“Fakamatalaʻi ʻo e Folofolá: Ko Hono Fakaʻilongaʻi mo Tānaki atu ha Ngaahi Fakamatalá,” Tokāteline mo e Ngaahi Fuakavá – Tohi Lēsoni ʻa e Faiako Seminelí (2025)
“Fakamatalaʻi ʻo e Folofolá,” Tokāteline mo e Ngaahi Fuakavá – Tohi Lēsoni ʻa e Faiako Seminelí
Lēsoni 171: Ngaahi Taukei Ako Folofolá
Fakamatalaʻi ʻo e Folofolá
Ko Hono Fakaʻilongaʻi mo Tānaki atu ha Ngaahi Fakamatalá
ʻE lava ke tokoni ʻa e lēsoni ko ʻení ki he kau akó ke fakaʻilongaʻi mo tānaki atu ha ngaahi fakamatala ki heʻenau folofolá ʻi ha founga te ne ʻai ʻenau akó ke ʻuhingamālie ange pea ʻomi kinautolu ke nau ofi ange ki he Tamai Hēvaní mo Sīsū Kalaisi.
Teuteu ʻa e tokotaha akó: Fakaafeʻi ʻa e kau akó ke fakaʻilongaʻi ʻa e meʻa ʻoku ʻuhingamālie kiate kinautolú, tautautefito ki he ngaahi foʻi lea pe kupuʻi lea ʻoku tokoni ke mahino kiate kinautolu pe ongoʻi e ʻofa ʻa e Tamai Hēvaní mo Sīsū Kalaisí, ko ha konga ʻo ʻenau ako folofola fakaʻahó. ʻE lava ke nau omi mateuteu ke vahevahe ʻa e meʻa naʻa nau fakaʻilongaʻí pea mo hono ʻuhingá.
Ngaahi ʻEkitivitī Ako ʻOku Ala Fakahokó
Ko hono ʻai ʻo e ako folofolá ke toe mahuʻingamālie angé
Fakaafeʻi ʻa e kau akó ke vahevahe ha fakakaukau ʻo ha ngaahi ʻekitivitī ʻe lava ke nau fakahoko noaʻia pē mo ha ʻekitivitī te nau fakahoko ʻoku mahuʻingamālie ange. ʻE lava ke kau ʻi he ngaahi sīpingá ʻa e fakafeʻiloaki mo e talanoa ki ha kaungā akó, fai ha kiʻi tohi pe text fakamālō, pea mo hono ako ʻo e folofolá.
Naʻe fekauʻi kitautolu ʻe he Fakamoʻuí ke ʻoua naʻa tau lau ʻataʻatā pē ʻa e folofolá ka ke tau “fakatotolo,” “ako,” mo “keinanga” ʻi Heʻene folofolá (Tokāteline mo e Ngaahi Fuakava 1:37; 11:22; 2 Nīfai 32:3). Te tau lava ʻo ʻiloʻi Ia mo ongoʻi ʻEne ʻofá ʻo fakafou ʻi he folofolá (vakai, Sione 5:39; Sēkope 3:2).
Fakaafeʻi ʻa e kau akó ke fakaʻaongaʻi ha kiʻi taimi ke vakaiʻi ai ʻenau ako folofolá, ʻo kau ai hono vakaiʻi pe ʻoku nau ongoʻi nai ʻoku tokoniʻi ai kinautolu ke nau ofi ange ki he Tamai Hēvaní mo Sīsū Kalaisi.
Ko e hā ha niʻihi ʻo e ngaahi meʻa kuó ke fakahoko (pe ʻe lava ke ke fakahoko) ke mahuʻingamālie ange ai hoʻo ako ʻa e folofolá?
Fakafanongo fakalelei ki he tali ʻa e kau akó pea hiki kinautolu ʻi he palakipoé. Fakakaukau ke fakamatalaʻi ʻa e ngaahi meʻá ni ʻi he lea pē ʻaʻau:
Fakaʻuhingaʻí: Fakaʻilongaʻi ʻo e folofolá
Ko e founga ʻe taha ke ʻuhingamālie ai ʻa e ako folofolá ko hono fakaʻilongaʻi mo tohi ha kiʻi fakamatala ki hoʻo folofolá. ʻI hoʻo ako ʻa e lēsoni ko ʻení, kumi ha ngaahi founga te ke lava ʻo fakaʻilongaʻi ai hoʻo folofolá ke tokoniʻi hoʻo ako folofolá ke ʻomi koe ke ke ofi ange ai ki he Tamai Hēvaní mo Sīsū Kalaisi.
