Leksiyon 168—Modangop ngadto sa Balaanong Gitudlo nga mga Tinubdan aron Matabangan sa Pagpangita og mga Tubag

Modangop ngadto sa Balaanong Gitudlo nga mga Tinubdan aron Matabangan sa Pagpangita og mga Tubag

Pag-angkon og Espirituhanong Kahibalo, Bahin 4

Usa sa mga katuyoan sa doktrinal nga kahanas mao ang pagtabang sa mga estudyante nga makat-on ug magamit ang mga baroganan sa pag-angkon og espirituhanong kahibalo. Kini nga leksiyon makatabang sa mga estudyante nga makasabot sa kamahinungdanon sa pagpangita sa kamatuoran gikan sa mga tinubdan nga mahigugmaong gihatag sa Langitnong Amahan ug ni Jesukristo.

Mga Posibleng Kalihokan sa Pagkat-on

Kabuhong sa impormasyon

Ikonsiderar ang pagdala og usa ka tasa sa tubig aron ipakita. Dapita ang mga estudyante sa paghanduraw nga gitanyagan sila og mainom. Pangutan-a sila kon unsa kaha ang gusto nilang masayran mahitungod sa tubig sa dili pa sila mohukom kon moinom ba niini.

Sama nga kita gusto nga masayod sa tinubdan sa mga butang nga atong gibutang sa atong mga lawas, kon kita adunay mga pangutana sa ebanghelyo o mga hilisgotan nga nakuryoso kita, kinahanglan nga ato gayod nga susihon ang mga tinubdan nga atong gipangitaan alang sa impormasyon.

Si Elder Dieter F. Uchtdorf, kanhi sa Unang Kapangulohan, mipasabot:

Wala pa sukad sa kasaysayan sa kalibotan nga aduna kitay mas sayon nga paggamit sa daghang impormasyon—ang uban niini tinuod, ang uban dili tinuod, ug ang kadaghanan tinuod sa ubang bahin.

Agi og sangpotanan, wala pa sukad sa kasaysayan sa kalibotan nga mas importante ang pagkat-on unsaon nga hustong makaila tali sa kamatuoran ug sayop. (Dieter F. Uchtdorf, “What Is Truth?” [Pakigpulong sa debosyonal sa Church Educational System, Ene. 13, 2013], broadcasts.ChurchofJesusChrist.org)

• Unsa nga mga tinubdan ang kasagaran nimong pangitaan kon ikaw adunay pangutana sa ebanghelyo?

• Unsaon nimo pagkahibalo kon kasaligan ang tinubdan?

Ang Dios mao ang tinubdan sa tanang kamatuoran

Aron matabangan ang mga estudyante nga makaila sa panginahanglan sa pagtan-aw ngadto sa Langitnong Amahan ug ni Jesukristo sa ilang pagpangita sa kamatuoran, ikonsiderar ang pagpakita sa mosunod nga mga pakisayran sa kasulatan diha sa pisara.

Mahimo nimong dapiton ang mga estudyante sa pagtuon sa pipila o sa tanan nga mga bersikulo sa ilang kaugalingon o uban sa usa ka grupo. Ikonsiderar ang pagdapit kanila sa pagsulat diha sa pisara sa mga pulong o sa mga hugpong sa mga pulong nga ilang nakit-an nga naghulagway sa mga kinaiya sa Langitnong Amahan ug ni Jesukristo.

Basaha ang mosunod nga mga kasulatan, mangita sa mga pulong o sa mga hugpong sa mga pulong nga makatabang nimo nga makasabot nganong kinahanglang mangita kita ngadto sa Langitnong Amahan ug ni Jesukristo alang sa kamatuoran:

• Juan 14:6

• Mosiah 4:9

• Doktrina ug mga Pakigsaad 88:6–7

• Doktrina ug mga Pakigsaad 93:26

• Unsa ang nakatabang niini nga mga bersikulo nga imong masabtan kon nganong kinahanglan kitang mosalig sa Langitnong Amahan ug ni Jesukristo samtang nangita sa kamatuoran?

  Isip kabahin sa imong diskusyon, hisgoti nga Ang Dios mao ang tinubdan sa tanang kamatuoran. Ikonsiderar ang pagsulat niini nga baroganan diha sa pisara.

• Asa nato makit-an ang kamatuoran nga gikan sa Langitnong Amahan ug ni Jesukristo?

Pagtinguha og kasaligang mga tinubdan

Ang mosunod nga kalihokan sa pagtuon makatabang sa mga estudyante nga makasabot kon nganong gustohon nilang gamiton ang balaanong gitudlo nga mga tinubdan nga gipanalangin sa Dios kanila.

