Семинар
167-р хичээл—Сайн мэдээний сэдэв болон асуултуудыг мөнхийн талаас нь шинжлэн судлах

“167-р хичээл—Сайн мэдээний сэдэв болон асуултуудыг мөнхийн талаас нь шинжлэн судлах,” Сургаал ба Гэрээний семинарын багшийн гарын авлага, (2025)

“Сайн мэдээний сэдэв болон асуултуудыг мөнхийн талаас нь шинжлэн судлах,” Сургаал ба Гэрээний семинарын багшийн гарын авлага

167-р хичээл: Төгс эзэмших сургаал: Асуултууддаа хариулт олох

Сайн мэдээний сэдэв болон асуултуудыг мөнхийн талаас нь шинжлэн судлах

Сүнслэг мэдлэг олж авах, 3-р хэсэг

Зураг
Алсыг харж буй Есүс Христ

Төгс эзэмших сургаалын нэг зорилго бол сүнслэг мэдлэг олж авах зарчмуудтай танилцаж, хэрэгжүүлэхэд суралцагчдад туслах явдал юм. Энэ хичээл нь утга санаа болон асуултуудыг мөнхийн талаас нь шинжлэн судалж, тэдгээрийг Есүс Христийн хардагтай илүү адилаар харахад суралцагчдад тусална.

Боломжит суралцах үйл ажиллагаа

Итгэлийн нүд

Доорх зургийг үзүүлээд, тухайн нөхцөл байдлыг төсөөлөхөд суралцагчдыг урь.

Музей руу ороод, үүнтэй адил үзүүлэн үзэж байна гэж төсөөл. Та харж буй зүйлээ хэрхэн тайлбарлах байсан бэ?

Зураг
Майкл Мурфигийн харах өнцгийн өөрчлөлт

  • Ижил үзүүлэн харсан өөр хүн танд хүний нүдний хэлбэрийг олж харснаа хэлбэл та юу гэж бодох байсан бэ?

Өөр өнцгөөс харахад цэгүүдийн байрлал хүний нүдний дүрс болж байгааг тайлбарла. Дараах зургийг үзүүлнэ үү. Та мөн нүд харагдах хүртэл харагдах өнцөг өөрчлөгдөж байгааг харуулсан видеог үзүүлж болно.

Зураг
Хүний нүдийг дүрсэлсэн урлагийн бүтээл

  • Бид энэ урлагийн бүтээлээс харах өнцгийн талаар юу мэдэж авч болох вэ?

  • Энэ нь бидэнд ямар сүнслэг сургамжийг ойлгоход тусалж болох вэ?

Суралцагчдыг ойлгосноо хуваалцаж дууссаны дараа Арван хоёр төлөөлөгчийн чуулгын ахлагч Нийл Л.Андэрсэнаас суралцахад нь тусал.

Зураг
Ахлагч Нийл Л.Андэрсэн

Майкл Мурфигийн энэхүү бүтээлийг хар даа. Энэ өнцгөөс харвал, хүний нүдийг дүрсэлсэн урлагийн бүтээл гэдэгт итгэхэд бэрх байна. Харин цэгүүдийг өөр өнцгөөс харвал, уран бүтээлчийн бүтээлийн гоо үзэсгэлэнг олж харах болно.

Үүний адилаар бид Бурханы сүнслэг үнэнийг итгэлийн нүдээр хардаг. (Нийл Л.Андэрсэн, “Итгэлийн нүд,,” 2019 оны 4-р сарын Ерөнхий чуулган, 40)

  • Сүнслэг үнэнийг “итгэлийн нүдээр” харах гэдэг нь ямар утгатай гэж та бодож байна вэ?

  • Заримдаа сүнслэг үнэнийг энэ талаас нь харахад юу бидэнд хүндрэл учруулдаг вэ?

Их Эзэний мэлмийгээр харах

Бидэнд сургаал, асуулт эсвэл нийгмийн асуудлыг итгэлийн нүдээр харахад тусламж хэрэгтэй бол сүнслэг мэдлэг олж авах зарчмуудыг хэрэглэж болно.

  1. Итгэлээр үйлд.

