“168-р хичээл—Хариултуудыг олоход туслахын тулд тэнгэрээс томилогдсон эх сурвалжуудад хандах,” Сургаал ба Гэрээний семинарын багшийн гарын авлага, (2025)
“Хариултуудыг олоход туслахын тулд тэнгэрээс томилогдсон эх сурвалжуудад хандах,” Сургаал ба Гэрээний семинарын багшийн гарын авлага
168-р хичээл: Төгс эзэмших сургаал: Асуултууддаа хариулт олох
Хариултуудыг олоход туслахын тулд тэнгэрээс томилогдсон эх сурвалжуудад хандах
Сүнслэг мэдлэг олж авах, 4-р хэсэг
Төгс эзэмших сургаалын нэг зорилго бол сүнслэг мэдлэг олж авах зарчмуудыг судалж, хэрэгжүүлэхэд суралцагчдад туслах явдал юм. Энэ хичээл нь Тэнгэрлэг Эцэг, Есүс Христ хоёрын хайраар өгсөн эх сурвалжуудаас үнэнийг эрэлхийлэхийн ач холбогдлыг ойлгоход суралцагчдад тусална.
Боломжит суралцах үйл ажиллагаа
Мэдээллийн элбэг дэлбэг байдал
Үзүүлэн болгон аягатай ус авчрахыг бод. Тэдэнд уух юм өгч байна гэж төсөөлөхөд суралцагчдыг урь. Тэднийг уух эсэхээ шийдэхийн өмнө усны талаар юу мэдмээр байгааг нь асуу.
Бид бие махбоддоо хэрэглэж буй зүйлсийн эх сурвалжийг мэдэхийг хүсдэгийн адил бидний сонирхлыг татсан сайн мэдээний асуулт юм уу сэдэв байвал тухайн мэдээллийн эх сурвалжуудыг шалгах хэрэгтэй.
Тэргүүн зөвлөлийн ерөнхийлөгч асан ахлагч Дийтр Ф.Угдорф ийн тайлбарласан.
Дэлхийн аль ч түүхэд ийм их мэдээллийг одоогийнх шиг амархан олж авч байсангүй. Эдгээр мэдээллийн зарим нь үнэн, зарим нь буруу, ихэнх нь үнэний хувьтай байдаг.
Ийм учраас дэлхийн түүхэд үнэн ба бурууг хэрхэн зөв ялган танихад суралцахаас илүү чухал зүйл байгаагүй билээ. (Dieter F. Uchtdorf, “What Is Truth?” [Church Educational System devotional address, Jan. 13, 2013], broadcasts.ChurchofJesusChrist.org)
-
Хэрэв сайн мэдээний талаар асуух зүйл байвал та ихэвчлэн ямар эх сурвалжуудаас хайж судалдаг вэ?
-
Тухайн эх сурвалж найдвартай эсэхийг та хэрхэн мэдэх боломжтой вэ?
Бурхан бүх үнэний эх сурвалж мөн
Үнэнийг эрэлхийлэхдээ Тэнгэрлэг Эцэг, Есүс Христ хоёрт хандах хэрэгтэй гэдгийг ойлгоход нь суралцагчдад туслахын тулд дараах судрын эшлэлүүдийг самбарт үзүүлж болох юм.
Та шүлгүүдийг хэсэгчлэн эсвэл бүгдийг нь бие даан эсвэл бүлгээрээ ярилцахад суралцагчдыг урьж болно. Суралцагчдыг Тэнгэрлэг Эцэг, Есүс Христ хоёрын зан чанарыг тодорхойлсон үг, хэллэгийг самбарт бичихэд урь.
Дараах судруудыг уншаад, үнэнийг мэдэхийн тулд бид яагаад Тэнгэрлэг Эцэг, Есүс Христ хоёрт хандах ёстойг ойлгоход туслах үг, хэллэгийг хайж ол.
-
Үнэнийг эрэлхийлэхдээ бид яагаад Тэнгэрлэг Эцэг, Есүс Христ хоёрт тулгуурлах хэрэгтэйг ойлгоход эдгээр шүлэг танд хэрхэн тусалж байна вэ?
Хэлэлцүүлгийнхээ нэг хэсэг болгон, Бурхан бүх үнэний эх сурвалж мөн гэдгийг онцол. Энэ зарчмыг самбарт бичихийг бод.
-
Бид Тэнгэрлэг Эцэг, Есүс Христ хоёроос ирдэг үнэнийг хаанаас олж болох вэ?
