Leksyon 169: Mga Kahanas sa Pagtuon sa Kasulatan

Pagtutok kang Jesukristo diha sa mga Kasulatan

Pagtuon sa mga Ngalan, mga Titulo, ug mga Hiyas sa Manluluwas

Usa sa mahinungdanong mga katuyoan sa mga kasulatan mao ang pagtabang kanato nga makat-on mahitungod sa Langitnong Amahan ug ni Jesukristo. Magkadaghan ang atong makat-onan Kanila, mas labaw pa nga molambo ang atong hugot nga pagtuo diha Kanila. Kini nga leksiyon gituyo aron sa pagtabang kanimo sa pagtutok sa Manluluwas samtang nagtuon sa mga kasulatan, ilabi na sa Doktrina ug mga Pakigsaad.

Posibleng mga Kalihokan sa Pagkat-on

Unsay imong nakita?

Ikonsiderar ang pagbuhat sa mosunod nga kalihokan o usa sa imong kaugalingon aron sa pagpaila sa kahanas sa pagtuon sa kasulatan sa pagpunting ngadto sa Manluluwas. Aron mapalambo ang pagkaandam sa tigkat-on, mahimo nimong ipakita ang hanap [blurred] nga bersiyon sa hulagway aron makita sa mga estudyante sa ilang pag-abot.

Tan-awa ang mosunod nga hanap nga litrato ug sulayi ang paghulagway kon unsa sa imong hunahuna ang nahitabo.

Sunod, tan-awa ang pareho nga hulagway nga gitutokan.

Samtang ang mga estudyante mosusi sa imahe sa Manluluwas nga nangalagad ngadto sa mga tawo sa karaang Amerika, ikonsiderar ang pagpangutana sa mosunod. Samtang motubag ang mga estudyante sa imong mga pangutana, pahibaloa sila nga imong gipakabilihan ang ilang mga panabot ug pag-apil.

• Unsa nga mga detalye ang imong namatikdan karon nga ang hulagway maoy gipuntingan?

• Samtang nagtan-aw ka niini nga imahe, unsa man ang imong mga hunahuna o mga pagbati nga naangkon mahitungod sa Manluluwas?

Ikonsiderar ang pagpakigbahin og impormasyon sama sa mosunod aron sa pagtabang sa mga estudyante nga mas makasabot sa katuyoan alang karong adlawa.

Ang pulong nga pagtutok mahimong nagpasabot sa paghimo sa usa ka butang nga mas klaro, sa paghimo niini nga sentro sa interes, o sa paghatag og partikular nga pagtagad niini.

• Unsa ang pipila ka mga paagi nga kita makapaningkamot sa pagpunting sa Manluluwas samtang kita magtuon sa mga kasulatan?

• Ngano kaha nga gusto nato nga motutok ngadto Kaniya?

Samtang magtuon ka niini nga leksiyon, tinguhaa ang giya gikan sa Espiritu Santo ug pangitaa ang mga rason nga mahimong usa ka panalangin alang kanimo ang pagtutok ngadto sa Manluluwas diha sa imong pagtuon sa kasulatan. Pamalandongi ang mga paagi nga mahimo nimo Siya nga mao ang tutokan sa imong pagtuon.

Ihulagway: Ilha ang mga ngalan ug mga ulohan ni Jesukristo

Usa ka kahanas nga makatabang kanimo sa pagpunting ngadto sa Manluluwas mao ang pagpangita sa Iyang daghang mga ngalan ug mga titulo samtang nagtuon sa mga kasulatan. Kini nga mga ngalan ug mga titulo nagpakita sa mga papel nga gihatag sa Langitnong Amahan ngadto Kaniya.

Ipakita kon unsaon

Ikonsiderar ang pagpakita ngadto sa mga estudyante kon unsaon kini nga kahanas pinaagi sa paggamit sa mosunod nga tudling sa kasulatan o lain nga imong pilion. Mahimo usab nimong ipakita ang imahe gikan sa sinugdanan sa leksiyon o laing imahe sa Manluluwas diha sa pisara. Samtang ang nagkalainlaing mga ngalan ug mga titulo hinganlan sa tibuok leksiyon, mahimong dapiton ang mga estudyante sa pagsulat niini sa palibot sa hulagway sa Manluluwas diha sa pisara ug sa pagpasabot kon nganong ang ngalan o titulo makahuloganon ngadto kanila.

