Leksiyon 172: Mga Kahanas sa Pagtuon sa Kasulatan

Mga Himan sa Pagtuon sa-Kasulatan

Paggamit sa mga tabang sa pagtuon

Kini nga leksiyon makatabang kanimo sa pagpalambo sa imong personal nga pagtuon sa kasulatan ug sa paglig-on sa imong relasyon ngadto sa Langitnong Amahan ug ni Jesukristo pinaagi sa paggamit sa mga himan sa pagtuon sa kasulatan.

Pagpangandam sa estudyante: Dapita ang mga estudyante sa pagtambong nga andam sa pagpakigbahin sa mga himan nga anaa aron sa pagtabang kanato sa kalibotan karon nga wala niini 50 ka tuig ang milabay. Hangyoa sila nga mahimong andam sa pagpasabot kon unsa nga kalahian ang mahimo niini nga mga himan sa atong mga kinabuhi.

Posible nga mga Kalihokan sa Pagkat-on

Mga Himan

Ikonsiderar ang pagpakita sa mosunod nga mga hulagway (o ubang susama nga mga hulagway) ug pagdapit sa mga estudyante sa pagtubag sa mosunod nga mga pangutana.

• Sa unsang paagi kini nga mga himan nakaimpluwensiya sa atong mga abilidad sa pagbiyahe ug pagtrabaho?

• Unsa ang ubang mga himan nga naugmad sulod sa mga katuigan nga nakadugang sa atong mga abilidad sa pagbuhat sa mga butang?

• Sa unsang paagi malahi ang kinabuhi kon wala kita mahibalo niini nga mga himan o kon unsaon kini sa paggamit?

Sama sa pagbiyahe ug trabaho, adunay mga himan nga makatabang kanato sa pagtuon sa mga kasulatan ug mas mapaduol ngadto sa Langitnong Amahan ug ni Jesukristo.

Si Brother Tad R. Callister, kanhi Kinatibuk-ang Presidente sa Sunday School, mipakigbahin sa mosunod:

Ang kasamtangan nga henerasyon nakadiskobre sa mga kamatuoran, mga panabot, ug dugang nga mga kompirmasyon nga wala mahibaloi sa daghan sa iyang mga katigulangan—dili tungod kay ang kasamtangan nga kaliwatan kinahanglan nga mas matarong, ni tungod kay kini adunay mas dako nga salabotan, apan tungod kay kini adunay mas maayo nga mga himan. Ang labing hanas nga mag-uuma nga adunay usa ka kabayo ug daro dili katugma sa usa ka parehas nga hanas nga mag-uuma nga adunay usa ka high-tech nga traktor sa iyang mando. Ang mathematician nga adunay slide rule walay dag-anan sa iyang kauban nga adunay high-speed nga kompyuter. Ang usa ka Galileo nga adunay usa ka gikuptan nga teleskopyo sa kamot dili gyod makadiskobre sa uniberso sama sa usa ka Galileo nga adunay labing bag-ong matang sa teleskopyo nga iyang magamit. Ang Ginoo kinahanglan gayod nga magdahom og labaw pa kanato diha sa pagka-eskolar sa ebanghelyo kay sa nangaging mga henerasyon, tungod kay kita adunay mas daghan pa nga magamit. (Tad R. Callister, The Infinite Atonement [2000], 21)

Pamalandongi ang mosunod nga mga pangutana:

• Unsa ka kasayod bahin sa mga himan sa pagtuon sa kasulatan nga makatabang nimo sa pagpangita og mga tubag sa imong mga pangutana ug mas maduol ngadto sa Langitnong Amahan ug ni Jesukristo?

• Unsa ka maayo paminaw nimo nga imoha kining gigamit?

Samtang magtuon ka niini nga leksiyon, tinguhaa nga mas masabtan ang mga himan sa pagtuon sa kasulatan ug sa unsang paagi kini makatabang kanimo.