Basaha ang mga parapo 11–12 sa “Pag-angkon og Espirituhanong Kahibalo” nga seksiyon sa Mahinungdanon nga Dokumento sa Doktrinal nga Kahanas (2023). Pangita og mga pagtulun-an nga makagiya kanato sa atong mga paningkamot sa pagpangita og mga tubag sa atong mga pangutana.

• Unsa nga mga pulong o mga hugpong sa mga pulong ang imong nakit-an nga naghulagway nganong importante ang paggamit sa balaanong gitudlo nga mga tinubdan?

• Unsa ang pipila ka mga tinubdan gikan sa Langitnong Amahan ug ni Jesukristo nga atong madangpan sa atong pagpangita sa kamatuoran? Sa unsang paagi kini nga mga tinubdan nagpakita sa gugma sa Langitnong Amahan ug ni Jesukristo alang kanato?

Ang mosunod nga mga kalihokan makatabang sa mga estudyante nga makasabot kon unsaon pagpangita sa balaanong gitudlo nga mga tinubdan ug sa pagsusi sa pagkakasaligan sa ubang mga tinubdan nga ilang makita. Ikonsiderar ang paggamit sa usa o sa duha ka mga kalihokan, depende sa inyong bakante nga oras ug sa mga panginahanglan sa imong mga estudyante.

Kalihokan A: Pagpangita og balaanong gitudlo nga mga tinubdan

Sa dili pa dapiton ang mga estudyante sa pagkompleto sa mosunod nga kalihokan, ikonsiderar ang pagpakita kon unsaon paggamit ang hinimo sa Simbahan nga mga tabang sa pagtuon sa pagpangita og balaanong gitudlo nga mga tinubdan. Mahimo kang mopili og hilisgotan sa ebanghelyo ug ipakita sa mga estudyante kon asa makapangita og dugang nga impormasyon gamit ang mga kapanguhaan nga gilista diha sa lakang 2.

Human mapakita sa mga estudyante kon unsaon pagpangita sa balaanong gitudlo nga mga tinubdan, pabansaya sila sa ilang kaugalingon o kauban sa usa ka pares. Mahimo nimong ipakigbahin ug ipakita ang mosunod nga mga panudlo aron matabangan ang mga estudyante nga makasugod.

Pagbansay sa paggamit sa hinimo sa Simbahan nga mga tabang sa pagtuon aron sa pagpangita sa balaanong gitudlo nga mga tinubdan pinaagi sa pagsunod niining duha ka mga lakang:

1. Pagpili og usa ka hilisgotan sa ebanghelyo aron mapangita ang impormasyon mahitungod niini. Ang mga ehemplo sa mga hilisgotan naglakip sa hubad sa Basahon ni Mormon, mga asoy sa Unang Panan-awon, ug ang Pulong sa Kaalam. Mahimo nimong pilion ang bisan unsang hilisgotan sa ebanghelyo nga interesado ka.

2. Pangita og balaanong gitudlo nga mga tinubdan pinaagi sa paggamit sa hinimo sa Simbahan nga mga tabang sa pagtuon. Ang mga ehemplo sa mga tabang sa pagtuon naglakip sa Mga Hilisgotan ug mga Tubag, Giya ngadto sa mga Kasulatan, ang search nga function sa Librarya sa Ebanghelyo, Mga Hilisgotan sa Kasaysayan sa Simbahan, ug mga pakigpulong sa kinatibuk-ang komperensiya.

   Samtang magbuhat ang mga estudyante sa pagpangita og balaanong gitudlo nga mga tinubdan, ikonsiderar ang paglakaw-lakaw sa palibot aron pwede ka nga motabang sa mga estudyante nga tingali adunay mga pangutana o mga panginahanglan. Human ang mga estudyante nahatagan og panahon sa pagtuon, ang mosunod nga mga pangutana mahimong makatabang nila sa paghisgot sa ilang mga kasinatian.

3. Unsa nga mga panabot ang imong naangkon pinaagi sa proseso sa pagpangita og balaanong gitudlo nga mga tinubdan?

4. Unsa nga makatabang nga impormasyon ang imong napalgan?

Kalihokan B: Susiha ang mga tinubdan sa impormasyon

Adunay mga panahon sa atong pagpangita sa kamatuoran nga kita makakita og mga tinubdan sa impormasyon nga wala namantala sa Simbahan. Niini nga mga higayon, importante nga atong susihon ang pagkakasaligan sa impormasyon nga atong gigamit.

• Unsa ang atong mahimo sa pag-ila tali sa kasaligan ug sa dili kasaligan nga mga tinubdan sa impormasyon?

Ipakita ang mosunod nga mga pangutana o ihatag kini sa mga estudyante isip handout. Agi og dugang sa pagdapit sa mga estudyante sa pagbasa sa mga pangutana nga sila ra o isip usa ka klase, mahimo nimong hangyoon sila sa pagbasa sa mga kasulatan nga may kalabotan sa mga pangutana.