Basaha ang Doktrina ug mga Pakigsaad 6:21 ug pangitaa ang usa o daghan pang mga ngalan o mga titulo nga gigamit ni Jesus sa paghulagway sa Iyang Kaugalingon.

• Unsay imong nadiskobrehan?

  Posible nga mga tubag niining pangutana lagmit maglakip sa “Jesukristo,” “ang Anak sa Dios,” o “Ako ang kahayag.” Ang mga estudyante mahimong mainteresado nga makahibalo nga ang English nga mga titulo nga “Christ” ug “Messiah” naggikan sa Greek ug Hebreo nga mga hubad sa “ang dinihogan.” Sa karaan nga mga panahon, ang mga hari ug mga pari kinsa adunay espesyal nga mga katungdanan sa pagpahigayon gidihogan gamit ang lana (tan-awa sa Giya ngadto sa mga Kasulatan, “Dihog,” scriptures.ChurchofJesusChrist.org). Busa, ang Manluluwas, kinsa mipahigayon sa labing makahuloganon nga katungdanan sa tanan, mao “ang dinihogan nga Propeta, Pari, Hari, ug Tigtubos” alang sa tanang mga anak sa Dios (Giya ngadto sa mga Kasulatan, “Mesiyas,” scriptures.ChurchofJesusChrist.org).

• Unsay atong makat-onan mahitungod ni Jesus gikan niini nga mga ngalan o mga titulo?

• Ngano nga kana nga titulo makahuloganon diha kanimo? Sa unsa nga mga paagi nga kini nga pagsabot mahitungod ni Jesukristo makatabang kanimo karon sa imong kinabuhi?

Pananglitan, kon kita mobati nga kita nagkinahanglan og dugang kahayag sa atong mga kinabuhi, kita makahinumdom sa Manluluwas nga mao kana nga kahayag. Siya makagiya kanato sa atong dalan pabalik ngadto sa Langitnong Amahan.

Aron matabangan ka sa pagpamalandong sa kamahinungdanon sa mga ngalan ug mga titulo, tan-awa ang bidyo nga “‘Nombre’—What Should We Name Him?” (1:47) anaa sa ChurchofJesusChrist.org.

Pagbansay

Ikonsiderar ang mga panginahanglan sa imong mga estudyante samtang magdesisyon ka kon kinahanglan ba nilang buhaton ang mosunod nga kalihokan sa tinagsa o diha sa gagmay nga mga grupo. Dugang pa, mahimong mopakigbahin ang mga estudyante og mga titulo nga ilang nakit-an gikan sa ilang personal nga pagtuon nga makahuluganon ngadto kanila.

Ipadayon ang pagpraktis sa pag-ila sa lainlaing mga ngalan ug mga ulohan ni Jesus diha sa Doktrina ug mga Pakigsaad. Ang uban nga mga tudling nga inyong gitun-an mahimong maglangkob og labaw pa sa usa ka ngalan o titulo. Kon gikinahanglan nimo ang tabang sa pagsabot sa kahulogan sa ngalan o titulo, ikonsiderar ang mga kapanguhaan sama sa Giya ngadto sa mga Kasulatan o sa Bible Dictionary, nga anaa sa scriptures.ChurchofJesusChrist.org.

Basaha ang pipila o ang tanan sa mosunod nga tudling sa kasulatan ug irekord ang bisan unsang ngalan o mga ulohan nga imong nadiskobrihan sa imong journal sa pagtuon. Pamalandongi kon unsa ang inyong makat-onan mahitungod ni Jesus gikan sa ngalan o titulo ug kon sa unsang paagi nga Siya makatabang kanimo sa imong kinabuhi.

