Lēsoni 170: Ngaahi Taukei Ako Folofolá

Ko Hono Kumi ʻa e Ngaahi Moʻoni ʻo e Ongoongoleleí ʻi he Folofolá

Ako ke ʻIloʻi ʻa e Tokāteliné mo e Ngaahi Tefitoʻi Moʻoní

Kuo fakatolonga ʻe he ʻEikí ʻi he folofolá ʻa e ngaahi moʻoni ʻo e ongoongoleleí—ʻa e tokāteline mo e ngaahi tefitoʻi moʻoni taʻengata ʻo ʻEne ongoongoleleí—ʻa ia ʻokú ne ʻomi kitautolu ke tau ofi ange kiate Ia pea mo mahuʻinga ki heʻetau fakalakalaká mo e fakamoʻuí. ʻE lava ke tokoni ʻa e lēsoni ko ʻení ke fakatupulaki hoʻo malava ke maʻu ʻa e ngaahi moʻoni ʻo e ongoongoleleí ʻi he folofolá pea ofi ange ki he Tamai Hēvaní mo e Fakamoʻuí.

Ngaahi ʻEkitivitī Ako ʻOku Ala Fakahokó

ko e talanoa fakatātā ʻo e ngaahi maka koloá

Kapau ʻoku ʻikai maʻu ʻa e foʻi vitiō ko ʻení, fakakaukau ke kamata ʻa e kalasí ʻaki hano fakaʻaliʻali ʻa e ngaahi fakatātā ʻi ʻolungá pea kole ki he kau akó ke fakakaukauloto ki ha taha ʻoku fekumi mo maʻu ha makakoloa ʻi he ʻoneʻoné ʻi ha matātahi. Fehuʻi ange, “ʻE tatau fēfē nai ʻa e fekumi ʻi he folofolá mo e fekumi ki ha ngaahi makakoloa ʻi he ʻoneʻoné?”

Sio ʻi he foʻi vitiō “The Parable of the Gems” (6:47; sio mei he taimi 2:13 ki he 4:20) pea fakalaulauloto ki he founga ʻe lava ke tatau ai ʻa e talanoá mo ʻetau ako folofolá.

Kapau naʻe ʻikai ke ke lava ʻo huluʻi ʻa e foʻi vitioó, hiki fakalaka mei he fehuʻi ʻuluaki ʻi he ngaahi fehuʻi ko ʻení. Te ke lava foki ʻo liliu ʻa e fehuʻi fakaʻosí ki he “Ko e hā nai ʻe fakahoko ʻe ha taha ke ne sivisiviʻi mo fakahoungaʻi ai ʻa e ngaahi maka koloá?”

• Ko e hā naʻe makehe kiate koe ʻi he foʻi vitiō ko ʻení?

• Ko e hā ʻe lava ke fakafofongaʻi ʻe he ʻoneʻoné? Ko e hā ʻe lava ke fakafofongaʻi ʻe he maka koloá?

• Ko e hā naʻe fakahoko ʻe he taʻahiné ke ako pe houngaʻia ai ʻi he ngaahi makakoloa naʻá ne maʻú?

Fakakaukau ke fakamatalaʻi ʻa e ngaahi meʻá ni ʻi he lea pē ʻaʻau:

ʻE lava ke hangē ʻa e tokāteline mo e ngaahi tefitoʻi moʻoni ʻo e ongoongoleleí ko e makakoloa ʻi he talanoa fakatātaá. Ko e taha ʻo e ngaahi tefitoʻi taumuʻa ʻo e folofolá ko hono akoʻi ʻa e tokāteline mo e ngaahi tefitoʻi moʻoni ʻo e ongoongoleleí. Ko e tokāteliné ko ha foʻi moʻoni mahuʻinga mo taʻe-feliliuaki ia ʻo e ongoongolelei ʻo Sīsū Kalaisí. Ko e tefitoʻi moʻoni ʻo e ongoongoleleí ko ha fakahinohino fakatokāteline ia ʻe lava ke ohi mai ʻe he fakafoʻituituí ke tokoniʻi kinautolu ʻi hono fakahoko ha ngaahi fili. ʻOku tokoni ʻa e tokāteline mo e ngaahi tefitoʻi moʻoni mahuʻinga taha ʻoku tau ako mei he folofolá ke tau ʻilo ʻa e Tamai Hēvaní mo Sīsū Kalaisi pea mo mahino ʻa e founga ke foki ai ki Hona ʻaó.

