“Lesona 208—Miomana ho amin’ny fihaonamben’ny Fiangonana maneran-tany: Mandre ny tenin’ny Mpamonjy amin’ny alalan’ny fihaonamben’ny Fiangonana maneran-tany,” Boky torolalana ho an’ny mpampianatra seminera: Fotopampianarana sy Fanekempihavanana (2025)
“Miomana ho amin’ny fihaonamben’ny Fiangonana maneran-tany,” Boky torolalana ho an’ny mpampianatra seminera: Fotopampianarana sy Fanekempihavanana
Lesona 208: Fampianaran’ireo mpitarika ao amin’ny Fiangonana
Miomana ho amin’ny fihaonamben’ny Fiangonana maneran-tany
Mandre ny tenin’ny Mpamonjy amin’ny alalan’ny fihaonamben’ny Fiangonana maneran-tany
Ny fiomanana sy ny fandraisana anjara amin’ny fihaonamben’ny Fiangonana an-tsitrapo dia ahafahantsika mandray fanambarana ho an’ny tena manokana. Ireo hafatra feno fitaomam-panahy sy ny fitarihana omena mandritra ny fihaonamben’ny Fiangonana maneran-tany dia avy amin’ny Tompo amin’ny alalan’ireo mpitarika nofidiny. Ity lesona ity dia afaka manampy ireo mpianatra hiomana handre ireo hafatra manokana avy amin’ny Mpamonjy mandritra ny fihaonamben’ny Fiangonana maneran-tany.
Ireo sahanasa fianarana azo atao
Miomana amin’ireo fotoana miavaka
Asao ny mpianatra hieritreritra fotoana miavaka izay mahafinaritra azy ireo ny mandray anjara aminy, toy ny fety manokana, lalao ara-panatanjahan-tena, fialan-tsasatra, na fotoana miavaka iray hafa. Angataho izy ireo hizara ny fomba nandraisany anjara na niomanany handray anjara tamin’ireo zavatra ireo. Ifanakalozy hevitra ny fomba hanampian’ny fiomanantsika antsika hiaina zavatra manan-danja kokoa mandritra ilay fotoana. Aorian’ny fifanakalozan-kevitra dia hevero ny hampiseho ny sarin’ny fianakaviana iray mijery ny fihaonamben’ny Fiangonana maneran-tany.
-
Inona no ataonao na ataon’ny fianakavianao mba hiomanana sy handraisana anjara amin’ny fihaonamben’ny Fiangonana maneran-tany?
Ny tanjon’ny fihaonamben’ny Fiangonana maneran-tany
Tamin’ny Febroary 1831, ny Tompo dia nanome fanambarana ho an’i Joseph Smith sy i Sidney Rigdon izay nanome toromarika azy ireo mba hanangona ireo loholona hiaraka hanatrika fihaonambe iray izay natao ny volana jona tamin’io taona io.
Vakio ny Fotopampianarana sy Fanekempihavanana 44:2 ka tadiavo izay zavatra nampanantenain’ny Tompo fa hataony mandritra io fihaonambe io.
-
Ahoana no ahafahan’ny fampanantenan’ny Tompo ao amin’io andininy io manampy anao hahatakatra ny antony hisian’ny fihaonamben’ny Fiangonana maneran-tany?
Vakio ity fanambarana manaraka avy amin’ny Filoha Russell M. Nelson ity, ka tadiavo ny tanjon’ny fihaonamben’ny Fiangonana maneran-tany.
Ny tanjon’ity fihaonambe ity sy ny fihaonambe maneran-tany rehetra dia ny hanampy antsika handre Azy. (Russell M. Nelson, “Hafatra fanokafana,” Liahôna, mey 2020, 7)
Afaka manoratra na mampifandray ny tenin’ny Filoha Nelson ao amin’ny soratra masin’izy ireo eo akaikin’ny Fotopampianarana sy Fanekempihavanana 44:2 ireo mpianatra.
Antitrantero ilay fahamarinana hoe, ny tanjon’ny fihaonamben’ny Fiangonana maneran-tany dia ny hanampy antsika handre an’i Jesoa Kristy.
