Lesona 188: Soifua Maloloina Faaletino ma Faalelagona

Feagai ai ma le Faanoanoa ma le Atuatuvale

E Mafai e le Tama Faalelagi ma Lona Alo, o Iesu Keriso, ona Fesoasoani ia i Tatou e Faatoilalo Luitau Faalelagona o le Olaga

Na folafola mai e le Faaola e mafai ona tatou maua ia te Ia se atoatoaga o le olioli (tagai i le Mataupu Faavae ma Feagaiga 101:36). Peitai, o taimi o le faanoanoa ma le lotovaivai o se vaega masani o lo tatou olaga faaletino. O nisi taimi atonu tatou te oo ai i ni lagona sili atu ona ogaoga o le leai o se faamoemoe ma le atuatuvale. Na saunia e le Tama Faalelagi ma Iesu Keriso ia punaoa e fesoasoani ia i tatou e agai ai i luma i le faatuatua i taimi o faigata i agona. O lenei lesona e mafai ona fesoasoani i tagata aoga ia malamalama i auala e mafai ona latou maua ai le fesoasoani i lagona o le faanoanoa ma le atuatuvale.

Gaoioiga E Ono Mafai Ona Aoao Ai

O lagona e pei o galu o le sami

Manatua: Atonu e fesoasoani le iloa e le manaomia ona avea oe ma se tagata e iai tomai faapitoa i lenei mataupu e aoao atu ai lenei lesona. Tatalo mo le taitaiga a le Agaga Paia, mulimuli i anomea, ma talitonu i au tagata aoga. Afai e fai mai e tagata aoga ni fesili e te le iloa pe faapefea ona talanoaina pe faasoa mai ni tauiviga patino latou te feagai, valaaulia i latou ia saili le fesoasoani mai le Alii, o latou matua, taitai o le Ekalesia, ma tagata e iai tomai faapitoa o le soifua maloloina o le mafaufau.

Ina ia amata, faaali atu se ata po o se vitio o galu o le sami. Faasoa atu pe aotele le parakalafa lenei.

Vaai faalemafaufau i le tu ai i luga o le matafaga ma matamata i galu o le sami. O galu e pei lava o o tatou lagona. O nisi o galu e taia lemu i ou vae a o e tu pe asa atu i le vai. I nisi taimi atonu e te oo atu i le loloto o le vai, ma e ono taia malosi oe e galu pe faafuasei foi, ma mafua ai ona le paleni [lau tu]. O nisi taimi o galu tetele e mafai ona taia malosi ai oe ma atonu e uma atu lesi ae taia i lesi. Atonu e te tauivi ia maua se mea e te tu lelei ai ma e mafai foi ona [e] tau mole i le vai pe tauivi foi e manava.

Faaalu sina taimi e mafaufau loloto ai pe faapefea ona faatatau lenei upu valiata i tauiviga faalelagona e pei o le faanoanoa, lotovaivai, ma le atuatuvale.

Ina ia fesoasoani i tagata aoga e iloilo lo latou malamalama i lenei mataupu, e mafai ona e tuuina atu nisi o faamatalaga nei mo tagata aoga e mafaufau i ai.

Tatalo ma manatunatu i faamatalaga nei. Tusi i lau api talaaga pe o le a le tele o le faatatau o faamatalaga taitasi ia te oe (e faaaoga ai tali “ioe,” “tele lava,” “e pei lava,” ma le “e leai lava”).

• Ou te iloa le eseesega i le va o le faanoanoa, lotovaivai, ma le atuatuvale.

• Ou te iloa faailoga o le atuatuvale.

• Ou te iloa le mea e maua ai le fesoasoani pe a ou lagona le faanoanoa.

• Ou te iloa le auala e mafai ai e le Tama Faalelagi ma Iesu Keriso ona fesoasoani ia te au pe a ou faanoanoa pe atuatuvale.

