Lēsoni 172: Ngaahi Taukei Ako Folofolá

Ngaahi Meʻangāue ki he Ako-Folofolá

Ko hono fakaʻaongaʻi ʻo e ngaahi tokoni ki he akó

ʻE lava ke tokoni ʻa e lēsoni ko ʻení ke fakatupulaki hoʻo ako folofola fakatāutahá mo fakamālohia ho vā fetuʻutaki mo e Tamai Hēvaní mo Sīsū Kalaisí ʻo fakafou ʻi hono fakaʻaongaʻi ʻo e ngaahi meʻangāue ako folofolá.

Teuteu ʻa e tokotaha akó: Fakaafeʻi ʻa e kau akó ke omi mateuteu ke vahevahe ha ngaahi meʻangāue ʻe lava ke tokoni kiate kitautolu ʻi he māmani ʻo e ʻaho ní ʻa ia naʻe ʻikai maʻu ʻi he taʻu ʻe 50 kuohilí. Kole ange ke nau mateuteu ke fakamatalaʻi ʻa e faikehekehe ʻoku fakahoko ʻe he ngaahi meʻangāue ko ʻení ʻi heʻetau moʻuí.

Ngaahi ʻEkitivitī Ako ʻOku Ala Fakahokó

Ngaahi Meʻangāué

Fakakaukau ke fakaʻaliʻali ʻa e ngaahi ʻīmisi ko ʻení (pe ngaahi ʻīmisi kehe ʻoku faitatau) pea fakaafeʻi ʻa e kau akó ke tali ʻa e ngaahi fehuʻi ko ʻení.

• Kuo tākiekina fēfē nai ʻe he ngaahi meʻangāue ko ʻení ʻetau malava ke fefonongaʻaki mo ngāué?

• Ko e hā ha ngaahi meʻangāue kehe kuo fakatupulaki ʻi he ngaahi taʻu kuo hilí kuo nau fakatupulaki ʻetau malava ke fai ha ngaahi meʻá?

• ʻE kehe fēfē nai ʻa e moʻuí kapau naʻe ʻikai ke tau ʻilo ʻa e ngaahi meʻangāue ko ʻení pe ko e founga hono fakaʻaongaʻi kinautolú?

Hangē ko e fefonongaʻakí mo e ngāué, ʻoku ʻi ai ha ngaahi meʻangāue ke tokoniʻi kitautolu ʻi hono ako ʻo e folofolá pea ʻunu ke ofi ange ki he Tamai Hēvaní mo Sīsū Kalaisi.

Naʻe vahevahe ʻe Brother Teti R. Kalisitā, Palesiteni Lahi mālōlō ʻo e Lautohi Faka-Sāpaté ʻa e meʻá ni:

ʻOku ʻilo ʻe he toʻu tangata lolotongá ha ngaahi moʻoni, ngaahi fakakaukau mo ha ngaahi fakapapau lahi ange ʻoku fakamisiteli ki ha tokolahi ʻo ʻenau ngaahi kuí—ʻo ʻikai koeʻuhí ʻoku māʻoniʻoni ange ʻa e toʻu tangata lolotongá, pe koeʻuhí ʻoku nau poto ange, ka koeʻuhí ʻoku nau maʻu ha ngaahi meʻangāue lelei ange. Ko e tangata taukei lahi taha ʻokú ne maʻu ha hoosi mo ha palau tohó, he ʻikai teitei tatau ia mo ha tangata faama poto tatau ʻoku ʻi ai haʻane mīsini palau fakaonopooni kuo mateuteu ki heʻene fiemaʻú. He ʻikai poleʻi ʻe ha faifika mataotao ia ha kaungā-faifika ʻoku ʻi ai haʻane komipiuta fakaonopooni. He ʻikai teitei ʻiloʻi ʻe ha Kaleliō ʻoku ʻi ai haʻane meʻa fakaʻata lahi, ʻa e ʻunivēsí ʻo hangē ko ha Kaleliō mo e meʻa fakaʻata fakaonopooni tahá. Kuo pau ke lahi ange ʻa e meʻa ʻoku finangalo mai ki ai ʻa e ʻEikí kiate kitautolu ʻi he ako ki he ongoongoleleí ʻi he ngaahi toʻu tangata kimuʻá, koeʻuhí ʻoku lahi ange ʻa e ngaahi naunau tokoni ʻoku tau maʻu ʻi he kuonga ní. (Tad R. Callister, The Infinite Atonement [2000], 21)

