“Lēsoni 169—Ko e Nofotaha ʻia Sīsū Kalaisi ʻi he Folofolá: Ko Hono Ako ʻa e Ngaahi Huafa mo e ʻUlungaanga ʻo e Fakamoʻuí,” Tokāteline mo e Ngaahi Fuakava – Tohi Lēsoni ʻa e Faiako Seminelí (2025)
“Ko e Nofotaha ʻia Sīsū Kalaisi ʻi he Folofolá,” Tokāteline mo e Ngaahi Fuakava – Tohi Lēsoni ʻa e Faiako Seminelí
Lēsoni 169: Ngaahi Taukei Ako Folofolá
Ko e Nofotaha ʻia Sīsū Kalaisi ʻi he Folofolá
Ko Hono Ako ʻa e Ngaahi Huafa mo e ʻUlungaanga ʻo e Fakamoʻuí
Ko e taha ʻo e ngaahi tefitoʻi taumuʻa ʻo e folofolá ke tokoniʻi kitautolu ke tau ako ki he Tamai Hēvaní mo Sīsū Kalaisi. Ko e lahi ange ʻetau ako kiate Kinauá, ko e lahi ange ia ʻa e tupulaki ʻetau tui kiate Kinauá. ʻOku fakataumuʻa ʻa e lēsoni ko ʻení ke tokoniʻi koe ke ke tokanga taha ki he Fakamoʻuí lolotonga hoʻo ako ʻa e folofolá, tautautefito ki he Tokāteline mo e Ngaahi Fuakavá.
Ngaahi ʻEkitivitī Ako ʻOku Ala Fakahokó
Ko e hā ʻokú ke sio ki aí?
Fakakaukau ke fai ʻa e ʻekitivitī ko ʻení pe ko ha ʻekitivitī pē ʻaʻau ke fakafeʻiloaki ʻa e taukei ako folofola ʻo e tokanga taha ki he Fakamoʻuí. Ke poupouʻi ʻa e mateuteu ʻa e tokotaha akó, te ke lava ʻo fakaʻaliʻali ʻa e tatau nenefu ʻo e ʻīmisí ke sio ki ai ʻa e kau akó ʻi heʻenau aʻu atú.
Sio ki he fakatātā nenefu ko ʻení pea feinga ke fakamatalaʻi ʻa e meʻa ʻokú ke pehē ʻoku hokó.
Hokó, vakai ki he fakatātā tatau ʻoku ʻata leleí.
ʻI hono vakaiʻi ʻe he kau akó ʻa e fakatātā ʻo e ngāue fakafaifekau ʻa e Fakamoʻuí ki he kakai ʻo ʻAmeliká ʻi he kuonga muʻá, fakakaukau ke ʻeke ha ngaahi fehuʻi hangē ko ʻení. ʻI hono tali ʻe he kau akó hoʻo ngaahi fehuʻí, ʻai ke nau ʻiloʻi ʻokú ke mahuʻingaʻia ʻi heʻenau ngaahi fakakaukaú mo e kau maí.
-
Ko e hā ha ngaahi fakaikiiki ʻokú ke fakatokangaʻi ʻi he taimí ni ʻi he ʻata lelei ʻa e fakatātaá?
-
ʻI hoʻo vakai ki he fakatātā ko ʻení, ko e hā ha ngaahi fakakaukau pe ongo ʻokú ke maʻu fekauʻaki mo e Fakamoʻuí?
Fakakaukau ke vahevahe ha fakamatala hangē ko ʻení ke tokoni ke mahino lelei ange ki he kau akó ʻa e taumuʻa ʻo e ʻaho ní.
ʻE lava ke ʻuhinga ʻa e foʻi lea ʻata leleí ke ʻai ha meʻa ke toe mahino ange, ke ʻai ia ko e uho ʻo e tokangá, pe tokanga makehe ki ai.
-
Ko e hā ha ngaahi founga te tau lava ai ʻo fāifeinga ke tokanga taha ki he Fakamoʻuí ʻi heʻetau ako ʻa e folofolá?