Faanoanoa ma le atuatuvale

Fesoasoani i tagata aoga ia malamalama o le faanoanoa ma le lotovaivai e faigata ae taua i lo tatou tuputupu ae. E pei lava o ni galu laiti, o tali masani i luitau ma faanoanoaga o le olaga. Faamalamalama atu o le atuatuvale e sili atu nai lo na o le faanoanoa. O le atuatuvale e aafia ai e le aunoa ma le lelei ai le ala e mafaufau, lagona, ma faatino ai se tagata (e pei o ni galu tetele atu). O auga o le atuatuvale e aofia ai le faanoanoa faifai pea, lagona ua leai se faamoemoe, lagona o le le amanaiaina, leai o se malosi, leai o se fiafia i gaoioiga sa fiafia muamua ai, lagonaina o se avega mamafa ia i latou o siomia oe, ma mafaufauga o le oti ma le pule i le ola. Ma le isi, pe a faanoanoa nisi atonu latou te lagona le faalavelaveina i lo latou tomai e iloa ai le Agaga. (Tagai i le “Malamalama i le Faanoanoa ma le Atuatuvale,” i le Mauaina o le Malosi i le Alii: Faafoisia Faalelagona [2021], 75.)

Mafaufau i lou lava olaga, mafaufau loloto po o a ituaiga o galu e mafai ona faamatalaina ai lou tulaga tau i lagona o i ai nei.

A o e suesue i le asō, saili ma le agaga tatalo uunaiga a le Agaga e fesoasoani ia te oe ma i latou e te iloa o loo feagai ma le faanoanoa ma le atuatuvale.

O leIsaia 61:1–3 o loo faamatala mai ai le tele o auala e mafai ona fesoasoani ai le Faaola ia i tatou. Faitau fuaiupu nei, ma vaavaai mo fasifuaitau e te manatu e mafai ona faaaoga e fesoasoani ai i se tasi o faanoanoa pe atuatuvale. O le upu “o a’u” i nei fuaiupu e faasino ia Iesu Keriso, le Mesia.

• O a ni upu po o ni fasifuaitau na aoga ia te oe? O le a se mea na e iloa e mafai ona fesoasoani i se tasi o tauivi ma le faanoanoa po o le atuatuvale?

Atonu e ta’ua e le vasega le tomai o le Faaola e fesoasoani ai, faamafanafana, ma siitia loto o i latou ua nutimomoia, i latou o e ua pueina, i latou o faavauvau, ma i latou o e lagonaina se agaga o le mamafatu.

A uma ona tuu atu i tagata aoga se avanoa e faasoa mai ai, faaali atu le saunoaga lenei a Sister Reyna I. Aburto. O lana saunoaga e mafai ona fesoasoani i tagata aoga e iloa ai mea e mafai ona latou faia e saili ai le toomaga.

Na aoao mai Sister Reyna I. Aburto, sa Fesoasoani Lua i le Au Peresitene Aoao o le Aualofa:

I Mala i Manū, Iesu, Afio Mai!

Ua molimau mai Sister Aburto e mafai e le Faaola ona fesoasoani i fanau uma a le Atua ia onosai i gasegase faalemafaufau ma faaletino.

E pei o soo se vaega o le tino, e aafia foi le faiai i faama’i, mafatiaga ma vailaau eseese. Pe a mafatia o tatou mafaufau, e tatau ona tatou saili atu i le fesoasoani mai le Atua, mai ia i latou o loo siomia i tatou, ma mai tagata tomai faapitoa o le soifua maloloina ma fomai faalemafaufau. …

… O se mea masani le lagona o le faanoanoa po o le popole mo sina taimi. O le faanoanoa ma le atuatuvale o lagona masani ia o le tagata soifua. Peitai, afai tatou te faanoanoa pea ma afai e poloka e o tatou tiga lo tatou tomai e lagona ai le alofa o lo tatou Tama Faalelagi ma Lona Alo ma le faatosinaga a le Agaga Paia, atonu la o loo tatou mafatia mai le atuatuvale, popole, po o isi tulaga faalelagona. (Reyna I. Aburto, “I Mala i Manū, Alii e, Tumau Mai!,” Liahona, Nov. 2019, 57)

• O a ni upumoni e mafai ona tatou aoaoina mai i le savali a Aburto?

Fesoasoani i tagata aoga ia malamalama i le upumoni e faapea a mafatia o tatou mafaufau, e tatau ona tatou sailia le fesoasoani mai le Atua, mai ia i latou o siomia i tatou, ma fomai ma tagata tomai faapitoa o le soifua maloloina tau le mafaufau.

