Leksiyon 170: Mga Kahanas sa Pagtuon sa Kasulatan

Pagkaplag og mga Kamatuoran sa Ebanghelyo diha sa mga Kasulatan

Pagkat-on sa Pag-ila sa Doktrina ug mga Baroganan

Diha sa mga kasulatan, gitipigan sa Ginoo ang mga kamatuoran sa ebanghelyo—ang mahangtorong doktrina ug mga baroganan sa Iyang ebanghelyo—nga makapaduol kanato ngadto Kaniya ug nga mahinungdanon sa atong pag-uswag ug kaluwasan. Kini nga leksiyon makatabang sa pagdugang sa imong abilidad sa pagkaplag og mga kamatuoran sa ebanghelyo diha sa mga kasulatan ug mas mapaduol ngadto sa Langitnong Amahan ug sa Manluluwas.

Mga Posibleng Kalihokan sa Pagkat-on

Ang sambingay sa mga bahandi

Kon ang mosunod nga bidyo dili magamit, ikonsiderar ang pagsugod sa klase pinaagi sa pagpakita sa mga hulagway sa ibabaw ug hangyoa ang mga estudyante sa paghanduraw sa usa ka tawo nga nangita ug nakakaplag og mga bahandi diha sa balas sa baybayon. Pangutan-a, “Sa unsang paagi nga ang pagsiksik sa mga kasulatan sama sa pagpangita og mga bahandi diha sa balas?”

Tan-awa ang bidyo nga “The Parable of the Gems“ (6:47; tan-awa gikan sa time code 2:13 hangtod sa 4:20) ug pamalandongi kon sa unsang paagi nga ang istorya mahisama sa atong pagtuon sa kasulatan.

Kon dili nimo mapakita ang bidyo, laktawi ang una sa mosunod nga mga pangutana. Mahimo usab nimong usbon ang kataposang pangutana ngadto sa “Unsa kaha ang mahimo sa usa ka tawo aron masusi ug magmapasalamaton sa mga bahandi?”

• Unsa ang mipatigbabaw diha kanimo niini nga bidyo?

• Unsa kaha ang girepresentar sa balas? Unsa kaha ang girepresentar sa mga bahandi?

• Unsa ang gibuhat sa babaye aron mahibaloan o magmapasalamaton sa mga bahandi nga iyang nakaplagan?

Ikonsiderar ang pagpasabot sa mosunod diha sa imong kaugalingong mga pulong:

Ang doktrina ug mga baroganan sa ebanghelyo mahimong sama sa mga bahandi sa analohiya. Usa sa mahinungdanon nga katuyoan sa kasulatan mao ang pagtudlo sa doktrina ug mga baroganan sa ebanghelyo. Ang doktrina usa ka sukaranan, dili mausab nga kamatuoran sa ebanghelyo ni Jesukristo. Ang baroganan sa ebanghelyo usa ka giya nga gibase sa doktrina nga mahimong gamiton sa mga indibidwal aron matabangan sila sa paghimo og mga desisyon. Ang labing mahinungdanon nga doktrina ug mga baroganan nga atong makat-onan gikan sa mga kasulatan makatabang nato nga makaila sa Langitnong Amahan ug ni Jesukristo ug makasabot kon unsaon sa pagbalik ngadto sa Ilang presensiya.

Niini nga manwal, usahay makakita ka og mga pagdapit alang sa mga estudyante sa pag-ila sa “mga kamatuoran.” Kini usa ka mas sayon nga paagi sa pagsulti sa mga baroganan o mga pamahayag sa doktrina. Dapita ang mga estudyante sa pagsukod kon unsa kadali sila makaila sa mga kamatuoran (mga baroganan o mga pamahayag sa doktrina) gikan sa mga kasulatan.

• Hain sa mosunod nga mga pamahayag ang labing nagrepresentar kon unsa ka kamasaligon paminaw nimo sa imong abilidad sa pagkaplag sa mga kamatuoran sa ebanghelyo diha sa mga kasulatan?

  • Dili gyod masaligon

  • Medyo masaligon

  • Masaligon kaayo

Paminaw og maayo sa mga tubag sa mga estudyante. Ikonsiderar ang pagpangutana nganong ingon niini ang ilang gibati. Pangita og mga paagi sa tibuok leksiyon aron matabangan sila nga mobati nga mas masaligon samtang sila naningkamot sa pagkaplag sa mga kamatuoran sa ebanghelyo.