Найдвартай эх сурвалжийг эрэлхийлэх
Дараах суралцах үйл ажиллагаа нь Бурханы адислал болгон өгсөн тэнгэрээс томилогдсон эх сурвалжийг яагаад ашиглах хэрэгтэйг ойлгоход суралцагчдад тусална.
2023 оны Төгс эзэмших сургаалыг судлах үндсэн материалын “Сүнслэг мэдлэг олж авах” хэсгийн 11–12-р догол мөрийг унш. Асуултдаа хариулт олохын тулд гаргадаг хичээл зүтгэлийг маань удирдан чиглүүлэх сургаалыг хайж ол.
-
Та тэнгэрээс томилогдсон эх сурвалжуудыг ашиглах нь яагаад чухал болохыг тодорхойлсон ямар үг, хэллэгүүдийг олсон бэ?
-
Бидэнд үнэнийг хайх эрэлдээ ашиглаж болох Есүс Христ, Тэнгэрлэг Эцэг хоёрын өгсөн ямар ямар эх сурвалж байдаг вэ? Эдгээр эх сурвалж Тэнгэрлэг Эцэг, Есүс Христ хоёрын биднийг хайрлах хайрыг хэрхэн харуулдаг вэ?
Дараах үйл ажиллагаанууд нь тэнгэрээс томилогдсон эх сурвалжуудыг хэрхэн олох мөн гарч ирж болох өөр бусад эх сурвалж найдвартай эсэхийг шалгахад суралцагчдад тусална. Цагийн бололцоо, суралцагчдын хэрэгцээ зэргээс шалтгаалан нэг юм уу хоёр үйл ажиллагааг ашиглах талаар бодож үз.
Үйл ажиллагаа А: Тэнгэрээс томилогдсон эх сурвалжуудыг олох
Суралцагчдаас дараах үйл ажиллагааг гүйцээхийг хүсэхээс өмнө тэнгэрээс томилогдсон эх сурвалжуудыг олохын тулд Сүмээс эрхлэн гаргасан судлах тусламжийг хэрхэн ашиглахыг үзүүлж болно. Та сайн мэдээний сэдвийг сонгож, суралцагчдад 2-р алхамд жагсаасан эх сурвалжуудыг ашиглан нэмэлт мэдээлэл хаанаас олж болохыг үзүүл.
Тэнгэрээс томилогдсон эх сурвалжуудыг хэрхэн олохыг суралцагчдад үзүүлсний дараа тэднийг бие даалгаж эсвэл хамтрагчтай нь давтуул. Суралцагчдад эхлэхэд нь туслахын тулд дараах зааврыг хуваалцаж мөн үзүүлж болно.
Тэнгэрээс томилогдсон эх сурвалжуудыг олохын тулд дараах хоёр алхмыг даган, Сүмээс эрхлэн гаргасан хичээлийн туслах материалыг ашиглах дадлага хий.
-
Сайн мэдээний нэг сэдвийг сонгон мэдээллийг нь хайж ол. Мормоны Номын орчуулга, Анхны үзэгдлийн тэмдэглэлүүд, Мэргэн ухааны үг зэрэг сэдвүүд байж болно. Сонирхлыг тань татсан сайн мэдээний аль ч сэдвийг сонгож болно.
-
Сүмээс эрхлэн гаргасан хичээлийн туслах материалуудыг ашиглан тэнгэрээс томилогдсон эх сурвалжуудыг хайж ол. Сэдэв ба асуулт, Судруудын удирдамж, Gospel Library-ийн хайлтын хэсэг болон Ерөнхий чуулган дээр хэлсэн үгс гэх мэт хичээлийн туслах материалууд бий.
Суралцагчдыг тэнгэрээс томилогдсон эх сурвалжуудыг олохоор ажиллаж байх явцад тусламж хэрэгтэй, асуулт бүхий хүмүүст туслахад бэлэн байхын тулд ангийг тойрон алх. Суралцагчдад судлах цаг гаргаж өгсний дараа, дараах асуултууд туршлагаа хуваалцахад нь тэдэнд тус болж болох юм.
-
Та тэнгэрээс томилогдсон эх сурвалжуудыг олох үйл явцаас ямар ямар ойлголт олж авсан бэ?
-
Та ямар хэрэгтэй мэдээллийг олж мэдсэн бэ?