ʻI he tohi lēsoni ko ʻení, te ke sio ʻi he taimi ʻe niʻihi ki he ngaahi fakaafe ke ʻiloʻi ʻe he kau akó ʻa e “ngaahi moʻoní.” Ko ha founga faingofua ange ʻeni ʻo hono lea ʻaki ʻa e ngaahi tefitoʻi moʻoní pe ngaahi fakamatala ʻo e tokāteliné. Fakaafeʻi ʻa e kau akó ke vakaiʻi ʻenau malava ke ʻiloʻi ngofua ʻa e ngaahi moʻoní (ngaahi tefitoʻi moʻoni pe fakamatala ʻo e tokāteliné) mei he folofolá.

• Ko e fē ʻi he ngaahi fakamatala ko ʻení ʻokú ne fakafofongaʻi lelei taha ʻa e loto-falala ʻokú ke maʻu ʻi ho tuʻunga malava ke maʻu ʻa e ngaahi moʻoni ʻo e ongoongoleleí ʻi he folofolá?

  • ʻIkai ke falala ki ai

  • Falala siʻisiʻi pē ki ai

  • Falala ʻaupito ki ai

Fakafanongo fakalelei ki he ngaahi tali ʻa e kau akó. Fakakaukau ke fehuʻi ange pe ko e hā ʻoku nau ongoʻi pehē aí. Kumi ha ngaahi founga ʻi he lēsoní ke tokoniʻi kinautolu ke nau ongoʻi loto-falala ange ai ʻi heʻenau feinga ke ʻiloʻi ʻa e ngaahi moʻoni ʻo e ongoongoleleí.

Fakaʻuhingaʻí

ʻOange ki he kau akó ʻa e laʻipepa tufa ʻoku ʻoatu ko ʻení. Lau fakataha ʻeni mo e kalasí. ʻOange mo ha toe ngaahi fakamatala pē ʻokú ke pehē ʻe ala fiemaʻu ke fakamatalaʻi ʻaki ʻa e taukei ko ʻení.

Ako ke ʻIloʻi ʻa e Tokāteliné mo e Ngaahi Tefitoʻi Moʻoní

ʻOku hā mahino ʻi he folofolá ha niʻihi ʻo e tokāteline mo e ngaahi tefitoʻi moʻoni ʻo e ongoongoleleí. ʻE lava ke fakahoʻata ʻa e tokāteline mo e ngaahi tefitoʻi moʻoni kehé ʻi he talanoá pea ʻoku toki maʻu pē ia ʻi hono ako ha tohi kakato ʻo e folofolá, ko ha vahe pe ko ha foʻi veesi. Te ke lava ʻo akoako fakahoko ʻa e ngaahi sitepu mahuʻinga ko ʻení ʻi he taimi kotoa pē ʻokú ke ako ai ʻa e folofolá ke tokoni ke ke ʻiloʻi ʻa e ngaahi moʻoni ʻo e ongoongoleleí:

1. Lau māmālie mo tokanga .

2. Fekumi ki ha ngaahi moʻoni ʻoku mahino hono fakamatalaʻí. ʻOku faʻa ʻilonga ʻeni ʻi he taimi ʻoku fakaʻaongaʻi ai ʻe he tokotaha tohí ʻa e ngaahi lea hangē ko e “ko ia ʻoku tau vakai,” “ko ia,” “ko ia ai,” pe “vakai.”

3. Fekumi ki he ngaahi moʻoni ʻoku fokotuʻu maí. Te ke lava ʻo maʻu ʻa e ngaahi moʻoni ko ʻení ʻaki hono ʻeke kiate koe pē ha ngaahi fehuʻi hangē ko ʻení:

   1. ʻOku ʻi ai nai ha ngaahi fakakaukau, lea, pe kupuʻi lea mahuʻinga—tautautefito ki ha faʻahinga meʻa pē ʻokú ne tokoniʻi koe ke ke ʻiloʻi lelei ange ʻa e Tamai Hēvaní mo ʻEne palaní pe ko Sīsū Kalaisi mo ʻEne ongoongoleleí?