Ipasabot

Hatagi ang mga estudyante sa kauban nga handout. Basaha kini og dungan isip usa ka klase. Paghatag og bisan unsa nga dugang nga mga pagpasabot nga sa imong hunahuna mahimong gikinahanglan aron mapasabot kini nga kahanas.

Pagkat-on sa Pag-ila sa Doktrina ug mga Baroganan

Ang ubang doktrina ug mga baroganan sa ebanghelyo klaro nga gipahayag diha sa mga kasulatan. Ang ubang doktrina ug mga baroganan mahimong ipasabot diha sa dagan sa istorya ug makita lamang pinaagi sa pagtuon sa tibuok basahon sa kasulatan, usa ka kapitulo, o usa ka bersikulo. Mahimo nimong bansayon ang mosunod nga importante nga mga lakang sa matag higayon nga ikaw nagtuon sa mga kasulatan aron sa pagtabang kanimo sa pag-ila sa mga kamatuoran sa ebanghelyo:

1. Basaha og hinay-hinay ug pag-ayo.

2. Pangitaa ang klaro nga gipahayag nga mga kamatuoran. Kini usahay gipakita kon ang tagsulat mogamit sa mga pulong sama sa “sa ingon kita makakita,” “busa,” “mao nga,” o “tan-awa.”

3. Pangitaa ang gipasabot nga mga kamatuoran. Makaplagan nimo kini nga mga kamatuoran pinaagi sa pagpangutana sa imong kaugalingon og mga pangutana sama sa mosunod:

   1. Aduna bay importante nga mga ideya, mga pulong, o mga hugpong sa mga pulong—ilabi na ang bisan unsa nga makatabang nimo nga mas makaila sa Langitnong Amahan ug sa Iyang plano o ni Jesukristo ug sa Iyang ebanghelyo?

   2. Unsa ang hinungdan-ug-epekto nga mga relasyon niini nga istorya?

   3. Unsa ang moral o punto sa istorya?

   4. Ngano sa imong hunahuna nga gilakip sa tagsulat kini nga mga panghitabo o mga tudling?

4. Isulat sa imong kaugalingong mga pulong unsa ang imong nakaplagan ug markahi ang mga pulong diha sa mga kasulatan nga nagtudlo niini.

5. Pamalandongi kon ngano nga ang kamatuoran importante diha kanimo. Si Elder Jeffrey R. Holland sa Korum sa Napulog Duha ka Apostoles mitudlo:

   

   Pamalandongi [ug] susiha ang matag pulong, matag bahandi sa kasulatan. … Hupti kini ngadto sa kahayag, ug ituyok kini, tan-awa pag-ayo kon unsa ang repleksiyon ug mobalda didto. … Ang maong pagsusi mahimong makalot sa usa ka bahandi nga natago sa usa ka uma: usa ka perlas nga labing bililhon; usa ka perlas nga labawng bililhon. (“Students Need Teachers to Guide Them” [pakigpulong ngadto sa Church Educational System nga mga religious educator, Hunyo 20, 1992], 4)

Ipakita kon unsaon

Ikonsiderar ang pagpakita kon unsaon kini sa pagbuhat isip usa ka klase pinaagi sa pagsunod sa mga lakang diha sa handout. Pahibaloa ang mga estudyante nga aduna silay kahigayonan sa pagsulay niini unya sa ilang kaugalingon. Ikonsiderar ang pagdrowing og usa ka bahandi diha sa pisara. Sa tupad niini, isulat ang mga kamatuoran nga nahibaloan sa mga estudyante. Ang paggamit sa mga pulong sa mga estudyante usa ka maayong paagi aron mapalig-on ang ilang pagsalig sa pag-apil sa klase.

1. Basaha ang Doktrina ug mga Pakigsaad 18:10–11 sa hinay-hinay ug sa mabinantayon nga paagi.

2. Pangitaa ang klaro nga gipahayag nga mga kamatuoran.

   Mahimong makakaplag ang mga estudyante og doktrina sama sa ang bili sa mga kalag mahinungdanon sa panan-aw sa Dios.

3. Pangitaa ang gipasabot nga mga kamatuoran pinaagi sa pagpangutana sa pipila ka mga pangutana nga gilista diha sa handout.

Agig tubag sa unang pangutana diha sa handout, mahimong makakaplag ang mga estudyante niini nga kamatuoran: Mahimo kitang maghinulsol ug moduol ngadto kang Kristo tungod kay Siya nag-antos alang sa atong mga sala ug mga kasakit ug sa kataposan namatay alang kanato.

