Leksiyon 166: Doktrinal nga Kahanas: Pagkaplag og mga Tubag sa Akong mga Pangutana

Molihok inubanan sa Hugot nga Pagtuo aron sa Pagkaplag sa mga Tubag

Pag-angkon og Espirituhanong Kahibalo, Bahin 2

Si Jesukristo nagdapit kanato sa panghangad ngadto Kaniya ug paglihok inubanan sa hugot nga pagtuo sa tibuok natong mga kinabuhi. Importante nga magatutok kita sa Manluluwas, hilabi na kon dili nato sayon nga masulbad ang mga pangutana o sitwasyon. Kini nga leksiyon makatabang sa mga estudyante nga makasabot kon unsaon sa paglihok inubanan sa hugot nga pagtuo kang Jesukristo samtang sila magtinguha og mga tubag sa ilang mga pangutana.

Mga Posibleng Kalihokan sa Pagkat-on

Ang kamahinungdanon sa pagpangutana

Sa dili pa ang klase, mahimo nimong isulat ang mosunod nga pangutana gikan ni Presidente Dieter F. Uchtdorf diha sa pisara. Sa pagsulod sa mga estudyante, dapita sila sa pagpamalandong kon unsaon nila sa pagtubag ang iyang pangutana ug nganong ingon niana ang ilang tubag. Human mahatagan og panahon ang mga estudyante sa pagpamalandong, dapita sila sa pagpakigbahin sa ilang mga tubag.

Si Presidente Dieter F. Uchtdorf, kanhi sa Unang Kapangulogan, gipangutana ang mosunod:

Husto ra ba nga adunay mga pangutana mahitungod sa Simbahan o sa mga doktrina niini? (Dieter F. Uchtdorf, “The Reflection in the Water” [debosyonal sa Church Educational System, Nov. 1, 2009], thechurchnews.com)

• Unsaon nimo pagtubag kini nga pangutana? Nganong ingon niana ang imong tubag?

Samtang imong basahon ang nahibilin sa pamahayag ni Presidente Uchtdorf, pangitaa kon sa unsang paagi ikatandi ang imong mga tubag sa iyaha.

Akong minahal nga batan-ong mga higala, kita usa ka tigpangutana nga mga katawhan tungod kay nasayod kita nga ang pagpangutana modala ngadto sa kamatuoran. Mao kana ang paagi [nga] nakapasugod sa Simbahan—gikan sa usa ka batan-ong lalaki kinsa adunay mga pangutana. Sa pagkatinuod, dili ko sigurado kon unsaon sa usa ka tawo pagdiskobre sa kamatuoran kon dili mangutana. …

… Ang pagpangutana mao ang sinugdanan sa pagpamatuod. … Ang pagpangutana dili timailhan sa kahuyang; kini ang mag-una sa paglambo. (Dieter F. Uchtdorf, “The Reflection in the Water” [debosyonal sa Church Educational System, Nov. 1, 2009], thechurchnews.com)

• Unsa nga mga ehemplo ang imong nakita diha sa mga kasulatan, kasaysayan sa Simbahan, o sa imong kaugalingong kinabuhi nga naghulagway nga ang Langitnong Amahan ug si Jesukristo gusto nga kita mangutana?

Usahay makadiskobre kita og bag-ong impormasyon mahitungod sa doktrina, mga naandang gimbuhaton, o kasaysayan sa Simbahan nga daw lisod sabton. Mahimo usab nga kita adunay mga pangutana nga lisod tubagon. Ang pagbaton og mga pangutana dili sama sa pagduhaduha. Ang matinud-anong pagpangutana makadugang sa atong pagsabot ug pagpamatuod kang Jesukristo. Ang pagpasiugda og pagduhaduha mahimong negatibo nga makaapekto sa atong hugot nga pagtuo diha Kaniya (tan-awa sa Mga Hilisgotan ug mga Pangutana, “Magtubag sa mga Pangutana sa Ebanghelyo,” topics.ChurchofJesusChrist.org).

Hangyoa ang mga estudyante sa paghunahuna mahitungod sa ilang mga pangutana mahitungod sa Simbahan o sa doktrina niini nga dili nila daling matubag. Mahimo nimong dapiton ang mga estudyante sa pagsulat niini nga mga pangutana diha sa ilang mga journal sa pagtuon. Dapita sila sa pagpangita og mga kamatuoran niini nga leksiyon nga makatabang kanila kon moabot ang lisod nga mga pangutana.

Pagtubag sa lisod nga mga pangutana

Aron ihulagway ang kamahinungdanon sa pagpangutana ug sa pagpakita og pananglitan kon unsaon sa paglihok inubanan sa hugot nga pagtuo, pagpresentar og senaryo ngadto sa klase. Gamita ang deskripsiyon sa ubos o ipakita ang bidyo nga “Pag-angkon sa Espirituhanong Kahibalo: Sugilanon ni Madison,” anaa sa ChurchofJesusChrist.org, gikan sa time code 0:00 hangtod sa 1:44.

