“Maʻu ha Mahino ki he Puipuituʻa ʻo e Folofolá,” Tokāteline mo e Ngaahi Fuakava – Tohi Lēsoni ʻa e Faiako Seminelí (2025)
“Maʻu ha Mahino ki he Puipuituʻa ʻo e Folofolá,” Tokāteline mo e Ngaahi Fuakava – Tohi Lēsoni ʻa e Faiako Seminelí
Lēsoni 173: Ngaahi Taukei Ako Folofolá
Maʻu ha Mahino ki he Puipuituʻa ʻo e Folofolá
ʻOku tokoni ʻetau maʻu ha mahino ki he puipuituʻa ʻo e folofolá ke tau ʻiloʻi ʻa e taumuʻa ʻa e kau faʻu tohi ueʻi fakalaumālié. ʻE lava heni ke fakaloloto ʻa e mahino ʻoku tau maʻu ki heʻenau ngaahi leá mo tokoniʻi kitautolu ke tau fanongo ki he folofola ʻa e ʻEikí ʻi heʻetau moʻuí. Ko e taumuʻa ʻo e lēsoni ko ʻení ke tokoni ke mahino ki he kau akó ʻa e founga ʻe lava ai ʻe he puipuituʻa ʻo e folofolá ʻo ʻai ke mahuʻingamālie ange ʻa e ako folofolá.
Ngaahi ʻEkitivitī Ako ʻOku Ala Fakahokó
Ko e fakatātā kakató
Kamata ʻa e kalasí ʻaki hano fakaʻaliʻali taha taha ʻa e ngaahi fakatātā ko ʻení pea ʻeke ange ʻa e ngaahi fehuʻi ʻoku hoko maí. Pe ko hono hiki ʻe he kau akó ʻa e fakamatala ʻo e fakatātaá ʻi hoʻo fakaʻaliʻali takitaha kinautolú. Hili iá, ʻe lava ke nau aleaʻi ʻa e founga naʻe liliu ai ʻa e fakamatala ʻo e fakatātaá hili ʻenau sio ki he fakatātā kakató.
Ke ʻoua te nau fakaʻaongaʻi ʻa e ngaahi fakatātā ʻi laló, ʻe lava ke fili ʻe he kau akó ha laʻitā mei heʻenau telefoní pea ʻunuki ʻa e ʻatá ke ofi ki ha konga ʻo e fakatātaá, pea fakaafeʻi hanau hoa ke ne mateʻi ʻa e meʻa ʻoku hoko ʻi he fakatātaá. ʻE lava ke nau fakafoki ki he ʻata totonú pea fehuʻi pe naʻe founga fēfē ʻa e liliu ʻa e mahino ʻa e tokotaha ako ʻe tahá.
-
Ko e hā ʻoku hoko ʻi he laʻitaá?
-
ʻOku liliu fēfē nai ʻa e mahino ʻoku tau maʻú ʻi he taimi ʻoku tau maʻu kakato ai ʻa e fakatātaá?
Fakakaukau ke fakaafeʻi ʻa e kau akó ke vahevahe ha ngaahi sīpinga mei heʻenau moʻuí naʻe hoko ai ha liliu ʻi he lahi ange ʻa e mahino naʻa nau maʻu ki he meʻa ko iá. ʻE lava ke kau ʻi he ngaahi sīpingá ʻa e fetohiʻaki ʻi he telefoní pe tohi ha meʻa kimuʻa pea toki maʻu kotoa ʻa e ngaahi fakaikiikí, ko hono fakamāuʻi ha taha taʻe ʻiloʻi ʻa e meʻa tonu naʻe hoko kiate kinautolú, pe aofangatuku hala mei ha mahino ʻoku ʻikai kakato.
-
ʻOku felāveʻi fēfē nai ʻeni mo ʻetau ako folofolá?