Sīpingá: Fakaʻilongaʻi ʻo e folofolá
Fakaʻaliʻali ki he kau akó ha ngaahi sīpinga ʻe niʻihi ʻo e founga ʻe lava ke fakaʻilongaʻi ai ʻe he kakaí ʻenau folofolá ʻo hangē ko e ngaahi vitiō pe ʻū fakatātā ʻoku fakakau atu hení. ʻE lava foki ke vahevahe ʻe he kau akó ha ngaahi founga ʻoku nau fakaʻilongaʻi ai ʻenau folofolá. Fakaafeʻi ʻa e kau akó ke feinga ke ʻiloʻi ha ngaahi ʻuhinga ki he ngaahi fakaʻilonga ʻoku nau sio ki aí.
“A Marking System That Works for You” (1:56). ʻI he foʻi vitiō ko ʻení, ʻoku fakahaaʻi ai ʻe ʻEletā Tēvita A. Petinā ʻo e Kōlomu ʻo e Kau ʻAposetolo ʻe Toko Hongofulu Mā Uá ʻa e founga ʻokú ne fakaʻilongaʻi ai ʻene folofolá.
“Marking Scriptures” (1:45). ʻI he foʻi vitiō ko ʻení, ʻoku fakahaaʻi ai ʻe Palesiteni Tāleni H. ʻOakesi ʻo e Kau Palesitenisī ʻUluakí ʻa e founga ʻokú ne fakaʻilongaʻi ʻaki ʻa e folofolá.
-
Ko e hā ha ngaahi ʻuhinga ʻoku fakaʻilongaʻi ai ʻe he kakaí ʻenau folofolá?
-
ʻOkú ke pehē ʻe tokoni fēfē nai kiate koe hono fakaʻilongaʻi hoʻo folofolá?
Akoako Fakahoko: Ko hono fakaʻilongaʻi ʻa e folofolá
Fakakaukau ke hiki pe fakaʻaliʻali ʻa e fakamatala kakato ʻo e ngaahi veesi ko ʻení ʻi he palakipoé. Pe, kapau ʻoku maʻu, fakaʻaliʻali ʻa e tatau fakaʻilekitulōnika ʻo e ngaahi veesi ko ʻení mei he Gospel Library. Te ke lava ʻo fetongi ʻa e ngaahi veesi ko ʻení ʻaki ha potufolofola fakataukei fakatokāteline ʻe taha pe ko ha veesi kehe pe ngaahi veesi ʻokú ke fili.
Ki he kau ako ʻoku nau fakaʻaongaʻi ʻa e folofola fakaʻilekitulōniká, mahalo te ke fie fakaʻaongaʻi ha taimi ke fakatātaaʻi ʻa e founga hono fakaʻilongaʻi ʻa e folofolá ʻi he Gospel Library app. Ki ha fakahinohino ki he founga hono fai iá, vakai ki he konga “Help” ʻi he Gospel Library App, kau ai ʻa e: Gospel Library User Guide (iOS) mo e Gospel Library User Guide (Android) ʻi lalo ʻi he ʻuluʻi tohi “Marking Content.”
Ke akoako hono fakaʻilongaʻí, lau ʻa e Tokāteline mo e Ngaahi Fuakava 68:5–6 pea fakaʻilongaʻi ʻa e meʻa ʻoku ʻuhingamālie kiate koé. Mahalo te ke fie tokanga makehe ki he meʻa ʻokú ke ako fekauʻaki mo e Fakamoʻuí pea mo e ongo ʻokú Ne maʻu kiate koé.
Kapau ʻoku fakaʻaliʻali ʻa e ngaahi vēsí ʻi he palakipoé, fakakaukau ke fakaafeʻi ʻa e kau akó ke fakaʻaongaʻi ha ngaahi peni tohi palakipoé ke toe fakaʻilongaʻi ʻi he palakipoé ʻa e meʻa ne nau fakaʻilongaʻí pea kole ange ke nau vahevahe ʻa e ʻuhinga naʻa nau fakaʻilongaʻi ai iá.
-
Ko e hā ha ngaahi foʻi lea pe ngaahi kupuʻi lea naʻá ke fakaʻilongaʻi? Ko e hā naʻe makehe ai kiate koé?
