“166-р хичээл—Хариултуудыг олохын тулд итгэлээр үйлдэх,” Сургаал ба Гэрээний семинарын багшийн гарын авлага (2025)
“Хариултуудыг олохын тулд итгэлээр үйлдэх,” Сургаал ба Гэрээний семинарын багшийн гарын авлага
166-р хичээл: Төгс эзэмших сургаал: Асуултууддаа хариулт олох
Хариултуудыг олохын тулд итгэлээр үйлдэх
Сүнслэг мэдлэг олж авах, 2-р хэсэг
Есүс Христ биднийг Өөрт нь найдаж, амьдралынхаа турш итгэлээр үйлдэхэд урьдаг. Ялангуяа асуулт, нөхцөл байдлуудыг хялбар шийдэх боломжгүй үед бид Аврагч дээр анхаарлаа төвлөрүүлэх нь амин чухал. Энэ хичээл нь асуултууддаа хариулт эрэлхийлэхдээ хэрхэн Есүс Христэд итгэх итгэлээр үйлдэж болохоо ойлгоход суралцагчдад тусална.
Боломжит суралцах үйл ажиллагаа
Асуухын ач холбогдол
Хичээл эхлэхийн өмнө та ерөнхийлөгч Дийтр Ф.Угдорфын дараах асуултыг самбарт бичиж болно. Суралцагчдыг орж ирэхэд түүний асуултад хэрхэн хариулахаа мөн тэдний яагаад ингэж хариулах байсныг тунгаан бодоход урь. Суралцагчдад тунгаан бодох цаг гаргаж өгсний дараа хариултуудаа хуваалцахад тэднийг урь.
Тэргүүн зөвлөлийн ерөнхийлөгч асан Дийтр Ф.Угдорф дараах асуултыг тавьсан.
Сүмийн тухай эсвэл Сүмийн сургаалын талаар асуух нь зөв үү? (Dieter F. Uchtdorf, “The Reflection in the Water” [Church Educational System devotional, Nov. 1, 2009], thechurchnews.com)
-
Та нар энэ асуултад хэрхэн хариулах вэ? Та яагаад ингэж хариулах байсан бэ?
Ерөнхийлөгч Дийтр Ф.Угдорфын мэдэгдлийн үлдсэн хэсгийг уншихдаа та хариултаа түүнийхтэй хэрхэн харьцуулахаа олж мэд.
Хайрт залуу найзууд минь, магадлан лавлах нь үнэн рүү хөтөлдөг тул бид асуух дуртай хүмүүс. Чухам ийм л замаар, нэгэн залуу эрэгтэйд асуулт байснаас Сүмийн эхлэл тавигдсан. Ер нь асуухгүйгээр яаж үнэнийг олж мэдэхийг би сайн мэдэхгүй байна. …
… Магадлан лавлах нь гэрчлэлийг төрүүлэгч мөн. … Асуух нь сул дорой байдлынх биш. Энэ нь өсөлтийн эхлэл мөн. (Dieter F. Uchtdorf, “The Reflection in the Water” [Church Educational System devotional, Nov. 1, 2009], thechurchnews.com)
-
Та Тэнгэрлэг Эцэг, Есүс Христ хоёр биднийг асуулт асуугаасай гэж хүсдэгийг харуулсан ямар жишээг судар, Сүмийн түүх эсвэл өөрийн амьдралаас харж байсан бэ?
Заримдаа Сүмийн сургаал, зан үйл, түүхийг ойлгоход бэрх шинэ мэдээлэл, асуулт бидэнд гарч ирж магадгүй. Бидэнд мөн хариулахад хэцүү асуултууд байж болно. Асуулт байна гэдэг нь эргэлзэхээс өөр. Итгэлтэйгээр асуух нь Есүс Христийн талаарх бидний ойлголт, гэрчлэлийг нэмэгдүүлнэ. Эргэлзээг өөгшүүлэх нь Түүнд итгэх итгэлд маань сөргөөр нөлөөлөх болно.
