Leksiyon 210: Mga Pagtulun-an sa mga Lider sa Simbahan

Template: Mga Pagtulun-an sa mga Lider sa Simbahan

Tun-i ug Gamita ang mga Pagtulun-an sa mga Sulugoon sa Ginoo

Sa tibuok tuig sa seminary, makabaton og daghang kahigayonan ang mga estudyante nga tun-an ang mga mensahe gikan sa mga lider sa Simbahan. Kini nga template mohatag nimo og mga ideya aron tabangan ang mga estudyante nga tun-an ang mga mensahe sa mga lider sa Ang Simbahan ni Jesukristo sa mga Santos sa Ulahing mga Adlaw.

Pahinumdom: Para sa pananglitan kon unsaon paggamit kini nga template, tan-awa ang Leksiyon 211: “Mga Pagpili alang sa Kahangtoran”.

Posibleng mga Kalihokan sa Pagkat-on

Para sa kada mensahe gikan sa mga Lider sa Simbahan, pwede kang mopili og usa o daghang mga ideya gikan sa Sugdi ang leksiyon, Tun-i ang mensahe, o Palawmi ang pagsabot nga mga seksiyon niini nga template o susama niini nga imong napili. Pwede usab nimong gamiton ang Gamita ang unsay imong gitun-an nga seksiyon sa template.

Sa pagtuon, pwedeng indibidwal nga magtuon ang estudyante o isip usa ka klase, o pwede nimo silang bahin-bahinon sa gagmayng grupo. Kon pilion nimong maminaw sa audio o motan-aw og bidyo sa pakigpulong, palihog hatagi og nakaprinta o digital nga bersyon aron makasunod ang mga estudyante.

Tabangi ang mga estudyante nga makatutok sa Langitnong Amahan ug kang Jesukristo sa kada ideya sa pagtudlo nga imong napili.

Sugdi ang leksiyon

Paghunahuna og paagi sa pagsugod sa leksiyon nga makatabang sa pagmugna og interes sa mga hunahuna ug mga kasingkasing sa mga estudyante nga makatabang aron maandam sila para sa kasinatian sa pagkat-on. Ang mensahe nga tun-an sa mga estudyante naa tingali pipila ka makatabang nga mga pamaagi nga imong magamit. Ang mosunod mao ang pipila ka pananglitan:

• Pagpakigbahin og makapukaw sa hunahuna nga pangutana gikan sa mensahe ug dapita ang mga estudyante nga hisgotan kini sa makadiyot o irekord ang ilang inisyal nga mga tubag diha sa ilang journal.

• Pagpakigbahin og usa ka litrato o butang nga kakuhaan og leksiyon nga gigamit isip kabahin sa ilang mensahe ug hisgoti kadiyot kon nganong gigamit kini.

• Pagpakigbahin og istorya gikan sa mensahe sa mamumulong. Mas maayo tingali nga dili ipakigbahin ang tibuok istorya sa sinugdanan sa leksiyon pero igo lang aron mainteres ang mga estudyante. Sa ulahing bahin sa leksiyon, pwedeng taposon ang istorya aron ihulagway ang katuyoan sa mensahe sa mamumulong.

• Pwede nimong ipakigbahin ang hilisgotan sa pakigpulong ug dapita ang mga estudyante nga irekord ang pipila sa ilang mga pangutana nga may kalabotan sa hilisgotan. Awhaga sila nga pangitaon ang mga tubag atol sa leksiyon.

Tun-i ang mensahe

Pwede nimong gamiton ang mga imong mga ideya o ang pipila sa mosunod nga mga ideya aron tabangan ang mga estudyante nga makatutok sa pagtuon sa pakigpulong. Kon naa pay oras, haom tingali ang paggamit og daghang pamaagi. Dapita ang mga estudyante sa pagtinguha og personal nga pagpadayag samtang ilang rebyohon ang mensahe, pagsulat og mga pag-aghat diha sa ilang mga journal sa pagtuon. Dugang nga mga ideya sa pagtuon makita diha sa “Pagtuon sa mga Pakigpulong sa Kinatibuk-ang Komperensya” sa ChurchofJesusChrist.org.

Kon walay akses ang mga estudyante sa digital nga kopya sa pakigpulong, pwede nimong han-ayon nga matun-an sa mga estudyante ang nakaprinta nga kopya.