Pag-ila sa Kamatuoran gikan sa Sayop

Manwal sa Magtutudlo sa Seminary sa Doktrina ug mga Pakigsaad—Pag-angkon og Espirituhanong Kahibalo, Bahin 4

Basaha ang mosunod nga mga pangutana. Hunahunaa kon sa unsang paagi ang mga pangutana sama niini makatabang kanimo sa pag-ila sa pagkakasaligan ug pagkamapuslanon sa nagkalainlaing mga tinubdan sa impormasyon.

• Unsa ang akong gibati gikan sa Espiritu Santo sa dihang akong gibasa o nadungog kini nga impormasyon? (Tan-awa sa Doktrina ug mga Pakigsaad 50:23–24.)

• Mas gipaduol ba ako niini nga impormasyon ngadto ni Jesukristo ug sa Iyang Simbahan? (Tan-awa sa Moroni 7:15–17.)

• Nagdasig ba kini kanako sa pagsunod sa mga sugo sa Dios?

• Miuyon ba kini sa gitudlo sa mga kasulatan ug sa mga propeta sa modernong panahon? (Tan-awa sa 2 Timoteo 3:15–17; Doktrina ug mga Pakigsaad 1:38.)

• Gikompirmar ba niini ang unsay gibati na nako nga gisulti sa Espiritu Santo kanako nga tinuod, o gidasig ba ako niini nga magduhaduha niadto nga mga kamatuoran? (Tan-awa sa Moroni 10:5 .)

• Naggikan ba kini sa tinubdan nga gikonsiderar nga kasaligan sa Manluluwas o sa mga lider sa Iyang Simbahan?

• Unsa ang ikasulti sa akong mga ginikanan o mga lider sa Simbahan mahitungod niini nga impormasyon? (Kon matintal ako nga itago kini gikan kanila, unsa ang gisulti niana kanako mahitungod sa tinubdan niini?)

Human mabasa sa mga estudyante ang mga pangutana, hangyoa sila sa pagpakigbahin kon ngano sa ilang hunahuna nga ang mga pangutana nga sama niini makatabang kanila sa pagpamalandong. Mahimo usab nimo silang dapiton sa pagpakigbahin og mga ehemplo kon giunsa nila paggamit kini o ang susama nga mga pangutana sa pagsusi sa pagkakasaligan sa impormasyon.

Paggamit sa unsay imong nakat-onan

Aron matabangan ang mga estudyante nga mahimong kabahin sa ilang kaugalingon ang ilang nangakat-onan, ikonsiderar ang pagdapit kanila sa pagsulat sa ilang tubag sa usa o sa duha sa mosunod nga mga pangutana diha sa ilang journal sa pagtuon. Mahimo dayon nimo silang dapiton sa pagpakigbahin sa ilang mga hunahuna ngadto sa usa ka pares o sa klase.

• Unsa ang imong nakat-onan karon nga makatabang nimo nga mas makapangita og mga tubag sa imong mga pangutana sa ebanghelyo?

• Sa unsang paagi sa imong hunahuna nga ang unsay imong nakat-onan karon makaimpluwensiya sa imong umaabot nga mga binuhatan?

Pagpamatuod sa mga kamatuoran nga inyong gitun-an karon, ug awhaga ang mga estudyante sa pagtinguha sa kamatuoran nga gipadayag sa Langitnong Amahan ug ni Jesukristo pinaagi sa balaanong gitudlo nga mga tinubdan.

Dugang nga mga Kapanguhaan

Unsa nga mga tinubdan ang akong magamit sa pagpangita sa kamatuoran nga gipadayag sa Dios?

Si Sister Tracy Y. Browning sa Kinatibuk-ang Kapangulohan sa Primary mitudlo:

Isip mga anak sa Dios sa pakigsaad, kita talagsaon nga napanalanginan og daghang suplay sa balaang gitudlo nga mga himan aron mapalambo ang atong espirituhanong panan-aw. Ang mga pulong ug mga pagtulon-an ni Jesukristo nga natala diha sa kasulatan ug mga mensahe gikan sa Iyang pinili nga mga propeta ug ang Iyang Espiritu nga nadawat pinaagi sa inadlaw nga pag-ampo, regular nga pagtambong sa templo, ug pinaagi sa sinemana nga ordinansa sa sakramento makatabang sa pagpahiuli sa kalinaw ug makahatag sa gikinahanglan nga gasa sa pag-ila nga nagdala sa kahayag ni Kristo ug sa Iyang panabot ngadto sa mga pribado nga mga hunahuna o mga aksiyon sa atong kinabuhi ug diha sa kalibotan nga tingali madag-omon. Ang Manluluwas mahimo usab nga atong kompas ug atong piloto samtang kita naglawig agi sa kalma ug sa gubot nga mga tubig sa kinabuhi. Siya makahimo sa yano nga paagi sa husto nga dalan nga modala kanato ngadto sa atong mahangtoron nga destinasyon. (Tracy Y. Browning, “Mas Makakita Pa ni Jesukristo diha sa Atong mga Kinabuhi,” Liahona, Nob. 2022, 14)

Si Elder Dieter F. Uchtdorf sa Korum sa Napulog Duha ka Apostoles mipasabot:

Asa man kamo mangita sa kamatuoran?