Sa seminary, si Madison nanakat-on nga si Joseph Smith nagbuhat og dinaghan nga kaminyoon. Human niya madunggi kini, pipila ka pangutana ang misantop sa iyang hunahuna.

Aron sa pagtabang sa mga estudyante nga mahisgotan ang mosunod nga mga pangutana, mahimo nimong bahinon ang klase ngadto sa managpares o sa gagmay nga grupo. Human sa paghisgot sa mga pangutana,ang mga estudyante mahimong moreport sa ilang mga tubag diha sa klase.

• Unsa ang pipila ka negatibo ug pasitibo nga mga paagi nga mabuhat ni Madson aron sa pag-atubang sa iyang mga pangutana?

• Ngano nga inyong gibati nga kini nga mga paagi mahimong positibo o negatibo?

Kon makasugat kita og lisod nga mga pangutana, makatabang ang paggamit sa mga baroganan sa pag-angkon og espirituhanong kahibalo.

Ang ubang mga estudyante tingali adunay miaging kasinatian sa pagtuon sa mga baroganan sa pag-angkon og espirituhanong kahibalo sa seminary. Kon mao, pangutan-a ang mga miyembro sa klase kon makasulti ba sila sa tulo ka baroganan sa pag-angkon og espirituhanong kahibalo. Kon gikinahanglan, dapita sila sa pagbasa sa parapo 4 sa “Pag-angkon og Espirituhanong Kahibalo” nga seksiyon sa Mahinungdanon nga Dokumento sa Doktrinal nga Kahanas (2023). Ikonsiderar ang pagsulat niini nga mga baroganan diha sa pisara:

• Lihokon inubanan sa hugot nga pagtuo.

• Susiha ang mga konsepto ug mga pangutana nga adunay mahangtorong panglantaw.

• Tinguhaa ang dugang nga panabot pinaagi sa balaanong gitudlo nga mga tinubdan.

Lihokon inubanan sa hugot nga pagtuo

Ang kasinatian sa pagkat-on karon magpunting sa baroganan sa paglihok inubanan sa hugot nga pagtuo.

Basaha ang Doktrina ug mga Pakigsaad 6:36. Ilha kon sa unsang paagi kini nga pagdapit nga gikan sa Manluluwas makatabang kanato sa paglihok inubanan sa hugot nga pagtuo.

• Unsa nga mga pulong o mga hugpong sa mga pulong dinhi niini nga bersikulo ang mahimong makatabang ni Madison o sa uban kinsa adunay mga pangutana bahin sa ebanghelyo o sa Simbahan?

• Ngano nga kadtong mga pulong og mga hugpong sa mga pulong makatabang?

Samtang mopakigbahin ang mga estudyante sa ilang mga tubag, tabangi sila sa pag-ila sa mosunod nga kamatuoran: Kon aduna kitay mga pangutana nga wala matubag, kita makahangad ngadto kang Jesukristo ug dili magduhaduha.

Ipasabot ngadto sa mga estudyante nga daghang mga ehemplo kon sa unsang paagi kita makahangad ngadto kang Jesukristo ang makita diha sa Mahinungdanon nga Dokumento sa Doktrinal nga Kahanas.

Basaha ang mga parapo 5–7 diha sa “Pag-angkon og Espirituhanong Kahibalo” nga seksiyon sa Mahinungdanon nga Dokumento sa Doktrinal nga Kahanas, mangita og mga paagi nga ikaw makalihok inubanan sa hugot nga pagtuo kon aduna kay espirituhanong mga pangutana.

• Hain sa mga pamahayag gikan niini nga mga parapo ang imong gibati nga labing makatabang sa usa ka tawo nga adunay usa ka lisod nga pangutana? Ngano man?

Ikonsiderar ang pagdapit sa mga estudyante sa pagpangita og mga kasulatan nga nagsuporta sa ilang mga tubag. Pananglitan, kon ang mga estudyante maghisgot og pag-ampo, mahimo silang motan-aw sa 2 Nephi 32:8–9 o Santiago 1:5–6. Kon sila maghisgot sa pagtuon sa kasulatan, mahimo silang motan-aw sa 2 Nephi 32:3 o 2 Timoteo 3:15–17.

Pangita og natural nga mga kahigayonan sa pagpahinumdom sa mga estudyante sa kamahinungdanon sa pagbuhat niini nga mga lihok nga magtutok ngadto kang Jesukristo. Mahimo nimong dapiton ang mga estudyante sa pagkonsiderar kon sa unsang paagi ang mga lihok nga ilang nahibaloan mahimong mga ehemplo sa paghangad ngadto ni Jesukristo.