-
Ko e hā ka tau ka fiemaʻu ai ke tukutaha ʻetau tokangá kiate Iá?
ʻI hoʻo ako ʻa e lēsoni ko ʻení, fekumi ki ha fakahinohino mei he Laumālie Māʻoniʻoní pea kumi ha ngaahi ʻuhinga ʻe ala hoko ai ko ha tāpuaki kiate koe ke tukutaha hoʻo tokangá ʻi he Fakamoʻuí ʻi hoʻo ako folofolá. Fakalaulauloto ki ha ngaahi founga te ke lava ai ʻo fakatefito hoʻo akó ʻiate Ia.
Fakaʻuhingaʻí: Kumi ʻa e ngaahi huafa ʻo Sīsū Kalaisí
Ko e taukei ʻe taha ʻe lava ʻo tokoni atu ke ke tokanga taha ai ki he Fakamoʻuí ko e fekumi ki Hono ngaahi huafá lolotonga hoʻo ako ʻa e folofolá. ʻOku fakahaaʻi ʻe he ngaahi huafa ko ʻení ʻa e ngaahi fatongia kuo foaki ange ʻe he Tamai Hēvaní kiate Iá.
Fakatātaaʻi
Fakakaukau ke fakatātaaʻi ʻa e taukei ko ʻení ki he kau akó ʻaki hano fakaʻaongaʻi ʻa e potufolofola ko ʻení pe ko ha potufolofola kehe te ke fili. Te ke lava foki ʻo fakaʻaliʻali ʻa e fakatātā mei he kamataʻanga ʻo e lēsoní pe ko ha ʻīmisi ʻe taha ʻo e Fakamoʻuí ʻi he palakipoé. ʻI hono ʻiloʻi ha ngaahi huafa kehekehe ʻi he lēsoní, ʻe lava ke fakaafeʻi ʻa e kau akó ke hiki takatakai ʻeni ʻi he fakatātā ʻo e Fakamoʻuí ʻi he palakipoé pea fakamatalaʻi ʻa e ʻuhinga ʻoku mahuʻingamālie ai kiate kinautolu ʻa e huafa ko iá.
Lau ʻa e Tokāteline mo e Ngaahi Fuakava 6:21 pea kumi ha huafa ʻe taha pe lahi ange naʻe fakaʻaongaʻi ʻe Sīsū ke fakamatalaʻi ʻaki Ia.
-
Ko e hā naʻá ke ʻiló?
ʻE lava ke kau ʻi he ngaahi tali ki he fehuʻi ko ʻení ʻa e “Sīsū Kalaisi,” “ko e ʻAlo ʻo e ʻOtuá,” pe “Ko au ko e māmá.” Mahalo ʻe tokanga ʻa e kau akó ke ʻilo ko e maʻu ʻa e huafa faka-Pilitānia “Kalaisí” mo e “Mīsaiá” mei he ngaahi liliu faka-Kalisi mo faka-Hepelū ʻo e “tokotaha kuo paní.” ʻI he kuonga muʻá, naʻe tākai ʻa e ngaahi tuʻi mo e kau taulaʻeiki naʻa nau maʻu ha ngaahi fatongia makehe ke fakahokó ʻaki ʻa e lolo (vakai, Fakahinohino ki he Ngaahi Folofolá, “Tākaí,” scriptures.ChurchofJesusChrist.org). Ko ia ai, ko e Fakamoʻuí, ʻa ia naʻá Ne fakahoko ʻa e fatongia mahuʻinga tahá, ʻa e “Palōfita, Taulaʻeiki, Tuʻi, mo e Tokotaha Fakahaofi kuo pani” maʻá e fānau kotoa ʻa e ʻOtuá (Fakahinohino ki he Ngaahi Folofolá, “Mīsaiá,” scriptures.ChurchofJesusChrist.org).
-
Ko e hā te tau lava ʻo ako fekauʻaki mo Sīsū mei he ngaahi huafa kehekehe ko ʻení?
