“165-р хичээл—Асуултууддаа хувийн илчлэлт хүлээн авахыг эрэлхийлэх,” Сургаал ба Гэрээний семинарын багшийн гарын авлага (2025)
“Асуултууддаа хувийн илчлэлт хүлээн авахыг эрэлхийлэх,” Сургаал ба Гэрээний семинарын багшийн гарын авлага
165-р хичээл: Төгс эзэмших сургаал: Асуултууддаа хариулт олох
Асуултууддаа хувийн илчлэлт хүлээн авахыг эрэлхийлэх
Сүнслэг мэдлэг олж авах, 1-р хэсэг
Тэнгэрлэг Эцэг хүүхдүүддээ хайртай бөгөөд биднийг Өөртэй нь адил болоосой хэмээн хүсдэг. Биднийг Тэнгэрлэг Эцэгийн талаар суралцахыг эрэлхийлэхэд Тэрээр Ариун Сүнсээр дамжуулан оюун ухаан, зүрх сэтгэлд маань үнэнийг илчлэхээ амласан (Сургаал ба Гэрээ 8:2; Моронай 10:5-ыг үзнэ үү). Энэ хичээл Ариун Сүнсээр дамжуулан Бурханаас удирдамж, илчлэлт хэрхэн хүлээн авч болохыг ойлгоход суралцагчдад тусална.
Боломжит суралцах үйл ажиллагаа
Сүнслэг байдлын хувьд тэсэж үлдэх
Самбарт өсвөр насны хүүхдийг төлөөлөх дүрс зурснаар хичээлээ эхлүүл. Суралцагчид мөн энэ хүний дүрсийг судлах тэмдэглэлдээ хуулж зурж болно. Суралцагчид хүний дүрсэд нэр өгч мөн нас, хобби, дуртай хоол зэрэг зарим үндсэн шинжийг нэмж болох юм.
Суралцагчдыг дараах асуултуудын эхнийхэд хариулж байх хооронд та самбар дээрх хүний дүрсийг тойруулан тэдний хариултыг бич.
-
Өнөөгийн дэлхийд өсвөр насныханд сүнслэг байдлын хувьд тэсэж үлдэхэд юу саад болж болох вэ?
-
Эдгээр сорилт бэрхшээл, нөлөөллийг даван туулахад бидэнд юу тус болж чадах вэ?
Ерөнхийлөгч Рассэлл M.Нэлсон бидэнд тулгарч буй сорилт бэрхшээл, нөлөөг сүнслэг байдлын хувьд давж гарах нэг арга замын талаар ийн хуваалцсан.
Байнга ашиглахад бэлэн байдаг сошиал медиа, 24 цагийн туршид тавигддаг мэдээ мэдээлэл биднийг хайр найргүй булж байна. Хэрэв үнэн рүү дайрч довтлох хүмүүсийн олон янзын үзэл бодол, зарчмыг анхааралтай шигшиж, ялган таних ямарваа нэгэн итгэл найдварыг бий болгоё гэвэл бид илчлэлт хүлээн авч сурах ёстой. …
… Ирэх өдрүүдэд Ариун Сүнсний заан чиглүүлэх, удирдах, тайтгаруулах, байнга хамт байх нөлөөгүйгээр сүнслэгээр оршин тогтнох боломжгүй байх болно.
Хайрт ах, эгч нар минь ээ, би та бүхнээс илчлэлт хүлээн авах сүнслэг чадвараа нэмэгдүүлээсэй хэмээн гуйж байна. (Рассэлл М.Нэлсон, “Сүмд болон бидний амьдралд зориулсан илчлэлт,” 2018 оны 4-р сарын Ерөнхий чуулган, 119)
-
Энэ мэдэгдлийн ямар үг, хэллэг танд онцгой ач холбогдолтой санагдсан бэ? Яагаад?
-
Ариун Сүнснээс илчлэлт хүлээн авах нь энэ дэлхийд сүнслэг байдлын хувьд тэсэж үлдэхэд яагаад чухал гэж та бодож байна вэ?
Суралцагчдыг илчлэлт авах хэрэгцээгээ тунгаан бодоход урь. Та тэднийг өөрсдөд байгаа асуултуудаа, илчлэлт авах хэрэгтэй шалтгаануудаа тэмдэглэлдээ бичихэд урь. Эсвэл та өмнө нь илчлэлт эрэлхийлэхэд тулгарч байсан сорилт бэрхшээл, асуултуудаа хуваалцахад суралцагчдыг урьж болох юм.
Амьдралдаа Бурханаас илчлэлт хүлээж авахад бэлдэхэд нь туслах сургаал, урилгыг өнөөдрийн хичээлээс хайж олоход тэднийг урамшуул.
Бурханаас удирдамж, илчлэлт хүлээн авах
Мозая 4:9 болон Сургаал ба Гэрээ 38:1–3-ыг уншаад, Бурханы удирдамжийг хүсэхэд бидэнд туслах Бурханы шинж чанарыг олж мэд.