Mga ehemplo sa paglihok inubanan sa hugot nga pagtuo

Ipakigbahin ang konklusyon sa sitwasyon bahin ni Madison. Dapita ang mga estudyante sa pag-ila kon giunsa pagpili ni Madison sa paglihok inubanan sa hugot nga pagtuo samtang siya nag-atubang sa iyang mga pangutana. Mahimo nimong ipakita ang bidyo nga “Pag-angkon sa Espirituhanong Kahibalo: Sugilanon ni Madison” gikan sa time code 1:44 hangtod sa 8:35; kon wala ang bidyo, basaha ang mosunod nga parapo.

Human sa klase, si Madison miduol sa iyang magtutudlo ug nangutana nganong si Joseph Smith nagbuhat sa dinaghan nga kaminyoon. Giawhag siya sa iyang magtutudlo sa pagpadayon sa pagsunod sa ebanghelyo ug paghalad og sinsero nga pag-ampo samtang nangita siya og mga tubag. Samtang nag-ampo ug nagsiksik si Madison sa iyang mga kasulatan, nakadawat siya og pag-aghat nga makadawat siya og tubag sa tukmang panahon. Si Madison nagpadayon sa paglihok inubanan sa hugot nga pagtuo ug misalig sa iyang pagpamatuod sa Langitnong Amahan ug sa Iyang plano, ug siya hinay-hinay nga nagsugod sa pagpangita og mga tubag nga nakatabang kaniya nga mobati og kalinaw. Sa tibuok proseso, gibati ni Madison nga milambo ang iyang relasyon ngadto sa Langitnong Amahan ug ni Jesukristo. Iyahang nahibaloan nga samtang kita molihok inubanan sa hugot nga pagtuo, ang Dios mohatag sa mga tubag o kalinaw nga atong gitinguha.

Isip kabahin sa panaghisgotan sa mosunod nga pangutana, hangyoa ang mga estudyante sa pagtudlo kon hain sa mga lihok ni Madison ang may kalabotan sa unsay ilang gitun-an diha sa Mahinungdanon nga Dokumento sa Doktrinal nga Kahanas.

• Sa unsang paagi nga ang mga lihok ni Madison nagpakita sa iyang hugot nga pagtuo diha kang Jesukristo?

• Unsa ang atong makat-onan mahitungod sa Langitnong Amahan ug ni Jesukristo gikan sa kasinatian ni Madison?

Ikonsiderar ang pagdapit sa mga estudyante sa paghunahuna ug sa pagpakigbahin sa mga panahon nga sila napanalanginan tungod sa paglihok inubanan sa hugot nga pagtuo kon mag-atubang og lisod nga mga pangutana. Dayon dapita ang mga estudyante sa paghunahuna mahitungod sa unsay ilang nakat-onan ug gibati karon nga makatabang sa ilang personal nga mga kahimtang ug mga pangutana. Ikonsiderar ang paghatag nila og panahon sa pagrekord sa ilang mga hunahuna ug mga impresyon diha sa ilang mga journal sa pagtuon.

Taposa pinaagi sa imong pagpamatuod sa kamahinungdanon sa paglihok inubanan sa hugot nga pagtuo nga adunay pagtutok kang Jesukristo samtang kita magtinguha og mga tubag sa atong mga pangutana.

Dugang nga mga Kapanguhaan

Unsaon nako pagpalambo ang akong hugot nga pagtuo diha kang Jesukristo?

Si Presidente Russell M. Nelson mitudlo:

Lihokon inubanan sa hugot nga pagtuo. Unsay inyong buhaton kon kamo adunay dugang hugot nga pagtuo? Hunahunaa kini. Isulat kini. Dayon dawata ang dugang pa nga hugot nga pagtuo pinaagi sa paghimo og butang nga nagkinahanglan og dugang nga hugot nga pagtuo. (Russell M. Nelson, “Si Kristo Nabanhaw: Ang Hugot nga Pagtuo diha Kaniya Makabalhin og mga Bukid,” Liahona, Mayo 2021, 103)

Si Elder Dale G. Renlund sa Korum sa Napulog Duha ka Apostoles mitudlo:

Ang bugtong paagi aron motubo ang hugot pagtuo sa usa ka tawo mao ang paglihok inubanan sa hugot nga pagtuo. Kini nga mga buhat sa kasagaran dinasig pinaagi sa mga pagdapit sa uban, apan dili nato “mapatubo” ang pagtuo sa uban o magsalig lang sa uban aron molambo ang atoang kaugalingong pagtuo. Aron motubo ang atong hugot nga pagtuo, pilion gayod nato ang mga buhat nga makapalig-on, sama sa pag-ampo, pagtuon sa mga kasulatan, pag-ambit sa sakramento, pagtuman sa mga sugo, ug pagserbisyo sa uban. (Dale G. Renlund, “Walay Pagkapaling nga Pasalig ngadto kang Jesukristo,” Liahona, Nob. 2019, 23)

Unsa kaha kon aduna koy pangutana nga murag dili matubag?