   2. Ko e hā ʻa e ngaahi tupuʻanga-mo e-ola ʻi he talanoa ko ʻení?

   3. Ko e hā ‘a e lēsoni pe taumu‘a ‘o e talanoá?

   4. ‘Okú ke pehē ko e hā na‘e fakakau ai ‘e he tangata tohí ʻa e ngaahi me‘a ko ʻeni naʻe hokó pe ngaahi potufolofolá?

4. Hiki ʻi he lea pē ʻaʻau ʻa e meʻa naʻá ke maʻú pea fakaʻilongaʻi ʻa e ngaahi lea ʻi he folofolá ʻoku nau akoʻi iá.

5. Fakalaulauloto ki he ʻuhinga ʻoku mahuʻinga ai ʻa e moʻoní kiate koé. Naʻe akonaki ʻa ʻEletā Sefilī R. Hōlani ʻo e Kōlomu ʻo e Kau ʻAposetolo ʻe Toko Hongofulu Mā Uá ʻo pehē:

   

   Fakalaulauloto [pea] vakavakaiʻi ʻa e foʻi lea kotoa pē, ʻa e koloa fakafolofola kotoa pē. … Puke hake ia ki he māmá pea fulifulihi, pea vakai ke sio ki he meʻa ʻoku ʻasi pe tapua mai mei aí. … ʻE lava ʻe he faʻahinga vakavakaiʻi peheé ʻo taʻaki ha makakoloa ʻoku fufū ʻi ha ngoue: ko ha mataʻitofe mahuʻinga lahi; ko ha mataʻitofe ʻoku ope atu hono mahuʻingá. (“Students Need Teachers to Guide Them” [address to Church Educational System religious educators, June 20, 1992], 4)

Fakatātaaʻi

Fakakaukau ke fakatātaaʻi ʻa e founga ke fakahoko ai ʻeni ko ha kalasí ʻaki hoʻo muimui ki he ngaahi sitepu ʻi he laʻipepa tufá. ʻAi ke ʻilo ʻe he kau akó te nau maʻu ha faingamālie ʻamui ange ke ʻahiʻahiʻi ia ʻiate kinautolu pē. Fakakaukau ke tā ha makakoloa ʻi he palakipoé. Hiki ʻi he tafaʻakí ʻa e ngaahi moʻoni ʻoku ʻiloʻi ʻe he kau akó. Ko hono fakaʻaongaʻi ʻo e fakalea ʻa e kau akó ko ha founga lelei ia ke langaki ai ʻenau loto-falala ke kau ki he kalasí.

1. Lau māmālie mo tokanga ʻa e Tokāteline mo e Ngaahi Fuakava 18:10–11.

2. Fekumi ki ha ngaahi moʻoni ʻoku mahino hono fakamatalaʻí.

   ʻE lava ke maʻu ʻe he kau akó ha tokāteline hangē ko e ʻoku mahuʻinga lahi ʻa e ngaahi laumālié ʻi he ʻao ʻo e ʻOtuá.

3. Fekumi ki ha ngaahi moʻoni ʻoku fokotuʻu mai ʻaki haʻo ʻeke ha niʻihi ʻo e ngaahi fehuʻi ʻoku hiki ʻi he laʻipepa tufá.

ʻI he tali ki he ʻuluaki fehuʻi ʻi he laʻipepa tufá, ʻe lava ke maʻu ʻe he kau akó ʻa e foʻi moʻoni ko ʻení: Te tau lava ʻo fakatomala pea haʻu kia Kalaisi he naʻá Ne mamahi koeʻuhí ko ʻetau ngaahi angahalá mo e mamahí pea iku ʻo pekia maʻatautolu.

Kapau ʻe fakatokangaʻi ʻe he kau akó ʻa e tupuʻanga mo e ola ʻi he veesi 10 mo e 11, mahalo te nau lava ʻo vakai ki he foʻi moʻoni ko ʻení: Koeʻuhí ʻoku mahuʻinga lahi hotau laumālié ʻi he ʻao ʻo e ʻOtuá, naʻe finangalo lelei ai ʻa Sīsū Kalaisi ke mamahi koeʻuhí ke tau lava ʻo fakatomala pea haʻu kiate Ia.

Kapau ʻe fakakaukau ʻa e kau akó ki he fehuʻi fakaʻosí, ʻe lava ke nau vakai ki he moʻoni ko ʻení: ʻOku finangalo ʻa Sīsū Kalaisi, ko hotau Huhuʻí, ke tau ʻiloʻi hotau mahuʻinga kiate Iá.