Saili le fesoasoani mai le Atua, isi, ma tagata tomai faapitoa

Ina ia fesoasoani i tagata aoga ia malamalama atili i lenei mataupu faavae, valaaulia i latou e gagau se pepa i ni vaega se tolu e fai ai se tamaitusi. I le tamaitusi, e mafai ona latou faamauina mea ua latou aoaoina e uiga i le sailia o le fesoasoani mo le faanoanoa po o le atuatuvale. E mafai ona fesoasoani lenei mea i le taimi nei po o le lumanai mo i latou po o se tasi latou te alolofa i ai. E mafai e tagata aoga ona faaigoa vaega e tolu “Saili le fesoasoani mai le Atua,” “Saili le fesoasoani mai isi,” ma le “Saili le fesoasoani mai tagata e iai tomai faapitoa.” Ona tuuina atu lea o le pepa e tufa atu ua faaulutalaina “Sailia o le Fesoasoani.” E mafai e tatagata aoga ona galulue taitoatasi pe i ni vaega toalaiti ma tusi a latou tali i fesili e tufa atu i luga o a latou tamaitusi.

Sailia o le Fesoasoani

Saili fesoasoani mai le Atua

Ua folafola mai e le Tama Faalelagi le fesoasoani faalelagi ina ia mafai ai ona tatou onosaia luitau uma faaletino. Ua Ia folafola mai le tele o auala o le a oo mai ai Lana fesoasoani. Afai tatou te le vaai i Lana fesoasoani i se tasi auala, e taua i taimi uma le aua le fiu. Saili pea. O loo i ai o Ia iina.

• O le a se mea ua e iloa e uiga i le Tama Faalelagi ma Iesu Keriso lea e tuuina atu ia te oe le talitonuga e mafai ona La fesoasoani i le faanoanoa ma atuatuvale?

Faitau le Iakopo 2:8; Alema 26:27–28; Mataupu Faavae ma Feagaiga 6:36; 136:29. Vaavaai mo ni auala e mafai ona tatou sailia ai le fesoasoani a le Alii pe a tatou faanoanoa pe atuatuvale.

• O a mea o aoao mai e nei fuaiupu ia i tatou e fai pe a tatou faanoanoa pe atuatuvale?

• O a nisi o auala e mafai ona tatou sailia ai le fesoasoani mai le Tama Faalelagi ma Iesu Keriso?

Afai e le patino tele, faasoa atu se aafiaga na e maua i le sailia o le fesoasoani mai le Tama Faalelagi ma Iesu Keriso.

---

Saili le fesoasoani mai i isi

Na aoao mai Peresitene Spencer W. Kimball:

E amanaia i tatou e le Atua, ma na te leoleo ia te i tatou. Ae e masani lava ona auala mai i se isi tagata lona taulimaina o o tatou manaoga. (Aoaoga a Peresitene o le Ekalesia: Spencer W. Kimball [2006], 82)

A tatou lagona le faanoanoa po o le atuatuvale, atonu tatou te lagona le faaosoosoina e o ese pe faaesea i tatou lava mai isi. O le faia o lenei mea e ono faatapulaaina ai lo tatou tomai e vaai ai i le fesoasoani o loo auina mai e le Tama Faalelagi ia i tatou. O le aapa atu i isi e mafai ona aofia ai le talanoa i matua, tagata faatuatuaina o le aiga, po o taitai o le Ekalesia.

Lisi ni mea se lua pe tolu e mafai e se tasi o loo tauivi ona fai e aapa atu ai i isi pe tuu atu foi i isi e fesoasoani ia i latou.

Afai e le patino tele, faasoa atu se taimi na fesoasoani ai se tagata o le aiga po o se uo ia te oe i taimi o le faanoanoa po o le atuatuvale.

---

Saili le fesoasoani mai tagata e iai tomai faapitoa

O se tasi o punavai taua o le fesoasoani e mafai ona tatou sailia o le atamai lea o fomai faatuatuaina ma fomai o le soifua maloloina o le mafaufau. Mafaufau i le faatusatusaga muamua o le faanoanoa ma le atuatuvale i galu o le sami. Pe a tatou faanoanoa (taulimaina o galu laiti), e tatau ona tatou mulimuli i le taitaiga a le Agaga Paia ia iloa ai le taimi e saili ai se fesoasoani faapolofesa. Ae peitai, afai tatou te lagona le faanoanoa po o le fia pule i le ola (feagai ma galu tetele), o le sailia o le fesoasoani faapolofesa e taua tele.