-
Nahoana no zava-dehibe ny fahafantarana izay mety holazain’i Jesoa Kristy aminao?
-
Inona avy ireo fomba ahafahanao mandre ny Mpamonjy mandritra ny fihaonamben’ny Fiangonana maneran-tany?
Mba hanampiana ireo mpianatra hisaintsaina momba ny fiomanany amin’ny fihaonamben’ny Fiangonana maneran-tany dia hevero ny hampiseho eny amin’ny solaitrabe ireto fanontaniana fanombanan-tena manaraka ireto. Afaka misaintsaina ireo fanontaniana ireo mpianatra ary manoratra ny valinteniny ao anatin’ny diary fandalinana.
-
Manao ahoana ny fiomananao handre ny Mpamonjy miresaka aminao amin’ny alalan’ireo hafatra mandritra ny fihaonamben’ny Fiangonana maneran-tany?
-
Inona no ilainao na antenainao horaisina avy amin’ny fihaonamben’ny Fiangonana maneran-tany?
Miomana ho amin’ny fihaonamben’ny Fiangonana maneran-tany
Ny tanjon’ilay taratasy zaraina dia ny hanampy ireo mpianatra hahita fomba samihafa ahafahan’izy ireo miomana ho amin’ny fihaonamben’ny Fiangonana maneran-tany. Afaka miasa ao anatina vondrona kely ny mpianatra, na miaraka amin’ny mpiara-mianatra iray, na samirery.
Miomana ho amin’ny fihaonamben’ny Fiangonana maneran-tany
Rehefa namangy ny Nefita i Jesoa Kristy dia nanasa azy ireo Izy mba hanomana ny sain’izy ireo hihaino sy hahatakatra ny hafany (jereo ny 3 Nefia 17:3). Alaivo sary an-tsaina hoe mety ho toy ny ahoana ny zavatra hiainanao mandritra ny fihaonamben’ny Fiangonana raha toa ka manao toy izany koa ianao.
-
Halalino ireto loharanom-pitaovana manaraka ireto ary tadiavo ireo fomba ahafahanao manomana ny tenanao handray ny hafatry ny Tompo mandritra ny fihaonamben’ny Fiangonana maneran-tany. Azonao atao ny manisy marika ireo teny sy andian-teny izay manan-danja aminao.
Môzià 2:9; Fotopampianarana sy Fanekempihavanana 88:63
Nampianatra izao ny Filoha Russell M. Nelson:
Hanohy handre fahamarinana avy eto amin’ity polipitra ity ianareo androany sy rahampitso. Miangavy aho ny mba handraisanareo an-tsoratra ireo eritreritra misarika ny sainareo ary ireo izay tonga ao an-tsainareo sy mijanona ao am-ponareo. Angataho am-bavaka ny Tompo mba hanamafy fa marina izay zavatra norenesinareo. (Russell M. Nelson, “Inona no marina,” Liahona, nôv. 2022, 30)
Nampianatra izao ny Filoha Henry B. Eyring ao amin’ny Fiadidiana Voalohany:
Fantatro ireo mpanompon’ny Tompo izay hiteny aminareo mandritra ity fihaonambe ity. Nantsoin’ Andriamanitra izy ireny hanome hafatra ho an’ny zanany. Niteny tamin’izy ireo ny Tompo hoe: “Izay efa noteneniko Izaho Tompo dia efa noteneniko, ary tsy manalady ny tenako Aho; ary na dia levona aza ny lanitra sy ny tany, ny teniko dia tsy ho levona fa ho tanteraka avokoa, na amin’ny alalan’ny feoko na amin’ny alalan’ny feon’ny mpanompoko, dia iray ihany izany” [Fotopampianarana sy Fanekempihavanana 1:38].