-
Эдгээр судар Бурханы талаар танд юу зааж байна вэ?
Дээрх асуултад хариулах боломжийг хэдэн суралцагчид өг. Өгч болох олон хариултын дунд, Бурханд бүх мэргэн ухаан байдаг ба Тэрээр бүгдийг мэддэг гэсэнтэй адил үнэнийг суралцагчид дурдаж болох юм.
-
Бурханы эдгээр зан чанарыг мэдэх нь Түүгээр удирдан чиглүүлэх, заалгах таны хүсэлд хэрхэн нөлөөлж болох вэ?
Би Бурханаас хариултаа хэрхэн авч чадах вэ? гэсэн гарчгийг самбарт бич.
2023 оны Төгс эзэмших сургаалыг судлах үндсэн материалын “Сүнслэг мэдлэг олж авах” хэсгийн 1–3-р догол мөрийг судал. Бурханаас сүнслэг асуултуудынхаа хариултыг авахын тулд юу хийж болохыг тайлбарласан үг, хэллэгийн доогуур зур.
Төгс эзэмших сургаалыг судлах үндсэн материалыг судлахын сацуу Бурханаас хариултаа хүлээн авахын тулд бид юу хийж чадах тухай тайлбарласан сургаалыг судруудаас хайхыг суралцагчдаас хүс. 2 Нифай 32:3–5; Моронай 10:4–5; Сургаал ба Гэрээ 9:7–9; 42:61 зэрэг нь суралцагчдыг судлахад урих судруудын жишээ байж болно.
-
Бурханаас асуултуудынхаа хариултыг авах чадвараа сайжруулахын тулд бид юу хийж чадах талаар та юу сурч мэдсэн бэ?
Олж мэдсэн зүйлсээ самбарт жагсааж бичихийг суралцагчдаас хүс.
Дараах асуултыг тавихын оронд самбар дээрх үг, хэллэгээс өөрсдөд чухал санагдсан үг, хэллэгүүдээ сонгохыг өөр өөр суралцагчдаас хүсэж болно. Дараа нь тэд яагаад тухайн үг, хэллэгүүд асуултуудынхаа хариултыг авахад биднийг бэлддэг чухал арга зам гэж бодож байгаагаа тайлбарлаж болох юм.
-
Яагаад эдгээр үйлдлийг Ариун Сүнсээр дамжуулан илчлэлт хүлээн авахад биднийг бэлддэг чухал арга замууд гэж та бодож байна вэ?
-
Хувийн илчлэлт хүлээн авч байсан ямар туршлага танд байдаг вэ? Хүлээн авахад тань ямар үйлдэл таныг бэлдсэн бэ?
Суралцагчдад хэт хувийн чанартай эсвэл нууц зүйлээ хуваалцах шаардлагагүй гэдгийг ойлгоход нь тусал. Та бас амьдралынхаа туршлагаас хуваалцаж болно.
Амьдралдаа хэрэгжүүлэх
Өөрсдөд нь байгаа асуултад тус болох юуг өнөөдөр сурч мэдсэнээ эргэцүүлэн бодоход суралцагчдыг урь. Дараа нь тэдэнд олж мэдсэн сургаалаа хэрэгжүүлэхэд туслах дараах зүйлийг хуваалц.
Хичээлийн эхэнд судалсан “Би та бүхнээс илчлэлт хүлээн авах сүнслэг чадвараа нэмэгдүүлээсэй хэмээн гуйж байна” гэх ерөнхийлөгч Нэлсоны зөвлөгөөг эргэн сана (“Сүмд болон бидний амьдралд зориулсан илчлэлт,” 119).
Өнөөдөр энэ зөвлөгөөг дагахад тань туслах олж мэдэж, мэдэрсэн зүйлээ эргэцүүлэн бод. Ариун Сүнсээр дамжуулан хувийн илчлэлт хүлээн авах чадвараа хөгжүүлэхийн тулд та юу хийхээ судлах тэмдэглэлдээ бичнэ үү.
Суралцагчдыг судлах тэмдэглэлдээ бичиж дууссаны дараа хэдэн суралцагчаас төлөвлөгөөгөө сайн дураараа ангийнхантай хуваалцахыг хүс.
Хангалттай цаг байвал дараа дараагийн хичээлүүдээр асуултынхаа хариултыг авахад нь туслах сүнслэг мэдлэг олж авах гурван зарчмын талаар судлах болно гэдгийг тэдэнд хэлж болно. Зарим суралцагч сүнслэг мэдлэг олж авах гурван зарчмыг мэддэг байж болно. Хэрэв мэддэг бол хуваалцахыг суралцагчдаас хүс эсвэл Төгс эзэмших сургаалыг судлах үндсэн материалаас тэдгээр зарчмыг олж мэдэхийг хүс. Тэдэнд семинар дээрээ илчлэлт хүлээн авах чадвараа хөгжүүлэх боломж олгоно гэдгийг бататгаж хэл.