Faitau le saunoaga lenei a Elder Jeffrey R. Holland o le Korama a Aposetolo e Toasefululua, ma vaavaai mo mea ua saunia e le Tama Faalelagi e fesoasoani ai ia i tatou pe a tatou tauivi:

Saili se fautuaga a ni tagata tomai o i ai ni aoaoga faamaoniaina, tomai faapolofesa, ma tulaga lelei. Ia faamaoni ia i latou e uiga i lou talafaasolopito ma ou luitau. Mafaufau ma le agaga tatalo ma le manatu tonu i fautuaga latou te tuu atu ma fofo latou te fautuaina. Afai e afaina lou pitogaau, o le a faamoemoe le Atua e te saili atu i se faamanuiaga faaleperisitua ma saili ia maua se togafitiga sili faafomai. E faapena foi i faaletonu i lagona. Ua faamoemoe mai lo tatou Tama o i le Lago ia tatou faaaoga ia meaalofa ofoofogia uma ua Ia saunia i lenei tisipenisione mamalu. (Jeffrey R. Holland, “Peiseai o se Vaa ua Malepe,” Liahona, Nov. 2013, 41)

I lau tamaitusi, tusi i lalo se vaega o le saunoaga a Elder Holland sa taua ia te oe.

• Aisea e te manatu ai e taua mo se tasi ona sailia se fesoasoani faapolofesa mo le atuatuvale?

Fesoasoani i tagata aoga e faailoa mai po o fea o le a latou liliu i ai e saili ai se fesoasoani faapolofesa. O manatu e mafai ona faigofie e pei o le talanoa atu i se faufautua o le aoga, matua, po o se taitai faatuatuaina o le Ekalesia e fesoasoani ia i latou ia maua se polofesa talafeagai. E mafai ona e valaaulia tagata aoga e faailoa mai le laina fesoasoani po o le upega tafailagi o le puipuiga o le pule i le ola mo la outou eria ( suicide.ChurchofJesusChrist.org mo laina fesoasoani ma punaoa). E mafai ona latou tusia nei punaoa i a latou tamaitusi. E mafai e tagata aoga ona faailoga le itulau o le puipuiga o le pule i le ola mai le upega tafailagi a le Ekalesia i luga o se masini eletonika.

O punaoa mo le talanoa e uiga i le pule i le ola e mafai ona maua i le suicide.ChurchofJesusChrist.org ma i le “Gaoioiga Faaopoopo e Aoao Ai” i le lesona lenei.

O nisi o loo tauivi ma le atuatuvale atonu latou te lagonaina le tele naua o se avega mamafa i isi ma e oo lava i le Alii. Fesoasoani i tagata aoga ia manatua le alofa atoatoa, onosai, ma le mana o le Alii i o latou olaga ma e finagalo o Ia e fesoasoani ia i tatou e tauave a tatou avega. E mafai ona e faamanatu atu ma le alofa i tagata aoga o loo i ai lava le faamoemoe mo soo se tasi o feagai ma le atuatuvale po o mafaufauga o le pule i le ola.

Toe iloilo mea ua e aoaoina

Valaaulia tagata aoga e talanoaina pe aisea e taua uma ai le sailia o le fesoasoani mai le Atua, isi, ma tagata tomai faapitoa pe a feagai ma le faanoanoa ma le atuatuvale. E mafai e ni nai tagata aoga ona faasoa mai mea na latou aoaoina ma lagonaina i le aso, pe afai e le patino tele.

Valaaulia tagata aoga e saili le taitaiga a le Agaga Paia a o latou faamaeaina mea nei.