Maneho ny fahatokianareo Azy ianareo rehefa mihaino amin’ny finiavana ny hianatra, hibebaka, ary hanatanteraka izay rehetra angatahiny. Raha toa ka ampy ny fahatokianareo hihaino ny hafany amin’ny fivoriana rehetra, amin’ny hira, ary amin’ny vavaka mandritra ity fihaonambe ity, dia hahita izany ianareo. Ary raha mandeha sy manatanteraka izay asainy ataonareo ianareo, dia hitombo ny hery entinareo mahatoky Azy ary ho avy ny fotoana izay haha-feno fankasitrahana lalina anareo noho ny fahafantarana fa natoky anareo koa Izy. (Henry B. Eyring, “Trust in God, Then Go and Do,” Liahona, Nov. 2010, 73)
Nampianatra izao ny Filoha Dieter F. Uchtdorf, izay tao amin’ny Fiadidiana Voalohany tamin’izany:
Rehefa miomana ho amin’ny fihaonamben’ny Fiangonana maneran-tany ianao, dia manasa anao aho hisaintsaina ireo fanontaniana anananao izay ilanao valiny. Ohatra, mety mikatsaka fitarihana sy torolalana avy amin’ny Tompo ianao mahakasika ny fanamby izay atrehanao.
Ny valin’ireo vavakao manokana dia mety ho tonga mivantana avy amin’ny alalan’ny lahateny na andian-teny iray manokana. Amin’ny fotoana hafa ireo valiny dia mety hiseho amin’ny alalan’ny teny iray na andian-teny na hira iray izay toa tsy nifandray tamin’ny lohahevi-dehiben’ny lahateny akory. Hanomana ny fomba handraisana ny fanambarana ho an’ny tena manokana ny fo feno fankasitrahana an’ireo fitahian’ny fiainana sy ny faniriana mafy handre sy hanaraka ny teny feno torohevitra. (Dieter F. Uchtdorf, “General Conference—No Ordinary Blessing,” Ensign, Sept. 2011, 4)
-
Tanisao, avy amin’ny zavatra nohalalininao, ireo fomba ahafahanao miomana mba hihaino ny feon’ny Tompo mandritra ny fihaonamben’ny Fiangonana maneran-tany.
-
Mitanisà fomba hafa ahafahanao miomana mba hihaino ny feon’ny Tompo mandritra ny fihaonamben’ny Fiangonana maneran-tany.
Ny fiomanako amin’ny fihaonamben’ny Fiangonana maneran-tany
Ireto fanontaniana manaraka ireto dia afaka manampy ny mpianatra hampihatra ny torohevitry ny Loholona Uchtdorf ao amin’ilay taratasy zaraina. Azon’ny mpianatra atao ny mamaly ireo fanontaniana ao amin’ny diary fandalinany na amin’ny taratasy kely na karatra kely izay azony entina mody mba ho fampahatsiahivana.
-
Inona avy ireo fanontaniana ananako? Inona no fitarihana ilaiko amin’ireo olana atrehiko?
-
Inona no zavatra manokana hataoko mba hiomanako hihaino ny fitarihan’ny Tompo ho ahy mandritra ny fihaonamben’ny Fiangonana maneran-tany? (Misafidiana fomba iray na roa voatanisa ao amin’ilay taratasy zaraina any aminao.)
Ampio ny mpianatra hanao tatitra momba ny zavatra niainany nandritra ny fihaonamben’ny Fiangonana maneran-tany
Aorian’ny fihaonamben’ny Fiangonana maneran-tany dia hevero ny hangataka ny mpianatra hizara ny fiantraikan’ny fiomanany ho amin’ny fihaonamben’ny Fiangonana teo amin’ny zavatra niainany. Mety tsy nahita fihaonambe ny mpianatra sasany. Azonao atao ny manome fotoana ho an’ireo mpianatra ireo hijerena ny famintinana ireo lahateny.
-
Inona no nataonao mba hiomanana? Ahoana no fomba nanampian’izany?
-
Ahoana no nanampian’ny fiomananao anao handre ny feon’ny Mpamonjy sy handray fitarihana avy Aminy?
Afaka mizara ny fahatsapany na ny fijoroana ho vavolombelona ananany mikasika ny zavatra tsapany na reny nandritra ny fihaonamben’ny Fiangonana koa ny mpianatra.