Hiki ʻa e moʻoni naʻá ke maʻú ʻi ha laʻipepa, ʻi he tafaʻaki hoʻo folofolá, pe ko ha kiʻi fakamatala ʻi he polokalama Gospel Library . Mahalo te ke fie fakaʻilongaʻi foki ʻa e ngaahi lea ʻoku nau akoʻi ia ʻi he folofolá.

Fakaʻaongaʻi ha kiʻi taimi ke fakalaulauloto ai ki he ʻuhinga ʻe mahuʻinga pe ʻuhingamālie ai kiate koe ʻa e moʻoni naʻá ke maʻú. Fakaʻaongaʻi ha kiʻi taimi ke ke fakakaukauloto ai ki he ngaahi moʻoni naʻá ke maʻú. ʻE lava ke tokoni atu ʻa e fehuʻi ʻe tolu ko ʻení:

1. Ko e hā ʻe ala lau ai ʻa e foʻi moʻoni ko ʻení ko ha makakoloá?

2. Ko e hā ʻokú ne akoʻi atu fekauʻaki mo e Tamai Hēvaní mo Sīsū Kalaisí?

3. ʻE lava fēfē nai ke ne tokoniʻi koe ʻi he ʻaho ní?

Fakaafeʻi ha niʻihi ʻo e kau akó ke vahevahe ʻenau ngaahi fakakaukaú. ʻI heʻenau fanongo ki he fakakaukau honau kaungā akó mo fakalaulaulotó, ʻe lava ke ne poupouʻi kinautolu ke fakakaukau lahi ange ki he ngaahi moʻoni ʻi he folofolá.

Akoako Fakahoko

Fakaafeʻi ʻa e kau akó ke fakahoko fakafoʻituitui ʻa e ʻekitivitī ko ʻení. ʻE lava ke fakakakato ʻe he kau akó ʻa e ʻekitivitií ʻi heʻenau tohinoa akó pe, kapau te ke loto ke nau vahevahe ʻa e meʻa naʻa nau maʻú mo e toenga ʻo e kau akó ʻi he ʻekitivitī ʻi laló, ʻi ha ngaahi laʻipepa mavahevahe. Te nau lava ʻo fakaʻaongaʻi ʻa e laʻipepa tufa kuo ʻoatú ke tokoni kiate kinautolu.

Ke akoakó, fakahoko ʻa e ʻekitivitī ko ʻení:

1. Tā ha fakatātā ʻo ha makakoloa ʻe ua.

2. ʻI hoʻo ako ha potufolofola ʻe ua pe lahi ange mei he ngaahi potufolofola ko ʻení, pe ngaahi potufolofola kehe te ke fili, hiki ha “makakoloa” ʻe taha ʻo e moʻoní ʻokú ke maʻu ʻi he potufolofola takitaha: Tokāteline mo e Ngaahi Fuakava 1:30; 8:2–3; 18:15–16; 19:16–19; 21:4–6; 49:15–17; 58:42–43; 76:22–24; 131:1–4; 135:3.

3. Hiki ʻa e ʻuhinga ʻoku hoko ai ʻa e foʻi moʻoni takitaha ko ha makakoloa fakalaumālie kiate koé. Fakakau ai ʻa e meʻa ʻokú ne akoʻi atu fekauʻaki mo e Tamai Hēvaní mo Sīsū Kalaisí pea mo e founga ʻe lava ke ne tokoniʻi ai koe ʻi he ʻaho ní.

Kapau naʻe fakakakato ʻe he kau akó ʻa e ʻekitivitií ʻi ha ngaahi laʻipepa mavahevahe, te nau lava ʻo fefakafetongiʻaki ʻenau laʻipepá pea fevahevaheʻaki ʻa e meʻa naʻa nau akó. ʻE lava foki ke fokotuʻu ʻe he kau akó ʻa e ngaahi makakoloa fakafolofola ʻoku nau ongoʻi ʻoku ʻuhingamālie taha ki he toʻu tupu ʻo e ʻaho ní pea hiki ha lisi ʻo e ngaahi meʻá ni ʻi he palakipoé.

Makatuʻunga ʻi hoʻo aʻusia ʻi he ʻaho ní, ko e hā hono ʻuhinga te ke fiemaʻu ai ke kumi mo fakalaulauloto ki ha ngaahi moʻoni ʻi hoʻo akó?