Tusi mea nei i lau api talaaga mo suesuega po o luga o lau tamaitusi:

• O le a se mea o le a e faia e saili ai le fesoasoani a le Alii pe afai o e lagona le faanoanoa po o le atuatuvale (e mafai ona aofia ai mau o le a e faitauina po o musika paia e aumaia ia te oe le faamoemoe)

• O le a se mea o le a e faia e aapa atu ai i isi pe a e lagona le faanoanoa po o le atuatuvale

• O le a se mea e mafai ona e faia e fesoasoani ai i se tasi e lagona le faanoanoa po o le atuatuvale

• O le a sau tala e fai atu i se tasi o loo tauivi ma taumanatunatu pe tatau ona ia sailia se fesoasoani o le soifua maloloina o le mafaufau

Mafaufau e faamanatu i tagata aoga e mafai e le Tama Faalelagi ma Iesu Keriso ona “soloiesea loimata uma mai [o tatou] mata” (Faaaliga 21:4) ma “s’io [i tatou] i aao o [Lona] alofa” (Mataupu Faavae ma Feagaiga 6:20).

Punaoa Faaopoopo

Pe talafeagai le faanoanoa pe a uma le maliu o se tasi e pele?

Na faamantu mai e Peresitene Russell M. Nelson tatou:

Doors of Death

Elder Russell M. Nelson delivers a message titled "Doors of Death."

Po o le a lava le matua, tatou te faavauvau mo a tatou pele ua maliliu. O le faavauvau o se tasi o faailoaga loloto o le alofa mama. I se tali masani e ogatusa atoatoa ma le poloaiga faalelagi: “Ia outou nonofo faatasi i le alofa, ia outou fetagisi ai i le toesea o i latou o e e oti.” (MF&F 42:45.)

I le faaopopo atu, e le mafai ona tatou talisapaia atoatoa faatasiga fiafia mulimuli ane e aunoa ma le tuueseesea ma loimata i le taimi nei. E na o le pau le auala e aveese ai le faanoanoa mai le oti, o le aveesea lea o le alofa mai le ola. (Russell M. Nelson, “Faitotoa o le Oti,” Ensign, Me 1992, 72)

O a ni mea na aoao atu e perofeta ma aposetolo i le autalavou o e atonu o tauivi ma mafaufauga e pule i le ola?

Na faamatala mai e Elder Jeffrey R. Holland:

Aua E Te Fefe: Tau Ina E Faatuatua!

Ua aoao mai Elder Holland e faapea, e mafai ona tatou maua le faamoemoe i taimi faigata ona o le talalelei a Iesu Keriso.

I soo se tasi o o tatou talavou iina o tauivi, po o a lava ou popolega po o faigata, o le oti e ala i le pule i le ola ua manino lava e lē o le tali lea. O le a le faamatuuese atu le tiga o loo e lagona atonu o loo e faapogaiina. I se lalolagi ua matua manaomia le malamalama uma e mafai ona ia maua, faamolemole aua ne’i tuuitiitia le malamalama faavavau na tuuina e le Atua i lou agaga a o le’i i ai lenei lalolagi. Talanoa i se tasi. Fesili atu mo se fesoasoani. Ia aua ne’i faatama’iaina se ola lea na tuuina mai e Keriso Lona soifua ina ia faasaoina ai. E mafai ona e onosaia faigata o lenei olaga faitino aua o le a matou fesoasoani ia te oe e onosaia. E te malosi atu nai lo le mea o e manatu ai. O loo maua le fesoasoani, mai i isi aemaise lava mai le Atua. E alofagia ma taua ma manaomia oe. Matou te manaomia oe! “Aua e te fefe: tau ina e faatuatua.” (Jeffrey R. Holland, “Aua le Fefe: Na o le Talitonu!,” Liahona, Me 2022, 36)

O fea e mafai ona ou aoao atili ai e uiga i le fesoasoani atu ia i latou e i ai lu’itau o le soifua maloloina o le mafaufau?