Kon ang mga estudyante makamatikod sa hinungdan ug epekto diha sa mga bersikulo 10 ug 11, mahimo nilang makita kini nga kamatuoran: Tungod kay ang bili sa atong mga kalag mahinungdanon sa panan-aw sa Dios, si Jesukristo kinabubut-on nga nag-antos aron kita makahinulsol ug moduol ngadto Kaniya.

Kon ikonsiderar sa mga estudyante ang kataposang pangutana, tingali ilang makita kini nga kamatuoran: Si Jesukristo, ang atong Manunubos, gusto nga atong mahibaloan kon unsa kita ka importante ngadto Kaniya.

Isulat ang kamatuoran nga imong nakaplagan sa usa ka piraso nga papel, diha sa margin sa imong mga kasulatan, o isip usa ka mubo nga sulat diha sa Librarya sa Ebanghelyo nga app. Mahimo usab nimong markahan ang mga pulong nga nagtudlo niini diha sa mga kasulatan.

Paggahin og panahon sa pagpamalandong kon nganong ang kamatuoran nga imong nakaplagan mahimong mahinungdanon o makahuloganon diha kanimo. Paggahin og kadiyot sa pagpamalandong sa kamatuoran nga imong nailhan. Ang mosunod nga tulo ka mga pangutana mahimong makatabang:

1. Ngano kaha nga kini nga kamatuoran maisip nga usa ka bahandi?

2. Unsa ang gitudlo niini diha kanimo mahitungod sa Langitnong Amahan ug ni Jesukristo?

3. Sa unsang paagi kini makatabang kanimo karon?

Dapita ang pipila ka mga estudyante sa pagpakigbahin sa ilang mga hunahuna. Samtang ilang madungog kon unsay gihunahuna ug gipamalandongan sa ilang mga klasmeyt, makadasig kini kanila sa paghunahuna og mas lawom mahitungod sa mga kamatuoran diha sa mga kasulatan.

Pagbansay

Dapita ang mga estudyante sa pagbuhat sa mosunod nga kalihokan nga magtinagsa. Mahimong kompletohon sa mga estudyante ang kalihokan diha sa ilang mga journal sa pagtuon o, diha sa managlahi nga mga piraso sa papel kon gusto nimo nga ipakigbahin nila ang ilang nakaplagan sa ubang mga estudyante sa kalihokan sa ubos. Mahimo nilang gamiton ang gihatag nga handout aron matabangan sila.

Alang sa pagbansay, buhata ang mosunod nga kalihokan:

1. Pagdrowing og hulagway sa duha ka bahandi.

2. Samtang magtuon ka og labing menos duha sa mosunod nga mga tudling, o ubang mga tudling nga imong gipili, paglista og usa ka “bahandi” sa kamatuoran nga imong makaplagan sa matag usa: Doktrina ug mga Pakigsaad 1:30; 8:2–3; 18:15–16; 19:16–19; 21:4–6; 49:15–17; 58:42–43; 76:22–24; 131:1–4; 135:3.

3. Isulat kon ngano nga ang matag kamatuoran usa ka espirituhanong bahandi alang kanimo. Ilakip ang unsay gitudlo niini diha kanimo mahitungod sa Langitnong Amahan ug ni Jesukristo ug sa unsang paagi kini makatabang kanimo karon.

Kon gikompleto sa mga estudyante ang kalihokan diha sa managlahi nga mga piraso sa papel, mahimo nilang ibaylo ang ilang mga papel sa ubang mga estudyante ug ipakigbahin ang ilang nakat-onan ngadto sa usag-usa. Mahimo usab nga mopili ang mga estudyante og mga bahandi sa kasulatan nga ilang gibati nga hilabihan ka makahuloganon sa mga kabatan-onan karon ug maghimo og lista niini diha sa pisara.

Base sa imong kasinatian karon, nganong gusto man nimo nga makakaplag ug mamalandong sa mga kamatuoran samtang magtuon ka?

Isulat diha sa imong journal sa pagtuon kon unsaon nimo pagpangita og mga kamatuoran samtang magtuon ka sa ebanghelyo. Usa ka paagi nga mahimo nimo kining buhaton mao ang pag-ila ug pagpamalandong og labing menos usa ka kamatuoran sa usa ka adlaw gikan sa imong personal nga pagtuon sa kasulatan. Mahimo nimong ikonsiderar ang pagsulat sa mga kamatuoran nga imong nahibaloan diha sa imong mga kasulatan o diha sa usa ka journal sa kasulatan.