  2. Утга санаа болон асуултыг мөнхийн талаас нь шинжлэн судал.

  3. Тэнгэрээс томилогдсон эх сурвалжуудаар дамжуулан илүү гүн гүнзгий ойлголт олж авахыг эрэлхийл.

Энэ хичээлээр бид утга санаа болон асуултуудыг мөнхийн талаас нь шинжлэн судлахад голчлон анхаарах болно.

Суралцагчдыг утга санаа болон асуултуудыг мөнхийн талаас нь шинжлэн судлах гэдэг нь юу гэсэн утгатай талаар ойлгосон зүйлээ тайлбарлахад урь.

Бид аливааг мөнхийн талаас нь хардаг болохын тулд юу хийх ёстойгоо ойлгохын тулд 2023 оны Төгс эзэмших сургаалыг судлах үндсэн материалын “Сүнслэг мэдлэг олж авах” хэсгийн 8–10-р догол мөрийг унш.

  • Та эдгээр догол мөрөөс мөнхийн талаас харахын ач холбогдлын талаар юу олж мэдсэн бэ?

  • Юу танд аливааг мөнхийн талаас хардаг байхад туслах вэ?

8-р догол мөр дэх Бид аливаа зүйлийг Их Эзэний мэлмийгээр харахын тулд Ариун Сүнснээс тусламж эрэлхийлдэг гэх хэллэгийг тэмдэглэ.

  • Сүнслэг асуулт, асуудлаа Их Эзэний мэлмийгээр харах гэж хичээх нь ямар ашигтай гэж та бодож байна вэ?

Их Эзэний өнцгөөс харахын үнэ цэнийг ойлгоход тань туслах хоёр эсвэл гурван судрыг хайж ол.

Зарим шүлгийг доор өгөв.

Уншсан зүйлээ эргэцүүлэн бодоход нь суралцагчдад туслахын тулд Бурханы талаар олж мэдсэн зүйлээ хураангуйлан бичихийг тэднээс хүс. Хэдэн суралцагчийг бичсэн зүйлээ хуваалцахад урь эсвэл хамтрагчтайгаа хуваалцахыг тэднээс хүс.

  • Эдгээр шүлэг нь Бурханы талаар, аливааг Түүний мэлмийгээр харахад биднийг урамшуулах ямар зүйлийг зааж байна вэ?

Харах өөр өнцөг

Дараах үйл ажиллагаа нь дэлхийн харах өнцгийг мөнхийн талаас харах өнцөгтэй харьцуулан дадлага хийхэд суралцагчдад тусална. Дараахтай адил жишээг танилцуулаад, хоёр харах өнцгийг хоёуланг авч үзэхэд суралцагчдад тусал.

Раян саяхан ахлах сургуулиа төгссөн. Тэр Есүс Христийн Хожмын Үеийн Гэгээнтнүүдийн Сүмийн гишүүн бус охинтой болзож эхэлжээ. Тэдний харилцаа улам гүнзгийрч эхлэхэд найз охин нь гэрлэхгүйгээр хамтдаа амьдрах санааг цухуйлгав.

Ангийнхныг дараах асуултыг авч үзэн ярилцаад, самбарт “Дэлхийн харах өнцөг” гэх гарчгийн доор хариултаа жагсаан бичихэд урь. Суралцагчдад хичээлийн эхэнд үзүүлсэн урлагийн бүтээлийг сануул. Энэ хэлэлцүүлгийн үеэр та нүдийг дүрсэлсэн урлагийн бүтээлийг хажуу талаас нь харуулж болно.

  • Хэрэв Раян хязгаарлагдмал буюу дэлхийн харах өнцгөөс хардаг байсан бол энэ нь түүнд яагаад сайхан санаа мэт сонсогдох байсан бэ?

Хэрэв суралцагчдад шалтгаан гаргаж ирэхэд тусламж хэрэгтэй бол дараах догол мөрийг хуваалцаж болно.