-
ʻOkú ke maʻu nai ha ongo kehe fekauʻaki mo hoʻo folofolá hili hoʻo fakaʻilongaʻi kinautolú? Naʻe liliu nai ai hoʻo ngaahi ongo ki he Fakamoʻuí? Kapau ʻoku ʻio, ko e hā hono ʻuhingá?
Mahalo ʻe tokoni ke fakamahinoʻi ki he kau akó ko e taimi ʻoku makehe ai ʻa e ngaahi kupuʻi lea fakafolofolá kiate kinautolú, ʻe lava ke hoko ia ko ha founga ʻe taha ʻoku fetuʻutaki ai ʻa e ʻEikí mo kinautolu ʻo fakafou ʻi he Laumālie Māʻoniʻoní.
Fakaʻuhingaʻí: Fakafehokotaki pe fakakulupu ʻa e ngaahi vēsí
ʻE ala ʻaonga foki ke ke ako ha ngaahi veesi kehe ʻi ha tefito pea fakafehokotaki pe fakakulupu fakataha ʻa e ngaahi veesi ko ʻení.
Sīpingá: Fakafehokotaki pe fakakulupu ʻa e ngaahi vēsí
-
Ko e hā ha ngaahi founga te ke lava ai ʻo fakafehokotaki pe fakakulupu fakataha ha ngaahi veesi fekauʻaki mo e ʻofa ʻa e Fakamoʻuí kiate koé?
Fakafanongo ki he ngaahi tali ʻa e kau akó pea fakakaukau ke tānaki atu ha taha ʻo e ngaahi meʻa ko ʻení. Te ke lava ʻo fakaʻaongaʻi ʻa e Tokāteline mo e Ngaahi Fuakava 68:5–6 mo e Tokāteline mo e Ngaahi Fuakava 18:10–11 ko ha sīpinga ʻo e ngaahi veesi ʻoku tokoni ke tau ongoʻi e ʻofa ʻa e Fakamoʻuí. ʻOku ʻi he lisi ko ʻení ha ngaahi fakakaukau ʻe ala talaatu ʻe he kau akó pe te ke lava ʻo tānaki ki he meʻa ʻoku vahevahe ʻe he kau akó.
-
Hiki ʻa e ngaahi fakamoʻoni folofolá ʻi he ngaahi peesi ʻoku ʻikai tohi ai ha meʻá ʻi he kamataʻanga pe ngataʻanga hoʻo folofolá, pe ʻi ha tohinoa ako folofola.
-
ʻI he tafaʻaki ʻo ha veesi, hiki ai ʻa e (ngaahi) fakamoʻoni folofola ki ha veesi ʻoku fekauʻaki mo ia.
-
ʻI he taimi ʻoku fakaʻaongaʻi ai ʻa e Gospel Library app, fakaʻaongaʻi ʻa e linking pe tagging.
Kapau ʻe fiemaʻu, fakamatalaʻi ange ʻe fakafekauʻaki ʻe he fakafehokotakí ha potufolofola ʻe ua, ka ʻe fakaʻatā koe ʻe hono fakaʻilongaʻí (tagging) ke ke fakakulupu ha ngaahi potufolofola lahi ʻi he tefito tatau pē. Fakakaukau ke fakatātaaʻi ʻa e taukei ko ʻení ʻi he Gospel Library app pe fakaafeʻi ha tokotaha ako ke ne fai ia. Kapau ʻe lava, ʻe tokoni ke fakaʻaliʻali ʻi ha screen lahi ange kae ʻikai ʻi ha telefoni ʻa e meʻa ʻokú ke fai pe ko ha tokotaha ako. Ki ha ngaahi fakahinohino ʻi he founga hono fakahoko ʻení, vakai ki he konga Help ʻo e Gospel Library app. Te ke lava ʻo hū ki he konga ko ʻení ʻaki haʻo lomi ʻa e foʻi toti ʻe tolu ʻi he tuliki toʻomataʻu ki ʻolungá. (Fakatokangaʻi ange: Te ke lava foki ʻo fakafehokotaki pe fakaʻilongaʻi ʻa e ngaahi palakalafí ʻi he ngaahi lea ʻo e konifelenisi lahí pe ko ha toe naunau kehe pē ʻi he Gospel Library app.)
