

Gaoioiga E Ono Mafai Ona Aoao Ai

Ola i le faaleagaga

Mafaufau e amata le lesona i le tusia o se tagata fasilaau i luga o le laupapa e faatusa i se talavou. E mafai foi e tagata aooga ona kopi le tagata fasilaau lenei i totonu o a latou api o talaaga mo suesuega. Atonu e fiafia tagata aooga e faia se igoa mo le tagata fasilaau, faapea foi ma nisi o vaega faavae e pei o tausaga, mea e fiafia i ai, ma meaai e fiafia i ai.

A o tali mai tagata aooga i le fesili muamua o fesili nei, tusi a latou tali faataamilo i le tagata fasilaau i luga o le laupapa.

• O a ni mea e faafaigata ai mo tupulaga talavou ona ola i le faaleagaga i le lalolagi i nei aso?

• O le a se mea e mafai ona fesoasoani ia i tatou e faatoilalo ai nei lu’itau po o faatosinaga?

Sa faasoa mai e Peresitene Russell M. Nelson se tasi auala e mafai ai ona tatou sao faaleagaga mai luitau ma faatosinaga tatou te feagai:

O le maua pea o ala faasalalau faaagafesootai ma se taamilosaga 24 itula o talafou ua lofituina ai i tatou i savali e le muta. Afai e ao ona tatou maua se faamoemoe o le suesueina o le tele o manatu ma filosofia a tagata ia e osofaia le upumoni, e tatau ona tatou aoao e maua ia faaaliga. …

… I aso a sau, o le a le mafai ona ola ai faaleagaga e aunoa ma le taiala, taitaiga, faamafanafanaga, ma le faatosinaga faifaipea a le Agaga Paia.

O’u uso e ma tuafafine pele, ou te aioi atu ia te outou ia faateleina lo outou gafatia faaleagaga e maua ai faaaliga. (Russell M. Nelson, “Faaaliga mo le Ekalesia, Faaaliga mo o Tatou Olaga,” Liahona, Me 2018, 96)

• O a ni upu po o ni fasifuaitau mai lenei saunoaga sa faapitoa le aoga ia te oe? Aisea?

• Aisea e te manatu ai o le mauaina o faaaliga mai le Agaga Paia e taua mo i tatou e ola ai faaleagaga i lo tatou lalolagi?

Valaaulia tagata aooga e mafaufau loloto i o latou lava manaoga mo faaaliga. E mafai ona e valaaulia i latou e faamaumau i a latou api talaaga ni a latou fesili po o ni mafuaaga latou te manaomia ai faaaliga i le taimi nei i o latou olaga. Pe e mafai foi ona e fai atu i tagata aooga e faasoa mai nisi o a latou fesili po o luitau na latou feagai a o latou sailia faaaliga i le taimi ua tuanai.

Uuna’ia i latou a o latou suesue i le asō e vaavaai mo aoaoga ma valaaulia ia e mafai ona fesoasoani ia i latou e saunia ai e maua faaaliga mai le Atua mo o latou olaga.

Mauaina o le taitaiga ma faaaliga mai le Atua

Faitau le Mosaea 4:9 ma le Mataupu Faavae ma Feagaiga 38:1–3, e saili ai mo uiga e faatatau i le Atua ia e fesoasoani ai ia i tatou ina ia mana’o i Lana taitaiga.

• O a ni mea ua aoao mai e nei tusitusiga paia ia te oe e uiga i le Atua?

  Tuu atu i le toatele o tagata aooga se avanoa e tali ai le fesili talu ai. I le tele o tali e mafai ona tuuina mai e tagata aooga, atonu latou te ta’ua se upumoni e talitutusa ma lenei: Ua i ai i le Atua le poto uma ma silafia mea uma.

• E mafai faapefea e le iloaina o nei uiga o le Atua ona aafia ai lou manao mo Ia e taiala ma aoao oe?

Tusi le ulutala lenei i luga o le laupapa: E mafai faapefea ona ou maua tali mai le Atua?