ʻI hono tali ʻe he kau akó ʻa e fehuʻi ko ʻení, fakafuofuaʻi ʻa e mahino ʻoku nau maʻu ki he puipuituʻá ʻi heʻene fekauʻaki mo hono ako ʻo e folofolá. Makatuʻunga ʻi hoʻo fakafuofuaʻi ʻa e mahino ʻoku nau maʻú, fakakaukau ke fakaʻaongaʻi kotoa pe ha ngaahi konga ʻo e konga ko ʻení.
Fakaʻuhingaʻí: Mahino ʻa e puipuituʻá
Fakakaukau ke hiki ʻa e foʻi lea puipuituʻá ʻi he palakipoé.
ʻE lava ke mole meiate kitautolu ha ngaahi fakaikiiki mahuʻinga pea tau maʻu ha mahino taʻe-kakato ki he meʻa ʻoku hokó taʻe-kau ai ʻa e puipuituʻá.
-
Te ke fakaʻuhingaʻi fēfē nai ʻa e foʻi lea puipuituʻá?
Fakakaukau ke hiki ʻa e ngaahi tali ʻa e kau akó ʻi he palakipoé. ʻO ka fiemaʻu, vahevahe ʻa e fakaʻuhinga ko ʻeni ʻo e puipuituʻá:
Ko e puipuituʻá ko e fakamatala, tūkunga, mo e feituʻu ia naʻe hoko ai ha ngaahi meʻa ʻe lava ke mahino lelei ange ai kiate kitautolu ʻa e meʻa ʻoku hokó.
Lau ʻa e fakamatala ko ʻení meia ʻEletā Tēvita A Petinā fekauʻaki mo ha lea ʻa e Palōfita ko Siosefa Sāmitá (1805–1844):
“ʻOku ou maʻu ha founga ʻokú ne fakamahino kiate au ʻa e folofolá. ʻOku ou fakakaukau, ko e hā nai ʻa e fehuʻi naʻá ne ʻomi ʻa e tali ko ʻení, pe fakatupu ke fakahoko ai ʻe Sīsū ʻa e talanoa fakatātaá?” (History of the Church, 5:261). Ko ia ai, ʻe lava ke tokoniʻi kitautolu ʻe he feinga ke mahino ʻa e fehuʻi naʻe muʻomuʻa ʻi ha fakahā, talanoa fakatātā, pe meʻa naʻe hokó, ke tau maʻu ha mahino lahi ange ki he folofolá. (David A. Bednar, ʻi he “Witnesses of the Prophet Joseph Smith,” Ensign, Jan. 2009, 15)
-
ʻE tokoni fēfē nai hono ako ʻa e puipuituʻa ʻo e folofolá ke mahino kiate koe ʻa e ngaahi lēsoni ʻoku nau akoʻí?
Fakaafeʻi ʻa e kau akó ke fakalaulauloto ki he tuʻo lahi ʻo ʻenau feinga ke ʻiloʻi ʻa e puipuituʻá mo e feituʻú/taimí. Fakakaukau ke ʻoange ha miniti ʻe taha pe ua ki he kau akó ke nau fakalaulauloto ki he founga kuo tāpuekina, pe ʻe tāpuekina ai kinautolu ʻi heʻenau ako folofolá ʻi hono ako ʻa e puipuituʻa ʻo e folofolá. ʻE lava ke ke fakaafeʻi ha niʻihi ʻo e kau akó ke vahevahe ʻenau ngaahi fakakaukaú pe ngaahi aʻusia fakatāutahá.
Sīpinga: Tokāteline mo e Ngaahi Fuakava 121
Ko ha sīpinga ʻeni ʻo e founga ʻe lava ai ʻe he mahino kau ki he puipuituʻá ʻo ʻai ʻa e ako folofolá ke toe mahuʻingamālie angé. Kapau te ke loto ki ai, te ke lava ʻo fili ha ngaahi veesi kehekehe ke fakaʻaongaʻi ko hoʻo sīpingá ia.
