Lesona 184: Soifua Maloloina Faaletino ma Faalelagona

Tausiaina o o Tatou Tino Faaletino

Mataituina o Tulafono o le Soifua Maloloina Faaletino

O o tatou tino faaletino o se meaalofa ofoofogia mai se Tama Faalelagi alofa. Tatou te faamamaluina lenei meaalofa e ala i le faia o filifiliga poto i le tausiga o o tatou tino. O lenei lesona e mafai ona fesoasoani i tagata aoga e faaali atu ai le lotofaafetai i le Tama Faalelagi ma Iesu Keriso e ala i le tausia o o latou tino faaletino.

Gaoioiga E Ono Mafai Ona Aoao Ai

O o tatou tino faaletino

Manatua: A o aoao atu lenei lesona, e taua le manatua o lenei mataupu e mafai ona faigata mo nisi tagata aoga. O le tausiga o o latou tino faaletino e faapitoa lava le faigata mo i latou e i ai faaletonu o le aai, aafiaga tumau i le soifua, gasegase ogaoga, ma isi tulaga.

Fesoasoani i tagata aoga e sauni e suesue lenei lesona e ala i le valaaulia o i latou e faasoa mai ni omiga e lagonaina e tagata ma uiga faaalia o tagata e uiga i o latou foliga vaaia faaletino. O se tasi o auala e faia ai lenei mea o le tusi lea o upu tino faaletino i luga o le laupapa ma valaaulia tagata aoga e faasoa mai o latou manatu e uiga i fesili nei:

• O a nisi o omiga eseese atonu e lagona e tagata e uiga i o latou tino?

• O a nisi o uiga eseese o loo i ai i tagata e uiga i o latou tino?

  Valaaulia tagata a’oga e tali fesili nei i a latou api faamaumau mo su’esu’ega:

• O le a sou lagona e uiga i lou tino? Aisea?

• O le a le lelei o lou lagona i le tausia o lou tino? Aisea?

A o e suesue i lenei lesona, saili musumusuga mai le Agaga Paia ia iloa ai pe mafai faapefea ona e tausia lou tino faaletino.

Upumoni mai le Alii e uiga i o tatou tino

Faitau le palakalafa muamua o le vaega “E Paia Lou Tino” i le Mo le Malosi o le Autalavou: O Se Taiala mo le Faia o Filifiliga ([2022], 23).

• O le a se mea na taua ia te oe?

  A o tali mai tagata aoga, tusi upumoni ua latou taua i luga o le laupapa. Mafaufau e fai atu i tagata aoga e faamatala mai pe aisea latou te manatu ai e taua le upumoni i talavou i aso nei.

  Afai e le ta’ua maia e tagata aoga, faaopoopo le upumoni lenei i le lisi i luga o le laupapa: O lou tino o se meaalofa ofoofogia mai le Tama Faalelagi.

• E mafai faapefea e le iloaina o o tatou tino o ni meaalofa mai le Atua ona aafia ai o tatou uiga faaalia e uiga i ai?

• E mafai faapefea e le iloaina o lenei upumoni ona aafia ai le ala tatou te tausia ai o tatou tino?

Ina ia fesoasoani i tagata aoga ia malamalama i lenei mataupu faavae ma le auala e tausia ai le meaalofa o o tatou tino faaletino, e mafai ona e tuueseeseina le pepa e tufa atu “Tausiga o o tatou Tino Faaletino” i ni nofoaga se fa e aoao ai. E mafai ona e faatulagaina le vasega i ni vaega toalaiti e faataamilo i gaoioiga taitasi e aoao ai. E mafai ona e tuuina atu se fasipepa o loo totoe i nofoaga taitasi mo tagata aoga e faamaea ai le vaega tusitusi i le faaiuga o vaega taitasi. Ona mafai lea e tagata aoga ona faitau mea na tusia e isi vaega ma faaopoopo i ai

Tausiaina o o Tatou Tino Faaletino

Ata o o Tatou Tino

• E mafai faapefea e manatu o isi ona aafia ai o tatou lagona e uiga i o tatou tino?

• E faapefea e upumoni e finagalo le Alii tatou te iloa i le Kenese 1:26–27 ma le 1 Korinito 6:19–20 ona ese mai feau atonu tatou te maua mai i isi?

