Mga Kahanas sa Pagtuon sa Kasulatan

Mga Kahanas sa Pagtuon sa Kasulatan

Kinatibuk-ang Pagpasabot

Ang mga kahanas sa pagtuon sa kasulatan makatabang kanato nga makabaton og mas maayong kasinatian sa pagtuon sa mga kasulatan ug makatabang kanato nga mas maduol ngadto sa Manluluwas nga si Jesukristo. Ang pagtutok kang Jesukristo, pagbutang og mubo nga mga sulat, pagpangita sa mga kamatuoran, paggamit sa mga himan sa pagtuon sa kasulatan, ug pagsabot sa konteksto makatabang sa paghimo sa pagtuon sa kasulatan nga mas makahuloganon.

Sugyot sa gipaspason [pacing]: Kini nga mga leksiyon mahimong itudlo bisan kanus-a. Hinoon, mahimong epektibo ang pagtudlo og usa o daghan pang mga leksiyon sa mga kahanas sa pagtuon sa mga kasulatan sa sinugdanan sa tuig sa pagtungha, dayon ipaila ang laing kahanas matag pipila ka mga semana. Kini makatugot sa mga estudyante nga makat-on ug mapraktis kini nga mga kahanas sa tibuok tuig.

Pangandam sa pagtudlo

Ang mosunod nga impormasyon naghatag kanimo og mga ideya kon unsa ang imong gikinahanglan nga andamon daan alang sa matag leksiyon.

Pagpunting kang Jesukristo diha sa mga Kasulatan

Katuyoan sa leksiyon: Aron matabangan ang mga estudyante nga makatutok sa Manluluwas samtang nagtuon sa mga kasulatan, hilabi na sa Doktrina ug mga Pakigsaad.

• Pagpangandam sa estudyante: Dapita ang mga estudyante sa pagpangita og ngalan o titulo ni Jesukristo diha sa Doktrina ug mga Pakigsaad nga makahuloganon ngadto kanila ug sa pagtambong nga andam sa pagpakigbahin sa unsay ilang nadiskobrehan.

• Mga butang nga ipakita: Hanap nga hulagway sa Manluluwas ug usa nga klaro

• Bidyo: “‘Nombre’ – What Should We Name Him?” (1:47)

Pagkaplag og mga Kamatuoran sa Ebanghelyo diha sa mga Kasulatan

Katuyoan sa leksiyon: Aron matabangan nga madugangan ang abilidad sa mga estudyante sa pagpangita sa mga kamatuoran sa ebanghelyo diha sa mga kasulatan ug mas mapaduol ngadto sa Ginoo.

• Pagpangandam sa estudyante: Isip kabahin sa ilang inadlaw nga pagtuon sa kasulatan, dapita ang mga estudyante sa pagpaningkamot sa pagpangita sa mga kamatuoran sa ebanghelyo nga makatabang kanila sa ilang mga kinabuhi ug sa pagpamalandong kon unsay ilang gibuhat aron makit-an kini.

• Bidyo: “Parable of the Gems” (6:47; tan-awa gikan sa time code 2:13 hangtod sa 4:20)

• Mga butang nga ipakita: Usa ka hulagway sa usa ka batan-ong babaye nga nangita ug nakakaplag og mga bahandi sa balas sa baybayon

• Handout: “Pagkaplag og mga Kamatuoran diha sa mga Kasulatan”

• Mga Materyal: Mga panid sa papel alang sa matag estudyante

Pagbutang og Mubo nga mga Sulat [Annotating] sa mga Kasulatan

Katuyoan sa leksiyon: Aron matabangan ang mga estudyante sa pagmarka ug pagdugang og mubo nga mga sulat diha sa ilang mga kasulatan sa paagi nga makahimo sa ilang pagtuon nga mas makahuloganon ug makapaduol nila ngadto sa Langitnong Amahan ug ni Jesukristo.

• Pagpangandam sa estudyante: Isip kabahin sa ilang inadlaw nga pagtuon sa kasulatan, dapita ang mga estudyante sa pagmarka kon unsay makahuloganon ngadto kanila, hilabi na ang mga pulong o mga hugpong sa mga pulong nga nakatabang kanila nga makasabot o mobati sa gugma sa Langitnong Amahan ug ni Jesukristo. Mahimo silang motambong nga andam sa pagpakigbahin sa unsay ilang gimarkahan ug ngano.

• Mga butang nga ipakita: Pipila ka mga ehemplo kon giunsa pagmarka sa mga tawo ang ilang mga kasulatan (Usab, kon mapuslanon, pag-andam og paagi sa pagpakita kon unsaon pagmarka ang mga kasulatan diha sa Gospel Library nga app.)

• Mga Bidyo: “A Marking System That Works for You” (1:56); “Marking Scriptures” (1:45)

Mga Himan sa Pagtuon sa Kasulatan

Katuyoan sa leksiyon: Aron matabangan ang mga estudyante nga mapalambo ang ilang personal nga pagtuon sa kasulatan ug mapalig-on ang ilang relasyon sa Langitnong Amahan ug ni Jesukristo pinaagi sa paggamit sa mga himan sa pagtuon sa kasulatan.

• Pagpangandam sa estudyante: Dapita ang mga estudyante sa pagtambong nga andam sa pagpakigbahin sa mga himan nga magamit aron sa pagtabang kanato sa kalibotan karon nga dili pa magamit sa milabayng 50 ka tuig. Hangyoa sila nga mangandam sa pagpasabot kon unsa nga kalahian ang mahimo niini nga mga himan sa atong mga kinabuhi.

• Mga butang nga ipakita: Mga hulagway sa usa ka tawo nga adunay pangdaro, modernong makina sa pag-ani, usa ka tawo nga nagsakay og kabayo, ug usa ka eroplano

Pagsabot sa Konteksto sa mga Kasulatan

Katuyoan sa leksiyon: Aron matabangan ang mga estudyante nga makasabot kon sa unsang paagi ang konteksto sa mga kasulatan makahimo sa pagtuon sa kasulatan nga mas makahuloganon.

• Pagpangandam sa estudyante: Dapita ang mga estudyante sa pagpangandam alang niini nga leksiyon pinaagi sa pagbasa sa ulohan sa seksiyon sa dili pa magtuon sa usa ka seksiyon sa Doktrina ug mga Pakigsaad. Hangyoa sila sa pagpangita sa kalainan nga mahimo niini sa pagsabot sa sulod sa seksiyon.

• Mga butang nga ipakita: Hulagway sa usa ka lalaki nga nagduso sa laing lalaki ug usa ka hulagway sa usa ka lalaki nga nagduso sa laing lalaki palayo sa usa ka sakyanan (Usab, kon mapuslanon, pag-andam og paagi sa pagpakita og dugang nga mga kapanguhaan alang sa konteksto diha sa Gospel Library nga app.)