“Pagbutang og Komento [Annotating] sa mga Kasulatan: Pagmarka ug Pagdugang og Mubo nga mga Sulat,” Manwal sa Magtutudlo sa Seminary sa Doktrina ug mga Pakigsaad (2025)
“Pagbutang og Komento [Annotating] sa mga Kasulatan,” Manwal sa Magtutudlo sa Seminary sa Doktrina ug mga Pakigsaad
Leksiyon 171: Mga Kahanas sa Pagtuon sa Kasulatan
Pagbutang og Komento [Annotating] sa mga Kasulatan
Pagmarka ug Pagdugang og Mubo nga mga Sulat
Kini nga leksiyon makatabang sa mga estudyante sa pagmarka ug pagdugang og mubo nga mga sulat diha sa ilang mga kasulatan sa paagi nga makahimo sa ilang pagtuon nga mas makahuloganon ug mas makapaduol kanila ngadto sa Langitnong Amahan ug ni Jesukristo.
Pagpangandam sa estudyante: Isip kabahin sa ilang inadlaw nga pagtuon sa kasulatan, dapita ang mga estudyante sa pagmarka kon unsay makahuloganon ngadto kanila, hilabi na sa mga pulong o mga hugpong sa mga pulong nga makatabang kanila nga makasabot o mabati ang gugma sa Langitnong Amahan ug ni Jesukristo. Mahimo silang motambong nga andam sa pagpakigbahin unsa ang ilang gimarkahan ug ngano.
Posible nga mga Kalihokan sa Pagkat-on
Paghimo sa pagtuon sa kasulatan nga mas makahuloganon
Dapita ang mga estudyante sa pagpakigbahin og pipila ka mga ideya sa mga kalihokan nga mahimong talagsa ra gibuhat ug, apan diay, mas makahuloganon diay. Ang mga ehemplo mahimong maglakip sa pagtimbaya ug pagpakigsulti sa usa ka klasmeyt, pagpadala og sulat sa pasalamat o text, ug pagtuon sa mga kasulatan.
Ang Manluluwas misugo kanato nga dili panagsa lang magbasa sa mga kasulatan apan sa “pagsiksik,” “pagtuon,” ug “pagbusog” sa Iyang mga pulong (Doktrina ug mga Pakigsaad 1:37; 11:22; 2 Nephi 32:3). Pinaagi sa mga kasulatan kita makaila Kaniya ug mobati sa Iyang gugma (tan-awa sa Juan 5:39; Jacob 3:2).
Dapita ang mga estudyante sa paggahin og kadiyot sa pagsusi sa ilang pagtuon sa kasulatan, lakip na kon paminaw nila kini ba nakatabang kanila nga mas maduol ngadto sa Langitnong Amahan ug ni Jesukristo o sa unsang paagi paminaw nila kini nakatabang kanila nga mas maduol ngadto sa Langitnong Amahan ug ni Jesukristo.
Unsa ang pipila sa mga butang nga imong nahimo (o mahimo) aron ang pagtuon sa kasulatan mas makahuloganon alang kanimo?
Paminaw og maayo sa mga tubag sa mga estudyante ug isulat kini diha sa pisara. Ikonsiderar ang pagpasabot sa mosunod sa imong kaugalingong mga pulong:
Ipasabot: Pagmarka sa mga kasulatan
Usa ka paagi sa paghimo sa pagtuon sa kasulatan nga makahuloganon mao ang pagmarka ug pagdugang og mubo nga mga sulat diha sa imong mga kasulatan. Samtang magtuon ka niini nga leksiyon, pangita og mga pamaagi nga mahimo nimong markahan ang imong mga kasulatan aron matabangan ang imong pagtuon sa kasulatan nga mas mopaduol kanimo ngadto sa Langitnong Amahan ug ni Jesukristo.
Modelo: Pagmarka sa mga kasulatan
Ipakita sa mga estudyante ang pipila ka mga pananglitan kon giunsa sa pagmarka sa mga tawo ang ilang mga kasulatan sama sa mga bidyo o mga hulagway nga gilakip dinhi. Mahimo pa gani nga ipakigbahin sa mga estudyante ang mga pamaagi nga ilang markahan ang ilang mga kasulatan. Dapita ang mga estudyante sa pag-ila sa posibleng mga rason sa mga marka nga ilang nakita.
“A Marking System That Works for You” (1:56). Niini nga bidyo, si Elder David A. Bednar sa Korum sa Napulog Duha ka Apostoles mipakita kon giunsa niya pagmarka ang mga kasulatan.