Suesue le fautuaga lenei na tuuina mai e le Alii e ala mai ia Peresitene Russell M. Nelson ma Elder Jeffrey R. Holland o le Korama a Aposetolo e Toasefululua ma vaavaai mo mea e mafai ona fesoasoani i ata o tatou tino:

O taimi taitasi e te autilo ai i le faaata, vaai i lou tino o lou malumalu. O lena upumoni—e faafouina ma le agaga faafetai i aso taitasi—e mafai ona faatosina ai mo le lelei au filifiliga e uiga i le auala o le a e tausia ai lou tino ma le auala o le a e faaaogaina ai. Ma o na filifiliga o le a fuafua ai lou taunuuga. (Russell M. Nelson, “O Filifiliga mo le Faavavau,” LiahonaNov. 2013, 107)

Ou te aioi atu ia te outou … ina ia faamolemole ia taliaina atili outou lava, e aofia ai foliga vaaia ma le sitaili o lou tino, ma sina faananau laitiiti e foliga e pei o se isi tagata. E eseese uma i tatou. O nisi e uumi, ae o nisi e pupuu. O nisi e lapotopoto, ma o nisi e paeee. Ma e toetoe lava o tagata uma i nisi taimi po o isi e mananao e avea ma se mea e le o i latou! Ae i le avea ai ma se tasi o faufautua i teineiti talavou na fai mai: “E le mafai ona e ola i lou olaga ma le popole o loo sioa atu le lalolagi ia te oe. Pe a e faatagaina manatu o tagata e te mafaufau ai ia te oe lava, ua e lafoai ese ai lou mana. … O le ki i le lagonaina o le [mautinoa] o le faalogo lea i taimi uma i lou tagata i totonu—[o oe moni lava.]” Ma i le malo o le Atua, o le mea moni e “sili atu lo outou taua nai lo penina” [Faataoto 3:15]. (Jeffrey R. Holland, “Mo Tamaitai Talavou,” Liahona, Nov. 2005, 29)

• O a ni mea na e aoaoina mai i nei faamatalaga?

Tusi i lalo se mea e te manatu e finagalo le Alii e te fai atu ai i se tasi o loo tauivi ia lelei lagona e uiga i o latou tino.

Moe

Faitau le Mataupu Faavae ma Feagaiga 88:124, ma vaavaai mo mea na aoao e le Alii e faatatau i le moe.

• Aisea e te manatu e taua ai le moe?

O le le lava o le moe e mafai ona avea ma se faafitauli ogaoga o le soifua maloloina. O le toatele o tagata atamamai faapitoa e fautuaina le autalavou ia maua le va o le 8-10 itula e momoe ai i le po (tagai i le National Sleep Foundation, “O le a le Umi o le Moe e te Manaomia?,” Oke. 1, 2020, thensf.org). O le le lava o le moe e mafai ona oo ai i se tagata le lelava, le lelei le galue, ma lamatia ai i faafitauli o le soifua maloloina i le tino ma le mafaufau. O le lagonaina o le lelava e mafai ai ona tatou lolo atili ai i faaosoosoga.

• Ua faapefea ona aafia lou olaga ona o le auala e te moe ai?

• E mafai faapefea e mausa o le moe maloloina ona faaleleia lo tatou tomai e auauna atu ai i le Alii?

Talanoa ma lau vaega fautuaga o le a e tuuina atu i se tasi e manao e faaleleia atili auala e momoe ai pe o ai foi e te fautuaina e latou te o i ai mo se fautuaga. Tusi ou manatu i luga o le pepa ua saunia.

Faamalositino ma se Olaga Gaioi

O le paie e faasino i le faama’umauina o o tatou taimi, faapaie, po o le aloese mai le galue. Faitau se tasi pe lua o fuaiupu nei, ma vaavaai mo lagona o le Alii e uiga i ana fanau ua paie: Mataupu Faavae ma Feagaiga 42:42; 60:13; 75:3.

• Aisea e te manatu ai e finagalo le Alii ia tatou mataalia ma galulue malosi nai lo le paie?

• Na faapefea ona faamanuiaina oe e le Alii a o e taumafai e ola gaioi ma galue malosi?

• E mafai faapefea e le faamalositino ma se olaga gaioi ona faaleleia lo tatou soifua maloloina o le mafaufau? E mafai faapefea e lenei mea ona fesoasoani ia i tatou e auauna atu ai i le Alii?

Tusi i lalo lau fautuaga mo se talavou e manao e faaleleia le tulaga o a latou faamalsoitino ma gaoioiga.