Akoako: Fakafehokotaki pe fakakulupu ʻa e ngaahi vēsí
ʻE lava ke poupouʻi ʻe he ʻekitivitī ko ʻení ʻa e kau akó ke nau fakakulupu mo fakafehokotaki ʻa e folofolá. Kapau naʻá ke fili ha potufolofola kehe ke ako ʻe he kau akó ʻi he konga kimuʻa ʻo e lēsoní, mahalo te ke fie fili foki ha ngaahi veesi kehe ʻi he kaveinga tatau ke fetongi ʻaki ʻa e ngaahi veesi ʻi laló.
Lau ha potufolofola ʻe tolu pe lahi ange pea fakakaukau ke fakafehokotaki pe fakakulupu kinautolu ko ha ngaahi veesi ʻoku tokoni atu ke ke ongoʻi e ʻofa ʻa e Fakamoʻuí: Tokāteline mo e Ngaahi Fuakava 18:10–11; 34:1–3; 45:3–5; 49:26–27; 68:5–6; 138:3; ʻĪsaia 49:15–16; Sione 15:13; Loma 8:35–39; 1 Sione 4:19; 1 Nīfai 19:9.
Fakaafeʻi ʻa e kau akó ke nau vahevahe ko ha kalasi pe ʻi ha fanga kiʻi kulupu iiki ʻa e founga ne nau fakakulupu ai ʻa e ngaahi vēsí mo e ʻuhinga ʻoku mahuʻingamālie ai kiate kinautolú. Te nau lava foki ʻo vahevahe ha ngaahi fakakaukau ʻo e founga te nau fie fakaʻaongaʻi ai ʻa e fakakulupú pe fakafehokotakí ʻi heʻenau ako folofolá.
Fakaʻuhingaʻí: Tānaki ha Ngaahi Fakamatalá
Ko e founga ʻe taha ke ofi ange ai ki he ʻEikí ʻo fakafou ʻi he ako folofolá ko hono tānaki ha ngaahi fakamatala fekauʻaki mo e meʻa ʻokú ke akó.
Naʻe fakamatalaʻi ʻe ʻEletā Tēvita A. Petinā ʻo e Kōlomu ʻo e Kau ʻAposetolo ʻe Toko Hongofulu Mā Uá ʻa e mahuʻinga hono lekooti ʻo e ngaahi fakamatalá ʻi he taimi ako folofolá:
Ko hono hiki ʻo e meʻa ʻoku tau ako, fakakaukau ki ai mo ongoʻi ʻi heʻetau ako ʻa e folofolá, ko ha founga ia ʻe taha ʻo e fakalaulaulotó mo ha fakaafe mālohi ki he Laumālie Māʻoniʻoní ke hokohoko atu ʻa e fakahinohinó. (“Because We Have Them before Our Eyes,” New Era, April 2006, 6–7)
Sīpingá: Tānaki ha Ngaahi Fakamatala
Fakaʻaliʻali pe tokoni ki he kau akó ke nau manatuʻi mei he ngaahi fakatātā mo e vitiō kimuʻa ʻi he lēsoní te nau lava ʻo tānaki atu ha fanga kiʻi fakamatala ʻaki ʻenau tohi ʻi he tafaʻaki ʻo ʻenau folofolá, ʻi ha fanga kiʻi laʻipepa iiki ʻoku nau fakapipiki ki heʻenau folofolá, ʻi ha tohinoa fakafolofola, pe fakaʻilekitulōnika ʻo fakaʻaongaʻi ʻa e Gospel Library app.
Akoako: Tānaki ha Ngaahi Fakamatala
Fakaʻosi ʻa e lēsoni ko ʻení ʻaki haʻo hiki hoʻo ngaahi fakakaukau mo e ongo fekauʻaki mo ha taha ʻo e ngaahi potufolofola naʻá ke ako ʻi he ʻaho ní.
Te ke lava ʻo fakatātaaʻi ʻa e founga ke tānaki atu ha fanga kiʻi fakamatala ʻi he folofola fakaʻilekitulōniká ʻaki hono fakaʻilongaʻi ha kupuʻi lea, fili ʻa e Note, pea taipeʻi ʻa e fakamatalá.
Hili hono maʻu ʻe he kau akó ha taimi feʻunga ke akoako tānaki ha ngaahi fakamatala, fakaafeʻi ha niʻihi ke vahevahe ʻa e meʻa ne nau hikí kapau ʻoku ʻikai fuʻu fakataautaha. Mahalo te ke fie fehuʻi ange foki ʻa e founga ʻe fie fakaʻilongaʻi ai ʻe he kau akó ʻenau folofolá ʻi he kahaʻú pea mo hono ʻuhingá.