“Leksiyon 165—Pagtinguha og Personal nga Pagpadayag alang sa Akong mga Pangutana,” Manwal sa Magtutudlo sa Seminary sa Doktrina ug mga Pakigsaad (2025)
“Pagtinguha og Personal nga Pagpadayag alang sa Akong mga Pangutana,” Manwal sa Magtutudlo sa Seminary sa Doktrina ug mga Pakigsaad
Leksiyon 165: Doktrinal nga Kahanas: Pagkaplag og mga Tubag sa Akong mga Pangutana
Pagtinguha og Personal nga Pagpadayag alang sa Akong mga Pangutana
Pag-angkon og Espirituhanong Kahibalo, Bahin 1
Ang Langitnong Amahan naghigugma sa Iyang mga anak ug gusto nga kita mahisama Kaniya. Samtang kita nagtinguha sa pagkat-on mahitungod Kaniya, ang Langitnong Amahan misaad sa pagpadayag sa kamatuoran diha sa atong mga hunahuna ug mga kasingkasing pinaagi sa Espiritu Santo (tan-awa sa Doktrina ug mga Pakigsaad 8:2; Moroni 10:5). Kini nga leksiyon makatabang sa mga estudyante nga makasabot kon sa unsang paagi sila makadawat og giya ug pagpadayag gikan sa Dios pinaagi sa Espiritu Santo.
Mga Posibleng Kalihokan sa Pagkat-on
Espirituhanong pagsugakod
Ikonsiderar ang pagsugod sa leksiyon pinaagi sa pagdrowing og stick nga porma og tawo [stick figure] diha sa pisara nga nagrepresentar sa usa ka tin-edyer. Mahimo usab nga kopyahon sa mga estudyante kini nga stick nga porma og tawo [stick figure] diha sa ilang mga journal sa pagtuon. Mahimong malingaw ang mga estudyante sa pagmugna og usa ka ngalan alang sa stick nga porma og tawo [stick figure], ingon man ang pipila ka nag-unang mga aspeto sama sa edad, mga kalingawan, ug mga paboritong pagkaon.
Samtang tubagon sa mga estudyante ang una sa mosunod nga mga pangutana, isulat ang ilang mga tubag sa palibot sa stick nga porma og tawo [stick figure] diha sa pisara.
-
Unsay makapalisod sa mga tin-edyer nga espirituhanong makasugakod sa kalibotan karon?
-
Unsa ang makatabang kanato sa pagbuntog niini nga mga hagit o mga impluwensiya?
Si Presidente Russell M. Nelson mipakigbahin og usa ka paagi nga kita espirituhanong makasugakod sa mga hagit ug mga impluwensiya nga atong giatubang:
Ang padayon nga paggamit sa sosyal medya ug ang 24 oras nga mga balita mohan-ok kanato og walay hunong nga mga mensahe. Kon gusto kitang makaangkon og paglaom nga makaayag sa daghang mga opinyon ug sa mga pilosopiya sa katawhan nga nag-atake sa kamatuoran, kinahanglan makakat-on kita sa pagdawat og pagpadayag. …
… Sa umaabot nga mga adlaw, dili na posible ang espirituhanong pagsugakod kon wala ang giya, direksiyon, ug makahupay nga impluwensiya sa Espiritu Santo.
Akong minahal nga mga kaigsoonan, mohangyo ko kaninyo sa pagpalambo sa inyong espirituhanong kapasidad sa pagdawat og pagpadayag. (Russell M. Nelson, “Pagpadayag alang sa Simbahan, Pagpadayag alang sa Atong mga Kinabuhi,” Liahona, Mayo 2018, 96)
-
Unsa nga mga pulong o mga hugpong sa mga pulong gikan niini nga pamahayag ang labing makahuloganon diha kanimo? Ngano man?
-
Ngano sa imong hunahuna nga ang pagdawat og pagpadayag gikan sa Espiritu Santo mahinungdanon alang kanato aron espirituhanong makasugakod dinhi sa atong kalibotan?
Dapita ang mga estudyante sa pagpamalandong sa ilang kaugalingong panginahanglan alang sa pagpadayag. Mahimo nimo silang dapiton sa pagrekord diha sa ilang journal sa mga pangutana nga aduna sila o sa mga rason nga nagkinahanglan sila og pagpadayag karon sa ilang mga kinabuhi. O mahimo gani nimong tugotan ang mga estudyante nga ipakigbahin ang pipila sa ilang mga pangutana o mga hagit nga ilang giatubang samtang nagtinguha sila og pagpadayag kaniadto.
Dasiga sila samtang nagtuon sila karon sa pagpangita sa mga pagtulun-an ug mga pagdapit nga makatabang kanila sa pagpangandam sa pagdawat og pagpadayag gikan sa Dios alang sa ilang mga kinabuhi.
Pagdawat og giya ug pagpadayag gikan sa Dios
Basaha ang Mosiah 4:9 ug Doktrina ug mga Pakigsaad 38:1–3, mangita og mga kinaiya sa Dios nga makatabang kanato sa pagtinguha sa Iyang paggiya.
-
Unsa ang gitudlo niini nga mga kasulatan diha kanimo mahitungod sa Dios?