Su’esu’e le parakalafa 1–3 o le vaega o le “Mauaina o le Malamalama Faaleagaga” i totonu o le Pepa Autu o le Atamai i Aoaoga Faavae (2023). Vase upu po o fasifuaitau o loo faamatala ai mea e mafai ona e faia e maua ai tali mai le Atua i a tatou fesili faaleagaga.

E faaopoopo atu i suesuega mai le Pepa Autu o le Atamai i Aoaoga Faavae, e mafai foi ona e valaaulia tagata aooga e suesue i tusitusiga paia mo aoaoga e faamatala ai mea e mafai ona tatou faia e maua ai tali mai le Atua. O faataitaiga o mau e mafai ona e valaaulia tagata aooga e suesue i ai e aofia ai le 2 Nifae 32:3–5; Moronae 10:4–5; Mataupu Faavae ma Feagaiga 9:7–9; 42:61.

• O le a se mea na e aoaoina e uiga i mea e mafai ona tatou faia e faateleina ai lo tatou tomai e maua ai tali i a tatou fesili mai le Atua?

  E mafai ona e valaaulia tagata aooga e tusi i le laupapa mea na latou mauaina.

  Nai lo le fai atu o le fesili lenei, e mafai ona e fai atu i ni tagata aooga eseese e filifili se tasi o upu po o fasifuaitau i luga o le laupapa e foliga mai e taua tele le faapitoa ia i latou. Ona mafai lea ona latou faamatala mai pe aisea latou te lagona ai o lena upu po o le fasifuaitau o se auala taua lea mo i tatou e sauni ai e maua tali i a tatou fesili.

• Aisea e te manatu ai o nei faatinoga o ni auala taua e saunia ai i tatou e maua faaaliga e ala i le Agaga Paia?

• O a aafiaga na oo mai ia te oe i le mauaina o faaaliga faaletagata lava ia? O a ni faatinoga na fesoasoani e saunia ai oe ina ia maua?

Fesoasoani i tagata aooga ina ia malamalama e le tatau ona latou faasoaina atu soo se mea e patino tele pe paia. E mafai foi ona e mafaufau e faasoa atu se aafiaga mai i lou lava olaga.

Faaaogaina i lou olaga

Valaaulia tagata aooga e mafaufau ai i mea ua latou aoaoina i lenei aso e ono fesoasoani ai ia latou fesili o i ai. Ona faasoa atu lea o mea nei e fesoasoani ai i tagata aooga e faaaoga aoaoga sa latou maua i lenei aso.

Manatua le fautuaga mai ia Peresitene Nelson sa e suesueina i le amataga o le lesona: “Ou te aioi atu ia te outou ia faateleina lou malosi faaleagaga e maua ai faaaliga” (“Faaaliga mo le Ekalesia, Faaaliga mo o Tatou Olaga,” 96).

Mafaufau i mea ua e aoaoina ma lagonaina i le asō e mafai ona fesoasoani ia e mulimuli ai i lea fautuaga. Tusi i lau api talaaga mo suesuega mea o le a e faia e faateleina ai lou tomai e maua ai faaaliga faaletagata lava ia e ala i le Agaga Paia.

A uma ona tusitusi tagata aooga i a latou api talaaga mo suesuega, mafaufau e fai atu i ni nai volenitia e faasoa mai a latou fuafuaga i le vasega.

Afai e lava se taimi, atonu e te manao e faailoa atu i tagata aooga o lesona i le lumanai o le a latou aoao ai mataupu faavae e tolu o le mauaina o le malamalama faaleagaga lea o le a fesoasoani foi ia i latou e maua ai tali i a latou fesili. Atonu ua i ai ni au tagata aooga e iloa mataupu faavae e tolu o le mauaina o le malamalama faaleagaga. Mafaufau e fai atu ia i latou e faasoa mai pe afai latou te iloa pe tuu atu i tagata aooga e su’e i totonu o le Pepa Autu o le Atamai i Aoaoga Faavae. Faamautinoa atu i ai o le a latou maua avanoa i le seminare e faateleina ai lo latou tomai e maua ai faaaliga.