-
Ko e hā ʻoku mahuʻingamālie ai ʻa e huafa ko iá kiate koé? Ko e hā ha ngaahi founga ʻe lava ke tokoniʻi ai koe ʻi hoʻo moʻuí ʻi he taimí ni ʻe he mahino ko ʻeni fekauʻaki mo Sīsū Kalaisí?
Hangē ko ʻení, ʻi he taimi ʻoku tau ongoʻi ai ʻoku tau fiemaʻu ha maama lahi ange ʻi heʻetau moʻuí, te tau lava ʻo manatuʻi ko e Fakamoʻuí ʻa e maama ko iá. Te Ne lava ʻo tataki kitautolu ʻi he hala ke foki ai ki heʻetau Tamai Hēvaní.
Ke tokoni atu ke ke fakalaulauloto ki he mahuʻinga ʻo e ngaahi huafá, sio ʻi he vitiō “‘Nombre’—What Should We Name Him?” (1:47) ʻoku maʻu ʻi he ChurchofJesusChrist.org.
Akoako Fakahoko
Fakakaukau ki he ngaahi fiemaʻu hoʻo kau akó ʻi hoʻo fili pe ʻoku totonu ke nau fakahoko fakafoʻituitui pe fakakulupu ʻa e ʻekitivitī ko ʻení. ʻIkai ngata aí, ka ʻe lava ke vahevahe ʻe he kau akó ʻa e ngaahi huafa naʻa nau maʻu mei heʻenau ako fakatāutahá ʻa ia ʻoku mahuʻingamālie kiate kinautolú.
Hokohoko atu hoʻo akoako ke ʻiloʻi ʻa e ngaahi huafa kehekehe ʻo Sīsū ʻi he Tokāteline mo e Ngaahi Fuakavá. ʻE malava ke maʻu ʻi ha ngaahi potufolofola ʻe niʻihi ʻokú ke ako ha ngaahi huafa ʻoku lahi ange ʻi he tahá. Kapau ʻokú ke fiemaʻu tokoni ke mahino ʻa e ʻuhinga ʻo ha huafa, fakakaukau ki he ngaahi maʻuʻanga tokoni hangē ko e Fakahinohino ki he Ngaahi Folofolá ʻa ia ʻoku maʻu ʻi he scriptures.ChurchofJesusChrist.org.
Lau ha niʻihi pe kotoa ʻo e ngaahi potufolofola ko ʻení pea lekooti ha ngaahi huafa ʻokú ke maʻu ʻi hoʻo tohinoa akó. Fakalaulauloto ki he meʻa te ke lava ʻo ako fekauʻaki mo Sīsū mei he huafá mo e founga te Ne lava ʻo tokoniʻi ai koe ʻi hoʻo moʻuí.
Hili hono ʻoange ha taimi ki he kau akó ke ako mo fakalaulaulotó, fakaafeʻi kinautolu ke vahevahe ʻa e meʻa ne nau ako mo ongoʻi mei he ʻekitivitií. Kumi ha ngaahi founga ke fakamamafaʻi ʻa e founga ʻoku fenāpasi ai ʻa e huafa ʻo e Fakamoʻuí mo ʻEne ngaahi ngāue ke tokoniʻi kitautolú.
Fakaʻuhingaʻí: Kumi ʻa e ngaahi ʻulungaanga fakalangi ʻo e Fakamoʻuí
Ko ha founga ʻeni ʻe taha ke tukutaha ai ʻa e tokangá ki he Fakamoʻuí lolotonga hono ako ʻa e folofolá. Kapau ʻoku ʻi ai ha taimi feʻunga ʻi hoʻo lēsoní, te ke lava ʻo fakatātaaʻi pea fakaafeʻi ʻa e kau akó ke nau akoako ʻa e taukei ko ʻení foki.
