Ngaahi Taukei Ako Folofolá

Ngaahi Taukei Ako Folofolá

Vakai Fakalūkufuá

ʻE lava ke tokoniʻi kitautolu ʻe he ngaahi taukei ako folofolá ke tau maʻu ha aʻusia lelei ange ʻi hono ako ʻo e folofolá pea tokoniʻi kitautolu ke tau ofi ange ki he Fakamoʻui ko Sīsū Kalaisí. ʻE lava ke tokoni ʻa e tokanga taha kia Sīsū Kalaisí, hiki ha fakamatala, kumi ha ngaahi moʻoni, fakaʻaongaʻi ʻo e ngaahi meʻangāue ako folofolá, mo e feinga ke mahino ʻa e puipuituʻá, ke mahuʻingamālie ange ʻa e ako folofolá.

Fokotuʻu ki he vave hono akoʻí: ʻE lava ke akoʻi ʻa e ngaahi lēsoni ko ʻení ʻi ha faʻahinga taimi pē. Ka neongo ia, ʻe lelei ke akoʻi ha lēsoni taukei ako folofola ʻe taha pe lahi ange ʻi he kamataʻanga ʻo e taʻu fakaakó, pea toki fakafeʻiloaki leva ha taukei kehe hili ha ngaahi uike siʻi, ʻo fai pehē ai pē. ʻE lava heni ke ako mo akoako ʻe he kau akó ʻa e ngaahi taukei ko ʻení ʻi he taʻú kakato.

Teuteu ke akoʻi

ʻOku ʻoatu ʻe he fakamatala ko ʻení ha ngaahi fakakaukau ʻo e meʻa ʻe ala fiemaʻu ke teuteuʻi kimuʻa ‘i he lēsoni takitaha.

Ko e Tukutaha ʻa e Tokangá ʻia Sīsū Kalaisi ʻi he Folofolá

Taumuʻa ʻo e Lēsoní: Ke tokoni ki he kau akó ke tukutaha ʻenau tokangá ʻi he Fakamoʻuí lolotonga ʻenau ako ʻa e folofolá, tautautefito ki he Tokāteline mo e Ngaahi Fuakavá.

• Teuteu ʻa e tokotaha akó: Fakaafeʻi ʻa e kau akó ke kumi ha hingoa pe huafa ʻo Sīsū Kalaisi ʻi he Tokāteline mo e Ngaahi Fuakavá ʻoku mahuʻingamālie kiate kinautolú pea haʻu mateuteu ke vahevahe ʻa e meʻa naʻa nau ʻiló.

• Ngaahi meʻa ke fakaʻaliʻalí: Fakatātā nenefu ʻo e Fakamoʻuí mo ha fakatātā ʻata lelei

• Vitiō: “‘Nombre’ – What Should We Name Him?” (1:47)

Ko Hono Kumi ʻa e Ngaahi Moʻoni ʻo e Ongoongoleleí ʻi he Folofolá

Taumuʻa ʻo e lēsoní: Ke tokoni ke fakatupulaki ʻa e malava ʻe he kau akó ke ʻilo ʻa e ngaahi moʻoni ʻo e ongoongoleleí ʻi he folofolá pea ofi ange ki he ʻEikí.

• Teuteu ʻa e tokotaha akó: Fakaafeʻi ʻa e kau akó ko ha konga ʻo ʻenau ako folofola fakaʻahó, ke feinga ke ʻiloʻi ʻa e ngaahi moʻoni ʻo e ongoongoleleí ʻe tokoni ʻi heʻenau moʻuí pea fakalaulauloto ki he meʻa naʻa nau fai ke maʻu ai kinautolú.

• Vitiō: “Parable of the Gems” (6:47; mamata mei he taimi 2:13 ki he 4:20)

• Ngaahi meʻa ke fakaʻaliʻalí: Ko ha fakatātā ʻo ha finemui ʻoku fekumi mo maʻu ha ngaahi makakoloa ʻi he ʻoneʻoné ʻi ha matātahi

• Laʻipepa Tufá: “Ko Hono Maʻu ʻa e Ngaahi Moʻoní ʻi he Folofolá”

• Naunaú: ʻŪ laʻipepa maʻá e tokotaha ako takitaha

Fakamatalaʻi ʻo e Folofolá

Taumuʻa ʻo e lēsoní: Ke tokoni ki he kau akó ke fakaʻilongaʻi mo tānaki ha ngaahi fakamatala ki heʻenau folofolá ʻi ha founga te ne ʻai ʻenau akó ke mahuʻingamālie ange pea ʻomi kinautolu ke nau ofi ange ki he Tamai Hēvaní mo Sīsū Kalaisi.