Хэрэв Раян энэ шийдвэрийг дэлхийн өнцгөөс харвал, гэрлэхгүйгээр найз охинтойгоо амьдрах нь ашигтай гэж харж болох юм. Тэр үнэтэй бөгж, хуримд мөнгөө үрэлгүйгээр хадгалах боломжтой гэж бодож болно. Энэ нь үүрэг хүлээхийг шаардах гэрлэлтээс үүдэх дарамтыг бууруулна гэж бодож бас болох юм. Хэрэв бүх зүйл бүтвэл тэд дараа нь хэзээ ч гэрлэх боломжтой.

Суралцагчид энэ нөхцөл байдлыг дэлхийн харах өнцгөөс харсан бол одоо мөнхийн талаас харахад нь тусал. Хэрэв та сүүлийн хэлэлцүүлгийн үеэр нүдийг хажуугийн өнцгөөс харуулсан бол одоо нүдийг бүтнээр нь харагдах байрлалд тавь.

Самбарт “Мөнхийн талаас харах” гэсэн гарчиг тавиад, үүний доор дараах асуултын хариултуудыг жагсааж бичихэд суралцагчдыг урь. Гэр бүл: Дэлхий дахинаа өргөх тунхаг эсвэл Өсвөр үеийнхний бат бөх байдлын төлөө: Сонголт хийхэд туслах удирдамж (2022) гэх мэт эх сурвалжийг онцолно уу.

  • Хэрэв Раян мөнхийн талаас нь харвал, яагаад найз охинтойгоо хамт амьдрахыг сонгохгүй вэ?

Хэрэв суралцагчдад уг асуултад хариулахад тусламж хэрэгтэй бол дараах догол мөрийг хуваалцаж болно. Үнэндээ суралцагчид хэлэлцүүлэгт оролцсоноор хариултаа олж авна.

Хэрэв Раян энэ шийдвэрийг мөнхийн талаас харсан бол дараах зүйлсийг авч үзэх байсан. Үүнд: Есүс Христийг болон Түүний сургаалыг дагаснаар аз жаргал ирдэг. Раян гэрлэлтийн өмнө бэлгийн харьцаанд орохоос зайлсхийх явдал ордог Их Эзэний ариун явдлын хуулийг зөрчин, “Бурханы эсрэг нүгэл үйлдэх” (Эхлэл 39:9) сонголтыг хийхгүй. Мөн Есүс Христийн сайн мэдээнд хүүхдүүд эцэг, эх нь хууль ёсоор гэрлэж, бие биедээ болон тэдэнд үнэнч гэр бүлд төрөх эрхтэй гэж заадаг. Раян харилцаагаа мөнхөд байлгахын тулд ариун сүмд Бурхантай гэрээ байгуулах ёстой гэдгээ ойлгодог.

Асуулт болон нийгмийн асуудлуудыг мөнхийн талаас нь харж шийдвэр гаргахдаа аливаа зүйл тодорхой байдгийг дараах богино хэмжээний видео харуулна.

Суралцагчид жишээн дээр ажилласан тул та одоо тэднийг өөр нөхцөл байдлыг бие даан эсвэл жижиг бүлгээрээ ярилцахад урьж болно. Тэд өөр асуулт эсвэл нийгмийн асуудлыг дэлхийн болон мөнхийн гээд аль аль талаас нь харж болно.

Дэлхийн харах өнцгийг мөнхийн талаас харахтай харьцуулахын үнэ цэнг ярилцахад нь суралцагчдад туслахын тулд та тэдэнд дараахтай адил асуултуудыг тавьж болно. Үүнд:

  • Та дэлхийн харах өнцгийг мөнхийн талаас харах өнцөгтэй харьцуулснаар юу олж мэдсэн бэ?

  • Өөрсдийн сонголт эсвэл асуултуудыг мөнхийн талаас харах нь ямар ашиг тустай вэ?

  • Аливааг мөнхийн талаас харахын адислалыг та хэзээ олж харж байсан бэ?

Өнөөдрийн ярилцсан үнэнүүдийнхээ талаар гэрчил. Суралцагчдыг асуултууддаа хариулт эрэлхийлэхдээ сүнслэг мэдлэг олж авах зарчмуудыг амьдралдаа үргэлжлүүлэн хэрэгжүүлэхэд урамшуул.

Хэвлэх