Hiki ʻi hoʻo tohinoa akó ʻa e founga te ke fiemaʻu ai ke maʻu ʻa e ngaahi moʻoní ʻi hoʻo ako ʻa e ongoongoleleí. Ko e founga ʻe taha te ke lava ʻo fakahoko ai ʻení ko hono kumi mo fakalaulauloto ki ha foʻi moʻoni ʻe taha pe lahi ange ʻi he ʻaho mei hoʻo ako folofola fakatāutahá. Mahalo te ke fakakaukau ke hiki ʻa e ngaahi moʻoni ʻokú ke maʻú ʻi hoʻo folofolá pe ʻi ha tohinoa folofola.

Fakakaukau ke fakaafeʻi ha tokotaha ako ʻe taha ʻi he ʻaho ki he ngaahi lēsoni hono hokó ke vahevahe ha foʻi makakoloa fakafolofola ʻe taha naʻa nau maʻu ʻi heʻenau akó. ʻE lava foki ke fakahoko ʻeni ʻe he kau akó ʻaki hano vahevahe ha fakakaukau fakafolofola ko ha konga ʻo ha fakataha lotu. Kumi ha ngaahi faingamālie kehe ʻi he ngaahi lēsoni ʻi he kahaʻú ke hokohoko atu hono ako ʻe he kau akó ʻa e taukei mahuʻinga ko ʻení.

Ngaahi Maʻuʻanga Tokoni Lahi Ange

Ko e hā ʻoku totonu ai ke u ʻiloʻi ʻa e ngaahi moʻoni ʻo e ongoongoleleí mei he folofolá?

Naʻe akonaki ʻa ʻEletā Lisiate G. Sikoti (1928–2015) ʻo e Kōlomu ʻo e Kau ʻAposetolo ʻe Toko Hongofulu Mā Uá ʻo pehē:

ʻI hoʻo fekumi ki he ʻilo fakalaumālié, fekumi ki he ngaahi tefitoʻi moʻoní. Fakamavahe‘i fakalelei kinautolu mei he ngaahi fakamatala fakaikiiki ʻoku fakaʻaongaʻi ke fakamatalaʻi ʻaki kinautolú. Ko e ngaahi tefitoʻi moʻoní ko ha moʻoni ʻoku fakataumuʻa ke fakaʻaongaʻi ʻi ha ngaahi tūkunga kehekehe. ʻOku hanga ʻe he tefitoʻi moʻoni ʻoku moʻoní ʻo fakamahinoʻi ʻa e ngaahi fili ʻoku tau faí, ʻo aʻu pē ki he ngaahi tūkunga fakapuputuʻu mo faingataʻa tahá. ʻOku mahuʻinga ke tau feinga mālohi ke fokotuʻutuʻu fakalelei ʻa e moʻoni ʻoku tau tānakí ke hoko ia ko ha ngaahi fakamatala faingofua ʻo e tefitoʻi moʻoní. (Richard G. Scott, “Acquiring Spiritual Knowledge,” Ensign, Nov. 1993, 86)

Naʻe fakamoʻoni ʻa ʻEletā Tēvita A. Petinā ʻo e Kōlomu ʻo e Kau ʻAposetolo ʻe Toko Hongofulu Mā Uá ki he meʻá ni:

ʻOku fakamālohia ʻe hono ako, mahino mo moʻui ʻaki ʻa e ngaahi tefitoʻi moʻoni ʻo e ongoongoleleí ʻa ʻetau tui ki he Fakamoʻuí, fakaloloto ange ʻetau moʻui līʻoa kiate Iá, mo fakaafea ha ngaahi tāpuaki mo ha ngaahi meʻafoaki fakalaumālie lahi ki heʻetau moʻuí. …

ʻOku fakaʻatā kitautolu ʻe he ngaahi tefitoʻi moʻoni totonú ke tau ʻilo hotau halá mo tuʻu maʻu, tuʻu ʻaliʻaliaki mo taʻe lava ke ueʻi ke ʻoua naʻa tau fakahoko ha ngaahi fehalaaki ʻi he lotolotonga ʻo e ngaahi pole mo e ngaahi fakakaukau fakapuputuʻu ʻo e ngaahi ʻaho ní. (David A. Bednar, “Ko e Ngaahi Tefitoʻi Moʻoni ʻo ʻEku Ongoongoleleí,” Liahona, Mē 2021, 123, 126)