Kini anaa sa ebanghelyo ni Jesukristo. Ug ang kahingpitan niana nga ebanghelyo gitudlo sa Ang Simbahan ni Jesukristo sa mga Santos sa Ulahing mga Adlaw.

Si Jesukristo miingon, “Ako mao ang dalan, ang kamatuoran, ug ang kinabuhi: walay bisan kinsa nga makaadto sa Amahan, gawas kon pinaagi kanako” [Juan 14:6].

Kon kamo adunay importante nga mga pagpili nga himoon, si Jesukristo ug ang Iyang gipahiuli nga ebanghelyo mao ang labing maayong pagpili. Kon kamo adunay mga pangutana, si Jesukristo ug ang Iyang gipahiuli nga ebanghelyo mao ang labing maayong tubag. (Dieter F. Uchtdorf, “Si Jesukristo Mao ang Kalig-on sa Kabatan-onan,” Liahona, Nob. 2022, 10)

Unsa pa ang makatabang nako samtang nagtinguha ko nga makahibalo sa kamatuoran?

Si Presidente Russell M. Nelson mipakigbahin sa mosunod:

Ako mangamuyo kaninyo sa pag-ako sa responsibilidad sa inyong pagpamatuod. Trabahoa kini. Angkona kini. Atimana kini. Amomaha kini aron motubo kini. Palamboa kini gamit ang kamatuoran. Ayaw kini hugawi sa sayop nga mga pilosopiya sa dili matuohon nga mga lalaki ug mga babaye ug dayon matingala nganong nagkahuyang ang inyong pagpamatuod. …

Kon kamo adunay mga pangutana—ug ako naglaom nga kamo aduna—pangita og mga tubag nga inubanan og mainiton nga tinguha nga motuo. Pagkat-on sa tanan nga inyong mahimo mahitungod sa ebanghelyo ug seguroha nga modangop ngadto sa mga tinubdan nga puno sa kamatuoran alang sa giya. Nagpuyo kita sa kapaigoan nga “walay [ma]tago” [Doktrina ug mga Pakigsaad 121:28]. Mao nga, sa paglabay sa panahon, ang Ginoo motubag sa atong tanang pangutana. (Russell M. Nelson, “Mga Pagpili alang sa Kahangtoran” [tibuok kalibotan nga debosyonal alang sa mga young adult, Mayo 15, 2022])

Dugang nga mga Kalihokan sa Pagkat-on

Bidyo: “Balaanong Gitudlo nga mga Tinubdan”

Ikonsiderar ang paggamit sa mga bahin sa bidyo nga “Balaanong Gitudlo nga mga Tinubdan [Divinely Appointed Sources]” (9:16). Mahimong mabayaw ang mga estudyante pinaagi sa mga pagpamatuod sa mga batan-on kinsa nakakaplag og gahom sa paggamit sa balaanong gitudlo nga mga tinubdan sa pagtubag sa mga pangutana ug mga kabalaka sa ebanghelyo.

Pagkat-on mahitungod sa kasaysayan sa Simbahan

Ang pagkat-on mahitungod sa mga panghitabo sa kasaysayan sa Simbahan makapakita og talagsaong mga hagit. Ang pag-ila niini makatabang sa mga estudyante. Sa mga pulong sa usa ka tigtipig sa kasayasayan sa Simbahan, “Sa atong panglantaw sa karon, ang nangagi ingon og dili na importante. Ang mga tawo nangamatay na; ang ilang mga kasinatian natapos na. Hinoon, ang mga tipik sa kagahapon nagpabilin—mga sulat, mga diary, rekord sa mga organisasyon, mga materyal nga butang. Karon, makat-onan lang nato ang nangagi pinaagi sa dili direktang paagi gamit ang nahibilin nga mga tipik. Ang impormasyon kanunay nga mawala tali sa mga nangagi ug sa karon. Kinahanglang tun-an nato ang mga rekord nga milahutay samtang maghinumdom kita nga kini wala gayod magrepresentar sa tanan nga nangagi” (Keith A. Erekson, “Understanding Church History by Study and Faith,” Ensign, Peb. 2017, 57).