1. Doktrina ug mga Pakigsaad 10:70

2. Doktrina ug mga Pakigsaad 19:1

3. Doktrina ug mga Pakigsaad 38:22

4. Doktrina ug mga Pakigsaad 45:3

5. Doktrina ug mga Pakigsaad 50:44

Human sa paghatag sa mga estudyante og oras sa pagtuon ug pagpamalandong, dapita sila sa pagpakigbahin unsa ang ilang nakat-onan ug nabati gikan sa kalihokan. Pangita og mga paagi sa pagpasabot kon sa unsang paagi ang mga ngalan sa Manluluwas nahiuyon sa Iyang mga paningkamot sa pagtabang kanato.

Ihulagway: Pangitaa ang balaan nga mga hiyas sa Manluluwas

Ang mosunod mao ang laing paagi sa pagpunting ngadto sa Manluluwas samtang nagtuon sa mga kasulatan. Kon duna kamoy igong panahon sa inyong leksiyon, mahimo nimong ipakita kon unsaon ug dapiton ang mga estudyante sa pagpraktis usab niini nga kahanas.

Ang laing paagi sa pagpunting ngadto sa Manluluwas samtang nagtuon sa mga kasulatan mao ang pagpangita sa Iyang balaanong mga hiyas. Ang hiyas usa ka kalidad o kinaiya nga naangkon o naugmad sa usa ka tawo, sama sa pagkamatinud-anon o pagkamabination.

Ipakita kon unsaon

Kon gikinahanglan, ikonsiderar ang pagpakita ngadto sa mga estudyante kon unsaon sa pag-ila ang usa ka hiyas sa Manluluwas gamit ang usa sa mga tudling sa sunod nga seksiyon o usa ka tudling nga imong pilion. Usa ka paagi sa paghimo sa mosunod nga kalihokan mao ang pagsulat sa mga tudling gikan sa Doktrina ug mga Pakigsaad ngadto sa managlahi nga mga piraso sa papel ug ibutang kini sa nagkalainlaing mga dapit sa tibuok lawak [room]. Mahimong magtinabangay ang mga estudyante diha sa gagmay nga mga grupo sa pagduol sa matag piraso sa papel ug sa pagsiksik sa tudling alang sa usa ka balaanon nga hiyas sa Manluluwas.

Pagbansay

Basaha ang pipila o ang tanan sa mosunod nga mga tudling ug pangitaa ang balaanong mga hiyas sa Manluluwas. Pilia ang usa ka hiyas nga makahuloganon diha nimo ug sa daklit ipasabot kon unsaon sa pag-ila niana nga hiyas sa Manluluwas makatabang nimo nga mas mohigugma ug mosalig Kahiya nga labaw pa.

1. Doktrina ug mga Pakigsaad 19:24

2. Doktrina ug mga Pakigsaad 61:2

3. Doktrina ug mga Pakigsaad 62:6

4. Doktrina ug mga Pakigsaad 101:9

5. Doktrina ug mga Pakigsaad 133:52

Pananglitan, mahimong makaila ang mga estudyante sa kaandam ni Kristo sa pagbuhat sa kabubut-on sa Langitnong Amahan seksiyon 19. Kon ang mga estudyante nagsulat og mga ngalan ug mga titulo libot sa usa ka imahe sa Manluluwas diha sa pisara, awhaga sila sa pagsulat sa mga hiyas nga ilaha usab nga nasidkobrihan. Pangita og mga paagi sa pagpasalamat sa mga estudyante alang sa ilang pag-apil ug ipasabot kon nganong kita kinahanglan mohigugma ug mosalig sa Manluluwas.

Tutokan ang bahin sa Manluluwas sa matag seksiyon

• Base sa unsay imong nakat-onan ug napraktis karon, sa unsang paagi ang pagpunting kang Jesukristo makahimo og kalainan diha sa imong pagtuon sa kasulatan?

Ikonsiderar ang pagpakigbahin sa imong kaugalingong pagpamatuod mahitungod sa kamahinungdanon sa pagtutok sa Manluluwas kon magtuon sa mga kasulatan. Dapita ang mga estudyante sa pagtutok sa Manluluwas sa matag seksiyon sa Doktrina ug mga Pakigsaad.