Fakalaulauloto ki he ongo fehuʻi ko ʻení:

• ʻOkú ke ʻiloʻi fēfē nai ʻa e ngaahi meʻangāue ako folofola ʻe lava ʻo tokoni atu ke ke maʻu ʻa e tali ki hoʻo ngaahi fehuʻí pea haʻu ʻo ofi ange ki he Tamai Hēvaní mo Sīsū Kalaisi?

• Ko e hā hoʻo ongo ki he tuʻunga hoʻo fakaʻaongaʻi kinautolú?

ʻI hoʻo ako ʻa e lēsoni ko ʻení, feinga ke mahino lelei ange kiate koe ʻa e ngaahi meʻangāue ki he ako folofolá mo e founga te nau lava ʻo tokoniʻi ai koé.

Fakaʻuhingaʻí: Ko hono fakaʻaongaʻi ʻo e ngaahi meʻangāue ki he ako folofolá

Fai ʻeni ke tokoni ke mahino lelei ki he kau akó ʻa e ngaahi meʻangāue ki he ako folofolá.

Fakaafeʻi ʻa e kau akó ke omi ʻo hiki ha faʻahinga meʻangāue ako folofola pē ʻoku nau ʻiloʻi kuo ʻomi ʻe he ʻEikí ke tokoni ke tau tali ʻetau ngaahi fehuʻí pea haʻu ke ofi ange kiate Ia. Fakakaukau ke tānaki atu ha taha ʻo e ngaahi meʻangāue ko ʻení ʻoku ʻikai lave ki ai ʻa e kau akó.

ʻŪ Futinoutí

Fakahinohino ki he Ngaahi Folofolá

Ngaahi Mapé

Ngaahi Tā ʻi he Hisitōlia ʻo e Siasí

Tuhu ki he ngaahi meʻangāue kehekehe ʻi he palakipoé pea fehuʻi ki he kau akó pe ko e hā kinautolu mo e feituʻu te nau lava ʻo maʻu ai kinautolú. Kapau ʻoku ʻikai maheni ʻa e kau akó mo ha taha ʻo kinautolu, fakakaukau ke fakaʻaongaʻi ʻa e ngaahi fakamatala ko ʻení pea fakaʻaliʻali ki he kau akó ʻa e feituʻu ʻoku maʻu aí.

Futinoutí—ʻOku fakamatalaʻi ʻa e futinoutí ʻaki ha fanga kiʻi mataʻitohi iiki ʻi ha veesi ʻokú ne tataki koe ki he konga ki lalo ʻo e pēsí ʻa ia te ke maʻu ai ha toe ngaahi fakamoʻoni fakafolofola pe tefito fekauʻaki mo e vēsí. ʻI he Gospel Library app, ʻe ʻasi mai ʻa e fakamatala tatau ʻi he lomiʻi ʻi he futinoutí.

Fakahinohino ki he Ngaahi Folofolá—ʻOku ʻi he maʻuʻanga tokoni ko ʻení ha ngaahi fakaʻuhinga nounou mo mahino ʻo e ngaahi foʻi lea fakafolofolá fakataha mo ha ngaahi potufolofola ʻe niʻihi ʻoku fekauʻaki mo e foʻi lea takitaha. ʻE lava ke maʻu ia ʻi he fakaʻosinga ʻo e Tohi ʻa Molomoná pe ʻi he Gospel Library app ʻi he Ngaahi Folofolá, pea ʻi he Ngaahi Tokoni Akó.

Fakamatala Fakahokohoko ʻo e Hisitōlia ʻo e Siasí, Ngaahi Mapé mo e Ngaahi Tā—ʻE lava ke maʻu ʻa e ngaahi maʻuʻanga tokoni ko ʻení ʻi he ngataʻanga ʻo e folofola ʻe tolu kuo fakatahaʻí pe ʻi he Gospel Library app ʻi he Ngaahi Folofolá, pea ʻi he Ngaahi Tokoni Akó.