• Pangitaon. Mainampoong ikonsiderar ang mga panginahanglan sa imong klase ug ilha ang ilang “Pangitaon” nga magamit samtang tun-an sa mga estudyante ang pakigpulong. Ang mga pananglitan sa “Pangitaon” naglakip sa mosunod: Mahangtorong mga Kamatuoran, Mga Pagdapit, ug Gisaad nga mga Panalangin. Pwede usab pangitaon sa mga estudyante ang mga tubag sa mga pangutana o ilang mga gikabalak-an.

  Haom tingali nga papilion ang mga estudyante kon unsay gusto nilang pangitaon diha sa pakigpulong. Pwede nimong ipakigbahin ang hilisgotan sa pakigpulong ug hatagi og higayon ang mga estudyante nga magsulat og pipila ka pangutana bahin sa hilisgotan diha sa pisara. Human magtuon, pwede nimong ilhon kon hain sa mga pangutanaha ang gibati sa mga estudyante nga natubag ug kon sa unsang paagi.

• Butangi og numero ang mga parapo ug ilibot ang pakigpulong. Isulat o i-type ang mga numero sa mga parapo diha sa kopya sa pakigpulong. Hatagi og kopya ang kada estudyante ug dapita sila nga mopili og usa ka butang nga pangitaon. Pwedeng basahon sa mga estudyante ang usa o daghang parapo, nga markahan kini ug isulat ang mubo nga mga sulat diha sa margin. Pwedeng ipasa sa sunod nga estudyante ang papel, nga sundon ang susama nga sumbanan. Human matun-i ang tanang parapo, iuli ang papel sa orihinal nga estudyante ug ipatan-aw nila ang mga panabot nga gipakigbahin sa mga sakop sa klase.

• May kalabotan nga senaryo. Dapita ang mga estudyante nga ikonsiderar kon sa unsang paagi ang pakigpulong nga gitun-an magamit sa mga tin-edyer karon o sa personal nga mga hagit nga atubangon sa usa ka tin-edyer. Pag-andam ug pagpresentar og senaryo sa sinugdanan sa klase. O pwedeng maghimo og senaryo ang mga estudyante sa usa ka tin-edyer nga nanlimbasog sa usa ka sitwasyon o pangutana. Pwedeng magdugang ang mga estudyante og may kalabotan nga mga detalye sa senaryo nga mohaom sa mga panginahanglan sa mga tin-edyer sa inyong lugar.

• Gikutlo o may kalabotan nga mga kasulatan. Pwedeng pangitaon sa mga estudyante ang gikutlo nga mga kasulatan diha sa pakigpulong o sa mga endnote. Pwedeng basahon sa mga estudyante ang mga bersikulo ug magsulat og mubo nga sulat kon sa unsang paagi nakatabang ang pagkigpulong kanila aron mas masabtan ang gikutlo nga mga kasulatan o sa unsang paagi nakatabang nila ang gikutlo nga kasulatan aron mas masabtan ang mensahe sa pakigpulong. Diha sa Librarya sa Ebanghelyo, pwedeng ikonektar sa mga estudyante ang gikutlo nga mga kasulatan diha sa pakigpulong o markahan ang ilang kopya sa mga kasulatan.

Palawman ang pagsabot

Ang katuyoan niini nga leksiyon mao ang pagtabang sa mga estudyante nga pamalandongan ug hisgotan ang pakigpulong nga ilang gitun-an. Pwede nimong gamiton ang imong mga ideya, o makapili ka og usa o daghan sa mosunod nga mga kalihokan aron tabangan ang mga estudyante nga moapil sa panaghisgot. Pwede kang mangutana og follow-up nga mga pangutana samtang ipakigbahin sa mga estudyante ang unsay ilang gihunahuna ug gibati samtang nagtuon sila. Kini nga opsyon pwedeng himoon sa tinagsa-tagsa, naay pares, o sa gamayng grupo.