Naʻe pehē ʻe Palesiteni Melioni G. Lomenī:

He ʻikai lava ʻe ha taha ʻo ako moʻoni ʻa e folofolá kae ʻikai ke ne ako ʻa e ngaahi tefitoʻi moʻoni ʻo e ongoongoleleí he kuo hiki ʻa e folofolá ke fakatolonga ʻa e ngaahi tefitoʻi moʻoní ke ʻaonga kiate kitautolu. (“The Message of the Old Testament” [Church Educational System symposium, Aug. 17, 1979], 3)

Ko e hā ʻa e mahuʻinga ʻo e tuku taimi ke hiki ʻa e ngaahi moʻoni ʻoku tau maʻú?

Naʻe akonaki ʻa ʻEletā B. H. Lōpeti ʻo pehē:

Kapau ʻe ʻiloʻi ʻe he kakaí ʻa e moʻoní, kuo pau ke fakahā ʻa e moʻoní pea ko ʻene mahino lelei mo kakato ange ʻa e fakamatalá, ko e faingamālie lelei ange ia ʻe maʻu ʻe he Laumālie Māʻoniʻoní ke fakamoʻoniʻi ki he laumālie ʻo e tangatá ʻoku moʻoni ʻa e ngāué [New Witnesses for God, 3 vols. (1909), 2:vii]. (B. H. Roberts, ʻi he James E. Faust, “What I Want My Son to Know before He Leaves on His Mission,” Ensign, May 1996, 41; Malangaʻaki ʻEku Ongoongoleleí: Ko ha Fakahinohino ki he Ngāue Fakafaifekaú [2004], 217–18)

Ngaahi ʻEkitivitī Fakalahi ki he Akó

Ngaahi tefitoʻi moʻoni kuo fakamatalaʻi mahinó

Kapau ʻe ʻaonga ki he kau akó ʻenau sio ki he ngaahi sīpinga ʻo e ngaahi moʻoni ʻoku muimui ʻi he ngaahi foʻi lea mo e ngaahi kupuʻi lea hangē ko e “ko ia ʻoku tau vakai,” “ko ia ai,” “ko ia,” pe “vakaí,” ʻe lava ke mou vakai ki he ngaahi potufolofola ko ʻení pea feinga ke ʻiloʻi ʻa e tefitoʻi moʻoní:

• Hilamani 3:27: “Ko ia ʻoku tau lava ʻo ʻiloʻi ai ʻoku ʻaloʻofa ʻa e ʻEikí kiate kinautolu kotoa pē te nau ui ki hono huafa toputapú, ʻi he moʻoni ʻo honau lotó.”

• ʻAlamā 12:10: “Ko ia, ʻilonga ia ʻe fakafefeka hono lotó, ʻe maʻu ʻe ia ʻa e konga siʻi ange ʻo e folofolá;; pea ʻilonga ia ʻe ʻikai fakafefeka hono lotó, ʻe foaki kiate ia ʻa e konga lahi ʻo e folofolá.”

• ʻEfesō 6:13: “Ko ia ke toʻo ʻa e mahafu tau kotoa ʻo e ʻOtuá, koeʻuhí ke mou faʻa tuʻu ai ʻi he ʻaho ʻo e koví, pea hili hono ikuʻi kotoa pē, kae tuʻu pē.”

• ʻAlamā 41:10: “Vakai, ʻoku ou pehē kiate koe, kuo teʻeki ai hoko ʻa e fai angahalá ko e fiefia.”

Ngaahi fakahinohino ki hono vakavakaiʻi ʻo e ngaahi moʻoní

ʻI he taimi ʻoku ako ai ʻa e founga ke ʻiloʻi ʻa e ngaahi moʻoni mei he folofolá, ʻoku faingofua ke ʻiloʻi ha ngaahi fakamatala pe tohi ha ngaahi tefitoʻi moʻoni ʻoku ʻikai moʻoni pea ʻoku ʻikai ko e meʻa ia naʻe fakataumuʻa ki ai ʻa e tokotaha naʻá ne hiki iá. Mahalo naʻa ʻaonga ke ʻoange ki he kau akó ʻa e ngaahi fehuʻi ʻoku hiki atu ʻi laló ke tokoni ke nau vakavakaiʻi ʻa e tonu ʻo e ngaahi tefitoʻi moʻoni ʻoku nau maʻú. Hili hoʻomou maʻu ha tefitoʻi moʻoni ko ha kalasí, te ke lava ʻo fakatātaaʻi ʻa e founga ke fakaʻaongaʻi ai ʻa e ngaahi fehuʻi ko ʻení kimuʻa pea toki ʻahiʻahi fakahoko ia ʻe he kau akó ʻiate kinautolu pē.