Fakatātaaʻi

Ke fakatātaaʻi ʻaki hono fakaʻaongaʻi fakakalasi ʻa e ngaahi naunau ako folofolá, fai ʻa e ʻekitivitī ko ʻení:

Fakakaukau ki he meʻa ʻokú ke ʻiló mo e meʻa ʻokú ke fie ʻilo fekauʻaki mo e fakamolemolé.

Lau ʻa e Tokāteline mo e Ngaahi Fuakava 64:9–11, pea kumi ha ngaahi moʻoni fekauʻaki mo e fakamolemolé.

• Ko e hā naʻá ke akó? Ko e hā ʻa e meʻa ʻoku tokoni ʻa e ngaahi vēsí ni ke mahino lelei ange kiate koe fekauʻaki mo e Tamai Hēvaní mo Sīsū Kalaisí?

  Fakaafeʻi leva ʻa e kau akó ke vahevahe ʻa e ngaahi naunau te nau ala fakaʻaongaʻi ke fakaloloto ʻa e mahino ʻoku nau maʻú. Lolotonga ʻa e vahevahe ʻa ha tokotaha ako ha naunau, ʻeke ange pe ʻoku fakaʻaongaʻi fēfē nai ia, pea fakaafeʻi ʻa e kau akó kotoa ke muimui ki heʻene fakahinohinó. Hangē ko ʻení, ʻe lava ke nau kumi hake ha ngaahi potufolofola ʻoku maʻu ʻi he futinouti ki he ngaahi veesi ko ʻení. Te nau lava foki ʻo kumi ʻa e “Sīsū Kalaisí” pe “Huhuʻí” pe “Fakamolemolé, Fakamolemoleʻí” ʻi he Fakahinohino ki he Ngaahi Folofolá.

  Fakaafeʻi ha kau ako ke vahevahe ʻa e meʻa naʻa nau akó mo e ʻuhinga naʻe ʻuhingamālie ai ia kiate kinautolú.

• Naʻe tokoni fēfē nai ʻa e ngaahi meʻangāue ako folofola ko ʻení ki hoʻo akó?

Akoako Fakahoko

Fakaafeʻi ʻa e kau akó ke omi ʻo hiki ʻi he palakipoé ha ngaahi tefito ʻo e ongoongoleleí pe ngaahi fehuʻi ʻoku nau fiemaʻu pe ko ha niʻihi kehe ʻoku nau ʻilo, ke maʻu ha mahino lahi ange pe ko ha tali ki ai. Pe, ko hoʻo fakaʻaongaʻi ha founga tānaki fakamatala ʻoku ʻikai fakahāhāholo ke maʻu ai ʻenau ngaahi talí.

Kapau ʻoku faingataʻa ki he kau akó ke maʻu ha ngaahi fakakaukau, ʻe lava ke ke hiki ʻa e ngaahi tefito ko ʻení ʻi he palakipoé. Fakaafeʻi ʻa e kau akó ke fili ha taha ʻo e ngaahi tefito ko ʻení (pe ko ha tefito ʻe taha te nau fili) ʻoku nau maʻu ha ngaahi fehuʻi fekauʻaki mo ia pe ʻoku nau ongoʻi ʻe hanga ʻe heʻenau ako ki aí ʻo ʻai kinautolu ke ofi ange kia Sīsū Kalaisi:

• Fakamolemolé

• Maʻu fakahaá

• Tamai Hēvaní

• ʻUhinga ʻoku tau fiemaʻu ai ʻa Sīsū Kalaisí

• Moʻui ʻi he maama fakalaumālié

• Maama tataliʻanga ʻo e ngaahi laumālié

• Fakamaau Fakaʻosí

• Nofo-malí mo e fāmilí

• Ko e Hāʻele ʻAnga Ua Mai ʻa Sīsū Kalaisí

Pe, ko hono fakafaivaʻi ʻe he kau akó ha kaungāmeʻa ʻoku fie ʻilo lahi ange ki ha taha ʻo e ngaahi tefito ʻi ʻolungá.

ʻI hono fakaʻaongaʻi ʻo e ngaahi meʻangāue ki he ako folofolá, fakaʻaongaʻi ha ngaahi miniti siʻi ke ako ai ʻa e tefito pe fehuʻi ko ʻení. Kumi ha ngaahi moʻoni ʻoku ʻuhingamālie kiate koe, tali hoʻo ngaahi fehuʻí, pe ʻai koe ke ke ofi ange ki he Tamai Hēvaní mo Sīsū Kalaisi.

