Leksiyon 164: Doktrinal nga Kahanas: Pagpangita og mga Tubag sa Akong mga Pangutana

Pagpalig-on sa Imong Espirituhanong Pundasyon

Pasiuna sa Doktrinal nga Kahanas

Isip mga disipulo ni Jesukristo sa ulahing mga adlaw, nag-atubang kita og daghang espirituhanon nga mga peligro ug mga kalisdanan. Aron lig-ong makabarog sa mga impluwensiya sa kaaway, kinahanglan natong tukoron ang atong kinabuhi diha sa bugtong kasaligan nga pundasyon, si Jesukristo. Kini nga leksiyon motabang sa mga estudyante nga makasabot kon sa unsang paagi ang doktrinal nga kahanas makapanalangin sa ilang kinabuhi ug makatabang nila sa pagtukod sa ilang espirituhanon nga pundasyon diha kang Jesukristo.

Posibleng mga Kalihokan sa Pagkat-on

Kini nga leksiyon mahimong gamiton sa pagpaila sa mga estudyante ngadto sa mga katuyoan sa doktrinal nga kahanas. Magamit usab kini sa pagpahinumdom sa mga estudyante nga pamilyar sa doktrinal nga kahanas bahin sa bili niining importanteng bahin sa kasinatian sa seminary. Pwede nimong itudlo kini nga leksiyon sa sinugdanan sa bag-ong tuig sa kalendaryo, pero pwede usab nimo kining itudlo pag-usab kon nagtudlo ka og bag-ong grupo sa mga estudyante.

Ang “Pagbansay alang sa Doktrinal nga Kahanas” para sa mga magtutudlo mahimong makatabang nga kapanguhaan aron masabtan kon unsaon pagpatuman sa doktrinal nga kahanas diha sa imong pagtudlo. Kini nga pagbansay mahimong makita sa ChurchofJesusChrist.org.

Atong espirituhanon nga pundasyon

Tabangi ang mga estudyante nga masabtan ang kaimportante sa pagtukod sa ilang espirituhanon nga pundasyon diha kang Jesukristo. Pwede tingali nimo kining himoon pinaagi sa paghisgot sa pag-ayo sa Templo sa Salt Lake, nga hatagan og gibug-aton ang trabaho nga gihimo sa pagpalig-on sa pundasyon batok sa mga linog ug uban pang posibleng mga kakuyaw. Pwede nimong ipakita ang mga hulagway. Pwede usab nimong ipasalida ang “Presidente Nelson—Pundasyon sa Templo” (2:03).

• Ngano sa imong hunahuna nga dako kaayong panahon ug mga kapanguhaan ang gigahin sa pag-ayo sa Salt Lake Temple ug sa pagpalambo sa pundasyon niini?

• Sa unsang paagi nato ikatandi ang gihimo sa templo sa atong personal nga kinabuhi?

Basaha ang Helaman 5:12, nga pangitaon ang mga kamatuoran ug mga baroganan nga makatabang nimo nga mas masabtan ang panginahanglan sa espirituhanon nga pundasyon nga gitukod diha kang Jesukristo.

• Unsay nakatabang niini nga mga bersikulo nga imong masabtan kon nganong kinahanglan nato ang kalig-on nga gikan kang Jesukristo?

• Unsa ang kamatuoran nga imong nakat-onan gikan niini nga bersikulo mahitungod sa unsay mahitabo kon isentro nato ang atong kinabuhi diha sa Manluluwas?

  Pwede nimong hangyoon ang mga estudyante nga isulat diha sa pisara ang unsay ilang nakat-onan sa usa lang ka pamahayag. Mahimo dayon nimo silang hatagan og higayon sa pagpasabot sa ilang mga tubag. Mahimong mosulti sila sama sa kon tukoron nato ang atong espirituhanon nga pundasyon diha kang Jesukristo, dili kita mapukan.

• Unsa sa imong hunahuna ang gipasabot sa pagtukod sa atong espirituhanon nga pundasyon diha kang Jesukristo?

Pwedeng ipakigbahin sa mga estudyante ang mga ideya nga sama sa pagsentro sa atong kinabuhi diha kang Jesukristo ug sa Iyang mga pagtulun-an, pagsunod sa Iyang ehemplo, ug regular nga paghinulsol.