Tausami i Meaai Maloloina

Faitau fuaiupu nei, vaavaai mo le fautuaga a le Faaola e faatatau i filifiliga o meaai maloloina: Mataupu Faavae ma Feagaiga 59:16–20; 89:10–16.

• O le a le aafiaga o a tatou filifiliga i meaai i o tatou olaga?

Talanoa i nisi o faafitauli i le taumafaina o meaai maloloina. Faasoa atu nisi o auala e mafai ona tatou sailia ai le fesoasoani a le Alii ma faatoilalo ai nei faafitauli.

• O a ni manuia mo se taimi umi e mafai ona i ai i le mulimuli i le fautuaga a le Faaola e uiga i le tausami lelei ao e talavou?

I le avea ai o se vaega, tusi ni lisi se tolu ua faaautuina “Aloese,” “I Nisi Taimi,” ma le “Maloloina.” Galulue faatasi, filifili ni meaai masani e te vaaia i aso uma. Talanoa pe o le fea vaega e ono talafeagai mo lena meaai.

A maea ia faataamiloga, valaaulia tagata aoga e faasoa mai mea sa latou aoaoina ma soo se popolega atonu o ia i latou. E ono aoga fesili nei:

• Aisea e mafai ai ona avea ma luitau le atiina ae o aga masani maloloina ma le tausia lelei o tatou tino?

• O le a sou manatu e mafai faapefea ona fesoasoani le manatuaina o o tatou tino o ni meaalofa mai le Atua?

• Na faapefea ona fesoasoani le Alii ia te oe po o se tasi e te iloa e atiina ae ni aga masani maloloina?

Valaaulia le vasega e faasoa mai ni mea moni po o aafiaga e mafai ona fesoasoani i luitau po o atugaluga o loo ta’ua e tagata aoga.

Ina ia faaiu, valaaulia tagata aoga e tusi ia latou api talaaga mo suesuega mea latou te lagona e finagalo le Alii latou te faia e tausia lelei atili ai o latou tino

Punaoa Faaopoopo

O le a le faamoemoega na tuuina mai ai ia i tatou tino faaletino?

Na aoao mai Peresitene Russell M. Nelson, o se fomai tipitipi muamua o le fatu:

O le umi ou te ola ai, o le tele foi lea o loʻu iloa. O lena malamalama e fesoasoani ia te au ou te malamalama ai o le meaalofa oo tatou tino faaletino o se vavega maoae. O se tino tulaga ese ua tuuina mai ia i tatou taitoatasi e lo tatou Tama Faalelagi alofa. Na Ia faia e avea o se fale fetafai mo o tatou agaga, e fesoasoani ia i tatou taitoatasi i la tatou sailiga e faataunuu le atoaga o lo tatou foafoaga. O o tatou tino e mafai ai e i tatou taitoatasi ona iloa le fuafuaga sili o le faaolataga lea na Ia fuafuaina mo Ana fanau faapelepele uma. E finagalo o Ia ina ia tatou avea atili e faapei o Ia ma toe foi atu e mau faatasi ma Ia. O lena faamanuiaga sili o le a le mafai ona faia e aunoa ma le mauaina muamua o se tino faaletino i lenei olaga faataitai. (Russell M. Nelson, “O Lou Tino: O se Meaalofa Ofoofogia e Faatauaina,” New Era, Aok. 2019, 2)

Na faamalamalama mai e Elder D. Todd Christofferson o le Korama a Aposetolo e Toasefululua:

Reflections on a Consecrated Life

O se olaga ua faapaiaina e faaaloalo i le meaalofa e lē mafaatusalia o le tino faaletino o se tagata, o se foafoaga paia i le faatusa lava o le Atua. O se faamoemoega autu o le olaga faaletino, ia maua e agaga taitasi lea tino ma aoao ai e faaaoga le filifiliga faitalia i se fale fetafai o le tino. … I lenei lalolagi agasala, o nisi o le a itiiti sina taimi e tiga ai i le olaga; o nisi tino o le a lē atoatoa, gauia, pe itiiti se avanoa e ola ai; ae o le a lava le umi o le olaga mo agaga taitasi, ma o le a agavaa tino taitasi mo le toetutu. (D. Todd Christofferson, “Toe Manatunatuga i se Olaga Faapaiaina,” Liahona, Nov. 2010, 17)

Pe o i ai se sootaga i le va o le soifua maloloina faaletino ma isi vaega o lo’u olaga?