Hili ha taimi feʻunga, fakakaukau ke fakaafeʻi ʻa e kau akó ke vahevahe ʻi ha ngaahi hoa pe kulupu iiki ʻa e meʻa naʻa nau akó mo e founga ʻo ʻenau akó. Fakaafeʻi leva ʻa e kau akó ke tali ʻa e ongo fehuʻi ko ʻení ke fakaʻosi ʻaki ʻa e kalasí:

• ʻE tākiekina fēfē nai ʻe hono fakaʻaongaʻi maʻu pē ʻo e ngaahi naunau ko ʻení ʻi hoʻo ako folofola fakatāutahá, ʻa hoʻo ʻiló mo e vā fetuʻutaki mo e Tamai Hēvaní mo Sīsū Kalaisí?

Ngaahi Maʻuʻanga Tokoni Kehé

ʻE lava fēfē nai ke tāpuekina ʻeku moʻuí ʻe hono ako ʻo e folofolá?

Naʻe akonaki ʻa Palesiteni Poiti K. Peeka (1924–2015) ʻo e Kōlomu ʻo e Kau ʻAposetolo ʻe Toko Hongofulu Mā Uá ʻo pehē:

ʻOku ʻi he ngaahi folofolá ʻa e ngaahi kī ki he maluʻi fakalaumālié. ʻOku ʻi ai ʻa e tokāteline mo e ngaahi fono mo e ngaahi ouau te nau fakafoki mai ʻa e fānau takitaha ʻa e ʻOtuá ki ha fakamoʻoni kia Sīsū Kalaisi ko e Fakamoʻuí mo e Huhuʻí.

Kuo fai ha ngāue lahi ʻi he ngaahi taʻu ʻo e teuteú, ke paaki ʻa e folofolá ʻi he lea fakafonua kotoa ʻo ʻi ai ʻa e futinouti mo e ngaahi fefakamoʻoniʻaki. ʻOku tau feinga ke maʻu ia ʻe kinautolu kotoa ʻoku fie akó. ʻOku nau akoʻi mai ʻa e feituʻu ke tau ō ki aí mo e meʻa ke faí. ʻOku nau ʻomi ha ʻamanaki lelei mo ha ʻilo.

Naʻe akoʻi au ʻi he ngaahi taʻu kuo hilí ʻe ʻEletā S. Tiliuefi ʻIongi ʻo e Kau Fitungofulú ki ha lēsoni fekauʻaki mo hono lau ʻo e folofolá. Naʻe fefaʻuhi ha siteiki ʻi he fekeʻikeʻí mo e faingataʻaʻia ʻa e kāingalotú, pea fiemaʻu ke fai ha faleʻi.

Naʻá ku ʻeke kia Palesiteni ʻIongi, “Ko e hā ʻa e meʻa ke u lea ʻakí.”

Naʻá ne talamai pē, “Tala ange ke nau lau ʻa e folofolá.”

Peá u ʻeke ange, “ʻA e folofola fē?”

Naʻá ne talamai, “Ha folofola pē. Hangē ko ʻeni, talaange ke fakaava ʻenau Tohi ʻa Molomoná, pea kamata lau. He ʻikai hano taimi kuo hoko mai ʻa e ongo ʻo e nongá pea maʻu ha ueʻi fakalaumālie, pea ʻe haʻu ʻa e founga fakaleleiʻí ʻiate ia pē.” (Boyd K. Packer, “Ko e Kī ki he Maluʻi Fakalaumālié,” Liahona, Nōvema 2013, 26–27)

Naʻe akoʻi ʻe Palesiteni Peeka ʻi heʻene lea kau ki he futinoutí, Fakahinohino ki he Ngaahi Folofolá, mo e ngaahi meʻangāue kehe ʻi he folofolá ʻa e meʻá ni:

ʻI he fakalau atu ʻa e ngaahi taʻú, ʻe hanga ʻe he ongo folofola ko ʻení ʻo ʻomi ha toʻu tangata lelei ʻo ha kau Kalisitiane faivelenga te nau ʻilo ki he ʻEiki ko Sīsū Kalaisí mo nau feinga ke talangofua ki Hono finangaló. …