• Motutok ngadto ni Jesukristo. Ikonsiderar ang pagbutang og litrato sa Manluluwas diha sa pisara. Dapita ang mga estudyante sa pagsulat og makapadasig nga mga pulong o hugpong sa mga pulong sa palibot sa litrato nga nakit-an nila diha sa pakigpulong. Dapita ang pipila ka estudyante sa pagpakigbahin sa unsay ilang gisulat ug sa unsang paagi makatabang ang pulong o hugpong sa mga pulong sa usa ka tawo nga mahibaloan ang kinaiya, mga hiyas, ug mga papel ni Jesukristo. Pwedeng ipakigbahin sa mga estudyante kon sa unsang paagi makatabang nila ang mga pagtulun-an aron makasunod sa Manluluwas ug mapalig-on ang ilang relasyon ngadto Kaniya.

• Tudloi ang usag usa. Pwede nimong dapiton ang mga estudyante nga maghimo og tulo hangtod sa lima ka minuto nga pakigpulong o leksiyon nga nagtudlo sa mensahe nga ilang gitun-an. Pwedeng ilakip sa mga estudyante ang ilang personal nga kasinatian o dugang mga pakisayran sa kasulatan nga nagsuporta sa mensahe. Pwedeng magpraktis ang mga estudyante nga ipakigbahin ang ilang pakigpulong sa usa ka pares, gamayng grupo, o sa klase.

• Irekord ang mga gibati. Ikonsiderar ang pagdapit sa mga estudyante nga isulat ang ilang mga hunahuna ug mga gibati samtang nagtuon sa pakigpulong. Pwedeng irekord sa mga estudyante ang bisan unsang aksiyon nga giaghat sa Espiritu nga himoon nila. Kon angay, pwede nimong hangyoon ang andam nga mga estudyante nga ipakigbahin ang ilang gisulat.

• Paghimo og usa ka butang. Gamit ang ilang nakat-onan sa pakigpulong, pwede nimong hatagan og panahon ang mga estudyante sa paghimo og litrato, drowing, poster, meme, post sa social media, o uban pang parehas niini. Magsilbi kining usa ka pahinumdom o usa ka butang nga makapadasig sa uban. Pwedeng ipakigbahin sa mga estudyante ngadto sa grupo o diha sa klase ang ilang gihimo.

• Ipakigbahin sa uban. Pwede nimong awhagon ang mga estudyante nga mopakigbahin og mensahe gikan sa pakigpulong ngadto sa ilang pamilya, mga higala, o sa social media (pananglitan usa ka post, bidyo, o meme). Samtang sila mopakigbahin, pwedeng ilakip sa mga estudyante ang usa ka yano nga pagpamatuod ug usa ka pagdapit nga mokat-on og dugang.

Gamita ang unsay imong nakat-onan

Ang katuyoan niini nga seksiyon mao ang paghatag og higayon sa mga estudyante nga gamiton ang ilang nakat-onan ug gibati gikan sa pagtuon sa pakigpulong. Pwede nimong gamiton ang usa o daghan sa mosunod nga mga ideya o uban pang ideya nga mohaom sa mga panginahanglan sa imong mga estudyante. Alang sa dugang nga mga ideya, tan-awa sa “Awhaga ang mga tigkat-on sa pagpakigbahin sa mga kamatuoran nga ilang nakat-onan” diha sa Pagpalambo sa mga Kahanas sa Magtutudlo: Pagdapit og Makugihon nga Pagkat-on sa ChurchofJesusChrist.org.

• Sunda ang mga pag-aghat. Awhaga ang mga estudyante sa pagsunod sa mga pag-aghat nga ilang nabatonan samtang nagtuon sa pagkigpulong. Mibati tingali sila nga kinahanglang mohimo og kausaban sa ilang kinabuhi, aron makab-ot ang usa sa ilang personal nga mga tumong, o aron mapakigbahin ang mensahe ngadto sa laing tawo.

• Paghimo og plano. Pwedeng kompletohon sa mga estudyante ang mosunod nga pag-aghat aron tabangan sila nga magamit ang unsay ilang nakat-onan. Ang ubang mga estudyante gusto tingali nga ipakigbahin ang ilang plano ngadto sa sakop sa ilang pamilya o higala aron motabang nila nga matuman kini.

• Tungod niini nga pakigpulong, akong .

• Ang sunod nga lakang nga akong himoon aron makompleto ang akong plano mao ang .

• Paningkamotan nako nga buhaton kini sa (petsa).

• Akong pahinumdoman ang akong kaugalingon sa akong plano pinaagi sa .