Ipasabot: Paggamit sa mga himan sa pagtuon sa kasulatan

Buhata ang mosunod aron matabangan ang mga estudyante nga klarong masabtan kon unsa ang mga himan sa pagtuon sa kasulatan.

Dapita ang mga estudyante sa pagduol ug pagsulat og bisan unsang mga himan sa pagtuon sa kasulatan nga ilang nahibaloan nga gihatag sa Ginoo aron sa pagtabang kanato sa pagtubag sa atong mga pangutana ug mas mapaduol ngadto Kaniya. Ikonsiderar ang pagdugang og bisan hain sa mosunod nga mga himan nga wala hisgoti sa mga estudyante.

Mga Footnote

Giya ngadto sa mga Kasulatan

Mga Mapa

Mga Hulagway sa Kasaysayan sa Simbahan

Itudlo ang nagkalainlaing mga himan diha sa pisara ug pangutan-a ang mga estudyante kon unsa kini ug asa nila kini makit-an. Kon ang mga estudyante dili pamilyar sa bisan hain niini, ikonsiderar ang paggamit sa mosunod nga mga pagpasabot ug ipakita sa mga estudyante kon asa kini mapalgan.

Mga Footnote—Ang mga footnote gitumbok diha sa pino, gugmay nga mga letra sa usa ka bersikulo nga mogiya kanimo ngadto sa ubos sa pahina diin makakita ka og dugang nga mga pakisayran sa kasulatan o mga hilisgotanan nga may kalabotan sa bersikulo. Sa Librarya sa Ebanghelyo [Gospel Library] nga app, ang pag-tap sa footnote makapakita sa samang impormasyon.

Giya ngadto sa mga Kasulatan—Kini nga kapanguhaan naglangkob sa mubo, yano nga mga kahulogan sa mga termino sa kasulatan uban sa pipila ka mga pakisayran sa kasulatan nga may kalabotan sa matag termino. Makita kini sa kataposan sa Basahon ni Mormon o sa Librarya sa Ebanghelyo [Gospel Library] nga app ubos sa mga Kasulatan, dayon sa Mga Tabang sa Pagtuon.

Mga Mapa ug Mga Hulagway sa Kasaysayan sa Simbahan—Kini nga mga kapanguhaan makita sa kataposan sa triple combination o sa Gospel Library nga app ubos sa mga Kasulatan, dayon sa Mga Tabang sa Pagtuon.

Modelo

Sa pagmodelo gamit ang mga himan sa pagtuon sa kasulatan isip usa ka klase, buhata ang mosunod nga kalihokan:

Hunahunaa kon unsa ang imong nahibaloan ug unsa ang gusto nimo mahibaloan bahin sa pagpasaylo.

Basaha ang Doktrina ug mga Pakigsaad 64:9–11, ug pangitaa ang mga kamatuoran mahitungod sa pagpasaylo.

• Unsay imong nakat-onan? Unsa ang natabang niini nga mga bersikulo nga mas masabtan nimo ang mahitungod sa Langitnong Amahan ug ni Jesukristo?

  Karon dapita ang mga estudyante sa pagpakigbahin kon unsa nga mga himan ang mahimo nilang magamit sa pagpalawom sa ilang pagsabot. Samtang ang usa ka estudyante mopakigbahin og usa ka himan, pangutan-a sila kon unsaon paggamit niini, ug dapita ang tanang estudyante sa pagsunod sa iyang direksiyon. Pananglitan, mahimo silang mangita og mga kasulatan nga makita sa mga footnote niini nga mga bersikulo. Mahimo usab nilang pangitaon ang “Jesukristo” o “Pagtubos” diha sa Giya ngadto sa mga Kasulatan, o “Pasaylo” sa index sa Triple Combination.

  Dapita ang mga estudyante sa pagpakigbahin kon unsay ilang nakat-onan ug kon nganong makahuloganon kini kanila.

• Sa unsang paagi kining mga himan sa pagtuon sa kasulatan nakatabang sa imong pagtuon?