Sa sunod nga klase, ikonsiderar ang pagdapit sa mga estudyante sa pagpakigbahin kon unsa ang ilang nakit-an sa ilang personal o pamilya nga pagtuon mahitungod sa Manluluwas. Pangita og mga oportunidad sa umaabot nga mga leksiyon aron maawhag ang mga estudyante sa pagpraktis niini nga kahanas diha sa klase.

Dugang nga mga Kapanguhaan

Ngano nga kinahanglan ko nga motutok sa Langitnong Amahan ug ni Jesukristo kon magtuon ko sa mga kasulatan?

Si Elder D. Todd Christofferson sa Korum sa Napulog Duha ka Apostoles mitudlo:

Sa kataposan, ang sentrong katuyoan sa tanang kasulatan mao ang pagbusog sa atong mga kalag uban sa hugot nga pagtuo diha sa Dios nga Amahan ug sa Iyang Anak, si Jesukristo—hugot nga pagtuo nga Sila anaa; hugot nga pagtuo nga ang plano sa Amahan alang sa atong pagka-imortal ug kinabuhi nga dayon, hugot nga pagtuo sa Pag-ula ug Pagkabanhaw ni Jesukristo, nga mipalihok niining plano sa kalipay; hugot nga pagtuo sa paghimo sa ebanghelyo ni Jesukristo nga atong pamaagi sa kinabuhi; ug hugot nga pagtuo nga makaila “sa bugtong tinuod nga Dios, ug kang Jesukristo, nga [Iyang] pinadala” (Juan 17:3). (D.Todd Christofferson, “Ang Panalangin sa Kasulatan,” Liahona, Mayo 2010, 34)

Sa unsang paagi ang pagtuon sa lainlaing mga ngalan ug mga titulo ni Jesukristo mopanalangin sa akong kinabuhi?

Si Presidente Russell M. Nelson mipakigbahin sa mosunod sa tibuok kalibotan nga debosyonal alang sa mga young adult:

Tun-i ang tanan kon unsa si Jesukristo pinaagi sa mainampoon ug madasigong pagtinguha nga makasabot sa kahulogan sa matag usa sa Iyang nagkadaiyang mga tawag ug mga ngalan sa personal nga paagi alang ninyo. Pananglitan, Siya mao gayod ang imong Tigpataliwala ngadto sa Amahan. Siya modapig kanimo. Mobarog Siya alang ninyo. Siya mamulong alang sa imong kaayohan, sa matag higayon, kon ikaw mopili nga mas mahisama Kaniya. (Russell M. Nelson, “Mga Propeta, Pagpangulo, ug Balaanon nga Balaod,” [tibuok kalibotan nga bebosyonal alang sa mga young adult, Ene. 8, 2017], broadcasts.ChurchofJesusChrist.org)

Si Elder Jonathan S. Schmitt sa Seventy mitudlo:

Ang usa ka paagi nga kita mas makaila ni Jesus mao ang pagkat-on sa Iyang daghan nga mga ngalan. … Ang mga ngalan ni Jesus mao ang mga titulo nga makatabang kanato sa pagsabot sa Iyang misyon, katuyoan, kinaiya, ug mga hiyas. Sa atong pagkahibalo sa daghang mga ngalan ni Jesus, mas masabtan nato ang Iyang balaang misyon ug ang Iyang dili hakog nga kinaiya. Ang pagkahibalo sa Iyang daghang mga ngalan makadasig usab kanato aron mahimong mas mahisama Kaniya—aron mopalambo og Kristohanong mga hiyas nga magdala og hingpit nga kalipay ug tumong sa atong mga kinabuhi.

Pipila ka tuig ang milabay, si Presidente Russell M. Nelson nagtuon sa mga kasulatan kabahin ni Jesukristo diha sa Ang Giya ngadto sa mga Kasulatan. Siya dayon midapit sa mga single adult sa pagtuon niining sama nga mga kasulatan. …

Pagkahuman sa pagdapit ni Presidente Nelson, gisugdan nako ang pag-ugmad sa akong kaugalingong lista sa daghang mga ngalan ni Jesus. Ang akong personal nga lista karon aduna nay sobra sa 300 ka ngalan, ug nakasiguro ko nga adunay daghan pa nga wala pa nako makaplagi.