Gihulagway ni Presidente Russell M. Nelson ang mga rason kon nganong kinahanglan natong tukoron ang atong pundasyon diha kang Jesukristo:

Panahon na karon nga kita moimplementar sa dili ordinaryo nga mga paagi—tingali mga paagi nga wala nato mahimo kaniadto—sa pagpalig-on sa atong personal nga espirituwal nga mga pundasyon. Ang dili ordinaryo nga mga panahon nagkinahanglan og dili ordinaryo nga mga paagi.

Minahal nako nga mga kaigsoonan, kini mao ang ulahing mga adlaw. Aron kamo ug ako makasugakod sa umaabot nga mga katalagman ug mga kalisod, kinahanglan nga kita adunay lig-on nga espirituwal nga pundasyon nga natukod diha sa lig-on nga sukaranan sa atong Manunubos, nga si Jesukristo. …

Ang Ginoo namahayag nga bisan sa dili ordinaryo nga mga hagit, kadtong kinsa motukod sa ilang mga pundasyon diha kang Jesukristo, ug nakat-on unsaon sa paggamit sa Iyang gahom, dili kinahanglan nga magpadala sa talagsa nga mga kabalaka niining panahona. (Russell M. Nelson, “Ang Templo ug ang Inyong Espirituwal nga Pundasyon,” Liahona, Nob. 2021, 93)

• Unsay matabang niini nga pamahayag nga imong masabtan bahin sa imong panginahanglan sa lig-on nga espirituhanon nga pundasyon?

Ikonsiderar ang pagdapit sa mga estudyante nga hunahunaon kon unsay ilang nasinati sa kinabuhi nga makatabang nila nga mailhan ang panginahanglan sa pagtukod sa ilang pundasyon diha sa Manluluwas. Dayon dapita sila sa pagsusi sa kalig-on sa ilang espirituhanon nga pundasyon. Usa ka paagi sa paghimo niini mao ang pagpakita sa mosunod nga pagsukod sa kaugalingon, nga may kalabotan sa lainlaing resulta sa doktrinal nga kahanas nga makat-onan sa mga estudyante niini nga leksiyon. Pwedeng susihon sa hilom sa mga estudyante ang ilang kaugalingon o isulat ang ilang mga tubag diha sa ilang mga journal sa pagtuon.

Para sa matag usa sa mosunod nga mga pamahayag, i-rate ang imong kaugalingon sa sukdanan nga 1 (supak kaayo) hangtod 5 (uyon kaayo).

1. Mosalig ko kang Jesukristo ug sa Iyang mga pagtulun-an dihang matental o maimpluwensiyahan ko sa kaaway.

2. Nahibalo ko kon unsaon pagdawat sa mga tubag sa akong doktrinal, personal, sosyal, o historikal nga mga pangutana.

3. Makapasabot ko sa doktrina ni Jesukristo ngadto sa uban.

4. Makatultol ko sa importanteng mga tudling sa kasulatan nga naglangkob sa doktrina ni Kristo.

5. Mosalig ko sa ehemplo ug mga pagtulun-an ni Jesukristo nga motabang nako sa paghimo og inadlawng mga pagpili.

Doktrinal nga kahanas

Ipasabot nga usa sa mga paagi nga matukod sa mga estudyante ang ilang pundasyon kang Jesukristo pinaagi sa ilang kasinatian sa seminary mao ang pinaagi sa doktrinal nga kahanas. Kon naa kay mga estudyante nga nakaapil na kaniadto sa seminary, ikonsiderar ang paghangyo nila nga ipasabot kon unsay ilang nahibaloan bahin sa doktrinal nga kahanas. Pwede usab nimong ipaila sa mga estudyante ang doktrinal nga kahanas pinaagi sa pagpasalida sa bidyo nga “Unsa ang Doktrinal nga Kahanas?” (3:56), nga anaa sa ChurchofJesusChrist.org.

Basaha ang seksiyon nga “Pasiuna sa Doktrinal nga Kahanas” diha sa Mahinungdanon nga Dokumento sa Doktrinal nga Kahanas (2023). Hunahunaa kon sa unsang paagi ang pag-apil sa doktrinal nga kahanas makatabang nimo sa pagtukod og lig-ong pundasyon diha kang Jesukristo.

Pwede nimong hangyoon ang mga estudyante nga basahon og dungan diha sa gagmayng grupo. Ang usa ka estudyante mahimong magdumala sa pag-asayn sa mga estudyante diha sa grupo sa pagbasa sa lainlaing mga parapo, ang uban iasayn sa paglista sa importanteng mga nakaplagan, ug ang uban maoy moreport sa klase sa mga nakaplagan sa grupo.