Ko e founga ʻe taha ke tokanga taha ai ki he Fakamoʻuí lolotonga hono ako ʻa e folofolá ko e fekumi ki Hono ngaahi ʻulungaanga faka-ʻOtuá. Ko e ʻulungāngá ko ha tōʻonga pe anga ia ʻoku maʻu ʻe ha taha pe kuó ne fakatupulaki, hangē ko e faitotonú pe angaʻofá.
Fakatātaaʻi
Kapau ʻe fiemaʻu, fakakaukau ke fakatātaaʻi mo e kau akó ʻa e founga ke ʻiloʻi ai ha ʻulungaanga ʻo e Fakamoʻuí ʻo fakaʻaongaʻi ha taha ʻo e ngaahi potufolofola ʻi he konga hono hokó pe ko ha potufolofola te ke fili. Ko ha founga ʻe taha ke fakahoko ai ʻa e ʻekitivitī ko ʻení ko hono hiki ʻa e ngaahi potufolofola mei he Tokāteline mo e Ngaahi Fuakavá ʻi ha ʻū laʻipepa kehekehe pea tuku kinautolu ʻi ha ngaahi feituʻu kehekehe ʻi he lokí. ʻE lava ke ngāue ʻa e kau akó ʻi ha fanga kiʻi kulupu iiki ke ʻalu ki he laʻipepa takitaha pea fekumi ʻi he potufolofolá ki ha ʻulungaanga fakalangi ʻo e Fakamoʻuí.
Akoako Fakahoko
Lau ha niʻihi pe kotoa ʻo e ngaahi potufolofola ko ʻení pea kumi ʻa e ngaahi ʻulungaanga fakalangi ʻo e Fakamoʻuí. Fili ha ʻulungaanga ʻe taha ʻoku mahuʻingamālie kiate koé pea fakamatalaʻi nounou ʻa e founga ʻe lava ʻe hoʻo ʻiloʻi ʻa e ʻulungaanga ko iá ʻi he Fakamoʻuí ʻo tokoni atu ke ke ʻofa mo falala lahi ange ai kiate Iá.
Hangē ko ʻení, ʻe lava ke ʻiloʻi ʻe he kau akó ʻa e hoifua lelei ʻa Kalaisi ke fakahoko ʻa e finangalo ʻo e Tamai Hēvaní ʻi he vahe 19. Kapau kuo hiki takatakai ʻe he kau akó ha ngaahi huafa ʻi ha tā ʻo e Fakamoʻuí ʻi he palakipoé, poupouʻi kinautolu ke hiki foki mo e ngaahi ʻulungaanga ʻoku nau maʻú. Kumi ha ngaahi founga ke fakamālō ai ki he kau akó ʻi heʻenau kau maí pea fakamamafaʻi ʻa e ʻuhinga ʻoku totonu ke tau ʻofa mo falala ai ki he Fakamoʻuí.
Tokanga taha ki he Fakamoʻuí ʻi he vahe kotoa pē
-
Makatuʻunga ʻi he meʻa naʻá ke ako mo akoako fakahoko ʻi he ʻaho ní, ʻe lava fēfē nai ʻe he tokanga taha kia Sīsū Kalaisí ʻo fakahoko ha liliu ʻi hoʻo ako folofolá?
Fakakaukau ke vahevahe hoʻo fakamoʻoni pē ʻaʻau fekauʻaki mo e mahuʻinga ʻo e tokanga taha ki he Fakamoʻuí ʻi hono ako ʻo e folofolá. Fakaafeʻi ʻa e kau akó ke tokanga taha ki he Fakamoʻuí ʻi he vahe kotoa pē ʻo e Tokāteline mo e Ngaahi Fuakavá.
ʻI he kalasi hokó, fakakaukau ke fakaafeʻi ʻa e kau akó ke vahevahe ʻa e meʻa naʻa nau maʻu ʻi heʻenau ako fakataautaha pe fakafāmili fekauʻaki mo e Fakamoʻuí. Kumi ha ngaahi faingamālie ʻi he ngaahi lēsoni ʻi he kahaʻú ke poupouʻi ʻa e kau akó ke akoako fakahoko ʻa e taukei ko ʻení ʻi he kalasí.