Hatagi ang daghang mga estudyante og kahigayonan sa pagtubag sa miaging pangutana. Taliwala sa daghang mga tubag nga mahatag sa mga estudyante, mahimo silang maghisgot og kamatuoran nga susama sa mosunod: Ang Dios adunay tanang kaalam ug nahibalo sa tanang butang.
-
Sa unsang paagi nga ang pagkahibalo niini nga mga kinaiya sa Dios makaapekto sa imong tinguha nga Siya mogiya ug motudlo kanimo?
Isulat diha sa pisara ang mosunod nga ulohan: Unsaon nako pagdawat og mga tubag gikan sa Dios?
Tun-i ang mga parapo 1–3 sa “Pag-angkon og Espirituhanong Kahibalo” nga seksiyon sa Mahinungdanon nga Dokumento sa Doktrinal nga Kahanas (2023). Badlisi ang mga pulong o mga hugpong sa mga pulong nga naghulagway sa unsay imong mahimo aron makadawat og mga tubag gikan sa Dios sa atong espirituhanong mga pangutana.
Agi og dugang sa pagtuon gikan sa Mahinungdanon nga Dokumento sa Doktrinal nga Kahanas, mahimo usab nimong dapiton ang mga estudyante sa pagsiksik sa mga kasulatan alang sa mga pagtulun-an nga naghulagway unsay atong mahimo aron makadawat og mga tubag gikan sa Dios. Mga ehemplo sa mga kasulatan nga mahimo nimong dapiton ang mga estudyante sa pagtuon naglakip sa 2 Nephi 32:3–5; Moroni 10:4–5; Doktrina ug mga Pakigsaad 9:7–9; 42:61.
-
Unsa ang imong nakat-onan mahitungod sa unsay atong mahimo aron madugangan ang atong abilidad sa pagdawat og mga tubag gikan sa Dios sa atong mga pangutana?
Mahimo nimong dapiton ang mga estudyante sa paglista diha sa pisara kon unsay ilang nakaplagan.
Imbes nga ipangutana ang mosunod nga pangutana, mahimo nimong hangyoon ang nagkalainlaing mga estudyante sa pagpili og usa sa mga pulong o mga hugpong sa mga pulong diha sa pisara nga daw mahinungdanon kaayo kanila. Mahimo dayon nila nga ipasabot kon nganong gibati nila nga kana nga pulong o hugpong sa mga pulong usa ka importante nga paagi alang kanato sa pagpangandam sa pagdawat sa mga tubag sa atong mga pangutana.
-
Ngano sa imong hunahuna nga kini nga mga binuhatan importante nga mga paagi sa pag-andam kanato sa pagdawat og pagpadayag pinaagi sa Espiritu Santo?
-
Unsa nga mga kasinatian ang imong nasinati sa pagdawat og personal nga pagpadayag? Unsa nga mga binuhatan ang nakatabang kanimo sa pag-andam sa pagdawat niini?
Tabangi ang mga estudyante nga makasabot nga dili sila kinahanglang mopakigbahin og bisan unsa nga personal kaayo o sagrado. Mahimo usab nimong ikonsiderar ang pagpakigbahin og usa ka kasinatian gikan sa imong kaugalingong kinabuhi.
Paggamit niini diha sa imong kinabuhi
Dapita ang mga estudyante sa paghunahuna mahitungod sa unsay ilang nakat-onan karon nga makatabang kanila sa ilang mga pangutana. Dayon ipakigbahin ang mosunod aron matabangan ang mga estudyante sa paggamit sa mga pagtulun-an nga ilang nakat-onan karon.
Hinumdomi ang tambag gikan ni Presidente Nelson nga imong gitun-an sa sinugdanan sa leksiyon: “Mohangyo ko kaninyo sa pagpalambo sa inyong espirituhanong kapasidad sa pagdawat og pagpadayag” (“Pagpadayag alang sa Simbahan, Pagpadayag alang sa Atong mga Kinabuhi,” 96).
Ikonsiderar unsay imong nakat-onan ug gibati karon nga makatabang nimo sa pagsunod niini nga tambag. Isulat diha sa imong journal sa pagtuon kon unsay imong buhaton aron madugangan ang imong abilidad sa pagdawat og personal nga pagpadayag pinaagi sa Espiritu Santo.
Kon mahuman na ang mga estudyante sa pagsulat diha sa ilang mga journal sa pagtuon, ikonsiderar ang paghangyo og pipila ka mga boluntaryo sa pagpakigbahin sa ilang mga plano ngadto sa klase.
Kon adunay igong oras, mahimo nimong ipahibalo sa mga estudyante nga sa umaabot nga mga leksiyon ilang makat-onan ang mahitungod sa tulo ka mga baroganan sa pag-angkon og espirituhanong kahibalo nga makatabang usab kanila nga makadawat og mga tubag sa ilang mga pangutana. Mahimong aduna ka nay pipila ka mga estudyante nga nakahibalo sa tulo ka mga baroganan sa pag-angkon og espirituhanong kahibalo. Ikonsiderar ang paghangyo kanila sa pagpakigbahin kon nakahibalo ba sila o ipapangita kini sa mga estudyante diha sa Mahinungdanon nga Dokumento sa Doktrinal nga Kahanas. Pasaligi sila nga aduna silay mga kahigayonan sa seminary aron madugangan ang ilang abilidad sa pagdawat og pagpadayag.