Punaoa Faaopoopo

Aisea e le mafai ai ona ola i le faaleagaga e aunoa ma faaaliga faaletagata lava ia?

Na faasoa mai e Elder Jeffrey R. Holland o le Korama a Aposetolo e Toasefululua le lapata’iga lenei e uiga ia Satani:

O Satani o se tagata moni ua naunau e faaumatia outou.

E faavavau lava lona tetee i le alofa o le Atua, le Togiola a Iesu Keriso, ma le galuega o le filemu ma le faaolataga. O le a ia faasagatau atu i nei mea i soo se taimi ma soo se mea na te mafaia. … Ua naunau o ia e ave i lalo faatasi ma ia le toatele o isi tagata e pei ona ia mafaia. (Jeffrey R. Holland, “Ua Tauto i Tatou Uma,” Liahona, Nov. 2011, 45, 44)

O le a se isi mea e mafai ona ou faia e saunia ai a’u ina ia maua faaaliga faaletagata?

Na fautua mai Peresitene Russell M. Nelson:

Punouai i tatalo faatauanau ma lotomaualalo i aso taitasi. Tausia lelei oe lava ia i afioga a perofeta anamua ma aso nei. Ole atu i le Alii e aoao oe i le auala e faalogo lelei ai ia te Ia. Faaalu atili se taimi i totonu o le malumalu ma i galuega o talafaasolopito o aiga. (Russell M. Nelson, “Filifiliga mo le Faavavau” [faigalotu i le lalolagi atoa mo le autalavou matutua, 15 Me, 2022], ChurchofJesusChrist.org)

Na aoao mai Elder David A. Bednar o le Korama a Aposetolo e Toasefululua:

Talu ai e musumusu lemu mai lava ma le lē gaoiā le Agaga, e faigofie ona malamalama i le mafuaaga e tatau ai ona tatou aloese mai faasalalauga e lē talafeagai, ponokalafi, ma amioga ma mea faatauma’oi ua fai ma vaisu. O nei meafaigaluega a le fili e mafai ona faaitiitia ai ma i’u ai lava ina faatamaia lo tatou gafatia e iloa ai ma tali atu i feau maaleale mai le Atua, ia e auina mai e ala i le mana o le Agaga Paia. (David A. Bednar, “O Le Agaga o Faaaliga,” Liahona, Me 2011, 88)

Aisea e le vave oo mai ai faaaliga faaletagata lava ia?

Sa ta’ua e Elder W. Mark Bassett o le Fitugafulu:

E le mafai ona tatou … faamalosia le faaali mai ia i tatou o mealilo a le Atua. Nai lo lena, ua na o Lona finagalo ma e ala i le mana o le Agaga Paia o le a tatala mai ai mealilo a le Atua ia i tatou. …

I lenei vaitau o aso nei, ua tatou faamoemoe e mafai ma e tatau lava ona vave ona maua le malamalama; pe a le faigofie le iloaina po o le mauaina o faamatalaga, e masani lava ona le amanaiaina pe le talitonuina. Ona o le anoanoai o faamatalaga, o nisi ua tuu atu ma le le mafaufauina le talisapaia i punavai o loo maua ae le mailoa ni afuaga nai lo o le faalagolago i mamanu faatulagaina a le Alii mo le mauaina o faaaliga faaletagata lava ia. (W. Mark Bassett, “Mo Lo Tatou Alualu i Luma ma le Aoaoina Faaleagaga,” Liahona, Nov. 2016, 53)

E faapefea ona ou iloa pe o ou mauaina faaaliga pe o o’u lava manatu?