• ʻOku fakapapauʻi nai ʻa e meʻa naʻá ke maʻú ʻe he ngaahi folofola kehé mo e ngaahi akonaki lolotonga ʻa e kau taki ʻo e Siasí?

• ʻOku fenāpasi nai ʻa e meʻa naʻá ke maʻú mo e taumuʻa fakalaumālie ʻa e tokotaha faʻu tohí ʻo fakatatau mo e mahino ʻokú ke maʻú? (Te ke lava ʻo toe vakaiʻi ʻa e ngaahi veesi ki muʻá mo e hili ʻa e moʻoni naʻá ke maʻú pea fakalaulauloto pe ʻoku fenāpasi ia mo e meʻa ʻokú ke pehē naʻe fakataumuʻa ki ai ʻa e tokotaha faʻu tohi totonú.)

• ʻOku moʻoni nai ʻa e meʻa naʻá ke maʻú ʻi he taimi kotoa pē, ʻi he tūkunga kotoa pē, pea ʻi he anga fakafonua kotoa pē?

• ʻOku tokoni nai ʻa e mahino ʻo e meʻa naʻá ke maʻú ke ke fakakakato ho ikuʻanga taʻengatá ʻi he palani ʻa e Tamai Hēvaní?

• ʻOkú ke ongoʻi nai hono fakapapauʻi atu ʻe he Laumālie Māʻoniʻoní ʻoku moʻoni ʻa e meʻa naʻá ke ʻiló?

Ngaahi founga kehe ke tokoni ke ʻiloʻi ʻe he kau akó ʻa e ngaahi moʻoní

Fakakaukau ke kumi ʻa e ngaahi founga kehe ko ʻení ke tokoni ke ʻiloʻi ʻe he kau akó ʻa e ngaahi tefitoʻi moʻoní.

Fakamatala puipuituʻá: Ko e lahi taha ʻo e ngaahi fakahā ʻi he Tokāteline mo e Ngaahi Fuakava naʻe fakahā ia koeʻuhí naʻe ʻeke ʻe ha taha ha fehuʻi pe fehangahangai ʻa e Kāingalotú mo ha palopalema pe faingataʻa. ʻE lava ke tokoni hono ʻiloʻi ʻa e fakamatala ko ʻení ke mahino kiate koe ʻa e ʻuhinga naʻe fakahā ai ʻe he ʻEikí ʻa e meʻa naʻá Ne fakahokó. Hangē ko ʻení, fakaafeʻi ʻa e kau akó ke lau ʻa e ʻuluʻi vahe ki ha vahe ʻo e Tokāteline mo e Ngaahi Fuakavá pea kumi ʻa e tali ki he ngaahi fehuʻi ko ʻení:

• Ko hai naʻe ʻomi ki ai ʻa e fakahā ko ʻení?

• Ko e hā ʻa e fehuʻi pe tūkunga naʻe hoko kimuʻa ʻi he fakahā ko ʻení?

Ngaahi fakamatala fakanounoú: ʻE lava foki ke tokoni ke ʻiloʻi ʻoku ʻi lalo ʻi he ʻuluʻi vahe ʻo e vahe takitaha ʻo e Tokāteline mo e Ngaahi Fuakavá, ha palakalafi ʻokú ne fakamatalaʻi fakanounou ha ngaahi veesi. ʻE lava foki ke ʻaonga ʻeni ʻi hoʻo feinga ke ʻiloʻi ha ngaahi tefitoʻi moʻoní. Hangē ko ʻení, lau ʻa e palakalafi ʻi lalo ʻi he ʻuluʻi vahe ʻo e vahe naʻá ke filí.

ʻI hoʻo fakakaukau ki he fakamatala ko ʻení, lau ha konga ʻo e vahe naʻá ke filí ʻo fekumi ki he ngaahi moʻoni ʻo e ongoongoleleí.

Ko hono maʻu ʻa e ngaahi moʻoní ʻi he folofolá