Сүмийн эсвэл сургаалын талаар хариулахад хэцүү асуултуудынхаа талаар бодохыг суралцагчдаас хүс. Та суралцагчдыг судлах тэмдэглэлдээ тэдгээр асуултыг бичихэд урьж болно. Хэцүү асуулт гарч ирэх үед нь тус болох үнэнийг энэ хичээлээс олж мэдэхэд тэднийг урь.
Хэцүү асуултуудад хариулах
Асуулт тавихын ач холбогдлыг харуулж, итгэлээр хэрхэн үйлдэх загварыг үзүүлэхийн тулд ангид дараах жишээг танилцуул. Доорх тайлбарыг ашигла эсвэл “Сүнслэг мэдлэг олж авах нь, Мадисоны түүх” видеог ChurchofJesusChrist.org дээрээс цагийн код 0:00-оос 1:44 хүртэл үзүүлнэ үү.
Мадисон Иосеф Смит олон эхнэртэй байх ёсыг дагадаг байсныг семинарт байхдаа олж мэджээ. Үүнийг сонссоны дараа түүнд хэдэн асуулт гарч ирэв.
Суралцагчдад дараах асуултуудыг ярилцахад нь туслахын тулд ангийг хамтрагчид эсвэл жижиг бүлэг болгон хувааж болно. Асуултуудыг ярилцсаныхаа дараа суралцагчид хариултаа ангийнхандаа хэлж өгч болох юм.
-
Мадисон асуултуудынхаа хариултыг олох явцдаа ямар ямар сөрөг болон эерэг арга замыг хэрэглэж болох байсан бэ?
-
Эдгээр арга зам нь яагаад сөрөг юм уу эерэг байх байсан гэж та бодож байна вэ?
Бидэнд хэцүү асуулт гарч ирэх үед сүнслэг мэдлэг олж авах зарчмуудыг ашиглах нь тусална.
Зарим суралцагч семинар дээрээ сүнслэг мэдлэг олж авах зарчмын талаар суралцаж байсан туршлагатай байж болно. Хэрэв тийм бол ангийн гишүүдээс сүнслэг мэдлэг олж авах гурван зарчмыг цээжээр уншиж чадах эсэхийг асуу. Шаардлагатай бол тэднийг 2023 оны Төгс эзэмших сургаалыг судлах үндсэн материалын “Сүнслэг мэдлэг олж авах” хэсгийн 4-р догол мөрийг уншихад урь. Эдгээр зарчмыг самбарт бичих талаар бодож үз.
-
Итгэлээр үйлд.
-
Утга санаа болон асуултыг мөнхийн талаас нь шинжлэн судал.
-
Тэнгэрээс томилогдсон эх сурвалжаар дамжуулан илүү гүн гүнзгий ойлголт олж авахыг эрэлхийл.
Итгэлээр үйлдэх
Өнөөдрийн суралцах туршлага нь итгэлээр үйлдэх зарчмуудад төвлөрнө.
Сургаал ба Гэрээ 6:36-г унш. Аврагчийн энэ урилга хэрхэн бидэнд итгэлээр үйлдэхэд тусалж болохыг тодорхойл.
-
Энэ шүлгийн ямар ямар үг, хэллэг сайн мэдээ болон Сүмийн талаар асуух юмтай Мадисонд болон бусад хүнд тус болох вэ?
-
Яагаад эдгээр үг, хэллэг тус болох вэ?
Суралцагчдыг хариултаа хуваалцах үед, Бидэнд хариултаа авч чадаагүй асуулт байвал бид Есүс Христэд хандаж, эргэлзэхгүй байж чадна гэх үнэнийг тодорхойлоход тэдэнд тусал. Үүнд:
Төгс эзэмших сургаалыг судлах үндсэн материалд хэрхэн Есүс Христэд хандах олон жишээ байдгийг суралцагчдад тайлбарла.
Танд сүнслэг байдлын талаар асуулт байгаа үед итгэлийнхээ дагуу үйлдэж болох арга замуудыг олж мэдэхийн тулд Төгс эзэмших сургаалын үндсэн материалын “Сүнслэг мэдлэг олж авах” хэсгийн 5–7-р догол мөрийг унш.