Na lapata’i mai Elder David A. Bednar o le Korama o Aposetolo e Toasefululua:

Ou te manatu ua tatou soona faafaigata lenei mea. Ou te manatu ua tatou soona mafaufau i ai. Ua aoao mai Moronae o mea lelei uma e afua mai ia Keriso [tagai i le Moronae 7:13, 16]. Afai la e i ai sou manatu e fai se mea lelei, ua faaosoina e le Agaga Paia. … Afai e valaau mai ma faaosoosoina ai ia faia mea lelei, e sau mai ia Keriso, ma e tatau ona tatou faia. (David A. Bednar, “ (Talanoaga Faafesagai ma Elder ma Sister Bednar) ” [faasalalauga a le autalavou i le lalolagi atoa, 12 Me, 2015], FacetoFace.ChurchofJesusChrist.org)

Gaoioiga Faaopoopo e Aoao Ai

Malamalama ma faaaliga

Sa faamatalaina e Elder David A. Bednar o le Korama a Aposetolo e Toasefululua le faateleina o le malamalama e pei o le mauaina o faaaliga mai le Atua (tagai “O Le Agaga o Faaaliga,” Liahona, Me 2011, 87). Mafaufau e faaaoga le gaoioiga lenei e fesoasoani ai i tagata aooga ia malamalama atili i lenei mataupu.

• Tape moli i le potuaoga, ona toe ki lea.

• Valaaulia se tagata a’oga e faamatala mai pe faapefea ona faateleina le malamalama a o oso ae le la. (Pe mafaufau e faaaoga se moli e i ai le ki fesuisuia’i e faaalia ai pe faapefea ona mafai e le malamalama ona faateleina le malosi.)

• E mafai faapefea ona pei nei faataitaiga taitasi o le mauaina o faaaliga mai le Atua?

E mafai foi ona e faaalia le vitio “Patterns of Light: Spirit of Revelation” (3:04).

E faape’i le mauaina o faaaliga mai le Agaga Paia?

Atonu e te manao e talanoaina ni auala eseese e mafai ona fesootai mai ai le Agaga Paia ia i tatou. Mafaufau e valaaulia tagata aooga e faitau mau nei ma lisi mea ua latou maua: Mataupu Faavae ma Feagaiga 8:2–3; 11:12–13; Kalatia 5:22–23; 1 Nifae 17:45.

Na aoao mai Elder Ronald A. Rasband o le Korama a Aposetolo e Toasefululua:

“O lo’u aafiaga e tele lava ina fesootai mai le Agaga o se lagona. E te lagonaina i upu e te masani ai, e i ai se uiga ia te oe, lea e uunaia oe. … E tautala mai le Agaga i upu lea tatou te lagonaina. O nei lagona e mālū, o se uunaiga e faatino, ia faia se mea, ia fai atu se upu, tali atu ai i se auala faapitoa. Afai tatou te faasamasamanoa po o ua faamalieina i la tatou tapuaiga, aveese atu ma matafiese e ala i sailiga o mea faalelalolagi, o le a tatou mauaina i tatou lava ua faaitiitia lo tatou gafatia e lagona ai” (Ronald A. Rasband, “Tuu Atu i le Agaga Paia e Taitai,” Liahona, Me 2017, 94).

• O a nisi auala na e lagonaina ai le aafiaga a le Agaga Paia?

• E mafai faapefea ona avea le iloaina o le taimi e te lagonaina ai le Agaga Paia o se faamanuiaga i lou olaga?

Afai e maua, matamata le vitio “ Feeling the Holy Ghost ” o loo maua i le ChurchofJesusChrist.org e aoao atili ai le ala e mafai ona talanoa mai ai le Agaga Paia.

Vitio: “Light Switch”

Ina ia fesoasoani i tagata aooga e mafaufau pe faapefea e se faatinoga itiiti o le faatuatua ona faateleina lo latou tomai e maua ai faaaliga, faaali le vitio “ Light Switch .” E mafai ona e faasoa atu lenei vitio pe a uma ona faasoa mai e tagata aooga ni aafiaga e fesoasoani ai ia i latou e mafaufau po o a faatinoga na latou faia na pei o le kiina o se ki o se moli i faaaliga.