“Marking Scriptures” (1:45). Niini nga bidyo, si Presidente Dallin H. Oaks sa Unang Kapangulohan mipakita kon giunsa niya pagmarka ang mga kasulatan.
-
Unsa ang pipila ka mga rason nga markahan sa mga tawo ang ilang mga kasulatan?
-
Sa unsa nga paagi sa imong hunahuna ang pagmarka sa imong mga kasulatan makatabang kanimo?
Pagbansay: Pagmarka sa mga kasulatan
Ikonsiderar ang pagsulat o pagpakita sa tibuok nga teksto sa mosunod nga mga bersikulo diha sa pisara. O, kon anaa, ipakita ang elektronik nga bersiyon niini nga mga bersikulo gikan sa Gospel Library. Mahimo nimong ilisan kini nga mga bersikulo og laing tudling sa doktrinal nga kahanas o laing bersikulo o mga bersikulo nga imong gusto.
Alang sa mga estudyante nga naggamit og digital nga mga kasulatan, mahimo kang mogahin og panahon sa pagpakita kon unsaon pagmarka ang mga kasulatan diha sa Gospel Library nga app. Alang sa instruksiyon kon unsaon sa pagbuhat sa ingon, tan-awa ang “Tabang” nga seksiyon sa Gospel Library nga App, lakip ang: Gospel Library User Guide (iOS) ug Gospel Library User Guide (Android) ubos sa ulohan nga “Pagmarka sa Sulod [Marking Content].”
Aron sa pagpraktis sa pagmarka, basaha ang Doktrina ug mga Pakigsaad 68:5–6 ug markahi kon unsay makahuloganon diha kanimo. Mahimo nimong hatagan og espesyal nga pagtagad ang unsay imong nakat-onan mahitungod sa Manluluwas ug ang unsay Iyang gibati diha kanimo.
Kon ang mga bersikulo gipakita diha sa pisara, ikonsiderar ang pagdapit sa mga estudyante sa paggamit og mga marker sa paghimo og usab sa ilang mga pagmarka diha sa pisara ug hangyoa sila sa pagpakigbahin kon nganong ilaha kining gimarkahan.
-
Unsa nga mga pulong o mga hugpong sa mga pulong ang imong gimarkahan? Nganong mipatigbabaw kini kanimo?
-
Gibati ba nimo nga may kalainan mahitungod sa imong mga kasulatan human nimo kini gimarkahan? Nakaapekto ba kini sa imong mga pagbati alang sa Manluluwas? Kon mao, ngano man?
Mahimong makatabang ang pagpasabot sa mga estudyante nga kon ang mga pulong sa kasulatan mipatigbabaw diha kanila, kini mahimong usa ka pamaagi nga ang Ginoo nakigsulti kanila pinaagi sa Espiritu Santo.
Ipasabot: Pagsumpay o pagpundok sa mga bersikulo
Mahimo usab nga mapuslanon ang pagtuon og dugang nga mga bersikulo sa usa ka hilisgotanan ug isumpay o ipundok kini nga mga bersikulo.
Modelo: Pagsumpay o pagpundok sa mga bersikulo
-
Unsa ang pipila ka mga paagi nga imong masumpay o mapundok ang mga bersikulo mahitungod sa gugma sa Manluluwas alang kanimo?
Paminaw sa mga tubag sa mga estudyante ug ikonsiderar ang pagdugang og bisan unsa sa mosunod nga mga posibilidad. Mahimo nimong gamiton ang Doktrina ug mga Pakigsaad 68:5–6 ug Doktrina ug mga Pakigsaad 18:10–11 isip mga ehemplo sa mga bersikulo nga makatabang kanato nga mabati ang gugma sa Manluluwas. Ang mosunod nga lista adunay pipila ka mga ideya nga mahimong hisgotan sa mga estudyante o mahimo nimong idugang sa unsay ipakigbahin sa mga estudyante.
-
Isulat ang mga pakisayran diha sa blangko nga mga pahina sa sinugdanan o sa kataposan diha sa imong mga kasulatan, o sa usa ka journal sa kasulatan.
-
Tapad sa usa ka bersikulo diha sa margin, isulat ang (mga) pakisayran sa usa ka may kalabotan nga bersikulo.
-
Kon naggamit sa Gospel Library nga app, gamita ang linking o tagging nga feature.