Na faamalamalama mai e Elder Adrián Ochoa o le Au Fitugafulu:

E mafai ona faigata le olaga, ma o nisi taimi atonu e i ai ni o tatou lagona o le popole, atuatuvale, po o le leai o se manatu ia oe lava. Ae ia manatua mo le soifua maloloina faaletino ma faalelagona, o le faamalositino ma le galue malosi e fesoasoani e faatumauina ai se vaaiga lelei. O le tausia lelei o lou tino e faamanuiaina ai foi lou mafaufau ma fesoasoani ai ia te oe ia manatua o oe o se alo o le Atua ma e mafai ona to’a ma fiafia. O o tatou itu faalemafauffau, faaletino, ma faaleagaga e fesootai uma faatasi. (Adrián Ochoa, “Ia Malosi, Ia Ola Maloloina, Ia Poto,” New Era, Oke. 2013, 42)

Na saunoa Gérald Caussé epikopo Gérald Caussé le Au Epikopo Pulefaamalumalu:

O aga masani ua e faavaeina nei e faatatau i lou soifua manuia faaletagata lava ia o le a aafia ai oe i le faaletino ma le faaleagaga mo aso uma o totoe o lou olaga. O lau taulaiga e le tatau ona i ai i le mulimuli i faiga le aoga a le lalolagi. E le na o se fesili o le leiloa o se lapoa iinei po o iina po o le mamafa o le aveesea o se isi pauna faaopoopo e luasefulu e foliga mai o se tagata malosi e pei o lau uo e te lua potu faatasi! O le sini o le maua lea o se lagona lelei atu ma ia maua ai se paleni o le faaletino ma faaleagaga. O lenei mea o le a tuuina atu ai ia te oe le avanoa sili e maua ai le soifua maloloina lelei, lea o le a aumaia ia te oe le olioli ma le talitonuga i ou tomai faaletino ma se iloa lelei o mea e te gafatia e faavavau. (Gérald Caussé, “Harmony of Body and Spirit: A Key to Happiness” [Brigham Young University devotional, Oke. 13, 2020], 5, speeches.byu.edu)

Gaoioiga Faaopoopo e Aoao Ai

O ai i tatou ma o le a lo tatou taunuuga?

Ina ia fesoasoani i tagata aoga ia malamalama pe mafai faapefea e le vaaiga e faavavau o lo latou faasinomaga paia ona fesoasoani ia i latou i o latou ata o le tino e mafai ona e faaalia ai le vitio “Our True Identity” (3:39). Ua faasoa mai e Elder Dieter F. Uchtdorf o le Korama a Aposetolo e Toasefululua le tala i le tamai pato auleaga e fesoasoani tatou te malamalama ai po o ai moni lava i tatou, aemaise lava i lo tatou Tama Faalelagi. (O lenei vitio o loo aofia ai foi i le lesona ua faaulutalaina “Divine Identity and Purpose.”)

O Lo Tatou Faasinomaga Moni

Tumamā patino

Atonu e aoga le talanoaina o le tumama faaletagata lava ia ma lau vasega, ia manatua e le o vaega uma o le lalolagi e tutusa o latou tulaga masani po o le mauaina o oloa o le tumama. Afai e te filifilia lenei gaoioiga, e mafai ona e valaaulia tagata aoga e faitau le Mataupu Faavae ma Feagaiga 42:41, ma vaavaai mo afioga a le Alii e uiga i le mama. O se tasi o auala e mafai ona tatou tausia ai le meaalofa ofoofogia o o tatou tino o le faatinoina lea o le tumama lelei faaletagata lava ia.

I se fua o le 1 (e seasea) i le 5 (e masani) ona valaaulia ai tagata aoga e mafaufau loloto lemu pe o le a le lelei o lo latou tausia o lo latou lava tumama faaletagata lava ia. E ono mafai ona aofia ai mea nei:

• Fufulu ou lima i se fasimoli ma le vai i taimi uma.

• Folosi ma fufulu ou nifo i aso uma.

• Taele ma tofu lou ulu i aso uma.

• Tata ou lavalava e le aunoa.

Valaaulia tagata aoga e vaai faalemafaufau faapea sa talosagaina i latou e faatulaga se tulaga o le tumama faaletagata lava ia po o se folasaga mo se gaoioiga a le Ekalesia. Valaaulia i latou e talanoaina faamanuiaga o le tumama faaletagata lava ia ma pe mafai faapefea ona fesoasoani ia i tatou e faaali atu ai le lotofaafetai i le Tama Faalelagi.