… Ako modapit kaninyo sa paghimo og inyong kaugalingong lista samtang kamo makaila ni Jesus pinaagi sa Iyang daghang mga ngalan. Sa pagbuhat niini, kamo makakaplag nga adunay ubang mga ngalan—uban sa kaabin niini nga Kristohanong mga hiyas—nga gusto ninyong dalhon sa inyong kaugalingon isip mga disipulo ni Jesukristo diha sa pakigsaad. (Jonathan S. Schmitt, “Nga ang mga Tawo Moila Kanimo,” Liahona, Nob. 2022, 104–5)

Dugang nga mga Kalihokan sa Pagkat-on

Dugang nga mga ngalan, mga titulo, ug mga hiyas Jesukristo

Mahimong tinguhaon sa mga estudyante ang pagpadayon sa pagtuon sa nagkalainlaing mga ngalan ug mga titulo sa Manluluwas human sa kalihokan nga gilatid diha sa leksiyon. Mahimo nimong dapiton ang mga estudyante sa pagpadayon sa pagpangita diha sa Doktrina ug mga Pakigsaad o ipakita kanila ang dugang nga mga kapanguhaan sama sa Giya ngadto sa mga Kasulatan o “50 Names and Titles of Jesus Christ,” nga anaa sa ComeuntoChrist.org.

Ikonsiderar usab ang pagpili og usa ka tudling sa kasulatan gikan niining semanaha sa Dali, Sunod Kanako nga hugpong sa basahonon ug dapita ang mga estudyante sa pagtuon sa tudling mangita sa mga ngalan, mga titulo, o balaanong mga hiyas ni Jesukristo. Tabangi ang mga estudyante sa ilang pagdiskobre kon gikinahanglan. Mahimo nimong dapiton ang mga estudyante sa pagrekord kon unsaon nila sa pagkompleto sa matang usa sa mosunod nga mga pamahayag base sa ilang pagtuon:

• Ang ngalan, titulo, o hiyas ni Jesukristo nga akong nakita niini nga tudling mao ang …

• Ang pagkahibalo niini mahitungod sa Manluluwas nakatabang nako tungod kay …

Pagpangita sa Manluluwas sa matag seksiyon

Kon makabenepisyo ang mga estudyante gikan sa pagtan-aw og ehemplo sa seksiyon nga morag dili direktang nakatutok ngadto sa Manluluwas, ikonsiderar ang pagpakita kanila og seksiyon sama sa Doktrina ug mga Pakigsaad 89, diin gipadayag sa Ginoo ang Pulong sa Kaalam. Kini nga pagpadayag misugo sa mga Santos sa paglikay sa piho nga mga butang sama sa ilimnon nga makahubog o tabako ug moambit sa ubang makahimsog nga mga butang sa yuta “uban ang pagmatngon ug pagpasalamat” (Doktrina ug mga Pakigsaad 89:11; tan-awa usab sa Doktrina ug mga Pakigsaad 89:4–9, 11–17; Pagtudlo sa Pamaagi sa Manluluwas [2022], 6). Ang mga estudyante mahimong makatuon sa saad sa Ginoo alang sa pagsunod sa Pulong sa Kaalam diha sa Doktrina ug mga Pakigsaad 89:18–21 ug mahimong dapiton sa pagpamalandong kon unsa ang ilang nakat-onan mahitungod sa Ginoo. Ang pagpangutana sama sa mosunod mahimong makatabang sa mga estudyante nga mas maghunahuna og lawom:

• Sa imong hunahuna ngano kaha ang Ginoo naghatag og usa ka balaod sa panglawas alang sa Iyang katawhan? Unsa ang gitudlo niana kanimo mahitungod Kaniya?

• Unsa ang atong makat-onan mahitungod sa Ginoo gikan sa Iyang mga saad? Sa unsang paagi nga ang pagpakita og hugot nga pagtuo sa Iyang tambag makapanalangin sa atong mga kinabuhi?