Үйл ажиллагаа Б: Мэдээллийн эх сурвалжуудыг шалгах
Үнэнийг эрэлхийлэх явцад Сүмээс хэвлэн гаргаагүй мэдээллийн эх сурвалжууд гарч ирэх үеүд бий. Энэ тохиолдолд бид авч буй мэдээлэл маань найдвартай эсэхийг шалгах нь чухал.
-
Бид эх сурвалжуудыг найдвартай, найдваргүйг ялгаж салгахын тулд юу хийж болох вэ?
Дараах асуултуудыг үзүүл эсвэл тэдгээрийг тараах материал маягаар суралцагчдад өг. Асуултуудыг бие даан эсвэл ангиараа уншихад суралцагчдыг урихын зэрэгцээ тухайн асуулттай холбоотой судруудыг уншихыг тэднээс хүс.
Үнэнийг худлаас ялган таних
Сургаал ба Гэрээний семинарын багшийн гарын авлага— Сүнслэг мэдлэг олж авах, 4-р хэсэг
Дараах асуултуудыг унш. Дараахтай адил асуултууд нь мэдээллийн өөр өөр эх сурвалж найдвартай, хэрэгтэй гэдгийг тодорхойлоход хэрхэн тусалж болохыг тунгаан бод.
-
Энэ мэдээллийг уншиж эсвэл сонсож байхдаа би Ариун Сүнснээс ямар мэдрэмж хүлээн авсан бэ? (Сургаал ба Гэрээ 50:23–24-ийг үзнэ үү.)
-
Энэ мэдээлэл намайг Есүс Христтэй болон Түүний Сүмтэй илүү ойртуулж байна уу? (Моронай 7:15–17-г үзнэ үү.)
-
Энэ нь Бурханы зарлигуудыг сахихад намайг урамшуулж байна уу?
-
Энэ нь судруудтай мөн орчин үеийн бошиглогчдын заадаг зүйлстэй нийцэж байна уу? (2 Тимот 3:15–17; Сургаал ба Гэрээ 1:38-ыг үзнэ үү.)
-
Энэ нь Ариун Сүнсний үнэн болохыг өмнө нь мэдрүүлсэн зүйлсийг баталж байна уу, аль эсвэл тэдгээр үнэнд эргэлзэхэд хүргэж байна уу? (Моронай 10:5-ыг үзнэ үү.)
-
Энэ нь Аврагчийн эсвэл Түүний Сүмийн удирдагчдын найдвартай гэж үзэж болох эх сурвалжаас ирсэн үү?
-
Эцэг эх эсвэл Сүмийн удирдагчид энэ мэдээллийн талаар юу хэлэх бол? (Хэрэв би үүнийг тэднээс нуух хэрэгтэй гэж уруу татагдвал, энэ нь уг эх сурвалжийн талаар надад юу хэлж өгдөг вэ?)
Суралцагчдыг тухайн асуултуудыг уншиж дууссаны дараа яагаад ийм асуултууд тунгаан бодоход тэдэнд тусалдаг талаар хуваалцахыг тэднээс хүс. Мөн мэдээлэл найдвартай эсэхийг шалгахдаа дээрх эсвэл дээрхтэй ижил асуултуудыг хэрхэн ашиглаж байсан жишээнээсээ хуваалцахыг тэднээс хүсэж болно.
Олж мэдсэн зүйлээ ашиглах
Суралцагчдад сурч мэдсэн зүйлээ өөрийн болгоход нь туслахын тулд дараах хоёр асуултын аль нэгд эсвэл хоёуланд өгсөн хариултаа судлах тэмдэглэлдээ бичихэд урихыг бод. Тэднийг бодол санаагаа хамтрагчтайгаа эсвэл ангийнхантайгаа хуваалцахад урьж болно.
-
Сайн мэдээний талаарх асуултдаа хариулт илүү сайн олоход туслах юуг та өнөөдөр сурч мэдсэн бэ?
-
Таны өнөөдрийн сурсан зүйл ирээдүйд хийх үйлдэлд тань хэрхэн нөлөөлнө гэж та бодож байна вэ?
Өнөөдөр судалсан үнэнүүдийнхээ талаар гэрчлэлээ хуваалцаж, Тэнгэрлэг Эцэг, Есүс Христ хоёрын тэнгэрээс томилогдсон эх сурвалжуудаар дамжуулан илчилсэн үнэнийг эрэлхийлэхэд суралцагчдыг урамшуул.