-
Эдгээр догол мөр дээрх аль мэдэгдэл хэцүү асуулттай байгаа хүнд хамгийн их тус болно гэж та бодож байна вэ? Яагаад?
Хариултуудыг нь дэмжих судруудыг олоход суралцагчдыг урь. Жишээлбэл: Хэрэв суралцагчид залбирлын талаар дурдвал 2 Нифай 32:8–9 эсвэл Иаков 1:5–6-г эш татаж болно. Хэрэв суралцагчид судар судлах талаар дурдвал 2 Нифай 32:3 эсвэл 2 Тимот 3:15–17-г эш татаж болно.
Есүс Христэд төвлөрөн эдгээр үйлдлийг хийхийн ач холбогдлыг суралцагчдад сануулах ердийн боломжуудыг хайж ол. Тэдний тодорхойлсон үйлдлүүд нь хэрхэн Есүс Христэд хандах жишээ байж болох талаар бодоход суралцагчдыг урьж болно.
Итгэлээр үйлдэх жишээ
Мадисоны тухай өгүүлсэн жишээний төгсгөлийг хуваалцана уу. Асуултуудынхаа хариултыг олох явцдаа Мадисон хэрхэн итгэлийнхээ дагуу үйлдэхийг сонгосныг тодорхойлоход суралцагчдыг урь. Та “Сүнслэг мэдлэг олж авах нь, Мадисоны түүх” видеог цагийн код 1:44-өөс 8:35 хүртэл үзүүлж болно. Видео байхгүй бол дараах догол мөрийг уншина уу.
Хичээлийн дараа Мадисон багш руугаа очин, Иосеф Смит яагаад олон эхнэр авах ёсыг дагадаг байсныг асуужээ. Багш нь түүнд хариултаа эрэлхийлэх явцдаа сайн мэдээг амьдралдаа үргэлжлүүлэн дагаж, чин сэтгэлээсээ залбирахыг урамшуулав. Мадисон залбирч, судраас судалснаар хариултаа цаг нь болоход хүлээн авна гэсэн сүнслэг өдөөлтийг авчээ. Мадисон үргэлжлүүлэн итгэлээр үйлдэж, Тэнгэрлэг Эцэг, Түүний төлөвлөгөөний талаарх гэрчлэлдээ тулгуурласнаар аажим аажмаар амар амгаланг мэдрэхэд тусалсан хариултуудаа олж авч эхэлсэн юм. Энэ үйл явцын турш Мадисон Тэнгэрлэг Эцэг, Есүс Христ хоёртой харилцах харилцаа нь сайжирсныг мэдэрсэн. Итгэлээр үйлдэх үед Бурхан бидний эрэлхийлж буй хариултыг буюу амар амгаланг өгөх болно гэдгийг тэрээр мэдэж авсан юм.
Дараах асуултын талаарх хэлэлцүүлгээр Мадисоны аль үйлдэл Төгс эзэмших сургаалыг судлах үндсэн материалаас сурсан зүйлтэй нь холбоотой байгааг онцлохыг нэг суралцагчаас хүс.
-
Мадисоны үйлдлүүд түүний Есүс Христэд итгэх итгэлийг хэрхэн харуулсан бэ?
-
Мадисоны туршлагаас бид Тэнгэрлэг Эцэг, Есүс Христ хоёрын тухай юу мэдэж авч болох вэ?
Ойлгоход хэцүү асуулттай тулгарахад итгэлээр үйлдсэнээр адислагдаж байсан үеэ бодож, хуваалцахад суралцагчдыг урь. Дараа нь өнөөдрийн сурч, мэдэрсэн ямар зүйл нь тэдний хувийн нөхцөл байдал болон асуултуудад нь тус болж болох талаар эргэцүүлэн бодоход суралцагчдыг урь. Бодол, сэтгэгдлээ судлах тэмдэглэлдээ бичиж тэмдэглэх цаг гаргаж өг.
Асуултууддаа хариулт эрэлхийлэхдээ Есүс Христэд төвлөрч, итгэлээр үйлдэхийн ач холбогдлын талаар гэрчлэлээ хуваалцан дуусга.