Kon gikinahanglan, ipasabot nga ang pag-link magkonektar og duha ka mga kasulatan, samtang ang pag-tag motugot kanimo sa pagpundok sa daghang mga kasulatan ubos sa samang hilisgotanan. Ikonsiderar ang paghatag og pananglitan niini nga kahanas diha sa Gospel Library nga app o pagdapit og estudyante sa pagbuhat niini. Kon mahimo, makatabang ang pagpakita ngadto sa mas dako nga screen kaysa diha sa telepono lamang kon unsa ang imong gibuhat o gibuhat sa usa ka estudyante. Alang sa mga panudlo kon unsaon kini pagbuhat, tan-awa ang seksiyon nga Tabang diha sa Librarya sa Ebanghelyo [Gospel Library] nga app. Mahimo nimong masulod kini nga seksiyon pinaagi sa pagpili sa tulo ka tuldok diha sa ibabaw sa tuo nga bahin. (Timan-i: Mahimo usab nimong i-link o i-tag ang mga parapo sa mga pakigpulong sa kinatibuk-ang komperensiya o bisan unsa nga materyal sa Gospel Library nga app.)
Pagbansay: Pagsumpay o pagpundok sa mga bersikulo
Ang mosunod nga kalihokan makapadasig sa mga estudyante sa pagpundok ug pagsumpay sa mga kasulatan. Kon mipili ka og lahi nga tudling nga tun-an sa mga estudyante sa sayo pa sa leksiyon, mahimo usab nga mopili ka og nagkalainlaing mga bersikulo sa samang hilisgotan aron ilisan ang mga bersikulo sa ubos.
Basaha ang dili mominos tulo sa mosunod nga mga kasulatan ug ikonsiderar ang pagsumpay o pagpundok niini isip mga bersikulo nga nagtabang kanimo nga mabati ang gugma sa Manluluwas: Doktrina ug mga Pakigsaad 18:10–11; 34:1–3; 45:3–5; 49:26–27; 68:5–6; 138:3; Isaias 49:15–16; Juan 15:13; Mga Taga-Roma 8:35–39; 1 Juan 4:19; 1 Nephi 19:9.
Isip usa ka klase o diha sa gagmay nga mga grupo, dapita ang mga estudyante sa pagpakigbahin kon giunsa nila pagpundok ang mga bersikulo ug kon ngano nga kini mahimong makahuloganon ngadto kanila. Mahimo usab sila nga mopakigbahin og mga ideya kon unsaon nila paggamit ang pagpundok o pagsumpay sa ilang kaugalingong pagtuon sa kasulatan.
Ipasabot: Pagdugang og Mubo nga mga Sulat
Ang laing pamaagi aron mas maduol ngadto sa Ginoo pinaagi sa pagtuon sa kasulatan mao ang pagdugang og mubo nga mga sulat mahitungod sa unsay imong nakat-onan.
Si Elder David A. Bednar sa Korum sa Napulog Duha ka Apostoles mipasabot sa bili sa pagrekord sa mubo nga mga sulat kon magtuon sa mga kasulatan:
Ang pagsulat sa unsay atong nakat-onan, gihunahuna, ug gibati samtang magtuon kita sa mga kasulatan maoy laing matang sa pagpamalandong ug usa ka gamhanan nga pagdapit sa Espiritu Santo alang sa padayon nga pagtudlo. (“Tungod kay Kita Nakakita Kanila,” Liahona, Abril 2006, 20)
Modelo: Pagdugang og Mubo nga mga Sulat
Ipakita o tabangi ang mga estudyante sa paghinumdom gikan sa mga hulagway ug mga bidyo sa sayo pa sa leksiyon nga sila makadugang og mubo nga mga sulat pinaagi sa pagsulat diha sa mga margin sa ilang mga kasulatan, sa gagmay nga mga piraso sa papel nga ilang gibutang sa ilang mga kasulatan, sa usa ka journal sa kasulatan, o sa elektronik nga pamaagi gamit ang Librarya sa Ebanghelyo [Gospel Library] nga app.
Pagbansay: Pagdugang og mga Mubo nga mga Sulat
Taposa kini nga leksiyon pinaagi sa pagsulat sa imong mga hunahuna ug mga pagbati mahitungod sa bisan usa sa mga tudling nga imong gitun-an karon.
Mahimo nimong ipakita kon unsaon pagdugang og mubo nga mga sulat sa digital nga mga kasulatan pinaagi sa pag-highlight og hugpong sa mga pulong, pagpili sa Mubo nga Sulat, ug sa pag-type diha sa text.
Human mahatagi ang mga estudyante og panahon sa pagpraktis sa pagdugang og mubo nga mga sulat, dapita ang pipila sa pagpakigbahin sa unsay ilang gisulat kon kini dili kaayo personal. Mahimo ka usab mangutana kon unsaon sa mga estudyante pagmarka ang ilang mga kasulatan sa umaabot ug ngano.