Pagbansay

Dapita ang mga estudyante sa pagduol ug pagsulat diha sa pisara sa mga hilisgotan sa ebanghelyo o mga pangutana nga sila o ang uban nga ilang nailhan nga gustong mahibalo pa og dugang o natubag na. Sa laing paagi, mahimo nimong gamiton ang usa ka wala mailhi nga himan sa pagbotar aron makuha ang ilang mga tubag.

Kon ang mga estudyante maglisod sa pagpangita og mga ideya, ikonsiderar ang pagsulat sa mosunod nga mga hilisgotanan diha sa pisara. Dapita ang mga estudyante sa pagpili og usa niini nga mga hilisgotanan (o laing hilisgotanan nga ilang gipili) nga aduna silay mga pangutana o nga ilang gibati nga ang pagtuon niini makapaduol nila ngadto ni Jesukristo:

• Pagpasaylo

• Pagdawat og pagpahayag

• Langitnong Amahan

• Nganong kinahanglan nato si Jesukristo

• Kinabuhi sa wala pa dinhi sa yuta

• Kalibotan sa Espiritu

• Kataposang Paghukom

• Kaminyoon ug pamilya

• Ang Ikaduhang Pag-anhi ni Jesukristo

Sa laing paagi, mahimong mag-drama-drama ang mga estudyante nga ang usa ka higala gusto nga makahibalo og dugang mahitungod sa usa sa mga hilisgotanan sa ibabaw.

Gamit ang mga himan sa pagtuon sa kasulatan-, paggahin og pipila ka minuto sa pagtuon niini nga hilisgotanan o pangutana. Pangita og mga kamatuoran nga makahuloganon diha kanimo, motubag sa imong mga pangutana, o modala kanimo nga mas duol ngadto sa Langitnong Amahan ug ni Jesukristo.

Human ang igong panahon, ikonsiderar ang pagdapit sa mga estudyante sa pagpakigbahin nga managpares o sa gagmay nga mga grupo sa unsay ilang nakat-onan ug giunsa nila pagkat-on. Dayon dapita ang mga estudyante sa pagtubag sa mosunod nga pangutana sa pagtapos sa klase:

• Sa unsang paagi nga ang kanunay nga paggamit niini nga mga himan sa imong personal nga pagtuon sa kasulatan makaimpluwensiya sa imong kahibalo ug relasyon ngadto sa Langitnong Amahan ug ni Jesukristo?

Dugang nga mga Kapanguhaan

Sa unsang paagi nga ang pagtuon sa mga kasulatan makapanalangin pag-ayo sa akong kinabuhi?

Si Presidente Boyd K. Packer (1924–2015) sa Korum sa Napulog Duha ka Apostoles mitudlo:

Ang kasulatan naghupot sa mga yawe sa espirituhanong panalipod. Naglangkob kini sa mga doktrina ug mga balaod ug mga ordinansa nga makahatag sa matag anak sa Dios og usa ka pagpamatuod kang Jesukristo isip Manluluwas ug Manunubos.

Sa katuigan nga pagpangandam, anaa ang dakong paningkamot aron mahubad ang kasulatan sa tanang pinulongan, nga dunay mga footnote ug mga cross-reference. Naningkamot kami nga magamit kini sa tanan nga gustong magkat-on. Tudloan kita niini asa kita moadto ug unsay buhaton. Nagtanyag kini og paglaom ug kahibalo.

Mga katuigan ang milabay, si Elder S. Dilworth Young sa Seventy mitudlo kanako og leksiyon bahin sa pagbasa sa kasulatan. Nagkaproblema ang usa ka stake tali sa mga miyembro, ug gikinahanglan nga mahatagan og tambag.

Akong gipangutana si Presidente Young, “Unsay akong isulti?”

Yano ra ang iyang tubag, “Sultihi sila sa pagbasa sa kasulatan.”

Nangutana ko, “Asa niini nga kasulatan?”