Lau ʻa e Tokāteline mo e Ngaahi Fuakava 121:7–8, ʻo kumi ʻa e meʻa naʻe akoʻi ʻe he ʻEikí kia Siosefa Sāmitá.
-
Ko e hā naʻe mahuʻingamālie kiate koe ʻi he ngaahi veesi ko ʻení?
Fakakaukau ke vahevahe ʻa e kau akó ki ha fanga kiʻi kulupu iiki ke aleaʻi ʻa e ngaahi tali ki he fehuʻi ko ʻení. Fakaafeʻi kinautolu ke faʻu ha lisi ʻo e ngaahi maʻuʻanga tokoni ʻoku tokoni ke tau ako fekauʻaki mo e puipuituʻá.
-
Ko e hā ha ngaahi meʻangāue pe maʻuʻanga tokoni ʻe lava ʻo tokoni ke tau ako fekauʻaki mo e puipuituʻa ʻo e potufolofolá ni mo e ngaahi folofola kehé?
ʻE lava ke lisi ʻe he kau akó ha niʻihi ʻo e ngaahi maʻuʻanga tokoni ko ʻení: ʻuluʻi fakamatala ʻo e vahé, ngaahi veesi ʻoku nau ʻi aí, fakamatala fakafolofolá, ʻū tohi lēsoní, ngaahi lea ʻa e kau taki ʻo e Siasí, mo e ngaahi talanoa fakafolofola maʻá e fānaú.
Mahalo te ke fie talaange ʻoku kau ʻi he ngaahi maʻuʻanga tokoni pau ʻoku maʻu ʻi he Tokāteline mo e Ngaahi Fuakavá mo e hisitōlia ʻo e Siasí ʻa e Kau Māʻoniʻoní, voliume 1 mo e Revelations in Context. Kapau ʻe fie ʻilo lahi ange ʻa e kau akó, te ke lava ʻo fakatātaaʻi ʻa e founga ʻe lava ke maʻu ai ʻe he kau akó ʻa e ngaahi maʻuʻanga tokoni ko ʻení ʻi he Gospel Library app. Fakapapauʻi ange ki he kau akó neongo ʻe lava ke tokoni hono ako ha ngaahi maʻuʻanga tokoni kehekehé, ka ʻe lava ʻe hono lau maʻu pē ʻa e ʻuluʻi vahé kimuʻa pea nau akó ʻo ʻai ke mahuʻingamālie ange ʻenau ako folofolá. Ko e meʻa ia ʻe nofotaha ai ʻa e lēsoni ko ʻení.
Lau ʻa e ʻuluʻi vahe ki he vahe 121, ʻo kumi ha fakamatala ʻe tokoni ke mahino lelei ange kiate kitautolu ʻa e ngaahi veesi ko ʻení. Mahalo te ke fie lau foki ʻa e Tokāteline mo e Ngaahi Fuakava 121:1–6 ki ha toe ngaahi fakakaukau lahi.
Toe lau ʻa e Tokāteline mo e Ngaahi Fuakava 121:7–8 mo ha mahino ki he puipuituʻá.
-
ʻOku tokoni fēfē nai ʻa e puipuituʻa ko ʻení ke fakaloloto ʻa e mahino ʻokú ke maʻú ki he pōpoaki naʻe fai ʻe he ʻEikí kia Siosefa ʻi he ngaahi veesi ko ʻení?
-
ʻOku tokoni fēfē nai ʻa e mahino foʻou ko ʻení ke ʻuhingamālie ange kiate koe ʻa e ngaahi veesi ko ʻení?