Ikonsiderar ang pagdapit og usa ka estudyante sa matag adlaw sulod sa pipila ka mga leksiyon sa pagpakigbahin og usa ka bahandi sa kasulatan nga ilang nakaplagan sa ilang pagtuon. Mahimo kining buhaton sa mga estudyante pinaagi sa pagpakigbahin og ideya sa kasulatan [scriptural thought] isip kabahin sa usa ka debosyonal. Pangita og laing mga kahigayonan sa umaabot nga mga leksiyon aron makapadayon ang mga estudyante sa pagpraktis niining importante nga kahanas.

Dugang nga mga Kapanguhaan

Ngano nga kinahanglan nakong ilhon ang mga kamatuoran sa ebanghelyo gikan sa mga kasulatan?

Si Elder Richard G. Scott (1928–2015) sa Korum sa Napulog Duha ka Apostoles mitudlo:

Samtang nagtinguha kamo og espirituhanong kahibalo, pangitaa ang mga baroganan. Sa mabinantayong paagi ilahi kini gikan sa detalye nga gigamit sa pagpasabut niini. Ang mga baroganan lig-on nga mga kamatuoran, nga mahimong magamit sa daghang nagkalainlaing mga kahimtang. Ang usa ka tinuod nga baroganan naghimo og klaro nga mga desisyon bisan naa sa labing makalibog ug mapugsanon nga mga kahimtang. Takos ang bililhong paningkamot sa pag-organisar sa kamatuoran nga atong gitigom ngadto sa yano nga mga pamahayag sa baroganan. (Richard G. Scott, “Acquiring Spiritual Knowledge,” Ensign, Nov. 1993, 86)

Si Elder David A. Bednar sa Korum sa Napulog Duha ka Apostoles mipamatuod sa mosunod:

Ang pagkat-on, pagsabot, ug pagsunod sa mga baroganan makapalig-on sa atong hugot nga pagtuo sa Manluluwas, makapalambo sa atong pagtahod Kaniya, ug makadapit og daghang panalangin ug espirituhanong mga gasa sa atong kinabuhi. …

Ang husto nga mga baroganan makapahimo nato sa pagkaplag sa atong dalan ug sa pagbarog nga lig-on, makanunayon, ug dili matarog aron dili mawala ang atong balanse ug mahulog sa naghaguros nga mga unos sa kangitngit ug kalibog sa ulahing mga adlaw. (David A. Bednar, “Ang mga Baroganan sa Akong Ebanghelyo,” Liahona, Mayo 2021, 123, 126)

Si Presidente Marion G. Romney mipasabot:

Ang usa ka tawo dili mahimong matinud-anon nga magtuon sa mga kasulatan kon wala makakat-on sa mga baroganan sa ebanghelyo tungod kay ang mga kasulatan gisulat aron sa pagpreserbar sa mga baroganan alang sa atong kaayohan. (“The Message of the Old Testament” Church Educational System symposium, Aug. 17, 1979], 3)

Unsa ang bili sa paggahin og panahon sa pagsulat sa mga kamatuoran nga atong makaplagan?

Si Elder B. H. Roberts mitudlo:

Aron mahibaloan, ang kamatuoran kinahanglan nga ipahayag ug ang mas klaro ug mas kompleto ang pamahayag, mas maayo nga oportunidad sa Balaang Espiritu sa pagpamatuod ngadto sa mga kalag sa katawhan nga ang buhat tinuod [New Witnesses for God, 3 vols. (1909), 2:vii]. (B. H. Roberts, sa James E. Faust, “What I Want My Son to Know before He Leaves on His Mission,” Ensign, Mayo 1996, 41; Isangyaw ang Akong Ebanghelyo: Usa ka Giya sa Misyonaryo nga Pagpangalagad [2004], 219)

Dugang nga mga Kalihokan sa Pagkat-on

Klaro nga gipahayag nga mga baroganan

Kon makabenepisyo ang mga estudyante sa pagkakita sa mga ehemplo sa mga kamatuoran nga nagsunod sa mga pulong ug mga hugpong sa mga pulong sama sa “sa ingon kita makakita,” “busa,” “mao nga,” o “tan-awa,” mahimo nimong ipatan-aw kanila ang mosunod nga mga kasulatan ug sulayan ang pag-ila sa baroganan:

• Helaman 3:27: “Sa ingon kita makakita nga ang Ginoo maloloy-on ngadto sa tanan kinsa, diha sa katim-os sa ilang mga kasingkasing, motawag nganha sa iyang balaan nga ngalan.”