Miingon siya, “Dili gyod kini igsapayan. Pananglitan ingna sila nga ablihi ang Basahon ni Mormon, ug sugdi ang pagbasa. Sa dili madugay ang pagbati sa kalinaw ug inspirasyon moabot, ug ang sulbad moabot.” (Boyd K. Packer, “Ang Yawe sa Espirituhanong Panalipod,” Liahona, Nob. 2013, 27)

Si Presidente Packer, naghisgot sa mga footnote ug ubang mga himan diha sa mga kasulatan, mitudlo sa mosunod:

Sa paglabay sa mga katuigan, kini nga mga kasulatan mobunga og nagsunod-sunod nga mga henerasyon sa matinud-anong mga Kristiyanos kinsa nakaila ni Ginoong Jesukristo ug andam nga mosunod sa Iyang kabubut-on. …

… Maabli ang mga pagpadayag ngadto kanila nga wala mahitabo sa uban sa kasaysayan sa kalibotan. … Mapalambo nila ang panabot sa ebanghelyo lapas sa unsay nakab-ot sa ilang mga katigulangan. Makaangkon sila og pagpamatuod nga si Jesus mao ang Kristo ug mahimong sarang sa pagsangyaw Kaniya ug sa pagpanalipod Kaniya. …

Kini nga mga pakisayran gikan sa upat ka mga tomo [volumes] sa kasulatan nga naglangkob sa labing komprehensibo nga pagtigom sa kasayoran sa kasulatan sa misyon ug mga pagtulun-an ni Ginoong Jesukristo nga natigom sa kasaysayan sa kalibotan. (Boyd K. Packer, “Mga Kasulatan,” sa Conference Report, Okt. 1982, 75–76; o Ensign, Nob. 1982, 53)

Unsa nga mga himan ang anaa sa mga edisyon sa mga kasulatan sa mga Santos sa Ulahing mga Adlaw?

Ikonsiderar ang pagrebyo sa “Scripture Study Tools” sa Oktubre 2006 nga Ensign aron makakaplag og dugang impormasyon bahin niini.

Dugang nga mga Kalihokan sa Pagkat-on

Dugang nga praktis gamit ang mga himan sa pagtuon

Kon makabenepisyo ang mga estudyante gikan sa pagkat-on og dugang kon unsaon paggamit ang mga himan sa pagtuon nga giduso niini nga leksiyon, ikonsiderar ang pagdapit kanila sa pagdirekta sa ilang pagtagad ngadto sa “Using the New Scriptures” ni Presidente Boyd K. Packer (1924–2015), kanhi Presidente sa Korum sa Napulog Duha ka Apostoles, sa Disyembre 1985 nga Ensign. Ipares-pares ang mga estudyante ug ipatuon sa duha ang seksiyon sa “Mga Footnote.” Human sa igong panahon, dapita ang duha sa pagtudlo sa usag-usa kon unsay ilang nakat-onan ug sa pagpangutana sa usag-usa og pangutana nga ilang masiksik gamit kini nga mga himan. Makatabang dayon sila sa usag-usa sa pagpangita og mga tubag.

Rebyoha ang nagkalainlaing mga kalihokan ug pangitaa kadtong mas nakatutok sa Doktrina ug mga Pakigsaad o niadtong makatabang sa imong mga estudyante nga makabaton og mas gamhanang pagtuon sa kasulatan.

Usa ka pananglitan kon unsaon paggamit niini nga materyal mao ang pagbahin sa mga estudyante ngadto sa grupo nga taglima. Pag-assign og usa ka tawo sa matag grupo sa matag usa sa mosunod nga mga ulohan diha sa leksiyon: “Mga Footnote,” ug “Sunodsunod nga Panghitabo, mga Mapa, ug mga Hulagway sa Kasaysayan sa Simbahan.” Mahimo nilang tun-an ang materyal sa ilang seksiyon ug mangandam sa pagtudlo sa ilang grupo mahitungod sa na-assign kanila nga himan.