Si Presidente M. Russell Ballard sa Korum sa Napulog Duha ka Apostoles mipakigbahin sa mosunod:

Kon mabuhi kamo nga sama kanako og gidugayon, inyong masayran nga dunay paagi nga masulbad ra kini sa ilang kaugalingon. Usa ka dinasig nga ideya o pinadayag mahimong makatabang sa pagsabot sa usa ka isyu. Hinumdomi, ang Pagpahiuli dili usa ka panghitabo, apan kini padayon nga naglambo.

Ayaw biyai ang mahinungdanon nga mga kamatuoran nga gipadayag pinaagi ni Propeta Joseph Smith. Ayaw og hunong sa pagbasa, pagpamalandong, ug paggamit sa doktrina ni Kristo nga anaa sa Basahon ni Mormon.

Ayaw kapakyas sa paggahin og igo nga panahon sa Ginoo pinaagi sa matinuorong paningkamot sa pagsabot kon unsay gipadayag sa Ginoo. Sama sa gisulti kausa sa akong minahal nga higala ug kanhi kauban nga si Elder Neal A. Maxwell, “Kinahanglang dili kita magtuo … nga tungod lang kay dili kita makapasabot sa usa ka butang, dili na kini mapasabot” [Not My Will, but Thine (1988), 124].

Busa sa dili pa kamo mobuhat nianang makuyaw sa espirituhanon nga pagpili nga mobiya, moawhag ko kaninyo sa paghunong ug paghunahuna og maayo sa dili pa hunongan ang bisan unsa man nga unang midala kaninyo ngadto sa inyong pagpamatuod sa gipahiuli nga Simbahan ni Jesukristo. Hunong ug paghunahuna kabahin sa unsay inyong gibati dinhi ug nganong gibati ninyo kini. Hunahunaa ang mga higayon nga ang Espiritu Santo nagpamatuod kaninyo kabahin sa mahangtorong kamatuoran. (M. Russell Ballard, “Kang Kinsa Man Kami Moadto?,” Liahona, Nob. 2016, 91)

Dugang nga mga Kalihokan sa Pagkat-on

Alternatibo nga mga senaryo

Isip alternatibo sa senaryo sa leksiyon, mahimo nimong gamiton ang usa sa mosunod:

1. Mga Kasulatan: Dapita ang mga estudyante sa pagtuon og ehemplo gikan sa mga kasulatan sa mga tawo nga naglihok inubanan sa hugot nga pagtuo sa dihang aduna silay mga pangutana o anaa sa lisod nga mga sitwasyon. Ang mga ehemplo mahimong maglakip ni Joseph Smith (tan-awa sa Joseph Smith—Kasaysayan 1:8–18, Nephi (tan-awa sa 1 Nephi 3:31, 4:7), Lehi ug Sariah (tan-awa sa 1 Nephi 5:1–8), o Pedro ug ang Apostoles (tan-awa sa Juan 6:59–69).

2. Kasaysayan sa Simbahan: Gamita ang usa ka ehemplo gikan sa kasaysayan sa Simbahan nga naghulagway sa mga baroganan sa paglihok inubanan sa hugot nga pagtuo. Usa sa maong asoy mahimong ang tubag ni Brigham Young ug sa iyang igsoon nga lalaki nga si Joseph samtang naglisod sila sa pagsabot sa pagpadayag ni Joseph Smith kabahin sa tulo ka ang-ang sa himaya, nga karon makita sa Doktrina ug mga Pakigsaad 76. (Tan-awa sa “The Vision,” Revelations in Context, makita sa ChurchofJesusChrist.org.)

3. The stonemason: Tan-awa ang bidyo nga “Act in Faith: The Stonemason” (4:57). Tabangi ang mga estudyante nga makakita kon sa unsang paagi sila makahupot sa mga kamatuoran nga ilang nahibaloan samtang sila nagtinguha sa pagsabot sa mga pangutana sa ebanghelyo nga anaa kanila.

4. Liahona: Kon ang mga estudyante adunay digital nga device, dapita sila sa pagpili og bag-ong isyu sa Liahona nga magasin ug pangitaa ang artikulo nga “Mga Hulagway sa Hugot nga Pagtuo”. Tudloi sila sa pagpili sa “Ang nahabilin sa istorya” (digital lamang) sa kataposan sa pahina ug basaha ang istorya. Kon mahuman na ang mga estudyante, mahimo nilang ipakigbahin ang istorya nga ilang nakit-an ngadto sa silingan o sa klase ug ilhon ang hagit nga giatubang sa indibidwal ug giunsa nila paggamit ang mga baroganan sa paglihok inubanan sa hugot nga pagtuo.