ʻI he tali ʻa e kau akó, kumi ha ngaahi founga ke fakamamafaʻi pe fehuʻi ange pe ko e hā ʻoku akoʻi mai ʻe he puipuituʻa ko ʻení fekauʻaki mo e ʻEikí. Hangē ko ʻení, naʻe foaki ʻe he ʻEikí ʻi he ʻofa kia Siosefa Sāmita ha nonga, fakakaukau, mo ha talaʻofa ʻo e ngaahi tāpuaki ʻi he kahaʻú ʻi ha taimi faingataʻa. ʻOku tokoni ʻetau maʻu ha mahino ki he puipuituʻa ko ʻení ke tau ʻiloʻi ʻe lava ke ʻomi ʻe he ʻEikí ha nonga mo ha fakahinohino ki heʻetau moʻuí foki.
Akoako hono maʻu ha mahino ki he puipuituʻa ʻo e folofolá
Ke tokoni ke akoako ʻe he kau akó ʻa e mahino ʻoku nau maʻu ki he puipuituʻá, fakakaukau ke fakaʻaliʻali ʻa e ngaahi potufolofola mo e ngaahi fehuʻi ko ʻení ʻi he palakipoé. Te ke lava ʻo ʻai ke lau tautau toko ua ʻa e kau akó ha potufolofola ʻe taha pe lahi ange pea hiki ʻa e meʻa ʻoku nau ako mei aí ʻi lotomālie ʻi ha laʻipepa. Hili iá, ʻe lava ke nau lau ʻa e ʻuluʻi vahé fakataha mo e ngaahi veesi aí. ʻI he ngaahi meʻa kuo nau ʻosi tohí, te nau lava ʻo tā pe hiki takai ai ha meʻa ʻokú ne fakamatalaʻi ʻa e puipuituʻá (ko e fakatātā mahino angé).
Tokāteline mo e Ngaahi Fuakava 3:6–9
Tokāteline mo e Ngaahi Fuakava 8:2–3
Tokāteline mo e Ngaahi Fuakava 27:1–2
Tokāteline mo e Ngaahi Fuakava 28:2, 7
Tokāteline mo e Ngaahi Fuakava 46:3–5
Tokāteline mo e Ngaahi Fuakava 49:15–17
Tokāteline mo e Ngaahi Fuakava 98:1–3
Tokāteline mo e Ngaahi Fuakava 109:22–23
Fakaafeʻi ʻa e kau akó ke vahevahe ʻa e meʻa naʻa nau maʻú. Ka ʻaonga, fakakaukau ke ʻeke ʻa e ongo fehuʻí ni:
-
ʻOku fakaloloto fēfē nai ʻe he puipuituʻa ʻo e vahé ʻa e mahino ʻokú ke maʻú ki he meʻa ʻokú ke ako ʻi he ngaahi vēsí?
-
ʻOku tokoniʻi fēfē nai koe ʻe he puipuituʻá ke ke ako lahi ange fekauʻaki mo e Fakamoʻuí, ko ʻEne ʻofá, ko ʻEne ʻaloʻofá, pe ko Hono mālohí ʻi heʻetau moʻuí?
Fakatatau ki he toenga ʻo e taimí, ʻe lava ke akoako ʻe he kau akó ʻa e taukei ko ʻení ʻo fakaʻaongaʻi ha konga pe vahe ʻoku nau lolotonga ako ʻi heʻenau ako folofola fakatāutahá pe fakafāmilí.
Fakaafeʻi ʻa e kau akó ke fakalaulauloto ki he founga ʻe lava ai ʻe hono ako ʻo e puipuituʻá ʻo fakahoko ha faikehekehe ʻi heʻenau ako fakatāutahá pea mo e founga te nau lava ai ʻo fakaleleiʻi ʻenau ako folofolá ʻaki hono ngāue ʻaki ʻa e taukei ko ʻení.
ʻI hono akoako ʻe he kau akó ʻa e taukei ako folofola ko ʻení ʻi he ngaahi uike ka hokó, fakakaukau ke kumi ha ngaahi founga ke nau vahevahe ai ʻa e ngaahi fakakaukau ʻoku nau akó mo e kalasí ko ha konga ʻo e ngaahi fakataha lotu fakakalasi ʻi he kahaʻú.