• Alma 12:10: “Busa, siya nga mopatig-a sa iyang kasingkasing, ang mao modawat sa gamay nga bahin sa pulong; ug siya nga dili mopatig-a sa iyang kasingkasing, ngadto kaniya ihatag ang dako nga bahin sa pulong.”

• Mga Taga-Efeso 6:13: “Busa dad-a ninyo ang tibuok hinagiban sa Dios, aron makasukol kamo inig abot na sa adlaw sa kalisdanan, ug makapugong kamo sa inyong baroganan tapos sa inyong tanang pakigbisog.”

• Alma 41:10: “Tan-awa, ako moingon nganha kanimo, ang pagkadaotan dili mahitabo nga kalipay.”

Mga giya alang sa pagsukod sa mga kamatuoran

Sa pagkat-on kon unsaon pag-ila sa mga kamatuoran gikan sa mga kasulatan, sayon ang pag-ila sa mga pamahayag o pagsulat og mga baroganan nga dili tinuod ug dili mao ang gituyo sa orihinal nga tagsulat. Mahimong mapuslanon ang paghatag sa mga estudyante sa mga pangutana nga gilista sa ubos aron matabangan sila sa pagsukod sa katukma sa mga baroganan nga ilang nakaplagan. Human ninyo mailhan ang usa ka baroganan isip usa ka klase, mahimo nimong ipakita kon unsaon paggamit niini nga mga pangutana sa dili pa kini sulayan sa mga estudyante sa ilang kaugalingon.

• Ang unsay imong giila ba gipamatud-an sa ubang mga kasulatan ug sa kasamtangan nga mga pagtulun-an sa mga lider sa Simbahan?

• Ang unsay imong giila nahiuyon ba sa dinasig nga katuyoan sa orihinal nga magsusulat kutob sa imong masulti? (Mahimo nimong i-rebyo ang mga bersikulo nga nahauna ug nagasunod sa kamatuoran nga imong giila ug pamalandongi kon kini nahisubay ba sa unsay imong gihunahuna nga gituyo sa orihinal nga magsusulat.)

• Ang imong giila ba tinuod sa tanang panahon, sa tanang mga kahimtang, ug sa tanang mga kultura?

• Ang pagsabot ba sa unsay imong nailhan makatabang kanimo sa pagtuman sa imong mahangtorong padulngan diha sa plano sa Langitnong Amahan?

• Gibati ba nimo ang Espiritu Santo nga nagpamatuod nga ang imong giila tinuod?

Ubang mga himan aron pagtabang sa mga estudyante sa pag-ila sa mga kamatuoran

Ikonsiderar ang pag-ila sa mosunod nga dugang nga mga himan aron matabangan ang mga estudyante sa pag-ila sa mga baroganan.

Background nga impormasyon: Kadaghanan sa mga pagpadayag diha sa Doktrina ug mga Pakigsaad gipadayag tungod kay adunay nangutana o ang mga Santos nag-atubang og problema o kalisdanan. Ang pagkahibalo niini nga impormasyon makatabang kanimo nga masabtan kon nganong ang Ginoo mipadayag sa Iyang gibuhat. Pananglitan, dapita ang mga estudyante sa pagbasa sa ulohan nga seksiyon sa usa ka seksiyon sa Doktrina ug mga Pakigsaad ug pangitaa ang mga tubag niini nga mga pangutana:

• Alang kang kinsa kini nga pagpadayag?

• Unsa ang pangutana o sitwasyon nga nag-una niini nga pagpadayag?

Gipamubo nga mga pamahayag: Mahimo usab nga mapuslanon ang pagkahibalo nga ubos sa ulohan nga seksiyon sa matag seksiyon sa Doktrina ug mga Pakigsaad, adunay usa ka parapo nga nagpamubo sa mga grupo sa mga bersikulo. Mapuslanon usab kini kon mosulay sa pag-ila sa mga baroganan. Pananglitan, basaha ang parapo sa ubos sa ulohan nga seksiyon alang sa seksiyon nga imong gipili.

Uban niini nga impormasyon nga anaa sahunahuna, basaha ang seksiyon o ang usa ka bahin sa seksiyon nga imong gipili nga pangitaan og mga kamatuoran sa ebanghelyo.

Pagkaplag og mga kamatuoran diha sa mga kasulatan