• Unsa ang duha ka nag-unang resulta sa doktrinal nga kahanas?

  Seguroa nga nasabtan sa mga estudyante nga kini nga mga resulta mao ang (1) pagkat-on ug paggamit sa mga baroganan alang sa pag-angkon og espirituhanong kahibalo, ug (2) pagsug-ulo sa mga tudling sa kasulatan sa doktrinal nga kahanas ug ang doktrina sa ebanghelyo ni Jesukristo nga ilang gitudlo.

  Makatabang tingali ang pagpasabot nga ang mga estudyante moapil sa mga leksiyon sa tibuok tuig nga nagtutok niini nga mga resulta. Makabaton sila og mga kahigayonan sa pagpasabot sa doktrina sa kaugalingon nilang mga pulong, pagsag-ulo og mahinungdanong hugpong sa mga pulong sa kasulatan sa doktrinal nga kahanas, ug paggamit sa mga baroganan sa pag-angkon og espirituhanong kahibalo aron magamit ang doktrina sa tinuod nga kinabuhi nga mga sitwasyon.

• Sa unsang paagi sa imong hunahuna makatabang nimo ang doktrinal nga kahanas sa pagtukod sa imong pundasyon diha kang Jesukristo?

• Sa unsang paagi kaha ang pag-apil sa doktrinal nga kahanas makapanalipod nimo sa umaabot nga mga hagit ug sa mga pag-atake sa kaaway?

Tabangi ang mga estudyante nga masabtan nga ang paningkamot sa aktibong pag-apil sa doktrinal nga kahanas makatabang nila sa pagdangop kang Jesukristo nga mas masaligon. Ikonsiderar ang paghangyo sa mga estudyante nga kanhing miapil sa doktrinal nga kahanas nga ipakigbahin kon sa unsang paagi kini nakapanalangin sa ilang kinabuhi. Ipamatuod nga samtang sila mosalig kang Jesukristo, makasugakod sila sa mga hagit nga ilang giatubang karon ug makapangandam alang niadtong moabot nga mga kalisdanan.

Dugang nga mga Kapanguhaan

Unsay akong makat-onan gikan sa pagtukod sa pundasyon sa templo?

Si Elder Donald L. Hallstrom sa Seventy mitudlo:

Gamit ang templo isip usa ka sambingay, maghisgot ko karong gabhiona bahin sa mga pundasyon. Uban sa disenyo ug pagtukod sa kada templo, dako nga trabaho ang angayng himoon sa usa ka butang nga dili daling makita dihang mahuman na ang proyekto—ang pundasyon. Pananglitan, … ang Templo Philadelphia Pennsylvania, nga … [d]ihang mahuman, … maoy 82 ka pye ang gitas-on sa atop ug gipatas-an og 195 ka pye sa tumoy sa anghel nga Moroni. Ingon nga … dako ug halangdon kini nga estraktura, mapailalom gihapon kini sa makagun-ob nga hangin ug makaguba nga tubig sa ilawom sa yuta. Kining delikado nga mga kahimtang, kon dili masusi, mahimong makadaot ug gani makahugno niining maanindot nga edipisyo.

Nahibalo nga kining mga pwersa dili kapugngan nga moataki sa templo, ang mga inhenyero midesinyo, ug ang mga kontraktor mikubkob, og lungag nga 32 ka pye ang gilawmon ubos sa tibuok nga tiilan sa istruktura. Ang lungag gibutangan og karaang granite sa Pennsylvania aron makahatag og dili matarog nga pundasyon sa pagatukoron niini. Ang konkreto nga mga footing ug mga pundasyon ipatapot dayon ngadto sa gihanig nga granite gamit ang mga pang-angkla sa bato aron makasugakod bisan sa grabe nga hangin ug kusog nga tubig sa ilawom sa yuta. Ang mga angkla gibarinahan og 50 ngadto sa 175 ka pye ngadto sa granite ug giposisyon sa 250,000 pounds kada square inch. Ang mga angkla gibutang nga 15 ka pye ang gintang sa magkalahing direksyon.

Mihatag ko og ingon ka detalyado nga impormasyon aron motudlo niini nga punto: Dili sama sa estruktura sa gambalay (nga sa bisan unsa nga kahulugan temporaryo), sa pagtukod sa atong walay kataposan (ug gilaoman, mahangtoron) nga mga kinabuhi, usahay mohatag kita og gamay ra gayod nga pagtagad sa paghan-ay ug sa pagtukod sa atong mga pundasyon. Tungod niini, kita makit-an dayon, ug daling maigo, sa makadaot nga mga pwersa. (Donald L. Hallstrom, “How Firm a Foundation” [Church Educational System devotional for young adults, Nov. 2, 2014], broadcasts.ChurchofJesusChrist.org)

Unsa ang katuyoan sa doktrinal nga kahanas?