• Teuteu ʻa e tokotaha akó: Fakaafeʻi ʻa e kau akó ke fakaʻilongaʻi ʻa e meʻa ʻoku mahuʻingamālie kiate kinautolú, tautautefito ki he ngaahi foʻi lea pe kupuʻi lea ʻoku tokoni ke mahino kiate kinautolu pe ongoʻi ʻa e ʻofa ʻa e Tamai Hēvaní mo Sīsū Kalaisí, ko ha konga ʻo ʻenau ako folofola fakaʻahó. ʻE lava ke nau omi mateuteu ke vahevahe ʻa e meʻa naʻa nau fakaʻilongaʻí pea mo hono ʻuhingá.

• Ngaahi meʻa ke fakaʻaliʻalí: Ko ha sīpinga ʻe niʻihi ʻo e founga ʻe ala fakaʻilongaʻi ai ʻe he kakaí ʻenau folofolá (Kapau ʻe ʻaonga, teuteu ha founga ke fakaʻaliʻali ai ʻa e founga ke fakaʻilongaʻi ʻa e folofolá ʻi he Gospel Library app.)

• Ongo Vitioó: “A Marking System That Works for You” (1:56); “Marking Scriptures” (1:45)

Ngaahi Meʻangāue Ako Folofolá

Taumuʻa ʻo e lēsoní: Ke tokoni ke fakatupulaki ʻa e ako folofola fakataautaha ʻa e kau akó mo fakamālohia honau vā fetuʻutaki mo e Tamai Hēvaní mo Sīsū Kalaisí ʻo fakafou ʻi hono fakaʻaongaʻi ʻo e ngaahi meʻangāue ako folofolá.

• Teuteu ʻa e tokotaha akó: Fakaafeʻi ʻa e kau akó ke omi mateuteu ke vahevahe ha ngaahi meʻangāue ʻe lava ke tokoni kiate kitautolu ʻi he māmani ʻo e ʻaho ní ʻa ia naʻe ʻikai maʻu ʻi he taʻu ʻe 50 kuohilí. Kole ange ke nau mateuteu ke fakamatalaʻi ʻa e faikehekehe ʻoku fakahoko ʻe he ngaahi meʻangāue ko ʻení ʻi heʻetau moʻuí.

• Ngaahi meʻa ke fakaʻaliʻalí: Fakatātā ʻo ha tangata mo ha palau, mīsini ututaʻu fakaonopooni, tokotaha ʻoku heka hoosi, mo ha vakapuna

Maʻu ha Mahino ki he Puipuituʻa ʻo e Folofolá

Taumuʻa ʻo e lēsoní: Ke tokoni ke mahino ki he kau akó ʻa e founga ʻe lava ai ʻe he puipuituʻa ʻo e folofolá ʻo ʻai ke mahuʻingamālie ange ʻa e ako folofolá.

• Teuteu ʻa e tokotaha akó: Fakaafeʻi ʻa e kau akó ke teuteu ki he lēsoni ko ʻení ʻaki hono lau ʻa e ʻuluʻi vahé kimuʻa pea nau ako ha vahe ʻo e Tokāteline mo e Ngaahi Fuakavá. Kole ange ke nau kumi ʻa e faikehekehe ʻoku hoko ʻi he mahino kiate kinautolu ʻa e kakano ʻo e vahé.

• Ngaahi meʻa ke fakaʻaliʻalí: Tā ʻo ha tangata ʻokú ne tekeʻi ha tangata ʻe taha mo ha tā ʻo ha tangata ʻokú ne tekeʻi ke mamaʻo ha tangata ʻe taha mei ha kā (Kapau foki ʻe ʻaonga, teuteuʻi ha founga ke fakaʻaliʻali ai ha ngaahi maʻuʻanga tokoni tānaki mai ki he puipuituʻá ʻi he Gospel Library app.)