… ʻE ʻatā ʻa e ngaahi fakahaá kiate kinautolu ʻo ʻikai ke hangē ko ha toe taha ʻi he hisitōlia ʻo e māmaní. … Te nau fakatupulaki ha ʻilo ʻo e ongoongoleleí ʻo mahulu hake ʻi he meʻa naʻe lava ke maʻu ʻe heʻenau ngaahi kuí. Te nau maʻu ʻa e fakamoʻoni ko Sīsū ʻa e Kalaisí pea malava ke fakahaaʻi mo taukaveʻi Ia. …

Ko e ngaahi fakamoʻoni fakafolofola ko ʻeni mei he ngaahi vōliume ʻe fā ʻo e folofolá, ko e fakamatala fakafolofola mahino taha ia kuo fakatahatahaʻi ʻo kau ki he misiona mo e ngaahi akonaki ʻa e ʻEiki ko Sīsū Kalaisí ʻa ia kuo fakatahaʻi ʻi he hisitōlia ʻo e māmaní. (Boyd K. Packer, “Scriptures,” ʻi he Conference Report, Oct. 1982, 75–76; pe Ensign, Nov. 1982, 53)

Ko e hā ha ngaahi meʻangāue ʻoku lava ke maʻu ʻi he folofolá ʻi he ngaahi pulusinga ʻa e Siasí?

Fakakaukau ke toe vakaiʻi ʻa e “Scripture Study Tools” ʻi he Ensign ʻo ʻOkatopa 2006 ki ha fakamatala lahi ange ki he fehuʻi ko ʻení.

Ngaahi ʻEkitivitī Fakalahi ki he Akó

Akoako lahi ange ʻi he ngaahi meʻangāue akó

Kapau ʻe ʻaonga ki he kau akó haʻanau ako lahi ange ki he founga hono fakaʻaongaʻi ʻo e ngaahi meʻangāue ako ʻoku ʻoatu ʻi he lēsoni ko ʻení, fakakaukau ke fakaafeʻi kinautolu ke vakai ki he “Using the New Scriptures” naʻe fai ʻe Palesiteni Poiti K. Peeka (1924–2015), ko e Palesiteni mālōlō ʻo e Kōlomu ʻo e Kau ʻAposetolo ʻe Toko Hongofulu Mā Uá, ʻi he Ensign ʻo Tīsema 1985. Tuku ke tauhoa ʻa e kau akó pea ʻai ha tokotaha ʻi he hoá ke ne ako ʻa e konga “Futinoutí.” Hili ha taimi feʻunga, fakaafeʻi kinaua ke na feakoʻiʻaki ʻa e meʻa naʻá na akó pea ke fakahoko ha fehuʻi te na lava ʻo kumi hono talí ʻaki ʻena fakaʻaongaʻi ʻa e ngaahi meʻangāue ako ko ʻení. Te na lava ʻo fetokoniʻaki hono kumi ʻa e ngaahi talí.

Toe vakaiʻi ʻa e ngaahi ʻekitivitií pea kumi ʻa e ngaahi ʻekitivitī ʻoku fakatefito ange ʻi he Tokāteline mo e Ngaahi Fuakavá pe ngaahi ʻekitivitī ʻe tokoni ki hoʻo kau akó ke nau maʻu ha ako folofola ʻoku mālohi angé.

Ko ha sīpinga ʻe taha ʻo e founga hono fakaʻaongaʻi ʻo e naunau ko ʻení ko hono vahevahe ʻa e kau akó ki ha ngaahi kulupu tautau toko nima. Vahe ki ha taha ʻi he kulupu takitaha ha taha ʻo e ongo ʻuluʻi fakamatala ko ʻeni ʻi he lēsoní: “Fakahinohino ki he Ngaahi Folofolá,” mo e “Fakamatala Fakahokohoko ʻo e Hisitōlia ʻo e Siasí, Ngaahi Mapé, mo e Ngaah Taá” Te nau lava ʻo ako ʻa e naunaú mo mateuteu ke akoʻi ʻenau kulupú fekauʻaki mo e meʻangāue kuo vahe angé.