• Ronald A. Rasband, “O Iesu Keriso le Tali” (faasauga ma se Pulega Aoao, 8 Fep. 2019)

• “Soifua Maloloina o le Mafaufau” o le itulau o le “Fesoasoani o le Olaga” i le Potutusi o le Talalelei

• Mauaina o le Malosi i le Alii: Faafoisia Faalelagona (2021)

Gaoioiga Faaopoopo e Aoao Ai

Puipuiga mai le pule i le ola

Fesoasoani i tagata aoga ia malamalama o mafaufauga fia pule i le ola e tatau ona vaai totoa iai. E ui o le pule i le ola o se tulaga faigata ma e leai se mafuaaga e tasi, ae e mafai ona faaitiitia tulaga lamatia pe a o mai faatasi aiga, uo, tagata o le uarota, ma tagata tomai faapitoa o le soifua maloloina i le mafaufau e fesoasoani ia i latou o loo tauivi. E mafai e tagata uma ona faia se latou pitolaau i le puipuiga o le pule i le ola ma e tatau ona aoao i tulaga matautia ma faailoga lapatai.

Mafaufau e faaali le vitio “Renlund: Talking about Suicide” (1:45). Valaaulia tagata aoga e tusi i lalo mea na faasoa mai e Elder Dale G. Renlund o le Korama a Aposetolo e Toasefululua e uiga i le ala e mafai ai ona tatou fesoasoani i se tasi o loo mafaufau e pule i le ola. E mafai foi ona e faaalia le “Puipuiga i le Pule i le Ola: Filifili e Nofo” (3:49) po o le “Puipuiga i le Pule i le Ola: Auala e Fesoasoani Atu Ai” (6:35).

Renlund: Talking about Suicide

Talking about suicide will not make someone more likely to attempt suicide. Elder Dale G. Renlund shares ideas for talking with someone who may be in crisis.

Suicide Prevention: Choose to Stay

A young man who struggled with depression shares a message with others who have thought about suicide: "Please, choose to stay." For suicide prevention resources, click here.

Taofia le Pule i le Ola: Fesoasoani

This video helps parents, leaders, and individuals better understand how to respond to and help someone who is having thoughts of suicide. The video instructs us to ask, care, and tell.

O fesili talanoaina e mafai ona aofia ai mea nei:

• O le a se mea e te manao ia malamalama i ai se tasi mai le savali a Elder Renlund?

• O a nisi o faailoga lapatai e tatau ona tatou vaavaai i ai e fesoasoani ai i se tasi o loo i ai ni mafaufauga fia pule i ola?

Manatu faaopoopo e maua ma faaaoga ai le fesoasoani mai isi

Afai e manaomia e tagata aoga ni manatu faaopoopo i le auala e saili ai le fesoasoani mai isi, e mafai ona e fautuaina atu nisi po o manatu uma nei:

• Talanoa i se matua, tagata matua faatuatuaina, po o se taitai o le Ekalesia.

• Vili pe lafo se feau tusitusi i se uo.

• Fai atu i se tasi e siaki faatasi ma oe pe filifili e siaki ma se tasi i aso taitasi.

• Faatulaga se taimi e fai ai se mea ma uo po o tagata o le aiga.

• Auai i se vaega faaagafesootai e tutusa mea e fiafia i ai po o se vaega lagolago o le soifua maloloina o le mafaufau.

• Faafesootai se tasi na aafia i se aafiaga talitutusa faapena.

• Vaavaai mo ni avanoa e fesoasoani ai i isi.

Fesoasoani faaopoopo

Ina ia fesoasoani i tagata aoga ia iloa le auala e saili ai le fesoasoani ma fesoasoani i isi pe a lagonaina le faanoanoa, atuatuvale, po o le fia pule i le ola, e mafai ona e faaalia le vitio “The Hope of God’s Light” (6:46).

The Hope of God's Light

Many of us have wondered if God knows us or if He even exists. Todd was someone who wasn’t surprised when he didn’t get an immediate answer to a prayer. But could God be giving us small but obvious answers? And how patient do we need to be?

Afai e manaomia e tagata aoga se taitaiga faaopoopo e uiga i le taimi e saili ai se fesoasoani faapolofesa mo le atuatuvale, e mafai ona e faaali atu le vitio “Mental Health: Compassion for Those Who Struggle” (2:26).

Mental Health: Compassion for Those Who Struggle

Elder Holland reminds us that no amount of self will can solve clinical depression. Seeking professional help is key to healing our mental health issues. We also need the support and compassion of others.

O isi punaoa faavitio e mafai ona maua i le vaega o “Soifua Maloloina o le Mafaufau” o le Potutusi o Ala o Faasalalauga a le Ekalesia.