Si Presidente M. Russell Ballard sa Korum sa Napulog Duha ka Apostoles miingon sa mosunod samtang namulong sa mga magtutudlo sa seminary ug institute:

Ang Board of Education bag-o lang miaprobar og inisyatibo sa seminary nga gitawag og Doktrinal nga Kahanas. … Kining bag-ong inisyatibo magtutok sa pagpalambo ug pagpalig-on sa pagtuo sa atong mga estudyante diha kang Jesukristo ug pagdugang sa ilang abilidad nga masunod ug magamit ang ebanghelyo sa ilang kinabuhi. Pinaagi sa paggamit sa mga kasulatan ug sa pulong sa mga propeta, makat-onan nila unsaon sa paglihok uban sa pagtuo kang Kristo sa pag-angkon og espirituhanon nga kahibalo ug panabot sa Iyang ebanghelyo. Ug may mga oportunidad sila sa pagkat-on unsaon sa paggamit sa doktrina ni Kristo ug mga baroganan sa ebanghelyo diha sa mga pangutana ug mga hagit nga ilang madungog ug makita kada adlaw sa ilang mga higala ug sa social media.

Kini nga inisyatibo dinasig ug tukma sa panahon. Duna kini talagsaong impluwensya sa atong kabatan-onan. (M. Russell Ballard, “The Opportunities and Responsibilities of CES Teachers in the 21st Century” [usa ka gabii kauban sa General Authority, Peb. 26, 2016], broadcasts.ChurchofJesusChrist.org)

Dugang nga mga Kalihokan sa Pagkat-on

Kalihokan sa doktrinal nga kahanas sa pagmarka sa kasulatan

Paggamit og makalingaw nga kalihokan aron tabangan ang mga estudyante nga markahan ang mga tudling sa kasulatan sa doktrinal nga kahanas. Dapita sila nga tan-awon ang “Mga Tudling sa Kasulatan sa Doktrinal nga Kahanas ug Mahinungdanong Hugpong sa mga Pulong sa Kasulatan sigon sa Kurso” diha sa Mahinungdanon nga Dokumento sa Doktrinal nga Kahanas (2023). Pwedeng motapad ang mga estudyante sa usa ka pares samtang ilang markahan ang mga tudling, dayon ipakigbahin ang ilang mga tubag sa usa ka pangutana nga makatabang sa mga estudyante nga mas mailhan ang usag usa. Dayon pwedeng magbaylo og pares ang mga estudyante ug usbon kini nga proseso hangtod nga namarkahan na ang gitinguhang gidaghanon sa mga tudling.

Pagmemorya og mga kasulatan

Pwede nimong dapiton ang mga estudyante nga tan-awon ang “Mga Tudling sa Kasulatan sa Doktrinal nga Kahanas ug Mahinungdanong Hugpong sa mga Pulong sa Kasulatan sigon sa Kurso” diha sa Mahinungdanon nga Dokumento sa Doktrinal nga Kahanas (2023). Ipasabot nga dapiton ang mga estudyante nga tun-an kini nga mga tudling aron mahibaloan ang doktrina ug hatagan sila og kahigayonan nga praktisan ang pagpasabot sa unsay ilang nakat-onan. Sultihi ang mga estudyante nga hatagan sila og mga kahigayonan nga memoryahon ang importanteng mga bahin sa mga bersikulo nga anaa sa mahinungdanong hugpong sa mga pulong sa kasulatan.

Dapita ang mga estudyante sa paghunahuna sa mga panahon dihang nahibaloan nila ang importanteng mga kasulatan ug kon unsay ilang gitudlo importate. Pangutan-a ang mga estudyante kon naa ba silay mga kasinatian sa paghinumdom ug pagpakigbahin sa mga kasulatan ngadto sa uban.

App sa Doktrinal nga Kahanas

Tabangi ang mga estudyante nga i-download ang app sa Doktrinal nga Kahanas sa mobile device. Gamita ang oras sa klase aron tabangan ang mga estudyante nga mahimong pamilyar sa app ug magbuhat sa pipila sa mga kalihokan. Awhaga ang mga estudyante sa paggamit sa app sa gawas sa klase.